KM besemaya nyadi tulang belakang Yussibnosh BorneoPost Online | Borneo , Malaysia, Sarawak Daily News » Berita Iban - New 2 Borneo |
- KM besemaya nyadi tulang belakang Yussibnosh
- Peranak menua ringat, tanah NCR sida diteresa sebengkah kompeni
- Kelinik Pengerai di Jalai Siol Kanan berengkah dikena pun bulan April
- Pemutus SPM 2013 sitak Sibu niki
- Perintah ngemeratka tikas pengerai di menua pesisir
- Empat ari lima ditetap mulaika diri baru: Mawan
| KM besemaya nyadi tulang belakang Yussibnosh Posted: 20 Mar 2014 09:03 AM PDT MUKAH: Chairman Barisan Nasional (BN) Nengeri Tan Sri Adenan Satem besemaya deka bebendar mantu sereta nyadi tulang belakang pengari BN ba pengawa bepilih mit (PRK) DUN Balingian, Yussibnosh Balo. "Aku deka mantu. Sebarang maya iya begunaka agih belanja, aku deka meri ketegal kitai ngarika parti ke sama lalu aku besemaya, iya deka teulihka sukung aku. Lalu enti chalun ari penyakal minta agih belanja taja pan iya menang, aku enda meri sesen pan. Tu ukai jaku sumbung tang nyadi pekara ke amat," ku Adenan ke mega presiden Parti Pesaka Bumiputera Bersatu (PBB). Adenan nambah, bida entara Balo enggau chalun PKR, Abdul Jalil Bujang iya nya Jalil nadai nerima sukung ari perintah lalu enda sekali deka nerima projek pemansang ketegal nadai seiku nyukung iya. "Bida ti kedua iya nya, PKR semina 'tin puang' ke nemu rerauh sengapa tang enda kala ngamatka jaku," ku Kepala Menteri (KM) ba sebengkah pengawa ketuai begulai enggau rayat ke diatur di Balai Raban Bansa Abdul Rahman Yakub di Kpg Tellian Laut, Mukah. Adenan ke nganti penuduk Pehin Sri Abdul Taib Mahmud nyadi Kepala Menteri kenyau 28 Februari tu tadi madah, Taib minta iya nampung pesan tu ngagai rayat ditu. "Sebedau iya ngelengkaka pangku pengawa, Taib ngelalau aku ngambika seruran ngingatka rayat senentang pengawa ti udah dikereja iya ngagai rayat di Balingian sereta ngingat pemeri ti udah disedia ngagai semua peranak di serata Sarawak. "Berindik ari nya, enti kitai amat muji pengawa iya ti manah, Taib minta kitai semua ngundi chalun PBB/BN ke mega parti iya. Tang enti kita enda ngingatka pesan ari iya, reti nya kitai deka tulah ketegal iya udah mayuh meri pemaik ngagai kitai semua," ku Adenan. Dulu ari nya, seiku pengari PBB pampang Kpg Tellian Laut, Kpg Datuk enggau Kpg Penakub Permai, Long Bedul madah penyampau orang ngundi ari ketetiga genturung pendiau nya manggai 1,695 iku lalu semua sida nyukung chalun BN. "Peranak ari ketetiga genturung pendiau tu udah nyukung BN kenyau ari taun 60 menya. Kitai deka nyukung chalun BN enda ngira batang pengarap iya ketegal kitai ngakun diri ngarika ssebengkah komuniti," ku Long. Besemaya deka nyapai majoriti ke besai agi, iya deka nentuka nadai undi deka pulai ngagai penyakal. "Nadai jaku ngalih agi. Kitai deka nentuka BN menang nengah majoriti besai," ku Long. Iya madah sebedau pengawa kimpin berengkah, raban ari penyakal udah dulu alah bulu ketegal ketuai PKR nengeri Baru Bian ngakun pedis deka nyatup BN.   |
| Peranak menua ringat, tanah NCR sida diteresa sebengkah kompeni Posted: 20 Mar 2014 09:02 AM PDT KUCHING: Tiga iku pengempu tanah Adat Bansa Asal (NCR) ari Melugu, Panggil enggau Klauh Sri Aman ngeripot ngagai polis, ulah sebengkah kompeni ti neresa tanah sida enggau enda beradat, dipelaba deka ngulihka penguntung. Nitih penerang ari sida tiga, Tuai Rumah, Maria Tembak enggau Spencer Sungkui dalam penerang berita madah, sida enda lantang ati ngagai pengawa orang ti tama nadai beradat neresa tanah NCR sida. "Aku tekenyit meda injin pengauk tanah tama ngagai tanah aku. Aku udah minta operator mansutka injin nya (ari tanah aku)," ku Maria Tembak lebuh nyerita ngagai polis. Pengawa orang ti tama enda beradat ngagai tanah NCR ti nguji ngulihka batu kuari endang dibantah, ku sida tiga ti ngaga ripot polis. "Kami ari Melugu mantah enggau pengabis penemu pengawa sida ke tama enda beradat ngagai tanah kami ke lalu nguji ngulihka batu kuari ba tanah NCR kami. "Baka ti dipadahka orang ngagai kami, kompeni ti nguluka pengawa tu diempu bini seiku YB, nengah ulah tu baka ti sengapa masau penatai ai irup kami. "Kami mantah amat sebarang pengawa ti deka ngerusak pun penatai ai kami. Ari ti nulung kami, YB tu deka munuh kami ngena chara ngerusak pun penatai ai kami," ku Tuai Rumah Walthon, Maria enggau Spencer dalam sebengkah penerang berita. Dalam penerang berita ti sama, Sapit Chairman Parti Tindakan Demokratik (DAP) Sarawak Leon Jimat Donald ngarapka YB ti ngarika endur nya nagang orang ti tama enda beradat ngagai tanah NCR rayat. "Enti amat YB nya bisi kaul enggau pengawa ti deka ngereja kuari, nya endang ulah ti amat enda manah. "Laban penatai pemisi beratus peranak menua dia tekeruga ketegal pengawa tu. YB nya patut nagang tauka ngetuka pengawa orang ke tama enda beradat ngagai tanah NCR," ku Leon. Dulu ari nya Leon nyempulang sida ke ngempu tanah NCR nya ngagai Balai Polis Sri Aman ngaga ripot. |
| Kelinik Pengerai di Jalai Siol Kanan berengkah dikena pun bulan April Posted: 20 Mar 2014 09:01 AM PDT KUCHING: Direktor Pengerai Nengeri, Datu Dr. Zulkifli Jantan madahka Kelinik Pengerai di Jalai Siol Kanan, Petra Jaya ditu ditimpuhka berengkah dikena pun bulan April tu. Iya madahka Kelinik Pengerai Jenis Dua nya besedia meri servis ngagai penyampau orang sakit ti mayuh sereta lantang laban alai ke lebih besai kelimpah disikap kereban perubat senipak enggau standard. "Dalam perambu, Kelinik Pengerai Jenis Dua deka berengkah dikena pun bulan April sereta besedia meri servis ngagai penyampau orang sakit ti mayuh sereta lantang (alai)," ku iya lebih ditelefon kemari. Taja pia Dr. Zulkifli enda ulih nerangka silik bekaul enggau kereban ti disediaka ba Kelinik Pengerai nya berindik ari ti benung ngulu aum, maya ke ditelefon. Klinik ti udah tembu deka meri kereban pengerai ti lebih manah ngagai peranak di Petra Jaya enggau ke ngelilingi. Digaga ba palan ti pemesai 2.36 ekar ke disikap enggau kereban moden ti mega bisi 173 endur ngengkahka kereta, ti udah diserah kompeni kontraktor Ramijaya Sdn Bhd ngagai Opis Pengerai Nengeri ba pengerami mit ti diatur Hari Satu apin lama. Ba pengarami nya Pengarah Eksekutif Ramijaya Sdn Bhd Edwin Banta nyuaka kelinik nya ngagai Pengurus Wilayah Selatan Opis Kereja Raya (JKR) Ir Vincent Tang ti ngarika piak Opis Pengerai Nengeri. Kelinik nya kelinik ti keterubah digaga ngena langkar baru ti begunaka ungkus belanja sepenyampau RM34 juta sereta pengelama ngaga 34 bulan. |
| Pemutus SPM 2013 sitak Sibu niki Posted: 20 Mar 2014 09:01 AM PDT SIBU: Pemutus Sijil Pelajaran Malaysia (SPM) 2013 sitak Sibu mujur niki bulih 4.48 Gred Purata Sekolah (GPS). Pemesai Opis Pelajar Sibu Wong Chong Kung madah, pekara nya mandangka GPS SPM bagi sitak tu niki ari taun ke udah iya nya 4.57 ba SPM 2012. Ku iya, penyampau nembiak ke ngambi SPM 2013 iya nya bisi 3,903 iku lalu ari penyampau nya 3,366 iku mujur nerima setipikit tauka 86.2 persin. "Bagi sitak tu mega, penyampau nembiak ke bulih semua A ba peresa ke diambi iya nya enam iku aja. "Sida tu iya nya Loh Wei Wei ari SMK Chung Hua lalu ditangkan Brandon Wong Jung Yao ari SMK Sacred Heart enggau empat iku nembiak ari SMK Methodist iya nya Kho Hu Yong, Darly Tan Shuang, Kimberley Chew Wen Chien enggau Janet Lo Zhen Lin," pia ku iya madah maya dikerandau pengarang berita ditu, kemari. Ku iya, ari semua 23 buah sekula di sitak Sibu, 16 buah sekula niki GPS lalu tujuh buah agi nurun. "Sekula ke pemadu manah taun tu iya nya SMK St Elizebth enggau GPS 2.80 niki ari 3.04 ba SPM 2012. "Tu ditangkan SMK Methodist taja nurun iya nya 3.23 tang 3.00 ba SPM 2012. "Lalu penuduk lumur tiga iya nya SMK Tung Hua iya nya 3.35 niki ari 3.57 ba SPM 2012," ku iya nerang enggau nyemetak. Iya madah sekula ke nurun GPS serak tu iya nya SMK Methodist, SMK Tiong Hin, SMK Sacred Heart, SMK Deshon, SMK Bukit Assek, SMK Bawang Assan enggau SMK Bukit Lima. Berebak enggau tu Wong ngarapka sekula ti bisi nurun GPS ba peresa serak tu ulih mansik kebuah pekara nya tau nyadi ba sida. "Tu lebih agi mansik batang kebuah nembiak lemi ba sesebengkah subjek ke diambi. "Enti batang kebuah nya ditemu sida ulih ngatur chara bakani mutarka pekara nya," pia ku iya. Taja pan baka nya, ku Wong, sekula ke mujur niki GPS mega anang enda ngiga chara dikena nyungkakka agi pemujur nya ba peresa ti deka datai. Nambahka nya ku iya, kerejasama bala pengajar ngagai kepala pengajar nyengkaum bala apai indai mega beguna dikena nentuka pemansang pelajar nembiak. Nya alai ku iya, diatu bisi 'Program Sarana Ibu Bapa' ti ngembuan tuju nyungkakka kerejasama apai indai nyaup pelajar anak ba rumah. "Ba sekula endang bala pengajar bebendar ngajar nembiak. "Tang di rumah, apai indai megai tanggungpengawa ngembing anak sida belajar," ku iya. |
| Perintah ngemeratka tikas pengerai di menua pesisir Posted: 20 Mar 2014 09:01 AM PDT KANOWIT: Kelinik 1Malaysia ti digaga ba Nanga Tada ditu deka mai penguntung ari pekara pengerai ngagai rayat menua nya. Kaban Parlimen Kanowit, Datuk Aaron Ago Dagang madah, kelinik nya ke diatu benung deka tembu digaga sebengkah kelai perintah ngemeratka pengelikun pengidup rayat kelimpah pemansang infrastruktur ke bukai. "Perintah mega ngemeratka tikas pengerai rayat kelebih agi ba menua pesisir kelimpah bebendar deka numbuhka pemansang ke bukai ungkup penyenang ngagai pengidup rayat," ku iya. Iya mantaika jaku nya maya bejadika rumah Sio Maja ari Program Bantu Rumah di Nanga Tada ditu, empai lama tu tadi. Berebak enggau nya mega iya datai ngulu Pengerami Pemesai Begulai Enggau Rayat sereta pengawa ngerami Chua Sabai ke udah dichiri nyadi kaunsilor di Rumah Malam Jabu ba Nanga Tada mega. Penatai iya sehari nya disempulang Penghulu Ugak Seribu enggau Kaunsilor Chua Saba sereta bala ke bukai. Ku Aaron bejaku baru, sukung enggau kerejasama rayat beguna dikena nentuka pelin pemansang perintah ngagai nengeri tu. "Tang taja pan baka nya, pemansang tu deka bepenanggul nyema rayat enda nemu nimbal pengeransing perintah. "Ari nya, kitai enda tau enda nyukung perintah kediatu ngambika semua tu ulih diasaika kitai nyentuk ke ila-ila," pia ku iya madah baru. |
| Empat ari lima ditetap mulaika diri baru: Mawan Posted: 19 Mar 2014 02:58 PM PDT by Jacqueline David. Posted on March 20, 2014, Thursday Besaksika Kepala Menteri, empat ADUN ari SPDP nya kemari nerima setipikit kelai pulai baru ngagai parti KUCHING: Empat ari lima raban G5 (Datuk Peter Nansian, Datuk Sylvester Entri, Rosey Yunus enggau Paulus Palu Ngumbang, belabuh kemari ditetapka mulaika diri ngagai Parti Demokratik Progresif Sarawak (SPDP). Dalam aum betemu enggau pemesai SPDP pengudah betemu enggau Kepala Menteri, Tan Sri Datuk Amar Adenan Satem begulai enggau empat raban nya, presiden SPDP Tan Sri William Mawan Ikom madah, anang dikeingatka agi utai ke udah, ngampun sereta nerima pemulai empat iku raban tu. "Badu agi bebalas nengah surat berita ketegal pekara tu…Kitai udah penapat nyaga sereta ngangkatka imej parti. "Sebarang pengilap ke digaga kitai semina meri mayuh agi penanggul….Sebarang penanggul ke ditapi kitai, patut dipejuraika. Diatu maya kitai nyingkang dalam perintah, nya ke berat agi, laban sebarang penyarut ke nyadi semina ngelemika kitai," ku Mawan. Iya madah baka tu lebuh baum enggau raban pemesai SPDP bejuraika singkang parti nya kelimpah ari meri pemadah ngagai kaban parti ba pemansang ke diatu. "Aku nyambut pemulai raban tu (G5) lalu ba aku, tu pekara konsisten enggau pemesai kitai ke sejalai enggau Barisan Nsional (BN) sereta atur Opis Pengerijista Gerempung (ROS), ngambika belabuh ari diatu, semua penanggul ulih diputar lalu parti ulih mansang ke mua," ku iya. Taja pia, iya madah ba aum besai parti nya ila, parti nya deka numbuhka komiti teknikal mutarka pekara tu. Sebedau aum nya, raban G5, tu nerima setipikit 'Pemulai baru' nyadi kaban baru udah sida iya minta masuk pulai baru ngagai parti nya. Taja pia, ex-Kaban Parlimen (MP) Mas Gading, Datuk Dr Tiki enda disambung laban