KUSSIS nyukung program indai nusu ke anak chara eksklusif-Tusun 2 BorneoPost Online | Borneo , Malaysia, Sarawak Daily News » Berita Iban - New 2 Borneo |
- KUSSIS nyukung program indai nusu ke anak chara eksklusif-Tusun 2
- Anang nikika rega barang kena besekula
- MPS ngansak mensia mayuh ngaga kulit rian nyadi baja kompos
- Bakani media sosial mantu penyerakup rama?
- Ai tusu indai pemakai pemadu manah ungkup anak mit-Tusun 1
| KUSSIS nyukung program indai nusu ke anak chara eksklusif-Tusun 2 Posted: 31 Dec 2013 10:08 AM PST by Rengenyan Labang. Posted on January 1, 2014, Wednesday
KUSSIS mantu perintah kelebih agi Opis Menteri Pengerai Malaysia (KKM) nerangka ngagai raban indai enggau indu ti baru deka nyadi indai bekaul enggau pekara nusu ke anak. Kelimpah meri penerang, KUSSIS meri peransang enggau sukung ngagain ngagai indai pasal pemanah nusu ke anak, lebih agi ngagai raban bansa Sarawak. Nitihku Nurina Kusairi dalam forum 'Sokongan Penyusuan Susu Ibu: Dampingi Ibu' nyerumba Majlis Pelancaran Minggu Penyusuan Susu Ibu Sedunia 2013 Peringkat Nengeri Sarawak madahka KUSSIS bisi ngatur aum tauka Support Group Meeting (SGM) ambis kurang dua bulan, ti berandauka topic ti udah ditetapka. "Kami mega bisi nyendiaka palan berandau nengah internet dikena ngemuntang raban indai di Sarawak bekunsi peneleba enggau penerang pasal anak nusu tusu indai. "KUSSIS dipun sereta dipejalaika Sembilan iku Pembimbing Ibu Menyusu / Peer Counselor (PC) ti udah dilatih Peer Counselor Program Administrators (PCPA) ari Malaysia Breastfeeding Peer Conselor Association (MB/)CA) dalam bulan September 2011. "Penyereta raban PC dalam KUSSIS nyengkaum indai ti nyadi lecturer, pengajar, pemesai sereta pengereja pengawa opis perintah enggau indai ke diau di rumah aja," ku Nurina. Penemu deka numbuhka raban tu di Sarawak udah nyadi nyata pengudah mujur ngatur aum (SGM) ti keterubah pun bulan Januari 2012. Pengudah dua kali baum, laman KUSSIS ditumbuhka ba internet, https://www.facebook.com/groups/kussis/ kena 14 Februari 2012. SUKUNG ARI PERINTAH, PENGAJI, DIRI SEBILIK ENGGAU RABAN BANSA Perintah nengah Opis Menteri Pengerai Malaysia (KKM) bebendar nyukung, ngelaku tauka meri kelala enggau nyaga pengawa nusu ke anak ngena ai tusu indai chara eksklusif pengelama enam bulan keterubah udah ada, bepelasarka polisi enggau undang-undang. Program bersepadu ti dipejalaika Opis Pengerai Nengeri Sarawak (JKNS) nunjukka komitmen perintah nyukung pengawa anak nusu tusu indai, lebih agi ngagai indai ti gawa. Perintah nyendiaka kemisi beranak pengelama 90 hari ngagai orang indu ti gawa ba opis perintah sereta dikemendar ngambi kemisi enda begaji dikena meri awak nyaga anak nyentukka umur maggai lima ataun (anak), kelimpah laki dikemendar kemisi patermiti pengelama tujuh hari. Opis Menteri Pengerai Malaysia nyendiaka bilik endur nusu ke anak ti disikap enggau endur duduk ke lantang, endur bebasu jari, peti ais endur indai nyimpan ai tusu ti ba kelinik enggau sepital perintah. Kelimpah ari ba opis perintah, KKM mega ngarapka sektor swasta tauka Gerempung Ukai Dikuasa Perintah (NGO) sama bisi polisi enggau meri sukung ngagai indai ti gawa nusu ke anak chara eksklusif pengelama enam bulan ke terubah, ti nyengkaum kemisi beranak, nyendiaka bilik endur nusu tauka ngulihka ai tusu enggau palan nyaga anak mit ti bekualiti. "Nyendiaka endur sereta kereban ungkup indai ti nusu ke anak ba endur gawa, ambika banding bilik endur nusu ke anak sereta nendu ke atur iya nya meri awak ngagai indai nusu ke anak tauka ngulihka ai tusu maya jam gawa. "Laban 46 persin pengereja pengawa di Malaysia iya nya orang indu," ku Sekretari Perintah Besai Nengeri Sarawak Datuk Md Yahaya Basimin dalam jaku iya ti dibacha Direktor Pengerejister Bansa Nengeri Sarawak, Datu Abu Bakar Mat nyerumba 'Majlis Pelancaran Minggu Penyusuan Susu Ibu Sedunia 2013' Peringkat Nengeri Sarawak, ti diatur bulan September tu tadi. Penerang pasal pemanah anak nusu ba indai patut dikerembaika dalam komuniti, endur gawa, sekula tauka dalam ruang bilik. Nambahka nya Support Group Meeting mega patut ulih diatur ba endur gawa tauka dalam komuniti. Kelimpah ari nya perintah nyendiaka insentif ngena geran sepenyampau nyentuk ngagai RM200,000, dikena numbuhka TASKA (Palan Nyeridi Anak Mit) ba endur gawa. Sabsidi yuran TASKA ngagai orang ti gawa ba opis perintah ti kurang penatai pemisi ke enda lebih ari RM3,000 sebulan mega bisi disediaka perintah. Taja pia, sekeda bala indai enda nusu ke anak chara eksklusif berengkah ari timpuh baru ada nyentuk ngagai umur enam bulan udah ada taja pan beranak ba Hospital Rakan Bayi (HRB) iya nya sepital ti nyukung pengawa anak mit nusu tusu indai. Dalam timpuh tu, sukung komuniti amat diguna. Asal iya, pengawa nyukung meri ai tusu indai bepun ari orang indu ke tuai dalam ruang bilik enggau raban bansa, lebih agi maya indai ti bepenti pengelama 40-42 hari. Tang ubah dunya enggau chara pengidup ti lebih agi ngemeranka chara pendiau di mengeri, diri sebilik jauh sereta masuk kereja baru ngujungka pengawa nyaga indai enggau anak ti baru ada enda engkeman. Nya alai, sukung ngagai indai ti baru udah beranak patut dikemerat nengah 'peer counselor' tauka dikelala enggau nama raban nyukung anak nusu ba indai. Raban tu tebal agi indai ti udah dilatih nyukung anak nusu ba indai, diau semak enggau indai sereta ulih meri sukung ngagai indai bukai ti baru udah beranak.  To enable your comment to be published, please refrain from vulgar language, insidious, seditious or slanderous remarks. This includes vulgar user names.  |
| Anang nikika rega barang kena besekula Posted: 31 Dec 2013 10:06 AM PST Orang dagang, pengempu kedai mit patut bejual ngena konsep 'sama menang' SARIKEI: Raban orang dagang enggau pengempu kedai mit dilalau enda nitihka rega barang kelebih agi barang sekula enggau sepeneka ati. Pemesai Pelilih Sarikei, Khalid Andong madah, raban orang dagang enggau pengempu kedai mit ke bekaul aruh ngemeranka ulah bejalaika pengawa dagang ngena konsep 'sama menang' laban nengah ngemeranka etika pengawa dagang ke betanggungjawab baka tu mega ulih nambahka penyampau barang ke dibeli kelimpah penguna ulih mayuh pilih sereta ngurangka belanja. "Anang kelalu bam. Kita (orang dagang) patut ngeletakka rega nitihka pematut sereta anang ngambi awak maya penguna bebelika barang sekula nyerumba enggau kemisi sekula tu. "Kitai deka rayat disikap enggau penemu sereta hak sida bekaul enggau pekara bebelika barang ngambika enda muntang dipelitik piak ke nadai ngembuan tanggungpengawa ke deka ngulihka untung besai aja. "Penemu nya beguna amat ngambika kitai nemu hak diri lalu enda muntang dipelitik piak bukai. "Enti pekara tu nyadi, piak ke bekaul ukai semina nangi ditinggang ukum tang nangika kuasa meli ke bisi ba penguna," ku iya ba Program Jualan Kembali Ke Sekolah 2013 ditu, bedau lama ke udah. Program ke diatur Opis Menteri Dagang Dalam Negeri, Gerempung Kerejasama enggau Pekara Bebelika barang (KPDNKK) Sarikei tu sebengkah ari pengawa perintah mantu raban apai indai teulihka barang sekula nengah rega murah. Sama bisi datai pengari Ketuai Pampang KPPDNKK Sarikei Helena Ali, Pengurus Pasar Raya Friendly Jessica Lim enggau bala tuai raban bansa. Ku iya, nya seiti ari insiatif perintah mantu ngurangka tating ke disan bala apai indai nyerumba musin sekula buka baru ba taun tu. Tandu iya, program tu ulih ngerapatka kaul antara perintah enggau gerempung ukai dikuasa perintah NGO) seririh enggau rayat dikenulu nengah konsep 1Malaysia. Khalid ngelalau orang dagang ngambika enda beambi ulih nikika rega barang enggau sepeneka ati sepemanjai kemisi sekula. "Naka kediatu, kami nadai nerima riput. Aku ngarapka gaya manah tu ulih tan belama," ku iya. Pengari Ketuai Pampang KPPDNKK Sarikei Helena Ali madah, mensia mayuh patut sedar enggau hak sida nyadi penguna ngambika enda dikelakar piak bukai. "Kitai mega minta bala penguna ulih nyadi mata enggau pending KPDNKK nagang pengawa jai orang dagang tu. "Enti bisi sebana tauka riput bekaul enggau pekara nya ari mensia mayuh nya ngemuntangka pengawa piak KPDNKK mutarka penyalah nya. "Enti sema sida ditemu salah, kitai enda bechiping lalu ngambi atur ke patut," ku iya. Beduduk enggau nya, Helena ngansak orang mayuh ke bisi penerang tauka riput bekaul enggau pekara nya ngenataika riput ngagai piak KPPDNKK ba lumur 1800 866 800 tauka ngelawa laman web http://e-aduan.kpnkk.gov.my. Sida mega tau ngenataika penerang terus ngagai piak KPPDNKK Sarikei ba lumur 084-657751. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| MPS ngansak mensia mayuh ngaga kulit rian nyadi baja kompos Posted: 31 Dec 2013 10:05 AM PST SIBU: Opis Kunsil Bandar Sibu (MPS) ngelalau mensia mayuh nguna kulit buah rian ke muntang digiga maya ke diatu dikena ngaga baja kompos. Sapit Chairman MPS Daniel Ngieng Kiong Ann madah, uras kulit rian ulih nambahka penyampau uras ke dilela ba palan endur ngelelaka uras ninting taun. "Berindik ari nya, kami ngelalau mensia mayuh ke bisi pengelandik ngasilka baja kompos beratika sadang nguna kulit buah rian tu," ku iya madah ngagai pemberita. Ku Ngieng, piak opis kunsil nadai pengelandik dalam pekara tu sereta begunaka kerejasama mensia mayuh mendingka tangkan nya kena ngurang penyampau uras kulit rian. Tandu iya, kerejasama mensia mayuh endang dikelalu dikena ngiga chara ngasilka baja kompos ari kulit rian tu tauka ngena chara ke muntang sereta jampat agi. "Kitai nemu proses ngasilka baja kompos muntang mimit dikereja orang seseiku ba rumah. Nya alai kami ngansak mensia mayuh ngereja pengawa nya," ku terang iya. Ngieng madah, penyampau uras ke nambah ari kulit rian maya tetiap ujung taun sebengkah isu ke mar diputarka piak kunsil. Taja pia ku iya, piak kaunsil ka pan enda napi penanggul nya ninting taun sereta ngiga chara ke pengabis engkeman kena ngelelaka uras kulit rian nya ari ke muai terus ngagai palan ngelelaka uras. "Kelimpah kulit rian, buah bemusin ke bukai baka dabai enggau sibau mega nambahka pemayuh uras," ku terang iya. Ditanya bisi ke enda pengawa bebuaika kulit rian nengah chara ke enda betul deka nyadi endur nyamuk betelu, Ngieng enda ngenggaika pekara nya nyadi. Baka uras ke bukai ke tau nakung ai, ku iya, kulit rian mega ulih endur nyamuk betelu enti sema nakung ai. "Nya alai kami ngansak mensia mayuh ngambika muai kulit rian nya enggau chara ke betul," ku iya seraya madah kulit buah sibau ke nakung ai mega ulih endur nyamuk betelu. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Bakani media sosial mantu penyerakup rama? Posted: 31 Dec 2013 10:02 AM PST by Rengenyan Labang. Posted on January 1, 2014, Wednesday MEDIA sosial ulih nyadi kereban ti amat engkeman dikena nempa penyerakup antara pupu raban bansa di dunya nyengkaum Malaysia, enti ba jari orang tauka dikena ngena chara ti betul. Media sosial amat beguna ba raban bansa dikena ngereja pengawa ti bisi penguntung enggau pemanah baka ngiga orang lenyau, ngumpul belanja tauka bantu ke pengelantang orang bukai, ngenataika peminta meri darah enggau kebukai. Kelebih ngagai gerempung tauka ijinsi ti deka ngatur pengerami besai sereta diatur sekali aja tang projek timpuh panjai begunaka pengereja pengawa enggau komitmen ti tegap, ti enda dikembuan mayuh orang. Bepalasarka riput websait dalam pematau media sosial, urung 88 persin ari rayat Malaysia ngembuan akaun Facebook ba taun 2013. Diakses sekalika enggau telefon pintar sereta kereban teknologi bukai, websait tu majak tebilang ukai semina ba raban nembiak tang nyengkaum orang ke besai tuai. Pengawa ngena media sosial baka Twitter enggau Istagram dikemeran dalam pengidup ninting hari sereta nadai nunjukka media sosial nya dilengka tang nunjukka penyampau pengena Internet ti majak nambah. Media sosial tu nadai "penyaga" (gatekeeper) ti nyukung penerang ti ditulis tauka dichelak, sekalika ulih dipechaya tauka enda. Nya alai dipelabaka mayuh ti salah guna media sosial dalam interaksi sosial ti tau ngujungka penyarut baka bekaul enggau bansa sereta jalai pengarap. Trend nya enda manah ba tetiap raban bansa sereta ngeruga pemansang menua. Taja pia, Journalist & Newspaper Columnist, Datin Paduka Marina Mahathir ba sebengkah Forum Belia, Soul2Soul 2.0: "Tweeting-Up" (Perpaduan Sodail Melalui Media Sosial) ti kala diatur di Kuching ba bulan November taun nyin tadi madahka mayuh chunto penyerakup rama ti ulih ditempa nengah media sosial, ti meri penguntung ngagai mayuh orang. Ambika chunto, ba taun 2010, tiga gerija diserang di Kuala Lumpur enggau ke besemak nya. Tu ku jaku ketegal dikena nunjukka timbal ngagai pemutus kot ti nagang ngena jaku 'Allah' ulih penchelak ukai Islam ngelanggar undang-undang. Bisi mega kes diriputka pasal gerija diserang kelimpah ari masjid, semina orang ti ngepun ba tiap pengawa nya bedau ditangkap. Nya alai peluang penyarut ti majak tinggi. Taja pia nya enda nyadi laban bisi sekeda orang biak bepenemu sereta mutuska penemu diri iya nya pemaik agi sereta endang beguna. Seraban orang biak bediri ba tikuk jalai di Kuala Lumpur sereta meri bungai ngagai orang ti mansa di baruh sepanduk 'Segalanya Akan Menjadi Baik'. Seraban agi orang biak ngena penemu bukai iya nya dipejalai sereta dikerembaika nengah media sosial. Bepelasarka konsep 'flashmob' (tanda tekala nya bebala mayuh), sida minta orang mayuh nyereta sida ba hari ti udah ditetapka lalu ngena baju T burak enggau mai tali. Ba hari ti udah ditetapka, urung 200 iku orang begempuru ba stesyen LRT Bangsar, semua ngena baju T burak sereta nanchang tali ke dibai nyadi tali panjai, 'Tali Tenang". Udah nya sida bejalai ba kandang Bangsar seraya madahka mesej pengelantang enggau mai orang mayuh nyereta sida. Mesej nya terang; rayat Malaysia beserakup sereta deka ke pengelantang. Sebengkah agi chara ti udah diatur ke dua kali, sekali dikena nimbal 'insiden pala chapi' lalu kedua timbal ngagai maya bisi penyarut ba bulan Ramadan suba. Laban kededua insiden nya nyadi maya bulan puasa, lebuh orang ti megai pengarap Islam enda makai enggau ngirup maya siang hari,dia seraban orang biak ti ukai megai pengarap Islam ari mayuh bengkah jalai pengarap ngaga pemutus ngatur kimpin dikena meransang orang ukai megai pengarap Islam nyereta orang ti bepengarap Islam sama enggau bebuka puasa ba hari ti ditetapka. Tuju iya dikena nempa empati sesama diri. Ba orang ti ukai megai pengarap Islam, puasa deka nempa empati ba orang ti megai pengarap Islam ti bepuasa ari makai enggau ngirup pengelama sebulan. Lalu ba orang Islam nya nunjukka orang ukai bepengarap Islan nyukung sida maya bulan puasa. Ku Marina, media sosial dikena dalam kededua kimpin nya. Dalam kimpin ba taun 2009, pengerami nya dikelakuka nengah Facebook enggau blog. Kelimpah ari nya chunto penyerakup rama ulih ditempa nengah media sosial, nitihku Marina, ba sebengkah pengawa gempuru ti diatur komiti 'Fast for The Nation, Peace for Malaysia' urung 75 iku orang ti tebal agi enda ngelala pangan diri ulih begempuru besahur ba restoran di Petaling Jaya. Gambar gempuru dipandangka dalam blog enggau websait 'Fast for the Nation' di serata Malaysia enggau raban bansa Malaysia di serata dunya. Ngena media sosial nya, penyereta ukai bepengarap Islam madahka asai enggau peneleba bepuasa enggau bebuka puasa lalu ke bepengarap Islam tweet meransang enggau meri tip chara betapi enggau pengelapar. Nengah 'Fast4Malaysia' ku Marina, kami minta semaya rayat Malaysia ari tetiap bansa enggau jalai pengarap sama bebuka puasa dudi hari ila, sekalika ngena Facebook, Twitter enggau Tumblr. "Tang pemadu beguna iya nempa kaul raban bansa kelimpah ngemeranka ulah bebasaka pangan diri entara raban nembiak di Malaysia, raban bansa Islam enggau ukai bepengarap Islam, amat ngenyenangka," ku Marina. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| Ai tusu indai pemakai pemadu manah ungkup anak mit-Tusun 1 Posted: 30 Dec 2013 11:07 AM PST by Rengenyan Labang. Posted on December 31, 2013, Tuesday PANSIK saintifik nunjukka ai tusu indai pemakai ti pemadu manah sereta mungkur semua nutrien ti engkeman ke semua anak mit. Ai tusu indai ngembuan kualiti enggau khasiat laban ti bisi tenaga, protein, vitamin enggau mineral ke chukup ungkup anak mit ti baru ada nyentuk ngagai umur enam bulan keterubah. Indai ti nusu ke anak ngena chara eksklusif dalam timpuh enam bulan keterubah reti iya anak mit nya semina nusu ai tusu indai aja lalu nadai diberi ngirup ai enggau pemakai bukai. Opis Menteri Pengerai Malaysia (KKM) meransang semua indai nusu ke anak ba tusu indai aja pengelama enam bulan keterubah sereta terus nusuka anak nyentuk ngagai umur anak dua taun. Senipak enggau 'Polisi Penyusuan Susu Ibu Kebangsaan', KKM nyendiaka perengka guna mensia mayuh ba sepital enggau kelinik dikena meransang indai nusu ke anak. Pengawa indai ti nusu ke anak chara eksklusif ba anak mit maya baru ada ngagai enam bulan keterubah enggau meri pemakai ti mungkur semua pemanah ke pengerai tubuh deka nambahka status pemakai anak mit di Sarawak. Nitihku Direktor Pengerai Nengeri Sarawak, Datu Dr. Zulkifli Jantan dalam jaku iya ti dibacha Pegawai Pengerai Bagi Menua Kuching Dr. Kamarudin Lajim ba pengerami bejadika 'Minggu Penyusuan Susu Ibu Sedunia 2013' Peringkat Negeri Sarawak ba bulan September tu tadi di Kuching madah, di Malaysia, ba taun 2012, sepenyampau 30.5 persin (%) anak mit ti beumur enam bulan diberi ai tusu indai chara eksklusif. "Lalu di Sarawak, riput pengemeran nusu tusu indai ba anak ti beumur enam bulan nunjukka 14.4% anak mit nusu tusu indai chara eksklusif. "Data nya nunjukka pengawa nusu ke anak tu agi ba tikas ti baruh ba Sarawak enti dibandingka enggau nengeri bukai," ku Dr. Zulkifli. Taja pia nitihku Pakar Sakit Puan, Sepital Besai Sarawak (HUS), Dr. Edawati Dahrawi maya forum "Sokongan Penyusuan Susu Ibu:Dampingi Ibu" nyerumba pengerami bejadika 'Minggu Penyusuan