» »Unlabelled » BDCF 2014 Sibu udah ditutup malam ensanus BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

BDCF 2014 Sibu udah ditutup malam ensanus BorneoPost Online | Borneo , Malaysia, Sarawak Daily News » Berita Iban - New 2 Borneo

BDCF 2014 Sibu udah ditutup malam ensanus

Posted: 22 Aug 2014 09:06 AM PDT

Dikarang Judan Bungap

SIBU: Penyampau bansa Iban ke mindah ari rumah panjai di menua pesisir ngagai kandang mengeri majak nambah ari taun seiti ngagai taun seiti.

Menteri Muda Pemansang Tanah Datuk Gramong Juna madah, bansa Iban ke mindah tu tebal agi diau natam ba mengeri besai nyengkaum ba sitak Sibu ditu.

"Ambika banding, penyampau raban bansa Iban ke meli rumah tauka ngentapka pendiau ba Sibu Jaya majak nambah.

"Nya alai, udah maya iya kitai minta Opis Residen enggau Opis Kunsil sitak tu berunding nyiri tuai raban bansa nyengkaum penghulu tauka nyema udah bisi ditambah mayuh agi ngambika megai sesebengkah genturung pengentap pendiau ke mayuh diuan raban bansa Iban," pia ku iya madah.

Iya bejaku munyi tu ngarika Sapit Kepala Menteri Datuk Patinggi Tan Sri Alfred Jabu Numpang lebuh ke nutup Pengerami Mantaika Main Asal Dayak Borneo (BDCF) 2014 ditu, malam kilah ensana.

Gramong madah, pangku pengawa tuai raban bansa baka pengulu besai reti dikena ngibun sereta ngetan adat enggau main asal bansa Iban.

"Taja udah ngentap ke pendiau ba kandang mengeri, adat enggau main asal bansa kitai enda tau enda ditanka.

"Ari nya bala pengulu ulih ngempung bansa Iban, mutarka pekara ti bekaul enggau adat" ku iya madahka baru.

Iya ti mega Menteri Muda Dagang Temuai madah, BDCF nyadi sebengkah ari atur pengawa ba Kalender Dagang Temuai Malaysia lebih agi Kalender Dagang Temuai Nengeri Sarawak udah mujur endar matak penatai temuai ari menua bukai.

BDCF ku iya, awak ke diberi ngagai raban Dayak mantaika pengawa enggau pengelebih adat enggau main asal ngagai bansa bukai.

"Tang kitai anang enda ingat, pemujur ngatur BDCF tu bepun ari ati raban Dayak ba Sibu ti begempung kelimpah ari disaup gerempung ukai dikuasa perintah (NG0) Dayak empu.

"Kitai berasai temegah ati meda pemujur enggau penyerakup ngatur pengerami tu ke dipandangka raban Dayak di Sibu," pia ku iya madah.

Ku Gramong, semua raban Dayak kelebih agi rebak baru ngembuan tanggungpengawa ke sebaka ngetanka penegut main enggau adat asal ari ke kena segang pemansang, penemu baru enggau chara idup ke udah berubah ba kandang mengeri.

Kebuah pia ku iya, main enggau adat asal nyadika kelai sesebengkah bansa.

"Taja kitai udah diau ba mengeri kitai enda ulih ngelengkaka dua bengkah pekara tu.

"Kitai untung amat laban diau ba menua ke likun ti kaya enggau penyelai sereta pemanah main enggau adat asal pupu raban bansa," ku iya madah.

Bela bisi datai ba pengerami ke digulu lebih 8,000 iku mensia mayuh tu iya nya Kaban Kunsil Nengeri (ADUN) Tamin Datuk Joseph Mauh Ikeh, dua iku Sekretari Politik Kepala Menteri Andrew Shilling enggau Christopher Romeo Tegong, Pemancha Stanley Gramong, Sekretari Besai Sarakup Indu Dayak Sarawak (SIDS) Senorita Linang, Chairman Pengatur BDCF 2014 Kaunsilor Sempurai Petrus Ngelai enggau bini Mauh, Datin Jacqueline Mau sereta bala pemesai ke bukai.

Print Friendly

Bemacham bansa asil pengelandik jari enggau pemakai asal dijual maya Regatta Baram

Posted: 22 Aug 2014 09:06 AM PDT

MARUDI: Pemanah asil pengelandik jari ke digaga enggau mayuh macham chura sereta chara digaga endang mandangka gaya pengidup komuniti Orang Ulu sereta penyamai asai pemakai enggau buah di pasar Marudi udah ngidupka pasar nya dalam kandang minggu tu.

Komiti pengatur pengawa ti betuaika Menteri Muda Penyambung Ai enggau Gerempung Orang Bumai, Datuk Sylvester Entri Anak Muran udah nyaup Unit Pemansang Orang Dagang Bumiputera ngatur pengerami mandangka asil pengelandik jari enggau pemakai ngelama enam hari ke belabuh kena 19 Ogos tu tadi.

Penyelai chura, ukir enggau utai manik ke digaga bansa Kayan, Kenyah, Penan enggau sekeda raban bansa Orang Ulu ke bukai udah ngerindu bala temuai ke ngulu pengerami nya.

Tu deka pulaika pemaik ngagai industri kotej enggau asail pengelandik jari, laban produk sida dipelabaka deka laku dijual ngagai bala temuai ujung minggu tu beserimbai enggau Baram Regatta ke deka diatur kena 22 nyentuk ke 24 Ogos tu.

Antara asil pengelandik jari ke bisi dipandang tauka dijual maya nya baka Sape, ilang, manik, bakul, tikai enggau sekeda utai bukai.

Penyamai bau pemakai enggau buah ke datai ari palan bejual ngelingi pasar nya mega udah ngagitka ati bala temuai enggau peranak menua nya ti datai ngulu pengerami nya baka "Bubur Rian" enggau sekeda pemakai asal ke bukai.

Print Friendly

Atur pekit Kumang enggau Keling patut diserenih

Posted: 22 Aug 2014 09:06 AM PDT

Dikarang Judan Bungap

SIBU: Atur meri gelar ngagai pemekit pekit Kumang tauka Keling patut diserenih baru dikena nyeliahka rebak baru enggau bansa bukai saru penemu.

Kaban Kunsil Nengeri (ADUN) Tamin Datuk Joseph Mauh Ikeh madah, ari suba empai bisi gelar ke nyemetak diberi ngagai pemekit ba pekit nya ti bulih penuduk lumur dua enggau tiga kelimpah ari champian ti megai gelar Kumang tauka Keling.

"Enti ulih, pemekit ke bulih penuduk lumur dua enggau tiga diberi gelar bukai laban suah kitai ninga, nama enggau ngambi bagi ba pekit tu semua pemekit digelar Kumang tauka Keling magang.

"Kebendar iya gelar tu semina seiti aja iya nya diempu pemekit ke champian ba pekit nya," pia ku iya madah.

Mauh mantaika jaku nya maya bejadika malam ke enam Pengerami Mantaika Main Asal Borneo Dayak (BDCF) beserimbai enggau Pengerami Mantaika Main Asal Borneo (2014) ditu, malam kilah ensana.

Berindik ari pekara nya, ku Mauh, iya deka mai pekara tu ngagai Opis Adat Istiadat maya bisi simposium Iban diatur ila.

"Nya alai, ba aku pekara tu patut dikerandau kitai baru lebih agi enggau Opis Adat Istiadat ngambika nembiak enggau bansa bukai enda saru agi kelimpah seiti ari chara dikena ngetanka pengaya enggau pengelebih adat enggau main asal bansa Iban," pia ku iya madahka baru.

Berebak enggau tu mega Mauh ngelalau raban bansa Dayak ditangkan badu mekuhka ulah enggau runding jampat mantul udah ke enda mujur ngereja sesebengkah pengawa.

Ku iya, pekara nya nyadi bepun ari ulah enggai nguji baru tauka enggai besemekih enggau orang bukai.

"Ba pengidup maya hari tu pengawa ke bepekit enggau orang bukai udah nyadi adat pengidup dikena napi ubah rama.

"Tang agi bisi kitai raban bansa Dayak ngembuan ulah enggau runding enggai nguji baru nama sekali udah enda mujur.

"Pekara tu suah mega nyadi ba bala kitai baikka ba pengawa bepintaka projek tauka nyengulaka anak," ku tandu Mauh.

Nambahka nya Mauh madah, adat bepekit mega patut dikembuan komuniti rumah panjai ngambika beumba-umba ngangkatka tikas pengidup ruang bilik.

"Pia mega baka kitai ke betanam-betupi tauka bumai ba menua pesisir.

"Taja kitai mayuh tanah tang enti kitai kurang penemu, enggai bepekit, kitai enda bulih baka orang bukai.

"Enggau jaku pandak, semua pekara maya hari tu randaka ulah bepekit tauka besemekih," ku iya.

Bela bisi datai maya tu iya nya Chairman Komiti BDCF 2014 Kaunsilor Sempurai Petrus Ngelai, Chairperson Sarakup Indu Dayak Sarawak (SIDS) Pampang Sibu Ir Alice Jawan, Gerempung Orang Ulu Sarawak (OUNA) Lade Kalong, Chairman Sarakup Bidayuh Sarawak (DBNA) Mejun Abang enggau bala bukai.

Print Friendly

Nathan ngarika Sibu ba Pekit Public Speaking tikas nengeri Sarawak

Posted: 22 Aug 2014 09:06 AM PDT

KANOWIT: Nathan Chua ari Sekolah Sekondari (SMK) Methodist mujur nyadi champian Pekit 'Public Speaking' Tikas Menua Sibu 2014.

Pekit tu dipasuk 17 iku pemekit ari sekula sekondri pelilih Sibu enggau Kanowit ke diatur ba SMK Kanowit, empai lama ke udah.

Penuduk lumur dua diempu Ivan Yung Sii Hong ari SMK Sacred Heart lalu Rachel Lau Ning Ci ari SMK Bandar Sibu ba penuduk lumur tiga.

Enggau tu, Nathan deka ngarika sitak Sibu bepekit ba pekit nya tikas nengeri Sarawak.

Perais pemekit ke menang disuaka Pemesai Opis Pelajar Kanowit Willy Johnson.

Ba jaku iya, Willy madah, pekit nya sebengkah palan alai nembiak nempa pemerani diri bejaku ba mua bala mayuh.

"Kelimpah ari nya, pekit baka tu tau bendar meri peransang ngagai nembiak sekula ngulihka pemujur ba pelajar nyengkaum nempa ulah berani besemekih enggau pangan diri," ku iya.

Iya mega ngarapka Nathan tau bulih pemujur ba pekit tikas nengeri ila lalu tau nyungkakka pemanah nama sitak tu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Gelar Keling BDCF 2014 dipenggi Kemmy John

Posted: 22 Aug 2014 09:06 AM PDT

SIBU: Kemmy John dipadu megai gelar Keling Pengerami Mantaika Main Asal Dayak Borneo (BDCF) 2014, malam kilah ensana.

Iya ti ngalahka 10 iku pemekit ke bukai mai pulai perais mata duit RM3,000 sereta disempulang trupi enggau hamper.

Penuduk lumur dua diempu Frankie Fiq Ngadit lalu iya mai pulai perais mata duit RM2,000 sereta disempulang trupi enggau hamper.

John Brendan Sang dipadu ngempu penuduk lumur tiga.

Iya mai perais mata duit RM1,000 bela disempulang trupi enggau hamper.

Penuduk lumur empat enggau lumur lima diempu Kenneth Entalang enggau Mathias Ribut.

Seduai mai perais mata duit RM500 enggau hamper.

Kelimpah ari nya Wellington Kuling enda pulai enggau jari puang udah ke nerima perais hamper udah ke dipadu ngembuan undi pemadu mayuh.

Lima iku pemekit ke bukai nerima perais sagu ati iya nya Augustine Douglas Steel, Steward Sabang, Cornelius Joseph, Wellington Kuling enggau Randy Pangkas.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Pemajik Debbie Gibson disempama baka ‘Kumang’

Posted: 22 Aug 2014 09:06 AM PDT

SIBU: Pemajik Debbie Gibson Medan disempama baka 'Kumang' lalu ngujungka iya mujur pulai mai gelar Kumang Pengerami Mantaika Main Asal Dayak Borneo (BDCF) 2014, malam kilah ensana.

Enggau nya iya nerima perais duit RM3,000 lalu disempulang jumpang pala, trofi, selampai enggau hamper.

Penuduk lumur dua pekit serak tu diempu Michelle Thomas Magal lalu iya mai perais mata duit RM2,000 lalu disempulang trofi, selampai enggau hamper.

Lalitha Mancha semina bepuas ati ba penuduk lumur tiga ti ngujungka iya diberi perais duit RM1,000 sereta bela disempulang enggau trupi, selampai enggau hamper.

Perais mata duit RM500 diberi ngagai Subang Jamit enggau Alice Rebut pengudah seduai bulih penuduk lumur empat enggau lima.

Lima iku pemekit ke bukai nerima perais pengaga ati duit RM300 iya nya Claudia Anye, Sophia Thomas Kasau, Radhika Rahman, Sherry Simba Gay enggau Shirlyne Emilia Moses.

Sekali agi Lalitha pulai mai perais mata duit RM800, jumpang pala, gambar enggau hamper pengudah iya dipadu nyadi champian ba pekit Miss Fotogenik.

Nangkan penuduk iya, Mai Dilin Sipang ngempu penuduk lumur dua lalu mai pulai perais mata duit RM600, gambar enggau hamper.

Penuduk lumur tiga diempu Grace Nuta Guntur ke mai pulai perais mata duit RM400 enggau gambar.

Print Friendly