» »Unlabelled » “Empas Ngagai Rampa Menua Enggau Pekara Penatai Pemisi” – Agi Mayuh Penerang Dikena Mantah Projek Tekat Besai-Besai

07:06:00

“Empas Ngagai Rampa Menua Enggau Pekara Penatai Pemisi” – Agi Mayuh Penerang Dikena Mantah Projek Tekat Besai-Besai

“Empas Ngagai Rampa Menua Enggau Pekara Penatai Pemisi” – Agi Mayuh Penerang Dikena Mantah Projek Tekat Besai-Besai

Posted: 01 Sep 2014 03:49 AM PDT

Asil tengkebang lukis ba Tekat Baram ti dikinginka Taib Mahmud

Asil tengkebang lukis ba Tekat Baram ti dikinginka Taib Mahmud

Lebuh Adenan Satem neruska projek SCORE Taib Mahmud ti deka ngaga 15 buah tekat besai-besai agi di menua Sarawak, mayuh agi penerang ti madahka tukuh tekat nya udah jauh tinggal timpuh, lalu dikamatka tau mai pengerusak tang ukai penguntung ke menua ti ngaga iya.

Diatu suratberita New York Times udah nuliska pasal ubah runding siku penyanding penemu pasal pengawa ngaga tekat ti ditaga dikena ngulihka penguntung nyadi orang ti mantah pengawa nya
Professor Thayer Scudder, siku orang to landik pasal pekara antropolgi ari menua Amerika, udah bejalaika pansik ba empas ari projek tekat dalam pengelama lebih kurang setengah abad, ti dikarapka ulih ngelepaska raban bansa ari tanggam penyeranta.
Nitihka simpul penemu iya rega ngaga tekat besai-besai endang enda tepulai, tang tekat ti besai-besai semina mai pengerusak enggau penusah ngagai rampa menua enggau pekara penatai pemisi sesebengkah menua.
Enggau pengirau ati orang mayuh ti nambah enggau penerang ti mantah pemintar ngemasukka duit agih bebilion-bilion ringgit ke dalam langgur ngaga tekat, ti nadai ditemu tuju ke menua Sarawak, pengawa nya udah enda agi besabi enggau pengarap ti madahka Taib Mahmud enggau agen iya ari menua tasik Torstein Sjotveit udah ditemu majak ngeregaska pematut ngerusak batang sungai di Sarawak enggau ngeruga pengidup raban bansa menua nya, lalu enda ibuh ke projek tau mai pengerusak ngaga pekara penatai pemisi enggau sosial.

Raban orang bansa asal ti nguan lebak Sungai Baram udah angkat mantah lalu nyereminka pansik Scudder, tang Taib Mahmud enggau kepala menteri boneka iya Adenan Satem mengkang madahka seduai nya orang ti nemu agi pasal pematut majakka langgur nya lalu wang turu bebilion-bilion enda tau enda diinjau, dikena mai tama bala tukang pengaga tekat ari menua China laban bala tukang ari menua barat nyau enggai ngaga tekat laban betegalka pekara etika.

Rayat menua Sarawak diatu udah dipejal mayar duit entaruh ba projek pemansang ti dipasang, tang semina siku aja orang enggau siti aja ruang bilik bala orang ti deka bulih penguntung ti mayuh. Sida nya Taib Mahmud sebilik, ti endur Gabenor Sarawak nya udah ngena kuasa penuh iya ngulihka kontrak ti besai bendar dalam pengawa "pemansang" tu.

Uji bacha enggau silik agi ba utai ti dikenang Jacques Leslie dalam suratberita New Yrok Times:

Screen Shot 2014-08-26 at 15.15.23 THAYER SCUDDER, siku penengkebang pengawa mansik empas ari tekat besai-besai ngagai raban orang ti seranta, udah ngubah runding enggau penemu iya.
Scudder ti nyadika siku penyanding penemu dalam projek tekat besai-besai udah numpuka pengawa iya dalam timpuh 58 taun madahka tekat ti digaga enggau manah deka ngapuska pengerusak ngagai rampa menua ti sesebengkah menua.

Diatu ba umur ti udah tuai bendar, 84 taun, iya udah ngaga simpul penemu madahka tekat ti besai-besai ukai semina enda engkeman digaga, tang mayuh agi ti benung digaga nya meri empas ngagai rampa menua enggau pekara penatai pemisi, munyi saut iya nengah emel apin lama tu udah.

