» »Unlabelled » Enam nembiak SMK Demak Baru enda dikemendarka belajar ketegal fesyen buk BorneoPost Online | Borneo , Malaysia, Sarawak Daily News » Berita Iban - New 2 Borneo

05:27:00

Enam nembiak SMK Demak Baru enda dikemendarka belajar ketegal fesyen buk BorneoPost Online | Borneo , Malaysia, Sarawak Daily News » Berita Iban - New 2 Borneo

Enam nembiak SMK Demak Baru enda dikemendarka belajar ketegal fesyen buk

Posted: 03 Jan 2014 02:55 PM PST

KUCHING: Enam iku nembiak sekula SMK Demak Baru enda puas ati laban enda dikemendarka masuk ngagai kandang sekula ba hari kedua sesi sekula 2014 dibuka ketegal gaya tauka fesyen buk.

Nembiak ti beumur urung 15 ngagai 17 taun nya kemari tinggal ari pelajar ketegal enda diberi peluang masuk ke dalam kelas.

Enam iku nembiak nya bepenemu sida patut diberi peluang ngubah gaya buk sereta dikemendarka nyereta sesi belajar sehari nya (kemari).

"Kami enda puas ati enggau pemutus piak sekula ti enda ngemendarka kami masuk ngagai kandang sekula sereta nyereta sesi belajar semina ketegal gaya enggau buk ti panjai.

"Ambis kurang beri awak ngagai kami nguntin tauka ngubah gaya buk, anang terus enda ngemendarka kami masuk ngagai kandang sekula," ku sebana enam iku nembiak nya.

Enam iku nembiak nya ditemu benung duduk ba penganti bas di mua sekula, maya nembiak bukai tauka sesi sekula benung dipejalaika.

Nitihku nembiak nya, bepelasarka atur sekula gaya buk sida agi manah sereta bedau datai ba tikas ke patut enda dikemendarka tama kandang sekula.

"Buk kami 'masih ok' lalu kami nemu pasal nya (atur sekula)," ku nembiak nya.

Nembiak nya madah, sida nadai bepenanggul ba hari keterubah sesi sekula ke berengkah kena Hari Empat tu tadi.

"Kemari (ensana) kami semua datai ke sekula baka selama nadai penanggul bekaul enggau fesyen buk kami tang sehari tu (kemari) kami enda dikemendar masuk ngagai kelas ketegal fesyen buk kami baka tu," ku sida.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah deka nerang ngagai rayat bekaul enggau atur GST

Posted: 03 Jan 2014 02:55 PM PST

KAPIT: Perintah deka ngatur sebengkah program betemu enggau mensia mayuh kena nerangka kebuah Chukai Barang enggau Servis (GST) dipejalaika di menua tu kelebih agi ba menua pesisir.

Kaban Parlimen Hulu Rajang Wilson Ugak Kumbong madah, pekara tu patut diatur kena napi propaganda penyakal.

"Perambu bejalaika atur GST ba bulan April 2015 ila nadai nyengkaum peranak ke diau ba menua pesisir enggau sida ke kurang penatai pemisi. Nya alai, anang mendingka jaku propaganda penyakal. Program nya deka diatur perintah nerangka kebuah bejalaika atur GST ngagai mensia mayuh ila," ku iya bejaku ba sebengkah pengerami ke diatur ba Rumah Lembang, Nanga Sedugau, Sungai Gaat Baleh, bedau lama ke udah.

Iya madah, program nya mega deka nerangka kebuah perintah ngurangka sabsidi gula, minyak petrol enggau disel.

Ugak mega madah, peranak ke diau ba menua pesisir enggau sida ke kurang penatai pemisi deka nerima bantu nengah Bantu Rayat 1 Malaysia (BR1M) ke udah ditiki ari RM500 ngagai RM650.

Tandu iya, perintah mega bisi nyendiaka insuran Takaful Nasional ba baruh i-BR1M nyentuk ke RM30,000 ngagai ruang bilik penerima BR1M3.0 ke udah parai.

"Tu mandangka perintah pegai Datuk Seri Najib Tun Razak semampai sinu ke rayat kelebih agi ngagai sida ke diau ba menua pesisir enggau ke kurang penatai pemisi," ku iya.

Kelimpah ba Rh Lembang, Ugak mega bisi nemuai ngagai Long Busang, Long Urun, Palan Pengentap Pendiau Asap enggau pasar Belaga.

Iya mega bisi nemuai ngagai palan ke diperambu endur ngatur pengerami Regatta Bakun ke udah dipasuk dalam kalenda Taun Nemuai Ke Malaysia 2014 (VMY 2014).

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

PBT ngemeratka pengawa ngemanahka Sungai Tabuan kena mutar penusah bah

Posted: 03 Jan 2014 02:54 PM PST

by Jacqueline David. Posted on January 4, 2014, Saturday

KUCHING: Opis Penguasa Kandang Menua (PBT) deka ngemeratka pengawa ngemanahka Sungai Tabuan kena mutarka penanggul ampuh bah ngenyit ke suah nyadi maya musin pengujan.

Menteri Opis Penguasa Kandang Menua enggau Pemansang Komuniti Dato Sri Wong Soon Koh madah, Majlis Bandaraya Kuching Selatan (MBKS) udah digerah beempu tanggungpengawa ngaga perambu mutarka penanggul Sungai Tabuan.

Iya madah, naka kediatu penanggul ampuh bah ke nuntung Kampung Tabuan Dayak tu tadi, baruh pegai Komiti Bantu Tasah Menua ke betuaika Sapit Kepala Menteri Datuk Patinggi Tan Sri Alfred Jabu.

Kena Hari Tiga tu tadi, lebuh pasang besai ke nyadi di nengeri tu, genturung pendiau bansa Dayak di Kampung Tabuan Dayak betapi enggau penanggul ampuh bah besereta enggau ujan lebat ari urung pukul 4 lemai ngagai 7 lemai.

Taja pia, ai surut urung pukul 8 malam tang sekeda rumah bisi dipasuk ai kelimpah ari mensia mayuh ke diau di genturung pendiau nya (ke bisi betapi enggau ai masuk ke dalam rumah) kiruh betimbaka ai sereta meresi kandang rumah sida.

Dalam kandang berapa taun tu ke udah, ninting bulan Disember (musin landas), Kampung Tabuan Dayak antara genturung pendiau ke seruran betapi enggau ampuh bah nyerumba enggau maya pasang besai nyadi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pangku pengawa dalam kabinet patut bepelasarka pemujur maya bepilih

Posted: 03 Jan 2014 02:54 PM PST

KUCHING: Parti ke mayuh dipasuk raban bansa Dayak, baka Parti Rayat Sarawak (PRS) enggau Parti Progresif Demokratik Sarawak (SPDP), patut diberi tanda basa ketegal udah mantu gempung Barisan Nasional (BN) majak megai perintah di menua tu, ku Presiden PRS Tan Sri Datuk Amar Dr James Jemut Masing kemari (ensana).

Masing ti mega nyadi Menteri Pemansang Tanah sereta Kaban Kunsil Nengeri (ADUN) Baleh mantai pekara tu baru, berindik ari parti MCA betuaika Datuk Seri Liow Tiong Lai bisi minta dua penuduk menteri penuh enggau pengabis mimit dua penuduk sapit menteri diberi ngagai parti nya, lebuh kabinet ditusun baru enda lama agi.

Masing madah taja pan atur nyiri mangku pengawa kabinet nya ba baruh kuasa Menteri Besai ti mega nyadi Chairman BN Datuk Seri Najib Tun Razak, pengari dalam kabinet BN patut nitihka sukung tetiap parti ari penyampau pengari rayat tauka Kaban Parlimen.

"Lalu pekara ke sama nya mega patut dikena MCA enti sida iya narit pulai baru pemutus lalu merambu masuk baru dalam perintah BN," ku iya.

"Taja pia, tetiap parti dalam gempung BN patut diberi ungkup ari sukut pengawa menteri nitihka pemayuh wakil rayat ke disukung ulih parti lalu ukai nitihka pemayuh kaban parti," ku iya.

Taja pia, Masing madah, atur nyiri menteri nya endang hak Menteri Besai ke beratika penuduk 14 parti dalam gempung BN.

Pekara ke enda ngemuaska ati, iya nya PRS enggau SPDP teulihka 100 persin menang dalam Pengawa Bepilih Besai Parlimen (PRU13) tu tadi enti dibanding enggau MCA ke enda tentu mujur.

PRS menang ba semua enam kerusi parlimen alai sida iya bediri sereta SPDP menang semua empat kerusi endur bediri enti dibanding enggau MCA ke semina menang tujuh ari 39 kerusi ke alai sida iya bediri.

Presiden SPDP Tan Sri William Mawan Ikom enda ulih dikerandau bekaul enggau pekara nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak Kpg Tabuan Dayak minta parit dikemanah

Posted: 03 Jan 2014 02:53 PM PST

by Chris Bishop. Posted on January 4, 2014, Saturday

Parit ti udu alit balat ngenataika penanggul ngagai sida kelebih agi maya musin pengujan

KUCHING: Peranak Kampung Tabuan Dayak minta Opis Penguasa Kandang Menua (PBT) ke bekaul ngemanahka sistem parit ngelingi genturung pendiau nya ke nyadi kebuah sida suah napi penusah bah ngenyit.

Sida nuduh Majlis Bandaraya Kuching Selatan (MBKS) enda bejalaika tanggungpengawa ti patut lalu ngujungka parit ba dalam kandang endur nya suah alit.

Ba penusah bah ngenyit ke nyadi kena lemai Hari Tiga (1 Januari 2014) tu tadi, Lurung 5, 10 enggau 10A Kampung Tabuan Dayak ke diuan enda kurang ari 100 ruang bilik napi penusah nya.

Taja pan ai udah surut pagi kemari (ensana), sekeda ruang bilik mengkang dipeda betimba ke ai ari dalam rumah lemai ensana.

Sekeda peranak ke enggai nama iya disebut madah kala ngenataika sebana ngagai MBKS kenyau ari taun 2010 tang nadai sebarang pengawa dipejalai kena mutar pekara nya.

"Kitai kala ngenataika pekara tu ngagai MBKS. Sida mega bisi datai meresa penusah ke ditapi kami tang naka ke diatu nadai sebarang atur udah diadu," ku iya.

Pemesai MBKS lebuh dikerandau kemari madahka sida nadai daya nagang bah nyadi di genturung pendiau nya ketegal penusah nya nyadi ketegal ujan enggau ai pasang.

Sekretari John Lee madah sida sigi nyadang bah ngenyit deka nyadi ba kandang endur ke baruh tang semua nya ukai kuasa sida nagang.

Iya mega madahka MBKS udah ngemanah parit besai ba Kampung Tabuan Dayak ba taun 2011 lalu seruran diintu manah.

"Ketegal ujan ti kelalu bangat sereta penuduk genturung pendiau ba tanah ke baruh, bah ngenyit sigi dekanyadi,"ku iya lebuh dikerandau pemberita.

Lee mega madah sekeda raban MBKS bisi matau genturung pendiau nya maya penusah nyadi Hari Tiga tu tadi.

"Raban MBKS bisi datai ngagai genturung pendiau nya beambika gambar ke alai ai manggai ba peninggi sekaki setengah. Bah nya mega ngujungka jalai balat tetekul,"ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Lelaki ngemba KM nengah Facebook udah dilepas

Posted: 03 Jan 2014 02:51 PM PST

KUCHING: Seiku lelaki ke mansutka penerang ngemba Kepala Menteri Pehin Sri Abdul Taib Mahmud nengah Facebook udah dilepas enggau ikat jamin.

Kepala Polis Sarawak Datuk Sabtu Osman madah lelaki nya dilepas pengudah 3 hari diriman ke alai pansik enggau penerang ari iya mega udah dirikut.

"Sepemanjai tiga hari kandang riman iya meri kerejasama ti manah ngagai raban polis ti bejalaika pansik lalu nadai kebuah kitai tau ngenanka iya lama.

"Kitai ngelepaska iya enggau ikat jamin polis ke alai kitai mega deka matau pejalai tauka pengawa iya,"ku iya ba siti aum pengarang berita kemari.

Sabtu madah pansik deka majak dipejalai lalu riput pansik deka diserah ngagai luya ngambika tau dibai ngagai Kot.

Hari Satu tu tadi, lelaki nya ditangkap ba Padang Bilun Antarabansa Kuching (LTAK) urung jam 9:20 pagi ngambika tau mantu tasat.

Pengudah ditangkap, lelaki ke beumur 33 taun nya ditan riman pengelama tiga hari nyentukka kemari.

Berindik enggau nya, Sabtu ngelalau mensia mayuh bejejimat maya mansutka penerang ba media rama ngambika nyeliah diri ari tinggang sebarang penusah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.