» »Unlabelled » Ari taun 2012 nyentuk diatu enda ulih putar BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

Ari taun 2012 nyentuk diatu enda ulih putar BorneoPost Online | Borneo , Malaysia, Sarawak Daily News » Berita Iban - New 2 Borneo

Ari taun 2012 nyentuk diatu enda ulih putar

Posted: 18 Mar 2014 03:52 PM PDT

by Rengenyan Labang. Posted on March 19, 2014, Wednesday

Chek ditulak bank ketegal salah sepil, dua taun nganti lalu empai dikemetul

KUCHING: Errol Empaga Kijang seiku orang ti kala nyadi polis maya menua siga menya, enda lantang ati ngagai Tabung Amanah Warisan Polis (TAWP) ti lalu bedau ngemetulka penyalah sepil dalam chek ti diberi ngagai iya ba taun 2012.

Nitih penerang ari Empaga ba surat kabar pun taun 2012 iya nerima chek ari TAWP tang enda ditulak bank berindik ari bisi penyalah ba sepil.

Chek nya dianjung pulai baru ngagai Bahagian Hal Ehwal Bekas Anggota Polis di Kuching dalam bulan April 2013 ngambika ditukar ngena chek baru.

Taja pia nyentuk ke seharitu, semak dua taun pekara bekaul enggau chek nya nadai berita agi.

Berindika ari pengelama nganti pekara nya diputar, Empaga ngelempaika penanggul iya ba Ketuai Pampang DAP Sri Aman Leon Jimat Donald ngambika ngenataika pekara nya ngagai piak ke bekaul di baruh Opis Menteri Dalam Nengeri, ti nyaga pengelantang orang ti kala nyadi polis.

Nengah penerang berita ti sama, Leon bepenemu piak ti mutarka pekara nya enda patut beguna timpuh ti kelalu lama.

"Aku enda pechaya bantu ke dipenggi ngagai Empaga patut dikelaun. Iya udah bejalaika pengawa maya menua siga menya enggau menyana sereta teulihka gelar berindik ari pemerani.

"Penyalah tauka penyaru sepil dalam chek nya enda patut nyadi penanggul pengelaun iya nerima bantu ti ditaga ungkup iya," ku Leon.

Leon ti mega sapit chairman DAP Sarawak deka nulis surat ngagai Ketuai Polis Sarawak bekaul enggau kes Empaga, ngambika iya bulih duit ti endang dipenggi ke iya.

Print Friendly

Mauh ngarika Entulu nyuaka 500 baucher BR1M di Skuau

Posted: 18 Mar 2014 03:51 PM PDT

SIBU: Seraban 500 iku peranak menua Nanga Skuau udah nerima baucher Bantu Rayat 1Malaysia (BR1M) ari Kaban Kunsil Nengeri Tamin, Datuk Joseph Mauh Ikeh, ensana.

Mauh nyuaka baucher nya ngarika MP Selangau, Datuk Joseph Entulu Belaun.

Pengerami nya udah diatur ba Balai Mensia Mayuh Skim Pengentap Pendiau Nanga Skuau ditu.

Lebuh bejaku, Mauh ngelalau penerima ngena belanja nya enggau manah.

Ku iya, sida patut naruh sekeda duit nya ke pelajar anak kelebih agi ungkup sida ke nerima pemutus peresa Sijil Pelajaran Malaysia (SPM) 2013, ti deka dipansutka kena 20 March tu ila.

Bekaul enggau Pengawa bepilih Mit di Balingian, iya arapka penyukung meri sukung penuh ngagai chalun Barisan Nasional (BN), Yussibnosh Balo.

Nya kena nentuka BN ulih menang besai sereta teulihka undi majoriti ngelui ari 5,154 iti undi, ti diulih Kaban Kunsil Nengeri sitak nya ke dulu suba, Pehin Sri Abdul Taib Mahmud ba pengawa Bepilih Kunsil Nengeri dalam taun 2011.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Wong: Pemutus nerima pemulai G5 melakangka kaban SPDP bukai

Posted: 18 Mar 2014 03:51 PM PDT

SARIKEI: Chairman Parti Demokratik Progresif Sarawak (SPDP) Pampang Repok, Wong Siew Choo madah, pemutus Presiden parti nya, Tan Sri William Mawan Ikom ke deka bebaik sereta nerima pemulai raban G5 nyadi kaban parti nya dipeda melakangka penemu bala kaban SPDP bukai.

Ku Wong, enti nunda, sebedau ngaga sebarang pemutus lebih agi ti bekaul enggau parti, pekara nya patut dikerandau sereta dikenataika ba aum tikas parti dulu, lebih agi ngagai bala ketuai ba tikas nembiak redak, ukai semina ba tikas Kaunsil Tinggi SPDP aja.

"SPDP Pampang Repok berasai asa endar ati ninga pemutus nya. Kami nemu penyarut nya patut dikemanahka, tang ukai nengah chara tu.

"Enti nunda, sebedau sebarang pemutus ke bekaul enggau parti nya diputus, pekara nya patut sama dikerandauka dulu. Parti nya ukai diempu seiku aja, tang diempu kami semua.

"Penemu orang bukai patut diperundingka dulu sebedau ngambi pemutus ti bekaul enggau parti," ku Wong ditu, ensanus.

Ku Wong nandu, pemutus nya tau ngujungka mayuh orang berasai enda puas ati sereta nambahka agi penyarut ke endang udah nyadi lalu lenyau pengandal ba raban parti nya empu.

"Pemutus nya ukai semina ngasuh pampang SPDP Repok aja berasai enda puas ati, tang mayuh agi pampang SPDP ke bukai.

"Sida semina enda berani mansutka sebana. Ba aku, penanggul tu endang penanggul kami semua sereta patut diputarka enggau manah, ngambi pulaika pemaik ngagai parti," ku Wong.

Berebak enggau nya, Mawan nerima pemulai semua G5 nyadi kaban SPDP kelimpah ari ex-Kaban Parlimen Mas Gading, Datuk Dr Tiki Lafe ke bediri ngatika diri ba Pengawa Bepilih Besai Ke-13 (PRU13) ngelaban chalun Barisan Nasional (BN).

Empat iku ari raban G5 ke diterima pemulai nyadi kaban parti baru iya nya, Kaban Kunsil Nengeri (ADUN) Tasik Biru Datuk Peter Nansian, ADUN Marudi Datuk Sylvester Entri, ADUN Batu Danau Paulus Palu Gumbang enggau ADUN Bekenu, Rosey Yunus.

Ku Mawan, SPDP nerima pemulai raban G5 ngagai parti tang nadai netapka sebarang peminta ba sida.

Print Friendly

Pengawa nyadung baucher BR1M ke menua pesisir ngenyimatka belanja penerima: Elvis

Posted: 18 Mar 2014 03:51 PM PDT

KAPIT: Raban penyadung Bantu Rayat 1Malaysia (BR1M3.0) ke mindah kin kitu, diarika pengereja pengawa ari Opis Pelilih Mit Kapit, pengereja pengawa ari Maybank enggau Polis udah mujur nyadung bantu nya di pesisir sitak Pelagus.

Pekara nya udah ngelantangka peranak menua pesisir, ngambika sida menyati belanja nurun ke pasar ketegal ngambi baucher BR1M nya.

Keterubah endar, raban nya nyadung BR1M di Rumah Ama di Nanga Metah, Batang Rajang ke mungkur sekeda rumah panjai di Merit, Metah enggau Pila kena 10 March, ditangkanka ba Rumah Jinggut, Nanga Bulo, Batang Rajang, mungkur sekeda rumah panjai di ili Merit nyentuk ke Pala Wong Pelagus kena 11 March tu tadi.

Udah nya, sida nyadung BR1M nya ba Rumah Belaja, Nanga Banin di Batang Rajang, mungkur sekeda rumah panjai di ili Pelagus kena 13 March, ditangkanka ba Rumah Robert Ngumbang di Nanga Sebatu, Batang Rajang kena 14 March, mungkur sekeda rumah panjai di ili Menuan, Kapit.

Penudi endar, raban nya nyadung BR1M ba Rumah Pasang di Nanga Ensilai kena 15 March tu tadi.

Sama bisi nyempulang raban penyadung Bantu Rayat BR1M3.0 ke mindah kin kitu nya, Sekretari Politik Kepala Menteri, Jefferson Jamit Unyat enggau Wilson Nyabong Ijang.

Lebuh bejaku, Jefferson meri terima kasih ngagai raban nya ke udah mujur nyadung BR1M3.0 di menua pesisir, sereta ngelempungka ungkus belanja laban penerima enda ibuh nurun ke pasar Kapit nerima BR1M nya.

Pengerami nyuaka BR1M3.0 ungkup sitak Pelagus dipenyadika Sapit Menteri Pemansang Menua Pesisir enggau Kandang Menua, Datuk Alexander Nanta Linggi kena 8 March, ba Dewan Suarah Kapit.

Ku Kepala Opis Pelilih Mit Kapit, Elvis Didit, ba sitak Pelagus aja bisi 12,126 ruang bilik ke nerima BRIM2.0 sebedau tu. Ku iya, nitihka penerang ke dikembuan sida diatu, urung 6,460 iku penerima ke nadai akaun bank. Sida mega melabaka sekali tu, mayuh agi bala penerima laban udah dipechahka ngagai mayuh bengkah kategori baka ruang bilik ke ngembuan penatai pemisi RM3,001 nyentuk ke RM4,000 ti nerima RM450, ke nadai sebedau tu.

Ruang bilik ke ngembuan penatai pemisi kurang ari RM3,000 nerima RM650, lalu orang ke agi rumpas sereta beumur 21 ke atas, ngembuan penatai pemisi baruh ari RM2,000 deka nerima RM300. Orang tuai ke beumur ngelui 60 sereta diau kediri tauka nadai orang ngaling, nerima RM650.

Ku iya, penerima ke enda sempat ngambi baucher BR1M3.0 ba palan endur nyadung bantu nya, sida tau ngambi baucher BR1M nya ba lobi Opis Kompleks Nengeri di Jalai Bleteh, berengkah 17 March enggau hari bukai ti nangkan ke nya, belabuh ari pukul 9:00 pagi nyentuk ke pukul 4:00 lemai.

"Kami deka mantu seagi BR1M nya mengkang bisi. Taja pia, enti penyampau penerima nya majak kurang, kami deka nutup kaunter ba lobi tang muka kaunter ba opis kami di ringkat dua" ku Elvis.

Print Friendly

PKTRDS deka ngatur Aum Besai Ninting Taun kena 22 March tu

Posted: 18 Mar 2014 03:50 PM PDT

SARATOK: Serakup Pengintu Pengelantang Pendiau Tuai Rumah Pelilih Saratok (PKTRDS) deka ngatur Aum Besai Ninting Taun (AGM) kena 22 March tu.

Aum nya deka diatur ba Victoria Inn Saratok, berengkah pukul 8 pagi.

Ku tukang pengerembai berita PKTRDS, pekara ti deka dikerandauka maya nya; bejuraika ripot ari Chairman PKTRDS, Tukang Wang bejuraika ripot pasal pekara Wang, Sekretari bejuraika ripot pasal atur pengawa enggau sekeda pekara bukai ke bisi disungkit kaban gerempung.

Berebak enggau nya, PKTRDS meransang semua pengulu, pemancha enggau Tuai Rumah datai bebala mayuh ngulu aum nya ila.

PKTRDS mega muka awak ngagai bala pengulu, pemancha enggau Tuai Rumah ke bedau, ngerijista nyadi kaban PKTRDS maya nya ila.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

30 SEKPOL ngangkat sumpah mangku pengawa

Posted: 18 Mar 2014 03:50 PM PDT

by Jacqueline David. Posted on March 19, 2014, Wednesday

KUCHING: Empat ari 30 Sekretari Politik Kepala Menteri Sarawak betuaika Ketuai Sekretari Politik, Abdullah Saidol, ari empat komponen parti Barisan Nasional (BN) antara mua baru ke ngangkat sumpah mangku pengawa nya ba mua Kepala Menteri Tan Sri Datuk Amar Adenan Satem, di Wisma Bapa Malaysia, kemari.

Abdullah madah 30 SEKPOL tu dipilih ari empat komponen parti BN menua tu sereta pangku pengawa nyadi kepala sekretari politik agi mengkang dipangku Abdullah empu.

"Aku beterima kasih ngagai Kepala Menteri laban agi maduka aku nyadi Ketuai Sekretari Politik ba Opis Kepala Menteri.

"Dalam aum kami tadi (aum betambit pintu), Kepala Menteri madahka pengawa sekretari politik deka dikemanahka agi. Iya deka meda semua sekretari politik menua tu nemu sejarah politik Sarawak (pengabis kurang), lalu deka meda semua sekretari politik orang ke pro-aktif dalam kandang iya ke nyadi Kepala Menteri," ku iya.

Iya madah baka tu lebuh dikerandau pengudah abis atur pengawa sekretari politik ngangkat sumpah di Wisma Bapa Malaysia ditu, kemari.

Abdullah  ti mega ADUN Semop madah, ba senentang pejalai atur pengawa opis SEKPOL, deka digaga manah agi, nyengkaum minta semua SEKPOL seruran besedia ba utai ke nyadi ngelingi sida.

"Mayuh batang pengawa kami udah tu ila deka berubah. Kepala Menteri minta semua SEKPOL orang ke pro-aktif laban enti sida iya enda chakah, nya nyangka ulih ngujungka tuduh pengawa maya abis timpuh enda disambung baru.

"Kepala Menteri mega ngasuh SEKPOL meri kerejasama penuh ngagai semua Kaban Kunsil Nengeri enda ngira ari komponen parti BN ni ke patut ditulung.

"Lalu pia mega, seruran meri kerejasama ukai semina ngagai ADUN aja, tang pengawa 'Public Relations' nyengkaum bekerejasama enggau media enggau sida ke bukai, kelebih agi pengawa SEKPOL nyadi orang entara ADUN tauka Yang Berhormat (YB) enggau tuai-tuai komuniti di sitak sida iya empu, lalu nyadi nyawa sereta pending ngagai rayat ba maya YB tauka wakil rayat nadai ba sitak nya.

"Kadang-kadang pekara ke enda ditemu YB tauka wakil rayat, nyangka sida iya ulih mantu meri pemadah nya," ku iya lalu nambah, SEKPOL mega patut ngembuan ulah ke beradat lalu enda ngenyaika nama wakil rayat tauka perintah.

Ba atur pengawa SEKPOL ngangkat sumpah kemari, ari Parti Pesaka Bumiputera Bersatu tauka PBB (16), Parti Rayat Sarawak tauka PRS (5), Parti Demokratik Progresif Sarawak tauka SPDP (4) enggau Parti Sa'ati Rayat Sarawak tauka SUPP (5).

Parti PRS enggau SUPP sama bisi udah nambah.

Pangku pengawa nyadi SEKPOL dipegai dalam kandang dua taun, lalu sekeda nya mega deka abis timpuh, sereta bepanggai ba KPI kaban SEKPOL, lalu enti pengawa sida iya udah ngayanka pangku pengawa ke nyulut, timpuh sida iya ulih disambung baru.

Seiku ari empat mua baru ke sempat dikerandau kemari, iya nya Majang anak Renggi, 56, bebansa Iban ari Bintulu madahka iya berasai temegah ati laban presiden PRS, Tan Sri Datuk Amar James Jemut Masing udah meri kelala nama iya mangku pengawa nyadi SEKPOL Kepala Menteri.

Majang ke mayuh peneleba gawa nyadi 'Senior Procurement Executive' enggau Petronas lalu pia mega kediatu mangku pengawa nyadi Mandal Presiden PRS sereta Chairman PRS Kidurong, Bintulu madahka iya deka bejalaika tanggungpengawa ke diberi nya, enggau naka pemanah.

"Tu tanggungpengawa ke pengabis besai ngagai PRS, lalu aku enggau naka ulih mangku pengawa nyadi SEKPOL enggau naka pemanah," ku iya.

Print Friendly