» »Unlabelled » Perintah chakah ngemansangka peranak menua pesisir, ku Nanta BorneoPost Online | Borneo , Malaysia, Sarawak Daily News » Berita Iban - New 2 Borneo

05:12:00

Perintah chakah ngemansangka peranak menua pesisir, ku Nanta BorneoPost Online | Borneo , Malaysia, Sarawak Daily News » Berita Iban - New 2 Borneo

Perintah chakah ngemansangka peranak menua pesisir, ku Nanta

Posted: 01 Jan 2014 01:48 PM PST

by Rengenyan Labang. Posted on January 2, 2014, Thursday

Nengah FELCRA Bhd, RM6.47 juta ungkup interim keterubah enggau kedua udah diagih ngagai 4,189 pesereta ba taun 2013

KOTA SAMARAHAN: Perintah chakah ngemansang sereta nyungkakka penatai pemisi peranak menua pesisir, ku Sapit Menteri Pemansang Menua Pesisir enggau Kandang Menua Datuk Alexander Nanta Linggi.

Ku iya, sebengkah chara dikena mantu iya nya nengah Opis Menteri Pemansang Menua Pesisir enggau Kandang Menua nengah FELCRA Berhad.

Berindik ari nya, bisi 4,189 iku pesereta FELCRA Berhad Wilayah Sarawak udah nerima dividen sepenyampau RM6.47 juta ungkup interim keterubah enggau kedua asil ari penguntung bulan Januari ngagai Oktober 2013.

Tandu Nanta, penyampau penerima tauka pesereta nya nyengkaum 12 kandang menua.

Iya madahka pengawa ngagih tauka meri dividen nya bepelasarka pemesai tanah enggau penyulut projek tauka ladang ba timpuh nya (2013).

"Ba taun 2013, FELCRA Berhad Wilayah Sarawak ngagih tauka meri dividen ari interim keterubah enggau kedua ngagai 4,189 iku pesereta enggau penyampau dividen RM6.47 juta.

"Bisi 12 kandang menua ti kena bungkur pengawa ngagih dividen tu. Ari penyampau nya, tiga kandang menua ti nerima dividen pemadu tinggi iya nya Saratok sepenyampau RM1.5 juta, Mukah (RM1.19 juta) enggau Lundu sepenyampau RM1.17 juta," ku iya.

Nanta mansutka pekara nya lebuh bejaku seraya bejadika Pengerami Meri Dividen Taun 2013 ngagai pesereta FELCRA Berhad Wilayah Sarawak ti diatur FELCRA Berhad ba Dewan Suarah Kota Samarahan ditu, apin lama ke udah.

Bejaku baru iya madah, pemujur tauka penguntung ti diasaika pesereta seharitu asil ari penyerakup antara FELCRA Berhad Wilayah Sarawak enggau pesereta ba pengawa ngemansangka projek tauka ladang.

"Kitai ngarapka penyerakup tu ulih dipajakka ngambika semua piak kelebih agi raban pesereta enggau ruang bilik sama ngasaika penguntung," ku iya ke mega Kaban Parlimen Kapit.

Tambah mega ku Nanta, endang juluk perintah deka ngenukuka rayat menua pesisir sama ngasaika pemansang sereta teulihka penyungkak ekonomi ngagai tikas ti lebih tinggi.

Kelimpah ari nya Nanta mega ngelalau raban pesereta ngambika ngemeranka ulah deka bedagang ngambika ulih ngenataika penguntung ngagai ruang bilik.

"Raban indai enggau orang indu ti kena bungkur projek FELCRA patut bisi pengibuh deka nyereta program ti bisi diatur Opis Betanam Betupi, ngambika ulih mantu nyungkakka tikas penatai pemisi enggau pengelantang ruang bilik.

"Kitai ngarapka sukung ari pesereta ti masuk program pemansang tanah ti dipejalaika FELCRA sereta perintah," ku iya seraya beterima kasih ngagai FELCRA Berhad ti mantu ngemansangka rayat menua pesisir Sarawak.

Ba pengerami nya, Nanta diberi basa nyuaka replika cek dividen 2013 ngagai pengari pesereta FELCRA Berhad Wilayah Sarawak Mohd Jaafar Ellon.

Sama bisi datai ba pengerami nya, Ketuai Pemesai Eksekutif FELCRA Berhad Datuk Ramlee Abu Bakar, Kaban Perlimen Kota Samarahan Rabiah Wang, Kaban Kunsi Nengeri (ADUN) Sadong Jaya Aidel Lariwoo enggau bala ke bukai sereta 500 iku pesereta FELCRA Berhad Sarawak.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Urung 1,500 iku peranak ari genturung pendiau Bengoh deka pindah ngagai BRS bererenggat

Posted: 01 Jan 2014 01:47 PM PST

KUCHING: Urung 1,500 iku peranak ari empat buah genturung pendiau ti kena bungkur Projek Tekat Ai Bengoh, Padawan disadang mindah bererenggat ngagai Palan Pengentap Pendiau Bengoh (BRS).

Kampung Taba Sait, Pain Bojong, Rejoi enggau Semban di Ulu Padawan deka ampuh ai enda lama agi lalu semua peranak ari empat genturung pendiau tu dipindah ngagai BRS di Jalai Semadang-Skio urung 50 KM ari mengeri Kuching.

Penyampau 204 buah Rumah Mesra Rakyat (RMR) digaga perintah nengah Opis Pengawa Berumah (HDC) ke alai empat bagi genturung pendiau ti nitihka nama kampung sida ke asal dipindah ke BRS.

Lima puluh lapan (58) buah rumah digaga ba Kpg Taba Sait, 47 ba Pain Rojong, 40 ba Rejoi sereta 59 ba Semban.

RMR ke beungkus RM95,000 tiap unit nya ngembuan 3 buah bilik tinduk sereta dua bilik mandi ke alai ungkus semua 204 buah rumah iya nya RM19,380,000.

Projek BRS dipun kenaka 1 Mac 2012 lalu udah tembu besereta OP (pemendar nguan) kena 5 Disember 2013.

Naka ke diatu, nitihka penerang ari komiti BRS Itodio Peu, kenyau ari pun bulan Disember tu tadi 39 pintu rumah di BRS udah diuan peranak ari Kampung Taba Sait, semilan pintu ari Kampung Semban lalu sepintu diuan peranak ari Kampung Rejoi.

"Taja pia, nadai seiku peranak ari Kampung Pain Bojong mindah kitu," ku iya lebuh dikerandau bedau lama tu tadi.

Itodio ke mega Ketuai Kampung Taba Sait pechaya mayuh agi sida deka mindah ngagai palan pengentap pendiau Bengoh dalam awak ke semak tu.

Kena 20 Disember tu tadi, semua peranak ari empat buah genturung pendiau nya nerima cek bayar pampas rumah (lama) sereta surat pala tanah (lot rumah) enggau tanah kebun ke disua Menteri Muda Pengatur Pemansang enggau Pengeraja Asal datuk Naroden Majais.

Penyampau RM8.1 juta diagih ungkup pengawa mayar pampas rumah semua 204 ruang bilik peranak ke kena bungkur.

Sehari udah nya (21 Disember), sida (52 iku) mega nerima kunchi RMR ari Menteri Pengawa Berumah Datuk Amar Abang Johari Tun Abang Openg Balai Guna Mensia Mayuh Kpg Taba Sa'it.

Ngemantup ati semua sida ti mindah ngagai BRS, Peu ke nyadi pengari madah sebuah sekula primari patut ditumbuhka ba BRS.

Ku iya, sekula nya deka ngemudah bala anak ari empat buah genturung pendiau nya nampung pelajar sida.

"Kami keran deka meda sebuah sekula primari ditumbuh ba BRS lalu ukai ba endur bukai luar ari BRS," ku iya.

Lima puluh dua ruang bilik ke nerima kunchi RMR kena 21 Disember tu tadi deka ngintu Krismas sida ti keterubah ba rumah baru di BRS.

Taja pia, 90 buah ruang bilik mengkang enggai mindah ari kampung asal sida iya nya 35 ari Kpg Taba Sait, 21 ari Pain Bojong sereta 34 ari Rejoi.

Tekat Ai Bengoh digaga ngena ungkup belanja RM315 juta.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Jaga pengelikun benung enggau pengudah kena ampuh bah

Posted: 01 Jan 2014 01:46 PM PST

KUCHING: Sarawak Energy ngelalau mensia mayuh beratika pengelikun benung enggau pengudah ampuh bah, sereta nyeliahka diri ari penusah bebadi kena elekterik.

Ketuai Pemesai Eksekutif SEB, Lu Yew Hung madah, mensia mayuh patut ngenyauhka diri ari megai sereta masang tali karan.

"Rumah ke kena ampuh bah, papan suis besai rumah patut dipadamka dulu sebedau ai masuk ke rumah," ku iya.

Enti ulih ku iya, giga kontrektor ke landik ngadu baru barang elekterik baka kipas enggau utai bukai ke udah kena ampuh bah.

Mensia mayuh ke deka nemu enggau silik agi, tau telefon ngagai Palan Servis Penguna Sarawak Energy ba lumur 082-333221 (Kuching), 083-321486 (Sri Aman), 084-654242 (Sarikei), 083-472102 tauka 011-15441035 (Betong), 084-334566 (Sibu), 0198177074 (Mukah), 084-796020 tauka 019-8595499 (Kapit), 086-331151 (Bintulu), 085-212079 (Limbang) enggau 085-283405 (Lawas).

Mensia mayuh mega tau telefon ngagai Palan Servis Penguna ba lumur 1300883111.

Ke pengelikun pengguna, Sarawak Energy nengah Syarikat SESCO Berhad deka nutup bekal kuasa karan di sitak ke kena ampuh bah.

Bekal kuasa karan deka disambung baru di sitak ke kena ampuh bah nya enti gaya ampuh bah udah berinsur manah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Atur ngurangka elawin enda muntanka pengawa mantu rayat

Posted: 01 Jan 2014 01:46 PM PST

KOTA SAMARAHAN: Sapit Menteri Pemansang Menua Pesisir enggau Kandang Menua, Datuk Alexander Nanta Linggi nyambut manah penemu Menteri Besai ti deka ngurangka belanja sektor perintah nyengkaum ngurangka entertainment allowance menteri enggau sapit menteri sepenyampau 10 persin, ti berengkah dikemeranka kemari (1 Januari 2014).

Nanta bepenemu pengurang penyampau elawin nya enda meri pangka ti besai sereta enda ngeruga pejalai tanggungpengawa nyadi pengari rayat ba sitak ti dipegai iya.

"Kami nyambut manah pengawa ti dipejalaika perintah kelebih agi ba pekara ti dibantaika Menteri Besai. Taja pan penyampau ke dikurang enda mayuh tang enti nengah penegap runding ti sama dikena mantu, nya ulih diterima sereta nadai ngenataika penanggul.

"Pengurang elawin nya nadai ngeruga tauka meri pangka ngagai atur bejalaika tanggungpengawa ba sitak ke dipegai, kitai engka bisi chara bukai kena ngenegapka belanja, projek enggau kebukai.

"Kami (aku) nerima enggau ati tebuka pengawa ngurangka entertainment allowance nya," ku iya lebuh dikerandau pengarang berita pengudah bejadika pengerami meri dividen Taun 2013 ngagai pesereta FELCRA Berhad Wilayah Sarawak ti diatur ba Dewan Suarah Kota Samarahan ditu, bedau lama ke udah.

Ba surat berita madahka, kilah ensanus Menteri Besai Datuk Seri Najib Tun Razak mantaika 11 chara dikena ngurangka belanja sektor perintah, nyengkaum ngurangka entertainment allowance  menteri enggau sapit menteri sepenyampau 10 persin, berengkah 1 Januari 2014.

Tuju nya senipak enggau juluk perintah deka ngelimat bebelanja taun baru, ku iya dalam penerang ti dipansutka kemari (kilah ensanus).

Iya madahka pemutus nya asil ari runding enggau sapit iya Tan Sri Muhyiddin Yassin enggau Ketuai Sekretari Perintah Malaysia (KSN) Tan Sri Dr. Ali Hamsa.

Ku iya perintah mega deka ngurangka entertainment allowance sepenyampau lima ngagai 10 persin ke bala pemesai kanan perintah Gred Jawatan Utama Sektor Awam C (JUSA C) ke atas.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sarawak deka dikemansang endur nanam kelapa sawit pengabis besai di Malaysia

Posted: 01 Jan 2014 01:46 PM PST

KOTA SAMARAHAN: Sekeda kandang menua di Sarawak udah dikelala FELCRA Berhad ulih dikemansangka endur nanam kelapa sawit, lalu dikearapka jemah ila Sarawak ulih nyadi nengeri lumur satu nanam kelapa sawit di Malaysia.

Pekara nya disebut Kepala Pemesai Eksekutif FELCRA Berhad, Datuk Ramlee Abu Bakar dalam jaku pengelalu ba pengerami meri dividen Taun 2013 ngagai pesereta Felcra Berhad Wilayah Sarawak.

Beduduk ari pekara nya iya madah, FELCRA Berhad udah merambu sereta ngelangkar atur pemansang ti deka dipejalaika ila.

Di Sarawak, ku iya, FELCRA Berhad bejalaika pengawa ari taun 1979 ti berengkah muka projek di Nanga Tada, Nanga Ngungun sereta Nanga Jagau.

"Nyentuk ke seharitu FELCRA Berhad udah muka tauka ngemansangka urung 51,000 hektar tanah di Sarawak, lalu tu nyadika Sarawak antara nengeri di Malaysia pemadu besai kelimpah ari Pahang enggau Perak. Ngarapka jemah ila nyadi lumur satu ba FELCRA Berhad.

"Nya alai kitai ngarapka sukung ari semua piak ba pengawa ngemansangka tanah di Sarawak, baka ti dipadahka ngagai aku di nengeri tu bisi beberapa ribu hektar udah dikelala ulih dikemajuka.

"Kami udah ngelangkar nengah perambu ti engkeman ngambika pemansang tu ulih dikemujurka ti meri penguntung ngagai pesereta tauka peranak menua pesisir di Sarawak," ku iya ba pengerami ti diatur FELCRA Berhad di Dewan Suarah Kota Samarahan ditu, pagi kilah ensanus.

Ngenang pengawa meri dividen nya, Ramlee madah, FELCRA meri dividen 2013 Interim Kedua  nyerumba pengawa masuk sekula taun 2014, sepenyampau RM120 juta.

Dividen 2013  Interim Keterubah diberi rambau pengerami Hari Raya sepenyampau RM80 juta.

"Dividin 2013 Interim Keterubah enggau Kedua tu kitai meri sepenyampau RM6.47 juta (ti mungkur 4,189 iku pesereta di Sarawak)

"Dividen kepenudi 2013 ila kitai ngarapka teulihka sepenyampau RM300 juta," ku iya seraya ngarapka pesereta Felcra Berhad Wilayah Sarawak ulih ngenataika sebarang penanggul tauka riput ngagai kaban Komiti Pemansang Projek.

Kelimpah ari nya ba pengerami ti sebaka, pengari pesereta FELCRA Berhad Wilayah Sarawak Mohd Jaafar Ellon lebuh bejaku minta semua pesereta meri sukung tauka kerejasama ngagai FELCRA Berhad.

Kebuah pia ngambika teulihka penguntung nengah agih dividen ti diberi ngagai tetiap iku pesereta, ku iya.

Iya mega ngelalau semua pesereta ngambika ukai semina bepanggai ngagai FELCRA Berhad ba pengawa ngintu ladang.

"Pesereta patut regas ngabas ladang anang semina ngarapka pengereja pengawa ladang.

"Ambika banding, enti sema tetemuka buah kelapa sawit enda abis diangkut sida pengereja pengawa ladang, kitai patut ngeriput ngagai piak FELCRA Berhad.

"Aku mega sama ngingatka kitai ngambika enda nguna piak ketiga tauka media sosial endur ngenataika sebarang penanggul tauka asai enda puas ati. Pekara ti enda ngelantangka ati ulih dikerundingka (enggau FELCRA Berhad) nyentukka bisi pemutus," ku Jaafar.

Pengerami nya dipenyadi Sapit Menteri Pemansang Menua Pesisir enggau Kandang Menua, Datuk Alexander Nanta Linggi sereta bisi digulu Kaban Parlimen Kota Samarahan Rabiah Wang enggau Kaban Kunsil Nengeri (ADUN) Sadong Jaya Aidel Lariwoo.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sebengkah cherita pasal pemerinsa seiku Kenyalang di Kem Piasau Miri Bagi Ke-2

Posted: 01 Jan 2014 01:45 PM PST

by Chris Bishop. Posted on January 2, 2014, Thursday

KUCHING: Berita pemati ikon Kem Piasau di Miri, seiku burung Kenyalang ke beri nama Faridah balat ngeringat peranak nengeri Sarawak ke alai semua 2,000 kaban Facebook ti nitihka pengidup burung nya begulai enggau tawing iya (Jimmy) bela ngenataika penyinu ati.

Faridah ditangkap lalu dibunuh di Piasau Garden kena 24 September 2013 urung pukul 12:30 tengahari.

Saspek udah munuh seiku burung kenyalang peturun 'Oriental Pied' tauka nama saintifik Anthracoceros albirostris ti dijaga nengah Ordinan Perlindungan Hidupan Liar 1998, enda minta pemendar betulis ari Kontroler Opis Jelu Siga Nengeri Sarawak.

Pengudah penusah nyadi, polis bisi ngenan saspek lalu asil pansik mandangka sapek udah ngereja penyalah lalu tau diukum jil tiga bulan enggau ukum mata duit penyampau RM2,000 tauka jil tiga bulan agi enti enda mayar ukum.

Saspek, Micheal Rabai,20, ari Permy Jaya, Miri ngakun ngereja penyalah nitihka tuduh nengah Seksyen 29 (1) Ordinan Perlindungan Hidupan Liar 1998 lalu diukum nengah Seksyen 29 (1) (c) akta ke sama ti mai ukum penjara pengambis lama dua taun enggau ukum RM25,000.

Majistret Mohamad Redza Azhar Rezali ngeletak ukum berengkah 31 Oktober 2013, jil pengelama enam bulan pengudah orang salah enda tebayar ukum sereta pengudah mendingka jaku ngakun salah ari saspek.

Sebulan pengudah ditinggalka Faridah mati, Jimmy dipeda begulai manah enggau tawing baru iya Juliet.

Juliet disadang deka betelu dalam awak ke semak ke alai seduai udah berengkah dipeda ngemanah sarang ba pun bulan November tu tadi di Kem Piasau Miri.

Chairman MNS Persatuan Alam Malaysia (MNS) pampang Miri Musa Musbah lebuh dikerandau di Kem Piasau bedau lama tu tadi madah pemanah pendiau ti dipandangka Jimmy enggau Juliet nya sigi enda disadang.

Berindik enggau nya, dikena nentuka pengelikun seduai, sebengkah sistem pematau data sereta video disikap ba mua sarang burung nya.

Nitihka penerang ari Musa, video nya deka meri data ke silik ngambika tau dikena ngadu pansik jemah kelebih agi ba pengawa matau penyampau burung kenyalang di kem nya kelimpah dikena ngintu pemaik enggau pengelikun burung nya.

"Atur masang video ba mua sarang Jimmy enggau Juliet digaga nengah chara manual lalu udah diganti ngagai sistem pematau online ngambika ulih dipatau 24 jam.

"Nengah rikod ke dikembuan, kitai nyadang ulih nemu pusin pengidup burung kenyalang nyengkaum proses ngulihka tawing enggau chara nyendiakka sarang.

"Data senentang pengidup kededua burung tu chukup beguna lalu deka dikena raban pemansik sereta nembiak sekula meretika pengidup peturun burung tu jemah," ku iya.

Musa ke mega seiku Ranger Hidupan Liar Kehormat Sarawak Forestry Corporation (SFC) madah Juliet ulih ngada mayuh burung kenyalang di Kem Piasau enti enda dikachau mensia tauka jelu bukai.

Nitihka rikut, Indai kenyalang ke dulu (Faridah) udah ngadaka 56 iku anak burung kenyalang kenyau ari taun 2005 lalu tebal agi anak iya mati ketegal dibunuh sekeda orang ke enda beradat.

Rikut mega mandangka burung kenyalang keterubah datai di kem Piasau ba taun 2004 iya nya Jimmy ke alai kandang endur kem nya ngembuan mayuh macham pun kayu sereta pemakai ti dikerindu burung kenyalang.

Data senentang burung kenyalang di Kem Piasau berengkah dirikut Dr Gianna Minton ba taun 2005, laki iya seiku pemesai Shell ke diau di kem nya.

Ketegal ti ngembuan mayuh awak lepa, Dr Gianna rindu beratika pengidup burung (Jimmy enggau Faridah) lalu berengkah ngerikut data.

"Iya ke amat, aku nampung pansik ti udah diadu Dr Gianna.

"Maya Dr Gianna tetemuka Jimmy, burung nya bedau diberi nama lalu pengudah Dr Gianna nyerahka semua penerang senentang burung tu aku lalu meri iya nama Jimmy sereta pia mega enggau Faridah," ku Musa.

Musa berengkah bejalaika pansik enggau silik senentang burung kenyalang di kem Piasau pengudah iya pinchin ari Shell Berhad ba bulan Ogos 2012.

Shell nyerahka sebuah rumah ba Kem Piasau besemak enggau sarang burung kenyalang ngagai Musa ngambika mudah endur iya matau pengidup Jimmy enggau Faridah (maya nya), diatu enggau Juliet.

Ditanya senentang kus masang semua sistem, Musa ke mega mandal chairman Piasau Camp Nature Society (PCNPS) madah semua nya dipelanja ari puket iya empu ketegal ti kelalu rinduka pengidup bansa burung kenyalang nya.

Tajapan kus enda kelalu besai, MNS enggau PCNPS mengkang begunaka spunsa ari gerempung tauka orang bukai ngambika pengawa ngadu sistem pematau ulih dipejalai enggau lanchar.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.