05:48:00

RM 10,000.00 ungkup 300 iku peranak Long Jegan BorneoPost Online | Borneo , Malaysia, Sarawak Daily News » Berita Iban - New 2 Borneo


RM 10,000.00 ungkup 300 iku peranak Long Jegan

Posted: 28 Feb 2014 05:32 PM PST

BARAM: Peranak menua Long Jegan ke dituntung penusah angus udah nerima bantu ti keterubah kemari ari MP Baram, Anyi Ngau.

Anyi ke datai kia urung pukul 12.00 tengahari ngena kerita 4WD, udah nyuaka bantu RM 10,000.00 ngagai lebih 300 iku peranak menua nya ke udah angus rumah, ba penusah ke nyadi kena Hari Satu tu tadi.

"Kami berasai sinu endar ati meda penusah ke udah nuntung kita. Taja pia, aku ke nyadi pengari rayat ditu begempung enggau Menteri Muda Perengkaguna Mensia Mayuh (Penyambung Ai), Datuk Sylvester Entri Muran enggau naka ulih deka mantu kita ke udah tasah dituntung penusah nya," pia ku iya ke ke berandau enggau pemberita di Long Jegan ditu kemari.

Anyi mega ngelalau sida anang besalahka pangan diri ketegal penusah nya tang meransang sida beratika penusah nya nyadika sebengkah ajar.

Pengari ari genturung pendiau nya,Henry Kasim, 57, kemari madahka, naka ke diatu sida nadai udah nerima sebarang bantu pemakai tauka gari ari ejensi perintah.

"Diatu, bisi sekeda kami ditu nadai palan endur ngenduh. Kami arapka perintah tauka ejensi ke bekaul mantu kami ditu," pia ku iya.

Penusah nya udah nyadi urung pukul 1.15 tengahari, kena Hari Satu sereta udah ngeretungka 44 pintu ruang bilik ke diuan lebih 300 iku mensia.

Maya nya, seiku apai enggau anak iya udah betu ba jari, kaki enggau mua ketegal nguji deka ngerara api nya.

Pagi kemari seduai udah dianjung ngagai Sepital Besai Miri ngambika diperubat.

Print Friendly

Pengawa nyadung baucher BR1M di Marudi dipenyadi enggau lanchar

Posted: 28 Feb 2014 05:32 PM PST

MARUDI: Beribu iku mensia nedat ringkat baruh Bagi Akaun Opis DO Marudi ketegal deka meresa nama sekalika sida bulih nerima Duit Bantu 1Malaysia (BR1M), kena pagi Hari Empat tu tadi.

Ketuai ba Bagi Akaun Opis DO Marudi, Mohd Noor Aus madahka, urung 1,000 iku mensia mayuh ba kandang menua nya udah datai nedat opis meresa nama sereta ngambi baucher BR1M nya.

Ku Mohd Noor said, sehari tu (Hari Empat enggau Hari Lima), kami deka nyadung baucher nya ngagai bala penerima bantu nya. Diatu kami bisi lebih ari 2,000 iti baucher RM650, RM450 enggau RM300. Laluh baucher nya deka disadung kami kena Hari Satu minggu baru, pia ku iya seraya minta bala penerima nya anang irau ati laban enti nama sida bisi ba rintai nama penerima, sida tetap nerima baucher nya.

Seiku penerima, Awang Sujai ari Kampung Pemindahan, ti nerima BR1M RM650  madahka diri berasai gaga endar ati sereta meri terima kasih ngagai perintah laban udah berundingka kami ti mit penatai pemisi tu. Iya mega ngemanjaika terima kasih ngagai Menteri Besai, Datuk Seri Najib Tun Razak laban ke mentas ati enggau rayat.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Pengawa beripai patut diterenak ngagai raban nembiak, ku Edmund

Posted: 28 Feb 2014 05:31 PM PST

SRI AMAN: Opis Pelilih Mit Pantu udah ngaturka Program Beripai enggau Program Jiwa Murni meresi kandang opis nya apin lama ke udah.

Urung 20 iku raban opis begulai enggau peranak menua nya enggau ba program ti dipenyadika pemantu Kaban Parlimen Sri Aman, Edmund Pirang ngarika Masir Kujat.

Lebuh ke bejaku maya bejadika pengerami nya, ulah orang besai tuai ke begempung lebuh ke ngereja pengawa beripai nya patut mega diterenak ba raban nembiak.

"Perintah amat ngelaluka gerempung tauka ejensi ngatur sebarang program di nengeri tu ke malut raban nya ngambika ulah ke begempung nya enda lesap ngapa", pia ku iya.

