» »Unlabelled » Perambu Belanja ngemeratka pemansang betanam betupi BorneoPost Online | Borneo , Malaysia, Sarawak Daily News » Berita Iban - New 2 Borneo

05:41:00

Perambu Belanja ngemeratka pemansang betanam betupi BorneoPost Online | Borneo , Malaysia, Sarawak Daily News » Berita Iban - New 2 Borneo

Perambu Belanja ngemeratka pemansang betanam betupi

Posted: 25 Nov 2013 01:50 PM PST

by Jacqueline David enggau Chris Bishop. Posted on November 26, 2013, Tuesday

Kenyau tiga taun ke udah, ungkup ari perintah besai ngayanka penyiru ngagai peranak di menua pesisir  

KUCHING: Perambu Belanja ke dibantaika Menteri Besai (PM) di Parlimen ungkup taun 2011, 2012, enggau 2013 ngayanka perintah besai ngungkupka mayuh agi belanja ngagai Sarawak enggau Sabah seraya ngemerat peranak ba kededua nengeri tu ke tebal ngachir ba pesisir.

Sapit Kepala Menteri Datuk Patinggi Tan Sri Alfred Jabu madah, nengah opis Menteri Betanam Betupi Moden enggau Pemansang Menua Pesisir, Perintah deka muka 46 buah opis Betanam betupi enggau stesen sereta ngemanahka agi stesen betanam betupi ke lama, ngambika bisi endur pemesai Opis Betanam Betupi mantu Program Transformesyen Perintah (GTP).

"Kandang 2 ½ – 3 taun tu ila kitai deka meda urung 46 stesyen enggau opis Betanam Betupi di menua pesisir deka bejalaika pengawa ngubah menua pesisir nengah program betanam betupi moden," ku Jabu.

Iya madah, ninting taun, urung 100 iku pelatih di Palan Betanam Betupi di Semonggok enggau sida ke bejalaika kos 2 taun lalu udah pas, dianjung ngagai stesen enggau Opis Betanam Betupi di menua pesisir ngemansangka pengawa betanam betupi.

Iya nambah, baka ba sitak komuniti Penan, pengawa perintah nengah Opis Menteri Betanam Betupi enggau Pemansang Menua Pesisir, ba program bekebun getah pera ke mungkur 70 ruang bilik bansa Penan di Long Beruang Ulu Baram, Perintah meri bantu ngajar raban bansa Penan nanam 4 hektar getah ke pelai ungkup genap ruang bilik.

"Ke diatu genap ruang bilik bansa Penan di Long Beruang semina teulihka RM200 asil tiap bulan, tang nengah program baka ke diberi Perintah diatu,  kandang 4 taun tu ila, projek nanam getah baruh jaga Lembaga Getah Malaysia (LGM) enggau bansa Penan empu, lebuh maya getah nya tau ditangkal ila, sida deka teulihka asil enda kurang ari  RM2,000 sebulan," ku Jabu seraya madah program tu tau munaska penyeranta.

Projek bansa tu mega ngerinduka raban bansa Penan ari sitak Sg Silat baka Kpg Long Jengkitan, Long Beek, Long Burau, enggau Long Tikan di Long Belian, sama bisi ati deka masuk program tu.

"Pia mega di Ulu Tinjar di Sg Paong di Apau Nyaring, enggau di Tutoh Apoh, bantu bekebun getah mungkur 500 ruang bilik bansa Penan ari 18 genturung pendiau semak nya, deka dibantu nengah Palan Servis Penan," ku iya.

Kelimpah ari nya mega, Palan Servis Penan di Long Beruang (masuk taun ke-3) mujur udah nyadi sebuah palan alai komuniti Penan begagaka kraf jari ungkup Malaysian Handicraft, palan nya mega bisi nyendiaka palan alai nembiak mit besekula, ICT, perengka guna digital enggau perengka  guna kena indu Penan begagaka pemakai tauka kuih ke tau nambahka penatai pemisi.