Susu Ibu Sedunia 2013' Peringkat Negeri Sarawak madah, indai ti dirampit penyakit HIV enda diperansang nusu ke anak. "Indai ti dirampit HIV enda diperansang nusu ke anak ngena ai tusu indai, laban anak nya ulih dirampit nengah indai maya ti nusu ke anak," ku Dr. Edawati. PEMANAH AI TUSU INDAI KE ANAK Ai tusu indai ngembuan kereban ti ulih nyeliahka penyakit (antibiotik) sereta kompisisi ti chukup enggau tikas suhu ti senipak. Ai tusu indai ulih nyeliahka ari kurang zat pemakai enggau chirit-birit sereta penyakit pedis enseput, kelimpah ngurangka alegik (alah jamah bansa pemakai tauka ubat). Anak mit ti nusu ai tusu indai ngembuan pemansang daya intelek (IQ) ti lebih tinggi, kurang penanggul ba ngeli enggau ortodonik. Ai tusu indai ulih ngemanahka pemansang selangkuh tubuh enggau penyakit kemi manis (anak mit) pneumonia ulih diseliahka. PEMANAH INDAI NUSU KE ANAK Indai ti nusuka anak ulih ngempiska sarang anak pengudah beranak, ngurangka ari penyakit riman tusu enggau ovari. Pengasih enggau penyayau entara indai enggau anak ulih ditempa sereta ditegapka nengah pengawa nusuka anak kelimpah ari ulih ngelimat jam enggau belanja. Nusuka anak chara eksklusif ulih mantu indai nakahka entara anak (ti mega sebengkah ari chara nagang ari majak beranak). PEMANAH KOLOSTRUM Kolostrum bisi antibodi ti ulih nyaga anak mit ari mudah dirampit penyakit enggau alegik. Nambahka nya ngembuan sel darah burak ti nyaga ari dirampit penyakit. Kolostrum mega bisi vitamin A enggau E, kelimpah ari sebansa laksatif ti ngeluarka mekonium (tai anak mit) enggau nyeliahka ari jaundis. PEMANAH NUSU KE ANAK DALAM TIMPUH SEJAM KETERUBAH UDAH BERANAK Dalam timpuh nya (sejam keterubah udah beranak) ai tusu keterubah pansut (ngembuan kolostrum) ti penuh protein sereta antibodi dikena nyeliahka anak mit nya ari penyakit berampit. Nusu ke anak dalam timpuh sejam keterubah udah berabak ulih ngasuh ai tusu mayuh sereta nyeliahka tusu indai kembai. Nambahka nya ulih nyeliahka bedarah mayuh pengudah beranak sereta kolostrum nyadi imunisasi keterubah ngagai anak. NYIKAP DIRI – NUSU KE ANAK CHARA EKSKLUSIF Indai ti ngembuan juluk deka nusu ke anak ngena tusu indai patut nyikap runding diri ari pun iya nya maya ngandung tauka betubuh bisi. Nerima penerang ke betul pasal nusu ke anak ngena tusu indai ari profesyenal pengerai sereta belajar chara nusu ke anak. Indai enda tau enda berengkah nusu ke anak dalam timpuh satu jam pengudah beranak sereta nusu ke anak enggau naka penyuah ke ulih sereta nitihka peneka anak nusu. Indai ti deka nusu ke anak umur di baruh enam bulan ngena tusu indai chara eksklusif enda ibu meri pemakai tauka ai irup bukai kelimpah ari ai tusu indai. Taja pan indai bisi mindah kebukai lebih agi ti bekereja, pengawa meri anak ai tusu indai enda patut diketu tang patut belatih chara ngulihka ai tusu ari tusu indai enggau nyimpan ai tusu nya. Meri pemakai bukai kelimpah ari tusu indai patut dikemeranka pengudah umur anak nya manggai enam bulan sereta pajakka nusu ke anak nyentuk ngagai umur anak nya dua taun. Indai ti nusu ke anak patut mayuh belelak, makai enggau ngirup ke betul dikena ngetanka pengerai. Kelimpah ari nya, laki tauka apai anak mit serata diri sebilik ke bukai patut meri sukung ngagai indai ti nusu ke anak ngambika juluk deka nusu ke anak chara eksklusif enam bulan keterubah udah ada ulih mujur. To enable your comment to be published, please refrain from vulgar language, insidious, seditious or slanderous remarks. This includes vulgar user names. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |