» »Unlabelled » Gawa begulai enggau Taib, peneleba ke berega BorneoPost Online | Borneo , Malaysia, Sarawak Daily News » Berita Iban - New 2 Borneo

05:55:00

Gawa begulai enggau Taib, peneleba ke berega BorneoPost Online | Borneo , Malaysia, Sarawak Daily News » Berita Iban - New 2 Borneo

Gawa begulai enggau Taib, peneleba ke berega

Posted: 27 Feb 2014 02:25 PM PST

by Jacqueline David. Posted on February 28, 2014, Friday

KUCHING: Gawa enggau Kepala Menteri Sarawak, Pehin Sri Abdul Taib Mah­mud, sebengkah peneleba ke chukup manah, laban iya orang ke bepelajar, mayuh peneleba sereta ngemeratka pengawa iya, ku Sekretari Perintah Menua Sarawak, Tan Sri Datuk Amar Mor­shidi Ghani lebuh diasuh madahka peneleba diri gawa begulai enggau Kepala Menteri.

"Iya nyadi Kepala Menteri Sarawak kena 26 March 1981, lalu seharitu, 28 Februari 2014, iya ngelengka pengawa nyadi Kepala Menteri pengu­dah 33 taun," ku Morshidi.

Opis Kepala Menteri di Wisma Bapa Malaysia, Petra Jaya, Kuching dibuka dalam taun 1974, lalu Taib udah nyadi Kepala Menteri ari taun 1981, lebuh ngambi penuduk aya iya, Tun Abdul Rahman Yaakub.

"Aku beterima kasih nga­gai Pehin Sri laban iya udah mayuh meri ajar ngagai kami, mayuh ngiring ngem­bing kami ngemansangka menua tu baka ke dipeda kita diatu.

"Lalu diatu, aku ngelaluka penatai Kepala Menteri baru, Tan Sri Datuk Amar Adenan Satem ti mega seiku orang ke bepelajar, mayuh peneleba sereta mayuh penemu.

"Aku pechaya iya deka terus nyambung pengawa ke udah dipejalaika Pehin Sri un­gkup Sarawak," ku iya madah lebuh dikerandau pemberita pengudah ngiring Taib meda Rumah Annex Wisma Bapa Malaysia lalu dipenyadika Taib empu di luar opis nya ditu, kemari.

Morshidi belabuh gawa di Opis Perintah ari taun 1988 (sebedau nya Morshidi ukai ari ejensi Opis Perintah tang ari dunya korporat) lalu dipadu mangku pengawa nyadi Sekretari Perintah Besai Sarawak (SS) ari taun 2009 sampai ke diatu.

"Aku belabuh gawa ari baruh Pehin Sri nyadi SS ngeripot terus ngagai iya ari taun 2009 lalu sebedau nya ari 1988 ngagai 2009 pan sama di baruh Kepala Menteri.

"Aku ngarapka Pehin Sri lantang senang mangku pen­gawa baru iya, lalu aku nemu iya seruran meri jaku lalau ke manah ngagai mensia mayuh enggau perintah lalu kami mega ngarapka iya deka terus ngiring ngembing kami," ku iya.

Morshidi mega ngarapka Kepala Menteri ti baru, Ade­nan deka bejalaika pengawa iya enggau naka pemananh ari peneleba ke dikembuan iya ngelama tu, lalu ngajihka Sarawak deka terus maju, ku iya.

Tuju Rumah Annex Wis­ma Bapa Malaysia ke baru dipenyadika Taib kemari, iya nya penemu Morshidi empu ke deka meri peluang ngagai mensia mayuh ke gawa di Wisma Bapa Malaysia pemer­at ngimbang pengawa enggau pengawa lumba sereta bele­lak, ngambika orang gawa dia orang ke bepengerai.

Entara perengka guna ke bisi di Rumah Annexe nya, sebuah gymnasium ke dibuka ari 5:30 lemai nyentuk ke pukul 10 malam (maya hari orang gawa ari Hari Satu ngagai Hari Lima) sereta ari pukul 8 pagi ngagai 10 malam (hari Enam, Minggu/PH), sebuah pos ofis, Palan ATM enggau sebuah kedai 'Con­venient Stor'.

Sebedau ninggalka Wisma Bapa Malaysia ke penudi iya sekali, Taib enggau bini iya, Puan Sri Ragad-Kurdi Taib sempat betemu sereta berandau enggau pengereja pengawa di Wisma Bapa Ma­laysia, lalu begambar enggau bala pemesai ketuai-ketuai opis Perintah enggau sekeda menteri kabinet.

Gaya diperatika di luar opis Wisma Bapa Malaysia sinu, mayuh ke labuh ai mata laban ngasaika udah lama gawa enggau Pehin Sri Abdul Taib Mahmud lalu kemari sida iya ke penudi endar betabi eng­gau iya meri terima kasih nga­gai Kepala Menteri, sebedau iya ninggalka opis nya urung pukul 1.30 tengahari.

Entara pemesai ke sama bisi ngulu Taib kemari, Sapit Kepala Menteri Datuk Patinggi Tan Sri Alfred Jabu, Menteri di Opis Kepala Menteri (Penyanding Pen­emu) Tan Sri Datuk Amar Adenan Satem, Menteri Pemansang Tanah Tan Sri James Masing, enggau Menteri Muda di Opis Kepala Menteri (Pengawa Dagang Orang Bumiputera) Datuk Naroden.

Print Friendly

Palan endur ngentapka stesyen nya udah ditaga

Posted: 27 Feb 2014 02:19 PM PST

SIBU: Kaban Kunsil Nengeri (ADUN) Tamin, Datuk Joseph Mauh Ikeh madahka rayat di Selangau berasai asa endar ati enti sema perambu ngaga Stesy­en Pengerara Api (Bomba) enggau Penyah Penusah Kelas D di Selangau sekali tu enda nyadi.

Ku iya, perambu nya udah suah dipejuraika ba tikas Aum Dewan Rakyat (Par­limen) tauka Aum Kunsil Nengeri (DUN).

Ku Mauh, udah datai ba maya ke patut perintah berundingka perambu nya ngambi pulaika pemaik sereta pengfelantang rayat lebih agi ba sitak Selangau.

"Perambu deka ngaga Ste­syen Pengerara Api (Bomba) enggau Penyah Penusah di Selangau ukai pekara ke baru sereta nengenyitka ati rayat enggau aku empu ke nyadi pengari rayat sitak nya.

"Perambu nya udah suah endar dipejuraika aku, seka­lika lebuh aku agi nyadi MP Selangau tauka nyadi pengari rayat ADUN Tamin," ku iya lebuh dikerandau pemberita ditu kemari.

Ku Mauh, dipelabaka bepuluh buah rumah panjai di pelilih mit Selangau udah retung nyadi arang ketegal penusah angus.

"Ukai semina ngujungka orang ti dituntung penusah nya nadai palan endur diau, tang mega rugi duit ringgit sereta reta tengkira bukai.

Ku iya nandu, palan endur ngaga Stesyen Pengerara Api enggau Penyah Penusah di Selangau mega udah ditaga.

"Ku aku, nadai penanggul enti sema Balai Pengerara Api enggau Penyah Penusah di­gaga di Selangau laban palan nya endang udah bisi,"pia ku iya.

Dulu ari nya, Direktor Opis Pengerara Api enggau Penyah Penusah Nengeri Nor Hisham Abdullah bisi mantaika langgur penemu ngambika sebuah Stesyen Pengerara Api enggau Pen­yah Penusah Kelas D digaga di Selangau.

Nya berindik ari penyuah penusah angus ke nyadi di kandang menua nya.

Nor Hisham mega kala madah, pelilih mit Selangau jauh ari Stesyen Pengerara Api di Sibu.

Kelimpah ari Selangau, Asajaya enggau Belaga mega patut bisi Stesyen Pengerara Api.

Ku Nor Hisham, Stesen Pengerara Api Kelas D dipejalaika raban pengerara api enggau penyampau ke pemadu mimit sereta dibantu raban pengerara api ke enda begaji.

"Raban pengerara api ke enda begaji nya deka dibayar elawin enti sida bisi datai gawa," ku iya.

Kena 18 Februari tu tadi, Rumah Lichai Pusong di Sungai Tepus, Ulu Baling­ian udah retung nyadi arang maya penusah angus.

Penusah nya nyadi urung pukul 10.00 pagi sereta ngu­jungka 96 iku peranak rumah panjai nya lus palan endur diau, napi pengerugi wang ringgit sereta reta tengkira bukai.

Print Friendly

Bisi 47 ari 150 palan nadai SPB ti dikeluarka JBPM

Posted: 27 Feb 2014 02:19 PM PST

KUCHING: Bisi 47 ari 150 palan di serata bandar raya tu nadai ngembuan Setipkit ari Bomba (SPB) baka ke udah ditetapka Opis Bomba eng­gau Penyah Penusah Malaysia (JBPM).

Ketuai Zon JPBM Menua (Zon Satu) Tiong Ling Hii ma­dah, notis pengabis lama enam bulan deka diberi ngagai palan ke enda ngulihka SPB baka ke udah ditetapka JBPM.

"Notis keterubah deka dike­luarka kandang tiga bulan keterubah, tang orang ke ngempu palan nya tau minta nyambung timpuh datai ngagai tiga bulan laban deka meri sida iya peluang ngagai sida iya minta SPB.

Tang taja pia, enti udah abis timpuh enam bulan, orang ke ngempu palan nya agi enda teulihka SPB ungkup palan sida, nya ulih dipechara di kot sereta deka diukum mata duit enda kurang ari RM5,000," ku iya madah lebuh dikerandau pemberita ba atur pengawa Pekit 'Kawad Kecekapan Operasi Kebombaan Peringkat Zon Satu', kemari.

Iya nandu, kesemua 47 palan ke dikelala nya bedau minta SPB nyengkaum dua buah kilang sawit lalu laluh nya bisi sekeda ari opis perintah enggau rumah kedai kediri.

Enda mujur masang SPB enti nunda besangkut paut engaga rega kos masang sistem bantu rumah angus tau ngena belanja ke tinggi," ku iya.

Baka ke ditemu kitai, mayuh sida ke ngempu rumah kedai tauka palan nya, enda mujur teulihka SPB laban kos ke kelalu mar enti deka masang sistem perengka pemadam api.

"Orang ke ngempu palan patut nemu sekalika palan sida deka angus tauka enda ke alai kadang-kadang penyalah nya datai ari kitai empu, kitai enda sedar lalu anang semina lantang ati enggau utai ke ngeligi kitai," ku iya.

Ku Tiong baru, komuniti patut beratika utai ngelingi sida ke tau ngasuh ruamah angus sereta bepenemu dalam chara mutarka gaya utai ngelingi sida iya enti sema sida iya betapi enggau rumah angus.

"Baka ngelama tu, enti bisi rumah angus, orang mayuh jampat panik lalu enda nemu bakani deka mutarka penusah nya. Nya alai, JBPM ngelalau mensia mayuh lalu seruran nyendiaka diri ngambika enda jampat panik," ku iya.

Dalam pengawa deka ngajar komuniti chara nyeliahka ru­mah angus ku Tiong: JPBM Menua deka ngatur program pasal chara nagang penusah an­gus sereta latih kena bulan Mei taun tu ba 15 buah genturung pendiau mit di Lundu.

Pekit dua hari ke deka dipenyadi belabuh ari kemari (27 Feb) datai ke sehari tu (28 Feb) bisi mai digulu 120 iku penyerta sereta pemesai bomba ari enam tim palan Zon Satu Sarawak.

Nya nyengkaum Balai Bomba enggau Penyah Penusah Batu Lintang, Balai Bomba enggau Penyah Penusah Kuching, Balai Bomba enggau Penyah Penusah Tabuan Jaya, Balai Bomba enggau Penyah Pe­nusah Petra Jaya, Balai Bomba enggau Penyah Penusah Bau enggau Balai Bomba enggau Penyah Penusah Lundu.

Entara atur pengawa ke dipekit sepemanjai pengawa nya diatur, iya nya 'Operasi Membentang Hos 200 kaki, Kawad Operasi 'Fireman Lift', Kawad Operasi Naik Turun Tangga ' enggau 'Ka­wad Operasi Hantaran Jauh Berhalangan'.

Kesemua atur pengawa ti bisi dipekit dibagi ngagai dua kate­gori, iya ya kategori ngatika diri ke lelaki enggau indu.

Pekit ke keterubah ti kala diatur di renggat zon nya ngam­bika tau nelebaka pengereja pengawa kelimpah ari meri peluang ngagai penyereta ke dipilih ngarika Sarawak nga­gai Pekit 'Kawad Kecekapan Operasi Kebombaan Peringkat Kebangsaan'.

Print Friendly

Sepenyampau 34 iku raban opis kastam mujur belatih nimbak

Posted: 27 Feb 2014 02:17 PM PST

SIBU: Sepenyampau 34 iku raban Opis Kastam udah belatih nimbak di padang nimbak ditu, kilah ensana.

Nitihka penerang, Ketuai Opis Kastam Sibu, Muhd Yunus Hanuar, latih nimbak nya digulu pemesai ke lama enggau ke baru.

"Tu sebengkah ari pro­gram niting taun opis kami kelimpah ari ngangkatka pengelandik nimbak ba raban opis kami," ku iya.

Latih tu nyengkaum nim­bak ba penyauh 15 meter.

Ku Yunus, opis sida mega nyangka deka ngatur latih nimbak begulai enggau opis penerit adat ke bukai jemah ila.

"Tuju kitai ngatur latih begulai laban deka nyintalka kaul entara opis tu enggau opis bukai," ku iya nambah.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Kot Tinggi kemari nulak ‘injunction’ ke difailka Wong

Posted: 27 Feb 2014 02:16 PM PST

KUCHING: Kot Tinggi ke­mari, nulak 'injunction' ke di­failka Kaban Kunsil Nengeri (ADUN) Padungan Wong King Wei ke nagang Pehin Sri Abdul Taib Mahmud dipadu mangku pengawa nyadi Tuai Pemegai Menua (TYT), Yang di-Pertua Negeri Sarawak.

Hakim Chew Soo Ho ke mendingka peminta nya, nulak peminta nya enggau nadai kos.

Pemutus nya dipadahka 'State Attorney General' ke ngarika Perintah Sarawak, Datuk JC Fong, madahka kes bansa nya keterubah iya kala dibai ngagai kot.

Ba pekara ke sebaka mega, Wong lebuh dikerandau ma­dahka pemutus nulak 'injunc­tion' nya bepelasarka undang ke bisi diatu laban kot nadai kuasa ba pengawa nyirika orang nyadi Tuai Pemegai Menua.

"Nya hak Yang di-Pertuan Agong aja nyiri tauka maduka orang nyadi Tuai Pemegai Menua," ku iya lalu nambah kot tu enda masuk champur dalam pekara nya.

Sebengkah agi kebuah kot madahka pemutus nya agi kelalu tumu ba pengawa Taib dalam pengawa dagang.

Tu ku iya, laban Taib patut ngelengka pengawa iya nyadi Kepala Menteri udah iya nyadi Tuai Pemegai Menua.

Hari Dua tu tadi, Wong be­guai-guai ngaga 'last-minute writ of summons' kena nagang Taib ari nerima chiri pengawa nyadi Tuai Pemegai Menua lalu enti sema udah dipadu, Taib patut nyurutka diri laban iya udah ngelanggar atur ari baruh 'State Constitu­tion Article 6 (5) of the State Constitution' ketegal chakah dalam pengawa dagang.

Ba sebengkah agi pekara, Wong madah, ba penemu iya, orang ti dipadu mangku pengawa nya (TYT) bisi kaul enggau pengawa dagang, Hakim Chew madahka pekara nya agi kelalu tumu deka dipejuraika.

"Tu, ku Chew, Taib deka ngelengka sebarang pengawa dagang tauka kaul iya enggau dagang udah iya nerima pan­gku pengawa nyadi TYT

Wong nambah,"Kot mega madah, enti 'defendant' nya nyadi Tuai Pemegai Menua, dijangka bisi ulah ke enda manah deka nyadi berindik ari kuasa.

"Nya alai, dalam puin tu, aku minta Taib mendingka jaku lalau ari kot betatika pengawa iya beresi nyadi Tuai Pemegai Menua," ku iya.

Iya mega minta Taib man­taika semua kaul iya dalam pengawa dagang sebedau iya dipadu nyadi Tuai Pemegai Menua.

Lebuh ditanya ngagai Wong empu, enti iya deka ngapil pe­mutus nya, ku Wong, jangka iya enda ulih digaga iya dalam timpuh ke pandak laban Taib deka dipadu mangku pengawa nyadi Tuai Pemegai Menua kena hari Enam tu ila.

Taib diarika seraban luyar ti betuaika Sim Hui Chuang lalu Wong bejaku ke iya empu lalu dibantu 'counsels' Clement Wong enggau Alex Ngu.

Print Friendly

Nagang penchuri, sub-konteriktor parai ditancham ngena utai tajam

Posted: 27 Feb 2014 02:16 PM PST

KUCHING: Seraban polis mujur nangkap dua iku lelaki ti dipelaba ulih mantu pansik bekaul enggau kes bunuh seiku sub-konterik­tor ti diperitaka nguji nagang lori iya dichuri di Taman Stutong Indah ditu dini hari ensanus.

Sapit Kepala Polis Pelilih Mit Kuching Superintenden Entusa Iman madah, kededua iku orang ti disangka beumur urung 50 taun nya ditangkap di kandang mengeri Kuching bekaul enggau kes nya ti di­pansik ari baruh seksyen 302 Kanun Keseksaan.

Nitih penerang ari iya, dua iku ti disangka nya ngem­buan rikod ngereja penyalah ngelanggar undang-undang nyengkaum kes enchuri per­engka pengangkut.

"Kami bisi nangkap dua iku iya nya seiku lelaki China enggau seiku lelaki Melayu ti beumur urung 50 taun ngam­bika ulih mantu pansik bekaul enggau kes pemati seiku sub-konteriktor ti dipelaba nguji nagang lori iya dichuri pagi nya (ensanus)," ku iya.

Iya mansutka penerang nya dalam aum pengarang berita bekaul enggau kes nya ba Indu Opis Polis Pelilih Mit (IPD) Kuching lemai ensana.

Ngenang kes nya, Entusa madah, sub-konteriktor iya nya Chang Tung Peng, 45, kena bunuh ketegal ditan­cham ngena utai tajam ba tubuh iya lebuh nguji nagang lori iya dichuri urung pukul 4.45 pagi nya.

Bini iya (Chang) nemu insid­en nya lalu beguai nganjung iya ngagai sebuah sepital peribit ti semak sebedau iya (Chang) disahka mati udah nya.

"Saksi ba endur penusah nya nyadi madah, iya (Chang) ditemu begaring sereta dibalut darah di atas jalai alun urung 50 meter ari rumah iya.

"Iya (Chang) terus dianjung bini iya ngagai sebuah sepital peribit ti semak dia tang disa­hka mati ketegal ditancham ngena utai tajam ba tubuh, pala enggau jari," ku iya.

Kelimpah ari nya, iya ma­dah, lori mujur ditemu iay nya urung 80 meter ari penusah nya nyadi ti dipelabaka dit­inggalka orang ti disangka sebedau ngelarika diri.

"Sama bisi ditemu dalam lori nya sebilah pisau ti dis­impan ba tengah penuduk di mua lori nya.

"Taja pia piak kami agi mansik sekalika pisaunya dikena dalam kes nya tauka enda laban dipeda ngena mata kasar baka ti nadai bekau da­rah ba mata nya," ku iya.

Bejaku baru iya madah, taja pia motif bunuh nya agi dipansik.

Sama bisi ngulu aum penga­rang berita nya Mandal Ketuai Polis Pelilih Mit Kuching Su­perintenden Fauzilan Abdul Aziz enggau Ketuai Bahagian Siasatan Jenayah Daerah DSP Lim Bak Phai.

Print Friendly