Naka ke diatu, bisi enam buah palan pemansang menua pesisir ke udah ditumbuh ba genturung pendiau bansa Penan, iya nya di Apau Nyaring, Tinjar, Long Luteng, Sg Patah, Long Lamai, Ulu Baram, Long Rayeh di Limbang enggau Ba'buboi di Selaan sereta 6 buah di Long Beruang enggau palan servis ke-7 di Tutoh Apoh.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah besai enggau nengeri deka majak siruka pemansang pelajar nembiak bansa Penan

Posted: 25 Nov 2013 01:49 PM PST

KUCHING: Perintah besai enggau nengeri terus deka ngangkatka pemujur nembiak bansa Penan ngulihka penyulut ba pelajar, sama nyingkang baka nembiak bukai besemekih ba pelajar sereta deka terus ngangkatka pemujur pengelantang pendiau sida berindik ari japai pemujur dalam pelajar.

Sapit Kepala Menteri, Datuk Patinggi Tan Sri Alfred Jabu madah, bepun ari sekula Projek K9 ke udah ditumbuh sereta ngayanka pemujur sekula nya meri pelajar ngagai nembiak bansa Penan ke diau ngelingi sitak nya, Perintah merambu nengah Opis Pelajar Nengeri (JPS) deka ngaga mayuh agi sekula bansa nya ba genturung pendiau bansa Penan.

"Perintah merambu ngaga mayuh agi sekula nyerumba sekula projek K9 jemah ila, ngambi kira peneleba ti diulih nembiak Penan di sekula Long Bedian, perintah nyadang nengah JPS, mayuh agi sekula bansa nya ulih ditumbuh ba genturung pendiau sida.

"Perintah Menua udah minta pemendar ari Perintah Besai ngaga sekula K9 ba sitak ke patut di genturung pendiau bansa Penan," ku Jabu.

Iya madah baka tu ba aum media lebuh ngelaluka 13 iku nembiak bansa Penan ke benung sereta ke udah tembu belajar di Palan pelajar Tinggi Perintah tauka Peribit (IPTA/IPTS) ba atur pengawa Betemu enggau Nembiak Penan ti dipelanja Program Pemansang Modal mensia – GTP Sabah & Sarawak, ba opis menteri nya di Bangunan DUN ditu, kemari.

Iya nambah, perintah ngemeratka pemujur nembiak bansa Penan di menua pesisir ulih dilatih sereta ulih ngurangka penanggul buta urup ba nembiak bansa Penan. "Tu singkang ke diambi perintah deka meda nembiak bansa Penan sama enggau nembiak bukai ngulihka pelajar sereta besemekih dalam ngiga penemu enggau peneleba," ku iya.

Jabu nambah, sekula Projek K9 di Long Bedian, di Ulu Sungai Apoh, Baram nyadi sekula chunto ke manah, alai nembiak Penan ke belajar dia enggau sitak ke besemak enggau nya, lebuh nembiak udah abis Primari 6 sereta deka masuk Pom 1, sida iya enda ibuh jauh besekula laban sida tau  nyambung Pom 1-3 ba sekula ke sama.

"Chara baka tu ngurangka jam sida iya nurun-niki ari endur sida iya diau ngagai sekula kelebih agi enti rumah sida iya jauh ari sekula tauka ngurangka penyauh nganjung anak sida iya besekula di Marudi tauka Miri.

"Nitihka peneleba kami, nembiak Penan enti dianjung jauh besekula (baka ngagai nengeri tauka menua ke besai), sida iya deka napi penanggul rama ba palan baru," ku iya.

Iya nambah, kaul entara diri sebilik Penan chukup terit, kekadang apai indai sida enggau jauh ari anak.

Nya alai, ku iya, enti ulih apai indai nembiak deka diau semak enggau anak sida iya lebuh anak sida iya besekula. Sekeda apai indai nembiak Penan minta bantu Perintah ngambika ulih berumah semak enggau sekula anak sida iya.

"Perintah betatika pemerat pelajar nembiak Penan, kelebih agi sida iya diau jauh ari pemansang," ku iya.

Jabu nambah baru, naka kediatu, urung 59  nembiak penan udah pas dalam pelajar sida, lalu sekeda udah bulih degree, diploma sereta mayuh ke benung belajar di IPTA/IPTS, lalu deka nambahka pemayuh nembiak Penan udah bulih pelajar ke manah.

"Singkang tu berat dalam pengelantang pendiau bansa Penan, nembiak sida iya udah pas tau ngiga pengawa ke manah, ngembuan pemisi ke besai asil ari pelajar enggau disiplin sida iya," ku Jabu.

Sama bisi ngulu atur pengawa nya kemari, Sapit Sekretari Perintah Menua, Datu Ose Murang, Direktor Opis Pemansang Menua, Datuk Kamal Husin, Ketuai Pegawai Eksekutif PPKS/ICATS Datuk Baharuddin Abdullah enggau Chairman Gerempung Pupu Bansa Penan, Temenggung Datuk Hassan Sui.

Dalam atur pengawa nya mega, sekeda nembiak bansa Penan ke bisi dikerandau madahka penguntung sida iya ulih belajar datai ngagai IPTA/IPTS sereta beterima kasih ngagai perintah ke balat ngemeratka pengelantang pendiau sida..

Lonnie Jalung, 21, ari Long Tegan, Limbang, anak ke dua ari tujuh iku diri menyadi madah, iya nyadi chunto ke manah ke bala menyadi iya ke benung besekula sereta diau di genturung pendiau Penan.

Lonnie ke baru tembu ngambi Diploma dalam 'Pentadbiran Awam', diatu benung nyambung 'Degree' di UiTM madahka bantu ke diberi perintah kemari, deka dikena mayar pulai baru PTPTN.

"Aku gaga ati, berasai untung lalu meri terima kasih ngagai Perintah ke ngemeratka pengelantang pendiau kami," ku Lonnie.

Susan Guro, 26 ari Long Pelutan, Baram, anak ke empat ari lima iku diri menyadi madah, iya nyadi chunto ke manah ba sida menyadi sereta komuniti Penan.

"Aku beterima kasih ngagai perintah laban udah mantu aku ngulihka pelajar, sama mujur baka nembiak bukai," ku Susan ke deka ngena bantu nya mayar PTPTN sereta baru udah abis ngambi 'Nursing' di Kolej SeGI lalu benung minta pengawa ba sepital perintah enggau peribit di nengeri tu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sarawak mujur matak penyampau RM5.6 biliun ari pemeranak puku

Posted: 25 Nov 2013 01:48 PM PST

KUCHING: Nengeri Sarawak udah mujur matak penyampau RM5.6 biliun puku ti diperanak ba 19 bengkah projek dalam timpuh bulan Januari ngagai Ogos 2013.

Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan madah, enggau nya Sarawak ba penuduk lumur dua nangkanka Johor (RM8.82 Biliun).

"Nitih riput Malaysian Investment Development Authority (MIDA), nengeri tu ngerikut RM5.6 biliun puku ke alai tebal agi diperanak ba industri bepelasarka besi.

"Puku ari menua luar nya datai ari Korea Selatan penyampau RM1.5 biliun (Silicon), Jepun RM1.4 biliun (Titanium Sponge) sereta China RM1.2 Biliun (Solar Grade Silicon Ingot and Wafer)," ku iya.

Iya mansutka penerang tu ba Aum Kedua Penggal Ke-3 Aum Kunsil Negeri Sarawak ke-17 kemari.

Iya ke mega Menteri Perengka Guna Mensia Mayuh netapka 35 projek ke beungkus RM106 juta udah dikemendar dikereja Komiti Pengatur Industri Nengeri (ICC) ti bepelasarka industri kayu ramu enggau pemakai.

Ku iya, semua puku ke udah diperanak di nengeri tu deka nyendiakka enda kurang ari 4,000 pengawa puang.

Ba kaul ke sama, Awang Tengah mega madah 37 buah kompeni ke diempu Bumiputera Sarawak udah diangkat nyadi Syarikat Kompeni Berpotensi Tinggi (TERAS) ke alai pemutus nya ditetapka perintah nengah TERAJU enggau Unit Pembangunan Usahawan Bumiputera (UPUB).

"Kompeni ke udah dipilih deka diembing ngambika ulih ngangkatka tikas pemanah kereja lalu nentuka ulih besemekih enggau kompeni bukai ba renggat menua enggau global.

"Kompeni mega deka nerima dana RM48.3 juta ari TERAJU nengah kerejasama institusi bank baka ke SME Bank, RHB Bank enggau MIDF," ku iya.

Kelimpah ari nya, Awang Tengah madah 17 buah kompeni Bumiputera Sarawak udah diberi geran RM55.5 juta nengah atur dana mudahchara ke disediaka TERAJU.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pengereja pengawa deka disikap ngena pamatau peninggi kalori

Posted: 25 Nov 2013 01:48 PM PST

KUCHING: Pengereja pengawa ke ngembuan pemerat tubuh ngelui ari ke patut sereta gawa di komplek perintah besai, Begunan Sultan Iskandar Simpang Tiga, Kuching deka diberi sebengkah gelang ti ulih matau tikas peninggi kalori dalam tubuh.

Menteri ba Opis Menteri Besai Datuk Joseph Entulu Belaun madah, program ti keterubah iya dipun tu deka dipejalai enggau manah lalu enti mujur, program ke sebaka deka dikerembai ngagai ijinsi perintah bukai.

"Kitai ngemeratka pengelantang genap pengereja pengawa ba opis perintah produktif lalu dikena nyapai juluk nya sida patut bepengerai.

"Enti regas, sida ulih mindah ngereja pengawa enggau nadai penanggul lalu enda mudah ngidap sebarang penyakit.

"Pengeregas sida mega ulih mantu ngurangka belanja perintah sereta ngelimat belanja sida sebilik ari bebelika ubat," ku iya.

Iya mansutka jaku tu ba sebengkah aum pengarang berita pengudah nyuaka cek RM30,000 ngagai Sekretari Perintah Besai Datuk Md Yahaya Basimin ungkup ngatur program 'Senaman 1Malaysia'.

Ku iya, gelang jari deka matau tikas kalori  dalam tubuh sereta mega meri tikas penyampau kalori dibuai maya ngemansutka peluh ke alai raban orang ke lebih berat patut bebendar nguruska tubuh diri ngagai tikas ke patut.

"Enti opis tu mujur meri asil ti dikearap, aku deka berandau enggau opis menteri pengerai ngambika tau nyendiakka mayuh agi gelang jari nya ngagai pemesai ba sekeda opis perintah ke bukai.

"Ngarapka penusah pengerai ba menua tu lebih agi sakit kemi manis ulih dikurang lalu kitai ngarap ulih nyapai asil ke positif pengudah dua tiga bulan,"ku iya.

Entulu mega netapka chara pemadu manah dikena nyeliah diri ari ditepan sebarang penyakit iya nya seruran ngemansutka peluh.

Ku iya, kelimpah ari kitai nyaga pemakai enggau makai ubat, gula mega tau pansut ari tubuh maya kitai bepeluh lalu semua nya ulih dipeda ba gelang jari ke dikena.

"Pekara ti pemadu dikemerat…..semua pengerja pengawa opis perintah chukup pengerai sereta regas lalu nya deka nentuka produktiviti tinggi," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RM3 biliun puku dikena ngemansangka 7,200 hektar tanah

Posted: 25 Nov 2013 01:46 PM PST

KUCHING: Perintah nengeri udah ngungkupka  penyampau RM3 biliun puku dikena ngemansang 7,200 hektar tanah ungkup pengawa industri di Kuching, Kota Samarahan, Bintulu, Miri, Sarikei enggau sekeda bandar mit baka Kapit, Lawas enggau Tanjung Manis.

