» »Unlabelled » PPK besebana suah putus bekal lekterik BorneoPost Online | Borneo , Malaysia, Sarawak Daily News » Berita Iban - New 2 Borneo

05:18:00

PPK besebana suah putus bekal lekterik BorneoPost Online | Borneo , Malaysia, Sarawak Daily News » Berita Iban - New 2 Borneo

PPK besebana suah putus bekal lekterik

Posted: 25 Jan 2014 10:49 AM PST

by Chris Bishop. Posted on January 26, 2014, Sunday

Raban gerempung udah balat rugi pengudah bekal karan ke suah peputus

KUCHING: Persatuan Pengurusan Komplek (PPK) Sarawak begulai enggau sekeda gerempung dagang ke bekaul ngelingi mengeri Kuching minta Sarawak Energy Berhad (SEB) nyendiakka bekal lekterik ke enda peputus.

Pengari PPK Sarawak Ronald Ling madah kenyau ari taun 2012 nyentukka diatu, raban dalam gerempung ke tebal agi orang dagang udah balat ngasaika pengerugi pengudah bekal karan ngagai palan endur dagang suah putus.

"Dalam timpuh dua taun tu, penusah putus bekal karan suah nyadi ke alai sekeda nya nyentukka ngagai pengelama bejam-jam.

"Penusah tu ngujungka orang dagang sereta palan dagang ke besai balat rugi lalu nya nyengkaum ba bayar endur ngengkah entukar enggau asil bejual," ku iya bejaku ba siti aum pengarang berita ke diatur ba Plaza Merdeka Kemari.

Kitai ngarapka SEB ulih bejalaika atur ti patut dikena ngenukuka bekal lekterik ngagai palan dagang sereta mega rumah enda putus, tandu iya.

Iya madah entara sekeda kaban dalam PPK ti balat ngasai pangka penusah iya nya palan dagang Plaza Merdeka, Tun Jugah, Green Height Mall, tHe Spring Shopping Mall, Hills Shopping Mall, City One enggau Eastern Mall.

"Kelimpah ari nya, orang dagang bukai baka ke ba India Street bela mega napi pengerugi," ku iya.

Iya nambah, penusah bekal lekterik ukai semina mai pengerugi tang mega tau ngeruga pengelikun orang ti datai bebelika barang kelebih agi ba palan dagang ke bebesai.

Ku iya, tebal agi palan dagang ke besai disikap enggau lift, eskalator sereta pintu otomatik ti dibuka nengah kuasa lekterik ke alai semua perengka tu tau ngenusah orang ba dalam nya enti bekal lekterik putus ngenyit.

Menijer Besai Plaza Merdeka Alan Tang ke bela ngulu aum pengarang berita kemari madahka palan dagang 'Plaza Merdeka' napi pengerugi RM122,000 maya penusah putus bekal lekterik ke nyadi ba bulan Januari 2014 bedau lama tu tadi.

Ku iya, dalam  bulan Januari tu aja udah dua kali bekal lekterik putus ke alai penusah tu udah ngujungka kitai nutup palan dagang ungkup pemaik semua.

Penusah ke sama mega udah ngujungka tHe Spring rugi lebih RM200,000.

Entara gerempung bukai ke bekaul enggau PPK iya nya Kuching City Centre Consultative Committee, India Street Pedestrian Mall Committee enggau Kuching City Centre Merchants Association.

Ling mega madah gerempung sida kala nganjung surat ngagai SEB minta pekara ke bansa tu diputar manah dalam taun 2012 suba.

"Kita bisi nerima surat balas ari SEB ke alai sida ngenataika jaku ampun lalu deka beratika pekara nya enggau silik," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Mustafa: RELA nadai kuasa nangkap PATI

Posted: 25 Jan 2014 10:48 AM PST

KUCHING: Kaban Opis Sukarelawan Malaysia (RELA) nadai kuasa nangkap orang ari menua luar ti tama enggau nadai pemendar (PATI) pengudah akt baru dikenuku kena 22 Jun 2012 suba.

