» »Unlabelled » Juluk ngemansangka indu Dayak dikemerat belama BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Juluk ngemansangka indu Dayak dikemerat belama BorneoPost Online | Borneo , Malaysia, Sarawak Daily News » Berita Iban - New 2 Borneo

Juluk ngemansangka indu Dayak dikemerat belama

Posted: 16 Mar 2014 03:10 PM PDT

Nengah SIDS kenyau 57 taun ke udah, indu bansa Dayak udah ngayanka mayuh pemujur: Empiang

KUCHING: Sarakup Indu Dayak Sarawak (SIDS) udah manggai 57 taun diatu lalu pengelama serakup tu disema baka katalis ba pemujur indu Dayak di Sarawak.

Chairperson serakup tu, Dato Sri Empiang Jabu ngarap, bepelasarka juluk sereta kuing serakup, perambu ngemansangka raban indu Dayak dalam mayuh macham pekara seruran dikemerat belama.

"Penambah kaban ninting taun dalam SIDS nyadi pekara positif lalu sama nyingkang enggau pengarap kitai negut sereta ngangkatka pengulih indu Dayak dalam mayuh macham pengawa baka ekonomi, pelajar, pengawa ngatika diri enggau mayuh bengkah batang pengawa.

"Aku gaga bendar ati laban nyentuk ke diatu kitai (SIDS) udah bisi 24 pampang di serata nengeri enggau pemayuh kaban ke aktif lebih 12 ribu iku," ku iya.

Iya madah baka nya lebuh bejaku ba atur pengawa Beserumpu Makai Lemai beserimbai enggau Aum Besai Dua Taun Sekali (BGM) SIDS di Palan Ekumenikal Kristian Gerija Sarawak di Jalai Stampin ditu, malam Hari Enam tu tadi.

Empiang nandu, pemansang dunya ke majak nyemekih mensia diatu begunaka komuniti Dayak ngetanka adat sereta pesaka lama ngambika enda punas.

Empiang ke udah nyadi chairperson pengelama 29 taun ba serakup tu madah, penemu sereta pekara baru patut dipelajar lalu anang sekekali enda di keibuh.

Malam tu kitai beratika kaban SIDS mandangka ajat sereta adat baru, iya nya pemerindang karaoke.

Atur pengawa pekit tu digaga ari bulan Januari tu tadi nyadi sebengkah atur pengawa kitai nyaga sereta meransang komuniti Dayak lebih agi rebak baru ngelala lalu udah nya nyambung adat pesaka tu," ku iya.

Kelimpah ari nya, Empiang mega minta indu Dayak bebendar agi ngemansangka diri lalu merasang anak sida iya seruran ngemeratka pelajar.

Iya mega ngelalau kaban SIDS ngemeratka pelajar indu Dayak laban ku iya, nadai jalai pandak enti deka maju tang ngulihka pemandai nya enggau chara ngembuan penemu.

Ba atur pengawa nya mega, Chairperson Pengatur Pengawa nya, ti mega Sapit Chairperson SIDS Datin Catherine Gramong ngarika semua kaban SIDS meri terima kasih ba penyampau dana ke diterima ari serakup, bantu perintah ke bisi manggai RM100 ribu ngagai tabung SIDS.

Bantu nya diberi Sapit Kepala Menteri Datuk Patinggi Tan Sri Alfred Jabu, Menteri Industri Kebun Bedandang Besai enggau Komoditi Datuk Amar Douglas Uggah, Menteri Muda Perengka Guna Mensia Mayuh (Elektrik enggau Penyambung) Datuk Stephen Rundi, Menteri Muda Pengelantang Pendiau Robert Lawson, Menteri Muda Pengawa Berumah Datuk Francis Harden, Menteri Muda Opis Kandang Menua enggau Menteri Muda di Opis Kepala Menteri Datuk John Sikie Tayai enggau Chairman Opis Majlis Istiadat Datu Nellie Tangai.

Ba aum sebedau nya, SIDS mega bisi nerima ungkup RM50,000 ari Menteri Pemansang Pengawa Rama ti mega Presiden Gerempung Bansa Dayak Sarawak (SDNU) Tan Sri William Mawan Ikom.

Catherine madah, ungkup nya deka dikena bejalaika macham aktiviti pemansang SIDS nyengkaum pelajar, ekonomi, adat, pengawa ngatika diri enggau mayuh macham agi pengawa pemansang.

Sebedau nya, Empiang madahka tiap pampang SIDS deka diberi ungkup RM5,000 ari tabung SIDS kena sida iya bejalaika pengawa.

Print Friendly

Raban bansa Dayak diperansang besemekih ngambi ulih ngubah pengelantang pengidup

Posted: 16 Mar 2014 03:09 PM PDT

KUCHING: Sapit Kepala Menteri Datuk Patinggi Tan Sri Alfred Jabu Numpang minta komuniti Dayak betati sereta ngerebut peluang ti bisi disediaka perintah, ngambika ulih ngubah pengelantang pendiau diri jemah ila.

Iya madah, sida iya patut nyikap diri betunga enggau penanggul dudi hari ke majak mar ditapi sereta pejalai nuju peranak menua ti bepemisi besai.

"Nya alai, tiap raban komuniti kelebih agi nembiak rebak baru patut nyendiaka diri enggau macham penemu sereta pengelandik ngambika enda kena tinggal…Rebut peluang ke bisi.

"Kitai patut nemu pemar tapi jemah ila, nya alai sikap diri empu lebuh napi ubah pemar nya ila," ku iya.

Iya madah munyi nya lebuh bejaku bejadika atur pengawa 'Pengerami Makai Lemai' beserimbai enggau Aum Besai Dua Taun Sekali (BGM) SIDS di Palan Ekumenikal Keristin Gerija Sarawak di Jalai Stampin ditu, malam Hari Enam tu tadi.

Jabu ti mega Menteri Pemansang Menua Pesisir enggau Betanam Betupi Moden nandu, peluang ke patut direbut nya nyengkaum peminta pengereja pengawa bepengelandik dalam pekara teknikal laban iya pengawa ke deka meri penatai pemisi ke besai.

Nya alai, iya ngelalau apai indai ngambika sida iya landik ngatur pelajar anak sida iya ari pemun lalu ngiring ngembing sida iya ngambika mujur jemah ila.

"Ambika chuto, baka pengawa pemandang 'Sarawak Career and Training (SCAT) Fair' 2014 ti bisi diatur ulih Unit Tenaga Kerja Opis Kepala Menteri, ambi peluang tu mai anak kitai meda pengawa latih ke bisi disediaka opis tu," ku iya.

Jabu mega mantaika pengaga ati iya laban tuju kelia deka meda pengabis kurang bisi seiku graduet ari seruang bilik rumah panjai diatu udah dijapai laban rumah panjai diatu bisi lebih ari seiku graduet.

Tu ngelaika pemujur bansa Dayak ke majak nambah lalu iya patut diterus ungkup pemaik komuniti, ku iya.

Bejaku pasal SIDS, Jabu pechaya indu Dayak ke disengkaum dalam serakup tu ulih ngubah nasit sida iya nyengkaum rebak baru nengah pengereja mayuh macham aktiviti.

"Nya alai, kerejasama enda ngira lelaki tauka indu, tuai tauka biak, mit tauka besai berat kena ngemansangka bansa kitai," ku iya lebuh ngenang pemujur SIDS enggau SDNU dalam ngemansangka bansa Dayak di Sarawak.

Ba atur pengawa nya mega, iya meri perais ngagai pemenang pekit Ngajat enggau karaoke lagu Iban ti bisi diatur SIDS.

Print Friendly

Perundingka chara pemadu engkeman kena mulaika penyerakup dalam SUPP

Posted: 16 Mar 2014 03:07 PM PDT

KUCHING: Forum 'The Relevency of SUPP' ke diatur Kuching Youth Get Together nengah kerejasama Padungan Youth Movement matak urung 500 iku penyereta ti diatur di sebuah hotel ditu, kemari.

Forum ti keterubah nya, dipungkal chairman forum Ting Wei Tzen nengah atur besampika pengelikun penumpang bilun MH370 ke lenyau kenyau Hari Enam nyin tadi.

Ba jaku pengelalu iya, Ting madah forum diatur enggau tuju bekunsi penemu senentang penusah ke ditapi Parti Sa'ati Rayat Sarawak (SUPP) diatu.

Forum mega dikearap ulih berundingka chara pemadu engkeman dikena mulaika penyerakup ba parti ti udah pechah kenyau lima taun ke udah.

"Kitai bela nemu parti diatu napi penusah pengudah penyarut ke nyadi ba dalam parti ti ngujungka parti belah ngagai dua raban.

"Ngasuh penyarut majak bebalut, parti balat alah ba pengawa bepilih nengeri 2011 enggau pengawa bepilih besai 2013.

"Enti penanggul tu enda diputar, SUPP ke beumur 50 taun tau nitihka nasit parti SNAP enggau PBDS," ku iya.

Ba forum nya, empat speaker diundang ngemujur pengawa lalu bejuraika pekara politik Sarawak kelebih agi SUPP.

Speaker ke diundang iya nya Dr. Jeniri Amir, Tay Chze Cheng, Liew Wui Chern enggau Richard Wee Liang Chiat.

Datuk Lily Yong dipadu nyadi moderator.

Print Friendly

Program ScaT Fair dikearap ulih nyungkak pengelandik teknikal ba raban nembiak

Posted: 16 Mar 2014 03:07 PM PDT

KUCHING: Program dua hari ScaT Fair (Sarawak Career and Training) 2014 ke diatur kena 15-16 March nerima timbal ke manah ti alai urung 35,000 nembiak enggau apai indai sama bisi nyukung program pemansang pelajar teknikal enggau palan ngiga pengawa ke nembiak ke baru tembu besekula.

Kaban Kunsil Nengeri (ADUN) Demak Laut, Dr Hadzland Hipni madah, ScaT Fair ke diatur Unit Tenaga Kerja (UTK) ari baruh Opis Kepala Menteri bekerejasama enggau TEGAS (Tabung Ekonomi Gagasan Anak Sarawak) sigi seruran diangkatka lebih ungkup nembiak Sarawak, laban pelajar pegelandik baka tu beguna endar ba menua Sarawak ke deka nyadi sebuah menua industri manggai taun 2030 ila.

"Pemerat pengawa TEGAS iya nya deka meri penemu ngagai semua nembiak sekula ke udah abis peresa SPM, enggau ngagai bala nembiak ke bedau mutuska runding kuing sida iya dalam pelajar.

"Nya alai, dalam pekara tu, TEGAS beratika tuju menua tu ke begunaka pelatih ke deka dilatih dalam pengelandik teknikal lebih agi dalam pengawa ti bisi kaul enggau pemansang di kandang SCORE," ku iya.

Iya madah baka tu lebuh dikerandau pengudah nutup atur pengawa 'AZAM Youth Leadership Bootcamp' (ke diatur AZAM) enggau ScaT Fair 2014 di Palan Aum Besai Borneo Kuching (BCCK) ditu, kemari.

Dr Hazland madah beserimbai enggau penyendia Sarawak nyadi sebuah menua industri manggai 2030, menua tu benung nyendiaka nembiak iya ke dijangka deka ngelatih urung sejuta pengereja pengawa industri.

"Nya penyendia menua tu ngelatih peranak kitai empu…Enti ulih ngambika orang Sarawak ke nyadi orang ke bepengelandik sereta setengah bepengelandik dalam pengawa teknikal ba kandang SCORE, Tg Manis enggau sitak industri Samajaya," ku iya.

Dr Hadzland ti mega seiku ari pemesai ke mangku tanggungpengawa di TEGAS madah, pengawa TEGAS ukai semina ngangkatka pelajar teknikal ba nengeri aja, tang pemerat nya mega diangkatka di sitak ADUN di serata nengeri ke ngemeratka latih teknikal ba nembiak di menua pesisir.

"Naka ke diatu, TEGAS bulih bantu ari piak peribit baka Sunway bedau lama tu tadi mantu RM2 juta skolarship ke nembiak Sarawak belajarka latih pegelandik di universiti nya.

"TEGAS udah meri mayuh bantu skolarship baka lebuh TEGAS dipunka dalam 2011, kami udah meri lebih ari 10 skolarship ngagai nembiak Sarawak, alai mayuh ari sida tu nembiak ke ngambi pekara bekaul enggau perubat (belajar di universiti di India) enggau Injinir, lalu nembiak ke bulih skolarship mayuh nembiak ari menua pesisir," ku iya.

Iya madah baru, nembiak ke udah tembu sekula Pom Lima lalu bedau mutuska runding sida iya deka milih utai ke deka dipelajar sida iya, lalu bedau sempat ngagai ScaT Fair tu tadi, tau betanya pasal skolarship ba opis TEGAS empu di Wisma Bapa Malaysia, tauka betanya ba sekula sida.

Kelimpah ari nya iya madah, baka nembiak ke diau di menua pesisir, mayuh ari nembiak tu orang ke bisi pengelandik jari.

"Ba pekara bansa tu bisi makit ke besai, laban kami (TEGAS) ngelatih nembiak bansa tu. Ngembuan pengelandik baka tu deka meri pemisi ke besai.

"Nyangka jemah ila, kitai (Sarawak) deka nyadi nengeri ti ngeluarka pengereja pengawa teknikal ti beguna di menua tasik.

Baka indu misi kitai, udah kelalu mayuh diatu tauka pengereja pengawa di makmal sepital, sida iya dipinta gawa di menua Timur Tengah ngulihka pemisi besai agi," ku iya.

