Bas Sekula ‘Pengasih’ Ke Bala Nembiak Di Murum!

Posted: 21 Jul 2014 02:27 AM PDT

Agi benung deka tinduk – bala nembiak sekula suah agi diasuh duduk besekut dalam sebuah ari trak ti bansa tu

Dalam pengelama beminggu-minggu Sarawak Energy Bhd (SEB) udah betaburka propaganda ngemesaika nama diri empu, muji lalu ngumbai diri 'mentas' ngagai raban bansa Penan, ti udah diburu sida ngambika ninggalka menua asal lalu ngentapka diri ba palan pengentap pendiau laban meri awak ke projek Tekat Murum.

Aram kitai meda semua gambar tu – kerita SEB dikena berangkutka bala nembiak beumur 7 – 12 taun nengah pejalai ba penyauh setengah jam ke sekula ti pengabis dampih enggau menua baru sida!

Sehari tu Radio Free Sarawak ngeluarka siti rekod jaku randau enggau bala apai indai prang bansa asal ti ringat ke chara nembiak sida dianjung sekula tiap kali sida ditepanka ba belakang trak, chara ti tau ngujungka sida bebadi sebarang maya.

Sida madahka tiap hari bisi 30 iku nembiak nyengkaum apai indai sida diasuh duduk besekut dalam dua buah trak ti tau bendar nganu nyawa enti sema kerita nya tekelinchir aria rung jalai nuju ngagai tapak SEB ti enda dikena agi, nyadika sekula arau sida.

Pejalai nya sejam ninting hari.

'Bas sekula' kedua bekejang ke pagi nya!

Lebuh hari ujan lalu jalai basah pejalai nya tau bendar ngujungka sida bebadi. Bisi sekali dulu ari tu siku nembiak beumur 9 taun labuh ari trak nya lalu bakal ba kening iya.

Laban ti jauh ari klinik ti bisi dua jam pejalai, abi telih nembiak nya semina ditejuka enda diubat munyi ti dikenang ngagai Sarawak Report.

Enti sema di menua iya empu di Norway din, Torstein, ti udah netapka standard ti suah dikenang iya tiap kali iya bejaku ke pasal penguntung enggau pemanah datai ari projek tekat kuasa karan ke menua Sarawak, tiap iku nembiak sekula dijaga undang menua tu nya enda tau enda duduk enggau likun ditanggam tali pinggang pengelikun ba kerita pengangkut ti meruan mai sida ke sekula.

Arapka hari enda ujan dalam setengah jam pejalai tu lagi – bala nembiak ngatur penuduk diri d luar

Bas sekula patut bisi penuduk ke bala penumpang ti ditanggam tali pengelikun.

Tang kerita ti disediaka SEB nya semina dikena sida ngayanka pementas sida tang nadai ngayanka atur pengelikun bala orang ti diangkut nya.

Sebuah ari kerita pikap ti disediaka nya enggi Labang Paneh, siku Pengerusi Komiti Raban Bansa Penan ti dipilih berunding enggau SEB pasal pengidup enggau bekal pemakai sida.

Lalu kerita pikap sebuah agi enggi Tuai Raban ari Long Wat, siku orang ti meri pemutus runding ke bansa Penan, ti udah enggai ngererak empang jalai lalu bepindah ngagai palan pengentap pendiau baru udah ai tekat ngampuhka menua sida.

Terang bendar kelimpah ari mutarka atur pengangkut ti meruan ke bala nembaik ari palan pengentap pendiau baru nya, SEB besetuju enggau dua iku tuai raban nya, mayar seduai RM4,000 siku ke sebulan ketegal nyali kerita seduai empu dikena berangkut nya!

Enda belaban tanggungpengawa pekara nya? Tentu ya, sebengkah pekara ti besai guna ke SE B, ti rindu ngena belanja sida nyuap bala pengari orang asal, kelimpah ari ti nyaga pengelikun bala nembiak raban bansa nya.

Konvoi kerita pengangkut bekejang – dua buah kerita / bisi 30 iku penumpang ti duduk besekut

EnggauRM8,000 sebulan, chukup tauka enda dikena sida SEB nyewa sebuah bas sekula ti manah sereta meruan? Lalu baka ni gaya deriba sida?

Sarawak Report udah diterangka pasal sekeda ari bansa Penan nya diasuh begintir-gintir bejalaika kerita nya tiap hari, bepanggai ba sapa ti ulih ngelimpangka diri nganjung/ngambi nembiak lalu sapa bagi sida nya ti deka ngulihka belanja ari upah bejalaika kerita nya.

Tambah mega nadai siku ari sida nya ngembuan lisin bejalaika kerita pengangkut, tauka bisi kala udah ngambi latih ngangkut nembiak sekula, ti ngujungka atur SEB nya tau mai penusah besai ke raban bansa asal nya.

Baka ni ba atur nyaga pengelikun bala penumpang ngena insurans, enti sema penusah bebadi ba jalai nya nyadi di sebarang maya ti enda disadang – bisi tauka nadai SEB udah berundingka pekara ti mit baka nya?

Enggau nya, nemu meh kami nama utai ti bendar dikereja SEB ti betuaika Torstein, siku peranak menua Norway, ti ngeregaska pengawa mai pemansang ke menua Sarawak!

Kipas injin turbin ti bisi penimpang

Atur ti enda meruan ba bala nembiak sekula nya, ti diangkut sida ninting hari jai agi ari chara ngangkut jelu ti udah nyereminka sereta ngayanka pengamat pengawa ngerembaika propaganda SEB ti enda badu-badu nya.

Peda tu! Aku ngajar sida macha enggau nulis lalu diatu aku meri sida setipikit baka ti dijuluk ati aku!

Surat berita Borneo Post terus nuliska baka ni pengari ke raban bansa asal nya udah diasuh ngayanka 'pengaga ati' raban bansa Penan ngagai SEB enggau pengempu ti murat ati, Perintah Sarawak.

Diatu, nengah suratberita nya Torstein tau sepeneka ati ngemesaika pengawa ngemansangka nemu macha enggau nulis ba raban bansa Penan. Sekeda orang nanyaka nama kebuah iya enda terundingka deka ngaga sebuah sekula ti manah sereta meruan ke bala nembiak ari palan pengentap pendiau ti baru sebedau raban bansa Penan nya datai dia?

Udah bekau betaun-taun pengawa ngaga tekat kuasa karan Murum dipejalaika, bebilion-bilion ringgit udah dibubuhka ba projek nya, tang rumah endur nembiak besekula nya udah teberayan ari rintai perengka beguna sida SEB.

Nya alai, sapa tau ngumbai semua pengawa tu tau mai penguntung enggau pengelantang orang bansa asal di Sarawak?

Lalu nama kebuah nadai sebuah klinik didirika dalam kandang pejalai pengelama dua jam tauka ngena perengka pengangkut ti meruan ngagai endur nya, kelimpah ari ti nepan ba sebarang lori kayu batang ti tau mai penusah bebadi?

Lalu nama kebuah bala kontraktor nganjung pemakai ti dipilih SEB nyau majak besetuju ngurangka penyampau bekal pemakai ngagai sebagi ari empat bagi ba bulan ke-tiga, nyentuk ke tuai raban bansa nya ngaga repot polis madahka sida udah balat bendar keberuran nadai pemakai?

Bisi cherita sebubu ngapa ditempa madahka bansa Penan ti udah diburu kompeni Shin Yang, sebengkah kroni Taib, ninggalka kampung di menua asal sida, lalu diatu sida benung diajar chara-chara bumai enggau bekebun?

Enggau nya sekali agi suratberita di menua tu nyau penuh laban gambar ti ngayanka kelas enggau gaya pengidup baru raban bansa Penan penguin kampung ti agi jauh tinggal singkang pemaansang ari bansa bukai.

'Ulih nerima runding baru ba pengawa bumai-bekebun' – tang sida enda ulih mulaika diri ngagai menua asal sida agi

Ke bendar iya, raban bansa Penan ti dientapka pendiau ba menua baru nya, ti kala udah disemayaka ngepunka pengidup baru deka diberi tanah endur bumai-bekebun, tang diatu sida enda dikemendarka betanamka sebarang utai!

Pengawa nyain petisyen chara bebala mayuh – petisyen aari orang bansa asal ti balat mantah projek Tekat Baram!

Kebuah baka nya laban tanah ti deka dikena endur bumai-bekebun sida nya endang bisi orang bukai ngempu, ti nitihka penerang dipadahka ngagai kami, udah mai pekara nya ngagai kot lalu ngarahka raban bansa Penan nya nadai kuasa atas tanah baru sida nya!

Kandang menua pengentap pendiau baru nya endang tanah NCR enggau tanah temuda enggi raban bansa Kenyah di Long Lawan, ti kala meri jaku tangkan ngagai SEB empat taun ke udah madahka SEB nadai kuasa nyerahka tanah nya nyadika pampas ke raban bansa Penan ti dientapka ba palan pengentap pendiau baru nya.

Radio Free Sarawak kala berandau enggau bala tuai raban bansa asal bekaul enggau pekara nya dua taun ke udah, udah bekau sida mai bantah sida ke Kuching lalu ngayanka bantah sida ngagai Perintah Menua Sarawak.

Tang, taja pan udah ditangkan sereta dirara, Torsteinn enggau SEB majakka program ngaga tekat sida lalu muru raban bansa Penan, ti madahka sida deka meri tanah endur bumai-bekebun – sebaka enggau chara sida majak masang injin kipas turbin ti bisi penimpang taja pan perengka nya udah ditetapka enda manah dipasang.

Diatu raban bansa Penan udah tepejal beridup ba pemakai ti rangkai, nadai belaukka sayur tauka daging mata tauka sebarang bansa buah, pemakai ti mudah diulihka ari kampung puang sida.

Tu mih utai ti nyata sereta amat, tang Torstein ngumbai semua nya jauh muntang enggau chara madahka diri udah mutar semua penanggul nengah suratberita tauka radio ti dikuasa perintah kelimpah ari ti bisi kala ngereja pengawa nya. Baka nya mih chara iya bejalaika pengawa iya!

Ba minggu nyin kemari raban ti bejalaika kimpin ke gerempung Save Rivers udah ngeluarka siti asil pansik sida empu udah bekau sida nemuai ke Murum enggau Bakun uloh orang bansa asal Baram, ti deka napi atur dientapka ba palan pengentap pendiau ti baru, ngambika meri awak ngagai SEB terus ngaga Tekat Baram.

Penemuai dikena nimbal propaganda – raban bansa asal ngayanka sungai sida ti udah balayt bendar rusak ngagai bala temuai ari Baram

Nya nyadika timbal sida ngagai penemuai seraban tuai raban bansa asal Baram ke menua China ti dipelanja SEB ngambika sida ulih meda gaya tekat Three Gorges lalu berandau enggau orang China, ti madahka pasal pemanah 'pengidup baru' sida ba palan pengentap pendiau baru sida nya.

Berita enggau cherita ti bendar disebut pengari bansa Penan ngagai bala temuai ari Bram nya enda ditusui dalam suratberita ti dikuasa perintah, tang penerang nya ulih dibacha dalam Laman Kimpin kami.

Enti kita deka arap sereta pechaya ke jaku Torstein enggau mega Borneo Post nya, barang ko kita – tauka kita tau meda baka nib ala nembiak sekula diasuh duduk beskut-sekut dalam kerita pikap ke sekula nengah jalai ti tau ngujungka penusah bebadi, enggau mega gaya pemakai ti diempa sida sebulan-bulan nya.

Tu mih gaya pemakai pemadu manah ari SEB beungkus RM600 sebulan ke sepintu ruang bilik. Enda lama agi bala kontraktor ti nganjung pemakai nya deka ngurangka penyampau pemakai ti dianjung sida ngagai ungkus RM200 aja!

Bas Sekula ‘Pengasih’ Ke Bala Nembiak Di Murum!

Bas Sekula ‘Pengasih’ Ke Bala Nembiak Di Murum!

Recent Comments

Archive