05:13:00

Tagang ekstremis agama enggau bansa tama Sarawak ‘Aku enda bebegah’: Adenan BorneoPost Online | Borneo , Malaysia, Sarawak Daily News » Berita Iban - New 2 Borneo


Tagang ekstremis agama enggau bansa tama Sarawak ‘Aku enda bebegah’: Adenan

Posted: 22 Mar 2014 04:35 PM PDT

MUKAH: Kepala Menteri Sarawak Tan Sri Adenan Satem kemari madahka, iya ukai deka nyumbungka diri lebuh ke nagang ekstremis bansa enggau jalai pengarap sereta pekara bukai, datai ke Sarawak sereta ngeruga pengelikun ditu.

"Aku ukai sumbung, tang laban aku Kepala Menteri endang tanggungpengawa besai aku nyaga pengelikun enggau pengelantang di nengeri tu," ku iya bejaku ba seminar nyadi ketuai ungkup 222 iku ketuai raban bansa ari Bagi menua Mukah ditu.

Iya mega madahka diri ngembuan rintai nama orang nya.

"Aku deka nambah nama ba rintai nya ngambika ulih nagang mayuh agi orang ke deka ngeruga pengelikun," ku iya.

Ku iya, ketuai raban bansa bisi kuasa muru orang ke datai ari luar ti enda dikelala sereta orang ke tekelalu ba jalai pengarap tauka bansa ari kandang menua sida.

"Tanggungpengawa kita iya nya ngenukuka pengelikun enggau pengelantang ba rumah panjai enggau kampung kitai. Buru orang ti deka meri penusah ke kita tauka perintah," ku iya seraya ngelalau tiap iku ketuai raban bansa ti dichiri nya ngembuan kuasa dalam komuniti sida.

Lebuh ke ngenang pasal Pengawa Bepilih Mit sitak Kunsil Nengeri Balingian, ku Adenan rayat anang jampat berasai lantang ati laban andalka chalun Barisan Nasional (BN) Yussibnosh Balo nadai penanggul ngalahka chalun PKR, Abdul Jalil Bujang.

"Anang andal dulu. Kita enda tau enda nurun ngundi bebala mayuh. Ingat maya pengawa bepilih kunsil nengeri dalam taun 1996, lebuh chalun BN Tan Sri Dr Wong Soon Kai alah ba jari chalun DAP, Wong Ho Leng bepilih ba sitak Bukit Asek.

"Tebal pengundi China menya berasai andal ati sereta enda nurun ngundi, laban pechayaka Soon Kai sekali agi ulih ngetanka sitak. Pengujung, iya alah 226 iti undi," ku Adenan. — Bernama

Print Friendly

Pengerapit kaul disempulang kerejasama sebengkah senjata dikena nyapai pemujur

Posted: 22 Mar 2014 04:34 PM PDT

KUCHING: Kaul enggau kerejasama entara pekara ti deka nentuka pemujur atur dagang raban orang indu," ku Senator Dorris Brodie.

Ku iya, enti nadai kaul kerejasama ke rat,pejalai atur dagang pedis dikemujur lalu ngujungka mayuh orang dagang enda teulihka penguntung.

"Kitai bela nemu dia pengawa dagang ngembuan mayuh penguji enggau pemar lalu entara sekeda pemar iya nya ba atur ngemata pengawa dagang enggau makit ti enda tentu.

"Tang, nengah kaul kerejasama ke rat, semua pemar enggau penguji nya ulih ditempuh," ku iya.

Iya mansutka jaku nya ba pengawa bejadi Konferens Orang Dagang Indu 2014 ke diatur Gerempung Graduate Dayak sarawak (SDGA) nengah kerejasama Opis Menteri Pemansang Orang Indu, Ruang Bilik enggau Komuniti (KPWKM) di Universiti Teknologi SwinBurne di sini semalam.

Konferen dua hari berunggu nya diatur enggau tuju ngenegap kaul kerejasama orang dagang enggau atur dagang kelebih agi ungkup raban orang indu.

Konferen mega disadang tau meri awak ngagai raban orang indu ke ngaul diri ba pekara dagang bekelala enggau orang dagang bukai ngambika tau bekunsi penemu enggau pengelandik.

"Tu meh awak kitai bekelala lalu ngenegap kaul kerejasama entara kitai ke nyadi orang dagang ngambi ulih ngerembaika dagang diri," ku Dorris.

Iya nambah, gaya atur dagang tebal agi dipeda ba dua pekara iya nya surut mansang enggau ubah ekonomi dunya.

"Ketegal ti nyadi seiku orang dagang, kitai patut berani nempuh pemar lalu anang sekali surut ngambika tau nentu kitai nempa pemujur," ku iya.

Berindik enggau nya, iya ngarap raban penyereta konferens beambi awak ke disedia ungkup pemujur dagang diri.

Konferens nya digulu 200 iku penyereta ke tebal agi ngarika orang dagang mit enggau jelan pemesai, raban nembiak sekula enggau orang ke ngaul diri ba industri dagang.

Bela datai Presiden SDGA Dr Dusit Jaul, Chairperson Pengatur Konferens Carolina Sandra Giang enggau orang bukai.

Print Friendly

BPIEF penepan nembiak enggau IPT ke engkeman

Posted: 22 Mar 2014 04:33 PM PDT

by Chris Bishop. Posted on March 23, 2014, Sunday

Kenyau ari lima taun ke udah BPIEF nerima timbal ke manah ari peranak S'wak enggau IPT dalam pekara pelajar

KUCHING: The Borneo Post International Education Fair (BPIEF) 2014 mandangka pengangkun kompeni tumu nyendia peluang pelajar ngagai raban pengajar, nembiak sekula, nembiak ke benung begiga palan endur nampung pelajar sereta ngagai raban apai indai.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah perintah Sarawak kelebih agi peranak nengeri tu chukup betuah ketegal ngembuan kompeni ke ngembuan pengibuh baka tu.

"Lima taun udah ditempuh kenyau kitai ngadu BPIEF keterubah lalu nyentukka diatu pengawa tu nerima timbal ke manah ari peranak Sarawak ke datai ari tiap pelilih menua nyengkaum raban ari institusyen palan pelajar tinggi (IPT)dalam enggau luar sereta ijinsi bukai ti datai mandangka servis.

"Nengah bemacham bansa pekara pelajar ke dipandang, aku ngarap BPIEF 2014 ulih mantu raban nembiak, apai indai enggau pengajar teulihka ajar profesyenal enggau palan alai minta bantu ba pekara belanja.

"Ambi awak ke disedia enggau manah ke alai BPIEF ngundang mayuh palan pelajar tinggi dalam Malaysia sereta ari New Zealand, Australia, Singapura, United Kingdom enggau Taiwan, mandangka servis ke dikemisi sida kelebih agi ba pekara pelajar," ku iya.

Fatimah mansutka jaku tu maya bejadi The Borneo Post International Education Fair (BPIEF) 2014 di Palan Aum Borneo Kuching ditu, kemari.

Iya nambah, peneleba ikas dunya ti dibai raban komiti pengatur pengawa bekunsi deka mantu mantupka pinta enggau peneka sekula di nengeri tu nyengkaum raban pengajar kelebih agi raban nembiak di mengeri Kuching enggau di menua pesisir.

"BPIEF meri awak ngagai sida teulihka penerang senentang pekara baru ba pengawa pelajar enggau awak pemansang ba pengawa profesional baikka nya ba dalam tauka luar menua," ku iya.

Kelimpah ari nya, Fatimah madahka Sarawak patut nentuka sistem pelajar sereta program latih mentas dipejalai setipak enggau pinta ba abad ke-21.

"Awak belajar patut ngemeratka pinta pengawa puang ba dalam enggau ba luar menua sereta pemar pangku pengawa jemah. Sistem pelajar enggau program latih mega patut ngemeratka pemansang raban nembiak biak kelebih agi ke bekaul enggau pengelandik ikas entarabansa," ku iya.

Bela datai Menteri Pekara Maori ke mega Menteri Pelajar New Zealand Dr Pita Sharples's, Operasyen Menijer Borneo Post & Utusan Borneo ke mega Penyanding Penemu BPIEF 2014 Phyllis Wong, Chairman BPIEF 2014 Dorge Rajah enggau orang bukai.

Print Friendly

PKR ngansak Opis Pelajar ngemeratka pendiau nembiak sekula SMK Three Rivers

Posted: 22 Mar 2014 04:28 PM PDT

MUKAH: PKR ngansak Opis Menteri Pelajar ngagihka duit dikena ngemanahka perengkaguna baka pagar enggau rumah buding SMK Three Rivers, nya sebuah sekula luar bandar ke bebrita di menua tu.

Dalam penerang ke dipansut Ketuai PKR pampang Nangka Abdul Raafidin Majidi, parti nya madahka bedau lama alai perintah udah nebah geran RM79 dikena ngaga baru SK Tellian enggau SMK Balingian, lalu perintah mega enda tau ngemeratka pengelikun enggau pendiau bala nembiak ke betarak di SMK Three Rivers.

"Pagar sekula nyau luya sereta udah mayuh rusak. Pengelikun bala nembiak sekula udah baka enda bengat dikemerat ketegal pagar udah jai. Orang luar nyamai tama sebarang maya.

"Bilik kelas mega enda manah laban jenila udah pechah lalu bedau diadu sampai ke diatu," ku ketuai PKR Nangka Abdul Raafidin Majidi.

Kelimpah ari pagar enggau biilik kelas, Raafidin madahka gaya rumah bemalam mega enda tau dipetatika alai bala nembiak buding nangika rumah ke digaga ari kayu nya tau runtuh sebarang maya.

Opis Pelajar semina damping ari sekula. PKR ngansak Opis Menteri Pelajar ngungkupka bantu duit tambah ngagai sekula nya ngambika perengkaguna sekula baka pagar, bilik kelas, rumah buding ulih diadu sereta pengelikun nembiak dijaga.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Pementas Hope Place mantu seiku peranak enda lansik

Posted: 22 Mar 2014 04:28 PM PDT

Lumit udah neresa pemar dalam pengidup kenyau ari 58 taun ke udah diau dalam dunya pemetang

KUCHING: Lumit Emit ari Lubok Antu ngambiska timpuh 58 taun pengidup iya diau dalam pemetang, berindik ari ti buta berengkah ari umur enam taun bepun ari ngidap penyakit chelap angat.

Pengawa ti dikereja iya ninting hari iya nya diembing menyadi indu ngagai besaukka ai ke guna sida sebilik.

Pengawa nya ukai nyamai, ku volenter Hope Place ti bisi datai nemuai ngabas sida.

Laban ti deka ngasaika diri empu pengidup ke disepi Lumit, Kelvin Wan enggau raban volenter Hope Place ngembing Lumit ngagai sungai seraya mantu iya nyau ai.

"Semina seiti aja jalai ngagai sungai bejalai kaki 15 minit, neresa kampung enggau jalai bebatu sereta mayuh nyamuk," ku iya seraya madahka sida mai pulai lima liter ai pulai ke rumah.

"Nya ukai pengawa senang. Datai kami di rumah, kededua piak jari aku bisi endar ditat."

Peneleba ti diasaika nya, mandangka orang mayuh ti bisi ai ke disambung ngena paip endang chukup untung.

"Nya nagajar aku ngambika enda ngerua ai. Kitai ke diau di mengeri nyamai amat ngulihka bekal ai beresi.

"Sehari tu, kami enggau dua iku indu nya nengah pejalai ti mar nya dua kali sehari ketegal deka nyauk ai.

Lumit ti sebedau tu semina nerima RM150 ari Opis Pengintu Pengelantang Pendiau Mensia Mayuh Nengeri, diatu mega udah nerima bantu ari Hope Place, barang ke dipeguna tiap hari.

Taja pan nadai bekal ai enggau lekterik, tang Lumit nadai kala sebanaka penusah diri.

"Uji kitai ngasaika pengidup ditempuh iya, buta sereta betapi enggau pengidup ti mar ngelama lebih ari 50 taun. Tang iya (Lumit) agi ngembuan runding ke manah sereta enggai alah," ku Wan.

Hope Place nganjung bantu ngagai iya sekali dalam dua bulan laban mayuh rintai penerima gerempung volenter nya ti nganti idar nerima bantu.

Gerempung tu mega kekadang nerima peminta bantu ari peranak di luar mengeri Kuching.

Enti mimit barang ke dianjung nya nyamai diatur tang enti mayuh, nya begunaka belanja besai, ku Wan.

"Ungkus belanja sepenyampau RM1,200, dikena nyuwa lori dikena nganjung barang ngagai alai ke patut…aku ngarapka ulih ngiga mayuh agi sepunsa dikena napi tambang," ku iya.

Hope Place diatu mantu urung 80 ruang bilik. Enam ruang bilik penerima udah nadai agi dalam lis tang beberapa ruang bilik bisi masuk baru.

Penerang silik bekaul enggau chara mantu, tau betelefon ngagai Hope Place ba lumur 013-5672775 ari pukul 8.30 pagi ngagai 12.30 lemai hari Satu enggau Jumaat.

Print Friendly