Menteri Pemansang Industri Datuk Amar Awang Tengah Ali Hassan netapka nya sebengkah ari pengawa perintah ti deka ngemansang pekara industri ba semua bagi menua di nengeri tu sereta nyaup orang beranakka puku ari menua tu empu.

"Ungkup pengawa industri bepelasarka kuasa, perintah nengeri ngemansang 8,800 hektar tanah ba Samalaju Industrial Park lalu nya nyengkaum 210 hektar ke diungkupka ngagai industri mit enggau jelan pemesai (SME).

"Nambahka nya, sepenyampau 77,000 hektar tanah mega udah diungkupka ngagai Tanjung Manis Halal Hub," ku iya.

Iya mansutka jaku tu ba Aum Kedua Penggal Ketiga Sidang Dewan Undangan Negeri ke-17 ditu, kemari.

Ku iya, atur dagang enggau industri diatu udah nadai besekat lalu dikena nyapai juluk menua maju ba taun 2020, raban orang dagang enggau orang ke beranakka puku patut ransing agi ngerebut awak ke bisi ayan.

"Ngarapka orang beranakka puku ari menua tu lebih agi SME ngerebut awak ke disedia ngambika sama bela ngemujur juluk pemansang industri nengeri tu," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penumbuh MADC dikearap ulih ngenegap penyerakup

Posted: 25 Nov 2013 01:46 PM PST

by Judan Bungap. Posted on November 26, 2013, Tuesday

Nengah gerempung tu mega rebak baru diperansang ngerembaika pengawa betanam ngena jalai dagangJULAU: Komiti Pemansang Menua Meluan (MADC) sebengkah gerempung ke ditumbuh dikena ngenegap penyerakup rayat ba bagi menua nya ngelawa tikas pemansang ti betusun sereta nyengala.

Chairman Opis Penyanding Penemu 1Malaysia (MP1M) Sarawak, Datuk Joseph Salang Gandum madah, MADC gerempung ukai dikuasa (NGO) ngembuan tuju ngembing rebak baru bela merambu pemansang menua.

"Nambahka nya, MADC mega deka nyaup ngiga awak ke bisi disediaka perintah ke diungkup ngagai rebak baru baka awak pemansang ba pengawa betanam betupi nengah jalai dagang," ku iya.

Iya mantaika jaku tu maya bejadika Pengerami Ngepunka MADC di Rumah Entalai Jampong, Meluan ditu, ensana.

Ku Salang, nengah MADC, pemanah rampa menua Meluan mega ulih disungkak alai bejadika dagang temuai.

"Kelimpah ari nya, menua Meluan bisi pengelebih ba dagang temuai laban ngembuan sejarah baka Kubu Brooke nyengkaum Sungai Matup ke engkeman bendar alai pengawa memarin ti disempulang enggau sistem tagang.

"Meluan mega sebengkah menua ke ngemeranka pengawa betanam getah enggau lada ti ulih matak pemayuh temuai datai nemuai ngagai menua tu," ku iya.

Salang mega mai nembiak rebak baru ke diau ba menua pesisir nyikap diri nangika tinggal pemansang ari orang bukai.

"Anang guai mantul enti bisi sekeda orang ngaga petenah madahka penumbuh MADC bepelasarka politik.

"Lakka aja laban MADC endang ngembuan tuju deka ngempung rayat bela ngasaika pemansang ke betusun sereta nyengenda," tandu ku.

Berebak enggau nya Chairman MADC Belayong Jampong madah, MADC mega deka bekaul begulai enggau Gerempung Apai Indai enggau Pengajar (PIBG) SK Nanga Meluan ngambika ulih besaup ngangkatka tikas pelajar nembiak sekula.

MADC ku iya, bela nyaup perintah ngembing rayat senentang nerangka isu ke bisi nyadi enggau nyemetak.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.