Pesan Ari Menua Davos – Sada Nyawa Siku Tuai Ari Menua Ti Kaya Pengeraja Asal Tanah Tang Rayat Iya Seranta |
| Posted: 27 Jan 2014 04:00 AM PST  Pemanah menua ti begaya hari chelap sereta kaya – sekali ke bala tuai ari menua ti begaya hari angat begunaka sistem ti enda besiping ke rayat sida? Lebuh maya bala tuai menua ti kaya-kaya enggau raban orang ti mutarka pekara belanja begempuru di nengeri Davos dalam aum ninting taun sida, siku tuai menua ari menua Afrika udah nuliska sebuah artikel ngena gaya jaku ti lanchar bendar dalam suratberita Guardian di UK. Presiden menua Guinea, Alpha Conde, udah ngaga simpul penemu ti madahka penanggul besai ti ditapi sekeda menua begaya hari angat di dunya tu, baka menua Guinea enggau Sarawak, ti endur rayat sida diberekatka enggau rampa menua ti kaya ba pengeraja asal sereta tanah ti gemu lalu diuan bala orang ti enda mayuh tubuh. Rayat ti baka nya patut ulih idup nyamai sereta berasai diintu enggau manah, tang ketegal sekeda ari pengawa makai suap bala tuai sida, sida udah lenyau endur bepanggai nasit. Enti Presiden Alpha Conde ari menua Guinea nya endang amat ngereja setengah ari utai ti dituliska iya nya, rayat di menua iya tentu berasai bidik ke tuai ti baru sida nya, ti dipilih sida nengah sistem demokrasi ke tulin beberapa taun tu udah. Munyi ku iya, penyeranta ti dibai raban tuai menua ti balat makai suap di menua ti kaya ba pengeraja asal, menua ti benung mansang, ti enchuri ari rayat sida empu, lalu ukai mantu ngangkatka pemanah pengidup sida.  Alpha Conde nguji mutarka penanggul penyalah makai suap enggau sistem kleptokrasi Tang iya mega nujuka jaku kutuk iya ngagai kompeni-kompeni menua tasik ti rangka, ti nyuap bala menteri ba sesebengkah menua nya dikena sida ngulihka konsesyen bedagang lalu mega ti meransang penyawa makai suap – lalu besemayaka pengidup kaya-raja ti sereba moden. Baka nya mega, raban lawyer enggau akauntan menua tasik ti rangka, ti sama mantu orang politik enggau kompeni ti rangka ngambika ngubah penerang enggau angka-kira enggau chara ti salah. Lalu, bala pemesai-pemesai bank sereta enggau bala 'pengurus reta' ari menua tasik ti rangka ti mantu mai pansut semua duit nya ngagai menua tasik lalu nyimpan dalam akaun di menua-menua baka BVI enggau di menua bukai. Sekali ke gaya utai tu sebaka enggau ti diasaika orang di menua Malaysia? Ulah 'ngeluluka diri enda nemu' nya ti dibai tama sistem sosial menua maju ari barat ti nyadika peransang pengawa nabanka duit menua ti disimpan ba menua tasik ti enda bechukai. Ba endur tu, duit ti dichuri sida nya nadai mantu sapa-sapa, kelimpah ari ti ngujungka rega reta tengkira niki ba menua-menua bedemokrasi, lebuh raban orang politik 'menua ti benung mansang' ti rangka sereta korup nya mutuska penemu sida melanjaka duit taban nya ke sida empu aja.  Baka ni maya dudi hari KAMI tu ila? Bala orang ti mantah projek tekat ai bejalai bebala mayuh mai anak patung enggau chara simbolik Alpha Conde diatu ngansak menua adap ke barat ti 'taluk ngagai undang-undang' ngambika ngetuka ulah jai tu lalu badu agi ngena dalih lama nya "enti kitai ti manah-manah tu enda ngereja nya, orang bukai ga deka ngereja nya". Tuju ke bendar aum baka ti diatur di Davos nya ngambika bala tuai menua ari serata dunya tau begempuru, bejurai sereta ngaga undang-undang dikena nentuka pengelurus sereta enda nyiping sapa-sapa. Rayat menua Sarawak tentu andalka sida diperintah siku tuai menua ti baka Presiden Alpha Conde ari menua Guinea nya. Enggau tu kami mutuska penemu kami ngeluarka baru isi artikel ti dituliska iya ngagai suratberita Guardian nya: Di Davos, menua-menua barat patut mantu kami ngemunaska penyalah makai suap di Afrika Ari ti nyadika Presiden ke menua Guinea aku nemu kami enda ulih mutarka penanggul tu kediri – penyalah makai suap tu lama udah betapak dalam intitusyen barat ti udah mantu mungkangka menua kami. Kurang ari tujuh bulan ti udah aku bisi dikangauka David Cameron ngulu sebengkah aum G8 di London dikena nengkebang siti kes madamka penyalah makai suap nengah penampak. Aku bisi ngambi bagi laban terang bendar bala tuai menua-menua barat ti kaya diatu udah mereti lalu deka mutarka penanggul ti kompleks tu, timbal entarabansa endang beguna amat. Nitihka jaku Cameron: "Kitai patut nentuka pengeraja asal tanah ari menua ti benung mansang nya dikumbai berekat, lalu ukai sumpah. Enggau nya, ba aum G8 nya aku bisi ngansak penampak ti lebih agi patut dipejalaika nyerumba pengawa dagang tebuka." Semina mimit aja menua ti ngasaika sumpah nya lebih agi ari Guinea. Dalam pengelama berapa serak tubuh kami, penyalah makai suap dalam menua enggau sistem pengawa perintah ti lemi sereta atur demokrasi udah ngemendarka sekeda kompeni ganas bechurika reta rayat tang enda diukum. Siku orang kaya di Sudan, Mo Ibrahim, kala madahka siti ari kontrak ti benung dipansik perintah: "Sekali ke rayat Guinea empu ti ngereja penyalah nya orang ti beli tauka orang ti jai? Tauka dua-dua sekali?" Siti jaku tanya ti manah. Lalu siti agi, kitai arap ke tanya nya ulih saut ba pengeluar sebengkah reviu ke mayuh bengkah kontrak ti disain lebuh rambau diktator suba. Aku nyadi presiden nengah atur demokrasi ke terubah di menua Guinea ti dipilih empat taun tu udah, lalu pengarap bala rayat kelalu besai. Sekeda ari nya, dikena mulaika undang-undang, mulaika menua Guinea ngagai ikas solvensi, lalu ngurangka pengawa nipu dalam belanja pekara pengelikun menua ti lama udah kembai. Pejalai pengidup rayat Guinea tu mar sereta pait tang kami udah mujur nanjak arus. Kami udah mujur ngurangka defisit fiskal ngagai ikas 3%, akaun pekara pengelikun diatu duduk ba 10% ari GDP kami enti dibandingka 40% lalu penumbuh ekonomi ba taun tu udah ditimpaika ngambika lebih ari 4.5%. Tang bisi ironi ti balat dalam tachah juang kami dikena kami nyelamatka ekonomi kami ari ti majak puntan. Menua Guinea ke bendar iya endang kaya ba pengeraja tanah enggau deposit bauksit enggau bijih besi tunggal ti pemadu besai di dunya sebedau diambi – nadai siti pan asil nya udah diasaika rayat Guinea empu. Sekeda kompeni ari meua tasik, disukung rejim dalam menua ti balat korup, udah ngerangkaika pengawa asal Guinea ba pengelama bepuluh-puluih taun. Pemati ti belubah-lubah ti disukung jarin pengawa raban lawyer, akauntan enggau penyanding penemu pekara belanja ti duduk dalam opis ti manah-manah di nengeri London, New York, Paris, Geneva, Hong Kong enggau Singapura. Numbas nya ke diatu. Aku diatu benung di nengeri Davos ngambika ngansak perintah-perintah menua barat ngenuluka kuasa sida ba penampak ti disemayaka sida lalu ngemataka kuasa pengelantang semua orang, ukai semina orang Guinea, tang bala bakih sida ti beempu tanggungpengawa beranakka puku di menua kami lalu bejalaika pengawa dagang sida beduduk ba undang-undang. Ubah dalam atur bank pusat kami mai reti pekara dagang menua kami patut bepanggai ba agih belanja tunai. Kami enda ulih nyelak duit ke diri empu, kami patut bepanggai ba utai ti dikemisika dalam menua kami empu. Pengawa ngulihka asil ari tanah di menua kami mai mayuh penampak ba agih kontrak. Kami udah nginjau NGO entarabansa, Revenue Watch, ngemataka akaun-akaun menua kami. Tang kami diatu ngidupka diri dalam pengawa dagang global. Kami enda ulih bepanggai ba institusyen dagang menua barat ti balat korup sereta rangka ba penyauh lebih 3,000 batu ari menua kami. Bala orang dagang ti korup ari barat nya bekereja ari jauh, tang chara kereja sida nya global lalu begunaka timbal sechara global mega. Semina tindak ti begempung ti tinggi sereta lebih responsif sereta terit entara bala orang penerit atur ba dua buah menua ti benung mansang aja tau nyadi nyengala agi. Mayuh kompeni sereta perintah udah meretika utai tu. Sekeda kompeni entarabansa benung meranakka puku dagang sida dalam pengawa dagang ngulihka asil tanah kami beduduk ba atur ti enda besiping sereta tampak. Sukung ari menua US udah mujur mantaika penerang pasal penyalah makai suap ti dikereja bala orang dulu suba nya balat bendar empas. Enggau bantu pekara undang-undang entarabansa, menua Guinea deka mansutka penerang asil pansik ba sekeda jaku tuduh bekaul enggau penyalah makai suap ti balat ba cherita menua Afrika. Aku minta menua bukai mega patut ngereja pengawa tu ba institusyen pekara penatai pemisi sida empu. Rayat menua Guinea enda ulih andal sereta gaga ke cherita lama menua sida empu. Tang kami deka andal sereta gaga ati ke maya dudi hari ti deka datai ila. Kami deka ngereja semua pekara dikena kami niri-negika menua tu belalauka penampak enggau undang-undang. Tang belabuh enggau beberapa bengkah institusyen sida ti balat korup, aku minta awakka sida nyadika sebagi ari chara mutarka penanggul tu. |
| Posted: 27 Jan 2014 03:49 AM PST  Riza Aziz Hollywood madahka iya nya semina orang ti ulih melanja, tang ukai tukang ngaga wayang ti pandai nengkebang Batang pengawa Riza Aziz, iya nya anak tiri Menteri Besai Malaysia Najib Razak, di Hollywood diatu udah luluh, enggau berita ari Los Angeles ti madahka komiti Academy Awards udah mansutka pemutus deka muai nama iya ari rintai nama chalun penerima tanda puji pengeluar wayang pemadu manah sida. Ba sebengkah agi berita ti nyelai, komiti Academy nya udah enggai agi nerima rintai nama bala pengeluar wayang ti asal sida nyadika raban pengeluar wayang Wolf of Wall Street lalu ngujungka orang kaya ti biak Malaysia nya dibuai terus ari raban kreatif wayang nya. Jaku gerah nya dipansutka udah bekau spekulasyen dalam pengelama seminggu di Hollywood, udah pengawa nganjung nama chalun ti asal hari Empat nyin kemari, taja pan sida udah nganjung nama wayang sida ngambi bagi dalam kategori Wayang Pemadu Manah, Wolf of Wall Street lalu agi puntan mansutka nama bala pengeluar wayang sida nya. Tu ngambarka gaya utai ti nyadi nya jarang bendar didinga. Semua wayang bukai dalam kategori nya udah nganjung nama raban pengeluar sida, semina bala pengeluar wayang Wolf of Wall Street aja ti mengkang nuliska penerang "Nominee To Be Determined (Bala Penerima Bedau Ditetapka)".  Bedau ditetapka agi? Bisi jaku randau udah didinga lalu pengirau ati sekeda orang pasal kerja kreatif ti udah dibalut bala orang kaya ti semina deka ngulihka penampak nama enggau penguntung ari ti beranakka puku dagang di Hollywood. Suah agi atur Academy nya semina ngemendarka 3 iku ari raban pengeluar niki ngagai panggau nerima Oscar Wayang Pemadu Manah nya, munyi ti diterangka siku pemeri penerang ari pengawa dagang nya, tang bisi mega maya endur bala pengeluar wayang dikemendarka niki datai ke empat iku.  Jaku tangkan nya 'Ukai ke dijual' Rintai nama ti dikenataika Red Granite enggi Riza Aziz, sebengkah kompeni ti melanja projek wayang kenyau ari taun 2011 nya, nya Riza Aziz empu, bakih iya Joey Mcfarland enggau pengeluar ti endang bejalaika pengawa, Emmas Tillinger Koskoff. Tang ba pengujung jurai lemai kemari, Academy lalu mansutka jaku gerah ti madahka pengarah Martin Scorcese enggau pengelulu wayang Leonardo di Caprio, ti endur kompeni-kompeni seduai nya endang bisi bagi ngemansangka wayang nya, dikemendarka enggau nerima tanda puji Oscar nya. Enggau nya raban pengeluar wayang nya diatu nya Martin Scorcese, Leonardo di Caprio, Koskoff enggau Mcfarland! Laman portal suratberita pekara pemerindang di Hollywood, Deadline, madahka pekara ti baka nya "jarang bendar udah nyadi" lalu raban komiti Oscar nya udah "muai Riza Aziz" ari rintai nama bala penerima tanda puji Oscar nya.  Pangan dagang dalam kompeni Red Granite Pictures, Riza Aziz enggau Joey Mcfarland Bala orang ti meri penerang ari dalam Hollywood, ti berandau enggau Sarawak Report ba minggu nyin kemari, madahka isu nya udah ngujungka komiti Oscar nya nyau berunding dua tiga kali pasal nentuka pengawa ti deka meri nama Wolf of Wall Street nyadi sebagi ari wayang ti tau diberi tanda puji nya. Nitihka penerang sida, pengirau ati ba raban kaban Producers' Guild of America (PGA) madahka bisi mayuh bala orang ti kaya-kaya udah ngumbai diri nyadika pengeluar wayang ti dipelanja sida taja pan ukai ti ditengkebang sida. Ba Wolf of Wall Street ti dipelanja Red Granite enggi Riza Aziz, udah bekau kompeni Warner Bros matak diri, taja pan sida nya ke asal iya nengkebang lalu ngemansangka wayang nya. "Sida nya agi kelalu baru" kenu ku siku pengeluar wayang ti udah chukup lama bekereja ba pengawa dagang nya, ti berandauka pasal Riza Aziz enggau Mcfarland.  Riza Aziz, Mcfarland, Jho Low enggau siku ari pengelulu wayang Wolf of Wall Street, Mathew Mcconaughey Strategi dagang Red Granite Pictures ke selama tu nya semina meli lalu melanja projek-projek ngaga wayang ti udah kala dikemansangka orang profesyenal ti bukai dulu ari sida, ti udah nya ngelekaka wayang nya ba renggat ngeluarka wayang nya.
Mcfarland enggau Riza Aziz undah nunjukka seduai endang besedia mayar beratus-juta dollar ke projek-projek nya ti udah dilekaka studio bukai ketegal sida ke ngumbai wayang sida nya tau napi risiko pengerugi ti tinggi. Bala orang dalam ti meri penerang udah nganggarka, kenyau ari kompeni nya dilancarka, nyengkaum pengerami pemadu besai di Cannes dalam taun 2010, kompeni Red Granite udah melanja nyentuk ke setengah billion dollar ke wayang-wayang ti bedau tentu ulih meri asil penguntung ngagai sida. Tu nyengkaum wayang baka 'Dumb and Dumber 2', 'Horns' enggau 'Out of the Furnance'. Ungkus ngaga 'Wolf of Wall Street' aja udah manggai $100 juta, lalu $35-40 juta agi udah dikena melanja pengawa iklan enggau ngelakuka wayang nya, kenu ku siku orang profesyenal Hollywood.  