Pemutus pemesai ke suba mai penguntung: Adenan BorneoPost Online | Borneo , Malaysia, Sarawak Daily News » Berita Iban - New 2 Borneo |
- Pemutus pemesai ke suba mai penguntung: Adenan
- PRS andal ulih menang ba dua penuduk baru, ku Masing
- Pesta Pakan majak dikerinduka mensia mayuh
- Karnival Belia Merdeka tau dipasuk dalam kalender KBS
- Penyukung main bol Sarawak ringat besai di Stadium Negeri
- Kelas ngajat SADIA mengkang dibuka diatu
| Pemutus pemesai ke suba mai penguntung: Adenan Posted: 31 Aug 2014 09:18 AM PDT Dikarang Judan Bungap // Kenyau 50 taun ke udah nengeri kitai udah ngasaika mayuh macham penyungkak penatai pemisi ruang bilik KAPIT: Pemutus ke digaga raban pemesai 50 taun ke udah ti mai nengeri Sarawak setujuka penumbuh menua Malaysia udah mai penguntung enggau pemansang nengeri tu diatu. Kepala Menteri Tan Sri Datuk Amar Adenan Satem madah, pemutus ke digaga nya ngujungka nengeri tu mujur ngangkatka penatai pemisi ruang bilik 10 kali lipat kelimpah ari nyungkak tikas 'Gross Domestic Product' (GDP). "Pemesai kitai dulu suba baka niang Tun Jugah Baraieng, Datuk Ling Beng Siong, Tun Abang Openg, Datu Bandar Abang Mustapha Abang Mosili enggau bala bukai mai nengeri tu setuju nyukung penumbuh menua Malaysia. "Tang maya nya suba bala pemesai dulu agi ngaga beberapa macham atur ti nyaga sereta ngintu pengelikun tauka hak rayat pupu bansa nengeri tu. "Diatu kitai ulih meda nama bagi pemaik enggau penguntung ke diulih ari pemutus pemesai kitai dulu suba," pia ku iya madah. Iya mantaika jaku nya maya ba Pengerami Ngintu Hari Merdeka ti ke-57 renggat nengeri Sarawak di Kapit ditu, pagi kemari. Pengerami nya bela digulu Tuai Pemegai Menua Tun Pehin Sri Abdul Taib Mahmud enggau bini Toh Puan Ragad Kurdi Taib, Sapit Kepala Menteri Datuk Patingi Tan Sri Alfred Jabu Numpang, Menteri Pemansang Tanah ti mega Chairman Komiti Pengerami Tan Sri Datuk Amar Dr James Jemut Masing, Speaker Kunsil Nengeri Datuk Amar Mohamad Asfia Awang Nassar, bini Adenan Puan Sri Jamilah Anu enggau bala pemesai bukai. Dulu ari nya, kira bisi 2,500 iku bala ke bisi datai ngulu pengerami diau enda engkeretik enda lama kena meri basa ngagai bala ke kena tinggang penusah bilun MH17 empai lama tu tadi. Sekeda ari pengawa ke bisi diatur maya tu baka 'Senam Kenyalang', koir lagu Jalur Gemilang, Tanggal 3` enggau 'Di sini Lahirnya Sebuah Cinta', macha ikrar enggau raban Kem Batalion Ke-3 Rejimen Renjer Diraja (3RRD) mantaika tanda perang. Kelimpah ari nya, Taib mega maya tu dipebasa nyuaka perais ngagai bala ke mujur ba 'Larian Merdeka'. Nampung jaku Adenan baru, ku iya, enggau pemutus ke digaga sereta penumbuh menua Malaysia, rayat enda dipegai orang bukai agi lalu ngembuan tanggungpengawa ngemansangka diri empu. "Udah kitai merdeka, kitai sepeneka ngaga pemutus disempulang enggau pengelandik bakani deka ngangkatka pengidup diri empu. "Kitai ulih idup enggau berasai temegah ati," ku iya. Adenan madah, taja udah mayuh pemansang sereta ngasaika pengelikun maya hari tu tang agi bisi ba sesebengkah endur empai silik ngasaika pemansang kelimpah agi idup ba tikas seranta. "Nya alai, kitai deka chakah mutarka pekara tu enggau naka pengelengkas," ku iya. Ngalihka lemai Adenan enggau Taib sereta bala bukai meda Regatta Kapit ba tebing Sungai Rajang ditu.   |
| PRS andal ulih menang ba dua penuduk baru, ku Masing Posted: 31 Aug 2014 09:17 AM PDT KAPIT: Parti Rayat Sarawak (PRS) andal ulih menang ambis nadai ba dua iti penuduk ke baru, ku presiden parti Tan Sri Datuk Amar James Jemut Masing. Iya madah, parti ngintai penuduk ke diasai ulih alai Barisan Nasional (BN) menang. "Kami benung ngintai dua iti penuduk ke baru alai kami andal ulih menang ba penuduk nya. "Nadai guna semina nemu bejaku mayuh tang enda ulih mujur ba penuduk," pia ku iya madah ngagai pengarang berita udah iya bela enggau ngambi bagi ba 'Ice Bucket Challenge' di rumah iya ditu, kemari. Iya mantaika jaku nya maya ngelansa penerang ke dibantai Direktor Komiti Pengawa Bepilih (SPR) Datu Takun Sunggah empai lama tu tadi ti madahka SPR deka ngatur baru penuduk Kunsil Nengeri kena bulan Disember taun tu. Tu melabaka ambis nadai SPR deka numbuhka semilan iti penuduk DUN baru enggau beberapa iti penuduk Parlimen baka ke digaga ba taun 2001 suba alai Sarawak udah bisi semilan iti penuduk DUN baru enggau enam iti penuduk Parlimen baru. Sebedau nya Sarawak bisi 60 iti penuduk DUN enggau 25 iti penuduk parlimen. Takun madah, pemutus nya digaga bepelasarka pemesai menua enggau penyampau rayat. Menua ke besai baka Baram enggau Belaga ti nyauka sebaka pemesai nengeri Pahang bisi awak deka dibagi baru lalu menua bukai baka Kuching, Sibu, Bintulu enggau Miri. Masing ti mega Kaban Kunsil Nengeri Baleh enggau Menteri Pemansang Tanah madah, parti sida udah bisi chalun ke bisi penau ngarika dua bengkah penuduk baru nya. Bagi chalun ba penuduk Pelagus enggau Tamin, ku Masing, parti sida udah nentuka tiga iku chlun ke bisi penau ba tiap bengkah penuduk nya. "Tang agi ke diatu, aku empai ulih madahka sapa bagi chalun nya nambahka aku deka berandau dulu enggau Kepala Menteri. Nangkan ke nya kami minta iya mantaika sapa bagi chalun nya," pia ku iya madahka baru. Ku iya, parti sida bekenaka penemu enggau jaku tangkan ari Kepala Menteri laban lebih agi nemu sapa chalun ke patut dipadu bediri ba dua bengkah penuduk nya. Penuduk Pelagus dipeda 'angat' udah ke dipegai chalun ngatika diri George Lagong maya pengawa bepilih nengeri taun 2011 suba. Iya udah nya nyengulai Parti Pekereja Sarawak (SWP) alai iya dipadu megai pengawa mandal presiden. Tang taja pan baka nya, kena 15 April tu tadi iya deka tama enggau TERAS, sebengkah parti ti madahka diri bebakih enggau BN. Bagi penuduk Tamin, PRS endang deka ngerintai nama chalun baru udah Datuk Joseph Mauh Ikeh ngaga pemutus deka ngemaduka diri ari pengawa politik. Parti tu mega mengkang ngetanka pengari bukai ba tujuh bengkah penuduk iya nya Masing empu, Liwan Lagang (Belaga), Datuk John Sikie Tayai (Kakus), Datuk Mong Dagang (Bukit Begunan), Alexander Vincent (Ngemah), Malcome Mussem (Batang Ai) enggau Snowdan Lawan (Balai Ringin). Ba pekara bukai, Masing melabaka pengawa bepilih nengeri deka diatur ba taun 2015, enda ngira maya udah bulan September taun seiti alai kepala menteri ti mega Chairman BN Nengeri deka mutarka penanggul ke bisi nyadi bepun ari penumbuh TERAS enggau UPP. |
| Pesta Pakan majak dikerinduka mensia mayuh Posted: 31 Aug 2014 09:16 AM PDT Penyampau temuai ke datai seruran nambah tiap kali pengerami tu bisi diatur, ku Mawan PAKAN: Pesta Pakan endang sebengkah program ke pemadu manah dikena ngangkatka rita sereta ngelakuka pelilih tu nyadi sebengka palan ke manah dilawa genap iku temuai ke deka datai ngagai endur tu. Setipak enggau juluk tu, komiti pengatur begulai enggau mensia mayuh patut nyadaka langgur penemu ke memanah dikena ngerichahka agi pengerami tu nyadi sebengkah pengerami ke ke nyelai sereta seruran dilawa temuai ari menua jauh tauka semak tiap kali iya bisi diatur. Menteri Pemansang Rama Sarawak, Tan Sri William Mawan Ikom madah, berebak enggau nya mega mensia mayuh patut nguna peluang bisi maya pengerami bansa tu endur ngulihka penatai pemisi nengah mayuh bengkah chara baka mukai palan endur bedaja. "Kami deka meda rayat nemu genap program pengerami ke diatur bansa tu, ukai semina dikena merindang ati aja, tang mega patut dipeda ari sukut ke bebida. "Mayuh peluang dagang bisi dibuka nyerumba pengerami bansa tu. Nyadi enggau nya, kita patut nguna peluang ke bisi tu enggau manah. "Kena semua utai ke dikemisi ba endur tu baka peluang nyual asil babas, produk pengelandik jari enggau perengka bukai ke ulih narit ati," ku Mawan. Mawan ti mega nyadi Kaban Kunsil Nengeri (ADUN) Pakan madah munyi nya rambau nutup pengerami Pesta Pakan ke diatur ba Laman Pakan, malam kemari. Nangkan ke nya, Mawan madah kenyau ke diatur ba taun-taun ke udah, Pesta Pakan bisi mandangka pemanah ari taun ke udah-udah. "Penyampau temuai ke datai seruran nambah tiap kali pengerami tu bisi diatur lalu tu mega nunjukka pemanah pengerami tu. "Berebak enggau nya mega, sukung ari mensia mayuh ke bisi nyereta aktiviti ke diatur mega mandangka pemanah. "Berindik ari nya, kitai ngarapka pengawa ngatur pengerami tu deka terus ngerembai awakka meri bekau ke manah sereta seruran tejapaika juluk enggau tuju atur pengerami," ku tandu Mawan. Pengujung pengerami ke sekali tu bisi dipandangka enggau pekit Keling enggau Kumang Pesta Pakan 2014, iya nya lima iku pemekit lelaki bela betapat berebutka gelar Keling enggau semilan iku indu betapat berebutka gelar kumang. Ba pekit Keling, gelar keling dipenggi Jackle Gawang, lalu lumur dua dipenggi Harry Kalang enggau ketiga Alexson Amir Aden. Udah nya ba pekit Kumang, gelar Kumang dipenggi Sharron Valiny, lalu lumur dua enggau tiga diempu Diomera Darniati enggau Subang Jamit. Semua bala pemenang nerima perais duit, midul enggau trofi. Perais ungkup bala pemenang pekit tu disuaka bini Tan Sri Mawan iya nya Puan Sri Julia Mawan. Bela bisi datai Residen Sarikei, Dahim Nadot enggau Pemesai Pelilih Pakan, Alex Liau sereta urung 1,000 iku temuai. |
