Lisin kuari Bukit Serumbu patut dibatak pulai BorneoPost Online | Borneo , Malaysia, Sarawak Daily News » Berita Iban - New 2 Borneo |
- Lisin kuari Bukit Serumbu patut dibatak pulai
- Sebengkah palan endur masa pengelandik seiku antropologi deka dipenyadi
- Wan: Anang bekelikuh pasal Sempekat 18 enggau 21 Poin
- Penumbuh BOCMB dikearap mantu ngerembai pengawa dagang di nengeri tu
- PTR minta servis 37 iku Tuai Rumah disambung baru
- Apai indai dipinta besaup enggau pengajar nyapai penyulut anak ba pelajar
| Lisin kuari Bukit Serumbu patut dibatak pulai Posted: 24 Nov 2013 11:29 AM PST
Ba sebengkah pengawa bantah ke digulu enda kurang ari 100 iku orang di Batu Kasah besemak enggau Bukit Serumbu kemari, sida minta lisin kuari dikinsil ngambika bukit ti ngembuan mayuh sejarah lama nya mengkang baka gaya asal. Diuluka Stephen Sinyum Miti,76, peranak menua nya netapka runding seati ngelaban sebarang pengawa ngereja batu 'granite' ba bukit nya ti udah diuan urung 200 taun ke udah. "Kami ari genap 17 genturung pendiau ditu beserakup ngelaban sebarang pengawa ngereja batu ba Bukit Serumbu. "Kami minta lisin kuari dikinsil lalu pekara tu diputarka enggau manah, enti enda kami deka ngiga jalai bukai nagang sereta nentuka bukit tu mengkang baka asal. "Bukit Serumbu udah diperimba bala aki ini kami dulu agi ari jeman perintah Brooke, lebih 200 taun ke udah, enggau kebuah nya kami ngembuan hak ba bukit tu," ku iya. Nitihka penerang ke ulih dipechaya, lisin kuari tetap dikeluar taja pan EIA ke dianjung kompeni dikinsil, tandu iya. Sinyum, ke kala nyadi MP Bau-Lundu ba taun 1960 mega madah bukit nya enda patut dikeruga ketegal semua orang ke diau ngelingi bukit nya bekenaka ai bukit nya ba pengidup ninting hari. "Bukit Serumbu mega kaya enggau macham utai tumbuh enggau jelu siga lalu suah nyadi palan endur raban orang bejalaika pansik. "Rajah James Brooke mega kala ngaga rumah ba atas bukit nya kelia, sejarah nya patut diintu manah ngambika ditemu raban nembiak baru ke alai perintah mega merambu ngemansang bukit nya nyadi palan dagang temuai," ku iya. Lisin kuari udah dikeluar kenyau ari taun 1997 lalu diatu kompeni udah berengkah meresi sekeda kayu besemak enggau tanah NCR orang ba genturung pendiau nya. Lima surat bantah kala dianjung ngagai ijinsi ke bekaul, minta lisin dikinsil tang nadai kala dibalas lalu iya ke penudi udah dianjung ngagai Opis Kepala Menteri kena 13 Oktober tu tadi. Ku Sinyum, kompeni udah berengkah nebang kayu sereta ngaga jalai dalam timpuh dua bulan tu lalu enti bukit nya dikereja, urung 10,000 orang ari 17 genturung pendiau dia deka dituntung penusah ketegal pengidup sida ngelamatu sigi bepanggai ba asil sereta ai bukit nya. Tujuh belas genturung pendiau diau ngelingi bukit iya nya Peninjau Lama, Peninjau Baru, Sega, Kopit, Segobang, Sogoh, Skio, Seromah, Seropak, Skiat Baru, Skiat Lama, Merembeh, Sibulung, Podam, Skandis Lama, Skandis baru enggau Sungai Pinang.  To enable your comment to be published, please refrain from vulgar language, insidious, seditious or slanderous remarks. This includes vulgar user names.  |
| Sebengkah palan endur masa pengelandik seiku antropologi deka dipenyadi Posted: 24 Nov 2013 11:29 AM PST KUCHING: Sebengkah palan endur meri basa ngagai seiku pakar Antropologi, Explorer, Naturalist enggau pakar Biologi Alfred Wallace deka dipenyadi di Sarawak ngambika tau ngangkatka menua tu ba pekara 'Sains Hayat'. Menteri Dagang Temuai Datuk Amar Abang Johari Tun Openg madah, penumbuh palan nya dijangka deka nagngatka pampang pengawa dagang temuai menua tu bepelasarka pelajar Sain Hayat ke ulih dikemansang nyadi sebengkah produk dagang temuai. Iya madah, atur nya sama singkang enggau pengawa Perintah Menua kena narit mayuh agi orang ke bepelajar dalam pekara antropologi, explorer, naturalist enggau pakar biologi datai ke Sarawak ngiga penemu pasal pekara tu. "Kami merambu deka bejadika sebuah palan ngena nama beserimbai enggau nama seiku pakar antropologi ke tebilang, Alfred Wallace ke deka dikait enggau palan Charles Darwin di London ngulihka penemu bekaul enggau Sains Hayat. 'Reti nya, kitai bisi utai ke manah nengah penemu antrologi datai ke Sarawak ngambika bisi penemu ke silik agi pasal sabjek tu," ku iya. Iya madah baka nya lebuh bejaku ba pengawa Makai Lemai Gala Gelar Pengawa Dagang Temuai Kenyalang Sarawak, ngarika Kepala Menteri Pehin Sri Abdul Taib Mahmud ditu, malam kemari. Kelimpah ari nya mega, iya madah, opis menteri sida iya udah merambu sebengkah pekara ke setipak enggau menua deka narit urung 35 juta temuai ngagai Malaysia manggai taun 2020. "Nyangka kitai ulih narit urung 20 ngagai 30 persin penyampau nya ke ulih dibai nnemuai ngagai Sarawak," ku iya. Abang Johari mega madahka, Malaysia Airport Berhad (MAB) deka ngemesaika agi terminal 1, 2, 3, enggau 4 Penyangkai Bilun Antarabangsa Kuching (LATK) laban beratika sitak nya nyau majak mit sereta enda chukup dikena napi pemayuh temuai ti deka datai kitu jemah ila. "Aku udah baum enggau sida MAB lalu sida iya besetuju deka ngaga besai agi terminal LTAK kena napi pemayuh temuai. "Pengawa ngaga besai agi iterminal nya deka digaga enggau belanja RM35 juta lalu dipelaba tembu manggai taun 2020," ku iya. Sama bisi ngulu atur pengawa nya kemari, kededua Menteri Muda Dagang Temuai, Datuk Talib Zulpilip enggau Datuk Gramong Juna, Sekretari Perintah Menua Tan Sri Datuk Amar Mohamad Morshidi Abdul Ghani enggau Sekretari Mendam Opis Menteri Pegawa Dagang Temuai, Datu Ik Pahon Joyik. Kelimpah ari nya mega, urung 20 penerima gelar ari hotel, restoran, kompeni dagang temuai, media chelak enggau orang bukai ke mujur ke udah ngangkatka nama menua Sarawak dalam pekara dagang temuai, meri kelala pemujur, kreativiti enggau kualiti servis ngangkatka industri dagang temuai menua. Gelar besai 'Hornbill Special Awards' dimenang Datuk Wee Hong Seng ba kategori ngatika kediri, kelimpah ari Palan Pengelandik Seni Sarawak Cultural Village nyadi pemenang kategori gerempung. Kelimpah ari nya, kategori servis endur diau, dimenang Hotel Riverside Majestic (hotel lima bintang), Hotel Imperial Palace Miri (hotel empat bintang) enggau New World Suites Bintulu (hotel tiga bintang). Ba kategori program nyemilik dimenang Annah Rais Bidayuh. Ba pekara penerebai bilun, MasWings nyadi pemenang ke kategori servis pengangkut kelimpah ari majalah Borneo Talk nyadi pemenang ke kategori media chelak. Dalam kategori restoran, 'The Steakhouse Hilton, Kopitiam Yeow Kee enggau Top Spot Food Court' nyadi pemenang ke kategori restoran, kedai kopi bistro enggau palan makai. Lis pemenang bukai, Helmi Batek Craft ke kategori kraf jari, Taman Negara Gua Mulu ke kategori endur palan dagang temuai enggau Taman Budaya Sarawak ke kategori endur dagang temuai. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Wan: Anang bekelikuh pasal Sempekat 18 enggau 21 Poin Posted: 24 Nov 2013 11:29 AM PST SANTUBONG: Sempekat 18 Poin enggau 21 enda ibuh dikelikuhka agi laban sempekat nya udah dipasut dalam dalam Undang-undang menua tu. Sapit Menteri Dalam Menua, Datuk Wan Junaidi Tuanku Jaafar madah iya nemu bisi sekeda raban orang politik ke deka mechah belah Sabah enggau Sarawak. "Kami nemu sapa ke seruran nyebut deka bejuraika pekara nya lalu pia mega bisi sekeda Kaban Parlimen (MP) deka mantaika Pekara 18 enggau 21 Poin Sempekat nya. Iya ditagang Parlimen laban pekara nya enda ibuh dikelikuhka agi. "Laban sempekat nya udah dalam undang menua. Enti deka nemu penanggul tauka utai ke bendar nyadi dalam 1963, iya nya udah 'Cobbold Commission' ngaga pansik, danji nya udah dijapai lalu disain," ku Wan Junaidi. Iya madah baka tu lebuh bejaku ba atur pengawa bejadika program Nagang Pengawa Salah di Dewan Serbaguna, Kpg Santubong, semak ditu, kemari. Iya nandu, tembu semua pengawa nya, sempekat nya dipasuk ke dalam undang-undang menua nengah 'The Act of Malaysia' ke dikemendarka 18 Ogos 1963. Taja pia ku iya, Indonesia enggau Filipina mantah penumbuh Malaysia, udah nya digaga sebengkah aum ke dikumbai sida iya, 'Manila Court Summit' ke bejuraika baru sereta bisi mai sereta United Nations (UN) nyengkau betanya ngagai mensia mayuh ke diau di Sarawak enggau Sabah, enti nya betul tauka enda. "Tang riput ari 'Cobbold Commission' diserah ngambika dikemendar ulih UN, lalu iya disain kena 16 September, ukai entara 18 ngagai 31 Ogos. "Isi undang-undang tauka peneka orang Sabah enggau Sarawak dipasuk ke dalam undang-undang menua. Bisi sekeda enda disengkaum dalam sempekat nya tang dipasuk ke dalam undang-undang lalu diputar nengah undang-undang perintah nitihka pemerat tanah adat," ku iya. Tang bisi sekeda orang politik patut macha tauka meda pekara nya baru, laban udah 50 taun merdeka, pemisi udah tampak sereta pengelantang pendiau dalam gaya ke likun, ku iya. "Enti bisi pengurang, tau dibai berandau sama diri, enda ibuh dibai ngagai parlimen. Aku nadai nyebut sapa semina aku ngelalau anang ngaga penyarut ketegal pekara tu. Tu dikumbai orang enda ngenang budi. Ke diatu, kami nadai ngambi sebarang atur, aku semina ngelalau aja…Anang salah singkang," ku iya. Sama bisi ngulu atur pengawa nya kemari, Kepala Polis, Datuk Mohd Sabtu. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Penumbuh BOCMB dikearap mantu ngerembai pengawa dagang di nengeri tu Posted: 24 Nov 2013 11:28 AM PST KUCHING: Menteri Pekara Wang II Dato Sri Wong Soon Koh (gambar) pechaya mayuh agi atur dagang deka ngerembai dalam nengeri tu pengudah Bank of China (Malaysia) Berhad (BOCMB) bejalaika pengawa ditu.. Iya gaga pengudah bank nya numbuhka pampang keenam ngambika tau meri serbis ba ikas pemadu manah ungkup orang dagang di Sarawak sereta orang ke nemuai ari menua luar. "Pengudah nengeri tu ngembuan ekonomi enggau politik ti meruan nyadika kebuah bank numbuhka pampang ditu. "Perintah Sarawak ngelaluka mayuh agi orang tauka kompeni ari menua luar datai beranakka puku ditu kelebih agi ba palan SCORE,"ku iya maya bejadi Bank of China (Malaysia) Berhad, pampang Kuching enggau Palan Serbis Visa China di Wisma naim ditu, kemari. Wong ke mega Menteri Kunsil Kandang Menua enggau Pemansang Raban Bansa pechaya bank nya deka nyendiakka bemacham serbis ungkup semua. Ngenang senentang Palan Serbis Visa China, iya pechaya serbis online ti disedia deka meri pemaik ngagai orang dagang enggau orang ari menua luar ke datai nemuai kitu. Semua orang ulih netapka maya betemu nengah sistem online lalu tu manah agi ari chara lama sereta ngelimat jam betusun ba kaunter, tandu iya. Sebedau Kuching, Bank of China bisi udah ditumbuhka ba Muar, Penang, Klang, Johor Bahru sereta Puchong. Pinta Visa China bisi diurus ba ringkat 2, Wisma Naim, Batu 2 1/2, Jalai Rock Road tauka ngelawa ngagai www.visaforchina.org. Palan nya dibuka berengkah jam 9 pagi nyentukka 3 lemai tiap Hari Satu ngagai Hari Lima. Sebarang penerang tau diulih ngengah lumur 082-259885/ 016-8855612 tauka fax: 082-256885. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| PTR minta servis 37 iku Tuai Rumah disambung baru Posted: 24 Nov 2013 11:28 AM PST SRI AMAN: Seraban 37 iku ketuai ba sitak Kunsil Nengeri (DUN) Balai Ringin ke enda sejalai enggau Kaban Kunsil Nengeri Balai Ringin, Snowdan Lawan mengkang bedau disambung servis nyadi tuai rumah nyentuk ke diatu. Berindik ari nya, Serakup Tuai Rumah (PTR) ari kandang menua Balai Ringin, Simunjan enggau Pantu minta perintah nyambung baru servis nyadi tuai rumah ba rumah panjai sida. Chairman PTR Kandang menua Balai Ringin, Simunjan enggau Pantu Kaunsilor Peter Mooney Lingau madah, penanggul nya nyadi bisi bekaul enggau ulah Snowdan ke nyadi pengari rayat Balai Ringin. Ku iya, semua tuai rumah nyengkaum sida ke bedau disambung baru nyadi tiga bengkah kandang menua nya penyukung kuat Barisan Nasional (BN) sereta udah nyaup Snowdan menang ba Pengawa Bepilih Kunsil Nengeri (PRN) dalam taun 2006 enggau 2010 suba. Ku Mooney nandu, bala tuai rumah nengah PTR Balai Ringin, Simunjan enggau Pantu sama bela bisi nyaup BN menang besai ba Parlimen P.202 Sri Aman maya PRU 13 tu tadi. "Nya ngelaika semua sida (tuai rumah) nya penyukung kuat BN, tang nama kebuah 37 Tuai Rumah tu enda disambung baru nyadi ketuai?" tanya Mooney. Iya bejaku munyi tu ba aum enggau pengarang berita sepenembu aum PTR Kandang menua Balai Ringin, Simunjan enggau Pantu di Balai Raya, Rumah Alex Libau, Ensebang Kuari Baru, Balai Ringin, Serian, ensanus. Sama bisi ngulu aum nya, pengari Pengemata PTR Balai Ringin, Simunjan enggau Pantu, Abah Unggie, luyar gerempung nya, Melaka Nisau, Tukang wang gerempung nya, Tuai Rumah Hearold Ernest, 73 iku tuai rumah enggau sekeda kaban gerempung nya. Seraban 37 iku Tuai Rumah ari kandang menua Balai Ringin enggau Simunjan nya udah abis timpuh nyadi tuai rumah kenyau ari taun 2012 nyentuk ke bulan Oktober tu tadi. Mooney mega madah, Snowdan enggai nyaup nyambung baru servis bala tuai rumah nya ketegal PTR Balai Ringin, Simunjan enggau Pantu nya nadai bekaul enggau iya (Snowdan). Ku iya nandu, Tuai Rumah ukai dichirika ADUN tang dipilih rayat dari rumah panjai tauka genturung pendiau nya empu. "Aku ke nyadi Chairman PTR Balai Ringin, Simunjan enggau Pantu minta perintah nyambung baru servis 37 iku tuai rumah nya ngambika sida ulih gawa ke rayat enggau perintah BN ila," ku iya. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Apai indai dipinta besaup enggau pengajar nyapai penyulut anak ba pelajar Posted: 24 Nov 2013 11:27 AM PST SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis ngelalau bala apai indai di menua tu anang semina ngelempaika tanggungpengawa ngajar anak sida ba pengajar enggau raban sekula aja. Ku iya, apai indai patut bejalaika tanggungpengawa ke sebaka pemerat enggau pengajar di sekula, sereta ngajar lalu ngiring anak lebuh ke udah tempu timpuh sekula tauka di rumah. "Apai indai enda patut ngelempaika tanggungpengawa ngajar anak sida ba pengajar aja, tang sida patut begempung enggau raban sekula sereta pengajar nentuka pemujur pelajar anak sida," ku iya. Iya ke Kaban Kunsil Nengeri (ADUN) Simanggang bejaku munyi tu lebuh ti bejadika Pengerami Makai Lemai beserimbai enggau 'Anugerah Pelajar Cemerlang' nembiak primari 6, Sekula Primari (SK) Saint Lawrence, Sabu Sri Aman ditu apin lama ke udah. Ku iya, apai indai patut suah agi datai ke sekula anak sida betanyaka sentang pelajar anak sida seraya berandauka penganggul ke sitapi anank sida di sekula. Sama bisi ngulu pengerami nya, Pemesai Opis Pelajar Pelilih Mit Sri Aman, Bihud Apok, Ketuai Nembiak Pemu Parti Rayat Sa'ati Sarawak (SUPP) N.27 Simanggang, Patrick Micheal, Kaunsilor Sawing Sumar, bala pengajar kanan enggau bala-ketuai raban bansa bukai. Berebak enggau pengerami nya, Harden ngungkupka belanja sama penyampau RM 5,000 ngagai Komiti Pengatur Pengawa Sekula (LPS) enggau Gerempung Apai Indai enggau Pengajar (PIBG) sekula nya. Iya mega ngungkupka RM 10,000 ngagai Chapel Saint Lawrence, Sabu ngambika bisi dikena sida bejalaika pengawa ninting taun sida. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
BAU: Lisin kuari ba Bukit Serumbu tetap dikeluar taja pan riput pangka ngagai pemaik rampa menua (EIA) ti dianjung ngagai Opis Kaunsil Pengeraja Asal enggau Rampa Menua (NREB) dikinsil ketegal enda dikereja enggau silik lalu nya entara pekara ti ngalitka ati rayat ari 17 genturung pendiau ke ngelingi bukit nya.| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |