Kus Nengkebang Jaku Sempama Iban 23 Mac tu BorneoPost Online | Borneo , Malaysia, Sarawak Daily News » Berita Iban - New 2 Borneo |
- Kus Nengkebang Jaku Sempama Iban 23 Mac tu
- PVTMS udah ngatur AGM Ketiga
- Sejarah patut diajar enggau chara ti ngerinduka ati
- SUPP dilalau neladan SPDP mutarka penyarut parti
- 10 iku lelaki ditangkap makai dadah
- Gawai 2014 renggat Sibu disempulang enggau Program Bejalai Bebala Mayuh
| Kus Nengkebang Jaku Sempama Iban 23 Mac tu Posted: 21 Mar 2014 09:33 AM PDT SIBU: Kus Nengkebang Jaku Sempama Iban deka diatur ba Opis Syarikat Sungai Teras di Sibu Jaya kena 23 Mac ti deka datai. Kus ke diatur Gerempung Penulis Iban Sarawak (SIWA) tu deka belabuh ari pukul 8 pagi nyentuk pukul 5 lemai. Nitihka dipadah pengari kus tu, Casper Kayong Umping, pengawa nutup kus tu ila deka dipenyadika Kaban Kunsil Nengeri (ADUN) Tamin Datuk Joseph Mauh Ikeh. "Kus tu mega mengkang agi tebuka ngagai mensia mayuh ke bisi ati deka belajar enggau dalam Jaku Sempama Iban," ku iya madah ngagai pengarang berita, kemari. Nambahka nya, ku iya, bala ke enggau kus tu ila mega deka diberi setipikit magang. Bayar enggau kus iya nya RM30 seiku. "Kitai ngarapka bala mayuh ulih datai bela ngambi bagi ngulu kus tu ila laban tu sebengkah ari chara kitai ngetanka jaku asal bansa Iban. "Kelimpah ari nya, penatai kita mandangka sukung ngagai pengawa kitai ngetanka jaku asal bansa diri," ku iya madahka baru. Pengawa ngerijista enggau penerang bekaul enggau kus tu tau ditanya ngagai Kayong empu nengah lumur 019-8142510 tauka pengajar Harry Usop Umbar (011-14019115) enggau Ina Mawas (010-5211767).   |
| Posted: 21 Mar 2014 09:33 AM PDT SIBU: Gerempung Veteran Soldadu Malaysia Nengeri Sarawak (PVTMS) udah ngatur Aum Besai Ninting Taun (AGM) Ketiga di Dewan Mayuh Guna Gerempung Bansa Dayak Bidayuh (DBNA) Kuching, bedau lama ke udah. Aum nya dipenyadika Menteri Muda Dagang Temuai ke mega Penyanding Penemu PVTMS Datuk Talib Zulpilip. Sama bisi ngulu Presiden PVTMS Thomas Ling Kui Eng sereta Pengarah Opis Pekara Veteran Raban Soldadu Malaysia (JHEV ATM) Sarawak Mejar Monday Juhid. Dalam jaku iya, Thomas madah kuing gerempung endang begunaka kerejasama semua kaban gerempung kelai sukung ngambika gerempung terus relevan ke penguntung enggau pengelantang kaban. Berindik ari nya ku iya, tetiap kaban enda tau enda bejalaika tanggungpengawa sereta diansak ngulu aum enda ngira dini endur sida diau ngambika ulih meri buah runding enggau penemu ba kuing gerempung. Thomas mega madah sepenyampau 79 aktiviti udah diatur PVTMS sepemanjai 2013. Iya mega madah urung 18 isu udah dikenatai ba program berandau begulai enggau Ketuai Pengarah JHEV Enggau Veteran ATM di Lundu bedau lama. "Nya alai, gerempung tu ngarapka sebarang isu ti udah dikenatai deka dikemerat sereta diperunding," ku Thomas. Ba pengerami ke sama, bisi 28 kaban gerempung udah diberi Pingat Jasa Malaysia (PJM) ke disuaka Talib. Kelimpah ari nya, bisi 10 iku kaban mega udah nerima cheremin mata rabun semak ke diagihka gerempung. |
| Sejarah patut diajar enggau chara ti ngerinduka ati Posted: 21 Mar 2014 09:33 AM PDT by Jacqueline David. Posted on March 22, 2014, Saturday KUCHING: Sabjek Sejarah patut diajar enggau chara ke ngerinduka ati sereta interaktif, ari ke semina ngajar ngingatka taun sereta utai ke nyadi maya nya, ngambika sabjek nya dipeda muntang dipelajar sereta ke enda ngasuh leju. Ba taun 2013, sabjek Sejarah digaga nyadi sabjek ke enda tau enda pas kelimpah ari sabjek Bahasa Malaysia ungkup nembiak Sijil Pelajaran Malaysia (SPM) ti deka nerima setipikit sida iya. Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah lebuh atur baru tu ti madahka sabjek Sejarah ke enda tau enda pas, timbal ke diterima nyangka endang udah disadang baka enda ngelantangka ati sekeda nembiak. "Laban kitai nemu bisi sekeda ari anak kitai enda entu rindu belajar sabjek Sejarah, ba senentang deka ngingatka haribulan enggau utai ke nyadi maya nya. "Sabjek Sejarah patut diubah chara ngajar enti ngambika tau merindang ati sereta muntang dikeingatka. Iya ukai semina ngajar ngingatka haribulan, utai ke nyadi tang sabjek nya patut diajar chara 'interaktif' sereta ngerinduka ati kitai," ku Fatimah. Iya madah baka tu lebuh bejaku ba atur pengawa beserimbai enggau mantaika pemutus peresa SPM 2013 renggat Sarawak di Auditoriam Opis Pelajar Menua Sarawak (JPS) ditu, ensana. Fatimah besemaka peneleba iya di Bristol, United Kingdom beratika sabjek Sejarah diajar di universiti tauka di kelas di menua nya, ukai pengajar ke mayuh bejaku tang nembiak. "Nembiak diajar berunding, belakun, enggau ngaga kelas nya nyadi kelas sesi 'interaktif'. Lebuh siti-siti sabjek ke diajar bansa nya, iya deka ngaga sabjek nya ngerinduka ati, berunding chara kritikal lalu bisi kaul intereksyen dalam kelas. "Sabjek ke diasaika kitai pedis endar dipelajar sereta enda ngerinduka ati laban mayuh endar utai ke patut dikeingatka," ku iya lalu nambah chara ngajar Sejarah nunda chara tu deka diteruska ngambika mayuh agi nembiak rinduka sabjek nya. Iya madah, maya 2016 ila, sabjek English (BI) deka nyadi sabjek ke enda tau enda pas kelimpah Bahasa Malaysia enggau Sejarah. "Kitai patut nyendiaka diri kelebih agi anak-anak kitai di menua pesisir laban ari sukut pengelandik dalam BI patut dipajakka ngambika nembiak kitai ulih pas lalu enggau nya deka nyukupka atur ngulihka setipikit SPM, iya nya pas BM, Sejarah lalu 2016 pas BI," ku iya. Kelimpah ari nya, Fatimah madah pemutus SPM 2013 sekali tu ke pengabis manah dalam timpuh 10 taun ari taun 2004. "Pemujur tu meri kelala sukung ari semua renggat komuniti ke bisi bekaul enggau pengawa ngajar. "Tang kitai mega meri kelala ke pengiruh apai indai ke enda jera meri sukung mural sereta jaku ajar, kelimpah ngiring enggau ngembing anak sida iya. "Tentu pemujur tu enda ulih dijapai enti ukai orang empu ke deka beperesa nya belajar enggau bebendar agi. Kitai pan kala nyadi nembiak sekula, nyendiaka diri kena beperesa ukai utai ke nyadi semalam aja tang siti pejalai ke jauh, gawa bebendar agi sereta dibantu ulih pengajar enggau apai indai," ku iya. Mayuh macham aktiviti ke udah dijapai JPNS (renggat pelilih menua enggau renggat sekula), lalu iya meri asil ke manah. Fatimah madah, iya ngarapka program sereta aktiviti ke manah ulih dipajakka ngambika taun 2014, pemutus peresa SPM deka nyapai pemutus ke pengabis manah agi ari ke udah. "Pengajar kelebih agi ke udah bebendar beratika nembiak ke diajar ukai semina pas, tang pas enggau nyulut dalam tiap peresa ke diambi sida iya…..Pajakka pengawa kita taja pan mayuh penekul ke ditapi laban mayuh ubah ke nyadi dalam pengawa perintah ngaga transformesyen pelajar di Malaysia," ku iya. Sama bisi ngulu pengawa nya Direktor JPS, Abdillah Adam, bala apai indai sereta nembiak sekula ari mayuh bengkah sekula di menua tu ke sama ngambi pemutus peresa sida. |
| SUPP dilalau neladan SPDP mutarka penyarut parti Posted: 21 Mar 2014 09:33 AM PDT KUCHING: Dua bengkah raban ke ngembuan runding ti bebida dalam SUPP ke diulu presiden Tan Sri Peter Chin enggau ketuai pampang Sibu Dato Sri Wong Soon Koh patut neladan SPDP ti udah ngelengka laya lalu begempung manah baru, ku mandal presiden SUPP ke dulu suba Datuk Yong Khoon Seng. Yong ke kala mangku pengawa nyadi Sapit Menteri Kereja Raya enggau MP Stampin ngasai nadai pekara enda ulih diputar enti kededua piak enggau ati ti lurus deka bebaik ungkup pemaik parti. "Aku agi ngarap sida ulih ngelengka bida runding lalu bebaik. Bedau laun ungkup sida bebaik manah, tiap penanggul sigi bisi jalai dikena kitai mutar lalu sida patut ngiga jalai nya. "Engka sida patut neladan SPDP, ti bedau lama tu tadi udah nerima pulai empat ari raban G5 ngagai parti,"ku iya bejaku ngagai pemberita ba sebengkah pengerami ke diatur Wushu Association of Kuching ditu, kemari. Nyaut sekeda tanya, Yong ngasai raban ketuai SUPP ke udah tuai enggau ke udah alah patut meri awak ngagai raban nembiak nguluka parti. Ku iya, raban nembiak dalam parti patut diberi awak nguluka SUPP laban enti enda pia pengelandik enggau penau sida deka tebasau aja. "Aku sigi ngarap raban ketuai ke udah tuai meri awak ngagai nembiak baru, tajapan kurang peneleba, pengelandik sida tau diansah. Beri sida timpuh lima ngagai 10 taun, lalu raban ketuai ke dulu tau meri ajar ngagai sida,"ku iya. Yong ngasai ketuai SUPP ke diatu kurang pengangkun ke pemaik enggau penegap parti enti dibandingka enggau raban ketuai maya jeman 20 taun suba. "Aku berani madah penyayau sida ke parti udah majak lenyau,"ku ketuai ke beumur 72 taun nya. |
| 10 iku lelaki ditangkap makai dadah Posted: 21 Mar 2014 09:33 AM PDT SIBU: Polis Pampang Narkotik enggau Marin ditu udah mujur ngetan 10 iku lelaki dipelabaka benung makai dadah ba sebuah rumah di Kampung Hilir lemai Hari Tiga tu tadi. Pengawa nangkap nya ti betuaika Insp. Tengku Faizal urung pukul 3.00 lemai tu tetemuka semilan saspek bebansa Melayu enggau seiku bebansa Iban beumur urung 20-an nyentuk ke 30-an. Maya polis ke datai ba palan nya, tiga ari saspek nguji ngelarika diri nuju ngagai belakang rumah sebedau terejun ke sungai. Taja pia, ulah sida ke terejun ke sungai puntan lebuh seraban polis pampang Marin udah nganti ba sungai lalu nangkap sida. Sepengudah sida ke ditangkap, polis tetemuka siku ari saspek beumur 25 taun bakal ba pala enggau pah kiba iya lebuh terejun ke dalam sungai. Polis udah nya ngagauka ambulan ngambika ngemai saspek nya ngagai Sepital Sibu. Asil pansik enggau tasat tumu polis, 10 iku saspek nya dipelabaka benung makai dadah bansa methamphetamine ba dalam bilik dia. Semilan saspek ke bukai udah dibai ngagai Balai Polis Sentral ngambika ditasat polis. Kepala Polis Pelilih Sibu, ACP Mohd Kamal Kordi maya ditelefon madahka bisi nerima riput kes nya. "Kesemua saspek ke ditan udah diasuh ngechek ai kemi lalu sida ditemu positif dadah," tandu iya. |
| Gawai 2014 renggat Sibu disempulang enggau Program Bejalai Bebala Mayuh Posted: 21 Mar 2014 09:32 AM PDT by Judan Bungap. Posted on March 22, 2014, Saturday SIBU: Pengerami Gawai Dayak renggat Sibu serak tu deka disempulang enggau program bejalai bebala mayuh, sebengkah program ti baru sereta ngerami agi pengawa taun tu. Chairman komiti pengatur pengerami Ir Alice Jawan madah, sebedau tu sida semina ngatur pengerami nya ba dalam hotel aja. "Tu sebengkah program ke baru ti disempulang kitai enggau Pengerami Gawai Dayak renggat Sibu 2014. "Program tu digelar kitai Program Bejalai Bebala Mayuh Gawai Dayak lalu diperambu deka diatur ba Dataran Bandar Sibu Fasa I tauka ba Pintu Gerbang Sibu," pia ku iya madah maya betuaika Aum Komiti Gawai Dayak Renggat Sibu ditu, apin lama ke udah. Pengerami tu mega diatur begulai Sarakup Indu Dayak Sarawak (SIDS) Pampang Sibu, Gerempung Dayak Sarawak (SDNU) Pampang Sibu, SDNU Pampang Rajang, SDNU Pampang Sibu Jaya enggau Gerempung Orang Ulu (OUNA) Pampang Sibu. Alice madah, batang pengawa pengerami serak tu iya nya Pengerami Makai Lemai Gawai Dayak Renggat Sibu ke deka diatur ba Hotel Kingwood Sibu kena 17 Mei pukul 6.30 lemai. Nandu program bejalai bebala mayuh nya baru, ku iya, program nya deka diatur sebedau tauka sepengudah pengerami makai lemai Gawai Dayak nya tauka dua hari sebedau tauka dua hari ngelui 17 Mei. "Kebuah program tu diatur dikena kitai matak mayuh agi raban bansa Dayak tauka bansa bukai bela ngerami Gawai Dayak kitai taun tu," ku iya sambil madah komiti sida nyangka deka ngatur pekit bejalai bebala mayuh antara kontijen. Kelimpah ari nya, Alice mega madah komiti sida bisi perambu deka ngintu Gawai Dayak ba Rumah Seri Kenangan (RSK) begulai enggau orang tuai dia. "Kebuah pia laban mayuh agi sida ke diau dia bansa kitai Dayak lalu kitai ngasaika sida mega patut diberi awak ngintu Gawai Dayak begulai enggau kitai," pia ku iya madahka baru. Nyebut baru senentang pengerami makai lemai Gawai Dayak serak tu, ku Alice, temuai ke dipebasa bejadika pengerami iya nya Menteri Pemansang Tanah Tan Sri James Masing. "Tikit mija makai lemai tu berengkah dijual sepengudah 5 April tu enggau rega RM1,000, RM700 enggau RM500 seiti mija. "Kitai bisi nyediaka urung 170 buah mija lalu tikit meseti dianjung ngagai komiti sebedau 3 Mei tu," ku iya madah. Program ke bisi diatur lemai nya baka mantaika main asal, nyuaka peransang pelajar, beperindang enggau artis kelimpah Pekit Kumang enggau Keling Gawai Dayak 2014 renggat Sibu. "Pekit Kumang enggau Keling Gawai Dayak 2014 deka dipadahka kitai nangkan ke tu ila nyengkaum perais ungkup pekit nya," pia ku iya. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |