» »Unlabelled » Masing: PRS minta diungkupka sitak baru BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Masing: PRS minta diungkupka sitak baru BorneoPost Online | Borneo , Malaysia, Sarawak Daily News » Berita Iban - New 2 Borneo

Masing: PRS minta diungkupka sitak baru

Posted: 05 Jul 2014 09:05 AM PDT

Kelebih agi dalam parlimen Ulu Rajang, Selangau, Batang Ai enggau Sri Aman

Dikarang Rengenyan Labang //

KUCHING: Dipelabaka bisi tiga tauka empat sitak Kunsil Nengeri (DUN) Sarawak deka ditambah dalam taun tu, nyema pengawa ngatur baru garis entara sitak DUN dipejalaika Komiti Pengawa Bepilih (SPR).

Presiden Parti Rakyat Sarawak (PRS), Tan Sri Datuk Amar James Jemut Masing ngarap, ari pemayuh sitak DUN baru nya ila bisi diungkupka ngagai parti iya kelebih agi ba sitak ti majoriti bansa Dayak.

Iya madah, diatu ari 71 iti sitak DUN di Sarawak, 29 iti sitak tauka 40 peratus endang majoriti sitak Dayak, lalu penyampau pemayuh Dayak diatu urung 44 peratus. Dikearapka penambah sitak baru nya ti tebal majoriti Dayak ulih nangkup penyampau sitak DUN Dayak.

"Dipelabaka dalam taun tu bisi tiga tauka empat sitak DUN deka dibuka baru. Nya alai kami ngemerat peminta nambahka sitak DUN kami (PRS).

"Bisi endur ke dikerindu tauka dikeinginka PRS iya nya dalam parlimen Ulu Rajang, Selangau, Batang Ai sereta nyengkaum Sri Aman.

"Kami arap endar sekeda ari sitak DUN baru nya ti majoriti Dayak diberi ngagai parti ti bepelasarka Dayak, lalu kami PRS sebuah ari parti ti ngarika Dayak. Taja pia, nya bepanggai ngagai pemutus SPR," ku iya seraya madah ngagai pengarang berita nya entara pekara ke dikerandau dalam Aum Kaunsil Besai PRS ti diatur ba Indu Opis parti nya ditu, kemari.

Iya mega madahka sebengkah komiti udah ditumbuh ti betuaika Sekreteri Politik Kepala Menteri Sarawak Wilson Nyabong dibantu Ketuai Indu PRS Senator Datuk Doris Sophia Brodie enggau Liwan Lagang ke mega ketuai raban nembiak PRS, deka ngelala bagi sitak baru nya ke deka ditangkup sida ila.

PRS bisi semilan iti sitak DUN baka Balai Ringin, Bukit Begunan, Batang Ai, Ngemah, Tamin, Kakus, Pelagus, Baleh enggau Belaga.

Nitihka rikod, pengawa ngatur baru garis entara sitak nya kala dipejalaika dalam taun 1985, 1974, 1984, 1994 enggau taun 2003, lalu semua pengawa ngatur baru garis entara sitak dipejalaika dalam timpuh 10 taun semina antara 1958 enggau 1974 (16 taun) enggau 1994 nyentuk ke 2003 (semilan taun).

Kelimpah ari nya lebuh dipinta ngenang pekara ti bekaul enggau SPDP,PRS enggau SUPP ti enda setuju TERAS masuk dalam Barisan Nasional, iya madahka diri udah betemu enggau Menteri Besai Datuk Seri Najib Tun Razak kena 2 Julai tu tadi berandauka pasal nya.

"Aku empu betemu sereta berandau enggau Menteri Besai, lalu utai ke dirandau manah magang," ku iya ti enggai meri penerang silik.

Print Friendly

Seraban 84 iku Tuai Rumah pelilih mit Song nerima surat chiri

Posted: 05 Jul 2014 09:04 AM PDT

KAPIT: Sapit Menteri Pemansang Menua Pesisir enggau Pelilih Menua Malaysia, Datuk Alexander Nanta Linggi ke mega Kaban Parlimen Kapit begulai enggau Kaban Kunsil Nengeri Katibas, Datuk Ambrose Blikau Enturan kena Hari Lima tu tadi udah bejadika Pengerami Nyuaka Setipikit Nyiri Ketua raban bansa ungkup Pelilih Mit Song.

Seraban 84 iku Tuai Rumah ari Pelilih Mit Song udah nerima surat chiri sida ari Alexander.

Ba pengerami nya, Alexander ngenataika pengaga ati ngagai bala ketuai nya ti udah dichiri nyadi ketuai raban bansa ba Pelilih Mit Song.

Ku iya sebedau tu, Tuai Rumah semina nerima elawin RM100 aja. Diatu sida nerima elawin RM800 sebulan. Iya ngelalau sida begempung sereta negdutka diri enggauin perintah laban sida dichiri sereta nerima elawin ari perintah.

Ku iya baru, tanggungpengawa ketuai raban bansa endang berat. Nya alai iya ngelalau sida regas agi bejalai tanggungpengawa sereta begempung enggau Komiti Pemansang engagu Pengelikun Genturung Pendiau (JKKK) merambu mayuh bengkah atur pengawa dikena nyungkak tikas pengidup peranak rumah panjai.

Dulu ari nya DO Song, August Jackline lebuh ke bejaku nerangka sekeda pekara enggau chara ke dikena nyiri bala ketuai raban bansa. Iya mega ngelalau bala Tuai Rumah naruh sereta nusun profil rumah panjai sida enggau manah ngambi bisi nyadika rikod.

Ambrose Blikau sama bela bisi bejaku ba pengerami nya.

Bela bisi ngulu pengerami nya Sekreteri Politik Kepala Menteri Sarawak, Jefferson Jamit Unyat, Ketuai KEMAS, Ambrose Abong Buget, bala ketuai opis perintah, SAO  ba Opis Pelilih Mit Song, Robert Segie enggau Awangku sereta bala bukai.

Print Friendly

Luang ngaga ripot polis laban ngasaika diri diayah nerima chek RM150,000

Posted: 05 Jul 2014 09:03 AM PDT

KUCHING: Orang ke beempu tanah Adat Bansa Asal ari Pelilih Mit Serian ukai semina tekenyit tang enda ngaku kala nerima chek RM150,000 ari sebuah bank komersil ti dikeluarka sebuah opis luyar urung setaun ke udah.

Chairman Komiti ungkup tanah NCR bagi Melikin, Luang Entiyang madah, pekara nya nengenyit ka iya lebuh nerima salin chek bayar penulu ti mandangka penyampau, ari kaban iya beberapa hari ke udah.

"Aku udah ngaga ripot polis ba Balai Polis Serian sehari nya (30 Jun 2014) pengudah salin chek nya sereta deka madah ngagai mensia mayuh nengah media, aku nadai kala nerima sebarang chek tauka nemu sapa ti ngeluarka nya enggau penatai chek nya," pia ku iya madah ba aum enggau pemberita ke diatur ba Opis Pampang Sadia enda jauh ari Kota Sentosa ditu ensanus.

"Aku udah minta polis nasat pekara tu sereta deka meresi nama diri kena nyeliahka pekara ti enda disadang nyadi dudi ila, ku iya.

Luang madahka diri tekenyit endar ati lebuh menantu lelaki iya nyuaka salin chek ke diterima menantu lelaki iya ari Tuai Rumah kena 30 Jun 2014.

"Aku nemu nya semina bekaul pengawa nipu deka nganyah laban aku endang amat nadai kala nerima duit nya, nya alai aku lalu jejampat ngeripot pekara tu ngagai raban bekuasa dikena meresi nama aku tambah mega ngambika kami serumah enda berunding utai kena enda manah pasal aku," ku iya.

Iya mega madah enggai malutka nama diri ba pekara nya laban sekeda tanah ke nyadi penyarut di Melikin bisi kaul enggau tanah NCR, kompeni ari luar enggau peranak menua nya.

Ku Luang, iya enggai malutka diri ba pekara ti nadai dikereja iya sereta dituduh sida serumah bisi kaul nyual tanah NCR ba menua iya ngagai kompeni ke deka ngemansangka tanah nya nengah chara betanam komersil.

"Ke bendar aku meh orang ke ngelaban sereta deka ngetanka tanah NCR kami ngambika kami ulih nguna utai ke patut diguna ari tanah ke diempu aki ini kami sereta peranak menua Melikin.

Ku iya 7,300 hektar tanah ba kandang menua nya udah dijual nengah chara belalai tauka diberi ngagai kompeni ngambi dikemansang negna utai tanam nengah chara komersil, ke alai 3,642.29 hektar tanah nya diempu peranak menua nya.

Ku Luang baru, naka ke dikeingatka iya, iya nadai kala betemu enggau sesapa ari opis luyar tauka ngelala orang ari opis nya sereta nerima duit nengah chara belalai.

Pengawa ke nerang pekara nya ngagai mensia mayuh enggau media disukung bala komiti bukai baka Ketuai raban bansa Patricia Pantau,Ketuai raban bansa Nyalu Tampa, Ketuai raban bansa Ajah Gunya ari Ensebang enggau sida serumah nyengkaum, Supa Unyit, Alan Surang,Singa Lensat sereta Barangka Sawing.

Sida semua madahka cherita Luang nya endang amat sereta minta raban bekuasa nasat pekara nya nyengkaum tanah sida ti diambi orang ketiga ti bulih penguntung ari nya.

Print Friendly

Rebut skolarship ti disediaka Yayasan Teras

Posted: 05 Jul 2014 09:03 AM PDT

KUCHING: Yayasan Teras bisi nyendiaka skolarship ungkup nembiak bansa Dayak ti nampung pelajar dalam bidang teknikal berengkah ari setipikit nyentuk ke tikas degree.

Menteri Pemansang Tanah, Tan Sri Datuk Amar James Jemut Masing madahka anak bansa Dayak patut ngambi peluang ti bisi disediaka ba Yayasan Teras.

"Kitai bisi Yayasan Teras di Jalai Wan Alwi, skolarship nya diberi ngagai nembiak ti patut ke ngambi pelajar teknikal ba tikas diploma enggau degree.

"Enti nuan ngambi setipikit dalam timpuh pandak dalam bidang teknikal baka elektrikal, pengelikun (safety), nyelam (diving), scaffolding enggau bidang teknikal ke bukai, kami deka meri degree.

"Ngagai nembiak bansa Dayak ti ngambi pelajar teknikal ke begunaka skolarship nya, Yayasan Teras bisi bantu ari segi belanja," ku iya.

Masing ke mega Presiden Parti Rakyat Sarawak (PRS) mansutka pekara tu ba aum enggau pengarang berita seraya madahka nya entara pekara ti dipejuraika dalam Aum Kunsil Besai PRS ke diatur ba Indu Opis parti nya ditu kemari.

Kelimpah ari nya, bekaul enggau bantu ngemanah tauka nyeruri rumah panjai, Kaunsil Penyanding Penemu 1Malaysia ti bechairmanka Datuk Joseph Salang Gandum bisi nyendiaka bantu.

"Nya alai ngagai sapa ti begunaka bantu dikena ngemanah tauka nyeruri rumah panjai tau minta bantu ari Datuk Salang," ku iya.

Print Friendly

Rayat Opar nadai agi arap ngagai SUPP

Posted: 05 Jul 2014 09:03 AM PDT

70 peratus kaban SUPP Opar deka masuk TERAS

KUCHING: Tebal agi bala kaban Parti Seati Rayat Sarawak (SUPP) ba sitak Opar udah nadai agi pengarap ngagai parti nya lalu sida deka munaska bekau SUPP ba sitak nya.

Kaban Kunsil Nengeri (ADUN) Opar, Ranum Mina lebuh dirandau kemari madahka, kira 70 peratus kaban SUPP Opar nyukung pemutus iya pansut ari parti lalu masuk Parti Tenaga Rakyat Sarawak (TERAS).

Nangkan ke nya, ku Ranum, tebal agi ari penyampau sida nya udah besemaya deka nitihka singkang iya sereta deka ngerejista diri nyadi kaban TERAS.

"Ukai ajul bejaku enti aku nyebut sepemanjai timpuh dua renggat aku nyadi pengari rayat ba sitak Opar, aku ngasaika diri semina numpang nama SUPP.

"Udah nya, tebal agi rayat ba endur tu ngaku SUPP enda ulih mantu sida lalu udah datai maya iya sitak tu betuaika sebuah parti ke lebih ransing.

"Taja baka nya, tu ukai reti kami ngelaban Barisan Nasional (BN) tang laban sida udah nadai agi pengarap ngagai SUPP," ku iya madah ngagai Utusan Borneo.

Nangkan ke nya, Ranum madah, iya seruran deka nitihka peminta rayat ba sitak Opar ke deka tama parti ke lebih ransing lalu ukai baka parti ke semina bepelasarka seiti bansa baka SUPP.

Pengingin tu udah lama ditatam peranak Dayak ke endang mayuh nguan menua Opar tang sida nadai jalai ngereja utai ke bansa nya laban kerusi tu endang udah diagih ungkup SUPP.

Kerusi N.1 Opar ditumbuh nyadi sitak baru maya taun 2006, nyengkaum mungkur menua Lundu udah dipechah baru dikena nempa sitak seiti agi ke dikumbai Tanjung Datu.

Opar ngembuan 6,716 pengundi Bidayuh (83 peratus), ditangkan 498 pengundi Iban enggau 452 pengundi China.

Ba pengawa Bepilih Nengeri (PRN) 2011, Ranum ke bediri ngena tiket SUPP menang enggau penyampau 2,006 pemayuh undi pengudah ke belaban enggau tiga iku chalun ke bukai.

Ranum mujur bulih 3,360 iti undi ngalahka chalun PKR Boniface Willy Tumek (1,354), chalun Bibas Joseph Jindy Peter Rosen (475) enggau chalun SNAP Stephen Sagir (674).

Print Friendly

Masing minta kaban parti PRS saum penemu, bekerejasama

Posted: 05 Jul 2014 09:02 AM PDT

KUCHING: Presiden Parti Rayat Sarawak (PRS) Tan Sri Datuk Amar James Masing ngelalau bala kaban parti ngambika saum seiti penemu, bekerejasama sereta manggaika juluk nyapai pekara ke sebaka.

Iya mega deka meda genap iku kaban parti ngembuan penemu ke profesyenal dikena mutarka penanggul lalu nyikap diri napi utai dudi hari.

"Nama utai ke manah kitai simpan dalam ati lalu nama utai ke enda manah tinggalka aja dikena ngenegapka parti kitai PRS sebaka enggau rambai jaku ba pengerami kitai ti iya nya Segempung, Segulai, Sejalai.

"Kitai enda ibuh malik ke belakang agi. Kitai meseti terus mansang ke mua.

Tinggalka aja pekara ke enda manah lali kitai patut merening ngagai utai dudi hari enggau chara bekempit amat enggau pangan diri," ku iya.

Masing ti mega nyadi Menteri Pemansang Tanah madah munyi nya rambau Pengerami Makai Malam Ngiling Tikai PRS Pampang Balai Ringin apin lama ke udah.

Pengerami nya diatur ba Dewan Serbaguna Balai Ringin ilalu digulu lebih kurang 2,200 iku pengabang.

Nangkan ke nya, Masing madah PRS laban ke nyadi sebengkah ari parti sarakup Barisan Nasional (BN) ke ngembuan penemu ke diri empu, baka nya mega parti-parti sarakup ke bukai.

"Reti nya, nyema bisi sapa-sapa orang tauka parti ari luar deka nguji tama BN, nyadi semua sarakup parti BN tu deka saum penemu ngemansutka jaku. Tang, nyema bisi sebengkah enda setuju, nyadi perambu nya deka puntan.

"Nyema sebengkah ari sarakup parti BN ngembuan penanggul tauka kena keruga, laban ti ngasaika diri baka diri menyadi, nyadi kami patut ngulurka banti ngagai sida," ku iya.

Nya alai, Masing minta saup Kaban Kunsil Nengeri (ADUN) Balai Ringin, Snowdan Lawan terus ngaduka sitak menua nya awakka majak nyadi terabai pengering PRS.

Print Friendly