Taib Merambu Deka Meresi Nama Diri |
| Taib Merambu Deka Meresi Nama Diri Posted: 03 Mar 2014 06:05 AM PST  Pengawa ti dikereja Taib ba kampung Sarawak ti tebilang di serata dunya Taib diatu udah mujur bulih penuduk Gabenor, tang diatu mega iya irau bendar ke pemanah nama enggau penampak iya kena keruga. Ba jaku iya ti penudi kejang iya ti deka badu mangku pengawa nyadi Kepala Menteri iya udah milih numpuka perening iya ngagai cherita jai pasal iya empu ba tikas entarabansa bekaul enggau pengawa iya ti berusakka kampung; muka kebun dandang besai sawit sereta pengawa iya ti nugungka pengeraja ke iya empu. Terang bendar pekara tu udah ngeruga pengerami iya ti dichiri nyadi Gabenor lalu utai nya seruran ngeruga runding iya. Baka selama, iya udah balat ngutuk pasal "serang kasar" ti dikereja raban NGO menua tasik lalu iya minta bala "pengari" menua Malaysia belabuh ngangkatka pemanah nama iya di serata menua. Gabenor ti baru nya udah madahka ngagai bala pengabang iya, iya udah bejalaika atur pengawa pemadu manah ba kampung menua Sarawak ke raban bansa Penan, mayuh ari sida nya diatu lapar pungkang ketegal kampung endur sida beridup diatu udah balat rusak kena keruga pengawa ngulihka kayu batang enggau bebukaka kebun sawit. Iya mega majak nusui pemula iya ti madahka iya udah mujur ngetanka 50% ari kampung Sarawak "enda tau dikeruga" lalu enda kurang ari 85% kandang menua nya agi tebal ditutup kampung bungas. Angka ti kelalu betul ba 84% nya enda ulih diterima akal, laban pengawa nebang kayu enggau chara enda betagang ti udah ngerusak teda kampung di menua nya, semua keruga nya dikereja kompeni kroni ngagai Taib Mahmud.  Diatur enggau naka pemanah? Pengerusak baka tu balat bendar nyadi di pelilih menua Baram Diperatika enggau ngelansa tebing bukit enggau munggu di pelilih Baram, ti ke diatu udah balat bendar majak tusur lalu anyut ngagai batang sungai di menua Sarawak tauka baka ti ayan ba gambar satelit ti nunjukka pemesai rampa kampung ti udah rusak nya, sereta ngenyitka ati orang mayuh, udah nunjukka pemanggar orang tuai nya. Enggau nya, enda alit ati sekeda orang ke jaku ti dipansutka Taib lebuh iya ngumbai diri bejalaika atur pengawa niti pengelurus! "Pengelurus dalam pengawa nya endang batang pengarap iring aku" pia ku iya nyebut ngagai seraban pengabang ti endang dipilih iya datai ngagai pengerami iya nya, taja pan enda semua orang bisi besetuju enggau jaku iya nya.  Ngeluska sebarang utai ti agi tinggal Agi mega, baka ni chara iya ti udah nyadi siku Kepala Menteri bepun ari ti nyadi siku nembiak sekula ti datai ari ruang bilik orang ti jelan ba penatai pemisi nya ulih niki ngagai penuduk nyadi siku tuai ke sebuah ruang bilik pemadu kaya di pelilih menua Asia dalam pengelama 40 taun taja pan semina bepanggai ba gaji menteri iya aja? Taib Mahmud nya ukai sebaka enggau Mahatma Gandhi. Ke bendar iya, iya nyadika siku tuai raban apek bayat mafia kayu batang pemadu besai di pelilih Asia Tenggara, sebengkah pekara ti ditusui enggau lenak dalam sebengkah bup ti baru dikeluarka bekaul enggau menua Sarawak, dichelak di menua Switzerland ba minggu tu tadi lalu deka mega disalinka ngagai jaku English. Enggau nya, ulih kita pechaya ke jaku iya ti ngumbai 50% ari selampur kampung di Sarawak nya 'bedau ditegu'? Jaku iya ti ngumbai 65% ari selampur menua Sarawak nya agi ditutup kampung bungas lalu mayuh agi rampa menua nya udah balat bendar rusak, nyentuk ke datai ngagai ikas "rusak naka pemalat lalu enda ulih dikemanahka ari". Diatu raban orang ti mantah Taib mengkang nganti empas umbak baru penatai 'pengari pemeresi nama'. Ke terubah iya, bisi sebengkah gerempung ti benama FBC Media, ti berabanka bala apek bayat London, ti udah mujur tama ngagai berita TV lalu ngayanka filemdikena sida ngemanahka nama Taib Mahmud, kelimpah ari atur sida ti ngupah seraban blogger berachun ari menua US dikena nyerang sereta ngutuk Sarawak Report. Udah nya, nengah menantu iya, Sean Murray (laki Jamilah Taib), iya ngupah sebengkah agi kompeni PR ari UK, Bell Pottinger, ngambika bisi begerak dalam dunya internet ngemanahka laman Wikipedia iya, kelimpah ari ti ngatur serang ba laman Wikipedia ti ditumbuhka ke bala pengarang berita Sarawak Report. Kedua bengkah raban penyerang tu udah dibantaika. FBC Media lalu terus dipadamka, lalu Wikipedia udah nyekat tindak 'anak patung' Bell Pottinger.  Ben Fogle siku pengelulu dalam filem bejalai nengah rampa menua Udah nya Taib lalu ngupah sebuah agi kompeni PR ari menua UK, Hills Balfour, dikena bejalaika pengawa PR ngambika dikena ngangkatka pemanah nama dagang temuai ke menua Sarawak. Hills Balfour udah ngupah siku pengelulu program TV, Ben Fogle, dikena ngangkatka nama Sarawak ba dagang 'temuai ekologi'. Udah bekau kami mantaika pengamat di belakang 'nemuai ke kampung' ti dikeluluka Ben Fogle nya dia iya lalu matak diri, madahka diri minta ampun lalu udah nya meri duit upah asil bekelulu iya nya ngagai gerempung pengasih dikena ngintu pemanah rampa menua. Udah nya serang raban PR Taib majak balat dikereja atas Sarawak Report enggau stesyen radio internet Radio Free Sarawak ngena serang chara DDOS enggau serang nyekat gelumbang angin radio enggau chara ti mar bendar, ti dipelanja ngena duit Perintah Malaysia, tang enda lama udah nya bisi siku orang ditemu bekaul enggau kes ngerumpak enggau ngeruga perengka penyambung orang bukai.  Taib udah kala ngupah FBC Media nengah siti kontrak $15 juta dikena meresi nama iya  Raban penyerang madahka sida udah kena serang! Laman blog enggi Malay Messenger ti enda agi dipejalaika Kejang pengawa bepilihbesai ke-13 tu tadi, dia telefon siku pengarang berita Sarawak Report udah dichuri lalu dalam sekejap mata aja telefon nya udah dikena nyerungkai akaun gmail sida. Beberapa hari udah nya versyen emel ti kabur-kabur bisi diayanka ba laman blog di menua Malaysia (Malay Messenger, ti diatu enda agi dipejalaika) dikena meri ngambarka Editor dalam Sarawak Report benung bejalaika perambu iya ngenchuri minyak galau Sarawak! Cherita ti senutuk bendar enggau jaku tuduh Taib Mahmud dalam Dewan Undangan Negeri ti madahka pasal Editor Sarawak Report benung chakah bejalaika atur iya deka merintah baru ba menua Sarawak ngarika perintah British. Pekara ti balat nyelai nya kompeni penyelak suratberita enggi sida Taib Mahmud sebilik, New Sarawak Tribune, ti udah numpuka perati orang mayuh ngagai laman web Malay Messenger nya. Sekali ke pekara ti nyadi tu sebengkah seninjik? Berebak enggau nya, sebuah kimpin udah dipejalaika di menua UK, ti endur pengawa ngerumpak nya udah belabuh.  Diempu sida Taib sebilik lalu dikeluarka anak indu iya, Hanifah, New Sarawak Tribune ti seruran nyukung ambu gila apai iya. Suratberita tu udah nemu enggau tumu pasal akaun gmail Sarawak Report ti kena keruga orang
Siku pengarang berita cherita bepenyalah udah nguji nyadung sebuah berita ngagai kompeni suratberita ti tebilang di London, berindik ba cherita bula pasal akaun gmail Sarawak Report ti kena keruga lalu mega enggau mesej dalam laman Skype. Suratberita di menua UK udah diasuh macha isi dalam Malay Messenger lalu diberika penerang bula ti madahka Sarawak Report udah ngupah siku pemansik ti ngatik ke diri di menua US dikena ngeruga akaun bank enggi sida Taib Mahmud sebilik. Sarawak Report diatu mengkang nyimpan salin surat penerang ti disadung ngagai kompeni suratberita nya Taja pan pengarang berita nya diupah bekereja dikena ngelabuhka bala orang ti balat mantah Taib, iya udah mujur nunjukka tinjaun ti betul pasal menua Sarawak, enggau meri nama "chara ti selama, balat dipalit penyalah makai suap". Enda mukai-mukai nadai siti pan suratberita di UK mansutka berita nya. Nama agi tindak Taib udah tu begigaka 'pengari' dikena iya meresi nama diri udah bekau iya dichiri nyadi Gabenor? Tang semina bisi siti chara duit ulih dikena meli pulai sebuah nama manah iya nya enti nuan deka nyerahka semua duit nya. |
| Nyiri Taib Retinya Ngaga Kaul Dalam Penyalah Makai Suap – Najib Patut Ngelaunka Nya Posted: 03 Mar 2014 02:10 AM PST  Pengebal! – kartun dilukis Zunar Taib udah nerangka iya ngarapka diri deka dichiri nyadi Gabenor Sarawak sehari tu, udah bekau iya ngadap YDP Agong ba Istana Negara urung pukul 3 lemai tu. Iya udah madahka rayat iya ti endur iya arap ke diri empu diangkatka penuduk ti sebaka enggau penuduk Ratu menua England, ti semina meri sanding penemu. Ba kuasa ti bisi diatu, nyengkaum Menteri Besai Malaysia, patut berunding enggau dalam, laban enti sida majak deka nyiri Taib nyadi Gabenor, dunya deka ngumbai sida bisi kaul dalam penyalah makai suap, baka ti ditemu orang mayuh.  Rabun ketegal pengeraja – udah mejal iya empu ninggalka penuduk Kepala Menteri, diatu Taib dipeda udah putus pengarap ti endur iya bempu semua kuasa di menua Sarawak Kemari seraban kaban ari parti penyakal ti ringat udah mai kes sida terus ngagai opis Najib enggau mega ngagai opis SPRM. Bala pemesai ari SPRM ti malu-malu nya udah ngamatka dalam aum sida enggau Rafizi Ramli enggau See Chee How ari parti PKR, madahka pansik sida ba siku orang kaya gila kuasa nya tetap dipejalaika. Tang, ba mua mensia mayuh sida SPRM udah madahka, bala menteri kanan Taib lalu ukai iya empu ti nyain pemendar berampaska tanah orang bukai, kelimpah ari mayuh agi penyalah salah guna kuasa, sida tetap agi begunaka penerang bekaul enggau penyalah iya nya. Beserimbai enggau nya, beberapa iku orang udah ngenataika isu sida ngagai kot undang-undang. Baka ni siku Kepala Menteri ti udah ngerusak mulia undang-undang nengah penuduk iya ti nyadi Pengarah dalam kompeni-kompeni iya empu, baka ti ditanya parti DAP, dikemendarka mangku pengawa nyadi Gabenor – sebengkah penuduk ti nagang sapa-sapa orang dia mangku pengawa nyadi pengarah dalam sebarang kompeni dagang.  Enda mujur ngaga pemutus runding diri? Manah agi enda ngaga sebarang pemutus runding. Awakka Taib nganti gintir diri nyentuk ke iya udah tembu meresi diri ari penyalah makai suap Kot Tinggi Kuching udah madahka diri nadai kuasa veto nagang pengawa nyiri Gabenor nya dipejalaika ari atur YDP Agong. Baka ni munyi jaku penetap ti manah agi ba pengawa pengarah ti dipangku Taib dalam kompeni-kompeni iya nya lalu pengawa nya endang salah ba undang-undang. Taja pan orang mayuh nemu Taib udah ngelanggar mayuh undang-undang, mar bendar deka nagang iya niki Astana, kelimpah ari Menteri Besai empu bejalaika pengawa nya ti udah ari pechaya rayat iya empu kelimpah ari ti nyaga pengelantang sida. Enti Najib enda ngelubahka pengawa nyiri Taib, orang mayuh di serata dunya tu deka nanya iya "berapa rega iya? Sekali ke Taib deka mayar duit suap ba pengawa bepilihbesai ke-14 tu ila tauka endang udah bisi sebarang sempekat ti dikena nyelamatka iya ari dipechat enggau chara ti betul?" Menteri Besai nya tentu berindik ba tanah pemendar enti iya mechat Taib Mahmud, siku tuai ti lama udah dibalut penyalah makai suap ti balat nya. Tu mih siku orang ti dikenang petunggal iya empu bekereja berindik ba penyalah makai suap munyi ti dikeluarka dalam video Global Witness. Gerempung NGO nya baru tembu ngeluarka sebuah agi berita bekaul enggau penyalah makai suap, serak tu bekaul enggau makai suap bejuta-juta dollar ngagai anak Taib, Abu Bekir, ari kompeni Trienekens ari menua Jerman. Kompeni Trienekens udah mujur diberi kontrak muai uras udah bekau sida dituduh kena palit penyalah makai suap di pelilih Colonge – nama agi langgur penemu ti manah agi ke sida Taib Mahmud?  Majak regas agi ari suba … Taib endang deka mengkang mangku pengawa Kepala Menteri taja pan mayuh cherita pasal iya udah disebut dalam suratberita. Tang Menteri Besai enda patut ngereja pengawa setengah jalai lalu ngemendarka Taib dichiri mangku pengawa Gabenor ti tau ngujungka iya nyadi kebal. Semina Najib aja ulih ngemuntanka pengawa politik Taib. Nambahka nya, kemari tuai bekukut besai nya udah mansutka penerang bekaul enggau langgur perintah ti deka majak ngaga 5 iti agi tekat ai dikena ngeluarka kuasa elektrik di Sarawak, ti deka belabuh dipejalaika dalam setaun tu.  Badu ari pengawa, tang Taib merambu deka ngemelika parti iya empu Perambu tu nyadi sebagi ti besai agi ti udah dipansutka iya dua hari sebedau iya ninggalka opis Kepala Menteri lalu jaku pesan nya terang bendar nandaka iya endang deka majak bekuasa, taja pan program ngaga tekat ai nya balat napi bantah orang mayuh. Diatu Taib majak besedia napi bantah orang mayuh bekaul enggau isu tekat ai nya, kelimpah ari ti ngulihka untung ti mayuh ke iya empu nengah kontrak ti besai-besai ti diberika ngagai kompeni-kompeni iya. Pendiau Kepala Menteri tuai ti badu gawa nya nyau majak dibalut mayuh macham skandal lalu tau bendar meri malu ari sehari ngagai sehari. Enti Najib majak deka ngangkatka penuduk Taib nyadi Gabenor, iya deka bempu tanggungpengawa ba sebarang asai ati orang mayuh ti enda puas ati udah tu ila. |
| You are subscribed to email updates from Sarawak Report To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |