Meri Malu Bendar!

Meri Malu Bendar!
Malaysia Menua Asia Ti Bendar!
Keruga Raban Mafia Kayu Batang Sarawak Ngerembai ke Serata Dunya

Posted: 30 Jun 2014 04:32 AM PDT

Ditugungka – bantu pemakai ari SEB ditejuka betugung nyadika bantu ke bansa asal Penan ke pengelama sebulan

Kita tentu berunding enti bisi siti pekara Torstein ari SEB enggau bakih iya ti bebansa Tasmania, Nick Wright, (Kepala CSR enggau Program Pengentap Pendiau) deka nentuka, iya nya raban bansa asal Penan, ti udh diburu pansut ari kampung asal sida ari Tekat Murum, enda balat beserebana.

Tambah mega kami enda tau enda ngambi kira dua iku orang menua tasik ti dibayar gaji kelalu besai lalu suah bendar didinga muji-muji diri bekaul enggau projek tekat sida ti balat mai pengerusak laban kenu ku sida nya projek nya tau mai pengelantaang ngagai orang bansa asal ti dituntung penanggul lalu baka ni jaku tangkan ari raban NGO ari serata dunya nya nadai mai sebarang reti.

Torstein udah tekelalu lunggar penemu lalu ngutuk raban orang ti rinduka rampa menua nya 'kelalu ragak' semina ngiga penyinu dikena sida nambahka penatai belanja dikena bejalaika pengawa sida.

Nama juluk ati ti bendar peranak menua Norway ti nerima gaji lebih sejuta dollar setaun, ti mai bala bakih iya ti mega sama dibayar gaji kelalu besai dalam kompeni perintah Sarawak!

Nick Wright ti nyadi Sapit Presiden dalam SEB diberi tanggungpengawa ngemataka pekara 'Pengentap Pendiaau' enggau Tanggungpengawa Korporat enggau Sosial kompeni nya!

Beberapa ti udah kitai bisi ninga jaku kutuk ari komisyen kuasa pengelantang mensia Malaysia empu ti ngenang pasal sebana bala Penan ti udah dientapka pendiau lalu kitai mega bisi ninga pasal siku pengari rayat ti nyadika tuai raban bansa asal nya ti ringat ngaga repot polis ngelaban SEB laban udah nipu sida ba bekal pemakai.

Pemayuh tubuh raban bansa Penan nya bisi beberapa ratus buah ruang bilik: Tang kompeni SEB udah nginjau bbbilion-bilion ringgit ari wang turu menua dikena sida melanja pengawa ngaga tekat.
Bayar 'pampas' ti dikeluarka enggau chara bepejal ngagai raban bansa asal nya, nyadika ganti pengerugi pengerusak rampa kampung sida, semina RM800 sebulan ke sebuah ruang bilik (jauh mimit ari gaji pemadu mit ke sebulan ke menua Sarawak).

Enda kelalu mar bendar ngeluarka bantu ngagai raban bansa asal tu. SEB bempu tanggungpengawa meri bantu belanja ba penyampau RM250 mata duit enggau mega bantu pemakai beungkus RM650 (ti nyadika semua penyampau nya RM800 semua).

Tang, udah lebih setaun SEB mengkang enda ulih ngamatka jaku semaya tu.

Anjung pemakai rangkai ngagai sida nya – sebuah lori dikena nganjung pemakai ngagai raban bansa Penan

Raban bansa Penan udah ditejuka tepagang sereta keberuraan ba menua ti puang sereta jauh ari dunya luar enggau kampung asal endur sida ulih ngasu beburu lalu sida dibekalka pemakai rangkai ti kurang manah ke pengerai tubuh ari kompeni SEB.

Sama berebak enggau nya jaku kenang pasal kuasa karan ti meruan, ai ti beresi, atur sekula ke bala nembiak enggau perengka 'idup moden' ti disemayaka Torstein Sjotveit – badu agi ngenang nya. Semina penanggul aja ti pansut, taja pan tekat ai nya ngena timpuh betaun-taun endur ngaga – timpuh ti chukup lama endur mutarka semua penanggul.

Nick Wright ari menua Tasmania dibayar gaji ti mayuh bendar dikenan mutarka penanggul enggau betul, tang iya mengkang puntan.

Repot polis ti dikenataika raban bansa Penan udah bisi diayanka dalaam suratberita di menua Sarawak.

Ke bendar iya mayuh repot polis enggau serebana datai ari bala orang di Metalung enggau Tegulang kenyau ari beberapa minggu tauka bulan tu udah bekaul enggau bekal pemakai ti dianjung ngagai genturung pengentap penddiau ti baru nya.

Kami ngajar pasal chara ngeluarka pemakai

Penanggul nya udah ditejuka balat nyadi, nyentuk ke raban bansa Penan enda tau enda ngaga repot polis enggau pengari rayat sida, Liwan Lagang, tepejal ngambi tindak mantu raban bansa asal nya ngambi pemakai ari SEB.

Baka ni Torstein enggau Nick ulih tinduk jenak maya malam hari taja pan seduai sama nemu raban bansa asal tu ngerenchah pengidup ti mar seretaa keberuran?

Agi mayuh gambar aku begulai enggau bala nembiak ti bidik tu ti udah digaga aku – jaku ambi Torstein ti enda badu sereta nadai reti

Baka ni asai ati seduai enti anak enggau bini seduai nya tepagang ba tengah-tengah menua puang nganti penatai perengka pengangkut nganjung pemakai ngagai sida?

Ulih seduai iya meragam enti sida sebilik nya diburu ari menua asal sida lalu dientapka pendiau ba palan ti baru, ti puang, enda ulih disambungka ngaga endur bukai, semina ngena sebatang jalai ti enda manah?

Mayuh bendar dalih disebut, lalu kita tentu nemu belabaka, ke semua macham penanggul ti pansut ba palan pengentap pendiau baru ke bansa Penan.
Tang semua penanggul nya ulih disagam lalu SEB nadai nyediaka duit agih belanja ti chukup dikena napi ungkus ngaga projek tekat dikena nentuka pengelantang enggau pengelikun raban bansa Penan ba endur ti baru ti udah dikeluluka sida tau bulih mayuh penguntung enggau pemanah.

Kelulu SEB udah tebantai.

Lalu, berebak enggau maya perintah BN merambu deka ngaga mayuh agi tekat ngena atur pengawa ti sama baka Bakun enggau Murum (digaga dulu, lalu udah nya mansutka asil pensik empas projek ba rampa menua enggau social) sida enda ulih tekenyit enggau bantah ti betambah ari raban bansa asal ti diatu nyau majak enda agi arapka tuju sida nya.

Malaysia Menua Asia Ti Bendar!

Posted: 30 Jun 2014 02:54 AM PDT

Ditangkap – Natalie ditanka polis ketegal bisi enggau orang ngayanka pengeringat mantah penumbuh kilang Lynas

Atur nangkap Natalie Lowrey, siku peranak menua Australia mai reti ti enda manah ke rambai jaku ngelakuka menua Malaysia dalam dagang temuai.

Pengawa ngelakuka dagang temuai nya patut dikena narit bala temuai ari menua bukai nemuai ke Malaysia laban Malaysia dikumbai sebengkah menua di Asia ti manah sereta mentas enggau bala temuai, tang Natalie ngasaika pekara nya tekalih.

Natalie nya siku ari 15 iku orang ti udah ditangkap ketegal ngambi bagi dalam pengawa ngayanka bantah ba luar kilang Lynas, lalu iya ngasaika diri kena chiping raban polis Malaysia.

Diatu sida muka kes nya ngelaban iya siku, ti disadang deka ngujungka iya kena tutup dalam pengelama dua taun dalam rumah jil di Malaysia.

Ba siku indu bebansa Australia gaya dalam rumah jil nya enda manah ke pengerai iya, baka ti kala diserebanaka orang Malaysia empu tang enda lalu diputarka, lalu sistem penan tubuh iya disadang enda ulih tapi iya. Iya mega enda besedia betunga enggau perintah Malaysia ti enda rinduka orang ari menua bukai, laban ba menua iya empu orang ti salah endang diberi kuasa pengelantang ti diungkupka ngagai iya.

Nasit Natalie enggau pengasai ati diau dalam rumah jil di Malaysia mai reti ti baru ngagai rambai jaku 'Malaysia Truly Asia (Malaysia Menua Asia Ti bendar)' ngagai sapa-sapa temuai, ti suai dikangauka nemuai.

Enti sida udah datai enggau selamat (ngena penerebai bilun Malaysia Airlines) diatu sida patut 'bebasaka raban penerit undang-undang' Malaysia, laban enti sida ditangkap, sida deka dichiping ari orang salah ti bukai.

Tu gambar dikena ngelakuka menua ngagai bala temuai – tang baka ku gaya ti bendar?

Dalam sebengkah penerang sida kemari, raban NGO Suaram balat ngutuk undang-undang ti dikena nangkap Natalie, tang rayat Malaysia ti sama kena tangkap udah dilepaska baru.

Natalie udah dichiping ketegal iya ti 'orang ari menua bukai' ba undang-undang ti baru ti ngengkahka kuasa pengelantang orang ari menua bukai nya baruh agi ari kuasa pengelantang rayat Malaysia empu ti enda senutuk enggau Kuasa Pengelantang Mensia dalam Penetap Sedunya.

Iya udah dichiping, ngena undang-undang nagang pemasuk orang ari menua bukai, munyi ti disebut raban NGO Suaram. Iya udah ditanka ngena undang-undang baru ti nagang orang begelumu tauka ngayanka bantah ba sebengkah menua ti seruran ngumbai diri ngena atur demokrasi penuh.

Enti sema nuan nyau tepawah tama dalam raban orang ti benung ngayanka bantah ba sebelah jalai, lebuh nuan benung bebelika barang lalu nuan deka ditangkap enggau enda didawa.

Rayat Malaysia dikutuk laban mantah nama kebuah kompeni ari Australia nirika kilang sida di Malaysia lalu ukai di menua sida empu …

Natalie endang nemu pengawa bantah ti dikereja iya nya ukai pengawa kasar tauka jai, ba sebuah menua ti ngumbai diri mentas sereta tinggi daya idup, udah ngumbai diri mantah kilang ari menua iya empu, Australia, laban dikumbai ngamahka rampa menua sereta nanggul pengerai mensia mayuh.

Enda mayuh orang ari menua bukai ti sinu ke nasit Natalie ti ngayanka pengirau ati iya. Lebuh iya ditangkap iya benung duduk ba tisi jalai.

Polis London ngintu bala orang ti begelumu bebala mayuh Bersih – lalu nyaga sida ngambika enda kena penusah ba jalai alun!

Enda sebaka enggau atur dikena ba Natalie, seraban rayat Malaysia ti ngayanka bantah diri ba gelumu Bersih di nengeri London enggau di Australia, udah dijaga polis di menua nya, ukai ningaka tengik bala polis ti kasar baka di Malaysia.

Sida dikemendarka rauh-rauh ngena perengka dikena bejaku, lalu nadai siku sida kena tangkap tauka kena perinsaka orang ti bekuasa di menua ti endur sida ngayanka bantah nya.

Bala polis ti datai di endur nya semina nentuka sida nya begelumu enggau manah lalu mega nentuka sida enda medis diri laban arus pejalai kerita ba jalai alun.

Tang nadai emba dikereja. Emba semina datai ari opis pengari menua Malaysia ti nangkan rayat iya empu awakka enda 'ngelaban' perintah BN.
Tu laban kuasa angkat lalu ngayan bantah nya endang kuasa pengelantang mensia lalu menua Malaysia patut ditangkan laban iya sama enggau nanggam sempekat bebasaka kuasa pengelantang mensia sedunya.

Beberapa hari ti udah tu Menteri Besai Malaysia, Najib Razak, udah nangkan kaban parti iya UMNO ngambika berani sereta kempang ati baka raban militant ISIS, iya sebengkah raban soldadu penyelawai ti benung ngelaban undang-undang di menua Timur Tengah.

Jaku ari ati Najib nya ngasuh mayuh orang tekenyit laban dipansutka ba menua ti chelap baka Malaysia.

Nagang Bup Kudus dikerebaika – diansak ngena penemu politik ti udu nyiping sereta nyukung pengawa militant soldadu penyelawai ba sebuah menua ti chukup manah dulu suba

Atur nangkap Natalie nya ngayanka pengeruntuh undang-undang di Malaysia.

Sebengkah menua ti dulu suba ngembuan institusyen perintah ti tegap sereta tau diandalka ba atur polis enggau undang-undang, diatu dipeda enda teatur agi.
Kebuah pia laban atur perintah besai ti diatu dipegai BN udah ngelepaska beberapa bengkah undang-undang, ba gaya pengarap ti fanatik enggau 'pemesai kuasa bansa Melayu' ti seruran nguji ngerembaika chura kuasa enggau undang-undang syariah besai agi ari kuasa kot sivil.

Raban ti ditumbuhka nya bisi ditemu bulih belajna ari perintah BN, ti udah ngena semua peluang dikena ngepunka penyarut entara pupu bansa enggau pemenchi ngagai munsuh politik lalu seruran besemaya deka ngena penemu kasar ti enda tau dikereja sida terang-terang.

Bisi analogi Hitler ti ngasuh ati irau: raban bepenemu lunggar baka Perkasa enggai ISMA nya ditemu nyadika soldadu penyelawai diupah Najib. Sida nya diupah iya ngambika ngereja pengawa kamah ke iya dikena napi raban parti penyakal ti kala udah mujur bulih undi majoriti ba pengawa bepilihbesai ti dudi tu tadi.

Sarawak Report bisi diterangka pasal raban bepenemu lunggar baka ISMA bulih sukung belanja bepuluh juta ringgit terus ari opis Menteri Besai.

Dulu ari tu raban Perkasa udah bisi ngaku sida bulih sukung belanja ari duit agih perintah lalu diatu kami deka ninga penerang ari ISMA enggau mega ari perintah ngambika ngamatka tauka bebula, madahka ISMA nya bulih sukung belanja ti sebaka.

Enti enda baka nya, baka ni raban nya ulih ngatur pejalai sida ngagai menua luar?

Malaysia udah sama enggau nanggam Penetap Entarabansa Kuasa Pengelantang Mensia, tang menua Malaysia mengkang tepuruk dalam penyaru runding enggau atur gaya apek bayat ti dipelanja perintah, lalu kuasa pengelantang mensia udah enda dikibuhka.

Raban orang indu udah dirampas ari pengerami nikah sida, bangkai orang ti udah mati dirampas lebuh orang benung nyenggai sida, bala anak udah diambi ari apai indai sida, Bup Kudus dirampas ari orang ti patut beempu iya – semua nya dikereja laban dikena 'ngemetulka' atur jalai pengarap.

Lalu, atur ti diberika ngagai Natalie Lowrey nya udah meri chunto bechiping ti diasaika rayat Malaysia empu, ti endur bala pemerintah ngasika diri enda selamat lebuh napi bala penyakal.

Najib Razak dipeda enda ulih ngena rambai jaku 'Malaysia Truly Asia (Malaysia Menua Asia Ti bendar)' ba mata dunya.

Keruga Raban Mafia Kayu Batang Sarawak Ngerembai ke Serata Dunya

Posted: 30 Jun 2014 02:46 AM PDT

Asil kayu batang di menua Papua New Guinea ti dianjung ke menua Australia

Sarawak Report udah bejalaika sebuah pansik ba rampa ti besai bekaul enggau pengawa raban apek bayat mafia kayu batang ari menua Sarawak lalu kami ulih mantaika jarin kaul kompeni kayu batang ti udah ngeruga teda kampung ba dunya tu.

Keruga ti nyelai ti suah dikereja kompeni kayu batang ti besai- besai ari Sarawak tu nya bepun ari sistem dagang ti dikemendarka perintah Taib sebilik ti ngemasukka untung ari pengawa ngulihka kayu batang ke dalam genggam sekeda kompeni ti dipilih.
Bisi 6 buah kompeni ngulihka kayu batang ti ditemu,iya nya Samling, Rimbunan Hijau, WTK, KTS, Shin Yang enggau Ta Ann lalu ke semua kompeni nya bekaul rapat bendar enggau Abdul Taib Bin Mahmud empu sereta mega enggau sida sebilik.

Bepun ari untung ti mayuh bendar ari pengawa ngulihka kayu batang ti ulih dalam taun-taun 1980 – 90 suba, kompeni-kompeni tu ulih ngerembaika pengawa sida ngagai rampa kampung di endur bukai, ngena chara makai suap baka ti suah dikereja sida di menua Sarawak. Tu nyengkaum nyuap bala orang politik ba siti-siti endur; ngena pengasar ba orang bansa asal lalu mega ngelipakka undang-undang bekaul enggau pengawa ngulihka kayu batang.

Kompeni-kompeni besai ari menua Sarawak tu suah dituduh ngena chara kasar baka ti belabuh dikereja sida di menua-menua Amerika Latin, nengah Congo nyentuk ke Timur Jauh Kalimantan, Tasmanisa enggau Papua New Guinea (PNG).

Bala orang bansa asal ti ngelaban projek kebun dandang besai sawit di Long Teran Kanan, Sarawak

Di menua Sarawak empu, beribu iku orang bansa asal udah ngaga mayuh repot polis, serebana ngagai perintah menua tauka nganjung fail kes ngagai kot dikena ngelaban kompeni-kompeni nya ti bekaul enggau pengawa ngulihka kayu batang sereta muka kebun dandang besai.

Mayuh ari kes nya udah enda dikibuhka opis-opis perintah ti bekuasa lalu bala orang bansa asal enggau bala lawyer kuasa pengelantang mensia udah becharaka kes sida nya nengah sistem undang-undang ti balat betegal.

Diatu kompeni-kompeni tu bejalaika pengawa sida ngena chara ti sebaka dini-dini enda ti ulih pasuk sida di sebelah dunya tu, berampaska kampung enggau tanah lalu ngemba bala orang bansa asal siti-siti menua ti dikeruga sida.

Kompeni-kompeni ari menua Malaysia nya dipeda enda bebasa ke undang-undang, kuasa pengelantang mensia tauka rampa menua.

Kompeni Rimbunan Hijau, ti dikemataka siku orang kaya ari menua Sibu, Sarawak ti enda kroni Taib, Tiong Hiew King (menyadi siku kaban MP dalam kabinet perintah besai Malaysia), udah ditemu salah raban agensi rampa menua di Brazil laban ngaga kayu ramu enda beradat lalu udah dipansik Lawyer Perintah laban pengawa iya ba dagang kayu kampung enda beradat.

Kompeni ti sama mega kala diukum laban ngelanggar atur rampa menua di Soukpal, Russia lalu mega di pulau Vanuatu lalu dituduh ngereka kampung enggau nyediaka endur diau ti enda meruan ke bala anak kuli sida di gerempung Pulau Solomon.

Gerempung Pulau Solomon – udah balat dikeruga kompeni-kompeni ari Sarawak, baka Rimbunan Hijau

Pia mega, kompeni Samling ti dikemataka siku agi kroni kaya ke Taib, Yaw Teck Seng, udah napi kutuk komuniti entarabansa laban ditemu ngerusak rampa menua sereta berampaska kandang menua baka di Guyana di Amerika Selatan, Kemboja enggau PNG.
Ba taun 2012, kompeni ti bisi bekaul enggau Samling udah dibantaika laban ngerampas nyentuk ke lebih sebagi ari empat bagi rampa kampung pemadu besai di menua Liberia.

Bakih dagang sida ti sama bisi kaul dala skandal ngeruga kampung nya, sama bela ditemu ngelanggar undang-undang ngeluarka pemendar ngulihka kayu kampung ari orang bansa asal, nya petunggal Taib empu, Hamed Sepawi, ti ngembuan rekod ketegal kala ngeruga kampung nyadika orang pemegai syer pemadu besai dalam kompeni Ta Ann di Sarawak lalu mayuh agi dagang kunsi enggau pengawa kebun dandang besai sawit.

Ba bulan Satu taun 2013 tu tadi gempung kompeni Samling/Hamed Sepawi udah diburu pansut ari menua Liberia nengah atur ari Presiden Ellen Johnson Sirleaf.

Kompeni Samling nya dikaitka enggau Kepala Menteri Sarawak ke dulu suba, ti mangku pengawa Gabenor Sarawak ti baru, Abdul Taib Mahmud. Petunggal Taib, ti nyadika proksi dagang iya pemadu tebilang, Hamed Sepawi nya siku pemegai syer pemadu mayuh dalam Samling, lalu mega enggau dukun iya, Ahmad Bin Haji Su'ut.

Minggat Anak Nyakin – udah balat bendar kena jamah sereta dichekal bala apek bayat dalam taun 2012

Sarawk Report bepenemu madah ke diatu udah datai ba maya endur komuniti entarabansa patut mutarka keruga enggau emba ti dikereja raban apek bayat mafia kayu batang Sarawak, ukai semina bekaul enggau pengerusak rampa menua, tang empas pengawa sida nya ngagai orang bansa asal.

Kompeni-kompeni kayu batang di Sarawak endang ditemu ngupah bala apek bayat dikena ngemba orang bansa asal ti nguji ngetanka tanah pesaka sida empu.
Pengawa bala apek bayat ulih ngerembai di Sarawak laban endang enda ditusui ditusui dalam media di menua nya, ditambahka mega enggau pengenggai opis ti bekuasa ngambi tindak.

Diatu ukai utai ti nyelai ba orang bansa asal enti sida meda lori besai ngundan raban apek bayat tama ngagai kampung di menua sida lalu ngeruga sereta ngemba sida ngena duku enggau senapang.

Dalam taun 2012 kami kala nuliska berita pasal baka ni Minggat Anak Nyakin, enggau anak lelaki iya, Juan Anak Minggat, udah dijamah datai ke setengah nyawa dikereja bala bala apek bayat ti ngajar seduai menyanak nya laban mantah pengawa ngeruga sereta ngerusak kampung enggau tanah pesaka sida ari kena pasuk bala tukang tumbang.

Ba taun nyin kemari nyau datai ba gintir bala orang bansa asal di Melikin, nyengkaum Surik Anak Muntai, ti kena jamah datai ke setengah nyawa, lalu ba minggu tu tadi bisi gambar dipansutka bekaul enggau keruga bala apek bayat atas orang bansa asal ba empang jalai nuju Tekat Baram.

Surik Anak Muntai – kena jamah raban apek bayat lebuh iya ngambi anak iya ari sekula – nyadika siku ari tuai ti ngelaban pengawa orang ngulihka kayu batang di Melikin, Sarawak

Penyarut nya udah diayanka dalam repot Komiti Kuasa Pengelantang Mensia Malaysia (SUHAKAM) dalam taun 2011.

Tang enda mukai-mukai repot nya enda dikeluarka ngambika dikena nutup malu sekeda orang tauka opis perintah ti bekuasa.

Diatu, di menua PNG, kompeni kayu batang WTK udah ditemu ngena chara keruga enggau beduan ti sama ba orang bansaa asal.

Sebuah repot dari gerempung Oxfam ti dikeluarka dalam bulan Empat taunt u, ti nusui pasal bala orang bansa asal di pelilih Terubu, Kandang Timur Sepik beserebanaka diri kena keduan kompeni WTK
Baka nya mega, kompeni Rimbunan Hijau ari menua Sarawak endang amu ngerusak kandang rampa kampung ti besai sereta ngelanggar kuasa pengelantang mensia di Malaysia lalu pia mega di Gabong, Guinea Ekuatorial, Vanuatu, Indonesia, New Zealand enggau Russia.

Sida nguasa pengawa dagang kayu batang di PNG lalu kompeni nya udah dituduh bisi ngupah raban polis di Barat Pomio, di Pulau New Britain dikena nngeruga orang bansa asal ti angkat deka ngelaban. Bala orang bansa asal madahka raban polis sida endang diupah Rimbunan Hijau.

Bekejang mudik ke Baram – bala raban apek bayat u diambi gambar maya sida deka bekejang napi orang bansa asal ti benung nirika empang jalai di Baram

Lina Gawai ari genturung orang bansa asal Bumbu, PNG, benung begambar bediri atas tembawai rumah iya sebedau ti dirubuhka Rimbunan Hijau ti udah nya lalu muu sida pansut ari menua asal sida

Tu siti ari chara dikena atas orang bansa asaal Sarawak ti udah dipelajarka bala tauke kompeni kayu batang di Sarawak.
Beribu iku orang bansa asal Sarawak dipejal ninggalka menua asal sida endur sida meri awak ke projek ngaga tekat hidro ti besai-besai ti disadang meri penguntung ngagai sida Taib sebilik enggau baa kroni sida.

Semina ba minggu tu SUHAKAM bisi udah nemuai ngusung orang bansa asal ti udah dientapka ba palan pengentap pendiau ti baru di Murum lalu ngayanka gaya idup ti merinsa ditagaka ngagai sida.

Mayuh ari bala orang bansa asaal ti dituntung penanggul laban projek tekat Bakun udah ngaga rumah jelatung ba sebelah tebing sungai laban sida udah putus pengarap enggau gaya pengidup ba palan ti baru disediaka. Mayuh orang bansa asal beserebanaaka pasal pakej pampas ti bechiping, tauka benung nganti diri dibayar pampas.
Baka nya mega, dalam bulan Empat taunt u, kompeni Rimbunan Hijau udah diperesa komuniti entarabansa ketegal ti muru orang bansa asal ngagai palan pengentap pendiau di pelilih Bumbu di Lae, PNG.

Orang bansa asal nya diatru benung ngentap pendiau ba dunju arau udah bekau sida diburu pansut ninggalka menua asal ti udah diuan sida 40 – 50 taun tu udah. Sebuah kes dalam kot udah dibuka dikena perintah PNG ngelaban Rimbunan Hijau enggau Kompeni Asil Kayu PNG.

Taja pan Perintah Malaysia udah bebendar ngemetulka penerang bekaul enggau kuasa pengelantang mensia ba Aum Gerempung Bansa bekaul enggau Atur Ngemunaska Pengawa Nyiping Raban Orang Indu (CEDAW) enggau Kuasa Nembiak (CRC), Perintah udah puntan mutarka pengirau ati bekaul enggau keruga ba kuasa pengelantang orang indu enggau nembiak mit di Sarawak.

Raban bansa Penan Sarawak udah ngenataika serebana sida ti dalam beberapa taunt u sida sebilik dikeduan bala kuli kayu batang

Kes masung orang indu ti besistematik udah suah dikereja bala kuli kayu batang ba raban orang indu Penan di Sarawak, tang perintah Sarawak lalu enda ngambi tindak ngintu sida tauka bejalaika pansik ti betul.

Dalam sebengkah jaku randau stesyen BBC dalam taun 2009, sida menteri Jamess Masing kala ngumbai raban bansa Penan nya raban "ti landik nempa ensera".

Kompeni-kompeni kayu batang ari menua Sarawak udah nunjukka pengurang sida sinu ke orang bukai taja pan sida bekereja di menua bukai di sebelah dunya tu.

Sebuah wayang 2011 ti digaga David Fedela nguji ngusaika pengawa ngeruga rampa menua enggau sistem kaul mensia ti udah balat rusak sereta tebunsa dikereja kompeni kunsi enggau WTK, iya nya Vanimo Forest Products enggau Amanab Forest Limited di pelilih Sanduan, PNG.

WTK bisi pasar besai, sebuah rumah hotel enggau injin judi enggau sebuah palan kayu batang. Sida bekuasa atas pejalai kapal enggau bekal minyak perengka pengangkut, lalu kompeni Rimbunan Hijau nguasa sebuah ari dua buah palan pengeluar suratberita.

Bala tukan kayu ari Malaysia beduan raban orang indu bansa asal

Nitihka sebengkah repot, mayuh indu ti biak-biak ari orang bansa asal dipejal nyual tubuh diri ngagai bala tukang tumbang ngambi sida ulih terus idup lalu mayuh sida nya enda ulih nyengulaka anak.

Tu meh maya dunya patut dani lalu meda ulah enggau pengawa jai bala tukang tumbang ari Sarawak enggau agih belanja ti besai dikena nganjung sida nya tama ngagai pendiau orang bansa asal ti enda bidik nya. Pengerangka sida nya udah ngelui lalu ngelekai ngagai kampung di menua Australia enggau Tasmania.

Hamed Sepawi, petunggal enggau mega proksi dagang ke Taib, udah bejalaika tanggungpengawa iya enggau manah dalam pejalai politik menua Sarawak lalu udah mega nyungkak pengeringat orang mayuh enggau kaul iya dalam atur politik ti ngemendarka kompeni iya, Ta Ann, bekerugaka rampa kampung ti besai bendar taja pan udah ditagaka dijaga, ngambika enda puri sereta punas.
Makai suap nya main iya, lalu empas ari pengawa nya suah agi jai dipeda.

Meri Malu Bendar!

Meri Malu Bendar!

Recent Comments

Archive