» »Unlabelled » Anang ngemesaika penyarut ti mit, ku Jabu BorneoPost Online | Borneo , Malaysia, Sarawak Daily News » Berita Iban - New 2 Borneo

05:04:00

Anang ngemesaika penyarut ti mit, ku Jabu BorneoPost Online | Borneo , Malaysia, Sarawak Daily News » Berita Iban - New 2 Borneo

Anang ngemesaika penyarut ti mit, ku Jabu

Posted: 06 Jul 2014 09:06 AM PDT

Enti kitai majak bekelikuh, ulah nya ukai semina ngemediska diri tang tau ngujungka penanggul ba politik

Dikarang Judan Bungap //

SIBU: Ketuai parti politik lebih agi bansa Iban dipinta ngetu bekelikuhka pekara ti mit laban enti enda nya tau nyadi besai lalu ngujungka ukai semina ngemediska diri empu tang mai penang­gul ba politik.

Sapit Kepala Menteri Datuk Patinggi Tan Sri Al­fred Jabu Numpang madah, ulah begempung enggau pan­gan diri tau nyaup ngeringka parti lalu ulih mujur ngereja pengawa ke mai penguntung ngagai rayat.

"Umbas kitai bebekelikuh ba politik laban nya tau nge­mediska diri empu.

"Manah agi kitai begem­pung, sepenemu, begulai, sejalai laban parti ti kering ngemuntangka semua pen­gawa ke tau nguntungka rayat," ku iya.

Jabu mantaika jaku tu maya bejadika Pengerami Ngiling Bidai 2014 Gerempung Bansa Dayak Sarawak (SDNU) Pampang Sibu ba sebengkah hotel tebilang ditu, lemai kilah ensana.

Pengerami nya bela digulu ex-Panglima Infrantri 9 Briged Brigadier General Datuk Stephen Mundaw eng­gau bini iya Datin Jacqueline Perish, Sekretari Politik Kepala Menteri Thomas Romeo Tegong, Jefferson Jamit Unyat enggau Andrew Shilling Bangit, Residen Sa­rikei Dahim Nadot, Pemesai Opis Pemansang Asil Penge­landik Jari Sarawak Fuad Arffin, Chairman SDNU Sibu ti mega Chairman Komiti Pengerami Tengku Gruna, Chairperson Serakup Indu Dayak Sarawak (SIDS) Pam­pang Sibu Ir Alice Jawan.

Berebak enggau tu mega Jabu madah, resolusyen bekaul enggau kod tanah­tanah pesaka (NCR) asil ari gempung runding maya Simposium Adat Iban ke diatur di Sibu enggau Aum Tuai Raban Bansa Iban di Kapit taun seiti suba deka dipejurai ba Aum Kunsil Nengeri bulan November taun tu.

Ku iya madah, asil ari dua bengkah program nya tau bendar ngujungka tuai raban bansa Iban ngasuh perintah nyerenih sereta ngubah atur NCR awak ke manah agi udah tu ila.

"Tu ari sukung enggau runding penemu ke manah ari rayat ditampung bala tuai-tuai raban bansa Iban lalu dibai ngagai perintah.

"Perintah enda ngudah ke kitai pia aja tang besemaya deka ngatur sereta ngenegap­ka agi kod tanah NCR kitai," ku iya madahka baru.

Kelimpah ari nya, Jabu mega ngelalau bala sida ke indu lebih agi bansa Iban ngambika rindu ngajar anak diri betenun tauka ngereja asil pengelandik jari ke bukai.

Nya alai ku iya, kenyau beberapa taun ke udah iya bisi ngungkup puku dikena ngatur pekit Pua Kumbu.

"Ari pekit tu, aku ngarapka bala sida ke indu ulih ngem­bing anak diri betenunka Pua Kumbu ngambika pengawa lama tu enda punas pia aja," ku iya sambil madah deka ngungkupka belanja dikena ngatur pekit nya taun ti deka datai.

Jabu mega maya tu ngela­lau bala apai indai bebendar ngemansangka pelajar anak ba sekula.

Iya ngarap bala apai indai anang mantul nyengulaka anak nyentuk ke mujur ba tikas pemadu tinggi.

Ba pengerami ke digulu urung 800 iku mensia ti disempulang enggau ma­cham bengkah program baka miring, bebiau enggau bepantun.

Kelimpah ari nya bala ke bisi datai mega diperin­dang enggau ajat ari SIDS Pampang Sibu, mandangka kuntau ari Kelab Kuntau Lang Nginau SDNU Pam­pang Sibu ti betuaika guro Radin Tubu, muka kujok, ajat mas, tikit benasit enggau ke penudi ngiling tikai.

Maya pengerami tu mega Jabu dipebasa nyuaka perais mata duit enggau trofi nga­gai bala ke menang ba pekit ngukir terabai.

Gelar champian ba pekit tu diempu Malang Jabu lalu ditangkan Anthony Sian ba penuduk lumur dua enggau Clement Enggong ngempu penuduk lumur tiga.

Print Friendly

Lo: MPP ngembuan kaul ke tegap begulai enggau genap raban bansa

Posted: 06 Jul 2014 09:04 AM PDT

KUCHING: Opis Kunsil Kandang Bandar Padawan (MPP) nadai penanggul ngatur kerejasama enggau komuniti ba tiap genturung pendiau maya ngatur program tauka pengawa ti ngaul semua.

Ngemujur juluk nya, Chair­man Lo Khere Chiang meri semaya deka bebendar agi gawa lalu nguji deka mai pemansang ngagai komuniti.

Berindik ari nya, iya ngarap rayat kelebih agi ke diau ba genturung pendiau ke dikuasa MPP meri sukung ngagai raban opis kunsil ke dibungkur perin­tah Barisan Nasional (BN).

"Ba pengawa bepilih nengeri ke udah, kandang endur De­wan Undangan Negeri (DUN) Batu Kawa udah dirampas penyakal.

"Taja pia, ngarika opis kunsil ke megai tanggung pengawa ngintu pemaik kandang endur ke dikuasa MPP, pengawa ke dipangku deka majak dipe­jalai.

"Ketegal nya, ba pengawa bepilih ti deka datai, aku ngarap BN ulih ngerampas pulai penuduk nya ungkup pemaik enggau pengelantang rayat,"ku iya.

Iya mansutka jaku nya ba Pengerami Nutup Gawai Tematu 2014 enggau Bitanding Dayung Gawea Tematu 2014 malam ensanus.

Pengerami nya diatur di Balai Mayuh Guna 'Kelab Rekreasi Pengguna dan Pengurusan Dewan Serbaguna' Kampung Tematu ditu.

Ngenang sentang pengerami malam nya, Lo meri puji ketegal pemanah atur ke udah dipejalai raban pengatur pengawa.

'Pengerami ke baka tu ukai semina ulih ngenanka adat eng­gau main asal bansa Bidayuh tang mega tau ngedutka kaul entara pupu bansa di nengeri tu.

"Raban pengatur pengerami bisi merambu ngadu pengera­mi tu begulai tauka nengah kerejasama enggau MPP ba taun ke deka datai.

"Aku ke nyadi chairman MPP ngasai perambu nya chukup manah lalu MPP sedia ngadu kerejasama,"ku iya.

Pengerami malam nya bisi nerima sukung ari Menteri Pemansang Tanah ke udah meri RM2,000 lalu Senator Prof Dr. Sim Kui Hian meri RM1,000.

Print Friendly

Semua gerija Anglikan ngatur program Patronal Day kemari

Posted: 06 Jul 2014 09:03 AM PDT

SIBU: Komiti Indu Gerija Anglikan St.John Sibu udah mujur ngatur program Patronal Day renggat gerija nya ditu, pagi kemari.

Pengawa ti betuaika Pauline Lumus nya, disempulang 20 iku raban ke bukai tu diatur begulai enggau Reverend Father Peter Mandy enggau Deacon Doyle Lacasse.

Dulu agi ari nya, raban gerija besembiang mass dulu ti diuluka Reverend Father Peter Mandy.

Beserimbai enggau program nya, raban komiti indu enggau bala bukai makai beserumpu enggau pangan diri.

Program Patronal Day Parish Level tu bisi diintu ba semua gerija Anglikan di serata menua tu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Perintah BN seruran siru, enda bechiping beduaka pemansang

Posted: 06 Jul 2014 09:03 AM PDT

MIRI: Perintah Barisan Na­sional (BN) seruran siru ke rayat sereta enda bechiping nguntungka peranak menua ngambika bela ngasaika pe­mansang sekalika sida ke nguan mengeri tauka menua pesisir.

Sekretari politik Kepala Menteri Kijan Toynbee ma­dah, peranak menua pesisir nyengkaum bansa Dayak udah mayuh mangku pengawa besai ba opis perintah enggau kompeni luar nyerunyut pe­mansang ekonomi.

"Tu ngayanka perintah BN lurus sereta enda bechiping bejalaika pengawa mantu semua peranak menua nadai milih bansa tauka jalai pen­garap," ku iya lebuh bejadika pengerami Ngiling Tikai ke diatur Komiti Pemansang enggau Pengelikun Gentu­rung Pendiau (JKKK) Skim Pengentap Pendiau Stapok, Batu Kawa ditu ujung minggu tu tadi.

Bela bisi ngulu atur pengawa nya, chairman JKKK Skim Pengentap Pendiau Stapok, Ketuai Genturung Pendiau (KK) James Rangi entara se3keda ari urung 400 temuai enggau pengabang malam nya.

Nitih penerang ari Kijan, pengulih raban bansa Dayak dipeda ari penyakah diri seraya diembing perintah nengah program munaska penyeranta di serata nengeri tu.

Ku iya, bansa Dayak patut ngena genap peluang ke bisi besemekih enggau bansa bukai ba macham bengkah program latih sekalika di sekula tauka palan pematih pengelandik bukai seraya nyungkak penau kena napi peminta peluang pengawa.

"Aku pechaya perintah BN seruran siru ke rayat sereta deka bebendar nyaup peranak menua ngasaika pemansang," tandu iya ke ngarika Menteri Pemansang Rama, Tan Sri William Mawan Ikom ba atur pengawa nya seraya ngela­lau mensia mayuh nyukung pengari perintah ke diatu ngambika tau nyungkak tikas pengidup diri.

Sekeda ari pengawa ti bisi nyempulang malam nya, ajat, 'poco-poco', tiket benasit sereta ke bukai.

Print Friendly

Opis KGRI dedat endur peranak Indonesia ngundi presiden sida

Posted: 06 Jul 2014 09:03 AM PDT

KUCHING: Urung 2,000 iku peranak Indonesia di mengeri Kuching disadang bejalaika tanggung pengawa ngundi ba 'Pemilihan Umum' (PEMI­LU) Presiden Republik Ke-11 sehari tu (kemari).

Bepalan ba Opis Konsulat General Republik Indonesia (KGRI) ditu, Ketuai 'Panitia Pengawa Bepilih Luar Menua, (PPLN) Fathan Sutrisno ma­dah, pengawa nya berengkah ari pukul 9 pagi nyentuk ngagai 5 lemai.

"Naka pukul 11 pagi tu, urung 500 iku peranak In­donesia di mengeri Kuching udah bejalaika tanggungpen­gawa ngundi.

"Kitai nyadang entara 1,500 ngagai 2,000 iku orang ngundi deka muai undi milih presiden enggau sapit presiden,"ku iya lebuh dikerandau pemberita kemari.

Pengawa ngundi ke diadu kemari dipejalai nengah chara 'drop box' sereta sekeda mega ngundi di 'Tempat Pungutan Suara' (TPS).

Chara 'drop box, nyeng­kaum pengawa nganjung kere­tas undi ke diatur pengereja pengawa PEMILU Presiden Konsulat Jeneral Indonesia nuju palan endur peranak menua nya diau ke bisi minta tanggung pengawa sida dike­mujur nengah chara nya.

Pengawa ngira undi deka berengkah kena 9 nyentuk 14 Julai ke alai di Sarawak, sepenyampau 103,995 iku peranak Indonesia udah ngeri­jista nyadi pengundi.

Ngemujur pengawa nya kemari, opis Konsulat Indo­nesia bisi nyendia servis bas enda bebayar ba empat palan iya nya di Emart Matang, te­bing Sungai Kuching betunga enggau Parkson, Summer Mall (Samarahan) enggau Palan Bebeli Barang Giant (Tabuan).

Serak tu, Chalun presiden, Joko Widodo (Jokowi) ari Parti Demokrasi Indonesia-Perjuangan (PDI-P) deka besatup enggau Probowo Subianto, kala nyadi menantu Presiden Soeharto ke mega Ketuai Dewan Pembina Par­tai Gerakan Indonesia Raya (Gerindra).

Print Friendly

Kaban kunsil patut regas ngereja pengawa: Rayong

Posted: 06 Jul 2014 09:03 AM PDT

Anang semina ngeninggi diri ngena nama kaunsilor

ENGKILILI: Kaban Kunsil Nengeri (ADUN) Engkilili Dr Johnnical Rayong Ngipa ngelalau semua kaban kunsil opis bekuasa pelilih menua (PBT) ke udah dipadu nyadi kaunsilor baru seruran ransing sereta betanggungjawap bejalaika tanggung pengawa diri.

Iya madah, sida ke udah dipadu nyadi kaban kunsil baru patut regas mandangka pengeransing diri lebuh bejalaika tanggung pengawa ke diberi perintah.

Ku Rayong, seiku-seiku kaban kunsil ke udah dipadu patut bebendar ngedut kaul enggau orang bukai ngambika semua pengawa ulih dikereja enggau meruan.

"Genap kaban baru (kaunsilor) patut belajar ari orang udah teleba gawa awakka meri penyamai ngagai sida, lalu aku minta kaunsilor lama patut ngajar sida ke baru udah dipadu," ku iya rambau Pengawa Angkat Sumpah Nyadi Kaban Kunsil Opis Pelilih Menua Lubok Antu 2014-2015 iya nya Nyanu @ Nyanau Ramba ba Bilik Mesyuarat Majlis Daerah Lubok Antu ditu kemari.

Kelimpah ari nya, iya ngelalau semua kaunsilor ke baru dipadu chakah agi ngereja pengawa lalu anang semina ngeninggi diri ngena tanggung pengawa (nama kaunsilor) ke udah diberi perintah.

Iya madah, kaunsilor ke dipadu ukai dipilih sengapa tang laban sida udah bulih dikemendarka perintah bepelasarka sekeda pekara.

"Nya alai, kitai ngarapka udah tu sida ke dipadu nyadi kaban kunsil ulih bejalaika tanggung pengawa diri enggau manah kelimpah terus besaup enggau perintah ngemansangka nengeri tu," ku iya.

Bela bisi datai iya nya Pemesai Opis Pelilih Menua Lubok Antu Jack Aman Luat, Sekretari Opis Pelilih Menua Lubok Antu Ignatius Jinnie Bunyau enggau bala tuai raban bansa ba Sri Aman.

Print Friendly