Penyukung Sarawak FA, GB13 nadai kaul: Awang BorneoPost Online | Borneo , Malaysia, Sarawak Daily News » Berita Iban - New 2 Borneo |
- Penyukung Sarawak FA, GB13 nadai kaul: Awang
- Adenan: Pekit main golf deka dipasuk dalam SUKMA Ke-19
- Dennis meransang peranak Long Bemang chakah sereta bedisiplin dalam pengawa
- Penchuri engkechit terejun ari rumah
- India Street deka disikap ngena perabung
- Rayat minta saup perintah mutarka isu tanah NCR
| Penyukung Sarawak FA, GB13 nadai kaul: Awang Posted: 01 Sep 2014 09:46 AM PDT KUCHING: Raban penyukung Sarawak FA, GB13 kemari kering penemu madah, kaban sida nadai ngaga penyarut di Stadium Negeri pengudah pekit mangkuk Malaysia ke alai Sarawak seri 1:1 ngelaban Perak kena malam hari Enam tu tadi. Nitih penerang ari pengari penyukung GB13 nya, Awang Khairul Adzhar madah, lebuh chapuh nyadi, sida semua agi duduk ba teres stadium nya. "Kami agi majak belagu taja pan pemutus nya seri tang bungai api meruan dipasang ba tiap sukut stadium. Jaku ke madahka GB13 ngepunka penyarut, nya petenah ke enda adil lalu nya mega mandangka raban ti bekuasa enda landik ngemataka pengelikun di stadium nya," ku Awang Khairul madah lebuh dirandau 'The Borneo Post', kemari. Iya bejaku munyi tu nimbal penemu mensia mayuh ke dipansut dalam laman rama ke madah, GB13 nguluka penyarut nya di luar stadium, ke ngujungka tujuh buah kerita polis rusak nyengkaum sebuah angus, kelimpah ari lima iku penyukung Sarawak kena tangkap udah nya. Iya madah, kebuah penyukung Sarawak ringat laban maya sida di Ipoh dia penyukung Perak bisi ngemediska sida lalu ukai semina nya, penyukung Perak mega ngena jaku ke jai mangkit bansa. "Ku iya, sida ke chapuh nya ringat laban Sarawak enda menang tang bisi orang madah, malam nya, semua mensia dalam stadium nya ninga penyukung Sarawak ngangauka penyukung Perak ngasuh sida iya pansut ngayanka diri. Bakani ku orang enda meda utai bansa tu?," tanya iya. Iya nandu baru, enti FAM enggau media semenanjung agi majak ngaga Sarawak baka ke diatu, penanggul nya enda ulih diputar lalu penanggul bansa tu deka nyadi belama. "Serakup Main Bol Sarawak (FAS) udah ngaga ripot ngagai Serakup Main Bol Malaysia (FAM) pasal pekara tu tang ripot nya semina ripot aja. Nadai utai ulih digaga sida iya. Lapa iya bansa nya? Ketegal kitai tu orang Sarawak pia?," tanya iya baru. Iya madah, penyukung sereta orang Sarawak udah lelak beratika FAM bechiping penemu enggau Sarawak, tambah mega media di semenanjung pan baka ke enda kiruh lebuh Sarawak napi penanggul enggau Perak maya nya. "Penyukung Sarawak dikelala rindu ngelaluka temuai. Ambika chunto baka penyukung JDT, Terengganu FA, Selangor FA enggau Kelantan FA lebuh datai ditu, sida dikelalu enggau manah ari sepiak-sepiak, kami sama belagu taja pan pemutus main bol nya enda nyemiakka Sarawak, lalu sekeda nya begulai begambar sereta betukar skaf. "Bakani media semenanjung sengapa aja bejaku. Ari peneleba ke udah, jaku kami diputar-belit sida iya, lalu udah nya kami ke ngalahka diri. Utai bansa tu patut diketuka," ku iya lalu nambah GB13 sanggup bekerejasama enggau FAS lalu ngarapka penanggul bansa tu enda nyadi jemah ila. Awang Khairul madah penusah ke nyadi malam hari Enam tu tadi pelajar ke semua nyengkaum GB13 sereta penyukung bukai, iya nya pengawa bemain bol tu endang bisi besangkut paut enggau peragam ati kitai, ku iya. Pemutus bemain bol entara Sarawak-Perak ke seri (1-1) beratika penanggul ke nyadi nya, ke pengabis besai dalam sejarah main bol Malaysia, ke dipadah nyadi berindik ari penyukung Sarawak ke kena serang ti dipandang dalam video nengah media rama. Sida ke chapuh nya dijangka bisi urung 2,000 iku penyukung tim Sarawak belaban enggau raban polis 'Public Disorder Riot Unit (PORU)' enggau 'Light Strike Force (LSF)' sebedau bebelas gis pemedi mata ditimbak ngagai raban nya.   |
