» »Unlabelled » Tuai raban bansa dilalau nyaup nyaga pemeresi BorneoPost Online | Borneo , Malaysia, Sarawak Daily News » Berita Iban - New 2 Borneo

05:14:00

Tuai raban bansa dilalau nyaup nyaga pemeresi BorneoPost Online | Borneo , Malaysia, Sarawak Daily News » Berita Iban - New 2 Borneo

Tuai raban bansa dilalau nyaup nyaga pemeresi

Posted: 26 Nov 2013 02:58 PM PST

by Judan Bungap. Posted on November 27, 2013, Wednesday

KANOWIT: Tuai raban bansa patut ngayanka ulah ngemeratka pemeresi kandang rampa menua ngambi tau nyadika lalau ngagai mensia mayuh ke bukai.

Menteri Muda Pemansang Tanah enggau Dagang Temuai Datuk Gramong Juna madah, raban nya ulih nyadi ijin perintah besaup mai ubah tikas pemeresi baikka ba kandang rumah, sekula tauka palan alai gawa.

"Tu ngambika bala nembiak redak ulih nunda ulah ngemeratka pemeresi kandang rampa menua kelimpah kitai empu ransing nyukung program bekaul ngintu enggau nyaga pemeresi rampa menua ke bisi diatur perintah tauka opis ke bukai.

"Nambahka nya, iyarka ulah semina ngandalka orang bukai ngereja pengawa meresi rampa menua," ku iya.

Gramong mantaika jaku lalau nya maya bejadika Program Komuniti Beripai Meresi Sungai enggau Rampa Menua Kanowit beserimbai enggau 'Flag-Off' Jelajah Mesra Rakan Alam Sekitar (JJMRAS) 1Malaysia renggat Nengeri Sarawak bagi Parlimen Kanowit di Tebing Sungai Kanowit ditu, Hari Minggu tu tadi.

Program tu bela digulu Pemesai Opis Pelilih Kanowit Ibrahim Kipli, Pemesai Opis Pemadah Kanowit Wan Mohd Zuki Wan Ismail, Pemesai Opis BOMBA Kanowit Kackson Anyi Ngau, Pemancha Spencer Kudang, Penghulu Ijam Tuah enggau Penghulu Boniface Jacob Kalai.

Sekeda ari pengawa ke bisi diatur sehari nya baka senamrobik, beripai meresi palan paking kerita, enggau meresi uras enggau apat ba sungai.

Gramong ti mega Kaban Kunsil Nengeri (ADUN) Machan madah, ulah orang ke dulu suba enda bangat ngemeratka pemeresi udah tebantai ngujungka diatu kandang rampa menua nyau dikeruga tauka kamah.

Beduduk ari nya, iya ngelalau mensia mayuh bela ngesan tanggungpengawa ngintu pemeresi kelebih agi baka pemeresi sungai.

"Enti sema sungai kitai enda beresi tauka semampai kamah, leman utai idup baka ikan enggau undang mega deka punas ngujungka ekosistem sungai deka dikeruga lalu ngenataika penanggul ngagai pengidup kitai mensia," pia ku iya madah.

Bekenangka program ke diatur sehari nya, Gramong ngarapka penemu ari program nya ukai semina dibantai maya nya aja tang mega mengkang dikemeran nyentukka ba rumah panjai.

"Pengidup ti beresi bisi kaul enggau pemeresi rampa menua ti nentuka kitai ukai semina idup likun ba menua ti beresi tang mega likun baikka ba ekonomi, pemansang menua enggau pekara bukai.

"Ulah kitai sehari tu mega nentuka pengidup rebak dudi jemah ila," ku iya madahka baru.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

‘Program Pemantapan Diri dan Organisasi’ kena ngerari diri ari tanggungpengawa berat

Posted: 26 Nov 2013 02:58 PM PST

BINTULU: Pengawa ngatur 'Program Pemantapan Diri dan Organisasi' sebengkah ari aktiviti ukai akademik ke diperambu dikena ngerarika diri raban ke masuk program ari tanggungpengawa berat ba opis enggau sekula.

Pemesai Pelajar Pelilih Mit Tatau, Poniman Bejok madah, program keterubah diatur nya ngena konsep `Membina Pasukan' kena ngerapatka kaul kerejasama antara raban pengajar di pelilih Tatau.

"Program tu diatur raban fasilitator profesyenal dikearap ulih diatur baru jemah ila," ku iya bejaku ba pengerami nutup program ke diatur kena 15 nyentuk ke 17 November tu tadi di Taman Negara Similajau.

"Tagit dudi ila iya nya bala pengajar ke baru gawa ba pelilih Tatau enggau pengajar ke ngajar Taun Enam ulih sama enggau program tu kena nyungkakka pemujur ba pemutus peresa UPSR di pelilih Tatau taun nyin ila," ku iya.

Kelimpah ari nya, Ketuai Bank Rakyat Wilayah Sarawak Azman Abd Aziz madah, piak iya sedia mantu program nya kena ngangkatka pemujur akademik nembiak sekula nyengkaum nyungkak tikas pengawa raban pengajar.

"Program tu endang beguna endar laban ulih nempa gerup ke tegap kelebih agi raban ke gawa ba opis sekula enggau pemesai opis pelajar kena ngangkatka nama ba pemujur pemutus akademik ba endur sida," ku iya.

Azman madah, kelimpah pelilih Tatau, Bank Rakyat mega mayuh mantu program-program ba pekara pelajar ba Opis Pelajar Nengeri Sarawak laban polisi piak bank mega ngemeratka pelajar ba pengawa ngemujurka motto `Menjulangi Sarawak'.

Iya ngarapka raban pengajar ngajar enggau enda bechiping sereta ngelaungka status jalai pengarap enggau bansa nembiak ke diajar sida.

Program diatur Opis Pelajar Pelilih Tatau nengah kerejasama Biro Indu Opis Menteri Pengintu Pengelantang, Orang Indu enggau Pemansang Ruang Bilik Nengeri Sarawak enggau Bank Rakyat Pampang Bintulu nya dikemujurka pengelicha profesyenal, Telemachus Lo ari SMT Learning Solution Kuching.

Program nya mega digulu Pemesai Menguasa Taman Negara Similajau Ab Rahim Hassan, Penulung Pemesai Pelajar PPD Tatau Muhd Nor Abdullah enggau Chairman Komiti Kepala Pengajar Pelilih  Tatau Tony Madup.

Bisi 80 iku masuk enggau program nya ke nyengkaum ari pemesai enggau pengereja pengawa ba PPD Tatau, kepala pengajar, penulung kanan kurikulum, penulung kanan pekara murid enggau bala pengereja pengawa sukung.

Antara aktiviti ke bisi diatur iya nya nanam pun bungai, pemeri pun bungai keretas, aktiviti nyaga pengerai, baum beraban, neresa kampung, mayuh macham pekit enggau aktiviti beraban sereta licha pengarap enggau perangai ba taman nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

VCORP komited ngenukuka kaban iya ngasaika pengelantang pengidup pengudah pinchin gawa

Posted: 26 Nov 2013 02:58 PM PST

KUCHING: Gerempung Veteran Polis Soldadu (VCORP) komited ba pengawa pemansang bala kaban iya nyengkaum di Sarawak ngambika ulih ngasaika pengelantang dalam pengidup sepengudah pinchin gawa.

Beduduk ari nya, Pemangku Chairman Kor Polis Tentera Diraja (KPTD) Kolonel Kamaruddin Mustapa madah, mayuh ba raban kaban VCORP kelebih agi ba nengeri tu deka teulihka bantu rumah ari perintah.

"Bala kaban VCORP di Sarawak ke pengabis mayuh mujur teulihka bantu laban naka kediatu sida mayuh udah bisi rumah kediri empu.

"Projek ba baruh program 'Strategi Lautan Biru Negara' (NBOS) tu enda kala ngetu sereta bejalai enggau mujur enti dibanding enggau ba semenanjung," ku iya bejaku ngagai pemberita ditu, kemari.

Iya dikerandau sepengudah tembu berandau enggau raban veteran KPTD nyerumba pengerami nyambut 'Ulang Tahun KPTD Ke-60 Peringkat Wilayah Dua' di Kompleks Markas 1 Divisyen, Kem Muara Tuang, semak ditu.

Kelimpah ari nya,  Kamaruddin madah, VCORP mega ngemeratka pengelantang pendiau balu enggau anak kaban gerempung ke udah nadai.

"Mayuh agi pengawa ke dipejalaika kitai dikena mantu sida nengah aktiviti mensia mayuh baikka ari sukut ekonomi,  pelajar sereta bantu perintah," ku iya.

Sepengudah manggai 60 taun ditumbuhka, KPTD diatu bisi 217 pemesai enggau 3,078 lain pangkat.

Beserimbai enggau nyambut penumbuh nya kemari, ba renggat Wilayah Dua, Pegawai Memerintah Rejimen Pertama Kor Polis Tentera Diraja Leftenan Kolonel Ahmad Suardi Sandi nerima tabi basa ari Ketuai Baris Mejar Arif Jaafar begulai enggau tiga pemesai sereta 62 kaban lain pangkat.

Sarjan Mejar Rejimen pengawa bebaris iya nya Pegawai Waran 1 Mohazri Mohamad lalu pengawa bebaris tu diatur dalam timpuh jampat singkang dipasuk dua kontinjen, disempulang ari Tambo Batalion ke-13 Rejimen Askar Melayu Diraja.

Pengerami nya disempulang enggau pengawa ngelekatka pangkat ngagai tiga iku raban ari Staf Sarjan ngagai Pegawai Waran 2 (PPW2).

Mega bisi diatur iya nya pengerami nyuaka setipikit tanda basa ngagai Pegawai Pemerintah 9 Komp KPTD Sibu Mejar Khairuddin Abu Bakar ba penyulut iya ngarika rejimen dalam pekit ngurus setor renggat KOR, iya teulihka lumur tiga.

Sama bisi datai Pegawai Staf 1 Teknikal Lt Kol Abd Wahab Geoh.

mso-hansi-theme-font: minor-latin'>"Perintah melanja pukul rata urung RM1.2 juta ungkup sebuah ruang bilik. Komuniti nya mega diberi urung 20,000 hektar pemesai tanah ke ulih alai sida iya ngasu tauka ngiga pemakai nitihka pengidup sida iya ngelama tu," ku Awang Tengah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Rayat ke kena bungkur projek enda dikemelakang

Posted: 26 Nov 2013 02:57 PM PST

by Jacqueline David enggau Rengenyan Labang. Posted on November 27, 2013, Wednesday

KUCHING: Peranak menua ke kena bungkur projek ngaga tekat ai Murum ke dipindah ke Tegulang enggau Metalun endang udah dibai berandau dulu sebedau sebarang pengawa mindahka sida dipejalai.

Menteri Perambu Penatai Pemisi enggau Rampa Menua Datuk Amar Awang Tengah Ali Hassan madah, randau enggau komuniti ke nguan sitak nya lama udah dipejalai sebedau ngelangkar tekat ai nya belabuh.

"Nya kebuah atur nya digaga baka nya laban sebedau sebarang pengawa dipejalaika perintah, komuniti dia dibai berandau dulu sebedau mindahka sida lalu nya ngujungka sebenglah tempat ke dikumbai Batu Tungun enda dikachau," ku Awang Tengah.

Taja pan macham peminta ke enda patut dipadah ngagai Perintah, utai kedeka gerempung ke mit-mit  ari Perintah, Awang Tengah madah program mindahka komuniti tu udah diperambu enggau manah.

"Komuniti ke dipindah tu udah ditanya endur kedeka  sida iya pindah, bakani ku chura rumah panjai kedeka sida enggau perengka guna ke dikena sida.

"Semua pekara tu diberi atas peminta sereta sadang sida empu. Nya alai, enda patut enti bisi orang madah, peneka komuniti tu enda ditanya tauka enda dikemerat.

" Ba penemu ADUN di Dewan tu, komuniti ke kena pindah nya udah diberi perengka guna pengelantang pendiau sida sebedau tu. Ukai semina nya aja, rumah panjai nya mega disedia enggau paip, karan enggau penyikap bukai. Perintah mega meri ganti rugi, perengka guna enggau program ke ngemeratka jalai pengidup asal sida kena mantu sida ngatur pendiau diri dulu," ku iya.

Entara bantu ngatur pendiau diri ke diberi perintah, ku Awang Tengah, iya nya baka bantu kena pindah RM15,000 sebuah ruang bilik, ungkup jalai, sekula, klinik, enggau endur besembiang, bantu ninting bulan RM850 ke sebuah ruang bilik ke diberi dalam kandang tiga taun, ninting bulan RM500 tauka penyampau ke nyauka sebaka dalam taun ke-4, sukung ari pemun utai ke diguna di taun ke-5 enggau ungkup tanah 15 hektar alai bumai sereta bekebun nyengkaum program latih.

"Perintah melanja pukul rata urung RM1.2 juta ungkup sebuah ruang bilik. Komuniti nya mega diberi urung 20,000 hektar pemesai tanah ke ulih alai sida iya ngasu tauka ngiga pemakai nitihka pengidup sida iya ngelama tu," ku Awang Tengah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah deka mutarka penanggul rega rumah ke balat mar, ku Abg Jo

Posted: 26 Nov 2013 02:57 PM PST

KUCHING: Perintah beratika penanggul rega rumah ke balat udah niki ti ditapi rayat.

Menteri Pengawa Berumah, Datuk Amar Abang Johari Tun Openg (gambar) madah, penanggul nya udah dibantai maya sesyen debat Rang Undang-undang Pemansang Pengawa Berumah (Sekat enggau Lisin) 2013 ti udah dikemendar minggu nyin tadi.

"Perintah ngambi atur nyengkaum mayuh macham chara mutarka penanggul tu, nengah atur rumah kos murah enggau kos numbas pemar, ngaga rumah kos murah enggau rumah ke ulih diempu sereta ngena perengka fiska enggau wang," ku iya.

Keterubah, ku Abang Johari, perintah menua udah ngaga atur nyekat rega ke dua kategori rumah ke benung digaga, iya nya rumah kos murah enggau rumah numbas pemar.

Iya madah sekat rega rumah tu digaga nengah atur pengereja pengawa kena beratika sida ke bepemisi mimit enggau numbas pemesai ulih meli rumah diri.

"Perintah Menua udah netapka rega pemadu tinggi rumah kos murah naka RM50,400.00 seunit ba tengah enggau RM59,220.00 seunit ba tisi.

"Rumah kos numbas pemurah, rega ditetapka ba RM80,000.00 seunit ba tengah enggau RM100,000.00 seunit ba tisi," ku iya.

Iya madah baka tu lebuh nyimpul jurai penemu ba Hari Ke-7, Aum Kedua Renggat Ketiga, Aum Kunsil Nengeri ke-17 ditu, kemari.

Iya nandu, bisi dua piak, iya nya Perintah nengah Opis Pengawa Ngaga Rumah (JPN) enggau HDC sereta peribit disengkaum dalam pengawa ngaga rumah kategori tu.

"Tu deka nambah agi pemayuh rumah dalam makit enggau rega ke ulih dibeli mensia mayuh," ku iya.

Abang Johari madah, opis menteri iya enggau kerejasama ijinsi bekaul enggau pengawa ngaga rumah benung mansik atur enggau kuasa, rumah kos murah kena ngemanahka agi mekanisme ke udah bisi diatu sereta beratika ubah baru ke manah ke ulih dikena dalam atur tu.

Atur kedua, iya madah nengah chara nambah bekal rumah nengah atur mayuh macham projek enggau program pengawa rumah mensia mayuh nyengkaum pampang peribit.

Tu nyengkaum 'Skim Rumah Mesra Rakyat (RMR), Program Perumahan Rakyat (PPR), Skim Rumah Mampu Milik (RMM), Skim PR1MA, Skim Rumah Pertamaku, enggau Skim Pemilikan Rumah Mampu Milik Sektor Swasta (MyHome) ' ti ulih mantu mutar sereta ngenegapka rega rumah ke ulih dibeli sida ke bepemisi mit, numbas pemesai sereta sida ke baru belabuh gawa, ku iya.

"Nengah mayuh macham inisiatif baka tu, rega rumah ditetap nengah rega makit nengah subsidi rega rumah tauka subsidi kos rumah ulih Perintah enggau pengulih atur ke manah, ke ulih narit raban dalam kategori tu," ku iya.

Ketiga, strategi kena mutarka rega rumah niki, mega nyengkaum pemun atur fiskal enggau wang di renggat Perintah Besai.

"Dalam pekara tu, Perintah Besai udah meri kelala sekeda atur kena mutarka rega rumah ari niki.

"Tu nyengkaum nambah penyampau 'Real Property Gains Tax (RPGT)'  baka ke udah dipadahka Menteri Besai (PM) dalam Bajet 2014 bedau lama tu tadi, alai pekara nyual baru retanah dalam kandang 3 taun dichukai dalam 3 persin.

"Tang taja pia, pengawa melaba enggau pengawa 'flipping' enda entu balat di menua tu baka ke di semenanjung, kelebih agi di Lembah Kelang…..Atur baka nya ulih nyeliah penanggul baka nya nyadi di Sarawak," ku iya.

Kelimpah ari nya, palan wang ditagang nyendia mayar projek ke bisi bekaul enggau 'Developer Interest Bearing Scheme (DIBS)' kena nyeliah pemaju ngemasukka bungai ke dalam rega rumah.

"Atur tu dijangka ulih ngurang pelaba retanah ke tau ngasuh rega retanah ari majak niki," ku iya.

Iya madah, kelimpah ari nya mega, Bank Negara udah netapka lun rumah ketiga, orang ke ngambi lun nya nitihka pengabis tinggi 'loan-to-value' (LTV), iya nya 70 persin.

Penyampau LTV ku iya, dikarap ulih nyekat aktiviti nanam pukuk retanah sereta pelaba lebih (spekulasyen laban orang ke meli nya mesti mayar 30 persin ari rega kos rumah enggau pemisi diri dulu.

"Perengka guna fiskal bukai ke dikena Bank Negara, iya nya penyampau bungai enggau atur simpan tauka statutory reserve requirement ke ulih ditikika tauka dikurangka barang maya bepanggai ba pemerat maya nya enggau makit.

"Perintah deka terus beratika rega rumah ke majak nambah lalu enti ulih, deka mantaika atur penambah fiskal kena beratika rega retanah enda kelalu tinggi sereta ngenusahka pemeli rumah," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pelin Besai Pasar Debak ngemeratka pemansang sosio-ekonomi: Tengah

Posted: 26 Nov 2013 02:56 PM PST

KUCHING: Pelin Besai Pasar Debak ke ngemeratka pemansang sosio-ekonomi peranak menua dia udah dibantai ba Kaunsil Perambu Nengeri kena bulan Julai 2013 tu tadi tang bisi sekeda ubah digaga sebedau pelin nya diberi pemutus.

Menteri Perambu Penatai Pemisi enggau Rampa Menua, Datuk Amar Awang Tengah Ali Hassan madah baka tu lebuh nyaut tanya ari ADUN Saribas Radzi Sitam ke deka nemu penembu palan enggau pelin projek Palan Servis Supa-Tuie-Manggut ke mungkur pemesai 104 hektar ti udah dikemendarka Kaunsil Perambu Menua kena 19 Mei 2011 ke alai kos semua projek nya dipelaba urung RM34.4 juta.

"Dalam Lumpar Pemansang Malaysia (RMK10) ke-10, siling ungkup ke dikemendarka dalam RM5 juta kena mayar tanah ke kena bungkur nya, kereja nyukat, pengawa nukuh enggau ngaga jalai batu pemanjai 2 kilometer," ku Awang Tengah lalu nambah pengawa ngaga jalai enggau infrastruktur bukai udah belabuh lalu dipelaba tembu dalam bulan Mac 2014.

Kelimpah ari nya, iya madah, pelin enggau palan servis projek Tanjung Assam-Sebemban-Belingan, ke mungkur 179 hektar tanah udah dikemendarka Kunsil Perambu Menua kena 19 Mei 2011.

"Projek nya dipelaba deka ngena semua kos urung RM30 juta. Dalam RMK10, siling ungkup ke dikemendar bisi RM7 juta kena mayar kos ngambi tanah enggau ngaga jalai belakin 2 kilometer lalu pengawa ngaga jalai dipelaba deka belabuh pun taun 2014," ku iya.

Awang Tengah madah baka tu lebuh nyaut sekeda tanya ari ADUN bukai bekaul enggau sitak sida maya nyimput jurai ba di Aum Kedua Renggat Ketiga, Aum Kunsil Nengeri (DUN) ke-17 ditu, ensana.

Lebuh nyaut ADUN Engkilili, Dr Johnicol Rayong bekaul enggau apak sekula ke nadai surat tanah (pajakan rasmi), Awang Tengah madah Perintah Besai enggau Perintah Menua udah nemu pasal pekara tu.

Iya madah, Kepala Direktor Opis Tanah enggau Pengeraja Asal Malaysia udah numbuhka komiti 'Program Pemutihan Tapak Bukan Milik Pesuruhjaya Tanah Persekutuan' ke dikena opis menteri enggau ijinsi opis perintah besai di Sarawak.

Komiti nya ku iya, diarika ketuai opis perintah besai nyengkaum Opis Tanah enggau Survei (JTS) Sarawak.

"Tuju ke batang, iya nya ngelala status palan nya ngambika ulih dipindah orang ke ngempu ngagai Komisyener Tanah Perintah Besai. Ungkup Opis Pelajar Sarawak (JPS), iya mungkur sekula perintah aja, laban sekula ke dibantu modal tauka ukai perintah, baruh kuasa Lembaga Pengurus Sekolah nya empu.

Proses meresi tu dipelaba deka dikereja dalam timpuh ke lama. Taja pia, seagi-agi sekula nyadi kena enggau tuju alai belajar, Perintah Menua ngemendarka sekula nya terus dibuka ngambika pelajar nembiak enda dikachau," ku iya.

Iya nambah, komiti nya udah ngelala urung 440 premis sekula di serata menua Sarawak, ke alai 11 ari peyampau nya, di sitak DUN Engkilili.

"Dua buah sekula, SK San Semanju enggau SK Aping udah diberi pemendar endur sekula nya digaga ari Opis Kausil Perambu Nengeri. Program meresi nya sebengkah ari pengawa perintah ke terus dipejalaika di menua tu," ku Awang Tengah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.