Posted: 28 Mar 2014 03:58 AM PDT

Dikemendarka tama Sarawak – kepala gerempung Perkasa Ibrahim Ali ba minggu nyin kemari bisi dipeda berandau beberapa jam dalam Restoran Hotel Harbour View. Tang kaban politik penyakal ti betul ba undang-undang udah ditagang tama ke Sarawak

Diatu Sarawak Report bisi penerang ti madahka jaku penerang ari Opis Imigrasyen Sarawak ti madahka Kepala Perkasa, Ibrahim Ali nadai kala datai ke menua Sarawak minggu nyin kemari nya enda betul.

Kami bisi bulih penerang di madahka Ibrahim Ali endang bisi nemuai ke Sarawak, laban dikamatka nengah sain iya empu lebuh iya bebayar ke ai irup enggau pemakai sida seraban di Hotel Harbour View di Kuching, ti mega endur iya bemalam dia dua malam dalam bilik 307.

Sarawak Report mega bisi nerima sekeda gambar foto ti nyengala ke resit bayar ti disain iya empu nya.
Kami ulih ngamatka penemuai iya ke Kuching ba minggu nyin kemari udah diatur ngena nama gerempung orang Melayu ti lunggar penemu (ti ngumbai sida empu NGO Melayu) ulih Sekretari Besai sida, Syed Hassan Syed Ali.

Syed Hassan udah minta galauka empat buah bilik ngena nama gerempung Perkasa ba Hotel Harbour View, ti beungkus kira-kira RM150 sebuah-sebuah, ke malam 20 – 21 haribulan Tiga tu tadi.
Kami bisi nerima salin ari rekod regista bemalam ba hotel nya.

Raban sida nya berandau ba pengelama beberapa jam nyentuk ke jauh malam ba restoran nya begulai enggau sekeda bala kaban PKMS – Persatuan Kebangsaan Melayu Sarawak, ti direpotka orang ti ngangauka Perkasa ti kelalu lunggar penemu nya awakka bisi nerangka reti enggau tuju pejalai gerempung sida nya.

Ibrahim Ali lebuh iya ti berandau di restoran Hotel Harbour View begulai enggau kaban Perkasa enggau PKMS

'Dato' Ibrahim Ali' bemalam ba bilik 307 ti disain iya ba atas bil di hotel Harbour View

Udah bekau ningat pengeringat mayuh orang bekaul enggau penemuai nya lalu pia mega bekaul enggau sekeda repot ti madahka tuai Perkasa nya bejuluk ati deka numbuhka pampang sida di Sarawak, Opis Imigrasyen Sarawak, udah ngeluarka sebengkah penerang bebula berita ti madahka iya kala nemuai ke Sarawak.

Pengilap ba penerang nya mega bisi disukung raban polis, raban SB enggau direpotka mega dalam suratberita.

Tang kami mengkang ulih nunjukka siku orang ti sebaka bendar enggau Ibrahim Ali ti ukai semina berandau enggau kaban ari Perkasa iya hari Lima nyin kemari, tang iya mega bisi nyain bil enggau nuliska nama iya empu, lalu nyangkingka gela Dato' ba pun nama iya, nyengkaum nuliska lumur bilik 307 ti endur iya bemalam nya.

Kami mega bisi nerima siti salin penyata minta galau ke bilik endur bemalam ba hotel nya ti digaga ngena nama Perkasa enggau Sekretari Besai sida, Syed Hassan Syed Ali.

Enggau nya, sekali ke penemuai nya sebengkah chara nguji ti nyelai, direpotka dalam media ti pelesu enggau dikeluluka siku orang ti sebaka gamal enggau Ibrahim Ali, nuliska nama iya atas bil dikena bebayar, tauka perintah Sarawak udah ngena tindak ti palui ngerembaika penerang ti bula.

Sekeping surat minta galau ke bilik digaga Sekretari Perkasa, Syed Hassan Syed Ali

Penemuai Ibrahim Ali ti kelalu lunggar penemu, ti enda dipinta ngagai menua Sarawak nya enda patut diatur ba maya bepilih mit, ti ditambahka enggau atur perintah nagang penemuai raban penyakal ari Semenanjung Malaysia.

Saifuddin Nasution – siku tuai raban penyakal ti ngena atur ti betul ba undang-undang ditagang tama ke Sarawak lalu dikarapka deka kempen di Balingian

Atur ti dikeluarka perintah PBB/BN ngagai opis imigrasyen dikena nagang penemuai raban PKR ngatur pengawa kempen di balingian nya sebengkah atur dikena nutup demokrasi ti kelalu berupai.

Kemari, tiga iku bala tuai dalam PKR, Rafizi Ramli, Tian Chua enggau Saifuddin Nasution udah diasuh nikal pulai ke Semenanjung Malaysia, lalu bisi 8 iku agi sida ti bukai mega sama diburu pulai pansut ari Sarawak, ti deka sama enggau bekempen di Balingian ngarika Pakatan Rakyat, sama dipasukka dalam lis orang ti ditagang tama ke Sarawak.

Editor ke blog tu enggau blog Radio Free Sarawak mega kala ditagang tama ke Sarawak, sama sebaka enggau sida ti bukai.

Atur pengawa nagang orang tama ti baka tu udah nyadika jaku uti orang mayuh ba rambau bepilih mit Balingian ti patut dipejalaika ngena atur 'demokrasi' ba kerusi ti udah dikusungka Taib Mahmud, ti endur atur nya udah mantaika ulah ti ngeluluka diri, sereta mega bechiping ba tuai orang ti lunggar penemu, Ibrahim Ali.

Pengeringat orang mayuh di Sarawak udah bekau orang nemu tuai Perkasa bisi nemuai ke Sarawak minggu nyin kemari

Agi mega lebuh kepala menteri anak patung, Adenan satem, ba pun jaku iya madahka pengirau ati diri kena hari Enam nyin kemari bekaul enggau langgur ti deka nagang pemasuk kaban politik penyakal, dalih iya ba mensia mayuh maya nya, iya deka ngena kuasa ngemataka garis entara menua nagang pemasuk sebarang orang 'ti lunggar penemu enggau jalai pengarap' enggau sapa-sapa orang ti ngembuan ati 'nyiping orang bukai.

Tang orang politik penyakal ti selama udah ditagang tama ke menua Sarawak laban ti deka mai jaku pesan ti manah-manah, lalu orang Melayu ti kelalu lunggar penemu enggau jalai pengarap udah diasuh tama lalu dikemendarka numbuhka pampang gerempung sida.

Adenan Satem – semina nyadika anak patung Taib enggau nyadika kukut mayau parti UMNO/BN?

Engka tu udah datai ba maya endur mayuh agi orang deka ngelala pemula lalu ngelala Taib enggau PBB nya ngagang orang tama ke Sarawak mai elemen UMNO, ti udah disebut Adenan dalam jaku iya rambau bepilih mit tu?

Ngelama tu parti iya udah nyadika agen ti regas sereta chakah ke UMNO, merah pengeraja menua dikena meri untung ke parti ti merintah di Semenanjung lalu mega ke penguntung sida empu.

Lalu perintah BN/UMNO diatu udah ngaku diri endang bisi melanja pejalai gerempung Perkasa dikena sida ngembamunsuh politik sida, lalu Adenan mega dipeda ngemendarka Perkasa ditumbuhka di menua Sarawa.

Adenan Satem semina bedau dipeda berani nagang pemasuk tuai penyakal Anwar Ibrahim, baka ti endang disadang, engka laban dunya diatu benung meratika tiap singkang tuai politik ti jauh nyelai ari tuai politik ti bukai.
Tang iya mega bisi udah ngeluarka jaku emba ngambika Anwar enda "kelalu manchal" enti iya deka nemuai ke Sarawak.

Ngepunka 'pengachau', endang ditemu, deka ngachau genggam BN di menua Sarawak, lalu baka pengawa bepilih mit di menua pesisir Sarawak, pengawa bepilih mit Balingian tu sebengkah atur demokrasi ti dikeluluka.

Diemba 'kena sumpanh' ti dikereja 'manang' Taib baka ti kala dipeda di Balingian maya bepilihbesai 2011 suba

Ke bendar iya, parti BN di menua Malaysia nya sebengkah rejim parti perintah 'demokrasi' pemadu tuai di dunya, terima kasih ke semua kerusi di menua pesisir lalu PBB deka bekempen dalam pengelama 14 hari seraya salah guna semua asil pemisi menua enggau perengka pengangkut enggau pemesai-pemesai opis perintah.

Balingian deka milih siku pengari ti deka enggau baum 16 hari setaun dalam rumah Dewan Undangan Negeri. Taib udah ngemandakka timpuh baum ti dibagi ngagai dua iti sesyen 8 hari siti-siti, mayuh agi ari timpuh nya semina dikena pengawa bejadi enggau nutup aum.

Begari enda anchi-anchi pemanah tang nadai tuju ti bebatang – siku pengari rayat ti digaji besai

Sebarang pengari rayat ti bisi jaku tanya enggau chara ti betul bekaul enggau nama kebuah mayuh agi ari bajet balat dipelalaika, iya deka diburu pansut ari rumah dewan endur baum.

Dikena beterima kasih ke pengelenyau kuasa bala pengari rayat sida ba taun nyin kemari, Taib udah nikika gaji bala menteri iya dua kali lipat.

Udah ti mujur nutup mulut bala kaban politik iya, Taib mega nutup mulut bala pengarang berita, lalu sida diasuh minta lisin tauka pemendar enti sida deka nusui sebarang pekara bekaul enggau politik di menua iya nya.

Nadai siku orang enda dikemendarka Taib ngulihka lisin nya, lalu nya kebuah blog tu enggau blog Radio Free Sarawak suah bendar dipeda baka kereban penyadung berita orang ti jai di menua Sarawak.

Tang, bedanjang enggau stindit entarabansa, PBB, menua Sarawak, Gabenor Sarawak enggau pengawa bepilih mit ti dikeluluka enggau enda betul enggau perintah Malaysia patut meri kuasa ke rayat enggau pengari politik sida nyadung penrang enggau penemu, tang ukai semina ngemendarka gerempung orang ti lunggar penemu enggau jalai pengarap aja tau tama ke Sarawak lalu mai penanggul ke menua nya.

Kaban Belayan Anak Kapal Madahka Sida Dichiping Kompeni Penerebai Bilun Malaysia

Posted: 28 Mar 2014 03:40 AM PDT

[BERITA BARU – Udah bekau mayuh jaku randau ti diposka dalam cherita tu kemari, ti nusui enggau silik chara ngatur bayar pampas ti enda sebaka, kompeni MAS sehari tu dipeda tepejal nerang semua bansa bayar ti dikeluarka sida naka tu. Munyi ti dituliska dalam artikel di baruh tu, isu tu mantaika atur bayar ti bechiping ke bala kaban belayan orang ti bekereja nyadi anak kapal bilun ti lenyau nya. Komen kami "enti penerang ti madahka bala kaban belayan nya udah dibayar mimit agi ari orang bukai nya enda betul, kompeni MAS patut enggau jampat madahka bayar pampas nya endang sebaka?" Diatu kompeni MAS udah mansutka penerang ti madahka tiap ruang bilik orang ti tusah nya nerima pampas $5,000 nyadika pampas idup tasah. Sida patut ari pun udah beterus terang lebuh pengirau ati bala orang nya dipansutka ba minggu nyin kemari lebuh sida mutuska runding deka mampas orang. Nama kebuah lebuh maya nya pekara nya patut 'dipelalaika' lalu nama kebuah bala kaban belayan orang ti lenyau nya dipejal enda diasuh berandauka pekara nya ba endur tauka ba orang bukai? Agi mega, agi mayuh pekara ti patut dipelajarka ari penusah tu.]

Sepengudah lebih kurang dua minggu bekaul enggau sebengkah atur ti enda manah lebuh mutarka penusah, kompeni penerebai bilun Malaysia (MAS) diatu udah berasai tepejal ke ulah sida ti nadai ngembuan penyinu, nitihka sebengkah penerang ti diterima Sarawak Report.

Bala kaban belayan pengereja pengawa MAS diasuh tetap ati ke 'bayar pampas idup tasah' dikena ngenang nasit ti nuntung sida sebilik.

Tang bala kaban belayan madahka diri semina nerima bayar pampas setengah ari ti dibayar ngagai kaban belayan bala penumpang ti bukai.

Sekeda raban kaban belayan nya disebut kelalu sinu sereta pedis ati ke penyampau ti dibayar nya nyentuk ke sida enggai nerima pampas ari raban pemesai kompeni MAS ti dipaduka mayar duit papmpas ngagai sida, lalu ngasuh pemesai MAS nya nyimpan duit pampas nya.

Siku agi ari kaban belayan nya madahka sida diasuh bemalam ba Hotel Marriott di Kuala Lumpur, nerangka ngagai Sarawak Report pasal duit nya semina dibayar sekali aja, nyadika elaun tanggung idup tasah, sekumbang misyen ngiga enggau nyelamat biul ti lenyau nya dipejalaika.

Pekara tu tebantai berebak enggau maya MAS ti madahka sida deka bekirumka teks pesan jaku pandak ngagai kaban belayan sida ti lenyau nya lalu mai sida arapka sida ti lenyau nya ulih dibai pulai enggau likun sereta agi idup.

Hotel Marriott KL, ti endur kaban belayan pengereja pengawa MAS diasuh bemalam lalu dikemataka kompeni MAS

Naka ke diatu bala pemesai MAS agi enda mujur bebulaka penerang ti ngumbai sida bisi bida ba bayar pampas nya.

Tang enti penerang ti madahka sida udah mayar penyampau pampas nya mimit agi nya enda betul, kompeni nya tentu enggau naka penyampat madahka pampas nya dibayar sama bela?

Tang bala pemesai MAS ti dipaduka ngemataka kaban belayan orang ti lenyau nya udah milih meri jaku tangkan awakka bala kaban belayan ti sinu nya ngintu resia lalu lebih chundung agi beduan bala sida ti dituntung penusah nya.

Sarawak Report udah bisi dipadahka MAS bisi ngatur jaku randau ti dikena MAS nangkan bala kaban belayan ti endur sida bisi nemu 'sekeda berita angin' dikerembaika ngagai orang bukai ari luar hotel ti endur sida bemalam nya.
Bala pemesai MAS madahka bayar pampas nya dibayar nitihka peneka enggau penyinu ati sida ngagai kaban belayan lalu bala kaban belayan nya dipinta 'belalaika' pekara tu lalu enda patut ngemesaika pekara tu ke bukai.

Bala kaban belayan ti dituntung penusah nya mega bisi ditangkan bala 'pakar mantu penusah' ti enda ngasuh sida ngerembaika pasal bantu nya, laban "ke dudi hari ila pan kompeni MAS nya ti deka mantu sida".

Pekara ti baka tu udah ngemba bala kaban belayan orang ti lenyau dalam bilun ti enda bidik nya, baka ti diterangka ngagai Sarawak Report, laban bantu ti patut dipelalaika tang tebantai nya deka nanggul pengidup sida dudi hari.
Pemerinsa tu ti ditambahka mega enggau jaku gerah ti ngasuh ati balat agi sinu munyi ti dipansutka Menteri Besai Najib Razak ti madahka bilun ti lenyau nya enggau semua penumpang sereta anak kapal dia disadang mati magang.
Enggau ulah ti enda bebasaka penyinu orang bukai, kompeni MAS madahka sida deka meri berita nengah sistem pesan jaku pandak bekaul enggau pengawa ngiga bilun ti lenyau nya!

Atur pengawa ti baka tu udah ngayanka kompeni MAS enda ulih dikarapka, ditambahka enggau peminta sida awakka kaban belayan nya balalaika bayar pampas ti diberi sida.

Surat-suratberita entarabansa udah nuliska repot sida pasal kompeni-kompeni insurans udah ngeluarka bayar insurans ba penyampau £67 juta ngagai MAS dikena sida ngelempungka pemerinsa ti nuntung kaban belayan orang ti lenyau nya, reti nya 'pampas napi pemerinsa' nya jauh bendar mimit ari penyampau ti patut diterima sida ti dituntung penusah nya.

Enggau pemayuh 239 iku penumpang ti udah lenyau nya tiap iti ruang bilik kaban belayan patut nerima £280,000 [dikemetulka] ulih penyampau tu aja. Enggau nya, nama kebuah kompeni MAS minta pekara tu dipelalaika lalu mengkang deka ngumbai bayar tu 'pampas penyinu ati'?

Enggau gaya pengulih sereta penatai pemisi kompeni MAS ke ngelama tu jauh bendar pekara tu ngarika bala kaban belayan ti dituntung penusah lenyau kaban belayan sida. Baka nya nya mega kompeni nya mengkang bedau mujur tetemuka bilun sida ti lenyau nya.

Diatu kompeni MAS patut minta ampun ngagai bala kaban belayan orang ti ditabanka bilun ti lenyau nya. Bisi sida udah nyiping bala kaban belayan orang ti lenyau nya enggau kaban belayan bala penumpang bukai, enti bisi, nama kebuah?

Skandal ‘Meli Undi Ngena Projek Rumah Sekula’ RM559 Juta Di Sarawak!

Posted: 28 Mar 2014 03:35 AM PDT

Peter Chin mengkang nyadi presiden parti SUPP, taja pan iya udah ninggalka kerusi iya ba PRU13, ti endur parti iya mayuh udah alah

Sarawak Report udah mujur bulih penerang ti ngasuh tekenyit bekaul enggau pengawa nguji meli undi ti endang disengajaka dikena ngemendarka pengawa ngaga projek 15 buah rumah sekula ti baru di menua Sarawak, ti dipinta enggau chara beguai-guai sebedau PRU13 ti dulu suba ulih BN.

Projek nya udah dikemendarka Menteri Besai, Najib Razak enggau Sapit Menteri Besai ti mega nyadi Menteri Pelajar Muhyiddin Mohd Yassin.

Sama bisi kaul dalam projek nya Menteri Kuasa ti dulu suba ti mega mengkang nyadi Presiden parti SUPP Peter Chin, ti bisi kerejasama neggau sebuah kompeni, One BU Redha Sdn Bhd, ti bisi manah kaul enggau tuan Gabenor ti baru diatu Abdul Taib Mahmud.

Beduduk ba surat-surat penerang ti diterima kami, Najib Razak udah ngatika diri ngemendarka projek nya, ti dipeda nyadika sebengkah pengawa bebelika undi, nitihka ari sanding penemu menteri Peter Chin. Tuduh penemu nya udah dikenataika nengah opis Menteri Besai empu, enggau enda diperesa sereta enda ditanya bekaul enggau ungkus projek nya ti manggai RM559 juta.

Pekara nya mega bisi dikenataika nengah opis Sapit Menteri Besai ti mega nyadika Menteri Pelajar Muhyiddin Yassin, nitihka penerang ti bisi ba kami tu.

Tang udah lebih setaun udah nya nadai sebarang penerang ti madahka pengawa ngaga rumah udah dipejalaika baka ti udah dirintaika dalam lis ti dianjung nya.

Surat peminta projek ti dikirumka iya empu ngagai Najib dikena ngaga 15 buah rumah sekula ulih gerempung kompeni Redha Services udah ti nerima surat sanding penemu ari Peter Chin

Nitihka pemeri penerang kami projek ke-dua dikena ngaga palan matrikulasi Kuching mega sama dilanggurka ngagai Menteri Besai enggau sapit iya ulih kompeni ti sama, One BU Redha Services S/B lalu diansak ngambika ngenyampatka ngena chara ti sebaka, entara 25 haribulan Dua enggau 19 haribulan Empat 2013 nyin kemari.

Surat-surat ari bala tuai parti SUPP Peter Chin nya udah dikirumka ngagai opis Menteri Besai lalu mega ngagai opis sapit iya dulu ari peminta tu dikena muka jalai ke langgur ke One BU Redha Services.

Lebuh ngenataika langgur ti madahka projek-projek nya patut dipelanja ngena wang turu menua ngagai Najib enggau Muhyiddin, Peter Chin udah mudah bendar madahka tuju peminta nya endang dikena nyuap bala pengundi rambau PRU13 nya.

Surat ti ke-dua ari Peter Chin, kena 15 haribulan Tiga, sebulan udah nya, nuju Muhyiddin, udah ditulis ngena leka jaku ti nyau ka sebaka ti nyadika sanding penemu ke projek palan matrukulasi nya.

Nyadika timbal iya, kena 19 haribulan Empat, menteribesai empu udah ngemendarka projek dikena ngaga semua sekula ti diperambuka nya sebedau PRU13 nya kemari, nyadika siti pengawa nguji ngulihka sukung ari bala pengundi.

Pemendar dikena bejalaika atur pengawa ti enda diubah ari opis Menteri Besai udah 8 minggu

Kelimpah ari tuju dikena nyuap dalam politik ngena projek nya, bisi pengirau ati ba ungkus ti kelalu tinggi ke pengawa nya.

Sarawak Report udah bisi bulih penemu ari bala orang ti landik ba pengawa begagaka rumah, ti madahka sida tekenyit bendar meda pinta ngaga 15 buah rumah sekula di menua pesisir Sarawak udah diletak ba ungkus RM559 juta.

Raban orang ti deka nanggung pengerugi ari pengawa ti baka tu nya endang bala orang ti diau di menua pesisir empu ti udah lama bendar nganti menua diri bisi sepital enggau sekula digaga ngena wang turu menua ti udah nya semina ditagaka dikena bebelika undi maya bepilihbesai aja.

Sekeda ari bala kontraktor udah nyungkak jaku tanya sida nama ke atur ke selama tu dikena bejalaika projek nya enda dikena, lalu diberi chara pilih bulu ngagai sebuah kompeni aja?

Bala pemerati betanyaka baka ni mutarka penanggul pengelenyau MH370 patut meresa baka ni Najib bejalaika atur perintah iya empu

Sebarang projek ke orang mayuh patut dipejalaika ngena chara undang-undang, sebedau dikeluarka ngena sistem tender tebuka.

Tang penerang ti diterima kami nunjukka projek RM559 juta tu nyerangkum penerang ti penuh korup, dikenataika sebuah kompeni kroni ti disukung siku MP, ngena sebuah kompeni ti bisi kaul manah enggau Abdul Taib Mahmud.

Ke bendar iya, semua pekara dalam spesifikasyen ke projek ti dikenataika ngagai Opis Menteri Besai nya semina ngunda selimpir keretas besaiz A4 ti bisi 4 iti sitak aja.

Sitak-sitak tu dikena ngerintaika 15 buah sekula; penyampau kelas ba tiap iti rumah sekula; rega ke tiap buah rumah sekula enggau pelilih menua ti ngarapka diri ulih narit pulai bala pengundi BN – enggau semina naka nya aja!

Di belakang pengurang dalm semua proses nya enggau kangau rega ti kelalu tinggi, Menteri Besai Najib udah enda ibuhka semua atur ke bendar dikena ngemendarka rebut tender nya. Nambahka nya mega peminta nya nadai diseretaka enggau tapak dini endur rumah sekula nya deka didirika.

Nadai sebarang penerang ti silik dipinta opis Menteri Besai sebedau ngemendarka agih belanja ke projek beungkus RM559 juta nya!

Siti ari chara Peter Chin masuk champur nya ngatur tindak iya ngarika kompeni One BU Redha Services S/B.

Dalam surat peminta ti disukung iya kompeni nya "udah minta bantu iya awakka kompeni sida nya dipaduka nyadi kontraktor bejalaika pengawa ngaga sekula-sekula sekondari di Sarawak nya dikenataika".

Surat ti ke-dua iya dikena iya nyukung pengawa ngaga palan matrikulasi Kuching ngagai sapit Menteri Besai nya mega sebaka munyi isi iya. Peter Chin mega bisi nyebut pasal tanggungpengawa iya dalam pekara nya.

Surat ke-dua ari Peter Chin ti dikena iya nyukung peminta ngaga palan matrikulasi Kuching dikena ngulihka undi ke BN

Salam surat-surat iya nya Peter Chin madahka diri ngarika One BU Redha Services.

Kami deka nanya nama pelasar jaku Peter Chin pasal kompeni One BU Redha Services, enggau pengawa nyukung sida ngulihka kontrak ti beungkus tiunggi nya, ti enda dipejalai ngena atur ngeluarka projek ti patut enggau betul?

Kontrak ti beungkus beratus juta ringgit udah ulih siku kaunselor, bini iya enggau anak indu iya

Sarawak Report ulih ngamatka penerang pasal sebuah kompeni ti dalam gerempung tu iya nya Redha Services ti bepalan di Sarawak, ti bedau lama tu udah bisi kena pilih Taib Mahmud ngaga sayap opis pengawa perintah ba Astana Menua Sarawak.

Tu ngayanka kelai ti nunjukka Taib, ti nyadi Kepala Menteri maya nya kemari, endang udah ngelanggurka deka nukar pangkat iya empu nya nyerumba iya ti agi deka mengkang bekuasa ba menua Sarawak nya.

Pengarah enggau pemegai syer dalam Redha Services iya nya Abdul Rani Bin Haji Mohd Pauzi, ti megai 60% ari semua syer dia. Abdul Rani nya siku kroni ke Taib Mahmud, ti datai ari menua Mukah.

Di Mukah Abdul Rani nya siku kaban Majlis Daerah ngarika parti PBB, ti mega nyadi Pengerusi dalam Komiti Perambu Pemansang, Kereja-kereja enggau Pejalai Perengka Pengangkut, lalu mega nyadi kaban Komiti Rampa menua enggau Dagang Temuai.

Dua iku agi kaban pengarah sama enggau Abdul Rani dalam kompeni Redha Services nya bini iya empu (Rahmah Binti Mohti – megai syer 35% dalam kompeni) enggau anak seduai iya (Siti Hazura – 5% syer).

'Rumah berega murah' kala nyadika buah kenang orang mayuh, tang mayuh agi ari rumah nya digaga Koperasi Koppes ba Jalai Bako, endang digaga ngambika dijual ba rega ti mar dikena sida ngulihka untung RM2 juta.

Nitihka rekod ari opis CIDB, sida Abdul Rani sebilik nya nadai ngembuan pengelandik dalam pengawa ngaga rumah, tang sida suah mujur bulih kontrak bejuta-juta ringgit ari perintah Menua Sarawak.

Tu nyengkaum projek ngaga rumah RM19.8 juta ba Jalai Bako, Kuching, ti dipejalaika Koperasi Koppes Sdn Bhd enggi perintah menua.

Koperasi Koppes nya diarahka adi ipar Taib Mahmud, Abdul Aziz Husain, ti kala nyadi pengurus dalam Sarawak Energy.

Bisi tiap iti ketegal dikena kitai pechayaka projek nya udah kala diturunka ngaga siku orang ulih Redha Services, ti nadai ngembuan sebarang pengelandik ba pengawa begagaka rumah.

Duit agih belanja RM559 juta dikena ngaga sekula meri reti ti besai ngagai sebuah kompeni ti mit, taja pan udah tembu PRU13, tang nadai serepik pan ari rumah sekula nya udah dipunka.

Redha Services enggau sekeda ari projek sida ti besai-besai ti udah dikemendarka Perintah Sarawak. Projek tu nyadi makin tendu taja pan ungkus iya RM559 juta

Ba pekara ti bisi siti sada nyawa betanyaka pematut kaul Peter Chin enggau Redha Services dalam projek tu.

Jaku tanya tu betul sereta patut, ti endur Sarawak Report pechayaka Peter Chin nya patut nyaut, baka nya mega Menteri Besai enggai sapit iya dikena nerangka pasal kaul sida nya enggau pangan diri.

Taib Mahmud mega patut mansutka jaku pasal tanggungpengawa iya dalam pekara tu, laban RM559 juta tentu enda diagihka ngagai Sarawak enggau nadai buah penemu ari iya ti nyadi Kepala menteri, Menteri Pekara Wang enggau Menteri Perambu Pengawa ti dipegulaika sekali.

Ni semua sekula nya, Muhyiddin?

Berebak enggau nya, kelimpah ari randau bekaul enggau sekula dalam rambau bepilihbesai, utai ti nyelai nya, sereta bepilihbesai tembu dipejalaika, projek nya pan lesap.
Ngemendarka agih belanja enggau chara ti besak kejang deka bepilihbesai nya udah enda dikemesaika lalu enda didinga agi udah nya.

Muhyiddin udah nemua ngagai serata menua Sarawak dalam beberapa minggu tu lalu betaburka semaya dikena ngemansangka perengka dikena ba sekula ti udah lama enda dikibuhka ba menua nya, lalu diumbaka enggau jaku tangkan iya madahka perintah diatu benung dituntung pengusut ba belanja.

Iya nadai nyebut pasal projek beungkus bejuta-juta ringgit ti kala dikemendarka sebedau bepilihbesai nyin kemari, ti dipeda udah lebih ari belanja ke bendar ba perengka ti dipeguna bendar lalu bepiak ngagai sebuah kompeni kroni BN.

Ke bendar iya, semina ba minggu nyin kemari menteri Pelajar nya nyebut iya patut "meresa baru rintai projek ngagai sekula dalam Perambu Malaysia ke-10 bekaul enggau projek ba SK Tellian nya", taja pan sekula nya bisi dalam rintai 15 buah sekula ti udah dikemendarka ngagai One BU Redha Services sebedau PRU13 nyin kemari.

Jaku semaya BN ti betandu-tandu nya nerangka baka ni gaya rampa sekula di menua pesisir nya majak rusak sereta luya, dipejalaika perintah BN – baka nya mega pengelenyau belanja ti udah diagihka dikena ngemansang enggau miki rumah sekula.

Dalam taun 2012 Repot Ari Auditor General bisi serebana madahka kenyau ari 2008 RM1.05 bilion udah dikemendarka ke pengawa kontrak ngaga rumah di Sarawak, tang semina mimit aja projek ti udah dipejalaika.

Kelimpah ari nya, enti One BU Redha Services enggau bala orang ti bekaul enggau kontrak 15 buah sekula nya tau nerangka, udah ngujungka kita ningaka ensera pasal pengelenyau duit perintah bebilion-bilion ringgit.

Siku ari orang dagang tebilang di Malaysia – tang baka ni Teo enggau sebilik tu bisi kaul dalam kompeni See Choy Chan?

Bisi sebengkah pekara dalam skandal tu, iya nya sebuah kompeni ti sama bisi dalam konsortium nya, One BU Sdn Bhd.

One BU S/B udah direjesita ba ujung taun 2011 lalu nyadi sebengkah kompeni kerubung ti endang nadai pengelandik dalam pengawa ngaga rumah. Tang pengarah besai dalam kompeni siku ari orang dagang tebilang Malaysia, Teo Chiang Hong.

Raban sida Teo sebilik bejalaika sebengkah kompeni pengaga rumah, See Hoy Chan, ti bisi indu-opis di Semenanjung Malaysia lalu ngena pala surat One BU Redha Services Sdn Bhd.

Tambah mega sepuchuk surat ari konsortium One BU Redha Services ngagai Menteri Besai nya dikirumka semina dua hari sebedau projek nya dikemendarka, ti madahka konsortium nya nyadika sebagi ari gempung kompeni-kompeni See Hoy Chan.

Tang Sarawak Report udah enda mujur bulih jaku penetap ari See Hoy Chan ba minggu tu ti madahka Teo tauka kompeni nya bisi kaul dalam perambu ngaga 15 buah rumah sekula di menua Sarawak nengah kontrak ti enda ditender ba ungkus RM559 juta.

Surat ti disain Abdul Rani ti udah ngaku konsortium nya endang sebagi ari gerempung kompeni dalam See Hoy Chan

Diasuh tinduk bepadat ba bilik ti mit – sida ari sekula menua pesisir di Sarawak ti balat bnedar meri malu ke perintah

Terang bendar, dalam pengawa besak ngemendarka projek nya Menteri Besai engka enda meresa pengelurus One BU Redha Services, bisi orang deka ngarapka projek setengah billion ringgit, deka ninggalka mayuh jaku tanya bekaul enggau pengelandik ngatur pejalai projek nya.

Kes tu udah nyungkak jaku tanya di belakang pemutus penemu ngasuh One BU Redha Services nya nyadi sebagi ari gerempung kompeni See Choy Han lalu sapa ti ngelala nya?

Sain enggau chap jari ba surat nya endang ngaku konsortium nya sebagi ari gerempung kompeni See Hoy Chan nya endang enggi Abdul Rani Bin Pauzi, enggau siku orang dagang ari Sarawak, Koh Jik Seng. Sekali agi, penerang ti silik nya dipinta ditu.

Berebak enggau nya, terang bendar, sekali agi rayat Sarawak, ti ngelama tu arap bendar ke menua diri bisi rumah sekula ti jelan pemesai sereta enda kelalu mar digaga ke sida, diatu sekali agi kena tipu nengah skandal makai suap ba tikas ti pemadu tinggi.

Perkasa Dikemendarka TAMA / PKR Ditagang Tama Ke Sarawak – ‘Meli Undi’ Rambau Bepilih Mit Sarawak

Perkasa Dikemendarka TAMA / PKR Ditagang Tama Ke Sarawak – ‘Meli Undi’ Rambau Bepilih Mit Sarawak

Recent Comments

Archive