» »Unlabelled » Pengempu tanah NCR ringat enda dibayar pampas BorneoPost Online | Borneo , Malaysia, Sarawak Daily News » Berita Iban - New 2 Borneo

06:16:00

Pengempu tanah NCR ringat enda dibayar pampas BorneoPost Online | Borneo , Malaysia, Sarawak Daily News » Berita Iban - New 2 Borneo

Pengempu tanah NCR ringat enda dibayar pampas

Posted: 06 Jan 2014 02:21 PM PST

Kenyau ari 13 taun ke udah peranak menua Bunau enggau Ulu Sengkabang, Kanowit dikemulaka Pelita

SIBU: Orang ke ngempu tanah NCR di menua Bunau enggau  Ulu Sengkabang, Kanowit ke bisi kena bungkur sekim Sawit nengah chara bekunsi enggau Land Custody and Development Authority (Pelita) enda lantang ati setegal dividen enggau pampas tanah sida ke enda dibayar ngagai kenyau ari 13 taun ke udah.

Nundaku pengari sida, Tuai Rumah Tadong Tambi ari Pedai enggau Tuai Rumah Cr. Dang Enjat ari Sungai Bob, 98 iku orang ke enggau ngempu tanah ke kena bungkur sekim nya ke dibai Pelita dalam taun 1999.

"Sida tu orang ke ngempu tanah ari Pedai, Joh enggau  Bob. Pemesai tanah ke kena bungkur nya bisi 840 hektar ke alai Pelita sepatut iya udah meri pampas enggau dividen ke dianggarka penyampau RM2 miliun.

Tanah NCR nya di kandang menua Bunau di Ladang Pedai enggau Ulu Sengkabang kandang endur Lading Jih. Sekim nya dipejalai Syarikat Boustead," ku Tadong.

Tadong madah, Syarikat Boustead udah mayar dividen enggau pampas ngagai Pelita tang ga enda dibayar soh kami," ku iya nyebut ngagai pemberita di Kanowit bedau lama ke udah.

Iya madah, udah datai 13 taun tang sida lalu bedau nerima pampas enggau dividen ari Pelita lalu "tu udah didanji ngagai kami maya nyain sempekat suba (1999)".

"Udah beberapa kali tandan sawit dikembuah tang nadai sesen udah kami terima. Enda adil ngagai kami ke ngempu tanah," ku kutap iya.

Tadong nyebut dalam sempekat ke digaga Pelita enggau sida, Pelita deka mayar pampas tanah enggau dividen sekali dalam setaun lepas tiga taun sawit ditanam.

Setegal ke enda nerima bayar, orang ke ngempu tanah ngambi pemutus nutup tanah dikena ngayanka bantah.

Ke tanda bantah, sida mega udah Miring besampika penanggul nya diputar Pelita.

"Kami deka ngempang jalai ngagai dua buah ladang (Ladang Pedai enggau Ladang Joh) tang ngena atur. Tu ga kami udah Miring ngena genselan jani ngambika penanggul tu ulih teputar," ku Dang.

Nundaku iya, udah tu semua orang ke ngempu tanah deka ngembuah sawit ba tanah sida empu udah nya nyual baka ke enggi diri laban nya hak sida.

"Udah chukup sida nya bulih untung besai. Tu idar kami ga bulih untung".

Dang enggau Tong madahk,ladang nya deka dibuka baru enti Pelita mayar pampas ungkup sida dikira kenyau 13 taun ke udah.

"Pengawa perintah ngemansangka tanah NCR di Kanowit nya manah amat laban nya dikearap ulih nyungkak tikas penatai pemisi peranak menua pesisir. Nya kebuah kami setuju masuk sekim nya suba laban dikeandalka ulih ngangkatka ekonomi lebih agi ngagai anak uchu kami ke dudi hari.

"Tang utai bukai nyadi. Kami ngasaika diri kena tipu Pelita ke udah ngemuntanka sempekat. Sekim nya udah ngembuahka asil tang kami nadai nerima asil kenyau ari 13 taun ke udah. Kami udah mantaika penusah tu ngagai piak ke bekuasa tang nadai bulih timbal ari sida.

"Taun tu kami nyau nadai sabar agi tang nutup dua bengkah ladang ba tanah kami, kami bisi hak," ku Tadong enggau Dang mantaika pengeringat ati.

Keba sida ngapil ngagai Pelita gambika jampat agi meri pampas enggau dividen ngagai orang ke ngempu tanah ngambika enda neruska pemerinsa ke diasai sida ke balat suntuk ke nadai penatai pemisi ke tetap tang bepanggai ba dividen kena nupi diri.

