“Red Granite Ukai Diarika Kami Agi” – Kes “Nipu” Udah Tembu!

Posted: 24 Jul 2014 06:51 AM PDT

Wayang baru dikeluarka kompeni Red Granite Pictures enggi Riza Aziz

Bala orang di menua Hollywood udah dipadahka pasal kes bechara ke penudi entara kompeni Red Granite Pictures enggi anak tiri Najib Razak, Riza Aziz enggau bala pengeluar asal wayang sida 'Dumb and Dumber To'.

Mayuh bendar penerang ti enda terang ari kedua piak, tang Sarawak Report ulih nerangka enggau silik pasal penembu kes tu, sekumbang Riza Aziz enggau kompeni iya napi tuduh "nipu".

Kami ulih mantaika penerang madahka sepemanjai kes nya dipecharaka dalam kot, berebak enggau kompeni ti ngarika Red Granite dibuai ari kes nya, lalu besenutuk enggau nya mega kompeni ngemataka pekara belanja udah matak diri ari ngarika kompeni Red Granite.

Betimbal enggau nya jaku emba enggau keremba ari Red Granite ti deka nyaman Sarawak Report dalam kot lalu bedau nyadi nyata.

Nama Riza Aziz (kanan) niki tinggi di Hollywood, mangku pengawa nyadi pengeluar wayang

Bala pengeluar wayang baka sida Steve Stabler enggau Brad Krevoy, ti udah mutarka kes nya enggau Red Granite ba minggu nyin kemari, nya endang raban penempa wayang Dumb and Dumber ba tengan taun-taun 1990 suba ti dikeluluka Jim Carey enggau Jeff Daniels.

Dua iku pengelulu nya udah ringan ke pengawa kompeni Red Granite ti nguji deka muai nama seduaai ari rintai sekuel kredit lalu enda mayar pampas kuasa penempa asil kereja ngagai seduai.

Seduai iya nuduh Riza Aziz enggau bakih iya Joey McFarland nya orang baru dalam dunya wayaang di Hollywood, ti bisi akses bulih belanja ti mayuh dikena meli projek ngaga wayang, taja pan nadai ngembuan penemu enggau pengelandik ba pengawa nya.

Riza Aziz nya siku orang ti rindu ke pengawa berami lebih agi ti dipelanja bakih dagang iya, orang kaya , Jho Low, udah narit ati bala orang mayuh di Malaysia, ti endur seduai dikumbai bekaul enggau salah guna duit menua.
Ba bulan Mach tu tadi nengeri Hollywood udah dikenyitka lebuh Stabler enggau Krevoy ngubah peminta seduai nuduh Red Granite enggau bala pengempu iya (nyengkaum Riza Aziz ti anak tiri Najib Razak) bulih duit ari pengawa "nipu".

Pemutus runding runding ngubah dawa nya disungkak di Malaysia ti madahka kompeni nya bisi bekaul enggau pemansut duit belanja beratus juta ringgit dikena melanja projek ngeluarka wayang ti balat dikejakuka orang mayuh, Wolf of Wall Street.

Channing Johnson – bakih dagang dalaam kompeni bala lawyer Loeb & Loeb udah ringat ke dawa nya, tang udah nya mataak diri udah bekau bini iya diberi surat sabpina ari kot

Ba pechara minggu nyin kemari kot udah ngemendarka utai ti dipinta Stabler enggau Krevoy – seduai iya udah diberi basa nyadika pengeluar eksekutof ke wayang nya.

Seduai iya udah diberi bayar pampas kuasa penempa ke wayang nya, ti udah dipelakangka Red Granite.
Dawa ngagai seduai udah dibatak lalu seduai mega udah maatak dawa ba Red Granite, ti deka didinga dalam kot Los Angeles bulan nyin ila.

Seduai nadai kena tindak tauka ukum ketegal ngaga dawa nya, baka nya mega emba enggau keremba Red Granite ngagai Sarawak Report ti nuduh Red Granite nya nerima "duit belanja kamah".

Orang diri sebilik ti nanggung pengerugi besai bekaul enggau kes tu nya orang diri melaki bini di Hollywood – Channing enggau Debra Johnson.

Channing Johnson nya bakih dagang dalam kompeni lawyer Loeb & Loeb di Hollywood, ti udah dikorporatka lalu ngarika kompeni Red Granite, lalu kelimpah ari nya bini iya Debra Johnson bekereja nyadi penyanding atur dagang enggau reta daalam kompeni besai NKSFB ti mega nyadi Pengarah Urusan nyentuk ngagai pun taun tu.

Riza Aziz nya orang ti direjista bempu Red Granite lalu Loeb & Loeb udah dikorporatka lalu ngarika kompeni nya

Debra Johnson – diatu nadai agi bekereja dalam NKSFB

Sarawak Report udah diterangka pasal laya i nyadi dalam opis bala lawyer ti ngarika Stabler enggau Krevoy ba bulan April nyin kemari, udah sida ngeluarka dawa nipu nya.

Nyadika timbal Stabler enggau Krevoy udah ngeluarka surat sabpina dikena minta rekod pekara belanja ti dipegai Debra Johnson, bekaul enggaiu pengawa iya nyadi pengurus pekara belanja Red Granite ba kompeni NKSFB. Ba kes nya Channing Johnson udah diganti siku lawyer tebilang di Hollywood, Patricia Glaser ari kompeni seraban lawyer Glaser Weil Fink Jacobs Howard Avchen & Shapiro.

Tu meri kelai ke niat dikena bedawaka penyalah nipu, tang berita angin madahka Glaser deka mutarka kes nya di luar kot.

Putar pechara nya ngena timpuh beminggu-minggu, tang enti Glaser terus matak pulai jaku dawa atas Stabler enggau Krevoy, Red Granite tentu enda bidik.
Sama baka Sarawak Report, Stabler enggau Krevoy mengkang bepegai ba penetap sida lalu enda mudah deka matak penerang sida; sida udah matak pulai kes nya udah peminta sida dikenataika.

Berebak enggau nya, kami ulih mantaika nya ba bulan baru nyin ila Debra Johnson deka badu mangku pengawa iya dalam NKSFB, ti endur iya ditemu kala ngemataka pekara kira-kira enggi Red Granite!

Red Granite diarika Debra Johnson ari NKSFB, udah bekau kompeni nya diporporatka kompeni lawyer enggi lawyer iya

Siti jaku randau nengah telefon enggau kompeni NKSFB di Los Angeles udah ngamatka diri badu mangku pengawa Debra nyadi Pengarah Urusan.

Sarawak Report mega bisi bulih penerang ti madahka tindak nya diambi udah bekau penyarut enggau siku ari bakih dagang sida, udah bekau mayuh jaku dawa nipu ba Red Granite.

Taja pan baka nya, pansik kami tetemuka Debra udah begempung enggau klien iya numbuhka sebuah kompeni ti baru.

Kena 10 haribulan Aril, lebuh jaku dawa nipu datai ba raban media enggau suratberita, sebuah kompeni pengurusan udah dikorporatka di nengeri California, diberi nama Metropolis IX Capital Advisors.

Kompeni Metropolis udah direjista ngena alamt sebaka enggau alamat opis Debra ke dulu suba, NKSFB lalu kena 1 haribulan Julai iya mansutka penerang madahka iya udah diterima nyadika Kepala Pegawai Operasyen dalam kompeni ti baru nya udah iya ninggalka kompeni NKSFB.

Sapa di belakang kompeni Metropolis, tauka bisi tauka nadai orang bukai diupah kompeni baru ti ngemaruhka diri?

Enda tentu terang sapa orang bukai sama enggau Debra bekereja dalam kompeni Metropolis tauka enti opis nya bepalan ba rumah opis ti sama enggau NKSFB.

Debra Johnson

Taja pan baka nya Debra bisi ditemu kala nyereta Riza Aziz ke nengeri London bejalaika pengawa dagang lalu bala bakih dagang iya ti dulu suba ngamatka Debra nya engka ulih dikangauka ngena telefon opis Red Granite.

Sarawak Report deka nemu enti kompeni Metropolis nya udah ditumbuhka Debra Kediri, ngambika mutarka pekara belanja enggau reta pengaya enggi Riza Aziz enggau kompeni iya Red Granite.

Taja baka gaya pengujung iya, engka Debra enggau laki Channing Johnson nyadika orang ti enda bidik.

“Red Granite Ukai Diarika Kami Agi” – Kes “Nipu” Udah Tembu!

“Red Granite Ukai Diarika Kami Agi” – Kes “Nipu” Udah Tembu!

Recent Comments

Archive