Sama bisi ngulu program nya, DO Sri Aman, Ismawie Salleh, Dua iku SAO ari Opis Pelilih Sri Aman, Azmi Morshidi enggau Hendry Kran, Pengulu Entika enggau bala ke bukai.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Adenan angkat sumpah nyadi KM baru kemari

Posted: 28 Feb 2014 05:16 PM PST

by Chris Bishop. Posted on March 1, 2014, Saturday

KUCHING: Kepala Menteri Sarawak ke-5 Tan Sri Datuk Amar Adenan Satem ngangkat sumpah ba mua Tuai Pemegai Menua Tun Datuk Patinggi Abang Muhammad Salahuddin ba Astana, Petra Jaya urung jam 9:30 pagi kemari.

Adenan ngepunka pengawa ngangkat sumpah nya pengudah nerima surat chiri ari Salahuddin lalu ditampung enggau pengawa macha semaya angkunka menua sereta nyain surat akun pangku pengawa.

Iya disempulang bini iya Pn Sri Datuk Jamillah Anu enggau sida sebilik sereta bela dikemata Sapit Kepala Menteri Datuk Patinggi Tan Sri Alfred Jabu, Menteri Kanan Tan Sri James Masing enggau Tan Sri William Mawan kelimpah semua raban menteri ke bukai.

Adenan, 70, ke mega  ADUN Tanjung Datu nganti penuduk Pehin Sri Abdul Taib Mahmud ti udah mangku pengawa nya kenyau ari 26 March 1981.

Ba singkang pejalai politik, iya ke dulu agi ari tu mangku pengawa nyadi Menteri ba Opis Kepala Menteri sereta penyanding penemu ngagai kepala menteri kenyau taun 2011 kala mega nyadi Menteri Muda Pemansang Tanah Sarawak, Menteri Pemansang Rama, Menteri Betanam Betupi enggau Industri Pemakai Sarawak, Menteri Pengeraja Asal enggau Rampa Menua Sarawak.

Ada kenaka 27 Januari 1944, kepala menteri Sarawak ke 5 tu ngepunka pengawa besekula di St Joseph Kuching lalu nampung pelajar undang-undang ngagai Universiti of Adelaide dalam taun 1970.

Iya berengkah enggau orang ba pengawa bepilih (mit) dalam taun 1979 ke alai iya menang ba sitak DUN Muara Tuang.

Adenan ke nyadi ADUN Muara Tuang pengelama 5 penggal ngalih ngagai DUN Tanjung Datu ba pengawa bepilih besai nengeri ba taun 2011.

Iya mega kala bediri lalu menang ba pengawa bepilih parlimen di sitak Batang Sadong dalam  taun 2004.

Bekenangka pengawa chiri nya, Menteri Dagang Temuai enggau Pengawa Berumah Datuk Amar Abang Johari Tun Abang Openg ngembuan runding ke manah lebuh ke ditanya pemberita senentang pekara nya.

Ku iya, kepala menteri ke baru (Adenan) deka ngembing  nengeri  Sarawak ulih nempa pemujur ke manah  agi jemah ila.

"Sehari tu nyadi sebengkah agi sejarah besai ke ditempa nengeri Sarawak. Kepala menteri ke baru ngembuan mayuh peneleba ke alai aku udah bekereja begulai enggau iya kenyau ari taun 1980"  ku iya.

Print Friendly

Mayuh orang labuh ai mata TYT meri selamat tinggal

Posted: 28 Feb 2014 05:16 PM PST

KUCHING: Kandang Astana Nengeri ti penuh laban orang mayuh kemari penuh enggau penyinu lebuh  Tun Datuk Patinggi Abang Muhammad Salahuddin enggau bini iya Toh Puan Datuk Patinggi Norkiah bejalaika pengawa ke penudi nyadi Tuai Pemegai Menua.

Urung pukul 11.10 pagi  nyerumba Adat Beserara iya ke badu nyadi Tuai Pemegai Menua kemari, Tun Salahuddin diberi basa meresa baris Pasukan Gerakan Am Polis diRaja Malaysia.

Nambahka nya, Tun Salahuddin enggau Toh Puan mega ngambi awak betabi seraya beterima kasih enggau meri jaku selamat tinggal ngagai orang mayuh ke bisi ngulu pengerami nya.

Dulu ari nya Tun Salahuddin nyuaka surat chiri sereta ngemataka pengawa angkat sumpah Kepala Menteri Kelima Tan Sri Datuk Amar Adenan Satem.

Sama ngulu pengerami ke penudi Tun Salahuddin nya kemari, Adenan, Sapit Kepala Menteri Datuk Patinggi Tan Sri Alfred Jabu Numpang;  Menteri Pemansang Rama Tan Sri William Mawan; Menteri Pemansang Tanah Tan Sri Datuk Amar James Jemut Masing, Speaker Kunsil Negeri Datuk Amar Mohd Asfia Awang Nassar sereta bala menteri, bala menteri muda, bala kaban parlimen, bala kaban kunsil nengeri  sama disempulang bini enggau laki diri .

Tun Salahuddin sebedau tu kala nyadi Tuai Pemegai Menua kena 2 April 1997 ngagai 1 April 1981 sebedau dichirika baru (TYT) 6 Disember 2000 ngagai 28 Februari 2014, diatu diganti Pehin Sri Abdul Taib Mahmud.

Kelimpah ari nya, Menteri Pengintu Pengelantang Orang Indu enggau Pemansang Raban Bansa Datuk Fatimah Abdullah lebuh dikerandau pengudah ti ngulu atur pengawa nya kemari madahka Tun Salahuddin seiku ketuai ti ngembuan ulah ke lembut ati sereta manah enggau semua orang.

"Aku pechaya semua kitai berasi sinu ati lebuh iya (Tun Salahuddin) ngetu nyadi TYT. Iya dikesayauka semua orang laban ti ngembuan ulah ke lembut ati, ngemaruh diri, semampai tuchum ngagai semua orang enda ngira sapa, lalu maya betemu enggau iya kitai pan semampai dipeda senang ati.

"Aku ngarika semua orang indu sereta ruang bilik di Sarawak besampika iya terus dalam bungkur pengelantang sereta bepengerai," ku Fatimah.

Print Friendly

Aku meri sukung besai ngagai Kepala Menteri baru: Jabu

Posted: 28 Feb 2014 05:16 PM PST

KUCHING: Sapit Kepala Menteri Datuk Patinggi Tan Sri Alfred Jabu besemaya deka meri sukung ke pemadu besai ngagai Kepala Menteri ke baru baka sukung ke udah diberi iya ngagai Pehin Sri Abdul Taib Mahmud.

"Aku nyamin deka meri sukung enggau enda bebagi ngagai kepala menteri ke baru, Tan Sri Datuk Amar Adenan Satem.

"Aku pechaya ulih bekereja begulai enggau iya (Adenan) lalu nampung pengawa manah ti udah dipejalai Taib ungkup penegap politik, penyerakup pupu raban bansa, pengelikun enggau pengelantang Nengeri Sarawak,"ku iya.

Iya mansutka jaku tu lebuh dikerandau pemberita pengudah ngemata pengawa angkat sumpah kepala menteri baru ba Astana, Petra Jaya ditu, pagi kemari.

Ba pengawa nya, Adenan dichiri nyadi kepala menteri Sarawak ke-5 nganti Taib ti udah bejalaika pangku pengawa kepala menteri pengelama 33 taun.

Adenan ngangkat sumpah ba mua Tuai Pemegai Menua Tun Datuk Patinggi Abang Muhammad Salahuddin.

Ba kaul ke sama, Menteri Dagang Temuai enggau Pengawa Berumah Datuk Amar Abang Johari Tun Abang Openg bela ngembuan runding ke sama maya ditanya pemberita senentang pekara nya.

Ku iya, kepala menteri ke baru (Adenan) deka ngiring Sarawak nempa pemujur ke besai agi jemah.

"Sehari tu nyadi sebengkah agi sejarah besai ke ditempa nengeri Sarawak. Kepala menteri ke baru ngembuan mayuh peneleba ke alai aku udah bekereja begulai enggau iya kenyau ari taun 1980,"ku iya.

Abang Johari ke mega seiku entara tiga ketuai ti dikejaku dichiri nyadi kepala menteri ke-5 dulu agi ari tu madah diri enda ngembuan ati kemaru pengudah iya enda dipilih nyadi kepala menteri.

"Nadai jaku tauka ngembuan runding ke bansa nya. Aku deka meri sukung ke pemadu besai ngagai Adenan,"ku iya.

Seiku agi chalun kepala menteri, Menteri Pengatur Pengereja Asal enggau Rampa Memua Datuk Amar Awang Tengah Ali Hassan pechaya Adenan deka nampung pengawa manah ti udah dikereja Pehin Sri Taib.

Iya madah Adenan ngembuan mayuh peneleba lalu iya deka nentuka polisi perintah dipejalai enggau terit ungkup nempa pemansang ke besai agi.

"Atur besilih kuasa sehari tu dipejalai enggau lanchar ke alai kitai nyadang transformasyen tu ukai semina mai pemansang ba pekara luar , kitai mega nyadang semua pupu raban bansa  deka bela ngasaika pemansang.

"Raban ketuai ke diatu deka bekereja enggau Adenan ngambika tau ngenukuka Nengeri Sarawak nyapai juluk ti udah ditetap,"ku iya.

Print Friendly