» »Unlabelled » Penusah peranak Rumah Nuang Unging diberi perati BorneoPost Online | Borneo , Malaysia, Sarawak Daily News » Berita Iban - New 2 Borneo

05:02:00

Penusah peranak Rumah Nuang Unging diberi perati BorneoPost Online | Borneo , Malaysia, Sarawak Daily News » Berita Iban - New 2 Borneo

Penusah peranak Rumah Nuang Unging diberi perati

Posted: 15 Mar 2014 09:02 AM PDT

KAPIT: Sekretari politik Kepala Menteri Sarawak, Wilson Nyabong kemari udah ngabas peranak Rumah Nuang Unging ke udah dituntung penusah angus.

Iya disempulang Pemesai Opis Nembiak Lumba enggau Main Kapit, Jack Janda, Pemesai BOMBA, Irrewandy Tugor, Temenggung Dato Seri Tan Kian Hoo enggau sekeda bala bukai.

Berebak enggau nya, Wilson Nyabong nyuaka pemeri ari kuchik iya empu RM 500 ngagai Tuai Rumah Nuang ngambika dipedua ngagai seraban 40 iku peranak rumah panjai nya ke nadai agi rumah endur diau sepengudah rumah panjai sida 13 pintu, retung abis laban api kena malam Hari Tiga, urung pukul 7.30 malam tu tadi.

Tuai Rumah Nuang Unging madahka, peranak rumah panjai nya meri terima kasih ngagai opis perintah baka BOMBA, Polis, Opis Pengintu Pengelantang Pendiau, Sapit Residen Kapit, Zul Usop, Komiti Pengawa Rama Hock Ing Methodist, Kelab Lions, Bulan Sabit Mirah enggau sekeda bala bukai laban ti udah nyuaka bantu.

"Kami benasit amat laban raban BOMBA sikar amat ngerara api ngambika enda ngerarai ngagai rumah bukai ke semak dia. Enti enda pia, mayuh agi orang tusah laban bisi 36 buah pintu ba nya. Sepengudah penusah nya nyadi, Opis Pengintu Pengelantang Rama lalu berumban nyuaka bantu baka pemakai, mata duit enggau bantu ngagai nembiak ke besekula.

Gerempung Anak Bulan Mirah, Komiti Pengawa Rama Hock Ing Methodist, Komiti Pengasih Rama Pelilih Kapit udah nyuaka bantu baka pemakai, duit enggau sekeda utai bukai. Ensanus, Sekretari Politik Kepala Menteri Sarawak, Jefferson Jamit nyuaka bantu RM1000 lalu seiku orang ke beempu kedai kupi, Lau Swee Guan ke mega beempu kedai Friendship cake udah nyuaka bantu RM1100, pia ku Tuai Rumah Nuang.

Print Friendly

Japai pengelandik enggau kuasa ekonomi: Empiang

Posted: 15 Mar 2014 09:02 AM PDT

by Rengenyan Labang. Posted on March 16, 2014, Sunday

Indu Dayak dilalau landik milih bagi pengawa lebih agi ekonomi besenipak pemansang diatu

KUCHING: Meda indu Dayak pandai, bepengelandik, bisi pemansang enggau bekuasa dalam ekonomi endang juluk Serakup Indu Dayak Sarawak (SIDS).

Chairperson SIDS ti mega Sapit Presiden Sarawak Dayak National Union (SDNU), Dato Sri Empiang Jabu madahka semua pekara nya ulih ngubah tikas pengidup dalam tiap ruang bilik.

Berindik ari nya iya ngelalau indu Dayak ngambika landik milih pekara tauka pengawa ti deka dikereja lebih agi dalam ekonomi ngambika ulih nipak pemansang ke maya hari sereta bisi peminta.

"Juluk kitai SIDS iya nya deka meda indu Dayak pandai sekula, landik gawa, bisi penemu, bisi pemandai ti ukai semina gawa jari, bebendar ati deka mansang lalu nyulut dalam ekonomi.

"Bekuasa dalam ekonomi nya bepanggai ba kitai empu, giga utai ke tau digaga sereta ulih dijual lalu nya nyadi duit sereta ulih ke belanja diri empu sereta kitai dipeda orang ulih nulung laki.

"Ambika banding enti nuan bumai asil iya ulih dijual, enti nuan bekebun bisi asil mayuh lalu ulih di jual sereta mayuh ke bukai, nya alai kaban SIDS anang enda berundingka semua pekara tu," ku iya.

Empiang mansutka pekara nya lebuh bejaku ba pengerami Aum Besai Dua Taun Sekali SIDS ti diatur ba sebengkah hotel ditu, kemari.

Pengerami nya kemari dipenyadika Menteri Pemansang Rama ti mega Presiden SDNU, Tan Sri William Mawan Ikom.

Bejaku baru, Empiang madahka, ari nya orang indu ulih ngubah gaya pengidup sereta tetitihka singkang orang bukai sereta dikebasa.

Ngenang pasal pengawa sekula iya madahka pelajar sekula ulih ngubah, ngidup sereta ngangkatka pengidup sesebuah ruang bilik.

Nya alai Serakup indu enda tau enda ngemeratka pelajar sekula anak, ku iya.

"Sekula tauka pelajar tu kunchi ke pemansang enggau penyulut," ku iya seraya madahka SIDS bisi meri perais ngagai anak serakup ti nyulut dalam pelajar.

Kelimpah ari nya Empiang madahka SIDS merambu deka ngubah sentang aum besai serakup nya ari dua taun sekali ngagai tiga setaun sekali enti dikemendarka Gerempung Pengerister Bansa (ROS), ke mega pekara dipaum.

Sama bisi ba pengerami nya kemari, Sekretari SIDS Datin Senorita Linang, ketuai raban bansa sereta semua pengari ari 24 bengkah pampang SIDS di Sarawak enggau ke bukai.

Print Friendly

Pansik peneka bala nembiak rebak baru

Posted: 15 Mar 2014 09:01 AM PDT

KUCHING: Menteri Pemansang Rama Tan Sri William Mawan Ikom minta sereta meransang Serakup Indu Dayak Sarawak (SIDS) berundingka pekara ti releven tauka patut ungkup nembiak rebak baru enggau jemah ila.

Taja pan diatu serakup udah datai ba tikas ti tau dikemegah tang pemar enggau pemerat ti ditapi nembiak baru Dayak patut diperundingka, ku iya.

Iya ngelalau Serakup Indu nyikap diri napi pemar jemah ila, lebih agi rebak baru enggau dudi hari.

"Ba kitai ke diatu, aku ngasaika kitai udah ngereja pengawa ke patut enggau naka pemanah engka lebih ari nya, tang kati ku ila?.

"Nya alai aku mai serakup ngubah diri, mansik sereta meratika nama utai ti patut tauka releven ke dikerinduka nembiak  rebak baru enggau jemah ila.

"Kitai patut ngaduka pengawa ti tetap enggau rebak baru sereta rebak dudi enggai ke sida tu enda nyukung kitai," ku iya ti nyadi Presiden Sarawak Dayak National Union (SDNU).

Mawan mansutka pekara nya lebuh bejadika Aum Besai Dua Taun Sekali Serakup Indu Dayak Sarawak (SIDS) 2014/2015 ti gulu raban pengari ari 24 pampang SIDS serata nengeri, ti diatur ba sebengkah hotel ditu, kemari.

Ba pemutus aum enggau pengawa bepilih SIDS kemari, Dato Sri Empiang Jabu mengkang nyadi Chairman SIDS lalu sapit iya Datin Catherine Gramong. Sekretari, Datin Senorita Linang enggau sapit iya Cecelia Entering; Tukang wang , Angela Samson enggau sapit iya Cherry Keripin.

Kaban Komiti baka Monica Sita; Margaret Bedus; Julia Anding; Mena Tom; Alice Jawan; Helena Ginjos,; Norina Imas; Cynthia Zenhder enggau Lanjing Renggi.

Mawan kelimpah ari nya minta SIDS ngerembaika pengawa lebih agi ngagai raban indu di menua ulu ngambika enda tinggal ari mayuh macham isu enggau penerang.

"Aku ngasaika sebengkah forum patut diatur serakup ti nyerangkung indu di menua ulu ngambika sida enda kelalu jauh tinggal ari isu, penerang sereta teulihka penemu baru, ukai semina ke indu mengeri aja laban di mengeri tu endang pun.

"Nengah chara nya kitai nadai bebagi ba senentang penemu, nerima tesau sereta isu ke ulih ngasuh kitai angkat baru, lalu pia mega ngambika ulih nyendiaka diri nitihka orang bukai sereta enda mudah dipusin penemu ti bechiping," ku Mawan seraya madahka SDNU ti nyadi pugu sedia mantu SIDS senentang ngatur forum nya.

Berebak enggau tu iya minta SIDS bekempit enggau Gerempung Ukai Dikuasa Perintah (NGO) baka DCCI (Dayak Chamber of Commerce and Industries, SDGA (Sarawak Dayak Graduates Association) enggau ke bukai ti sama juluk deka ngemasangka raban bansa Dayak.

Print Friendly

PM ngesahka bilun MH370, tepawah ari alur asal

Posted: 15 Mar 2014 09:01 AM PDT

SEPANG: Menteri Besai Datuk Seri Najib Tun Razak kemari ngenukuka bilun ke enda dikelala ti disidi radar besai endang bilun Malaysia Airlines (MAS) MH370, seraya madahka bilun nya limpang ari jalai penerebai asal nuju ke Beijing sereta udah lenyau kenyau ari Hari Enam minggu siti nyin tadi.

"Sehari tu (kemari) enti nitihka penerang ari satelit ke bedau diproses, ti diambi ari penyendia servis penerang satelit, kami ngenukuka bilun ti pandangka dalam data radar besai nya endang bilun MH370," pia ku iya.

Berindik ari nya, Malaysia enggau kaban antarabansa iya mutuska penemu, penudi endar bilun nya bekangau enggau satelit dipelabaka ba seiti ari dua koridor.

Dua koridor bengkah ti dipelabaka nya, siti nya koridor utara ti dianggar ngunjur ari garis entara menua Kazakhtstan enggau Turkmenistan nyentuk ke utara Thailand lalu koridor selatan dianggar ngunjur ari Indonesia ke utara Tasik Hindi.

"Raban penasat benung nguse penerang nya," ku iya.

Taja pan bisi  riput ari media belabaka bilun nya dirampas, tang Najib madahka piak bekuasa benung nasat semua pekara ti tau ngujungka bilun MH370 limpang ari jalai penerebai iya ke asal. — Bernama

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Sekula pesisir di negeri tu agi mayuh pengurang ba infrastruktur, ku Adenan

Posted: 15 Mar 2014 09:01 AM PDT

ASAJAYA: Kepala Menteri Tan Sri Datuk Adenan Satem netapka bantu agih belanja ari perintah besai dikena nyaup ngerapit seraka sekula di menua pesisir enggau di kandang mengeri di Sarawak mengkang ditagih.

Ku iya, mengkang mayuh sekula di menua pesisir di nengeri tu begunaka kereja ngemanah kelebih agi ba pekara infrastruktur enggau ke bukai baka ba bekal ai beresi, bekal lekterik sereta sambung jalai ke jelan agi.

"Negeri Sarawak chukup besai sereta ngembuan mayuh sekula nyengkaum sekula di menua pesisir di serata menua.

"Puji ti besai diberi ngagai perintah besai ketegal ti udah meri sukung ba pengawa pemansang pekara pelajar ngelama tu.

"Taja pia, mengkang mayuh sekula kelebih agi di menua pesisir ti begunaka bantu belanja ngambika tau dikemanah agi lalu atur nya besenutuk enggau pengangkun perintah ti deka ngangkatka pekara pelajar ngagai tikas dunya,'ku iya.

Jaku Adenan dipansutka Menteri Pengatur Pengeraja Asal enggau Rampa Menua Datuk Amar Awang Tengah Ali Hassan ti ngarika iya ba pengerami Ketuai Begulai enggau Rayat ke diatur di SMK Asajaya 2 Samarahan, ditu kemari.

Pengerami nya dipenyadi Sapit Menteri Besai Datuk Patinggi Tan Sri Muhyiddin Yassin ke alai iya mega udah ngemujur pengawa bejadika sekula nya.

Kelimpah ari nya, Adenan ngelalau raban apai indai, komuniti enggau ijinsi bukai bela mantu ngiring pemansang pekara pelajar nengah program sosial, kokurikulum, main enggau lumba.

"Pengangkun raban apai indai ulih nyaup nempa nembiak ke mujur ba pekara pelajar lalu nyadi reta ti deka ngangkat menua ngagai renggat dunya,"ku iya.

Ba pengerami nya mega Muhyiddin setuju nganti nama sekula nya nyadi SMK Hajah Laila Taib nurutka pinta enggau peneka rayat sereta ketuai perintah Sarawak.

SMK Hajah Laila Taib digaga nengah ungkus RM70 juta lalu dibuka  kenyau ari empat taun ke udah.

Diatu sekula nya betuaika Prinsipal  Ahmad Ayub lalu bisi 77 iku pengajar, 10 iku staf sukung sereta 1101 iku nembiak sekula.

Bela datai Menteri Pemansang Infrastruktur enggau Penyambung Dato Sri Michael Manyin enggau Menteri Muda Pemansang Nembiak Datuk Abdul karim Hamzah.

Print Friendly

HFMD majak nambah di Sarawak, mensia dipinta bejejaga

Posted: 15 Mar 2014 09:01 AM PDT

KUCHING: Penyampau kes sakit jari, kaki enggau mulut (HFMD) di Sarawak majak nambah dalam timpuh 10 minggu keterubah taun tu.

Ba siti surat penerang ari Opis Pengerai Sarawak kemari, penyampau kes ke dirikut udah ngelui ari ikas ke patut kenyau ari minggu ke 9, iya nya dalam timpuh 23 Februari nyentuk 1 March.

"Sepenyampau 1,540 kes udah diriput dalam taun tu, taja pia semua kes nya semina kes ke mit aja. Penyampau 129 tauka 8.4 persen kes udah ditan ba sepital lalu nadai kes nabanka nyawa bisi diriput naka ke diatu, ku penerang nya.

Pelilih Miri ngerikut kes ke pemadu mayuh iya nya 423 kes, ditangkanka Sibu (384), Kuching (215), Limbang (106) enggau Samarahan (102).

Pelilih menua ti majak nambah kes HFMD iya nya di Kuching, Samarahan, Serian, Saratok, Pakan, Sibu enggau Miri.

"Atur bejejaga patut diterit ngambika tau nyeliah pengerekai HFMD kelebih agi ba maya pemisi sekula ke belabuh 21 nyentuk 19 March. HFMD tau ngerampit kelebih agi maya besekut ba palan ke mayuh orang lalu ditambah enggau pemindah mensia mayuh maya pemisi sekula tu,"ku surat penerang nya.

Entara atur bejejaga ke patut diambi iya nya masu jari enggau sabun sereta ai beresi pulai ari agu, sebedau nyendiakka pemakai, pengudah nganti lampin nembiak sereta maya masu mua nembiak.

Semua ayam nembiak lalu pia mega perengka bukai baka mija, bangku enggau lantai patut dipugar.

Apai indai diperansang enda mai anak sida ngagai palan ti suah ditatam mensia mayuh baka ba makit, palan bebeli barang, palan endur nyemerai enggau stisin bas.

Enti bala anak bisi mandangka tanda kena rampit HFMD, apai indai diansak nganjung anak sida ngagai kelinik tauka sepital ke besemak.

"Anak sida nya patut enda dianjung ngagai palan pengintu nembiak, taska, tadika tauka sekula.

"Enti anak enda mandangka tanda deka suman, apai indai diansak nganjung anak sida ngagai kelinik tauka spital baru ngambika tau diperubat enggau silik agi," ku penerang nya.

HFMD dikelala nyadi sebengkah penyakit ti suah nepan nembiak mit ke beumur enda lebih ari 10 taun.

Entara tanda sakit HFMD iya nya angat isi lalu enggai makai, tubuh enda nyamai sereta suah deka gatal rekung. Sehari dua udah nya, nembiak ke ngidap HFMD deka bisi rabus dalam nyawa.

Print Friendly