» »Unlabelled » JKR Sarawak bejalaika tujuh projek infrastruktur taun tu BorneoPost Online | Borneo , Malaysia, Sarawak Daily News » Berita Iban - New 2 Borneo

05:03:00

JKR Sarawak bejalaika tujuh projek infrastruktur taun tu BorneoPost Online | Borneo , Malaysia, Sarawak Daily News » Berita Iban - New 2 Borneo

JKR Sarawak bejalaika tujuh projek infrastruktur taun tu

Posted: 11 Jan 2014 08:23 AM PST

by Rengenyan Labang. Posted on January 12, 2014, Sunday

Tu mungkur ngaga lurung endur begelih enggau ngemanahka Jalai Pan Borneo, ku Fadillah Yusof

KUCHING: Opis Menteri Kereja Raya Malaysia deka bejalaika tujuh projek insfrastruktur di Sarawak ti nyengkaum ngemanah jalai enggau ngaga alur tauka lurung endur begelih, ti disengkaum dalam Jalai Pan Borneo.

Menteri iya, Datuk Fadillah Yusof madah, perintah deka bejalaika pengawa ngemanahka jalai alun di Sarawak nitihka ti lebih dikemerat tauka ditentuka perintah nengeri.

Iya madah, nengah agih belanja ari perintah besai dikearapka projek jalai alun ti deka dipejalaika di nengeri tu ulih bejalai enggau lanchar.

"Ba taun 2014, baka ti udah dipadahka ungkup semua belanja ti udah diagih dikena ngemanahka Jalai Pan Borneo iya nya RM267 juta ti nyengkaum RM50 juta. Lalu ba bajet 2014, Menteri Besai ngungkupka belanja tambah RM500 juta.

"Diatu kitai udah berengkah ngaga 95 lurung kena begelih (berengkah ari Simpang Lubok Antu ngagai Simpang Betong) ba kandang endur ke suah penusah bebadi nyadi di pelilih menua Betong, perintah nengeri udah ngenataika peminta RM20 juta lalu kitai udah ngungkupka RM5 juta.

"Projek taun tu mega ngemanahka Jalai Matang (eMart) ke Stapok ngagai empat lurung nyengkaum Jematan ketiga di kandang menua Petra Jaya ti nyambungka Matang enggau Batu Kawa, ke diatu benung nentuka sapa bagi konsultan ngambika udah nya ila ulih nentuka sapa tinda jalai enggau jematan," ku iya.

Fadillah ti nyadi Kaban Parlimen Petra Jaya mansutka pekara nya lebuh dikerandau pengarang berita pengudah bejadika Karnival Kerjaya ti diatuar Suruhanjaya Perkhidmatan Awam (SPA) ba Stadium Perpaduan ditu kemari.

Nitihku iya antara projek bukai ti dipejalaika ba taun 2014 nyengkaum ngemanahka Jalai Tanjung Kidurong ke Taman Perindustrian Samalaju 16 KM ngagai empat lurung ti begunaka belanja urung RM120 juta.

Jalai Tedungan ke Pandaruan Limbang deka dikemanah ngagai R5 enggau ngemanahka Jalai Mengkalap ke Sindumin di Lawas ngagai R5, kededua projek nya disengkaum dalam Jalai Pan Borneo.

Nambahka nya Jalai Kuching-Serian ti pemajai lapan kilometer iya nya Batu 10 ngagai Batu 15 deka dikemanahka ngagai empat lurung, mega diesengkaum dalam Jalai Pan Borneo ti dipejalaika dalam taun 2014.

Kelimpah ari nya Fadillah madahka lapan projek jalai alun di Sarawak udah tembu digaga dalam taun 2013.

Lapan projek nya nyengkaum Jalai Tun Jugah/Jalai Song Interchange, Kuching ti beungkus RM55 juta; Jalai Pujut 7-Tudan, Kuala Baram, Miri (ungkus RM130 juta); jematan meraka Sg Pandaruan ti nyambung ke Brunei enggau Limbang (ungkus RM46 juta).

Projek jematan Sg Tabuan ti beungkus RM60.2 juta (di Jalai Mambong-Sejingkat) ti dikemanahka ari dua ngagai empat lurung; projek Jalai Kuala Tatau/Kuala Serupai/Kuala Balingian Fasa 1 sepemanjai 15 KM (ungkus RM40 juta); jalai ari Rumah Kita/Ugap ke SK Rantau Panjai, Kapit sepemanjai 6KM (RM60 juta) enggau Rumah Kediaman Persekutuan Mukah ti beungkus RM4.93 juta udah tembu digaga dalam taun 2013.

Taja pia ku iya sebengkah projek ti bedau tembu dalam taun 2013 sereta deka terus digaga dalam taun 2014.

"Projek ke bedau tembu digaga dalam taun 2013 iya nya ngaga jalai penyambung ngagai Pusat Pentadbiran Persekutuan di Matang Fasa, ti dipejalaika kontraktor ZECON.

"Projek nya deka ditembuka taun tu, aku empu deka matau pejalai projek dikena ngenukuka projek nya ulih tembu digaga," ku Fadillah.

Kelimpah ari nya iya madah, ba taun 2013 Opis Kereja Raya Sarawak nerima RM241,534,400, lalu udah dipelanja 95 persin.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

4,235 peranak S’wak deka dilatih sereta gawa ba opis perintah

Posted: 11 Jan 2014 08:22 AM PST

KUCHING: Sepenyampau 4,235 iku peranak nengeri Sarawak mujur dalam pengawa interbiu lalu dilatih sereta dichiri Suruhanjaya Perkhidmatan Awam (SPA) gawa ba opis perintah, ba taun 2013.

Menteri Kereja Raya, Datuk Fadillah Yusof madah, ba taun 2013 bisi 14,731 iku peranak Sarawak datai interbiu minta pengawa ti bisi disediaka perintah Malaysia nengah SPA.

Bepelasarka statistik peminta peranak Sarawak dalam SPA ba taun 2013 iya nya bisi 196,478 iku ngenataika peminta ngagai SPA, lalu ari penyampau nya 21, 373 iku dikangau interbiu.

"Ba taun 2013 lebih kurang 14,731 iku peranak nengeri Sarawak datai interbiu minta nyadi raban pengereja pengawa ba opis perintah, lalu ari penyampau nya bisi 4,235 iku mujur dalam interbiu sereta teulihka pengawa ti disediaka perintah Malaysia," ku iya.

Fadillah ti nyadi Kaban Parlimen Petra Jaya mansutka pekara nya lebuh bejadika Karnival Kerjaya ti diatur SPA di Stadium Perpaduan Petra Jaya ditu, kemari.

Bejaku baru iya madah, penyampau peranak ti mayuh diambi gawa ba opis perintah beduduk ari mayuh atur pengawa baka 'Outreach Programme" enggau kebukai ti dipejalaika SPA.

Iya arap bendar program SPA baka Karnival Kerjaya meri penguntung ukai semina raban bansa di sitak Petra Jaya aja tang semua kandang endur ti besemak.

"Nengah program tauka karnival tu orang mayuh ulih nemu silik agi pasal SPA, nama ti bisi disediaka SPA, baka ni minta pengawa ba SPA ngambika ulih gawa enggau opis perintah kelebih agi di opis perintah Sarawak," ku Fadillah.

Kelimpah ari nya dalam jaku pengelalu, Sapit Chairman SPA, Datuk Segarajah Ratnalingam madahka sepemanjai taun 2013 SPA udah ngatur 23 siri 'Outreach Programme' di pelilih menua mit di Sarawak sereta nerima timbal ti manah ari 16,000 iku orang.

Senipak enggau pengawa transformesyan, SPA berengkah 4 Januari 2013 udah ngatur seminar enggau kursus chara minta pengawa ba opis perintah (Seminar dan Kursus Tips Panduan Bagi Memasuki Perkhidamatan Awam) di serata Malaysia.

"Di Sarawak, seminar tu deka diatur kena 19 Januari 2014 di Auditorium Bangunan Sultan Iskandar, Tingkat 17, Bangunan Sultan Iskandar, Jalan Simpang Tiga ditu.

"Tuju kursus tu iya dikena meri tips tauka chara ngagai orang mayuh ti bepengerindu gawa ba opis perintah.

"Penerang silik pasal kursus tu tau dipeda ba portal SPA di www.spa.gov.my," ku Segarajah.

Karnival Kerjaya Perkhidmatan Awan keterubah ba taun 2014 dipasuk 27 bengkah opis menteri tauka opis perintah nyengkaum Jabatan Tenaga Kerja (JTK), JPA sereta Suruhanjaya Perkhidmatan Pelajaran (SPP) enggau kebukai.

Sama datai ba pengerami nya kemari Sapit Sekretari (Pengambilan) Zainal Abidin Ahmad sereta orang mayuh nyengkaum nembiak sekula, institut pelajar tinggi enggau ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Bantut ngemba ngemedih, ini ngaga riput polis

Posted: 11 Jan 2014 08:21 AM PST

SIBU: Seiku ini beumur 58 taun ngaga riput polis ketegal seiku bantut ke nyuwa bilik suwa nya ba Jalai Punai ditu enggai mayar suwa bilik sepengalama dua bulan.

Penyuwa ke beumur dalam 20-an nya balat ngasuh pengeriput ngidan ati laban suah nganchau penyuwa bukai.

Ku pengeriput, iya suah nerima kompelin ari penyuwa bukai laban penyuwa nya selalu ngaga bunyi ragak sereta masang lagu enggau nyaris maya malam hari.

Ku iya, taja pan bantut nya udah diasuh pansut ari bilik suwa nya tang iya mengkang enggai pansut ari rumah nya.

Ukai semina nya aja, bantut nya mega ngemba pengeriput ngambika enda kekutap seraya deka malu pengeriput enti majak ngasuh iya pansut ari bilik suwa nya.

Bantut nya mega bisi seiku bakih lelaki ke sama diau enggau iya sekumbang dua taun ke udah.

Nangika pengelikun diri, pengeriput ngaga riput polis ba Balai Polis Sentral, apin lama ke udah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Karnival Kerjaya meri awak ngagai rayat ngiga pengawa

Posted: 11 Jan 2014 08:21 AM PST

KUCHING: Karnival Kerjaya ti diatur Suruhanjaya Perkhidmatan Awam (SP) meri peluang enggau penguntung ngagai peranak menua lebih agi ke diau di mengeri Kuching nyengkaum kandang menua ti besemak bulih penerang pasal pengawa perintah.

Nambahka nya orang mayuh lebih agi raban nembiak ti benung begiga pengawa perintah, pasal gaji enggau penguntung bukai lebuh gawa ba opis perintah.

Stephenie Yvonne Jatan, 27, ari Serian madahka program tauka karnival kerjaya meri awak ngagai iya ngiga pengawa puang ti bisi disediaka perintah.

Iya ti bisi Ijazah Sains Makan ari Universiti Malaysia Terengganu ngarapka jemah ila SPA nyendiaka mayuh agi peluang orang ti bisi ijazah beduduk ari pemayuh orang ti ngembuan ijazah.

"Pemanah karnival tu, mayuh penerang ke ulih ditemu pasal opis perintah nyengkaum pasal gaji, pemanah enggau penguntung nyadi pengereja pengawa perintah.

"Aku datai kitu laban deka ngiga peluang gawa, tang ungkup renggat ijazah peluang amat mimit sereta mayuh orang (ti ngembuan ijazah) enggau berebut.

"Aku bisi tiga kali udah dikangau interbiu enggau SPA tang enda kala mujur. Aku datai kitu mega deka betanya ngagai SPA nama penanggul nya alai enda kala bulih taja pan udah suah interbiu.

"Tadi maya aku nanya pegawai pasal pekara nya, sida enda ulih nyaut aku tang ngelalau aku ngambika terus nguji sereta liat ati," ku Stephenie lebuh dikerandau ba Karnival Kerjaya, kemari.

Nambahka nya Martha Erika Daniel, 26 ari Serian sepenemu enggau Stephenie madahka karnival nya meri penguntung ngagai semua raban bansa lebih agi orang ti benung begigaka pengawa sereta patut selalu dipejalaika.

Karnival nya ku iya muka mata enggau runding iya lebih deka besemekih senipak enggau pemansang menua.

"Endang amat karnival tu bisi mantu aku ngiga peluang gawa lalu ari tu mega aku nemu agi bisi peluang endur aku begiga pengawa taja pan umur majak tuai," ku iya ti bisi Sijil Tinggi Pelajaran Malaysia (STPM) lebuh dikerandau seraya madahka diri majak liat ati betapi enggau pemar idup.

Karnival Kerjaya keterubah ba taun 2014 diatur SPA sereta dipenyadika Menteri Kerja Raya Datuk Abdillah Yusof kemari.

Bisi 27 bengkah opis enggau ijinsi perintah nyereta pengawa pemandang ti nyengkaum Jabatan Tenaga Kerja (JTK), Opis Menteri Pengawa Dagang Dalam Nengeri, Koperasi enggau Pekara Bebeli Barang (KPDNKK); Jabatan Perkhidmatan Awam (JPA) enggau Suruhanjaya Perkhidmatan Pelajar (SPP) sereta ke bukai.

Mayuh atur program dipejalaika baka ngerejista online, seminar, licha kerjaya, licha chara interbiu enggau ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Industri muzik Dayak ulih nyingkang jauh enti nerima sukung semua

Posted: 11 Jan 2014 08:21 AM PST

KUCHING: Industri muzik Dayak enda ulih nyingkang jauh enti nadai nerima sukung ari semua piak, pia ku Menijar Besai Pengabang@Panggau Libau Tilung Tiau.

Ku iya, taja pan industri muzik Dayak dipeda baru angkat mansang tang nya enda deka nyadi nyata enti nadai sukung sereta nerima kerejasama ari semua piak nyengkaum perintah.

"Ba penemu aku industri muzik Dayak tau dikumbai udah maju diatu tang enti kitai ke nyadi peminat sereta sukung ari perintah kurang nya deka ngemuntanka pengawa ngemansang sereta ngerembaika industri muzik Dayak.

"Diatu kitai udah mayuh penanyi ke tebilang nama baka Melissa Francis, Raban Masterpiece, Taju Remaong, Leezweeta, Ranne Pat enggau sida bukai, tang enti peminat enda nyukung pan nadai nguna.

"Reti iya peminat patut nemu, iya nya nyukung ari sukut meli VCD tauka CD sida ke chulin tang ukai chelak tiru," ku iya madah ngagai pemberita ba pengerami nyambut Hari Krismas enggau Taun Baru ke diatur ba Pengabang@Panggau Libau, sebengkah palan pemerindang ke tebilang ba bandaraya Kuching.

Pengerami nya ngangauka penanyi popular Iban iya nya Melissa Francis enggau Ricky Francis sereta digulu urung 200 iku orang ke sama enggai enda ampit beperindang sereta betemu enggau penanyi bukai baka Jenarico Jeraki, Ranne Pat, Suzy Kay, Leezweeta, Jessica Ramaya, Depha Masterpiece enggau Diana Ant. Belikau.

Tandu iya, perintah nengah ijinsi ke bekuasa mega ngembuan tanggungpengawa chakah agi ngatur program munaska aktiviti chelak tiru VCD/CD.

"Tuju pengawa tu patut dikereja kena munaska aktiviti chelak tiru ke dipeda majak nyadi di menua tu," ku iya ke mega seiku orang dagang ke beempu kedai makai D' Dayak Cafe ke bepalan ba Kota Samarahan.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Sah SWP bekempit enggau PR

Posted: 11 Jan 2014 08:20 AM PST

by Chris Bishop. Posted on January 12, 2014, Sunday

SWP deka bekerejasama, ngenegap parti seraya ngepunka kerejasama ke engkeman antara gempung penyakal

KUCHING: Sarawak Workers Party (SWP) mutuska runding deka bekerejasama enggau raban penyakal ke alai penerang nya dipansut ba pengerami bejadi SWP pampang Padungan ditu, malam ensanus.

Presiden Larry Sng madah, taja pan pampang nya keterubah iya ngarika parti ba kandang mengeri, SWP nadai ngembuan niat ati  deka ngelangkah tauka ngalah parti ti megai sitak nya.

"Pampang Padungan ditumbuh enggau tuju ngenegap sukung ari raban ke diau di Kuching lalu ukai ketegal kitai deka besemekih enggau parti bakih bukai.

"Kitai deka berati chara kitai ulih bekerejasama, ngenegap parti sereta bela pechayaka pangan diri lalu malam tu meh maya kitai ngepunka kerejasama manah tu," ku iya bejaku ba atur pengawa ngintu Taun Baru China ke mega nyerumba pengawa bejadi pampang.

Larry mega madah parti deka nyadi parti ti ngarika semua pupu raban bansa lalu ukai semina ngarika rayat di menua pesisir tang mega parti ungkup semua peranak Sarawak.

Kelimpah ari nya, iya mega madah SWP benung ransing matak mayuh agi raban ketuai ti ngembuan pengelandik ngaul rayat masuk parti lalu pia mega matak mayuh agi raban.

"Maya pengawa bepilih parlimen suba ke alai kitai bediri ba enam sitak, parti nerima enda kurang ari 40,000 kaban. Pengudah beratika pemutus pengawa bepilih nya, parti ngasaika pekara ti patut dikemerat diatu iya nya matak mayuh agi orang ke landik nyadi ketuai ke dalam parti.

"Ketuai ti nemu ngaul sereta diterima rayat lalu semua jaku ari iya mega deka didinga rayat. Ketuai ti seruran begulai enggau rayat ba maya tusah mega maya lantang. Nya meh bansa ketuai ti deka digiga SWP," ku iya.

Dulu agi ari nya, Sekretari Besai SWP ke mega Chairman pampang Padungan Dr Ong Lak Sai meri jamin parti enda ngelangkah status tauka adan pangku pengawa ba mengeri Kuching lalu netapka deka ngadu kerejasama rapit enggau pangan ari parti ke megai kuasa.

"Tang enti kandang mengeri Kuching dibagi baru lalu sitak  baru ditumbuh, kitai deka minta nengah randau ngambika parti diberi awak bediri," ku iya.

Dr Ong mega madahka mayuh agi pampang parti deka ditumbuhka ba kandang mengeri ba awak ke semak nyengkaum di Sri Aman enggau Pelagus.

Bela datai raban ketuai DAP, ADUN Padungan Wong King Wei, ADUN Pending Violet Yong, ADUN Batu Kawa Christina Chiew enggau MP Stampin Julian Tan.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.