Tadong enggau Dang udah ngaga riput polis bekaul enggau pekara tu ba balai Polis Kanowit kena 2 Januari tu tadi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Musin tengkujuh ukai semina ngeruga penatai pemisi orang berikan tang mega orang tengah

Posted: 06 Jan 2014 02:19 PM PST

by Chris Bishop. Posted on January 7, 2014, Tuesday

KUCHING: Musin tengkujuh ke benung ditapi kitai diatu ukai semina diasai orang berikan di tasik, tang mega mangka orang tengah ke nyadi pemeli ari orang berikan.

Tinjau Utusan Borneo di jeti orang berikan Kampung Goebillt besemak enggau mengeri Kuching kemari mandangka dagang ikan udah jauh nurun.

Seiku orang tengah ke dikerandau, Mohd Syahrul Shahari,30, madah dalam timpuh dua  minggu ke udah asil ari dagang ikan sida sebilik (Syarikat Pemborong Lapuk) enda bangat tentu manah ketegal gaya hari ti enda tentu.

"Dua minggu sebedau kitai mungkal taun baru, orang berikan sigi enda ulih nurun ke tasik. Gaya hari balat jai ke alai alun umbak ba tasik balat tinggi.

"Berindik ari nya, kami nadai nerima bekal ikan ti deka dijual ngagai pemurung ari pasar. Enti suba asil bejual manggai ngelui ari RM2,000 ninting hari tang diatu ke semina RM800 aja,"ku iya seraya madah penusah nya disadang diasai nyentukka bulan Mach tu ila.

Iya ti nyadi orang tengah ungkup 10 buah kapal berikan ari Pusa, Sri Aman madah, penatai pemisi sida (orang berikan) mega balat nyusut ari ke suah.

"Enti maya hari manah sida ulih teulihka asil urung RM700 ngagai RM800 sekali nurun ke tasik tang diatu engka semina RM250 aja.

"Baru seminggu tu sida bisi nurun ke tasik, nya pan baru dua kali aja. Ejensi penerit adat seruran matau pejalai sida ke alai sida ditagang berikan enti gaya hari enda manah," ku iya.

Ketegal nya mega, kitai ulih meda bekal ikan ba pasar ikan serata Kuching balat kurang, tandu iya.

Entara sekeda ikan ke suah dibeli Syahrul ari orang berikan iya nya ikan pari, tongkol, kembung, gelama, tenggiri, siakap sereta mayuh macham undang.

Syahrul mega madah iya enda sengapa nikika rega ikan ke dijual ngagai pemurung taja pan bekal kurang.

Iya madah enti rega ikan di pasar bisi niki, rega nya ditiki pemurung lalu ukai ketegal dulu ditiki ka iya.

Dua iku orang berikan ari Beladin, Pusa Mohd Yunus, 20, enggau Zulhelmi, 17, ke dikerandau ba atas kapal berikan madah sida udah lama enda nurun ke tasik.

Ku Mohd Yunus, kapal kami semina ditambatka ba jeti Kampung Goebilt ditu aja nganti gaya hari belinsur manah.

"Seraya ke nganti gaya hari manah, kami semina ngemanah perengka berikan baka ke nyait pukat ti udah pesuk enggau pengawa bukai.

"Nadai mih asil diulih maya ke diatu, ejensi penerit adat tasik mega nagang kami nurun ke tasik berikan,"ku iya.

Tinjau kemari mega mandangka mayuh kapal orang berikan ditambatka ba enda kurang ari empat jeti di Kampung Goebilt.

Kampung Goebilt udah nyadi sebuah genturung pendiau orang berikan kenyau ari kelia menya ke alai tebal agi pemurung tauka tuke datai meli ikan ke baru datai ari tasik ngambika tau dijual ba mayuh pasar ikan ngelingi Kuching.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Naka pukul 8.00 pagi kemari 8 buah sekula mengkang ditutup

Posted: 06 Jan 2014 02:18 PM PST

by Jacqueline David. Posted on January 7, 2014, Tuesday

KUCHING: Naka pukul 8.00 pagi kemari, enam buah sekula di Sarawak agi ditutup ketegal ampuh bah.

Sekula ke agi tutup naka pukul 8.00 pagi kemari, ke diterima ari 'Unit Perhubungan Awam' Opis Pelajar Menua (JPNS), iya nya SK Tagageng (Subis, Miri), SK Kpg Klid (Dalat), SK Nanga Nyuruk (Kanowit), SK Nanga Bon (Sibu), SK Ulu Sg Sengan (Sibu) enggau SK Sg Salim (Sibu).

Menteri Pengelantang Pendiau, Indu enggau Pemansang Diri Sebilik, Datuk Fatimah Abdullah madah sekula-sekula tu semina deka dibuka enti ai ngelingi sekula nya amat-amat udah surut.

"Ambika chunto, SK Kpg Klid (Dalat), taja pan ai enda masuk ke dalam kelas, tauka enda ngampuhka rumah sekula nya tang ngelingi sekula nya agi ampuh sereta deras, enda likun ke nembiak tauka apai indai ke nganjung anak sida iya nurun sekula, laban mayuh endur di sitak nya, jalai sida nembiak nurun sekula agi nengah sungai.

"Enti ai deras, apai indai ke nganjung anak nurun sekula pan enda likun, alai udah nya sekula deka madah ngagai direktor JPNS pasal pekara nya, ke bedau ngasuh sekula nya dibuka," ku Fatimah.

Iya madah baka nya lebuh dikerandau sepengudah bejadika Pengawa Pemandang 'Evolusi Seni Jahitan Kreatif enggau Business Matching' ti diatur Mosiwell Sdn Bhd di Plaza Merdeka ditu, kemari.

Iya madah bisi sekeda sitak, sigi ai masuk ke dalam kelas taja pan ai udah surut, tang ai pasang baru, kelas nya enda ulih dikena. Tang taja pia, bisi alternatif bukai digaga ulih sekula nya ngena endur bukai ke tinggi agi.

"Sekula bukai ke ditutup ketegal nadai jalai bukai agi deka nganjung anak nurun sekula tauka semua sitak nya kena ampuh bah," ku iya.

Ba sekula ke ditutup ketegal kena ampuh bah, Fatimah madah maya hari udah manah agi, kelas tauka sekula ke ditutup nya patut nganti hari sekula nya.

"Atur ke digaga opis menteri pelajar (KPM), penyampau hari sekula nya ditutup patut diganti." ku iya.

Fatimah mega madah, naka ke diatu, nadai sebarang ripot bisi diterima, kantin sekula nikika rega pemakai, ngambi ulih ari tasah ampuh bah ke nuntung sekeda sitak di menua tu.

Iya madah, KPM seruran beratika pekara tu, lalu naka ke diatu di Sarawak nadai sebarang ripot bisi diterima bekaul enggau pekara nya.

"Tiap orang ke bejalaika kantin sekula, sida iya bisi danji lebuh sida iya diberi kunterik nya, ke patut disain sida iya.

"Surat danji nya nyengkaum kos kuih tauka utai pakai ke dijual di kantin, nyengkaum berapa gram pemakai nya. Lalu kunterik ke diberi ngagai orang tu lebih ari setaun," ku iya ke madahka atur bejalaika kantin enda tau enda nitihka atur KPM.

Iya nambah, enti deka nikika rega pan, iya ukai tau digaga sebarang tauka peneka ati, tang mesti betanya ngagai KPM dulu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Raban Indu PBB deka chakah ngulihka kaban baru

Posted: 06 Jan 2014 02:18 PM PST

by Judan Bungap. Posted on January 7, 2014, Tuesday

Parti pampang Machan nya ngasaika peranak menua pesisir agi mayuh begunaka bantu penatai pemisi

KANOWIT: Raban Indu Parti Pesaka Bumiputera Bersatu (PBB) Machan deka ngerejister mayuh agi rebak baru ari menua masuk parti nya.

Ketuai Raban Indu PBB Machan Datin Catherine Gramong madahka pekara tu deka ngenegapka parti sida ke nyadi parti ke pemadu besai ba nengeri tu.

"Enti tubuh kitai mayuh, kitai deka muntang agi ngulihka pemujur sereta lantang bejalaika pengawa mantu rayat menua pesisir baka ba pekara penatai pemisi.

"Nengah pekara tu mega kitai ulih nambahka agi penyampau undi ari rebak baru," pia ku iya madah.

Iya mantai pekara tu maya Beserumpu Makai Lemai beserimbai enggau pengawa Ngintu Hari Krismas sereta Nyambut Taun Baru 2014 ba Opis Kaunsil Pelilih Kanowit kena 28 December tu tadi.

Pengerami nya diatur begulai Raban Indu enggau Nembiak PBB Machan lalu dipenyadika Menteri Muda Pemansang Tanah ti mega ADUN Machan Datuk Gramong Juna.

Berebak enggau nya mega, Catherina madah, iya deka chakah ngembing orang indu enggau raban nembiak bagi menua pesisir ba sitak nya ngenyemakka diri enggau pengawa main asal kelimpah ari pengawa lumba enggau main.

Pekara tu ku iya nyengkaum pengawa nenun, ngaga asil pengelandik jari, ngajat lalu pia mega ngatur pekit main futsal.

Bela bisi datai maya nya, sekretari Politik Kepala Menteri Maurice Giri enggau Tengku Geruna, Pemancha Chia Chau Fah, Pemancha Spencer Kudang enggau Kaunsilor Benjamin Angki.

Pengerami tu mega bisi digulu urung 700 lebih iku raban PBB pampang Sibu, Ngemah, Meluan, Tamin, Pakan enggau Machan.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Lo: MPP nyangka deka ngena sistem kupon enda lama agi

Posted: 06 Jan 2014 02:17 PM PST

KUCHING: Opis Kaunsil Kandang Bandar Padawan (MPP) nyadang teulihka asil penyampau RM1 juta enti diberi pemendar ngeletakka bayar ba endur ngengkah entukar.

MPP udah merambu ngagai Menteri Kaunsil Kandang Menua enggau Pemansang Raban Bansa ngambika dikemendar ngeletak bayar ba Batu Tiga, Kota Sentosa, MJC Batu Kawa enggau Kota Padawan.

Chairman Lo Khere Chiang madah kaunsil udah nganjung Draft Parking Order ngagai opis menteri dua bulan ke udah lalu benung nganti pemendar diatu.

Lebih ari 2,000 endur ngengkah entukar deka diletakka bayar enda lama agi ke alai kitai benung nganti pemutus ari menteri.

"Kitai bedau mutuska chara bejalaika atur tu. Sekali ka kitai deka nitihka atur ti dikena MBKS tauka DBKU," ku iya madah ngagai pemberita pengudah ngulu randau enggau Kaban Kunsil Nengeri Kota Sentosa Chong Chieng Jen kemari.

Lo netapka MPP enda sengapa ngeletakka bayar ngengkah entukar lalu ukai enggau tuju ngulihka penguntung.

"Nengah chara ngeletakka bayar, kitai ngarap mensia mayuh ulih bebasaka adat ti udah ditetap sereta ulih nentuka pejalai entukar enda besekat,'ku iya.

Iya madah opis kunsil merambu ngeletakka bayar ba kandang endur ke suah sekut baka ke ba Batu Tiga enggau Kota Sentosa.

Entara tiga opis kaunsil, semina MPP aja ke bedau ngeletak bayar ngengkah entukar ba kandang endur ke dikuasa, tandu iya.

Ba kandang endur MBKS enggau DBKU, kupon ngengkah entukar bisi disedia nengah rega 20 sen, 50 sen sereta 80 sen. Tiga puluh minit keterubah dipinta mayar 20 sen lalu 30 minit nambah nya dichaj 50 sen sereta 80 sen enti lama agi ari nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Indai niang Mu salah pelaba pengelikun bandar raya Miri

Posted: 06 Jan 2014 02:17 PM PST

MIRI: "Aku melaba Miri sebuah bandar raya ke likun alai anak aku belajar," pia munyi kutap indai Mu Tshun Vui.

Apai indai Mu dipeda ba Rumah Mayat Hospital Miri malam Hari Enam tu tadi.

Seduai melaki bini sangkai ditu ari Sandakan di Miri kena Malam Hari Enam urung pukul 10 malam.

Sida nyebut Mu seiku anak ke mereti sereta manah ati, iya enda kala nating apai indai ba senentang belanja.

Bisi didinga indai Mu nyebut dalam sabak 'Pulai anak….pulai ke rumah anak," lebuh ke nachar perening ngagai mua pintu rumah mayat ke alai anak lelaki iya, Mu Tshun Vui disimpan sebedau dibuntastasat.

Sida udah nya dibai ngagai Rumah Mayat Hospital ngambika ngelala anak sida ke dibunuh ba rumah suwa dua ringkat ba Jalai Jati 1, Senadin kena Hari Enam.

Dipeda nyempulang seduai mega ADUN Pujut, Alan Ling.

Seduai mega dipeda berandau enggau pemesai Penasat (JSJ), ASP Zainan Azili ba laman rumah mayat.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.