maya Pengawa Bepilih Menua (PRN) bulan Mei 2013, iya bediri nyad chalun ngatika diri ngelaban chalun Barisan Nasional, lalu maya PRN nya, iya alah laban chalun baru BN-SPDP, Anthony Nogeh Gumbek. Leka jaku G5 besemaka empat raban Kunsil nengeri nya ke dibuai ari parti ketegal penyarut ke bisi nyadi entara bulan November 2011 enggau Januari 2012. Ba atur pengawa mulaika diri baru kemari, ke-empat-empat ADUN nya dipasukka baru nyadi kaban bisa tang sebedau kena buai ari parti suba, pangku pengawa Entri enggau Rosey dalam parti, nyadi mandal presiden lalu, Paulus, nyadi Ketuai Pemadah. Adenan ti mega nyadi chairman BN menua nyadi saksi ba atur pengawa mulaika diri baru nya di opis iya di Wisma Bapa Malaysia, lalu sama digulu Mawan enggau sekeda raban SPDP enggau ketuai pampang parti. Adenan madah, iya gaga ati meda atur tu ulih dikemujurka laban ku iya, pemulai empat iku raban tu manah ke SPDP nyengkaum ke semua komponen parti BN. "Tu mandangka kitai orang Sarawak nyamai dibai berunding sereta manah enggau pangan diri. Tu mandangka kitai ulih sama nyingkang ke mua," ku iya. Mawan ti mega Menteri Pemansang Rama enggau mandal chairman BN madah, begempung baru enggau empat kaban kunsil nengeri tu sebengkah jalai ngemansangka SPDP. "Seharitu, nyadi lambar baru ke parti. Belabuh ari seharitu, kami ngarapka ulih begulai bejalaika tanggungpengawa enggau tuju negutka BN lalu ngereja pengawa ke rayat. "Diatu kami ulih meri fokus kami ba pengawa bepilih ke dijangka dalam kandang dua setengah taun tu lalu beratika kami deka menang dalam semua kerusi kami," ku Mawan. Pemutus deka ngambi empat iku raban tu pulai baru, iya nya pemutus ke digaga parti nya nitihka pemerat dalam Barisan Nasional di serata menua dalam berapa taun tu ke udah, lalu ari pansik nya ngujungka SPDP betatika sukung ke diterima sida. Mawan madah, ari pansik ke diulih sida, BN nemu ni bagi sitak ke nyadi kubu kuat BN lalu ni bagi sitak alai sukung ari penyakal pan nambah. Iya nandu, nerima pemulai empat iku raban tu ngagai parti ukai 'kontroversi' laban dalam parti, nadai 'roadblock' dalam konstitusyen parti, ke raban tu duduk ba penuduk ke tinggi dalam SPDP. Ba tanya pemberita pasal Dr Tiki, ku Mawan: "Enti iya dalam UMNO, udah lama iya kena buai lalu enda diterima agi tang kami (SPDP) orang ke 'liberal'. Aku udah bejaku pasal begempung pulai baru. Aku ba penuduk ke ulih ngampun lalu enda agi ingat ke utai ke udah. Dr Tiki tau minta mulaika diri baru taja pan iya enda disengkaum dalam renggat tu. "Taja pia, kami muka peminta nya ari iya. Kami ulih nimbang pekara nya tang nitihka atur ke betul," ku Mawan, ti mega nyadi MP Saratok. Enggau pemulai empat raban nya ngagai parti, SPDP diatu bisi lima iku Kaban Kunsil nengeri. Parti nya alah betangkup enggau PKR di Ba' Kelalan enggau Krian maya PRN 2011 sereta lenyau kerusi Meluan ngagai Sarawak Workers' Party (SWP) laban ex-kaban SPDP, Wong Judat badu ari parti SPDP. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |