Mentas? Baka Ni Sida Taib Sebilik Nugungka Pengaya Berindik Ba Rumah Rega Murah Di Samariang |
| Mentas? Baka Ni Sida Taib Sebilik Nugungka Pengaya Berindik Ba Rumah Rega Murah Di Samariang Posted: 28 Nov 2013 06:58 AM PST "Tanah simpan kami besai amat rampa" – "rumah modular" ti digaga CMS ti patut ngemudahka bala orang ti seranta ngulihka rumah ke diri empu di Bandar Samariang Pansik Sarawak Report bekaul enggau chara sida Taib sebilik ti belabuh ngulihka penguntung ari projek Bandar Samariang, sereta Kepala Menteri nya udah nyerahka sebidang tanah ba pemesai 5,200 ekar ngagai kompeni enggi iya empu Cahya Mata Sarawak Berhad (tauka CMS). Asil pansik tu bisi tetemuka penanggul ti nuntung bala orang ti kurang bepenatai-pemisi ti meli rumah ti enda manah sereta enda meruan, lalu diberi pampas ti mit bendar. Tang Taib udah ngelakuka projek Bandar Samariang nya nyadika pengawa nunjukka "pementas" sida sebilik, digaga sida dikena mantu raban orang diri sebilik ti seranta, ti kiruh deka ngulihka rumah berega murah ke diri empu. Lebuh bejadika projek nya dalam taun 1997 suba Kepala Menteri nya madahka enda kurang ari 3,000-5,000 buah rumah baru dipinta ba pelilih menua Kuching ninting taun dikena napi penanggul kurang rumah ba raban orang ti seranta. Bandar Samariang patut meri 13,500 buah rumah baka tu lalu ba pengawa ti sama dia menyadi Kepala Menteri, Onn Mahmud, ti nyadi Pengerusi CMS maya nya, udah besemaya madahka semua rumah berega murah deka tembu digaga dalam 5 taun. Ba pengawa nya mega, Sapit Menteri Besai ti maya nya, Anwar Ibrahim udah muji CMS ke projek ti dikumbai sida "projek mentas" dikena mantu raban orang ti seranta. Taib madahka mayuh kompeni bukai enggai beranakka puku ba endur nya, lalu iya mega madahka CMS disadang "enda bulih untung ti besai"! Tang, 15 taun udah nya, gaya menua dia jauh bendar bebida. CMS disadang bulih penguntung RM474 juta di Bandar Samariang dalam kandang lima taun ti deka datai!  Diatu nyau majak jai – ramu rumah ti enda manah
Udah sepuluh taun ngelui maya ti patut nembuka projek nya, semina sebagi aja pemayuh rumah berega murah ti disemayaka suba nya udah tembu, iya nya semina 2,500 buah aja. Mayuh agi rumah di endur nya enda digaga enggau manah lalu diatu udah nunjukka pengerusak ti majak balat. Beserimbai enggau nya, awakka enda ngingatka juluk ati ti deka ngulihka untung besai, kompeni nya bulih untung belipat kali, enggau chara ngaga rumah berega mar, rumah kedai enggau tanah ba pelilih menua nya, ti diatu dikumbai "tanah simpan ti murah tang besai rampa". Ba pun iya Taib nyerahka tanah nya ngagai kompeni iya empu laban kenu ku iya tanah kandang menua nya kelalu mar dikereja lalu kompeni bukai enggai beranakka puku dia, kami deka nanya baka ni kompeni besai CMS diatu ngumbai tanah nya "berega murah"? Dalam Repot Taun CMS ke diatu, sida madahka opis pemansang reta sida udah mujur bulih untung RM60 juta ba taun nyin kemari. Lalu dalam kandang lima taun ti deka datai sida disadang bulih untung RM474 juta ari projek Bandar Samariang nya! Jaku Taib ti madahka CMS semina rindu ngereja projek nya laban sida enda sanggup meda raban orang ti seranta "nadai pendiau ti meruan" lalu sida ngereja nya "nadai ngira bulih untung ti mayuh"! RM474 juta – "tanah simpan ti murah sereta besai rampa" diserahka Kepala Menteri ngagai kompeni sida sebilik! [Repot Taun CMS 2012]  Enda manah digaga lalu enda tan lama. Bala orang ke nguan rumah nya madahka dinding dalam digaga ari semin plaster enggau asbestos ti keru