| Adenan: Pekit main golf deka dipasuk dalam SUKMA Ke-19 Posted: 01 Sep 2014 09:45 AM PDT Dikarang Chris Bishop KUCHING: Kepala Menteri Tan Sri Datuk Amar Adenan Satem netapka main golf deka dipasuk dalam pekit Lumba Malaysia (SUKMA) Ke-19 ti deka diatur di nengeri tu ba taun 2016 ila. "Aku udah berandau enggau Menteri Pemansang Rama Tan Sri William Mawan ke ngemataka pengawa lumba enggau main lalu iya setuju main golf dipasuk dalam pekit SUKMA Ke-19 ditu. "Berindik enggau nya, kitai patut sedia napi main golf ke deka diatur dalam timpuh dua taun agi lalu nentuka Sarawak bisi pemain disabung rambau nya ila,"ku iya. Iya mansutka jaku tu ba pengerami 'The 1st Sarawak Grand Championship' ke diatur di Kelab Golf Sarawak (KGS) ditu, kemari. Ba pekit ke diadu tiga hari berengkah 30 Ogosnyentuk 1 Seprtember 2014, penyampau 240 iku pemain ari kelab gof serata Sarawak bisi datai nyereta. Lee Ka Tung dipilih nyadi champian 'The 1st Sarawak Grand Championship' lalu penuduk lumur dua enggau tiga pulai ngagai Magit Smong enggau Lee Kah Ming. Nambahka nya, Adenan ke mega presiden KGS madah pekit 'The 1st Sarawak Grand Championship' deka nyadi pekit ke diatur ninting taun. Keterubah iya Sarawak dipilih nyadi palan endur SUKMA iya nya ba taun 1990. Bela datai Menteri Pemansang Rama Tan Sri William Mawan enggau Sekretari Perintah Nengeri Tan Sri Datuk Amar Mohamad Morshidi Abdul Ghani. |
| Dennis meransang peranak Long Bemang chakah sereta bedisiplin dalam pengawa Posted: 01 Sep 2014 09:44 AM PDT MARUDI: Genap iku kitai dekaka pemujur dalam pengidup tang semua nya berindik ari penyakah diri sereta disiplin ba sebarang pengawa. Ba dunya ti penuh penguji sereta peluang besemekih, kitai patut belajar ari orang ke meretika jalai ngemansangka diri. Berebak enggau nya, kitai mega patut ngasaika diri betuah ketegal ulih begulai enggau raban bansa bukai seraya besemekih ngulihka pemujur nengah program pemansang ke bisi ngelingi kitai. "Ngagai raban nembiak, kita anang enda ngerebut peluang belajar ba bidang teknikal ke bisi disediaka perintah. Peluang pengawa ukai semina gawa ba opis aja tang nengah pengelandik teknikal, kita mega tau mujur baka orang bukai. Kaban kaunsil nengeri (ADUN) Telang Usan, Dennis Ngau nyebut munyi nya maya pengawa nyambut pengerami Hari Merdeka sereta Malam Main Asal di Long Bemang ditu malam ensana. Berebak enggau nya mega iya meransang semua peranak rumah panjai nya, bekempit enggau Komiti Pemansang enggau Pengelikun Genturung Pendiau (JKKK) kena ngenukuka japai juluk pemansang di menua sida. Maya atur pengawa nya mega, Dennis mega nyuaka Surat Pangku Pengawa nyadi ketuai genturung pendiau (TK) Usong Deng enggau Kaunsilor Jok Ngau. Bela bisi ngulu atur pengawa nya, sekretari politik Kepala Menteri Robert Laing Anyie, ketuai parit PBB pampang Telang Usan, Dominic Nyurang Ajang sereta sekeda ketuai raban bansa di kandang menua nya. Nyerumba atur pengawa mantar Hari Merdeka nya, mayuh pekit udah diatur komiti pengatur. Ba pekit karaoke, Lily Mujan teulihka champian, lumur dua, Billy Oyo sereta Vicky Nyurang bulih lumur tiga. Pekit nebah sape, Jau Emang bulih champian, lumur dua Uvang Jok sereta lumur tiga Emang Anyie. Tanda ajat panjai, 'Datun Julut' ba babagi indu, Bidadari bulih champian, lumur dua Glory Team lumur tiga tim Bunga Raya. Tanda 'poco-poco' champian tim 1Malaysia, lumur dua tim Malaysia Merdeka sereta lumur tiga raban Young Bee. Band Dkays ari Miri merindang mensia mayuh malam nya. |
| Penchuri engkechit terejun ari rumah Posted: 01 Sep 2014 09:42 AM PDT MIRI: Seiku penchuri engkechit ari rumah peninggi sepuluh kaki di Lutong ditu, berindik ari pengempu rumah nya tedani ninga kesuh seput iya urung pukul 4.30 dinihari, Hari Minggu tu tadi. Tekenyit meda pengempu rumah nya tedani, penchuri nya lalu nyapai 'smartphone' sebedau ngebuka diri engkechit enda betangga ari penjan rumah nya. Nasit sida sebilik nadai nenama, lalu ulah nya udah diripot ba balai polis Lutong ba hari ke sama mega. Pengawa nya mega benung dipansik diatu. We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules. |
| India Street deka disikap ngena perabung Posted: 01 Sep 2014 09:40 AM PDT Dikarang Jacqueline R. David KUCHING: Pengawa ngaga perabung ba pasar India Street deka terus dikemujur taja pan bisi bantah ari parti penyakal, ku Chairman India Street Pedestrian Mall (ISPM), Dato Wee Hong Seng. Wee madah pengawa deka ngaga perabung ungkup ISPM nya perambu lama kenyau ari 2010 lalu di pesetuju bala komuniti gerempung sereta opis kandang menua. "Nya alai, anang bejaku sengapa enti enda nemu penerang ke silik. Penegap majoriti orang dagang ke bedagang di sitak tu mayuh udah setuju ke projek tu patut dipejalai. "Tentu meh enti maya ngadu pemansang ditu, bisi kamah mimit, bedebu, tang arap besabar laban ngaga pemansang ditu tau meri penguntung ngagai kitai mayuh. Kami deka beratika pekara tu enda ngenusahka pengguna, pemeli barang tauka orang bukai," ku Wee. Iya madah munyi nya lebuh aum pengarang berita begulai enggau komiti ISPM di Restoran Jubilee di India Street ditu, kemari. Pemansang ke digaga ditu ku iya, ukai keterubah iya laban sebedau tu, pemansang ke digaga iya nya endur bejalai kaki (pedestrian walk) ke digaga lebih 20 taun tu ke udah, sereta pemansang ke nyadi lebuh palan bebeli barang Plaza Merdeka enggau Begunan Kot Lama nya digaga baru, ku iya. Ba saut Wee, nimbal jaku Kaban Kunsil Nengeri (ADUN) Padungan, Wong King Wei, kebuah bedau madah ngagai pedagang ba India Street sentang projek pemansang ke deka digaga laban projek nya bedau diberi ngagai konteriktor, lalu penerang ke silik bedau tembu. "Enti kami udah nerima penerang ila, iya deka dibantai ngagai semua pedagang ditu. Udah nya baru tinda dibuka," ku iya. Pedagang meda deka dipinta muka pal ke udah lama, aircond compressor ke enda dikena agi sereta jaku tangkan endang udah dipesetuju bala orang dagang ditu. "Pemesai ari DBKU udah meri penerang ngagai bala mayuh kena 21 enggau 22 Julai tu tadi. Komiti mega bisi meri pilih enti sida iya minta komiti tu ngambi konteriktor nurunka pal tauka sida ngaduka diri empu. "Mayuh ari orang ke bekedai ditu milih ngambi konteriktor sida empu. Tambah, mayuh kedai di India Street tu kedai ke dipenggi diri empu, nya kebuah DBKU enda ulih tama lalu nurunka pal nya semadi bisi gerah ari kot. "Naka ke diatu, semua pengawa nya udah digaga pedagang empu lalu pengawa ngechat mega udah belabuh digaga," ku iya. Ba timbal Wee nyaut Wong bekait enggau lubang ba India Street, ke dipadah Wong lubang alai nirika tiang, ku Wee, nya ukai lubang tang dikena mansik tanah digaga raban konsultan ari gerah DBKU. "Tiang seigi patut digaga dia kena nyukung perabung laban sekeda kedai ke enda rata, lalu ngaga tiang nya dipinta ulih sida ke bekedai ditu digaga ba tengah-tengah India Street ditu, ngambika enda ngachau pengguna tama kedai. "Tiang nya ke segala lalu enda tajam. Bechuntoka pasar di Singapore ke tebilang dikumbai 'China Town' sama digaga tiang kena nyukung perabung nya," ku iya. Pasar India Street ke begamal baru disadang tembu dalam taun tu. Sama bisi nguluka aum media nya kemari, Kapitan Bong Sin Kong, Dr Shajahan, Ex Kaunselor Bong Lian Huan enggau Ketuai pampang ngaga Rumah tauka Kedai Opis DBKU, Mohd Faizal. |
| Rayat minta saup perintah mutarka isu tanah NCR Posted: 01 Sep 2014 09:39 AM PDT KUCHING: Peranak tiga buah kampung di Pelilih Simunjan minta saup perintah nengeri champur jari mutarka penanggul Tanah Bansa Asal Bumiputera (NCR) sida ke kena keruga. Tanah ke udah dikeruga tu dipenggi 93 pintu ruang bilik ari tiga buah kampung iya nya Kampung Sekendu, Kampung Sungai Lingkau enggau Kampung Melanjuk ke balat bepanggai ngagai pengawa betanam betupi ba tanah nya. Tiga iku pengari ari tiga buah kampung tu iya nya Sanabung Sampai, Aying Adat enggau Tri Nyanau madah, tanah ke dipenggi tiga buah kampung nya ngembuan pemesai urung 5,000 hektar lalu bisi dikeruga sebengkah kompeni kelapa sawit. "Kami tu ngarika tiga buah kampung deka ngetanka hak tanah adat kami ba Kampung Sekendu, Sungai Lingkau enggau Melanjuk ke benung dikeruga kompeni kelapa sawit," ku sebana sida. Tiga iku pengari rumah panjai tu mansutka sebana munyi nengah aum pengarang berita ke diatur ba Opis t Parti Keadilan Rakyat (PKR), Batu Tiga ditu, kemari. Nitihka penerang ari Sanabung, peranak tiga buah rumah panjai ke dikeruga nya tepasa ngatur pengawa nyekat jalai kenyau 18 Ogos tu tadi nyentuk ke diatu dikena nagang kompeni nya tama ngagai tanah NCR sida. "Kami agi ngaga sekat ba kandang tanah adat kami ke dipasuk kompeni nya. "Kami nemu tanah nya endang tanah adat kami ke diperimba aki ini kami endur sida bumai kelia munya," ku iya. Iya madah, tanah ke dikeruga nya endang tanah kebun endur kami nanam mayuh utai tumbuh kena beridup baka getah, kelapa sawit, padi, rian enggau utai bukai. "Nya alai, ba tanah tu mega bisi pendam, tembawai lama ke udah dikeruga kompeni nya," ku tandu iya. Kelimpah ari nya, Senabung madah kes ngeruga tanah NCR nya udah dibai ngagai kot, tang pemutus iya kompeni ke menang. "Taja kes kami tu udah dibai ngagai kot maya 2012 lalu kami alai ba renggat Kot Tinggi maya April 2013 tang kami ngapil baru ngagai Kot Apil bekaul enggau pemutus nya. "Kebuah kami ngaga sekat ngambika kompeni enda majak ngeruga tanah menua kami nyentuk kes tu udah tembu sereta bela dipesetuju kededua piak," ku iya. Nya alai, iya madah peranak ba tiga bengkah kampung nya chukup ngarapka perintah enggau orang ke bisi besangkut paut ulih champur jari mutarka penanggul tu. "Kami rayat ke seranta sereta semina bepanggai ba tanah nya endur beridup, nyema penanggul tu majak nyadi iya tau munuh kami," ku iya. Ketetiga iku pengari peranak tiga bengkah kampung nya madah, kompeni nya patut berandau enggau semua rayat ke kena keruga tanah, baum memanah awakka pemutus bela meri penguntung ngagai kededua piak. Kami ngelaluka kompeni nya berandau memanah enggau rayat ngambika sama bulih penguntung,"ku tandu sida. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |