» »Unlabelled » Kitai ngelaluka inisiatif Impian Sarawak: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

05:25:00

Kitai ngelaluka inisiatif Impian Sarawak: Mawan BorneoPost Online | Borneo , Malaysia, Sarawak Daily News » Berita Iban - New 2 Borneo

Kitai ngelaluka inisiatif Impian Sarawak: Mawan

Posted: 05 Jan 2014 08:40 AM PST

by Chris Bishop. Posted on January 6, 2014, Monday

KUCHING: Menteri Pemansang Rama Tan Sri William Mawan Ikom ngelaluka inisiatif Impian Sarawak ke dituku parti penyakal DAP enti amat inisiatif nya dipejalai enggau niat ke manah.

Ku iya, ba atur demokrasi ti dikemeran ba menua tu raban penyakal enda ditagang ngadu sebarang projek asal mih tau mulaika pemaik ngagai rayat.

"Tang taja pia, penyakal patut nemu pengawa ti diperambu tauka deka dipejalaika sida bisi taka lalu enda tau diruntu sengapa.

"Kitai enda nemu tuju ke bendar inisiatif Impian Sarawak DAP, tang enti semua nya diatur kena matak orang ngundi ngalih nyukung sida, aku pechaya rayat udah chukup mansau runding ba pekara politik lalu enda mudah teparuk ba semaya manis sida," ku iya ke mega kaban Kunsil Nengeri Pakan sereta Kaban Parlimen Saratok.

Mawan nandu, kitai sama meda naka ni pengangkun tauka pengelurus ati DAP ngemujur inisiatif ti udah ditetap ba semilan kandang endur nyengkaum Pakan.

Bedau lama tu tadi, Chairman DAP Nengeri Chong Chieng Jen madah, projek ke udah diputus diatur ba inisiatif Impian Sarawak (2014) nyerangkum kandang menua Pakan, Kedup, Marudi, Batu Danau, Repok, Tarat, Bawang Assan, Kidurong enggau Lanang.

Chong ba penerang nya madahka deka masang sistem ai graviti ke baru ba Ulu Wak Pakan ngambika tiap iku peranak ke diau ba menua nya nerima bekal ai tiap jam.

Kelimpah ari nya, Inisiatif Impian Sarawak mega deka masang sistem ai graviti ba tiap genturung pendiau di Kedup, Serian, Sungai Arang (Marudi), Baram, Rantau Kura sereta Medamit di Danau.

Di Repok, Sarikei enggau Kidurong, Bintulu Impian Sarawak deka bejalaika pengawa ngemanah rumah panjai sereta nentuka rumah panjai disikap enggau perengka guna ke chukup.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perambu penerebai bilun ke Shenzhen, China penyungkak dagang temuai, ku Abang Johari

Posted: 05 Jan 2014 08:39 AM PST

KUCHING: Sarawak merambu ngepunka penerbai bilun terus ngagai Shenzhen, China ngambika tau nyaup ngeranchak atur dagang temuai entara kededua menua.

Menteri Dagang Temuai, Datuk Amar Abang Johari Tun Abang Openg madah, perambu nya udah dikenatai ngagai Konsulat Besai China di Kuching ke alai iya deka ngatur kerejasama enggau Malaysia Airlines ngemujur juluk nya.

"Kaul diplomatik entara Malaysia enggau China udah diadu manah pengelama 40 taun ke udah lalu udah mega ngatur macham pengawa rama enggau ekonomi ungkup pemaik kededua menua kelebih agi Sarawak.

"Ari sukut dagang temuai, aku nguji deka matak mayuh agi orang ari China nemuai ke Sarawak ba taun 2014 nengah chara ngepunka penerebai terus ari palan dagang temuai di menua China baka ke Shenzhen sereta ke bukai ke Kuching," ku iya.

Iya mansutka jaku nya ba pengawa Makai Lemai Gerempung Dagang Eksport-Import Kuching China di Christian Ecumenical Center ditu,malam ensanus.

Pengerami nya digulu Tuai Pemegai Menua, Tun Datuk Patinggi Abang Muhammad Salahuddin sereta bini iya Toh Puan Datuk Patinggi Norkiah, Penyanding Penemu Gerempung Tan Sri Datuk Yee Ming Seng, Presiden Gerempung Xii Ming Tang, Konsul Besai China di Kuching Liu Quan enggau orang bukai.