| Karnival Belia Merdeka tau dipasuk dalam kalender KBS Posted: 31 Aug 2014 09:15 AM PDT Dikarang Jacqueline David // KUCHING: Program Karnival Belia Merdeka tau digagaka nyadi seiti program dirintai dalam kalendar Opis Menteri Nembiak, Lumba enggau Main (KBS) lalu tau mega disengkaum dalam program Opis Menteri Pengawa Dagang Temuai laban iya tau nyadi program ke manah ngagai bala nembiak dikena nyaga bepengerai kelimpah ari nyambut Hari Merdeka. Kaban Kunsil Nengeri (ADUN) Pantai Damai ti mega nyadi Penyanding Penemu Karnival Belia Merdeka 2014 Dr Abdul Rahman Junaidi madah, atur pengawa bansa tu tau digaga nyadi aktiviti ninting taun lalu tau dipasuk dalam kalendar Opis Menteri Nembiak, Lumba enggau Main nyengkaum Opis Menteri Pengawa Dagang Temuai. "Iya berat ukai semina pengawa bansa tu manah ke bala nembiak, tang iya mega tau ngangkatka pengawa dagang temuai di sitak tu laban pemanah rampa menua ke tau alai diri sebilik, sereta nembiak belelak," ku iya maya dirandau lebuh bejadika Karnival Belia Merdeka 2014 di D'Cove, Pasir Panjang Family Park ditu, kemari. Program nya diatur Catalyst Events begulai enggau Saberkas Pampang Pantai Damai ngatur Karnival Belia Merdeka 2014, pengelama dua hari. Entara pengawa ke bisi diatur belabuh ari pukul 8 pagi datai ngagai 12 malam nya Konvoi Merdeka Jalur Gemilang, bepemerindang enggau raban artis baka Najwa Latif, Razis Ismail enggau Syamin Jasmin, sereta Catalyst DE'5 Band, Badang Kenyalang, Senamrobik, Zumba, Futsal ba tebing tasik, pengawa pemandang kerita Merdeka sereta mayuh atur ke bukai. Dr Abdul Rahman madah, atur pengawa bansa tu mungkal pengawa ke manah ngagai bala nembiak ungkup pengerai tubuh enggau beratika pemesai reti Hari Merdeka. Atur pengawa ke bisi digaga mega setipak enggau pengerindu bala nembiak baka Konvoi Big Bike, Eksais, sereta mantaika pengering tubuh nengah 'Badang Sarawak'," ku iya. Ba atur pengawa 'Badang Sarawak', Addy Jawa, 19, seiku nembiak ari kolej perintah mujur nyadi champian, lalu ditangkan enggau Amir Hanafi, 44 gawa ba ejensi perintah (lumur dua) ke kala bulih gelar 'Iron Man' enggau Eswandy Ismail, 38 (lumur tiga). Ketiga-tiga sida tu nerima perais trofi, hamper enggau setipikit. |
| Penyukung main bol Sarawak ringat besai di Stadium Negeri Posted: 31 Aug 2014 09:14 AM PDT KUCHING: Penyukung tim main bol Sarawak ringat besai pengudah ambis pengawa main bol entara Sarawak enggau Perak malam kemari. Malam nya pemutus main entara Sarawak enggau Perak seri 1-1 lalu berindik ari penyarut ke bisi nyadi lima iku polis bakal sereta tujuh buah kerita polis ditunu enggau dikenyai. Penusah ke nyadi malam nya mega ngujungka pintu pagar Zon A enggau Zon B Stadium Negeri rusak ketegal ulah urung 2,000 penyukung Sarawak ngaga penyarut lalu tama padang. Bisi mega bala penyukung nunu suar, merechun enggau nikauka utai ngagai raban penyaga pengelikun. Nitihka penerang Sapit Ketuai Polis Pelilih (KPD) Kuching Superintendan Fauzilan, penyarut nya mujur dirara nengah bantu Polis Anti Penyarut (PORU) lalu ngujungka bala penyukung ke ngaga penyarut pulai. Taja baka nya ku iya, urung pukul 11.30 malam penyukung Sarawak datai baru begelumu ba mua pintu tama ngagai stadium enggau palan paking ba luar stadium kelimpah ngenyaika kerita polis. Entara entukar polis ke bisi rusak iya nya lori Hilcom, enggau dua buah kerita Kancil, Proton Waja enggau van Toyota. "Pengudah pengawa main bol entara Sarawak enggau Perak ambis, seraban penyukung Sarawak urung 2,000 iku tama ngagai padang lalu ngujungka pagar stadium rusak," ku iya. Penyukung Sarawak udah nya majak ringat ke ngujungka sida tama baru nengah pintu besai stadium. Fauzilan madah, penyarut nya ngujungka PORU Komander Unit 55 Komeni A Batalion 11 PGA, LSF 303 Balai Polis Sekama enggau LSF 301 Balai Polis Sentral tepasa nyembur 26 iti gas ngasuh mata pedis enggau 10 iti bom asap nuju bala penyukung ke ngaga penyarut pengudah sida enggai pulai. "Setengah jam udah nya raban sida ke ngaga penyarut ngelarika diri sereta majak ringat enggau chara nunu kerita polis lalu bala polis terus ngerah ngaga tangkap," ku iya. Lima iku nembiak ke beumur urung 17 ngagai 20 taun ditangkap lalu lima iku polis bisi bakal lebuh ke ngaga tangkap. Nangkan ke nya, iya madah semua saspek ke ditangkap ditan ba lokap Balai Polis Tabuan lalu sida deka diriman kelimpah deka diperesa ai kemi. Udah nya, Sapit Presiden Gerempung Main Bol Sarawak (FAS) Datu Mohd Abu Bakar Marzuki nyaga pengesal ati meda ulah bala penyukung ke ngaga penyarut nya. "Penerang rasmi deka dibantai pengudah komiti FAS baum," ku iya. Pengari GB13, Awang Khairul Adzhar madah, penyarut ke nyadi nya ngeluai ari pengasai ati ti kelalu ringat bekaul enggau penyai ulah ke udah digaga penyukung Perak. "Penyukung Sarawak dibukut penyukung Perak kelimpah sida (Penyukung Perak) nyebut utai ke enda manah ngagai penyukung Sarawak," ku Khairul. Kelimpah ari nya, ku iya GB13 mega asa laban Gerempung Main Bol Malaysia (FAM) langsung nadai ngaga nama-nama pengudah penyarut nuntung penyukung Sarawak di Stadium Ipoh. |
| Kelas ngajat SADIA mengkang dibuka diatu Posted: 31 Aug 2014 09:13 AM PDT Dikarang Chris Bishop // Mabong: Raban nembiak bansa Iban diperansang belajarka pengelandik nya kena ngelai identiti diri Sepenyampau 13 iku lelaki enggau 12 indu udah ngerijista diri nyereta kelas lalu orang bukai ke ngembuan pengingin belajar ngajat diperansang datai terus ngagai Indu Opis SADIA di Batu 7 ditu, sehari tu. "Ngagai orang ti ngembuan pengingin belajar ngajat, sida tau datai terus ngelawa Indu Opis SADIA maya kelas belabuh. "Peluang mengkang dibuka ngagai semua lebih agi nembiak ti deka belajar ngajat," ku Pengatur Kelas Ngajat Mabong Unggang ba sebengkah aum pasal ngajat renggat kedua ke diatur bedau lama tu tadi. Iya nambah, ungkup lelaki kelas deka belabuh sehari tu berengkah jam 7:30 lemai nyentuk 9:30 lemai lalu kelas ungkup orang indu deka belabuh 3 September tu. Mabong mega gaga pengudah meda bala ti datai enggau ati ransing deka belajar ke adat asal bansa diri empu. "Sida madahka diri kitai bansa Iban patut ransing ngenanka main asal diri ngambika tau nentu kitai Iban jemah ila enda lenyau identiti. "Sebengkah ari identiti kitai Iban iya nya ngajat. Nya meh kebuah kaban aku Alexander ari Taman Samarindah sanggup nganjung tiga iku anak iya ke beumur 16, 12 enggau 9 taun masuk kelas ngajat," ku iya. Ba renggat kedua tu, kelas ngajat orang indu deka diajar Elsie Joannes lalu sida ke lelaki deka diajar Joe Frazier Kemping. Seduai endang orang ke tebilang ba pengawa ngajat lalu suah dikangau mandangka diri ngajat ba mayuh bengkah pengerami tauka pengawa bukai, tandu Mabong. Sebarang tanya senentang kelas ngajat tu tau dikenatai ngagai Mabong nengah lumur 012-6925562, Elsie Joannes 013-8000544 tauka Joe Frazier 016-8589364. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |