Setengah Bilion Ringgit! Untung Pengawa Dagang Reta Tanah Taib Di Menua Tasik

Posted: 07 Mar 2014 08:29 AM PST

Sekeda ari rumah bansa penthouse ti benung dikelakuka ba rega RM8 juta

Sarawak Report diatu ulih mantaika penguntung pengawa dagang enggi sida Taib sebilik di menua tasik ke lebih agi di UK ti manggai setengah billion ringgit (tauka 100 juta pound sterling) lalu angka nya disadang majak betambah.

Nitihka penerang pansik gerempung NGO menua Switzerland, Bruno Manser Fund, ti bejalaika pansik sida ba opis pengerejista kompeni di UK, pengawa pemansang Ridgeford Properties di Bolsover Street, ti ba tengah-tengah nengeri London nya, diatu udah mujur nyual mayuh ari rumah renggat ke-dua sida ba rega £98,145,182 (RM537,000,000).

Sebagi ari rumah penthouse ti pemadu mar nya mengkang bedau dijual, lalu tu mai reti penyampau ke semua rega rumah nya ila disadang lebih ari tikas seratus juta pound.

Ba pun pengawa pemansang blok rumah nya, ti enggi Hospital Sakit Tulang, udah tembu digaga kompeni nya, ti bejalaika pengawa sida bekunsi enggau sebuah agi kompeni, The Manhattan Loft Company.

Nya nyadika sebagi ari pemayuh rumah ti dibeli lalu dijual baru sida Taib sebilik di London kenyau ari Ridgeford Properties ditumbuhka dalam taun1996 suba. Diatu Ridgeford nya udah dipasukka ke dalam kompeni City Gate, iya nya sebuah kompeni ari menua Kanada, ti nyadika sebagi ari gerempung kompeni Sakto enggi Jamilah Taib lalu dikemataka laki iya Sean Murray ti nyadi Pengarah dia.

Siku ari pemesai ti udah badu bekereja enggau kompeni sida nya madahka iya berasai besalah ketegal ti bekereja ba sebuah kompeni retatanah enggi seraban orang diri sebilik ti bisi kaul enggau pengawa ngeruga sereta ngerusak kampung di Sarawak.

Rampa nengeri London ditimpai ari atas – pun penatai duit ke Ridgeford Properties enggi anak indu Taib Mahmud, Jamilah

Berita pasal penguntung ti besai bendar ti datai ari semina siti projek dipejalaika sida Taib sebilik deka narit perati orang di Malaysia ngagai pekara ti ngelingi siku Gabenor baru ti balat nyadika buah mulut, nya terang bendar nentuka iya empu nya deka majak bekuasa di menua Sarawak ari opis baru iya di Astana.

Bebendar deka bediri ba sitak DUN Balingian – Abu Bekir betemu enggau raban pengarang berita ti mega disukung menyadi iya empu ba minggu tu tadi

Ari ti mangku pengawa tuai menua, Gabenor Sarawak ti baru nya patut ngenyauhka diri ari pengawa politik. Lalu ari nya mega iya diberi kebal dikena ngelindung iya ari kena tuduh dalam sebarang pechara kot, sebengkah atur ke lama bendar udah dikeinginka iya dikena iya ngintu reta pengeraja ti mayuh bendar udah ditugungka enggau chara salah ngelama tu.

Tang kepala menteri ti udah badu mangku pengawa nya mengkang nyadi presiden dalam parti PBB iya, ti nyadika parti lumur dua pemadu besai dalam gempung BN, nangkan UMNO, lalu iya nadai ngayanka sebarang kelai iya nya deka badu ari pengawa nya.

Enggau netapka bala anak lelaki iya ti nganti gintir diri dipilih nganti iya ba penuduk DUN Balingian, penuduk iya ti nyadi presiden parti nya besai bendar guna dikena nentuka utai ti dikedekaka iya.

Penyalah ngelanggar undang-undang nya terang bendar dikereja Taib nunjukka iya endang enda ibuhka peneka undang-undang menua ti nagang sapa orang ti mangku pengawa kepala menteri tauka gabenor megai pengawa nyadi pengarah dalam sebarang kompeni.

Suratberita pengawa dagang Edge baru udah ngeluarka siti lansa kenang sida pasal Taib Mahmud, ti mantaika beberapa buah kompeni ti endur iya nyadi pengarah, nyengkaum Demak Jaya Holdings (Pengarah kenyau ari 1992); Hamamorial Sdh Bhd (Pengarah kenyau ari 1992) enggau Ramah Jelita Sdn Bhd (Pengarah kenyau ari 1989).

Ruang endur begempuru ti besai di Bolsover Street

Pengawa iya ti nyadi pengarah ba mayuh bengkah kompeni iya nya, lebih besai agi reti ari pengawa iya dalam kompeni Mesti Bersatu, ti udah kala dikenang Sarawak Report dulu ari tu.

Suratberita The Edge nya mega udah nusui pasal semua kompeni nya diatu udah minta sida 'dikelaungka' ari tikas kompeni ngatika diri awakka sida enda ibuh ngayanka pekara penatai penguntung sida dalam regista kompeni awam.

Suratberita nya mega udah belabaka bisi sekeda ari kompeni bukai ti bisi kaul enggau Taib udah ngena chara nya udah bekau Sarawak Report mantaika pekara belanja siku gabenor.

Semina ba minggu nyin kemari Kot Tinggi Kuching udah madahka 'pengarap bendar' sida ba Taib deka nyerahka pengawa Pengarah iya dalam semua kompeni iya nya udah bekau iya dichiri nyadi gabenor. Pemutus kot nya beduduk ba jaku bantah parti penyakal DAP ti madahka kaul Taib dalam pengawa dagang tau bendar nagang iya dichiri nyadi gabenor belalauka undang-undang menua.

Udah tembu gaga enggau berumban-rumban – sayap opis baru di Astana endur opis atur pengawa Taib

Ke bendar, pengaruh eksekutif Taib ti enda ngetu-ngetu nya udah ngujungka Mahathir kurang pengiruh tauka gagau ba tikas Perintah Besai.

Taib udah maduka kaban belayan iya empu, Adenan Satem, ti benung sakit nya mangku pengawa kepala menteri ti ditinggalka iya. Adenan suah ditemu enda ulih datai ngulu pengawa ofisyel ketegal ti ngenatka penyakit iya, munyi ti disebut bala pemerati.

Tang Adenan Satem udah mansar diri mansutka jaku ti madahka iya mangku pengawa tiga iti opis menteri ba menua Sarawak, lalu enggau nya deka ngujungka Taib deka bejalaika kuasa perintah kukut besi iya nengah Adenan ari 'Sayap Opis' iya ti baru tembu gaga di Astana.

Terang bendar Taib ngumbai undang-undang bekaul enggau kebal nya ulih nyaga iya, tang iya empu suah ditemu ngelanggar semua undang-undang dalam menua iya empu!

Syer pengawa dagang sida gabenor baru sebilik nya dalam CMS udah niki kenyau ari beberapa hari tu, dikena ngamatka Taib Mahmud pulai bekuasa baru ba atas semua pekara ti nyadi di menua Sarawak lalu iya deka majak bekuasa merintah menua iya ngambika meri penguntung ke pengawa dagang iya empu.

Tu nyengkaum pengawa iya ti balat ngerusak rampa menua enggau rampa kampung ti besai bendar lalu ngansak pemindah bepuluh ribu iku orang bansa asal ninggalka menua asal sida empu ngambika meri awak ngagai projek SCORE asil ari buah runding gila Taib Mahmud.

Program ngaga tekat kuasa hidro nya endang dipejalaika dikena meri untung ngagai kompeni CMS enggau kompeni-kompeni enggi Taib, ti udah ditagaka nerima semua kontrak di menua nya ti deka dipelanja perintah nitihka ari asuh Gabenor ngambika tau nguntungka iya empu.

Ba jaku bukai, pengirau ati ti madahka kompeni Taib engka enda ulih meri kontrak ngagai sida empu ba atur kepala menteri ti baru diatu dipelabaka enda nyadi, belabuh ari pengawa dagang kamah ti dulu suba deka majak dikereja di menua Sarawak.

Raban tuai bansa Dayak Sarawak ti lama udah enda dikibuhka nyengkaum rayat sida empu lebuh maya pengawa maduka kepala menteri enggau gabenor ti baru, patut belabuh berundingka pemilih ke bukai. Sida udah nadai bulih pengasih lalu semina nganti lalu majak nganti. Nadai utai ti baru ke sida.

Setengah Bilion Ringgit! Untung Pengawa Dagang Reta Tanah Taib Di Menua Tasik

Setengah Bilion Ringgit! Untung Pengawa Dagang Reta Tanah Taib Di Menua Tasik

Recent Comments

Archive