Ketuai Direktor RELA Datuk Mustafa Ibrahim madah berengkah akt baru nya dituku, tiap kaban RELA penyampau 2.98 juta iku di Malaysia semina ulih mantu ijinsi bukai baka ke polis enti dipinta.

"RELA nadai kuasa nangkap PATI agi. Kitai semina ulih mantu nangkap PATI enti dipinta polis tauka opis imigresen.

"Enti dipinta, RELA semina mantau kandang endur ngelingi operasi ke alai pengawa nangkap PATI deka dikereja raban polis enggau imigresen," ku iya.

Iya mansutka penerang tu ba siti aum pengarang berita nyerumba aum ngintu Hari Pengada RELA ke-42 ti deka diintu di Palan Aum Borneo Kuching (BCCK) kena 10 Februari 2014.

Ku iya nambah, akt tu dikearap tau ngubah runding mensia mayuh ti suah nuduh raban RELA besalahka guna kuasa ke diberi ngagai sida.

Ba kaul bukai, Mustafa madahka RELA udah numbuhka 'Crisis Management Team' (CMT) di 156 pelilih menua serata Malaysia.

"CMT tu bisi 780 iku kaban ke regas lalu deka dianjung ngagai palan ke dituntung penusah baka bah, tanah tusur enggau ke bukai.

"Sida deka bekerejasama enggau ijinsi bukai ke bekaul, mindah orang ke dituntung penusah ngagai palan ke likun sereta mega nyaup operasyen nyelamat enggau begiga," ku iya.

Kelimpah ari nya, iya mega madahka Skuad Ronda Motosikal RELA ti udah ditumbuh mujur mantu ngurangka indeks kes penyalah jai ba tiap genturung pendiau ke dijaga.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RPL diadangka meri mayuh penguntung ngagai peranak Sarawak, ku Richard Riot

Posted: 25 Jan 2014 10:48 AM PST

SERIAN: Atur perintah ti deka ngangkatka Program Meri Kelala Pelajar Dulu (RPL) deka meri mayuh penguntung ngagai peranak nengeri Sarawak, ku Menteri Pengintu Pengereja Pengawa Dato Sri Richard Riot Jaem.

Ku iya, pengawa ngangkatka RPL bedau ditemu maya pengelengkas atur nya dipejalaika taja pan opis menteri iya udah ngansak semua ijinsi ke bekaul nyikap diri.

"Atur tu nyadi sebengkah pengawa ti dikereja opis menteri enggau tuju ngadaka mayuh agi pengereja pengawa ti ngembuan pengelandik lalu nyaup ngangkatka ekonomi menua," ku iya.

Riot ke mega Kaban Parlimen Serian mansutka jaku tu ba pengerami ngelanchar Bantu Sekula 1Malaysia 2014 (Spisil) ungkup semua sekula dalam pelilih mit Serian di SK St Dominic Pichin ditu, kemari.

Iya netapka nengah program RPL, pemerati enggau Pemesai Penilai ari institusyen ke dipebasa deka matih raban pemerati enggau pemesai penilai menua tu pengelama tiga taun.

Iya madah perintah udah ngadu kerejasama enggau empat kolej ari UK iya nya ari Wales, England, Scotland enggau Ireland ngambika ulih bekungi pengelandik enggau universiti menua tu.

"Pengudah bekungsi penemu sereta pengelandik enggau pengari kitai, pengawa meri basa ngagai raban orang ke ngembuan pengelandik enggau peneleba tang enda ngembuan setipikit deka mudah agi dikereja.

"Mayuh orang kitai diserangkum ba kategori tu, enti program tu dituku kitai minta sida ngerijister diri ke alai enti sida mujur napi pengawa nguji ikas pengelandik enggau penau, sida deka diberi setipikit ti setikas enggau degree,"ku iya.

Iya nambah, pengawa nya nyadika sebengkah singkang digaga perintah ngadaka mayuh agi pengereja pengawa ke landik jemah.

Ku iya, pekara tu udah dikerandau sereta disetuju Menteri Besai Datuk Seri Najib Tun Razak ke alai iya mega udah ngagih sekeda belanja dikena ngemujur program.