Sama bisi ngulu atur pengawa nya kemari, Direktor Unit Pemansang Pengereja Pengawa (UTK) Opis Kepala Menteri, Dr Abdul Rahmah deen, Chairman Komiti Pemansang Nembiak AZAM Sarawak, Mohd Ariff Azahari, Komiti Pemansang nembiak AZAM Sarawak Telemachus Lo, enggau Ketuai Pemesai Eksekutif TEGAS Awangku Merali Pengiran Mohamad.

Print Friendly

Ketuai SUPP patut berani ngenataika isu rayat

Posted: 16 Mar 2014 03:05 PM PDT

by Chris Bishop. Posted on March 17, 2014, Monday

Enti enda penyukung sida majak mayuh nguingka sukung ngagai penyakal: Jeniri

KUCHING: Raban ketuai dalam Parti Sa'ati Rayat Sarawak (SUPP) patut berani enggau chakah  ngenataika isu rayat ngagai perintah enti sida deka mulaika sukung ari rayat.

'Senior lecturer' ari Fakulti Sains Sosial Universiti Malaysia Sarawak (UNIMAS) Dr Jeniri Amir madah pekara nya nyadika kebuah SUPP majak enda nerima sukung rayat baka ke dipandang ba pemutus pengawa bepilih nengeri 2011.

Ku iya, parti DAP ulih ngerampas penuduk SUPP ketegal pengari ari parti penyakal nya berani mai pinta enggau peneka rayat ngagai renggat ke patut ngambika diperunding.

"Ketuai ari DAP seruran sereta berani mai isu rayat ngagai perintah. Sida bejaku ngarika rayat.

"Ketegal nya, rayat pechaya agi ke DAP lalu meri sukung ngagai parti nya maya pengawa bepilih. Rayat lebih agi bansa china ngalih lalu nyukung DAP," ku iya.

Iya mansutka jaku tu ba sebengkah forum 'The Relevancy of SUPP ' ke diatur Padungan Youth Movement ditu, kemari.

Iya ke mega seiku pengemata politik di Sarawak nambah, SUPP deka majak alah lalu deka lenyau mayuh agi penuduk baik nya ba sitak kunsil nengeri tauka parlimen enti ketuai sida enda ngemeratka pekara nya.

"SUPP mengkang ulih nyadi parti ke dikerinduka rayat enti pekara tu dikemerat lalu dipejalai enggau silik.

"Enti nuan (ketuai SUPP) patut bejaku mantaika isu rayat, bejaku meh enggau nadai asai rawan ungkup pemaik rayat ke nyadi penyukung," ku iya.

Anang irauka penuduk enggau pangku pengawa diri, tandu iya.

Berindik ari nya, enti SUPP deka angkat tegap, Jeniri madah sida patut beratika baru semua pekara ke udah nyadi ti ngujungka parti nya enda nerima sukung ari bansa china agi.

Ku iya, pekara ke nyadi dalam timpuh lima taun ke udah patut nyadika teladan enggau tenggau.

"Kededua piak ke belaya patut ngelengka laya lalu duduk berundingka pejalai parti. Raban ketuai sida patut mutarka laya lalu bebaik.

"Enti sida enda berubah, rayat deka ngubah sida ke alai kitai enda tekenyit enti SUPP majak alah ba pengawa bepilih ke deka datai," tandu Jeniri.

Print Friendly

Ketuai raban bansa China mujur ngulu licha pasal pengawa polis

Posted: 16 Mar 2014 03:04 PM PDT

ENGKILILI: Seraban 30 iku bala ketuai raban bansa China ba kandang menua Engkilili enggau ngulu program licha pengawa nyadi raban Polis DiRaja Malaysia (PDRM) di Balai Polis Engkilili kena Hari Enam minggu nyin tadi.

Kepala Polis Pelilih Lubok Antu, DSP James Johnathan madah, tuju program nya diatur ngambi ka bala ketuai raban bansa China nemu batang pengawa ti dipejalaika raban polis sereta tanggungpengawa lebuh neritka undang-undang menua.

"Aku arapka sida ke ngulu program tu bulih penerang sentang batang pengawa ti dipejalaika raban polis sereta nyadung penerang nya ngagai bala nembiak bansa China ba  kandang menua Engkilili,"pia  ku iya.

James mega arapka, nengah program ke diatur Indu Opis Polis Pelilih Mit (IPD) Lubok Antu nya, mayuh agi bansa China minta  masuk PDRM ila.

Berebak enggau nya, IPD Lubok Antu udah ngangauka Kepala Polis Pelilih Mit Saratok, DSP Lee Thai Lei meri licha ba program nya.

Ku iya, sida iya deka ngatur program nya sekali agi enti pemutus peresa SPM enggau STPM udah pansut ila.

Iya arapka bala ketuai raban bansa China ke ngulu program lalu nerangka isi licha nya ngagai bala nembiak China di Engkilili.

Print Friendly