Ku Abang Johari nambah, perintah nengeri betuaika Kepala Menteri Pehin Sri Abdul Taib Mahmud angkun nentuka pemansang ke sama bela diasai semua bansa nyengkaum komuniti Cina.

Nengah polisi ti ditukuka Kepala Menteri sereta Menteri Besai Datuk Seri Mohd Najib Tun Razak, iya pechaya Sarawak deka ngasai sekeda penguntung ari dagang ke disetuju Presiden Republik Rakyat China enggau Malaysia.

"Kaul entara Malaysia enggau China bepun kenyau ari jeman Laksamana Cheng Ho lalu majak rat asil ari penemuai kededua ketuai ngelama ke udah ke alai bedau lama tu tadi Malaysia bisi nerima penemuai Presiden Republik Rakyat China.

"Maya Najib dipilih nyadi Menteri Besai, China nyadi menua ti keterubah digusung iya lalu nya mandangka kededua menua ngembuan kaul ti chukup rat,"ku iya.

Tambah Abang Johari, China udah diakun nyadi sebengkah menua ti ngembuan kuasa ekonomi ti besai nangkanka Amerika Syarikat lalu disadang ulih ngalahka Amerika Syarikat jemah.

Berindik enggau nya, kaul entara China enggau Malaysia sigi nyadi pekara lumur satu ketegal menua nya benung majak mansang maya ke diatu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pengawa ngerampas Kitab Injil enggau Bup Kudus ngeringatka kaban SCAC

Posted: 05 Jan 2014 08:38 AM PST

KUCHING: Presiden Sarawak Chinese Annual Conference (SCAC) Dato Su Chii Ann mantaika pengeringat ati bekaul enggau pengawa berampaska Kitab Injil enggau Bup Kudus.

"Aku ngansak tuai politik enggau tuai pengarap nungkat sereta bebasaka Artikel 11 dalam Perlembagaan Persekutuan. Artikel nya terang bendar nyelinting hak seseiku orang bisi kuasa milih jalai pengarap sereta mantaika buah runding," ku Su.

Iya ngarapka bala tuai menua, enda ngira pegai pengarap enda deka nguna pekara tu meba orang Keristin di Sarawak enggau Sabah mega di Semenanajung Malaysia.

Lebuh dikerandau Sapit Bishop Gereja Anglikan Bishop Aeries Sumping Jingan madah, iya balat tekenyit lalu berasai enda puas ati meda pekara ke nyadi lalu nguing ngagai The Borneo Post pekara ke dipos ba lambar jantil pengawa rama.

"Nundaku sempekat 10-poin ke digaga PM nengah Datuk Idris Jala, orang ke megai pengarap Keristin di Malaysia (Timur enggau Barat) udah diberi jamin kitai tau ngulihka sereta ngena Alkitab. Kitai mega dkemendar nyelak Alkitab ba menua ditu empu.

"Jais ngerampas ukai semina Alkitab tang mega Bup Kudus dalam Jaku Iban. Aram kitai sama nganti pekara ke digaga PM pekara ke dijamin PM empu (ngagai raban Keristin) ulih Jais! Hari ke enda manah ungkup Malaysia…nyema nya ku gaya utai ke nyadi ba pun taun 2014!

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

ADUN Kedup ngelala juluk Impian Sarawak

Posted: 05 Jan 2014 08:38 AM PST

KUCHING: Kaban Kunsil Nengeri (ADUN) Kedup Martin Ben netapka inisiatif Impian Sarawak ti dituku penyakal, Parti Tindakan Demokratik (DAP) ngembuan juluk matak mensia mayuh ngalih lalu meri sukung ngagai sida.

Ku iya, pengawa ngelanchar semilan projek nengah inisiatif nya ungkup suku keterubah taun 2014 tebal agi mandangka juluk politik penyakal ti deka ngerampas kandang menua pesisir.

Semilan projek ti udah diputuska DAP nya nyengkaum penuduk sitak DUN Kedup ke nyadi kubu kuat Barisan Nasional (BN).

Lebuh dipinta ngenang senentang pekara nya kemari, Martin madah ke diri enda tekenyit Kedup dirintai dalam semilan projek Impian Sarawak DAP.

"Projek ke deka diadu DAP nya ukai pekara baru ungkup peranak di Kedup ke alai tebal agi genturung pendiau diatu udah nerima bekal ai beresi.

"Taja pia, bisi sekeda kandang endur mengkang bedau nerima bekal ai beresi tang semua nya deka diadu perintah BN bererenggat.

"Aku ke ngarika peranak Kedup nadai kuasa nagang DAP bejalaika projek ke diperambu nyengkaum pengawa masang sistem paip ai graviti ditu,"ku iya.

Ku Martin nandu, Menteri Pemansang Infrastruktur enggau Penyambung Dato Sri Michael Manyin udah bejadi Palan Pemeresi Ai Slabi di Serian ke beungkus RM116.5 juta ba bulan Disember tu tadi.

"Nengah palan nya, semua peranak Serian disadang deka nerima bekal ai beresi dalam timpuh 10 taun ke deka datai.

"Palan pemeresi nya chukup mekal ai ngagai genturung pendiau di Serian tang ketegal ti baru berengkah operasyen, kitai begunaka sekeda awak dikena nentuka semua rayat nerima bekal ai tu,"ku iya.

Palan Pemeresi Ai Slabi tembu digaga kena 7 April 2013 lalu ulih mekal 50 juta liter ai sehari nambahka penyampau palan lama ti ulih mekal 25 juta ai sehari.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sekeda pelilih menua di nengeri tu deka napi bah ngenyit: MET Malaysia

Posted: 05 Jan 2014 08:38 AM PST

KUCHING: Ujan lebat diumba kabut lemai kemari ngujungka sekeda endur di nengeri tu ampuh bah.

Urung pukul 5.30 lemai, bah ngenyit bisi diripot nyadi di jalai simpang empat lampu trafik di Jalai Tun Abang Haji Openg, Jalai Mendu, Jalai Datuk Abang Abdul Rahim, pasar MJC, jalai nuju ke BDC enggau Jalai Green.

Kelimpah ari nya, tiga buah palan mindahka orang kena tasah bah dibuka 24 jam ngambika ulih mantu mensia mayuh ke betapi enggau endur sida ke muntang kena ampuh bah.

Opis Penemata Gaya Hari Malaysia (MET Malaysia) kemari madahka palan kena mantu orang ke tasah laban bah dibuka di Dewan Sukan KPSU Tatau, Dewan Masyarakat Bakong enggau SK Kampung Iran, agi bejaga-jaga.

Maya tasah bah ke nyadi dalam kandang berapa hari tauka minggu tu ke udah, urung 10,851 iku mensia ari 1,579 ruang bilik betapi enggau penusah nya, lalu ari penyampau nya 82 ruang bilik tauka 315 dipindahka.

Nitihka ripot ari MET, ujan lebat Hari Enam ke mayuh nyadi di Miri enggau Limbang kilah tengahari lalu di Kapit, Bintulu enggau Sibu kilah malam hari.

Di Mukah, ai ke pasang diatu udah surut lalu jalai ulih dikena, lalu semina sekeda jalai besai ke agi bedau ulih dikena, tang semina ngena kerita besai aja ulih mansa.

Taja pia, tiga buah jalai nuju Rh Buda Dijih, Rh Ngelambai enggau Rumah Peter agi bedau ulih ditengah kerita.

Di Bintulu, 29 buah ruang bilik agi diau di Dewan Sukan KPSU Tatau.

Di Niah, Miri, semua 21 ruang bilik ari Kampung Iran, Suai agi numpang di SK Kampung Iran.

Ke Marudi, 30 ruang bilik ari sitak Setinggan, Bakong agi bedau numpang di Dewan Masyarakat Bakong, enggau sekeda endur di sitak nya, ai. udah majak surut. Nitihka ripot gaya hari naka pukul 4 lemai kemari, gambar ke dipeda ba radar urung pukul 3.30 lemai enggau gambar satelit pukul 3 lemai, mandangka semua sitak di Sarawak betapi enggau gaya mua hari.

Berindik ari nya, MET Malaysia ngelalau mensia mayuh deka betapi enggau hari ujan lebat sereta kabut deka nyadi dalam urung pukul 2.34 lemai kemari di Limbang, Miri, Kapit, Bintulu, Mukah (nyengkaum Dalat enggau Matu), Sibu (sitak Selangau), Sarikei (Julau enggau Pakan), Betong, Samarahan, enggau Kuching, dipelaba nyadi datai ngagai dini hari.

Gaya hari bansa tu ku MET Malaysia, sitak tu deka betapi enggau kabut sereta ampuh bah.

Kandang berapa hari udah nya, dalam kandang tujuh hari tu ila gaya hari dipelaba semun di sekeda sitak kelebih agi di menua ulu ari tenghari ngagai malam sereta pagi di tebing tasik.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Kitai ngarapka mayuh agi ungkup penuduk

Posted: 05 Jan 2014 08:36 AM PST

by Samuel Aubrey. Posted on January 6, 2014, Monday

Pangku pengawa dipegai Tiong mandangka pengibuh sereta penyiru Najib ba SPDP: Mawan

KUCHING: Sarawak Progressive Democratic Party (SPDP) meri basa ngagai Menteri Besai ketegal ti udah nyiri sapit presiden ke mega Kaban Parlimen Bintulu Datuk Seri Tiong King Sing nyadi pengari spisil perintah ngagai menua Asia Timur bekenaka status menteri.

Presiden Tan Sri William Mawan Ikom pechaya pemutus nya tau endar matak mayuh agi ketuai dalam SPDP diberi pangku pengawa menteri ngarika perintah besai ke alai ba rintai nama kabinet ti dipansut pengudah pengawa bepilih besai ke-13 bulan Mei tu tadi, raban dalam SPDP enda diberi sebarang penuduk.

Ngenang ubah ba rintai kabinet nyau majak semak, iya ngasaika sekeda kaban parlimen ari SPDP deka diberi pangku pengawa nyadi menteri tauka sapit menteri ba perintah besai.

"Pemutus nyirika Tiong mandangka perintah Barisan Nasional (BN) ngemeratka SPDP. Aku pechaya raban ketuai bukai dalam SPDP deka diberi pangku pengawa politik ke alai kitai nyadang ubah ba rintai kabinet menteri deka diatur ba awak ke semak tu.

"Kitai (SPDP) meri basa ngagai Menteri Besai ketegal ti udah ngungkupka sekeda penuduk tajapan kitai enda diberi sebarang pangku pengawa politik dulu agi ari tu. Nyadi sebengkah parti dalam serakup BN, kitai bisi pinta ba pekara politik lalu pinta nya enggai jadi enda dipantup. Sebarang pangku pengawa ke diberi, ketuai dalam SPDP deka bejalaika tanggung pengawa nya enggau pengabis manah," ku iya lebuh dikerandau kemari.

SPDP enda diagih sebarang pangku pengawa menteri tajapan menang ba semua empat penuduk ba GE13.

Mawan mega seiku entara chalun SPDP ke menang di penuduk parlimen Saratok. Tang ketegal iya udah mangku pengawa Menteri kanan enggau Menteri Pemansang Rama ba kabinet Sarawak, Mawan disadang enda diberi sebarang pangku pengawa ba perintah besai.

Berindik enggau nya, dua iku ketuai parti ke bukai MP Mas Gading Anthony Nogeh Gumbek enggau MP Baram Anyi Ngau ngembuan awak besai diberi mangku pengawa menteri ba kabinet perintah besai. Sebedau GE13, SPDP diungkupka dua penuduk mangku pengawa sapit menteri.

Ba kaul bukai, Mawan ngelai pemutus nyiri Tiong nyadi pengari perintah ngagai Asia Timur bekena status menteri sigi setipak enggau peneleba iya ba sektor korporat lalu dikena masa pemanah kereja ti udah dipandang iya ngelamatu.

Tiong ke udah empat renggat nyadi MP Bintulu nyadi ketuai ke-empat dichiri Najib nyadi pengari spisil perintah nangkanka Datuk Seri Jamaluddin Jarjis (Amerika), Tan Sri Ong Ka Ting (China) enggau Datuk Seri S Samy Vellu (India).

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.