» »Unlabelled » Semua piak besaup ngintu pemaik kaul rama BorneoPost Online | Borneo , Malaysia, Sarawak Daily News » Berita Iban - New 2 Borneo

06:44:00

Semua piak besaup ngintu pemaik kaul rama BorneoPost Online | Borneo , Malaysia, Sarawak Daily News » Berita Iban - New 2 Borneo

Semua piak besaup ngintu pemaik kaul rama

Posted: 13 Jan 2014 10:49 AM PST

by Chris Bishop. Posted on January 14, 2014, Tuesday

Berindik ari penyampau kes ke majak nambah, opis menteri ngemeratka kerejasama ari NGO

KUCHING: Opis Menteri Pemansang Rama angkun bejalaika kerejasama begulai enggau ejensi perintah bukai sereta gerempung ke ukai dikuasa perintah (NGO) ngintu pemaik kaul rama di nengeri tu.

Meretika penyampau kes rama ti majak nambah, Tan Sri William Mawan madah sebarang pengawa tauka perambu nyeliah penusah rama ari ti nyadi endang patut disukung.

"Penusah pengasar sereta bejamah dalam ruang bilik, kes bejamah entara indu-lelaki, beleman chara pejal nyengkaum kes masung diperatika majak nambah ninting taun.

"Kitai bisi perambu berandau sereta ngatur kerejasama enggau NGO ti bejalaika pengawa ngintu pemaik kaul rama," ku iya maya bejadika poster/broser "Go Rural-Ngagai Menua Pesisir" Palan Penyangga Krisis Sepengetu (OSCC) ditu, kemari.

Mawan nambah, statistik ari opis polis balat ngirauka ati ke alai kes masung orang indu ba taun 2011 bisi 151 lalu nambah ngagai 164 ba taun 2012.

Kes beleman bukai ngerikod 159 kes ba taun 2012 lalu kes penusah pengasar ruang bilik iya nya pengasar bejamah indu-lelaki bisi 249 kes ba taun 2011 lalu udah nambah ngagai 282 kes ba taun 2012, tandu iya.

Ba kaul ke sama, Chairman OSCC Datuk Lily Yong madah, pengawa sida ti ngeluarka poster ti nungkatka rambai jaku Ngagai Menua Pesisir dipejalai ketegal ti deka meri penerang senentang servis ti bisi disedia OSCC lebih agi ngagai orang ke diau di menua pesisir.

Ku iya, kitai angkun nentuka orang ti bisi kena penusah pengasar dalam ruang bilik, orang ke dipasung nemu hak sida lalu nemu kini tuju ti patut dulu dikereja maya penusah nyadi.

"Semua servis ke dipeguna bisi disedia ba Opis Bebadi Ngenyit di sebarang sepital di Sarawak dikena nyaga tudah ke kena jamah ari napi penusah ke lebih ngenakut ketegal ke diserahka ari siti ejensi ngagai ke bukai.

"Tuju tu dikena ngurangka penyuah tudah ke dikasar nya ke agi idup ngulang nusui pasal pengasar ti udah diasai iya enggau penyuah iya diperinsa," ku Lily.

Poster enggau broser bisi dichelak ba jaku Iban, Melayu, Mandarin enggau English lalu udah disadung Mawan ngagai pengari tiap pelilih menua maya atur pengawa nya kemari.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak Kpg Kasindu mantah ulah kompeni nyungkur Bukit Sabetong

Posted: 13 Jan 2014 10:49 AM PST

KOTA SAMARAHAN: Urung 50 iku peranak menua ari Kpg Kasindu, Sebuyau mantah pengawa tiga buah kompeni ke bisi minta pemendar deka nyungkur Bukit Sabetong di genturung pendiau nya, endur ngulihka batu kuari.

Ketuai raban ari genturung pendiau nya ti diuluka Nur Khairunisa Abdullah madah, genturung pendiau ke diuan 38 ruang bilik nya endang udah disukat perimeter, sereta madahka pemesai projek kuari nya dijangka mungkur 489 hektar.

"Kami endang enda setuju genturung pendiau kami disungkur kompeni kena sida iya ngaga kuari, laban mayuh agi pengerusak ke deka dibai sida iya ari ngelakka kompeni nya peneka ati ngambi tanah kami," ku Nur Khairunisa.

Peranak ke nguan menua nya tebal bansa Iban sigi ngembuan genturung pendiau nya ari aki ini sida iya kelia, lalu ngembuan umai sereta kebun kelimpah ari genturung pendiau nya ke ngembuan bukit ke manah.

Entara sekeda genturung pendiau ke besemak enggau Kpg Kasindu, iya nya Entangor , Jeragam, enggau Bulan.

"Kami enggai baka Kpg Entangor, alai mensia mayuh ke diau di genturung pendiau dia diasuh angkat dalam timpuh 7 hari lalu madah ngagai mensia mayuh dia enti sida iya enda angkat, sida iya diau di tanah 'haram'," ku Nur Khairunisa.

Iya madah munyi nya lebuh dikerandau nguluka orang genturung pendiau nya betemu mantah pengawa kompeni ke deka minta nyungkur genturung pendiau dia ngagai opis Tanah enggau Survei ditu, kemari.

Iya madah, sida ti diau di Kpg Kasindu endang bisi surat tanah, lalu madah kompeni tauka Tuai Kampung, Lamat anak Man tauka JKKK genturung pendiau nya nadai hak nyual tanah sida dia.

"Nya aja reta tengkira pemisi kami, taja pan kami tu ukai orang ke bepemisi," ku iya.

Iya madah, mensia mayuh ari genturung pendiau dia kala baum enggau Opis Kunsil Mit Sebuyau, kena 26 Oktober taun nyin tadi, ke bisi madah sereta mantaika 41 lis nama orang ari genturung pendiau dia ke besetuju nyual tanah sida iya.

Nitih ku Nur Khairunisa, surat lis nama nya surat palesu, laban sida iya nadai kala nyain sebarang surat sebedau tu.

"Kami nadai kala nyain surat besetuju deka nyual tanah di genturung pendiau kami, kebuah kami ngeripot ngagai polis pengawa salah ngemelsuka surat danji nya," ku iya, lalu nambah ripot polis udah digaga kena 28 Oktober taun nyin tadi tang datai ke seharitu, bedau nerima sebarang timbal ari polis.

Siti agi utai ke nyelai ku Nur Khairunisa, laban ari nama dalam lis nya, orang nya udah parai dalam bulan Mei taun nyin tadi.

"Nya alai, kami enda besetuju kompeni-kompeni tu deka nyungkur tanah kami laban kami enda ngemendarka nya. Bukit ba genturung pendiau kami dia berapa besai, pemayuh utai ke udah ditanam kami nyengkaum pendam. Ulih ka sida mayar pemayuh rengka nya dia?," ku iya.

Lebuh ditanya ngagai iya (Nur Khairunisa) bakani ku sida iya nemu bisi kompeni deka ngambi tanah sida iya dia, iya madah:

"Kami nemu laban sida kompeni nya bisi nganjung utai kia utai pakai, duit saguati," ku iya lalu madah kebuah sida iya mantah, laban nadai timbal ke diterima sida iya, kelimpah ari ngetanka hak sida iya.

Iya madah baru, enti sema pemansang deka digaga baka sekula, klinik tauka infrastruktur bukai, sida iya nyangka ulih bekerejasama.

"Tang enti ketegal ngambi penguntung kediri empu, kami enda ulih nerima nya," ku iya.

Ba pekara nya mega, pemesai ari Opis Tanah enggau Survei (JTS) sitak Kota Samarahan ngelalau sida ari genturung pendiau Kpg Kasindu nya nganjung surat bantah pasal kompeni ke deka nyungkur genturung pendiau nya.

Kemari, lebuh raban nya betemu enggau Opis JTS Kota Samarahan, lis nama orang ke besetuju nyual tanah di sitak nya (dalam fail) udah datai ba opis JTS ke diberi kompeni nya.

"Kami semina roses surat peminta ari kompeni nya, ngemendar ukai pengawa kami laban surat nya ila deka dianjung ngagai Indu Opis kami lalu ditangkan pemendar ari menteri…Ukai kami ngemendar tauka enda," ku pegawai nya.

Surat ari tiga buah kompeni udah datai ba opis JTS Kota Samarahan lalu semua surat nya agi dalam proses.

"Tiap peminta enda semesti iya dikemendarka, ukai nyamai ngemendarka utai baka tu, ngambi timpuh ke panjai. Kami semina proses, tang enti udah bisi bantah baka tu, enti nitih, sigi enda dikemendar…Tang anti mih dulu pemutus ari Indu Opis Indu kami," ku pemesai nya.

Taja pia, pemesai nya madah, enti amat genturung pendiau nya bisi udah disungkur kompeni ke bedau teulihka sebarang pemendar, sida iya tau kena ukum sereta saman.

Surat bantah ari mensia mayuh ari genturung pendiau nya nuju JTS Kota Samarahan deka diserah pengabis tumu, lemai kemari tauka kena hari Tiga tu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pengulu Juni nesau peranak Sg Ngemah ngenukuka akaun sida agi ulih dikena

Posted: 13 Jan 2014 10:49 AM PST

SIBU: Pengulu Juni Massam nesau bala ari Sungai Ngemah ke nerima Bantu Rayat 1Malaysia (BR1M) nentuka akaun bank sida agi ulih diguna dikena mayar bantu nya ila.

Iya madahka BR1M 3.0 disadangka dibayar ngagai sida ke patut nerima bantu berengkah ari bulan baru lalu bantu nya deka terus dipasuk ngagai akaun sida.

"Aku ngarapka peranak rumah panjai ulih meresa akaun sida sebedau sida meri penerang lumur akaun minta BR1M," pia ku iya madah ngagai pengarang berita, kemari.

Juni madahka, sida ke udah bisi akaun bank ulih ngelawa Opis Pengumpul Chukai meresa penerang sida nerima bantu nya tauka nengah online.

Iya ti mega seiku ari penerima BR1M madahka bala rumah panjai ke jauh ari pasar jarang meresa akaun bank sida.

Iya nambah, sekeda nya enda nemu akaun sida udah ditutup ketegal laluh baruh ari penyampau ke pemadu mimit sereta lama udah enda dikena.

Juni mega muji chara baru bayar bantu nya ke ngena akaun bank ti ngemuntangka mensia mayuh.

"Kitai badu agi kiruh berintai panjai ngambi bantu tu ba opis kunsil tauka bank baka ke sebedau tu," ko iya ti megai 70 buah rumah panjai.

Kelimpah ari nya, iya ngarapka sida ke ulih nerima bantu nya ngerijister diri empu sebedau 31 Januari tu.

Juni megai 70 buah rumah panjai ba Sungai Ngemah, Kan.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Polis Bintulu netapka rangkah mensia nya peranak ari Uma Nyaving, Belaga

Posted: 13 Jan 2014 10:48 AM PST

BINTULU: Bala peranak Pelilih Mit Menua Tubau ditu tekenyit ati laban ti tetemuka rangkah enggau tulang mensia enda jauh ari jalai besai Bintulu-Bakun urung pukul 9.55 pagi kena hari Minggu tu tadi.

Sepengudah nya, sida tu tadi lalu ngaga ripot di Balai Polis Tubau ngambika ulih dipansik enggau silik nama kebendar rangkah enggau tulang ti dipeda sida nya enda jauh ari simpang masuk ngagai ladang kelapa sawit ba menua nya dia tadi.

Ku Kepala Polis Bagi Menua Bintulu Superintendant Madang Usat, pengudah nya, sida ari Balai Polis Tubau alu betelefon ngagai iya ke Bintulu lalu bala raban sida sebuat begulai enggau polis ari Tubau meresa ngagai endur rangkah tulang nya ditemu peranak menua nya dia ti mansa endur nya maya sida ti ka nurun ke kebun.

"Datai din,kami tetemuka rangkah tulang mensia ti agi ingap gari iya nya baju chura mansau enggau seluar jeans iya empu," ku Madang lebuh ti mansutka jaku ba aum pemberita ti diatur ba Bilik Aum Indu Opis Polis Pelilih Mit (IPD) Bintulu ditu pagi kemari.

Sama enda jauh ari nya ku Madang, sida mega tetemuka motosikal enggau bungkus plastik ti dipelabaka enggi tudah.

Ku iya, lebuh ti ngusaika bungkus plastik nya, dia deh sida tetemuka surat peranak ti dempu seiku urang penama Doni Usa beumur 38 taun ari Uma Nyaving Sungai Asap Belaga.

Sepengudah nya tadi ku Madang, sida lalu betelefon ngagai balai polis Belaga dikena ngesahka bisi enda orang benama nya diau ba Uma Nyaving din.

Asil pansik bala raban polis din, dia deh sida madah endang bisi orang benama nya di Sungai Asap lalu bala sida lalu ngiga bala diri sebilik tudah ke nadai tu tadi.

"Lebuh sida sebilik tu meresa gari ti agi lekat ba rangkah tulang nya, dia sida madahka garit ti dikena nya endang enggi Doni lalu pia mega motosikal nya endang enggi iya mega," ku Madang.

Ku sida sebilik, Doni tu pansut ari rumah sida kenyau ari 25 haribulan Dua Belas taun siti nyin kemari (2013) iya nya urung 3 minggu ti udah.

Iya endang madahka diri deka ngiga kerja ba kem batang, nya alai sida sebilik enda tentu irau ke iya laban ti bisi madahka penunga diri.

Naka ke diatu ku iya, kes tu agi dikumbai kes mati ngenyit nganti pemutus buntaspansik ti dipejalaika Unit Forensik ari Sepital Besai Bintulu enda lama agi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Kitai enda ibuh kiruh bekelikuh, ku Wong

Posted: 13 Jan 2014 10:47 AM PST

by Judan Bungap. Posted on January 14, 2014, Tuesday

Semua piak patut berundingka chara ke pemadu engkeman kena ngidupka parti

SIBU: Parti Sa'ati Rayat Sarawak (SUPP) patut berundingka chara dikena ngidupka parti nya baru ari ke kiruh mantaika kelikuh enggau pangan diri ba media.

Menteri Kunsil Kandang Menua enggau Pemansang Raban Bansa Dato Sri Wong Soon Koh madah, penyarut ke bisi nyadi dalam parti tau dipanggaika ngagai Opis Pengerejister Gerempung (ROS) alai ngaga pemutus ke engkeman.

"Diatu kitai anang kiruh sapa presiden parti tauka ukai presiden parti. Tang kitai patut ngiga chara baka ni kitai ulih ngidupka parti tu baru," ku iya maya aum media ditu, lemai kemari.

Nambahka nya, ku iya, diatu mega udah bisi surat mandang kebuah dianjung ngagai Indu Opis SUPP ngambika pemesai parti meri saut kebuah parti nya enda patut dikinsil.

"Nyebut pekara tu, Raban Nembiak enggau Indu SUPP ngarapka parti ulih ngatur Extraordinary General Meeting (EGM).

"Pekara tu udah kelalu laun digaga lalu ROS nyangka enda ngemendarka.

"Aku kenyau ari dua taun ke udah kala ngasuh presiden ngatur EGM tang nyentukka sehari tu pengawa nya mengkang enda diaduka.

"ROS udah meri timpuh ke panjai ngagai kitai tang parti enda engkebut," ku iya ti mega Menteri Wang II.

Wong mega madahka, nyema parti dikinsil, anang nyalahka orang ke ngaga kompelin tang manggaika pekara nya ngagai sida ti ngaga pengawa ke salah.

Penyalah nya ku iya kala dibai ngagai Komiti Indu Parti tang enda dikeibuhka.

"Tang nyema dikinsil, bisi tuai raban China ngarapka parti baru ditumbuhka ngambika pengari bansa Cina mengkang bisi ba perintah Barisan Nasional (BN).

"Parti tu ukai parti semina ngarika bansa China aja tang mega Bumiputera," pia ku iya madahka baru.

Kelimpah ari nya, ku iya, sida ke udah tuai tauka sida ke udah alah anang amu tang ngelakka sida ke rebak baru megai pengawa dalam parti.

"Taja pan baka nya, aku semampai bepanggai ba jaku empu, enggai tama ngagai parti bukai tauka parti baru.

"Tang enti deka begunaka penemu ari aku, aku sedia mantu lebih agi deka ngembing rebak baru ngangkatka parti sida," ku iya ti mega Kaban Kunsil Nengeri (ADUN) Bawang Assan madah.

Penyarut nyadi dalam SUPP bepun ari penumbuh dua bengkah raban ti betuaika Presiden SUPP Tan Sri Peter Chin empu enggau Chairman SUPP Sibu Wong Soon Koh.

Penyarut berupai agi nyengenda maya Aum Deligit Tiga Taun Sekali (TDC) kena bulan Disember 2011.

Ba TDC nya, Chin dipilih nyadi Presiden nganti Datuk Patinggi Tan Sri George Chan ti ningkilka diri ari politik ketegal alah maya Pengawa Bepilih Nengeri 2011.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

RPR Sungai Plan minta dikeibuh piak bekuasa

Posted: 13 Jan 2014 10:43 AM PST

by Ambrose Rirang. Posted on January 14, 2014, Tuesday

Genturung pendiau ke suah ampuh maya bah ngenyit berindik ari sistem parit enggau entali ke enda menuku, suah ngerugika peranak menua dia

BINTULU: Mensia mayuh ti diau ba sebengkah genturung pendiau di Genturung Pendiau Rayat (RPR) Sungai Plan Lot ba Jalai Tanjung Kidurong ditu balat bendar teguran beduduk ari bah tunggal ti ngampuhka rumah enggau kandang endur nya urung pukul 5.30 pagi ensana.

Bah tunggal nya nyadi beduduk ari ujan ti enda ngetu semalam-malam nya ti ngujungka ai ari parit besai melumpa lalu ngujungka ai ngampuhka kandang menua nya lalu sekeda rumah bisi tama ai penalam 2 kaki.

Sida ti tasah laban ampuh bah tu endang nadai daya berangkutka semua barang enggau reta tengkira diri laban ai niki naka penyampat sereta ngenyit.

Sandine Bennidect, 40, seiku ari orang ti ngempu rumah dia madah, penusah bah tunggal endang iya suah nuntung palan pendiau di Sungai Plan Lot lebih agi maya musin ujan baka tu.

"Enggau tu, aku endang ngarapka bala pemesai menua ti megai kuasa nyaga sistem parit enggau entali ai ulih berundingka chara ti engkeman kena nagang penusah baka tu nyadi dudi ila," ku iya.

Kebuah pia, enti penusah tu enda diputar, iya deka mai pengerugi ti balat ngagai bala raban orang ti ngempu rumah ditu laban baka taun ke udah-udah, penusah ti sama mega nuntung bala mensia mayuh ti diau ba RPR Sungai Plan Lot tu.

Ku iya, bala penguasa enggau opis bekaul bukai ti diberi tanggungpengawa ngatur sistem parit enggau entali ai ba menua tu semampai ngelasi parit ba kandang endur rumah ditu ngambika enda nakat apat.

"Ba taun ke dulu suba, bah tunggal bakatu endang udah balat meri pengerugi ngagai kami sebuat ti nguan menua ditu laban mayuh reta tengkira kami rusak laban ti enda ulih dikatung sereta dipindahka ngagai endur ti tinggi agi," ku iya.

Nya alai, sida ti nguan menua nya dia endang ngarapka penusah tu ulih diputarka enggau jampat nengah jalai begaga ke sistem parit ti besai agi ngambika penusah ti baka tu enda nyadi agi jemah ila.

Genturung pendiau RPR Sungai Plan Lot tu endang entara palan genturung pendiau ti suah ampuh bah tunggal di Pelilih Menua Bintulu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.