Long Keluan endur ngepunka progam pemakai BorneoPost Online | Borneo , Malaysia, Sarawak Daily News » Berita Iban - New 2 Borneo |
- Long Keluan endur ngepunka progam pemakai
- Sekeda kaban PTR Balai Ringin, Simunjan, Pantu, deka matak diri ari gerempung nya
- MPP mujur ngumpul 85 persin chukai pintu, ku Lo
- Bangkai ditemu bangat ngenyinuka ati
- Hari Diri Sebilik Parlimen P. 214 Selangau ba Rumah Mulok Das
- SeDidik SEDC ngatur kerejasama enggau MSNS
| Long Keluan endur ngepunka progam pemakai Posted: 28 Nov 2013 11:17 AM PST KUCHING: Ari baruh program raban bansa ke diungkup ngagai komuniti Penan, perintah udah meri kelala Program Bantu Pemakai enggau Program Bakul Pemakai 2013. Long Keluan semak Long San di Pelilih Menua Miri dipilih endur ngemunka projek nya. Sapit Kepala Menteri, ti mega Menteri Pemansang Menua Pesisir, Datuk Patinggi Tan Sri Alfred Jabu madah, Program Bantu Pemakai (FAP) ditumbuh dalam bulan Julai 2013 ke bela dibantu Opis Pengerai. "Program tu diatur ngambi ulih nyendiaka pemakai ungkup anak mit ke kurang pemakai manah ke tubuh sereta sida ke biak ari 6 taun, ngambika sida nya ulih makai pemakai ke ngundan bansa pemakai ke ngemeratka pengerai sereta pemansang tubuh. "Seiku nembiak Penan ke gawa enda begaji dilatih meri pemakai, nimbang sereta nyendiaka penerang pasal pengerai ngagai apai indai. Pemesai ari opis pengerai ke gawa besemak enggau sitak nya deka mansik pemansang nya," ku Jabu. Naka ke diatu ku iya, program nya diterima enggau manah ulih komuniti Penan, ke alai 27 iku nembiak Penan di Long Keluan nerima penguntung ari program tu. "Taja pan agi tumu endur madahka pemutus ke di ulih sida iya ari program nya, tang taja pia, udah bisi pemujur ba pemerat tubuh nembiak Penan," ku iya. Jabu madah baka tu lebuh mantaika jurai Aum Hari Ke-8, Aum Kedua Renggat Ke-3, Kunsil Nengeri (DUN) ditu, ensanus. Sebengkah agi pemungkal projek ke baru dipunka pun taun tu tadi, iya nya Program Bakul Pemakai (FBP) ungkup komuniti Penan, mungkur Long Keluan, Long San, enggau Lusong Laku di sitak Belaga. Program tu dipejalai begulai enggau Perintah Menua enggau Besai besaup enggau MyKasih Foundation. "Nengah program tu, ruang bilik Penan ke teulihka penatai pemisi kurang ari RM1,500 sebulan, deka nerima bantu tu," ku iya. Urung 333 ruang bilik Penan ari tiga sitak, udah ditemu deka dipasuk dalam program tu. "Ruang bilik Penan ke udah dipilih tu ulih meli pemakai ba sekeda kedai ke udah di pilih ngena kad MyKasih. Kad nya deka ditambah peyampau RM100 sebulan. Tang taja pia, bantu ke tiap ruang bilik semina diberi dalam timpuh setaun nya aja," ku iya. Ba pekara ke sebaka, Perintah mega beratika bisi sekeda rumah Penan udah enda manah lalu patut dikemanah tauka dikemaru. "Perintah deka ngaga Program Meli Perengka Rumah kena Ngaga Rumah tauka Ngemanahka Rumah raban bansa Penan. Nengah program tu, kereban ke dikena ngaga rumah baka zink, enggau perengka bukai baka tukul deka diberi kena sida iya ngemanahka rumah sida." Ku Jabu. Kelimpah ari nya mega, taja pan jauh di menua ulu, Opis Pengerejister Bansa (JPN) enggau naka ulih ngerejister bansa Penan ke diau di menua ulu, ngambika sida bisi kad pengelala. Ari Januari nyentuk Oktober, JPN udah ngatur 17 operesyen ngagai sekeda endur pendiau Penan di serata menua tu. "Nitih rikut JPN, 8,145 Penan diatu udah bisi Kad Pengelala. Pengawa ngerejister 938 iku nembiak bansa Penan ke berumur 12 taun ke atas benung diatur diatu," ku iya.  To enable your comment to be published, please refrain from vulgar language, insidious, seditious or slanderous remarks. This includes vulgar user names.  |
| Sekeda kaban PTR Balai Ringin, Simunjan, Pantu, deka matak diri ari gerempung nya Posted: 28 Nov 2013 11:17 AM PST KUCHING: Sekeda ari kaban Gerempung Tuai Rumah (PTR) Balai Ringin, Simunjan enggau Pantu madahka diri udah saru sereta nyesal nyereta gerempung lalu deka matak diri. Kebuah pia ku Penghulu Pelie Jumbu dalam penerang berita, bala tuai rumah enggau pengari tuai rumah madahka diri saru ke batang tuju gerempung ti nyaga pengelantang sereta ukai tuju politik. Iya madahka, penumbuh Gerempung Tuai Rumah (PTR) enda patut nyadika kereban politik dikena mejal perintah ngemaruka servis nyadi tuai rumah tauka ketuai raban bansa. "Ngenang penemu ke dipansutka Chairman Gerempung Tuai Rumah Balai Ringin, Simunjan enggau Pantu, Peter Mooney dalam Utusan Borneo apin lama ti madahka 37 iku tuai rumah ti udah abis timpuh nyadi tuai rumah minta servis dikemaru beduduk ari penegap kaban tu ke nyadi penyukung Barisan Nasional (BN). "Iya (Peter) mega nyebut dalam penerang iya, Kaban Kunsil Sitak Balai Ringin Snowdan Lawan enggai nulung ngemaruka servis sida nyadi tuai rumah, ulah nya mandangka pekara tu bisi kaul enggau politik. "Gerempung (PTR) enda tau dikena nyadi kereban politik sereta enda patut dikena mejal ngambika servis (tuai rumah/ketuai raban bansa) dikemaruka. "Mayuh tuai rumah enggau pengari tuai rumah madah ngagai aku, sida saru penemu ba tuju penumbuh PTR ti nyaga pengelantang sereta ukai kuing nuju politik. Diatu bala tuai rumah enggau pengari tuai rumah madahka diri nyesal nyereta sereta deka matak diri ari penubuh PTR nya," ku Pelie. Iya madahka pengawa nyirika tuai rumah tauka ketuai raban bansa bepanggai ba atur perintah nengeri. Skim Perlantikan Ketua Kaum Perenggan 3.4 Surat Pekeliling Bilangan 165/EO/2604 kena 2 Oktober 1980, nerang sereta madahka, servis ketuai raban bansa bepanggai ba perintah sereta ulih diketuka nengah atur meri sebulan notis tauka diganti ngena bayar sebulan elawin, ku iya. "Aku ti nyadi penghulu ba kandang endur tu deka madah, pengawa nyirika seseiku tuai rumah tauka ketuai raban bansa bepelasarka atur perintah nengeri di baruh Opis Kepala Menteri. "Pengawa nyiri enggau ngemaruka servis nyadi tuai rumah tauka ketuai raban bansa bepelasarka kriteria nyengkaum penuai umur, regas gawa, bepengerai, bisi penyulut gawa sereta pemanah kaul enggau perintah nengeri tauka pengari," ku iya. Ku iya, pengawa nyiri keterubah nyadi tuai rumah tauka ketuai raban bansa bepun ba timpuh empat (4) taun mangku pengawa lalu udah nya dikemaruka setaun tauka dua taun. Taja pia tu bepanggai ba perintah nengeri di baruh Opis Kepala Menteri. Ba sitak Kunsil Nengeri Balai Ringin urung 134 iku tuai rumah ti udah diberi surat chiri lalu tebal agi timpuh pangku pengawa sida nya nyau deka abis sereta urung 60 iku pengari tuai rumah bedau diberi surat chiri. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| MPP mujur ngumpul 85 persin chukai pintu, ku Lo Posted: 28 Nov 2013 11:16 AM PST KUCHING: Majlis Perbandaran Padawan (MPP) mujur ngumpul 85 persin chukai pintu ungkup taun 2013 lalu nyapai Indek Pengulih Pengawa (KPI) ti udah ditetap. Chairman MPP Lo Khere Chiang madah, penyampau nya nambah enti dibandingka enggau taun 2012 (80 persin) lalu mandangka servis MPP manggai ba tikas ke manah. "MPP udah netapka KPI ba tikas 85 persin ungkup taun 2013. Diatu kami udah mujur ngumpul lebih ari 80 persin chukai pintu. "Penambah chukai pintu ti dikumpul ari 80 ngagai 85 persin mandangka MPP mujur ngaul rayat enggau manah ke alai servis ke disedia manggai ba tikas dikearapka semua,"ku iya. Iya mansutka jaku tu ba siti aum pengarang berita pengudah ngulu aum penuh raban kunsilor ke diatur ba Opis MPP, Padawan ditu, kemari. Lo madah, pemujur nya dijapai asil kerejasama manah ba raban pengereja pengawa MPP ti seruran ngemeratka pemujur tiap projek ke dipejalai. Iya mega netapka duit agih sepenyampau RM20 juta ari perintah nengeri