Cherita pasal pementas ati CMS dibantaika lebuh siku orang mansik baka ni Taib mindahka duit dalam wang turu orang mayuh masuk ngagai kompeni enggi sida sebilik. Terubah nya iya deka nentuka opis Komiti Pengawa Berumah Sarawak nikam tender tumu ke 2,500 buah rumah berega murah ti deka digaga CMS, ba pengawa dagang kunsi enggau Kumpulan Wang Simpanan Pekerja (KWSP). Rumah ti udah tembu tu deka dijual ngagai bala orang mayuh ba rega RM35,000 sebuah, berindik ba duit injau ari bank nyengkaum Bank Utama Berhad enggi sida Taib Mahmud sebilik. Mayuh orang ti meli nya ngasaika pemar ditating terma enggau kondisyen ti rat nya lalu bisi sekeda ari sida lenyau rumah ketegal ti laun mayar.  Orang diri sebilik tu enda ulih mayar pulai duit injau sida. Bangat kelalu ga BN enggau sida tu!
Diatu, kelimpah ari ti nyual ngagai raban orang ti seranta, projek Bandar Samariang CMS semina ngaga rumah berega mar enggau rumah kedai ti ulih meri mayuh agi penguntung. Raban juru jual CMS udah bebendar ngelakuka rumah ti digaga sida di sebelah nengeri Sibu, Miri enggau ngagai raban orang ti kaya-kaya ngena rega mimit kurang ari setengah juta ringgit sebuah. Nama penyadi ba 11,000 buah rumah ti agi disemayaka ngagai raban orang ti seranta ti benung ngiga endur ngenduh di Kuching?  Rumah beungkus mar enggau rumah kedai ti manah-manah ti meri penguntung ti mayuh – tang, nama penyadi ba raban orang ti seranta ngiga endur ngenduhka diri?
Taib mega udah meri projek nya enggau chara ngasuh puku menua diperanakka dalam projek infrastruktur ti besai-besai. Tu nyengkaum jalai alun Palan Opis Persekutuan ti besabungka Bandar Samariang terus enggau jematan tol meraka Sungai Sarawak nyentuk ke jalai alun baru ari adap utara ke selatan nengah iya. Suratberita Borneo Post mega bisi nuliska repot pasal pengawa ngemesaika Jalan Sultan Tengah dikena ngurangka penyekut jalai entara Bandar Baru Samariang enggau nengeri Kuching. Utai ti enda ulih dikereja perintah menua nya, nitihka penerang orang mayuh ti beranakka puku sida ba sistem pejalai kin-kitu ti manah sereta meruan ba kandang menua nya. Sistem pejalai bas ke Kuching udah nadai guna, nejuka orang mayuh seruran tepagang sereta seruran ngarapka kerita ti enda ulih dibeli sida. Penanggul tu nadai nagang bala menteri BN ngutuk pendiau rakyat sida 'ngena belanja betimbah-ayah' bebelika kerita enggau masang pirin satelit ba perabung rumah sida. Bala orang mayuh madahka mayuh agi piring satelit nya endang diberi enggau pechuma maya promosyen Astro lalu diatu perengka nya enda ulih guna agi, laban sida udah enda ulih napi terma enggau kondisyen ti diatur Astro ba sida.  Kar ti ngayanka jalai, tang sistem pejalai bas mimit bendar ke dikena raban orang ti seranta nya mindah kin-kitu! Pengerusak ti majak ba rumah modular Projek ke guna mensia mayuh tu mih balat dibalut skandal dikereja sida Taib sebilik ti chakah bendar ngulihka untung ti mayuh.  'Rumah modular' ti beinovatif – Repot Taun CMS taun 2000 Sarawak Report diatu udah bejalaika pansik bekaul enggau chara orang diri sebilik ti nguasa kompeni CMS nugungka pengeraja sida empu ngena pengawa dagang ti dipelanja menua ti dipejalai berindik ba penimpang pendiau raban orang ti seranta. Kami nujuka kenang kami tu ngagai Kepala baru dalam Opis Pemansang Reta CMS ba taun 1997, siku peranak Australia asal menua Lebanon, Robert Geneid – iya nya laki menyadi indu Taib, Raziah Mahmud. Lalu kami mega ngenang Pengerusi kompeni nya, iya nya menyadi lelaki Taib empu, Onn Mahmud. Robert Geneid udah ngaku madahka pengawa iya ba ngemansangka reta kompeni nya udah mujur nengah laman web iya empu ke diatu. Tang, utai ti ngalitka ati nya, iya nadai ngenang pasal bagi iya ba pengelama 8 taun nyadi Kepala ba Opis Pemansang Reta CMS ari taun 1997-2005.  Engka ukai pasal aku – nadai becheritaka pasal penanggul ti nuntung Rumah Modular CMS! Diatu, Robert Geneid numpuka ngagai penuduk iya ti bejalaika mayuh bengkah kompeni 'ngaga rumah' enggi bini iya, Raziah, ti udah nerima mayuh macham kontrak enggau konsesyen besai-besai di Miri ari perintah menua Sarawak ti betuaika menyadi iya empu, Abdul Taib Mahmud. Iya ke bendar, kompeni-kompeni tu, ti nyengkaum kompeni Miri Properties, Kumpulan Parabena enggau Kumpulan Construction, udah nyerahka kontrak sida ngagai kompeni tukang rumah ti bukai. Munyi ti kala ditusui siku orang ti kala bekereja dalam Kumpulan Parabena ti madah ngagai Sarawak Report, "kompeni nya endang nadai ngembuah sebuah kerita surung!" Tang dalam taun 1997, lebuh Robert Geneid mangku pengawa dalam pengurusan, begulai enggau bala sida Taib sebilik ti bukai dalam CMS, iya meda penuduk iya nya ulih dikena ngulihka peluang ti besai. Tindak tu dikereja sebedau projek 'rumah modular' CMS nyau majak jai, dikena mantu raban orang ti seranta.  Semua sida nya ari sebuah ruang bilik orang diri sebilik – bala anak iya Abu Bekir enggau Sulaiman, menyadi iya Arip enggau Onn, menantu iya Alsree Alwee enggau ipar iya Robert Geneid Total Pride Sdn Bhd Pejalai penerang nya ditikalka ngagai kompeni-kompeni, ti dipejalaika Geneid enggau bini iya nengah opis sida ba lumur 154-6 Jalan Sungai Padungan di Kuching. Nitihka asil pansik kami, siti ari kompeni iya nya benama Total Pride Sdn Bhd, ditumbuhka dalam taun 1997, lebuh iya mangku pengawa ngemansangka projek 'rumah rega murah'. Bala orang ti megai syer dalam Total pride nyengkaum sebuah kompeni enggi kaban iya empu ari menua Lebanon, siku tukang rumah benama Nabil Nazri Ghazali; sebuah kompeni 'enggi' sekretari enggau nomini ke Onn Mahmud (maya nya iya nyadi Pengerusi enggau pemegai syer pemadu besai dalam CMS) enggau sebuah agi kompeni ari menua tasik ti dipelabaka enggi Geneid enggau bini iya, kompeni Blue Azure. Kompeni Whittaker nya sebengkah kompeni di menua Hong Kong 'diempu' sekretari Onn Mahmud, Shea Kin Kwok, lalu kompeni Philbest diempu kaban Geneid, Nabil Nazri. Nitihka penerang ti diterima kami, Total pride udah kala meli sebengkah barang ti baru tembu digaga ari kaban Geneid, Nabil Nazri, ti udah nya lalu dipatenka iya ngena nama "Modular Housing". Asil tu beduduk ba sebansa ramu ti asal iya digaga dikena orang ba karavan, lalu beserimbai enggau nya mega sebuah kompeni ditumbuhka ba lumur 154-6 Jalan Sungai Padungan, diberi nama Viscount Caravans Sdn Bhd. Tang, Kepala baru Opis Pemansang Reta CMS enggau Pengerusi iya, Onn Mahmud, udah bulih sebengkah langgur penemu ti manah bendar taja pan bedau kala diuji, dikena ngeluarka ramu panel dinding enggau perabung pasang tembu ti murah ungkus. Sida netapka ramu bansa nya dijual ngagai CMS dikena ngaga beribu-ribu buah rumah rega murah ti dikemendarka Opis Komiti Pengawa Berumah Menua Sarawak. Total Pride, ngaga sebuah palan pengaga barang dikena sida ngeluarka asil ti digaga Nabil Nazri, ba Jalan Bako ti nuju ke negeri Kuching lalu udah nya nyewa palan nya ngagai Opis Pemansang Reta CMS ti udah nya mega nyual paten berejista nya ba rega RM48 juta ngaga CMS. Palan pengaga barang nya diberi nama baru, CMS Modular Housing Sdn Bhd, ti enda lama udah nya bejalaika promosyen formula ngaga ramu bansa baru sida dikena ba pengawa ngaga rumah rega murah enggau jampat, lalu beserimbai enggau nya madahka ramu bansa baru nya dijamin tan lama ari ramu ke ngelama tu. Dalam sebengkah pengerami ngelancharka Bandar Samariang dalam taun 1997, pemegai syer pemadu besai dalam kompeni Total Pride, Onn Mahmud, madahka CMS udah merambu ngena "sistem beinovatif" dikena sida ngaga rumah rega murah. Ba jaku gerah iya ti direkod Borneo Post maya nya, Onn Mahmud nandu semaya sida ti madahka 13,500 buah rumah rega murah deka tembu digaga dalam timpuh lima taun. Tang ba timpuh ti enda lama nya mega, dua iku ari sida Taib Mahmud nya sebilik dalam CMS udah ngereja penyalah konflik tanggungpengawa ba nyual 'penemu ti manah' ngagai kompeni sida empu dikena sida ngulihka bejuta-juta dollar. Kenyau ari taun 1998 Robert Geneid udah ngelakuka konsep 'Rumah Modular' nyadika konsep ba pengawa berumah ungkus murah. Rumah Modular CMS dikumbai 'chara baru' ti bejamin, lalu mega ti pemadu nyelai, ramu iya murah dikena ngaga rumah rega murah. Pekara ti ngalitka ati nya sebengkah chara baru ba pengawa ngaga rumah ti semina udah dipatenka lalu bedau kala diuji ba dini-dini endur dalam dunya tu? Bala orang di Bandar Samariang diatu udah ngelala penerang ti madahka pasal penan, gaya tan enda ulih nginsap ai ti digaga Nabil Nazri nya endang enda tan diuji gaya hari ti bendar, sereta sida belabuh mayar duit injau sida ke rumah ti ditembuka ba timpuh ti enda lama. Ke bendar iya, rumah nya enda tan baka ti diterangka. Chara ngaga rumah nya enda ulih nyelamatka CMS. Dalam taun 2006, iya nya setaun udah bekau Robert Geneid badu mangku pengawa iya nyadi Kepala dalam Opis Pemansang Reta CMS, iya udah direkod mansutka jaku pasal atur pengawa nutup palan pengaga ramu rumah modular sida.  Cherita ti bendar enda ditusui CMS mega lenyau agih belanja ba pengawa dagang tu ketegal pengelalek raban pengarah sida empu ti balat ngira penguntung ke sida empu aja. Tang, bala orang ti seranta nya ti balat napi penanggul laban sida udah telabuh meli rumah murah ti enda manah digaga. Dalam cherita kami renggat ke-3 kami deka nusui pasal Bandar Samariang enggau silik agi pasal utai ti bendar bekaul enggau gaya enggau tukuh rumah modular, lalu baka ni orang ti seranta udah balat bendar ditipu ngeluarka keengka belanja sida dikena meli rumah modular CMS. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |