» »Unlabelled » SUPP semina dipinta malas surat: Sim BorneoPost Online | Borneo , Malaysia, Sarawak Daily News » Berita Iban - New 2 Borneo

05:29:00

SUPP semina dipinta malas surat: Sim BorneoPost Online | Borneo , Malaysia, Sarawak Daily News » Berita Iban - New 2 Borneo

SUPP semina dipinta malas surat: Sim

Posted: 18 Jan 2014 08:43 AM PST

by Rengenyan Labang. Posted on January 19, 2014, Sunday

Madahka kebuah parti enda patut dikinsil, nya alai kaban parti dilalau enda bejaku nitihka asai ati tang meri penemu mutarka pekara nya

KUCHING: Parti Sa'ati Rayat Sarawak (SUPP) enda dikinsil pengerejista ba Opis Pengerejista Gerempung (ROS), tang diberi timpuh 30 hari malas tauka meri surat nunjukka kebuah parti nya enda patut dikinsil (pengerejista).

Pekara nya dipadahka Sekretari Besai Prof. Dr. Sim Kui Hian ngagai pengarang berita ba Indu Opis SUPP ditu ngalih hari kemari.

Iya madah, timpuh 30 hari nya berengkah ari 6 Januari 2014 maya surat ari ROS taja pan surat nya diterima SUPP kena 8 Januari 2014.

"Kaban parti anang ngumbai parti tu udah dikinsil pengerejista, laban kitai diberi dalam timpuh 30 hari malas surat tauka meri surat ti madahka kebuah parti enda patut dikinsil ba ROS.

"Diatu raban pengemeran undang-undang benung nyendiaka saut nitihka undang-undang, lalu kami arap bendar bisi kes undang-undang ti manah dikena nyaut. Nambahka nya tentu mega bisi saut politik.

"Nya alai semua kaban parti patut terus begempung lalu anang nitihka asai ati, isu dalam parti deka diputarka enggau naka ulih," ku iya pengudah meri licha tauka penerang ngagai semua ketuai ari lima pampang SUPP di mengeri Kuching kemari, bekaul enggau pekara nya.

Urung 100 iku ketuai ari lima pampang SUPP di Kuching nyengkaum ari pampang Kuching, Kota Sentosa, Pending, Batu Kawa enggau Batu Lintang.

Kemari iya madahka penerang ke sama mega deka diatur SUPP di Miri seharitu, ngambika ulih meri penerang ngagai kaban parti di Miri bekaul enggau parti sereta kaban parti.

Lebuh bejaku enggau pengarang berita kemari iya mega madahka pampang Piasau enggau Bekenu ti dikinsil pengerejista ba ROS Kuala Lumpur mega diberi timpuh ngapil tauka surat kebuah enda patut dikinsil, dalam timpuh ke sama.

Parti SUPP ti nerima surat ari ROS Kuala Lumpur ti ditulis haribulan kena 6 Januari diterima parti kena 8 Januari madahka pampang Bekenu enggau Piasau dikinsil pengerejista.

ROS dalam surat ke bukai mega minta SUPP Pusat nyaut surat ti madahka kebuah parti nya enda patut dikinsil pengerejista.

Kelimpah ari nya, Sim ngarapka orang mayuh di luar ti deka bekunsi penemu chara mutarka penanggul dalam parti patut terus datai betemu enggau SUPP, tang ukai meri penerang nengah surat kabar.

Iya madahka mayuh bendar orang ti meri penemu dikenataika nengah surat kabar.

"Aku seruran bisi sereta ulih betemu enggau sesapa ti deka bekunsi penemu tauka buah runding.

"Enti amat bebendar deka nulung nengah bekunsi penemu patut terus ngagai parti tauka endang bisi kebuah kediri empu lalu bejaku ngagai orang mayuh," ku iya.

Berebak enggau tu iya minta semua kaban parti sereta ketuai parti, ketuai raban bansa China enggau kebukai ti bekaul patut terus bejalaika pengawa ke rayat.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Beri surat chiri tuai rumah enggau jampat

Posted: 18 Jan 2014 08:42 AM PST

SIBU: Dipelabaka satu pertiga ari 359 iku Tuai Rumah (TR) di sitak Parlimen Sibu enggau Lanang bedau nerima surat chiri nyadi tuai rumah.

Bekaul enggau pekara nya, Chairman Gerempung Tuai Rumah Sibu (PTRS) TR Linus Meling ngarapka perintah meri surat chiri tuai rumah ngagai sida ti bekaul enggau naka penyampat, ti ulih ngenukuka status sida nyadi ketuai di sesebuah rumah panjai.

"Ari 139 tuai rumah ti nyadi kaban PTRS, enda kurang ari enam ari sida nya bedau nerima surat chiri nyadi tuai rumah," ku iya madah ngagai Utusan Borneo pengudah nyadi chairman aum PTRS, kemari.

Sama datai baum Pemancha Stanley Geramong ti nyadi Sekretari PTRS, Penghulu James Semilan ti nyadi penyanding penemu sereta kaban komiti PTRS ke bukai.

Ku Linus, gerempung amat ngarapka perintah ulih mutarka isu nyiri tauka meri surat chiri ngagai tuai rumah ditu enggau jampat ke pemanah tuai rumah sereta peranak di rumah panjai ti bekaul.

"Gerempung amat ngarapka perintah ulih mutarka penanggul meri surat chiri ngagai tuai rumah ke bedau disahka servis sida enggau sepenyampat ke ulih," ku iya seraya madahka bisi sekeda tuai rumah udah nganti pengelama nyauka manggai 10 taun.

Ditanya kebuah pekara nya nyadi, Linus madahka nya dipelabaka bepun ari rumah panjai nya enda chukup pemayuh pintu, iya nya kurang ari 20 pintu baka ti udah ditetapka perintah.

Nambahka nya mega iya ngarapka perintah ulih mutarka pengelaun mayar elawin tuai rumah, laban sekeda tuai rumah bedau nerima elawin sida berengkah bulan November taun nyin kemari.

"Bisi mega tuai rumah ti agi nerima elawin sepenyampau RM450 sebulan taja pan elawin baru tuai rumah iya nya sepenyampau RM800 sebulan," ku Linus.

Ketegal laun mayar elawin ku iya, bisi meri penanggul ngagai tuai rumah ti bisi pekara diatur enggau macham opis tauka ijinsi perintah.

"Tambah mega tebal agi tuai rumah nadai kereja tetap ti nempa penatai pemisi sida," ku iya seraya madahka enda nemu tegal elawin laun dibayar.

Linus mega minta tuai rumah ti bedau nyereta PTRS patut ngerejista diri enggau jampat, bayar yuran masuk nyadi kaban PTRS iya nya RM20 lalu yuran ninting taun iya nya RM12.

PTRS ku iya, deka ngatur aum ninting taun (AGM) di indu opis Parti Sa'ati Rayat Sarawak (SUPP) pampang Sibu kena 22 Februari tu ila, berengkah ari pukul 8.30 pagi.

Beduduk ari pekara nya, iya minta kaban PTRS ti bedau meri yuran ninting taun sida sebedau AGM dipejalaika ngambika ulih dipilih maya baum nya ila.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Rega sayur ba Bintulu dipelabaka nurun enda lama agi

Posted: 18 Jan 2014 08:42 AM PST

BINTULU: Rega sayur ba Bintulu deka pulai baka selama enda lama agi beduduk ari mua hari ngetu ujan sereta badu ampuh ba endur raban betanamka sayur, ku Kepala Opis Menteri Dagang Dalam Menua, Koperasi enggau Pekara Bebeli Barang (KPDNKK) Bintulu Mohamad Drahman.

Ku iya kenyau sebulan ti udah lalu, peranak menua tu udah ngasaika rega sayur bisi niki lalu mayuh sida sebana ke rega nya jauh mar ari rega ngelamatu.

"Rega sayur tu balat niki laban mayuh alai endur nanam sayur rusak ketegal ampuh bah lalu sekeda sayur ti bedau tinggal endang dijual enggau rega ti mar laban rega ba tikas borong mega bisi ditikika rega," ku iya bejaku ba aum pemberita sepengudah ngelancharka 'Operasi Ops 2' ke diatur ba Farley Mini Market, ditu, pagi kemari.

Ku iya, Operasi Ops 2 tu tambung ari 'Operasi Ops 1' ti dipenyadi ba taun 2013 dipejalaika KPDNKK meresa sereta matau palan alai bejual enggau bebeli barang nyengkaum kedai renchit ba pelilih menua tu ngambika raban pedaja enda ngelanggar undang-undang ti nyual barang enggau rega ti mar lebih ari patut kelebih agi barang ti disekat rega.

Nya alai ku Mohamad, sida ari KPDNKK endang begunaka bantu ari raban pedaja ngambika enda nikika rega barang sekat ngelui ari rega ti udah ditetapka opis tu laban enti ditemu salah, sida tau ditinggang ukum enggau kompaun nitihka bagi penyalah ti dikereja sida.

Tang bepun ari diatu ku iya, barang sapa ke ditemu salah ngelanggar undang-undang tu deka dibai ngagai kot.

"Dulu suba, kami ari KPDNKK ulih netapka saman tauka kompaun ngagai sida (raban pedaja) ti ngelanggar atur bejualka barang, tang diatu, KPDNKK semina bejalaika atur penerit adat sereta matau ni bagi kedai ti nyual barang enggau rega ti enda patut lalu udah nya mai pekara tu ngagai kot," ku Mohamad.

Reti iya, pemutus dikena nentuka tiap iku raban pedaja ti salah tu deka ditentuka kot lalu sepengudah nya baru sida nentuka penyampau kompaun enggau ukum bukai ti deka dilempai ba sida tu nitihka tikas penyalah ti dikereja sida.

Lebuh ba aum pemberita tu mega, iya ngarapka mensia mayuh ngeriput ngagai Opis KPDNKK enti sema bisi nemu ulah raban pedaja ti enggau sengaja niki ke rega barang ngambika pemesai opis (KPDNKK) ulih matau sereta mansik penyalah nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Nanta ngulu aum komiti pemansang Parlimen Kapit

Posted: 18 Jan 2014 08:42 AM PST

KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi udah ngulu aum Komiti Pemansang Menua Pesisir P 215 Kapit.

Ba aum nya, Nanta ninga licha ari pemesai opis perintah enggau piak ke bekaul senentang pejalai sereta ngenukuka projek pemansang mit ke benung enggau udah dipejalai ba sitak Kapit.

Aum nya mega bisi digulu Sekretari Politik Kepala Menteri Wilson Nyabong.

"Kami udah numbuhka sebengkah komiti dikena ngenuku sereta matau semua projek pemansang mit ke deka enggau benung dipejalai ba sitak Kapit ngambika teulihka pemujur.

"Komiti tu betuaika aku empu sereta dibantu pemesai opis-opis perintah enggau raban ke bekaul," ku iya madah pengudah tembu ngulu aum nya ba Hotel Meligai kemari.

Antara projek pemansang ke benung dipejalai ba Parlimen Kapit baka Projek Jalai Kapit/Song iya nya sebagi Projek Jalai Kapit/Song/Kanowit/Sibu, Penyangkai Perau Panjai enggau Projek Pemansang Tebing Sungai ba Song enggau Kapit.

Sama bisi ngulu aum nya Sapit Residen Kapit Zul Usup, Pemesai ari Opis Pelilih Kapit Mohd Suppian enggau Karon Mampus, Penyelia KEMAS Amnrose Abong, Pemesai Opis Tanah enggau Penyukat (JTS) Watson Awam, chairman SADIA Kapit Edward Manggah, pengereja pengawa Pusat Servis Alexason, Dennis enggau George sereta sida ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Khairuddin Ketuai Staf ke baru Briged Ke-9

Posted: 18 Jan 2014 08:41 AM PST

SIBU: Bisi 20 iku pemesai enggau 199 iku raban bemacham pangkat ngulu Perbarisan Serah Terima Tugas antara Ketuai Staf Briged Kesembilan Infantri Malaysia, Lefternan Kolonel Kamarudzaman Mohd Thani enggau Ketuai Staf ke baru Lefternan Kolonel Khairuddin Zakaria.

Pengawa tu disempulang nyain Nota Serah Terima Tugas Ketuai Staf Briged Kesembilan Infantri Malaysia ke diatur ba Padang Kawad Kem RASCOM, Batu 10, Jalai Oya Lama ditu, pagi kemari.

Pengawa tu mega dikemataka Panglima 9 Briged, Brigedier Jeneral, Daniel@Damien Abdullah.

Sebedau tu Kamarudzaman megai pengawa nyadi Ketuai Staf Briged Kesembilan Infantri Malaysia ba pengelama tiga taun di Kem RASCOM, Sibu lalu udah tu iya deka mindah gawa ngagai Markas Angkatan Bersama Mindef di Kuala Lumpur.

Kelimpah ari nya pengawa nyain Nota Serah Terima Tugas Chairman BAKAT 9 Briged antara Chairman BAKAT 9 Briged, Halimah Maarof enggau Chairman BAKAT 9 Briged ke baru, Fatimathun Zaharah Ramli.

Kamarudzaman madah, iya berasai temegah ati enggau sukung semua raban kem nya ngagai iya sepemanjai ke gawa dia.

"Aku meri besai terima kasih ngagai semua raban laban sekumbang ke gawa ditu kita meri sukung enggau kerejasama ke manah ngagai aku.

"Aku ngarapka semua pekara tu ulih ditandu baru begulai enggau Ketuai Staf ke baru iya nya Khairuddin.

"Ulah tu beguna bendar dikena kitai semampai ngangkatka nama manah Briged Kesembilan Infantri Malaysia," pia ku iya madah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Minta SEB mutarka penanggul suah putus kuasa karan, ku Yap

Posted: 18 Jan 2014 08:41 AM PST

KUCHING: Dua penanggul tauka putus kuasa karan apin lama ti nyadi dalam timpuh seminggu enda ulih diampunka tauka dilakka, pia ku Sekretari Besai Raban Nembiak Parti Sa'ati Rayat Sarawak (SUPP) Wilfred Yap.

Iya madah, penanggul nya ngeruga nyauka semua bagi menua Kuching enggau Sri Aman ti mungkur beratus iku orang ti diau sereta gawa ba kededua bagi menua nya enda besedia napi pekara nya.

"Tu sebengkah ti ironis enti dikenang bekaul enggau Sarawak ti tebilang laban ngembuan penatai kuasa karan ti mayuh sereta perintah nengeri udah ngena belanja ti mayuh dikena ngemajuka tekat kuasa hidro.

"Perintah nengeri kitai nyual kuasa karan nya ti senipak dikena narit pemeranak puku ari menua luar tang kitai bedau ulih mutarka penanggul tauka pengerusak teknikal ti baka tu enggau engkeman. Kitai betapi enggau beberapa penanggul tauka putus kuasa karan taun nyin kemari, peranak enggau orang dagang betangkup enggau penanggul. Patutka enda pekara tu nyadi tiap taun tauka pekara ti selalu nyadi ke patut diasaika rayat?" ku iya nengah penerang berita apin lama ke udah.

Yap madah amat beguna ngenukuka bekal kuasa karan enda seruran napi penanggul sereta ulih dikearapka dikena ngelakuka industri kuasa hidro ti nengeri tu kelimpah narit pemeranak puku ari menua luar.

Perintah mekuh ngagai pengawa narit mayuh agi pemeranak puku ari menua luar, nya alai iya bepenemu Sarawak Energy Bhd (SEB) ti nyadi kompeni ke megai tanggungpengawa nyendiaka kuasa karan patut beratka pekara nya ti nguntungka orang mayuh.

Penanggul ti ditapi ari putus kuasa karan nya amat besai laban ngenanggul pengawa ninting hari rayat, orang dagang, sekula, orang ti betengah jalai alun enggau kebukai, ku iya.

"Taun Baru China nyau majak semak, lalu raban nembiak SUPP minta SEB ngemeratka pengawa nyendiaka bekal kuasa karan ti konsisten sereta ulih dikearapka serata nengeri. Rayat ti nyengkaum orang dagang enda agi betapi enggau putus kuasa karan lebih agi mayuh orang benung nyendiaka diri deka ngintu pengerami," ku iya.

Beduduk enggau nya Yap minta SEB mega beratka pengawa ngemanahka standard kereja ti udah bisi lebih agi di substesyen 275kV Engkilili laban beberapa penanggul nadai karan di Kuching, Sri Aman sereta kandang endur ngelinggi ulih dikelala nyentuk ke substesyen Engkilili.

"Ukai nya aja, aku minta perintah nengeri ngelanggur chara ngira enggau polisi ti engkeman ngambika sektor komersil ti betapi enggau pengerugi ketegal putus kuasa karan ulih dibayar pampas tauka pengerugi ti senipak.

Kuching enggau Sri Aman putus kuasa karan kena 9 enggau 14 Januari apin lama.

Kepala Pemesai Operasi SEB Lu Yew Hung madahka kededua penanggul nya ketegal pengawa dipejalaika di substesyen 275kV Engkilili.

"Kami ngaku dua pengerusak transmissyen ti antara beberapa hari enda nitihka standard tinggi ti dikearapka ari kompnei kami sereta besemaya enggau peranak di Kuching enggau Sri Aman kami deka bejalaika pengawa sereta belajar ari pekara ti udah nyadi sereta nyeliahka ari nyadi baru," ku Lu.

Putus kuasa karan kena 9 Januari ari pukul 2.36 lemai ngagai 4.46 lemai lalu Hari Dua apin lama, nyadi urung pukul 11.42 pagi ngagai pukul 2.28 lemai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.