» »Unlabelled » Penyampau temuai ngelawa M’sia niki 3.3 persin BorneoPost Online | Borneo , Malaysia, Sarawak Daily News » Berita Iban - New 2 Borneo

05:21:00

Penyampau temuai ngelawa M’sia niki 3.3 persin BorneoPost Online | Borneo , Malaysia, Sarawak Daily News » Berita Iban - New 2 Borneo

Penyampau temuai ngelawa M’sia niki 3.3 persin

Posted: 21 Nov 2013 08:06 AM PST

by Rengenyan Labang. Posted on November 22, 2013, Friday

KUCHING: Rikut penyam­pau temuai ke nemuai ke Malaysia niki 3.3 persin (%) dalam timpuh sembilan bu­lan keterubah taun 2013 enti dibandingka enggau timpuh ke sama taun 2012.

Menteri Dagang Temuai enggau Main Asal, Datuk Seri Mohamed Nazri Abdul Aziz madah, nya nunjukka penegap industri dagang temuai ulih ngenyungkak pemansang sosio-ekonomi menua sereta ulih nyadi palan dagang temuai ke enda tau enda dilawa.

"Penyulut industri dagang temuai Malaysia taun tu nunjukka penambah 3.3 % iya nya menua nerima 18.8 juta temuai ari bulan Janu­ari ngagai September 2013 dibandingka enggau 18.2 juta iku ba timpuh ke sama taun 2012.

"Penatai pemisi industri dagang temuai menua be­rengkah ari bulan Januari ngagai September taun tu mega nambah 9.9% iya nya sepenyampau RM46.4 biliun dibandingka enggau RM42.6 biliun dalam timpuh ke sama taun 2012," ku iya.

Nazri mansutka statistik nya lebuh bejadika Asia Pacifik Tourism, Hospitality & Technology (APTHAT) Conference 2013, ti diatur UCSI Communication Sdn Bhd sereta disukung Opis Menteri Dagang Temuai enggau Main Asal sereta perintah nengeri, ba BCCK ditu, kemari.

Iya madah, Dagang Temuai Malaysia deka chakah agi bejalaika pengawa enggau inisiatif ti mekuh ngagai eko-dagang temuai, main asal sereta nyerangkung aktiviti pengerai, pemeresi rampa menua, pengelikun enggau ke bukai dikena matak mayuh agi temuai menua tasik ke Malaysia.

Nya alai ku iya, orang ti ngemeranka industri dagang temuai patut ngiga chara nambahka pemayuh temuai sereta nyendiaka produk penyungkak pemanah ngam­bika ulih nambahka penatai pemisi industri.

Pengemeran industri da­gang temuai, lebih agi In­dustri Mit enggau Tengah Pemesai (PKS) enggau ger­empung patut nyarap tauka ngelangkar baru strategi ngelakuka produk enggau kimpin beduduk ari menua tu mayuh pulau enggau tebing tasik, ku iya.

Ku Nazri, perintah nagit PKS dalam industri dagang temuai ulih nambahka penatai pemisi menua 40% dalam Pemansut Kasar Asil Dalam Menua (KDNK) lebuh mang­gai taun 2015.

"Ke diatu, PKS meri (pe­natai pemisi) sepenyampau 33%. Taun 2011 mega PKS meri penatai pemisi ngagai KDNK sepenyampau 32.5% sereta dipelabaka ulih meri 41% ngagai KDNK lebuh manggai taun 2020.

"Enti penumbuh ekomoni menua 5.5%, sektor PKS ulih ngerembai tauka mansang entara 6.5% ngagai 7%,tu peluang ti engkeman ungkup PKS," ku iya.

Bela bisi ngulu atur pen­gawa nya, Menteri Muda Dagang Temuai Datuk Talib Zulpilip, Director General Dagang Temuai Malaysia Datuk Mirza Mohammad Taiyab, Project Director APTHAT ti mega Managing Director UCSI Communica­tion Sdn Bhd Gracie Geikie enggau ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Atur ngubah tanah NCR nyadi estet pengawa berumah tau nguntungka peranak Bumiputera

Posted: 21 Nov 2013 08:04 AM PST

Posted on November 22, 2013, Friday

KUCHING: Enti Tanah Adat Bansa Asal (NCR) ba mengeri tauka di pasar ulih diubah nyadi genturung pendiau mensia mayuh, 70 persin ari penguntung nya patut diung­kup ngagai peranak Bumi­putera lalu 30 persin agi ukai Bumiputera.

ADUN Engkilili, Dr Johni­cal Rayong (BN-Engkilili) merambu, tanah NCR ti dike­mansangka ba genturung pendiau mensia mayuh baka di estet pengawa berumah se­bengkah jalai ke manah dikena ngemansangka tanah NCR ke deka meri penguntung ngagai komuniti Bumiputera ba kan­dang mengeri ke tebal sida tu enda tebelika rumah berega mar ba tanah mixed zone.

"Dalam timpuh ke sama mega, Perintah ulih nge­mansangka mayuh agi rumah ke ulih dibeli enggau rega ke numbas pemar ba kandang mengeri enti tanah NCR dike­mendar, dikemansangka nyadi genturung pendiau mensia mayuh.

"Tanah NCR ti dikemen­darka kena ngemansangka gen­turung pendiau nyangka ulih mega digaga nyadi genturung pendiau pengereja pengawa perintah, ku iya.

"Aku ngarapka Opis Tanah enggau Survei (JTS) ulih ngaga pelin bakani tanah NCR ba kandang mengeri ulih ditukar nyadi tanah pemansang gentu­rung pendiau ke alai 30 persin diungkup ngagai orang ke ukai Bumiputera," ku iya.

Johnicol madah baka nya lebuh mantaika pejurai nim­bal Rang Undang-Undang Pemansang Pengawa Berumah (Pekara Lisin enggau Sekat) 2013 maya Aum Kedua, Peng­gal Ketiga Aum Kunsil Nengeri (DUN) ke-17 ditu, ensana.

Iya madah, pemeli rumah mega patut mayar enti rumah ke digaga manggai 25 persin penembu lalu jengkeram 10 persin dibayar pengudah neri­ma geran tanah.

"Enti nitih, nadai sebarang bayar buking laban nyangka dikena nyeliah sebarang ubah ba rega," ku iya seraya madah, nya enda adil ngagai pemeli rumah ke mayar deposit 10 persin.

Iya mega merambu, lisin pemaju ngaga rumah dibagi ngagai sekeda bengkah baka lisin kunteriktor Opis Kereja Raya (JKR), iya nya Kelas A ngagai gred tinggi enggau kelas F ngagai kelas baruh.

"Pemeli ulih milih projek rumah ke dikedeka sida empu. Nya alai Opis Menteri Pengawa Berumah patut magi lisin sida iya ngagai pemaju ngaga ru­mah," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Teknologi pemadah ngemuntangka pengerembai dagang temuai: Mirza

Posted: 21 Nov 2013 08:04 AM PST

Posted on November 22, 2013, Friday

KUCHING: Teknologi pemadah (IT) kereban ke pemadu engkeman dikena ngurangka ungkus be­lanja seraya meri pemalat empas ngerembai sereta ngangkatka industri dagang temuai.

Direktor General Dagang Temuai Malaysia Datuk Mirza Mohammad Taiyab madahka pekara nya lebuh meri batang kebuah ngatur pengerami bejadika Asia Pacific Tourism, Hospital­ity & Technology (APT­HAT) 2013.

Iya madah, keraban IT mega ulih nambahka tikas semekih ti manah.

"Pangka tauka pema­nah IT ulih dipeda dalam pengawa ngeluar, ngelaku, operasi enggau pengerem­bai dalam indsutri dagang temuai sekalika ba sektor swasta tauka perintah.

"Kompeni tauka ger­empung dagang temuai ulih berandau taja jauh beseraka, destinasi, prinsi­pal enggau ijinsi penempa operasi ti lebih efisyen.

"Nengah IT, sida ulih ngerembaika aktiviti tang ngurangka kos lalu nam­bahka tikas besemekih," ku iya ti diatur ba BCCK ditu kemari.

Aum besai ti diatur ba BCCK ditu kemari dipeny­adika Menteri Dagang Temuai enggau Main Asal Datuk Seri Mohamed Nazri Abdul Aziz.

Lebuh nandu penemu iya, Mirza madah, pengawa operasyen baka merambu atur, netapka rega, ngaduka inventori enggau pengawa sukung bukai baka ma­yar gaji, akaun, pengawa ngelaku udah jauh manah ketegal penyikap IT.

Gerempung Pengatur Destinesyen (DMO) ngatur nengah IT ngambi ngemu­ntangka peneleba temuai sebedau, benung enggau pengudah penemuai sida.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pemujur menua jemah bepanggai ba pengelandik teknikal pengereja pengawa dalam industri: Taib

Posted: 21 Nov 2013 08:04 AM PST

Posted on November 22, 2013, Friday

KUCHING: Kepala Menteri Pehin Sri Abdul Taib Mah­mud netapka pengawa nge­lakuka pelajar teknikal lebih agi ba menua pesisir deka chakah agi dipejalai.

Seraya ngenang nasit nengeri tu jemah ila bepang­gai ba pemansang industri, Taib ngansak mayuh agi raban nembiak beambika pengelandik teknikal.

"Berindik ari nya, perin­tah nengeri deka nentuka mayuh agi raban nembiak ke mega nyengkaum nembiak di menua pesisir belajarka pengelandik teknikal.

"Ijinsi ke bekaul enggau raban apai indai nembiak bela dipinta nyaup ngelaku bengkah pelajar teknikal ngagai raban nembiak.

Pengerembai ba pekara industri begunaka mayuh orang ti landik ba pekara teknikal," ku iya.

Iya mansutka jaku tu ba pengawa nyuaka Anugerah ICT Media ke diatur ba Ringkat 5, Begunan Dewan Undangan Nengeri (DUN) baru ditu, kemari.

Mandangka pengirau ket­egal pekara teknikal tu kurang dikerindu raban orang ke bepemisi, Taib ngarap pekara tu ulih dit­erangka enggau manah ke alai industri ke udah sereta deka dibuka di nengeri tu ila begunaka mayuh orang ke ngembuan pengelandik teknikal.

Ba kaul ke sebaka, dua iku pengarang ari The Borneo Post iya nya Justin enggau Jonathan Wong bela teulihka lumur dua enggau tiga ba pekit ngarang ICT Media ungkup Bahasa English lalu seiku pengarang ari See Hua Daily teulihka lumur dua ba kategori Bahasa Cina.

Pekit ke diatur ninting taun nya nerima timbal ke manah ari pengarang di menua Kuching, Sibu enggau Miri lalu tiga bengkah kategori Bahasa Melayu, English eng­gau China, dipekit.

Bela bisi ngulu atur pen­gawa nya, Sekretari Perin­tah Nengeri Tan Sri Amar Morshidi Abdul Ghani, Chairman SAINS Datuk Patinggi Tan Sri Dr George Chan, CEO SAINS Dato Teo Thien Hiong enggau orang bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Bidayuh Bibukar lantang enseput, isu Bukit Sadong bepiak ke sida

Posted: 21 Nov 2013 08:03 AM PST

Posted on November 22, 2013, Friday

KUCHING: Lisin kompeni batang ari Sibu ke ngeruga kampung ba Bukit Sadong di Pelilih Serian, udah dikinsil.

Menteri Pemansang Infras­truktur enggau Penyambung, ti mega ADUN Tebekang, Dato Sri Michael Manyin ma­dah, Menteri Perambu Penatai Pemisi enggau Rampa Menua, Datuk Amar Awang Tengah Ali Hassan sereta Peman­gku Opis Kampung, Sapuan Ahmad udah madah ngagai iya (Manyin) ulah betujahka tanah di Bukit Sadong nya ukai isu agi.

"Lisin kompeni kayu ke betujahka tanah di Bukit Sadong nya udah dikinsil, lalu sida iya enda tau ngereja pengawa peneka ati dia

"Lisin ke dipinta kompeni nya ukai ungkup nebang kayu tang ke bendar semina minta lisin endur nanam getah aja.

"Nya alai, kami deka madah ngagai mensia mayuh ke diau di genturung nya, anang irau laban pekara nya ukai penang­gul agi," ku Manyin.

Iya madah baka tu ba aum media pengudah Hari Ketiga, Aum Kedua, Penggal Ketiga Kunsil Nengeri ke-17 ditu, ensanus.

Hari Minggu nyin tadi, men­sia mayuh ari lima buah gen­turung pendiau begempuru enggau likun mantah kompeni ari Sibu ke sengapa betujahka tanah NCR Bidayuh Bibukar di Bukit Sadong seraya berim­baka kayu ba sitak nya.

Raban bansa Bidayuh Bibu­kar maya nya minta Perintah nengeri enggau Opis Kandang menua nginsil lisin ti diberi ngagai kompeni ari Sibu nya, sebedau ngerusak pemanah rampa menua di Bukit Sadong, ke mega tanah pesaka orang tuai Bidayuh kelia.

Seiku ari ketuai ke mega pemesia genturung pendiau dia madah: "Bukit Sadong nya tanah keramat pesaka kami laban bansa Bidayuh Bibukar bisi bukti fizikal ke terang ngayanka endur nya di sitak bukit ke diempu aki ini kami.

"Dia mega kebun kami endur betanamka sayur, pun buah sereta pugu penatai ai irup ungkup 26 buah gen­turung pendiau ke ngelingi bukit nya," ku Temenggung Bidayuh Serian, Robert Sulis Ridu.

Manyin mega madah, nitih penerang ari kompeni nya, seraya bekebun dia sida mega merimba kayu ke batang.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Ungkus Jematan Lanang RM180j

Posted: 21 Nov 2013 08:03 AM PST

Posted on November 22, 2013, Friday

KUCHING: Menteri Pe­mansang Infrastruktur eng­gau Penyambung, Dato Sri Michael Manyin Jawong madah, ungkup belanja RM286 juta dikena ngaga jematan Lanang, Sibu munyi ti dipadahka Kaban Kunsil Nengeri Dudong nya enda betul.

Ku iya ungkus belanja dikena ngaga jematan nya udah disain antara WoodVeal Developmen Sdn Bhd enggau Opis Kereja Raya (JKR) ti ngarika perintah nengeri.

Iya madah, kebendar un­gkus jematan nya begunaka belanja RM180 juta ti dibagi ngagai tiga bagi.

"Bekaul enggau Jematan Lanang Sibu, penyampau ungkus belanja dikena ngaga jematan nya semina RM180 juta tang ukai munyi ti dipa­dahka piak penyakal iya nya RM286 juta.

"Aku enda nemu ari ni pe­natai penyampau nya (RM286 juta). Tang dalam kontrak ti disain Wood Veal Develop­ment Sdn Bhd enggau JKR (perintah nengeri) iya nya RM180 juta.

"Lalu ungkus belanja RM180 juta nya dibagi nga­gai tiga, keterubah dibayar mata duit RM10 juta, kedua dibayar enda ngena mata duit sepenyampau RM90 juta lalu ketiga RM80 juta dibayar nengah tol," ku iya bejaku dalam aum pengarang berita di Kompleks Kunsil Nengeri (DUN).

Iya ti mansutka pekara nya ba hari ketiga Aum Kunsil Nengeri dikena iya ngemet­ulka penerang ti salah dipan­sutka Kaban Kunsil Nengeri (ADUN) Dudong Yap Hoi Liong maya usul ba aum kunsil nengeri lemai kemari (ensana).

Ku Manyin, penyampau ungkus belanja jematan Lanang nya kala disebut maya aum kunsil nengeri sebedau tu.

"Aku kala madah kena 27 Jun 2011 maya aum kunsil nengeri, aku endang madah ungkus dikena ngaga jematan nya endang RM180 juta.

Manyin dalam aum pen­garang berita nya kemari (ensana) mega disempulang Menteri Wang Kedua, Dato Sri Wong Soon Koh.

Wong mega madah, ra­ban penyakal kala nuduh iya deka ngenataika pekara bekaul enggau enda mayar tol dikenataika ngagai perintah besai.

"Kebendar iya maya pengawa bepilih mit Sibu, Menteri Kereja Raya maya nya suba madahka perintah deka berundingka pekara nya (enda bebayar tol) tang enggau syarat rayat Sibu meri sukung ngagai Barisan Nasional (BN).

"Diatu kitai udah nemu baka ni ke nyadi, aku aja agi ngarika BN di Sibu," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.