Nengah program tu, aku pechaya kitai ulih nyapai tagit ngembuan 50 peresin pengereja pengawa bepengelandik manggai ba taun 2020," ku iya.

Iya madah, naka ke diatu 28 peresin ari penyampau 14 juta pengereja pengawa ba menua tu ngembuan pengelandik ke alai semina 10 peresin ari penyampau nya gawa ba opis perintah lalu iya ke lebih gawa ba kompeni.

"Berindik enggau nya, enti kitai enda nusun program diatu, kitai enda ulih nyapai tagit ngembuan 50 persin pengereja pengawa ke landik lalu dalam timpuh enam taun ke deka datai kitai enda mujur nyapai ikas menua mansang," ku iya.

Ngenang pekara nya, iya ngansak tiap pengaji enggau orang ke gawa ngangkatka tikas pengelandik diri ngambika ulih ngangkatka produktiviti seraya ti ngembuan penatai pemisi ke jelan besai.

"Enti juluk tu ulih dijapai, nya meh maya kitai ulih netapka penyampau gaji pemadu mit. Enti enda, orang ke gawa deka ketawa ketegal sida diberi gaji besai ke alai pengaji deka besebana nanggung ungkus operasi ke tinggi," ku iya.

Bela datai sekretari politik Menteri Besai Major (Rtd) Peter Runin, Temenggong Robert Sullis, raban ketuai bansa enggau orang bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Program CERT Engkilili mujur diatur ba rumah panjai Roy Entalai

Posted: 25 Jan 2014 10:47 AM PST

ENGKILILI: Seraban 165 iku ari 27 rumah panjai ba kandang Kunsil Nengeri (DUN) Engkilili masuk ba Program Latihan & Pelancaran Pasukan Bertindak Kecemasan Komuniti (Community Emergency Response Team) (CERT) Engkilili ke diatur ngelama tiga hari ba rumah panjai Roy Entalai, ditu, kemari.

Pengerami program nya udah dipenyadika DUN Engkilili Dr Johnnical Rayong anak Ngipa.

Lebuh ke bejaku, Dr Rayong madahka tuju program nya diatur ngambika bisi kena ngiri penemu ngagai mensia mayuh sentang penusah ngenyit ke nyadi ba kandang pendiau sida.

Ku iya, nengah raban CERT Engkilili nya, peranak rumah panjai tauka ba kampung ulih nyaup nyeliah sereta ngurangka pemedis enggau pengerugi reta tengkira ketegal penusah ngenyit sebedau penatai raban profesyonel.

"Raban tu dilatih sereta diberi semua pengelandik ke bekaul enggau penusah ngenyit sereta ulih meri bantu jampat ba palan penyadi nya, seraya ke nganti raban penyelamat ari ijinsi bukai datai," ku iya.

Ku Dr Rayong, pengawa numbuhka CERT tu beguna amat ngagai peranak rumah panjai tauka kampung laban kelimpah ari raban penyelamat, sida mega deka nyadi jematan penyambung antara ketuai, rayat enggau perintah.

Berebak enggau pengerami nya, Dr Rayong ngungkupka belanja Projek Mit Pemansang Menua (MRP) sama bela RM5000 ngagai JKKK Rumah Panjang Roy Entalai Selindung Ulu enggau Biro Indu sida.

Sama bisi ngulu pengerami nya, Direktor Unit Pengelikun Nengeri Datu Dr. Haji Yusoff Nook, Kepala Polis Pelilih Mit Lubok Antu, DSP James Jonathan, sapit DO Lubok Antu, Langgong anak Wassam enggau sekeda bala ketuai raban bansa ba kandang menua Engkilili.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SK Melugu ngagih duit bantu sekula ngagai 301 nembiak

Posted: 25 Jan 2014 10:46 AM PST

SRI AMAN: Seraban 301 iku nembiak ari Sekula Primari (SK) Melugu nerima duit bantu buka sekula ungkup taun 2014 ditu pagi tadi.

Duit bantu diberi perintah menua Malaysia kena ngamatka semaya ngelempungka tating belanja apai indai bebelika kereban sereta ungkus besekula ke majak niki.

Ku Kepala Pengajar SK Melugu, Louis Aom lebuh ke meri penerang ngagai bala apai indai, duit bantu nya patut dikena meli kereban sekula bala anak baka gari, perengka tulis enggau bup.

Iya ngelalau apai indai seruran ngemeratka perengkaguna sekula anak sida ngambika sida seruran nyendiaka diri besekula.

Kelimpah ari duit bantu nya, sama bisi diagihka iya nya duit KWAPM ngagai apai indai ke patut nerima bepelasarka peminta nengah e-kasih ti diberi Opis Pengintu Pengelantang Pendiau. Ungkup ruang bilik ke seranta sida nerima RM450 lalu ruang bilik ke umang nerima RM750.

Berebak enggau nya, bala apai indai ke nerima duit bantu nya berasai gaga endar ati sereta meri terima kasih ngagai perintah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Anang niki ke rega sepeneka ati

Posted: 25 Jan 2014 10:46 AM PST

by Rengenyan Labang. Posted on January 26, 2014, Sunday

Taja betapi enggau suntuk bekal tang raban orang dagang di menua pesisir dipinta enda beambi ulih: Wan Junaidi

KUCHING: Orang dagang di menua pesisir Sarawak dilalau enda niki ke rega barang sepeneka ati, taja pan betapi enggau suntuk bekal ketegal gaya hari ti selalu ujan.

Berindik ari pekara nya, Sapit Menteri Dalam Nengeri, Datuk Dr. Wan Junaidi Tuanku Jaafar ngarapka raban penerit adat ari Opis Dagang Dalam Nengeri, Koperasi enggau Pekara Bebeli Barang (PPDNKK) Pampang Sarawak ngatur pengawa matau rega barang ke menua pesisir.

"Ba aku pekara ti patut dikemeratka mega di menua pesisir, beduduk ari sungai enggau gaya hari ti enda manah, kitai irauka orang dagang di menua pesisir ngambi peluang niki ke rega barang.

"Nyadi aku amat ngarapka orang dagang di menua pesisir baka di Kapit, Belaga, Ulu Baram enggau kandang menua pesisir ti jauh ari pasar enda niki ke rega barang sepeneka ati.

"Aku amat arap bendar mega opis menteri (PPDNKK) deka suah agi bejalaika pengawa matau barang enggau rega barang di menua pesisir," ku iya seraya madahka menteri enggau sapit menteri dipinta kabinet sama matau rega barang di menua tu.

Wan Junaidi ti mega nyadi Kaban Parlimen Santubong mansutka pekara tu ngagai pengarang beritu ditu, pagi kemari. Dulu ari nya iya bejalai seraya matau rega barang di Pasar Komuniti Stutong.

Ku iya bejaku baru, perintah ba tiap sitak parlimen bisi nyirika seikun pengari ti diberi tanggungpengawa meri penerang ngagai PPDNKK bekaul enggau peniki rega barang.

Kelimpah ari nya iya madahka diri temegah ati ngagai orang dagang di nengeri tu ti ngemeranka ulah ti menyana iya nya enda sepeneka ati niki ke rega barang.

"Nitihka pansik KPDNKK berengkah ari tengan taun 2013 nyentukka diatu rega barang enda ditikika kelalu tinggi tauka ngenyit.

"Di Sarawak kitai enda nyadika rega barang dikena mejal rayat, kitai ngingatka orang tengah anang sesekali niki ke rega barang nitihka peneka diri laban nya mega tauka ngujungka orang dagang nikika rega barang," ku iya.

Ngenang diri ti matau rega barang iya madahka rega barang basah enggau rangkai di Pasar Komuniti Stutong enda kelalu mar tauka niki mimit aja.

Dikearapka piak penerit adat KPDNKK deka chakah agi matau rega barang, ti ukai semina dipejalaika maya bisi pengerami aja, ku Wan Junaidi.

Nyempulang iya kemari, Sapit Direktor PPDNKK Pampang Sarawak MOhd Nor Musa, Datuk Bandar Majlis Bandaraya Kuching Selatan Datuk James Chan sereta bini Wan Junaidi, Datin Feona Junaidi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.