Scudder ti nyadi siku professor ari Institut Teknologi California bisi madahka penusah ati iya ba tekat ti besai-besai nya. Iya nyadika pengulu dalam pansik ba pengawa ngaga tekat dalam pansik iya ba taun 1959, ti endur iya mantaika asil pansik iya ba pemindah chara pejal ba 57,000 iku orang bansa Tonga ba lebak Sungai Gwembe di Zambia enggau Zimbabwe. Pengawa ngaga Tekat Kariba nya bepanggai bendar ba duit jali ti pemadu besai dalam cherita lama Bank Dunya, ti ngujungka raban bansa orang Tonga ninggalka pendiau asal sida di lebak Sungai Zambezi ngagai kandang menua ti enda gemu ari ili tekatmua. Belabuh ari maya nya Scudder udah meratika pengerusak ba sistem kaul mensia sida dia.

Raban bansa orang Tonga, ti dulu menya sebengkah raban bansa orang ti regas ngidupka diri, begempung ati diatu nyau nyadi raban bansa ti suah dipangka penusah lapar pungkang, pengirup arak lalu mar bendar ngiga sebarang pengawa. Ketegal udah putus pengarap begigaka pengidup mayuh sida nya nyadi orang bekebun dadah enggai mai barang chara belalai, ngasu jelu gajah, nyadi apai manuk lalu sida ti indu mega nyadi indu sundal. Tang raban bansa asal menua nya mengkang nadai ngasaika penguntung ari bekal kuasa karan.

Pemeri ari Scudder ti diatu nya ba Tekat Nam Theun 2 di menua Laos, udah meri iya pengasai ati ti ngeruga runding iya.Tang taja pan projek nya udah ditembuka dalam taun 2010, tang tuju asal projek nya lalu bedau ulih mai pengelantang ti disemayaka. Berebak enggau nya tiga iku orang ti bempu tekat nya berunding deka nyerahka tekat nya ngagai perintah Laos. Perintah laos ngelanggur deka ngaga 60 iti agi tekat dalam timpuh entara 20 ngagai 30 taun, lalu diatu perintah menua nya lalu enda tetapika penanggul ba rampa menua enggau sistem kaul entara mensia.

Program ngaga tekat suah agi begunaka pun penatai belanja ti kelau besai, laban bala orang ti ngaga langgur suah bendar salah kira ba anggar pengusut penatai pemisi menua enggau pengusut mata duit ba tukar nyawa mata duit.
Empas ngagai pekara belanja sesebengkah menua nya jai bendar. Penanggul nya udah kala diasaika menua-menua baka Turki, Brazil, Mexico enggau menua Yugoslavia dulu suba. Ba mayuh agi menua nya, pekara dagang sida kelalu keru nyentuk ke projek nya tau mai empas ti balat ba pekara belanja menua, munyi penemu Flyvberg ti nyadi siku tuai dalam pengawa mansik empas projek tekat.

Nitihka kriteria pansik, mayuh agi tekat ti besai-besai di serata dunya tu udah nyadika penanggul enggau pemuntan pengawa dagang enggau penatai pemisi sesebengkah menua. Penemu tu ditemu betul ba lapan buah tekat ti ngempang sungai Congo – dua projek iya ti terubah udah ngelui kos ngaga ti diagihka – lalu Tekat Belo Monte ti beungkus $14 bilion, ti udah ngerusak rampa kampung Amazon enggau takat iya ti ketiga pengabis besai di dunya.
Kelimpah ari ti ngaga tekat besai-besai, bala pemansik nya meri penemu ba pemilih bukai baka ngulihka kuasa karan ari kuasa angin, matahari enggau tekat hidro ti mit-mit.

Semua projek tekat besai-besai tu udah enda besenutuk agi enggau protokol ngaga tekat entarabansa. Bala tukang pengaga tekat baka bansa China, Brazil enggau India udah ngaga beratus-ratus buah tekat di serata dunya, lalu Bank Dunya udah madahka, ba taun nyin kemari sida udah ngubah atur nyali duit dikena sida nyali duit melanja projek tekat ti besai-besai. Tekat ti besai-besai manah bendar dipeda: Tekat nya projek ti mejal daya pengidup mensia, perengka lama Rambau Industri ti jarang bendar ulih ngamatka utai ti disemayaka.