Pengeluar ari kompeni Red Granite Pictures, Joey Mcfarland mengkang dichalunka enggau nerima Oscar nya Cherita ti benung dikerembaika di pelilih menua Hollywood nya pasal Riza Aziz tauka Mcfarland ti enda kala dikelala sapa-sapa sebedau seduai iya melanja "pengerami pemadu besai" di pelilih menua Cannes tiga taun ke udah, lalu seduai iya nadai ditemu ngembuan sebarang peneleba tauka pengelandik ba pengawa ngaga wayang gambar. Tu endang dipelabaka udah ngujungka pengawa ngenataika nama seduai ditulak lalu ba pengujung nya Academy udah muai nama anak tiri kaya Menteri Besai Malaysia nya ari rintai nama penerima Oscar.  Ketegal ti laun lalu bisi penyelai, nama Riza Aziz dibuai ari rintai nama chalun penerima OscarIni telah memungkinkan proses pencalonan mereka itu ditolak dan akhirnya Academy telah memutuskan bahawa nama anak tiri kaya Perdana Menteri Malaysia itu digugurkan dari senarai penerima Oscar. Sebengkah agi pengirau pasal kompeni Red Granite Pictures di Hollywood, ti dikumbai udah nyungkak pemutus penemu raban komiti Oscar nya ngelaban Riza Aziz. Pekara nya nyadi udah bekau repot enggau komen Sarawak Report ti diambi suratberita bukai di Malaysia, ti ngambi jaku "bala bakih" Riza Aziz di menua US ti andal ke pemujur Red Granite nyadika "pemechah pengawa dagang nengali raban bansa Judah di Hollywood". Batang penemu ti kelalu lunggar baka nya udah nyereminka sentimen ba sekeda raban dalam serakup BN di Malaysia, ti endur jaku nya udah ngasuh sekeda raban ti bepenemu liberal enggau sama-rata di Hollywood nyima ati. Mayuh bala orang ti tebilang di menua Hollywood berasai gaga ketegal sida ngembuan aris tauka aki-ini bebansa Judah Amerika. Taja baka nya, menua Amerika endang mengkang angkunka penemu ti madahka pemujur nya datai nengah pengerajin enggau pengeliat ati gawa, ukai baka di menua Malaysia ti endur sekeda orang ti bisi bekaban orang raban orang politik aja tau ngarapka diri bulih peluang ngulihka duit. Kami udah dipadahka, taja pan Riza Aziz nadai nunjukka iya empu nya orang ti balat milih bansa tauka kelalu lunggar penemu ba pengarap iya, tang iya lalu nadai udah mantah enggau chara tebuka jaku penerang bala orang di Malaysia nya.  Isu nya udah nyungkak komen ti regas di menua Hollywood Lalu empas ari jaku "mechahka pengawa dagang negali bansa Judah" udah mai penyai nama ngagai kompeni Hollywood ti udah ngeluarka mayuh belanja diatu. Ba pun iya, iya dikumbai udah ngemaruhka orang siku-siku ti endang bisi pengelandik, ti seninjik bendar endang amat orang bebansa Judah! Nya alai, sebedau Riza Aziz empu nyakal enggau chara tebuka penerang-penerang ti balat milih bansa enggau lunggar penemu dalam pengarap bala bakih iya nya, ati ti enda lantang bala orang di Hollywood nya enda padam. Ulah enggau pendiau ti ngeluluka diri ba apai tiri iya Menteri Besai Malaysia Najib Razak ti nyadi tuai ke rejim raban Muslim, ti ngukum orang ti ngirup arak lalu mega udah nyekat wayang Wolf of Wall Street laban ngundan isi cherita ti kamah, leka jaku ti kamah sereta kasar enggau salah guna dadah, tang udah ngemendarka anak tiri iya empu beranakka puku dagang bejuta-juta dollar dalam pengawa ngeluarka wayang-wayang di Hollywood, benung diperatika. Baka nya mega enggau pengerami ti udah ditusui suratberita, ti diatur ngena pengawa makai besai enggau ngirup arak ti digulu Riza Aziz enggau bakih iya Jho Low. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |