» »Unlabelled » Hii: Asil BRIDP deka disepi enda lama agi BorneoPost Online | Borneo , Malaysia, Sarawak Daily News » Berita Iban - New 2 Borneo

05:36:00

Hii: Asil BRIDP deka disepi enda lama agi BorneoPost Online | Borneo , Malaysia, Sarawak Daily News » Berita Iban - New 2 Borneo

Hii: Asil BRIDP deka disepi enda lama agi

Posted: 16 Jan 2014 08:26 AM PST

KUCHING: Projek Pemansang Industri Beras Bario (BRIDP) ari baruh Palan Pemujur Ekonomi Nasional (NKEA) ti balat dikearap, nyangka deka ngeluarka asil ba suku keterubah taun tu.

Bario Ceria Sdn Bhd (BCSB), sebengkah kompeni ke besaup ngemansangka projek nya udah berengkah ngetau padi nya kena 2 Januari tu tadi pengudah ngemujurka pengawa ngachap dandang umai nya ngena ai nengah chara pemadu moden.

Direktor Pengatur BCSB Thomas Hii madah, kompeni nya deka besaup enggau Opis Menteri Pemansang Pengawa Betanam Betupi Moden sereta Opis Betanam Betupi ngelakuka asil projek NKEA tu ngagai mensia mayuh.

"Pengawa tu dipelabaka deka dipejalai ba suku keterubah taun 2014 nengah atur bejualka beras Bario tulin ari baruh program Sekim Setipikit Beras Bario, Opis Betanam Betupi.

"Kitai mega ngarap, mensia mayuh ulih nyepi beras Bario tulin kelimpah ari ngenataika penguntung ngagai peranak menua ditu ba dagang nya," ku iya, ensana.

Hii mega arap, projek nya nyadi penyungkak asil pemisi ke diulih dibandingka enggau sebedau tu.

Tebal orang bumai dia gaga ati enggau program nya ti udah ngayanka pemujur ba pengawa ke dikemeranka sida.

"Taja bisi sekeda peranak menua dia enggai masuk program nya tang BCSB pechaya nengah pemujur sereta penyungkak asil ke dipeda, pengujung… sida ke enggai nya deka masuk dalam program nya ila.

"Kami pechaya bendar, asil taun tu jauh manah ari ke udah, tambah mega pengawa bekenaka injin betanam padi dia mayuh ngelempungka tulang seraya teulihka asil ke jauh tinggi ari chara lama," tandu iya.

Iya mega ngarapka projek tu deka nyadi chunto ngagai perintah lebuh merambu pemansang ke dikearap ulih nguntungka peranak menua baka ke ditampai ketuai menua lebuh merambu projek NKEA ari barum GTP.

Projek ke beungkus RM17 miliun tu mungkur pengawa ngaga tujuh buah tekat ai dikena ngachapka umai nya, ngerata dandang umai, ngaga jalai, paip ai, pengawa nesap tanah umai pemesai 200 hektar kelimpar ari tempat endur nyembi sereta nginjin padi.

Kena bulan November taun nyin kemari, Sapit Kepala Menteri Datuk Patinggi Tan Sri Alfred Jabu madah, pemesai 140 hektar ari 200 hektar tanah bungkur projek nya benung dikereja endur nanam padi Bario sereta dikearap nyungkak asil maya pengawa ngetau bulan Januari taun tu.

Enti semua tanah ke dibungkur atur pemansang nya tembu ditanam magang, Jabu ke mega Menteri Betanam Betupi Moden madah ngagai Kunsil Nengeri, asil beras Bario deka nambah tiga ngagai empat kali lipat iya nya urung 300 tan metrik setaun.

Beras Bario ke ditanam di menua chelap baka ba kandang menua tinggi Kelabit ngembuan peminta tinggi berindik ari pemayuh undan mineral enggau vitamin.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pengajar Jaku English dipinta bebendar mutar pengelemi pemutus peresa: Malie

Posted: 16 Jan 2014 08:25 AM PST

KUCHING: Gerempung Pengajar Bumiputera Sarawak (KGBS) minta pengajar Jaku English bekunda ngereja pengawa sida ngambika nembiak pandai ba sabjek nya lebih agi nembiak sekula di menua pesisir.

Presiden gerempung nya Ahmad Malie madah, genap iku pengajar patut bebendar ngereja pengawa sida berindik ari pemutus ke enda manah dalam sabjek nya ba Penilaian Menengah Rendah (PMR) nengeri tu.

Dalam timpuh beberapa taun ke udah, Jaku English nyadi sabjek ke pedis amat nembiak pas lalu dianggarkan seiku ari empat nembiak enda mujur dalam sabjek nya.

Taun nyin tadi kitai beratika pengambis mayuh nembiak tejanggal dalam sabjek nya ba peresa PMR nengah 24.1 peratur bulih E ari 37,361iku nembiak ke ngambi peresa nya.

Semina 14.5 peratus chalun di nengeri tu bulih A seraya dalam taun 2012 bisi 14.4 peratus.

"Kitai enda ngenggaika pengelandik nembiak dalam Jaku English nurun dalam PMR taun lepas tang kitai enda setuju enggau anggap mensia mayuh ke ngasaika penurun nya setegal bala pengajar ke enda landik ngajar sabjek nya.

"KGBS arapka pengajar jaku English ditu (Sarawak) enda empelita bejalaika tanggungpengawa tang pekara ke ngujungka penurun tu nyangka kurang ba penyikap enggau emosyen nembiak," ku iya lebuh dikerandau pemberita empai lama ke udah.

Nundaku iya, pengelemi dalam sabjek Jaku English ukai semina nyadi di Sarawak tang di serata menua.

Berebak enggau nya, Presiden Gerempung Pengajar Sarawak (STU) Jisin Nyud mega nyebut, tikas kualiti pelajar ke majak kurang mega mai pengelemi nembiak dalam Jaku English.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

‘Imagine Retrowalk’ dipelaba nempa rikod baru dalam Guiness World Record

Posted: 16 Jan 2014 08:25 AM PST

by Rengenyan Labang. Posted on January 17, 2014, Friday

KUCHING: Program bejalai surut tauka 'Imagine Retrowalk' sepenyauh satu (1) kilometer (KM) nagit lebih ari 1,000 iku penyereta dikena mechah sereta nempa rikod baru dalam Guiness World Record.

Menteri Pemansang Rama, Tan Sri William Mawan Ikom madah, ngarapka lebih mayuh peranak Sarawak nyereta seraya nyukung program nya.

Iya madah, program nya diatur mega sebengkah ari program pengasih dikena mantu orang ti patut tauka begunaka bantu.

Endang tusah enti kitai bejalai surut tang enggau sukung bala kaban sereta peranak Sarawak ke mega bejalaika pengawa ti sebaka, ulih ngurangka penusah, ku iya.

"Bulan Oktober 2014, lebih ari 1,000 iku peranak Sarawak dipelaba deka masuk program bejalai surut sepenyauh 1KM. Dikearapka ulih mechah sereta nempa rikod baru dalam Guiness World Record.

"Bejalai surut kena mechah rikod Guinness World Record tu sebengkah chunto ke manah ti tau dikereja raban bansa ari mayuh bengkah pengarap ngambika nyapai tuju ti tau ngasuh dunya muji pemujur kitai," ku Mawan dalam jaku iya ti dibacha Menteri Muda Pemansang Nembiak, Datuk Abdul Karim Rahman Hamzah.

Karim ti mega Menteri Muda Pengawa Berumah nganti Mawan bejadika Program Bejalai Surut ti diatur 1BFF ba Plaza Merdeka ditu, lemai kemari.

"Laban pengawa tauka penusah ti sebaka dipesaup dikereja bala mayuh, dia tau nyadi nyamai dikereja. Tu mega dikereja ketegal pengasih iya nya kitai empu nentuka sapa ke deka nerima bantu," ku iya.

Nambahka nya iya madahka program ke sebaka kala digaga di China sereta dipasuk urung 1,000 iku penyereta lalu ngaga rikod ti dipasukka dalam rikod dunya.

Orang mayuh ke deka masuk program tu semina dipinta mayar RM50 aja.

Nitihku Chairperson Pengatur, Winnie Lim, pengawa ngerejister berengkah diatur 23 Januari ngagai ujung bulan September 2014, tiap ujung minggu ba Plaza Merdeka.

Program ti ngena rambai jaku "A World Record Event At Your Doorstep" tu deka diatur kena 11 Oktober 2014 di padang Jubli MBKS," ku Winne.

Sama datai ba pengerami nya kemari, Menteri Muda Dagang Temuai Datuk Talip Zulpilip, Datuk Bandar Dewan Bandara Kuching Utara, Datuk Abang Abdul Wahap Abang Julai enggau ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

NGO patut besaup enggau perintah nyeliahka penanggul rama, ku Abg Jo

Posted: 16 Jan 2014 08:25 AM PST

by Jacqueline David. Posted on January 17, 2014, Friday

KUCHING: Gerempung ukai dikuasa Perintah (NGO) enggau gerempug bukai dilalau chakah mantu Perintah mutarka penanggul rama ke majak nyadi diatu.

Menteri Dagang Temuai enggau Pengawa Rumah, Datuk Amar Abang Tun Openg madah, timbal ke diterima bekaul enggau penanggul pengawa rama ari NGO berat, laban ari timbal nya perintah ulih ngiga jalai mutarka penanggul nya.

"Kelia sebedau merdeka, bida entara mensia mayuh ke diau di mengeri enggau menua pesisir 58 enggau 42 peratus lalu dipelaba bida nya deka nambah ngagai 30:70 jemah ila.

"Ari pemayuh mensia, 2.5 juta iku di Sarawak, 550,000 nguan mengeri Kuching nyengkaum di Samarahan….Pemayuh nya nyauka manggai 800,000," ku iya.

Iya madah, mensia mayuh ke pindah ari menua pesisir mega udah nambah, lalu sebengkah ari kebuah mayuh endar penanggul pengawa rama nyadi, ketegal ari pengawa pindah ari menua pesisir ngagai mengeri.

"Kadang-kadang ketegal dikenyitka ubah jalai pengidup enggau penusah bukai ngujungka sekeda penanggul pengawa rama nyadi.

"Ba pekara baka tu, NGO tau nyadi kaban mantu mutarka penaggul pengawa rama ari terus nyadi, kelimpah ari meri penemu sereta ngaul Perintah," ku iya.

Iya madah baka tu lebuh bejaku ba atur pengawa nyuaka geran Projek Mit Menua Pesisir (MRP) penyampau RM690,000 ngagai 36 NGO, ba opis iya di Wisma Perumahan ditu, kemari.

Iya nandu, pemayuh orang ke pindah ari menua pesisir ngagai mengeri ngujungka nengeri tu betapi enggau penanggul berumah enggau nadai pemendar, enda chukup pengawa, ngereja pengawa salah enggau sekeda ulah bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Rayat S’wak patut nerima puji: Gramong

Posted: 16 Jan 2014 08:24 AM PST

by Judan Bungap. Posted on January 17, 2014, Friday

KANOWIT: Rayat Sarawak patut nerima puji ketegal nyentukka sehari tu mengkang ulih begulai enggau pangan diri taja pan enda sebaka bansa tauka jalai pengarap.

Menteri Muda Dagang Temuai enggau Pemansang Tanah Datuk Gramong Juna madah, penyerakup ke mengkang dikembuan tu endang bepun ari ulah bebasa ke pangan diri ti nejuka ulih idup enggau likun sereta mansang.

"Ba nengeri Sarawak, kitai nyengenda meda penyerakup antara pupu raban bansa kelimpah bela ngetanka adat enggau main asal diri empu enggau nadai bepenanggul," ku iya madah maya bejadika 'Majlis Perarakan Maulidur Rasul' Renggat Pelilih Menua Kanowit, empai lama tu tadi.

Gramong ti mega Kaban Kunsil Nengeri (ADUN) Machan ngelalau mensia mayuh ke bisi datai ba pengerami nya ngambika semampai bekerejasama ngatur sebarang program ba tuju nyintalka agi kaul antara pupu raban bansa.

"Anang kitai, enti bisi penusah lalu bela beserah pangan diri.

"Pungka nama bisi penanggul kitai patut besaup ngambika penanggul nya ulih diputarka enggau lempung agi," ku iya.

Tang ku iya, rayat bagi pelilih Kanowit nadai bepenanggul senentang pekara begulai enggau pangan diri nyentukka sehari tu.

Iya madah, pekara tu ulih dipeda bepun ari rayat menua nya empu enda ngira bansa tauka jalai pengarap begulai manah bepelasarka penyerakup.

"Ulah tu patut dikemeratka kitai belama ngambika tau ditunda rebak baru.

"Tang enti kitai enggai bepeda diri sama diri, rindu deka charut, nengeri tu tau enda likun baka menua bukai ke suah beperang, belaya, ngaga demonstrasi ti ngujungka menua nya enda likun alai diau," ku iya.

Kelimpah ari nya ku Gramong, program ke diatur begulai pupu raban bansa aruh ditanka tauka ditandu belama ukai semina nyintalka kaul tauka ngetanka penyerakup tang tau nyadi chunto ke manah ngagai rebak baru.

"Pengawa bekedumu, ngaga tim raban diri tauka enggai nyengulai orang bukai tau ngujungka penusah bukai nyadi.

"Kitai ngarapka penyerakup rayat ditu tau nyadika chunto ngagai orang menua luar," ku iya madahka baru.

Pengawa tu bela digulu Sekretari Politik Kepala Menteri Maurice Giri, Kunsil Kanowit Ibrahim Kipli, Kepala Polis Pelilih Kanowit Ismail Mahmood enggau Pemesai Opis Pemadah Kanowit Wan Mohd Zuki Wan Ismail.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah meri awak kedua ngagai orang ti udah ngereja penyalah

Posted: 16 Jan 2014 08:24 AM PST

PADAWAN: Semua orang nyengkaum orang jil sigi diberi perintah awak mulaika pemanah pendiau diri sereta diberi pelajar ke chukup.

Bejaku ba penemuai ngagai Sekula Integriti Kuching di Rumah Jil Puncak Borneo ditu, kemari, Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah (gambar) mada,h penumbuh sekula nya mandangka pengangkun perintah meri awak kedua ngagai orang ti udah ngereja penyalah.

"Di menua tu, kelimpah ari Sekula Integriti Kuching, perintah mega bisi numbuhka Sekula Tunas Bakti enggau Sekula Henry Gurney.

"Ketegiga sekula tu meri awak ngagai bala nembiak ti udah salah singkang, tepejuh enggau pengawa salah mulaika pemanah pendiau diri sereta teulihka pelajar baka nembiak bukai," ku iya.

Iya nambah, pengawa mulaika pemanah pendiau nya diadu nengah chara nyendiaka pelajar akademik enggau rohani sereta mega nyendiaka program pematih pengelandik ngagai raban nembiak ke diukum jil.

Ku Fatimah, semua nya disedia nitihka pengelandik tetiap iku orang jil lalu diatur enggau tuju ngambika sida ulih  nyapai pemujur baka nembiak bukai lalu sedia napi penguji maya pansut ari palan nya jemah.

Ba kaul ke sama, Fatimah nyukung perambu Opis Rumah Jil Malaysia ti deka numbuhka Sekula Henry Gurney di Rumah Jil Puncak Borneo ba taun 2014 tu.

"Sekula Henry Gurney nyadi palan endur kitai mulaika pemanah pendiau nembiak ti ditemu salah ngereja penyalah ke mit lalu semina bisi ba Sabah (2) enggau Melaka (1).

"Sekula Integriti ungkup nembiak ke ditemu salah ngereja penyalah berat baka munuh, masung sereta ke bukai," ku iya seraya ngarapka Sekula Henry Gurney ke diperambu ditumbuh di Kuching ulih ngurangka pengelengau raban apai indai ti jauh ari anak sida.

Maya ke diatu, menua Malaysia bisi tiga sekula Henry Gurney iya nya di Kota Kinabalu enggau Keningau di Sabah sereta sebuah di Teluk Mas, Melaka.

Lapan Sekula Integriti udah ditumbuh nyengkaum sebuah di Rumah Jil Puncak Borneo.

Sekula Integriti Kuching diatu bisi 10 iku nembiak ti diajar 7 iku pengajar lalu bisi ngerejista 71 iku nembiak ti ngambi kelas pemulai pemanah pendiau enggau kelas ngansah pengelandik.

Ba kaul bukai, Direktor Rumah Jil Puncak Borneo Pemantu Komisyener Fathi Mursidi ba jaku pengelalu madah Sekula Integriti Kuching udah teulihka penuduk lumur dua ba Anugerah Sekolah Cemerlang PMR ba taun 2010.

Kelimpah ari nya, iya mega madah Sekula Integriti Kuching mandang pemutus ti majak manah ungkup peresa PMR enggau SPM dalam timpuh taun 2010 ngagai 2012.

Bela datai Direktor Opis Pelajar Datu Abdillah Adam, Direktor Rumah Jil Sarawak TKPj. Abdul Kadir Rais, Ketuai Sektor Pekara Akademik IPPM Umbaik Ismail enggau orang bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.