» »Unlabelled » Peranak rumah panjai Rantai minta saup diperunding BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Peranak rumah panjai Rantai minta saup diperunding BorneoPost Online | Borneo , Malaysia, Sarawak Daily News » Berita Iban - New 2 Borneo

Peranak rumah panjai Rantai minta saup diperunding

Posted: 01 Jul 2014 11:50 AM PDT

Dikarang Judan Bungap

Sida ke ngempu rumah panjai 39 pintu nya minta opis ti bekaul ngelempungka belanja kena ngentak rumah baru

SIBU: Peranak Rumah Panjai Rantai Ngelambai, Sebintek, Sibu ditu berasai gagit ati nganti penembu rumah panjai baru sida.

Tuai Rumah Rantai maya berandau enggau pengarang berita madahka sida serumah 39 pintu udah ngaga pemutus deka ngentak rumah panjai chara baru.

"Naka ke diatu kami benung ngerata sereta nyemelaka tanah taba kira empat ikar pemesai," ku iya.

Iya mega madah, sida serumah benung berundingka chara baka ni ngaga lun rumah panjai ari opis ti bekaul.

Ku Rantai, sida serumah mega bepanggai bendar ba saup bala pemesai lebih agi ba menua nya ngelempungka belanja sida berumah baru.

Pengawa nasih tanah rumah panjai baru Rantai tu udah dipenyadi Menteri Pemansang Tanah Tan Sri Dr James Jemut Masing kena 22 Jun tu tadi.

Penatai iya mega disempulang Kaban Kunsil Nengeri (ADUN) Tamin Datuk Joseph Mauh Ikeh, Direktor Besai Opis Pemansang Tanah Sarawak Datu Jaul Samion enggau bala kaunsilor sereta bala penghulu ke bukai.

Maya pengerami nya, Masing bisi besemaya deka mantu RM39,000 dikena nyaup ngentak rumah panjai nya.

Kelimpah ari nya, maya bejadi Pengerami Mantar Gawai Dayak ba rumah panjai nya kena 24 Mei suba, Mauh mega madahka diri deka meri geran projek menua pesisir (MRP) RM30,000 dikena nyaup peranak rumah panjai nya nirika rumah baru.

Print Friendly

Sekeda peranak Bintangor ringat, MDMJ enda ngereja pengawa

Posted: 01 Jul 2014 10:50 AM PDT

BINTANGOR: Komiti Kereja Impian Rayat Parti Tindakan Demokratik (DAP) Pampang Bintangor udah nganjung uras enggau lutak ke diambi maya ngelasi tauka meresi parit enggau entali ai ba sebengkah palan genturung pendiau di belakang Gerija Methodist Bintangor kena 27 Jun tu tadi ngagai Opis Pelilih Mit Meradong enggau Julau (MDMJ), pagi kilah ensana.

Kaban Kunsil Nengeri (ADUN) Meradong Ting Tze Fui madah, parit enggau entali ai nya udah lama betebat kenyau ari taun 2010.

"DAP Pampang Bintangor suah mantaika penusah tu ngagai MDMJ baik nya nengah media, randau tauka memorandum.

"Tang nyentuk ke sehari tu penusah nya mengkang enda dikeibuh," ku iya.

Tandu iya, pekara nya balat ngenataika penusah bukai lebih agi ngagai sida ke diau ba genturung pengentap pendiau besemak.

Ting madah, konteriktor ti megai tanggung pengawa meresi parit enggau entali ai di Bintangor jarang bendar ngereja pengawa sida nitihka sempekat ba kontrak sebedau tu.

Nambahka nya, ku iya, MDMJ mega dipeda enda ngibuhka ulah kontriktor nya lalu ngelakka penusah nya majak balat nyadi.

"Tu mandangka opis ti bekaul enda ulih bejalaika pengawa sida enggau manah.

"Rayat udah mayar macham bengkah pupu nyengkaum pupu pintu tiap taun ngagai MDMJ.

"Endang nyadi batang pengawa MDMJ ngena pupu nya enggau manah dikena ngereja pengawa meresi parit enggau entali ai nyengkaum semua pekara ke bekaul enggau pengelantang pengidup rayat ditu," ku iya madahka baru.

Ting mega madah, orang megai penuduk ke besai ba opis nya anang semina duduk aja tauka semina nemu bejaku maya bisi aum aja.

"Manah agi angkat lalu ngereja pengawa ari ke semina duduk dalam opis sereta landik bejaku maya baum aja," pia ku iya.

Berindik ari pekara tu Ting ngarapka rayat menua nya nyemetak agi nama bengkah 'hak' sida sereta berani mantaika penusah ke bisi nuntung diri empu.

Kelimpah ari nya, pengawa meresi parit enggau entali ai baka tu deka ditandu ninting hari Empat lalu uras enggau lutak deka dianjung ngagai MDMJ nyentuk MDMJ lengkas ngatur bengkah pengawa dikena mutarka penusah nya ari nyadi baru.

Print Friendly

Penyalah nipu chara komersil bisi nurun: Firdaus

Posted: 01 Jul 2014 10:47 AM PDT

Dikarang Jacqueline David

Penyampau pengerugi mega nurun 57 peratus maya timpuh ke sama ba taun 2013

KUCHING: Kes nipu komersil di Sarawak diperatika bisi kurang urung 30 peratus, nitihka rikod entara timpuh Januari ngagai Jun ke penyampau 152 kes, dibanding enggau 219 kes dalam timpuh ke sebaka dalam taun 2013.

Kepala Opis Penyasat Penyalah Komersil (JSJK) Sarawak Supt Firdaus Abdullah madah, penyampau nya mega diperatika, pengerugi pan kurang dalam timpuh ke sama dalam taun 2013, ke semina ngerikod RM17.4 juta lalu dalam taun tu, urung RM7.3 juta.

"Penyampau pengerugi mega bisi kurang, iya nya urung RM10 juta (57 peratus)," ku Firdaus madah ba aum media di Palan Media, Opis Indu Polis Kontinjen (IPK) Sarawak di Jalai Badaruddin ditu, kemari.

Iya madah, pemujur nya mandangka mayuh macham kimpin sereta program meri penemu ti digaga PDRM ninting maya mujur mutarka sekeda kes nipu sereta ngakal.

Ba aum media nya mega, Firdaus madahka operasi 'Ops Cantas Khas' ti bisi digaga bedau lama tu tadi beratika 61 iku nyengkaum 23 indu ditangkap laban ditemu nyual VCD sereta nyelak DVD rumpak.

Operasi ti digaga belabuh ari 20 Mei di serata menua ku iya, urung 53 abaskenyit bisi dipejalai ke beratika 5,074 unit ari mayuh macham filem enggau muzik chelak rumpak enggau penyampau ke ditakar lebih RM36,000.

Iya madah, enam individu dibai ngagai kot lalu ke bukai nya agi ditasat.

Semua saspek ke ditangkap nya deka dibechara ba kot nengah genteran tusun ukum Seksyen 6 Akta Penapisan Filem 2012 ke mai ukum denda entara RM5,000 ngagai RM30,000 tauka kena jil enda lebih ari tiga taun tauka kededua nya sekali.

Maya operasi nya mega, polis bisi ngumpul urung 1,051 poster enggau kain tambai ke mandangka iklan endur nginjau duit ke nadai lisin nengah urung 135 abaskenyit di serata nengeri tu.

"Naka kediatu, polis nadai udah nangkap orang ke ngantung tambai nya," ku iya.

Firdaus mega madahka polis mega suah meresa palan alai nginjau wang beratika palan nya bisi lisin ke betul kena bedagang.

Iya madah, barang sapa ti ditemu muka kedai nyali duit ngagai mensia mayuh lalu nadai ngembuan lisin tau dibai ngagai kot lalu dipechara nengah genteran tusun ukum Seksyen 5(2) Akta pemberi Pinjam Wang 1951 ke tau diukum entara RM250,000 tauka RM1 juta tauka dijil enda lebih ari lima taun tauka kededua nya sekali.

Iya mega ngelalau mensia mayuh ngasuh sida iya ngeripot ngagai polis enti bisi meda pengawa orang bejalika duit tauka palan ti ditemu bisi nyali duit enda belisin ngagai orang mayuh.

"Minta mensia mayuh, enti sema kita deka nginjau duit, injau ari bank, koperasi tauka ejensi perintah ke nyediaka bungai ke patut sereta nitihka undang-undang," ku iya.

Print Friendly

RM1.39 juta ngemeratka pengelantang semua sereta pemansang pelajar nembiak

Posted: 01 Jul 2014 10:37 AM PDT

Dikarang Rengenyan Labang

KUCHING: Serakup Kayu Ramu Sarawak (STA) kemari udah ngungkupka bantu belanja sepenyampau RM1.39 juta ke pengelantang enggau pelajar raban bansa di nengeri tu.

Chairman STA, Pemanca Datuk Wong Kie Yik madah, nya kelimpah ari serakup beratka pengelantang kaban (serakup) baka ke disebut dalam M&A.

Bantu belanja ti diungkupka nya ke tuju pemansang pelajar, bejalaika pengawa pemansik, enggau bantu ke bukai sereta ke biasiswa pelajar nembiak.

"Seharitu (kemari), Serakup tu udah ngungkupka RM1.39 juta kena bejalaika macham pengawa nyengkaum nyaga rampa menua ulih perintah enggau Gerempung Ukai Dikuasa Perintah (NGO), ngintu rampa menua, nyendiaka servis ngagai mensia mayuh, lebih agi ke sida ke diau di menua pesisir sereta dalam kandang ti diintu unit pengurus kampung enggau ngemudahka pelajar bala nembiak nengah skolarship ti diberi ngagai sida," ku iya.

Wong mantaika pekara nya dalam jaku iya ti dibacha Honorary Treasurer STA Philip Choo Kwong Hui lebuh 'Presentation Ceremony of Financial Contributions for Education, Research & Other Assistance, STA & Daiken Scholarships enggau Singning of Memorandum of Understanding for Daiken Scholarship Fund' ti diatur ba Wisma STA ditu, kemari.

Bejaku baru iya madahka STA bisi bejalaika projek ngangkatka pengelantang mensia mayuh di Sarawak ti enda ngira bansa enggau jalai pengarap.

"STA bisi nyendiaka skolarship dikena nentuka nembiak ulih nampung pelajar di universiti, kolej enggau institut di Malaysia ti nempa graduet ti bepengelandik bekaul enggau kampung, kebun bedandang besai kampung enggau industri kayu ramu," ku iya.

Serakup kemari udah ngungkupka RM600,000 dikena mantu 14 buah sekula sekondari enggau The Sarawak United Association of Private Chinese Secondary School Management Board, lalu bantu nya dikearapka ulih mantu ngangkatka kualiti pelajar di Sarawak, ku iya.

Nambahka nya, Serakup ngungkupka beantu belanja sepenyampau RM15,000 ngagai Yayasan Lasallian Kuching ngambika bisi dikena bejalaika program tuisyen palan nya di Kuching, Serian enggau Bau.

"Dewan Bandaraya Kuching Utara diberi bantu sepenyampau RM50,000 awakka bisi dikena ngangkatka pemanah enggau nyadika Kuching sebuah mengeri ti lebih beresi, manah dipeda enggau likun di Asia lebuh manggai taun 2017.

Kelimpah ari nya Sarawak Heart Foundation nerima bantu belanja RM50,000; Forestry Department Sarawak (RM190,000); Faculty of Resources Science and Technology, University Malaysia Sarawak (UNIMAS) nerima bantu RM400,000; Sarawak Timber Insdustry Development Corporation (RM200,000).

Ba pengerami nya kemari bisi dua iku iya nya Mohamad Hamizan Malek enggau Dayang Nur Ainnayana Abang Bohari ti nampung pelajar ba UNIMAS nerima skolarship STA.

Bisi datai ba pengerami nya, Council Member STA Lau Swee Nguong, Sapit Chairman Sarawak Heart Foundation Tan Sri Datuk Amar Dr James Jemut Masing; 'Permanent Council Member' ti mega 'President The Sarawak United Association of Private Chinese Secondary School Management Board' Temenggung Vincent Lau Lee Ming sereta ke bukai.

Print Friendly

Daiken Sarawak ngungkupka skolarship tambah kena mantu nembiak di universiti

Posted: 01 Jul 2014 10:36 AM PDT

KUCHING: Daiken Sarawak Sdn Bhd kemari nyain Sempekat Pemereti Ati (MoU) baru enggau Serakup Kayu Ramu Sarawak (STA) bekaul enggau atur meri skolarship Daiken ngagai nembiak universiti ke patut dalam timpuh lima taun ke deka datai.

Direktor Eksekutif Daiken Sarawak Sdn Bhd Kazuyoshi Katsumata madah, tuju nyain baru MoU nya ngambika Daiken ulih mantu nembiak nampung pelajar ngagai renggat tinggi, nengah skolarship Daiken.

"Berindik ari pemujur sereta sukung ari STA, kami (Daiken Sarawak Sdn Bhd) mutuska deka nyendiaka skolarship Daiken dalam timpuh lima taun agi, ngambika ulih mantu mayuh agi nembiak nyambung pelajar ngagai renggat tinggi, ti begunaka bantu belanja.

"Ke tuju lima taun ke deka datai nya, kami ngungkupka belanja tambah sepenyampau RM400,000.

"Kami (Daiken) minta nembiak ba tiga buah universiti iya nya Universiti Malaysia Sarawak (UNIMAS), Swinburne enggau Curtin sama besemekih minta biasiswa Daiken ti bisi disediaka tiap taun ngambika ulih mantu ngelempungka belanja ruang bilik sida," ku iya.

Katsumata bejaku ba 'Presentation Ceremony of Financial Contributions for Education, Research & Other Assistance, STA & Daiken Scholarships enggau Singning of Memorandum of Understanding for Daiken Scholarship Fund' ti diatur ba Wisma STA ditu, kemari.

Daiken arap bendar nembiak ke teulihka biasiswa nya deka nyulut dalam pelajar sereta ulih nyadi pemesai jemah ila enggau nyadi chunto ke nengeri Sarawak, ku iya.

"Aku amat beterima kasih ngagai STA lebih agi pengeraja pengawa iya (STA) ti udah gawa bebendar nulung kami ngatur sereta ngiga nembiak ti patut nerima biasiswa Daiken ba beberapa universiti di Sarawak," ku iya.

Nitihku iya dalam timpuh tujuh taun ke udah (ari taun 2007), Daiken udah meri biasiswa ngagai 15 iku nembiak ti nampung pelajar ba UNIMAS, Swinburne enggau Curtin University.

Ba pengerami nya kemari bisi lima iku nembiak nerima biasiswa Daiken ti nyengkaum tiga iku ari UNIMAS iya nya Leong Ting Hao, Curazon Landon Munan enggau Yong Lee Kien sereta dua iku nembiak ari Swinburne University of Techonolgy iya nya Adeline Tan Jia Jia enggau Zephaniah Wong Ing Jiek.

Sama datai ba pengerami nya kemari, Chairman STA Pemanca Datuk Wong Kie Yik; Honorary Treasurer STA Philip Choo Kwong Hui; Chief Executive Officer Sarawak Forestry Corporation Datu Ali Yusop; Director Daiken Miri Sdn Bhd Kajihara; Council Member STA Temenggung Vincent Lau enggau Lau Swee Nguong enggau kebukai.

Print Friendly

Daiken Sarawak ngungkupka skolarship tambah kena mantu nembiak di universiti

Posted: 01 Jul 2014 10:29 AM PDT

KUCHING: Daiken Sarawak Sdn Bhd kemari nyain Sempekat Pemereti Ati (MoU) baru enggau Serakup Kayu Ramu Sarawak (STA) bekaul enggau atur meri skolarship Daiken ngagai nembiak universiti ke patut dalam timpuh lima taun ke deka datai.

Direktor Eksekutif Daiken Sarawak Sdn Bhd Kazuyoshi Katsumata madah, tuju nyain baru MoU nya ngambika Daiken ulih mantu nembiak nampung pelajar ngagai renggat tinggi, nengah skolarship Daiken.

"Berindik ari pemujur sereta sukung ari STA, kami (Daiken Sarawak Sdn Bhd) mutuska deka nyendiaka skolarship Daiken dalam timpuh lima taun agi, ngambika ulih mantu mayuh agi nembiak nyambung pelajar ngagai renggat tinggi, ti begunaka bantu belanja.

"Ke tuju lima taun ke deka datai nya, kami ngungkupka belanja tambah sepenyampau RM400,000.

"Kami (Daiken) minta nembiak ba tiga buah universiti iya nya Universiti Malaysia Sarawak (UNIMAS), Swinburne enggau Curtin sama besemekih minta biasiswa Daiken ti bisi disediaka tiap taun ngambika ulih mantu ngelempungka belanja ruang bilik sida," ku iya.

Katsumata bejaku ba 'Presentation Ceremony of Financial Contributions for Education, Research & Other Assistance, STA & Daiken Scholarships enggau Singning of Memorandum of Understanding for Daiken Scholarship Fund' ti diatur ba Wisma STA ditu, kemari.

Daiken arap bendar nembiak ke teulihka biasiswa nya deka nyulut dalam pelajar sereta ulih nyadi pemesai jemah ila enggau nyadi chunto ke nengeri Sarawak, ku iya.

"Aku amat beterima kasih ngagai STA lebih agi pengeraja pengawa iya (STA) ti udah gawa bebendar nulung kami ngatur sereta ngiga nembiak ti patut nerima biasiswa Daiken ba beberapa universiti di Sarawak," ku iya.

Nitihku iya dalam timpuh tujuh taun ke udah (ari taun 2007), Daiken udah meri biasiswa ngagai 15 iku nembiak ti nampung pelajar ba UNIMAS, Swinburne enggau Curtin University.

Ba pengerami nya kemari bisi lima iku nembiak nerima biasiswa Daiken ti nyengkaum tiga iku ari UNIMAS iya nya Leong Ting Hao, Curazon Landon Munan enggau Yong Lee Kien sereta dua iku nembiak ari Swinburne University of Techonolgy iya nya Adeline Tan Jia Jia enggau Zephaniah Wong Ing Jiek.

Sama datai ba pengerami nya kemari, Chairman STA Pemanca Datuk Wong Kie Yik; Honorary Treasurer STA Philip Choo Kwong Hui; Chief Executive Officer Sarawak Forestry Corporation Datu Ali Yusop; Director Daiken Miri Sdn Bhd Kajihara; Council Member STA Temenggung Vincent Lau enggau Lau Swee Nguong enggau kebukai.

Print Friendly