enggau besai ungkup program pemansang dalam kandang endur ke dikuasa MPP ba taun 2013 udah dipelanja enggau manah. Ku iya, agih belanja nya udah dikena nyendiaka perengka guna sereta ngemanah kandang endur ungkup pemaik enggau pengelantang semua rayat. "Aku ngasai MPP udah ngereja pengawa enggau manah ba taun 2013 tu, semua duit agih udah dikena enggau chukup engkeman ba program pemansang. "Kitai mujur nembuka projek ke diperambu nitihka timpuh ke udah ditetap," ku iya seraya ke madah sekeda projek benung dipejalai maya ke diatu. Kelimpah ari nya, Lo mega minta program Pemansang Komuniti ti diatur tauka nerima duit agih RM200,000 ari Opis Menteri Kunsil Kandang Menua enggau Pemansang Raban Bansa Dato Sri Wong Soon Koh dilanjar ngagai taun 2014. Ku iya, program pemansang komuniti nya mujur matak mensia mayuh begulai enggau perintah kelebih agi MPP lalu udah mujur dipejalai. "Kitai ngarapka program tu dilanjarka ngagai taun 2014 lalu ngarapka ulih nerima duit agih ke sama,"ku iya. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Bangkai ditemu bangat ngenyinuka ati Posted: 28 Nov 2013 11:16 AM PST ROBAN: Gaya nyelai baya ke dianggar sepemanjai 16 kaki, ngusakka tubuh enggau balat ti ngujungka ai begelenggang besai sebedau ngeluwak bangkai nadai bepala, nadai lengan enggau kaki ba Sungai Seblak, bangat ngaitka ati, tumu pagi kemari. Mani Mangai, 50-an, seiku peranak ari Rumah Mawan Ason, Empayak, Roban, ke meda ulah baya nya madah, dalam sepemanjai umur idup, iya nadai kala meda enggau mata iya empu utai nyelai baka nya. "Kami bangat tekenyit lebuh seiku baya sepemanjai 16 kaki bechura chelum, enda memukai ayan enda jauh ari perau ke ditepan kami lalu ngusak tubuh iya enggau balat sebedau ngeluwakka utai ari nyawa iya," ku Mani. Ku iya, iya berasai amat takut sereta iran ati nama utai ke nyadi bangat nyelai nya. "Keterubah, kami melabaka baya nya ngeluwakka kambut plastik, tang enda lama udah nya kami ensium bau but ari utai ke udah diluwakka baya nya. "Nangika pekara ke enda manah nyadi, kami terus ngenyemakka perau kami enggau utai nya lalu nyungkit enggau sengayuh. "Udah kami mujur nyungkit utai nya, kami tekenyit bendar lebuh tepedaka utai nya sebagi ari kereban tubuh mensia, iya nya bagi ari punggung nyentuk ke bau," ku iya madah ngagai pemberita ba pendai rumah panjai nya, kemari. Ku Mani, maya penyadi nya, sida benung dalam pejalai ngabas ginti baya ke ditan sida, ba pengawa nangkap baya ke dipelaba udah nagup seiku peranak ari rumah panjai nya, kena lemai Hari Lima tu tadi. "Sepengudah kami tetemuka bangkai nya kami terus nikal baru pulai ngagai rumah panjai," ku tandu iya. Bangkai nya dipelabaka sebagi ari bangkai mansa tagup baya siga ke dikangau enggau nama Bujang Seblak, iya nya Adrian Thomas, 32, seiku orang ke gawa berikan. Bangkai nya udah ditemu Mani begulai enggau tiga iku bakih iya ke bukai, iya nya seiku manang baya ke tebilang nama di menua nya Indet Senabong, apai mansa sereta Tuai Rumah Embol ke mansang ngabas ginti baya ke ditan ba mayuh endur ke suah dipeda nyadi palan baya ayan. Indet Senabong, 50, manang baya madah, palan endur sida meda penyadi nyelai nya urung 500 meter penyauh ari palan mansa dipelabaka ditagup iya nya ba Nanga Sungai Budak. "Ku peranak menua nya, palan nya dikumbai enggau nama Teluk Berauh. Utai ke nyelai nya nyadi urung pukul 9 pagi. "Ba kitai kelai tu madahka utai ke manah lalu tu mandangka pengelebang mansa bisi kaul enggau baya lalu mutarka sangka mensia mayuh madahka mansa lebang ba sebelah kampung ke besemak, lemas enggau sangka ke bukai. "Berebak enggau nya mega, penyadi tu nunjukka baya udah ngasaika pemedis ketegal penyalah iya," ku iya. Pia mega, ku iya, kitai ngarapka pengawa nangkap baya siga ke nagup mensia jemah ila mega mujur. Indet tebilang enggau pengelandik iya nundukka baya, nitihka pemujur ngelama tu iya udah nangkap seiku baya sepemanjai 12 kaki ba sungai ke sama kena 3 Julai taun tu tadi, ke udah nagup bini Tuai Rumah Embol ari Sungai Anak iya nya Siah Munsong, enggau sekali tampar ba pala baya nya. Kelimpah enggau nya, maya mensia mayuh begelumu ba laman pendai rumah panjai nya seraya nganti penatai polis mai bangkai nya ngagai Sepital Saratok ngambika dipansik enggau silik, mensia mayuh tekenyit ninga berita ke dipadah ari sekeda pemesai Opis Nyaga Jelu Siga Sarawak madah, maya sida nengah sungai seiti ginti ke ditan manang baya nya, bisi kelai bulih. Pengudah ninga berita nya, Indet, Mani enggau Tuai Ruamh Embol terus begeguai ngelawa palan ke dipadahka nya. Taja pia, urung pukul 2 lemai kemari, sida pulai ke rumah panjai lalu madah ginti nya bedau agi bulih. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Hari Diri Sebilik Parlimen P. 214 Selangau ba Rumah Mulok Das Posted: 28 Nov 2013 11:15 AM PST SELANGAU: Program Hari Diri Sebilik Parlimen P.214 Selangau udah diatur enggau mujur ba Rumah Mulok Das, Bukit Dinding, Jalai Selangau/Mukah, empai lama tu tadi. Program nya digulu urung 400 iku bala ke diatur Opis Menteri Pemansang Pengintu Pengalantang, Orang Indu enggau Ruang Bilik, Opis Pemansang Orang Indu P.214 Selangau enggau Pati PBB Bukit Dinding. Berebak enggau nya, pengawa numbuhka Pati PBB Ranting Bukit Dinding bela diatur seretai lalu ngerijister raban pati. Sekeda ari pengawa ke bisi diatur maya tu iya nya beripai, makai beserumpu, betanda poco-poco, pekit ngechat, karaoke kelimpah beperindang enggau artis tebilang, Ranee Pat. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| SeDidik SEDC ngatur kerejasama enggau MSNS Posted: 28 Nov 2013 11:15 AM PST KUCHING: Gerempung Pemansang Ekonomi Sarawak (SEDC) nengah SeDidik SEDC komited deka bekerejasama enggau Majlis Sukan Negeri Sarawak (MSNS) ngelala sereta nempa atlit baru gimnastik ti bekualiti. Chairman SEDC, Datuk Talip Zulpilip madah, nya mandangka SEDC majak chakah sereta deka nyingkang lebih jauh agi ke mua. "Kami (SEDC) amat komited deka bekerejasama enggau institusi lumba enggau main ti bepeneleba baka MSNS ba pengawa ngelala enggau nempa atlit baru gimnastik ti bekualiti. "Kelimpah ari MSNS, kami SEDC mega besedia deka bekerejama enggau ijinsi tauka gerempung bukai," ku iya. Talip ti mega nyadi Menteri Muda Dagang Temuai mansutka pekara ba pengerami nyain sempekat pemereti ati (MoU) entara SeDidik SEDC enggau MSNS ti diatur ba Menara SEDC ditu, lemai kemari. Tuju sempekat nya dikena nempa kerejasama ba pengawa ngelatih ngena kereban lumba enggau main ti betul sereta perengka guna di gymnasium Stadium Negeri kelimpah ari ngumpul sumber intelek enggau betukar penemu baru entara kededua institusi. Ba pengerami ti sebaka, Direktor MSNS, Francis Nyurang Ding madahka nya keterubah iya MSNS nempa kerejasama enggau SEDC. Iya ngarapka nengah kerejasama nya ulih ngelala sereta nempa mayuh agi atlit gimnastik Sarawak ti bekualiti jemah ila. "Gimnastik sebengkah lumba enggau main ti nyelai senentang kereban tauka perengka guna enggau atlit. Tambah mega di Sarawak semina sebengkah aja palan ke bisi nyendiaka semua nya iya nya MSNS. "Ngarapka nengah kerejasama tu kitai ulih ngemansang lumba enggau main gimnastik ngagai renggat ti lebih tinggi agi kelimpah ari dikena ngelala sereta nempa atlit gimnastik ti bekualiti, ambika chunto baka Esmelda Arecia," ku Francis. Pengawa nyain MoU nya entara SeDidik SEDC ti diarika Pemangku Pengurus Besar SeDidik SEDC Siti Rodziah Bunsu Drahman enggau Francis enggau Penulung Direktor MSNS Lucas Kalang Laeng ti ngarika MSNS, sereta dikemataka Talip. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |