» »Unlabelled » BNP deka mungkur raban indai tunggal bukai BorneoPost Online | Borneo , Malaysia, Sarawak Daily News » Berita Iban - New 2 Borneo

05:40:00

BNP deka mungkur raban indai tunggal bukai BorneoPost Online | Borneo , Malaysia, Sarawak Daily News » Berita Iban - New 2 Borneo

BNP deka mungkur raban indai tunggal bukai

Posted: 26 Feb 2014 08:05 AM PST

by Jacqueline David. Posted on February 27, 2014, Thursday

KUCHING: Indai tunggal tauka indu ke disarak laki sida tang enda diberi belanja kena ngelempung pengidup iya enggau bala anak, dijangka deka dibungkur undang-undang enti Genteran Tusun Ukum 'Married Women and Children Enforcement of Maintenance Act (MWCEMA) 1968 (Enforcement Act)' dikemendarka ila.

Menteri Pengintu Pegelantang Pendiau, Pekara Indu enggau Pemansang Ruang Bilik madah, semina indu Islam aja bisi sistem sukung, iya nya bantu ungkup indu ke disarak laki sida.

"Enti indu bepengarap Islam disarak laki sida, lalu pengawa nya diatur nengah Kot Syariah, reti nya kededua melaki bini Islam nya diberi 'court order' ke alai laki sida patut mayar 'Belanja Ngelempung Pengidup" (BNP) ngagai bini enggau anak-anak iya.

"Lalu enti laki nya enda nitihka perintah kot tauka sengaja enda mayar BNP ngagai bini anak iya, bini iya nya tau minta bantu nengah BSK (Bantu Sukung Ruang Bilik) ari baruh Kot Syariah tang bini iya nya patut ngeripot ngagai kot Syariah dulu sebedau minta bantu ngagai BSK," ku iya.

Nengah Kot Syariah bisi bantu ke diberi ari baruh BSK, sekalika laki nya nitihka perintah kot tauka ngambi bantu nya dulu ari BSK.

"Lalu enti bini laki nya udah ngambi bantu ari BSK, laki indu nya tadi patut mayar pulai duit bantu nya ngagai BSK," ku Fatimah.

Iya madah baka nya lebuh nyadi chairperson ba aum 'Majlis Wanita & Keluarga Sarawak 2014' di Opis Biro Wanita ditu, ensana, ke bela digulu  Sekretari Mendam KKWPK, Rodziah Morshidi, Direktor Biro Wanita Noriah Ahmad enggau bala kaban kaunsil biro nya ke bukai.

Kati indu ukai Islam bisi bantu ke sebaka enggau indu Islam?

Dalam pekara nya, Kaban kaunsil gerempung tu, Wendy Terang ti mega nyadi seiku luyar madah, pengawa sarak ke nyadi nengah adat tauka tikah nengah sivil, enda ngira orang nya bansa Iban, Bidayuh tauka Orang Ulu, sama patut diberi peluang dalam hak sida ngulihka bantu tauka belanja ari laki sida.

Naka ke diatu, Genteran Tusun Ukum 'Married Women and Children Enforcement of Maintenance Act 1968 (Enforcement Act)' semina bisi di semenanjung aja tang apin dikerembai ke Sarawak.

"Nya alai, komiti tu udah mansik pekara tu enggau silik dalam kandang dua taun ke udah. 'Majlis Wanita' meri penemu beratika atur baka BSK patut dipejalaika ba indu ukai Islam, dipejalai sereta diatur perintah menua.

"Dalam reti jaku muntang, sistem sukung belanja ungkup melaki bini ke ukai Islam, arap bendar bisi bantu baka BSK disediaka lalu belanja tu deka mantu indai tunggal enggau anak iya sekejap aja, lalu barang penyampau bantu ke udah diberi ngagai indai tunggal nya, patut dibayar pulai laki ke nyarak iya nya," ku Wendy.

Iya madah bantu belanja tu patut diberi kelala ba opis adat menua tu.

"Nya alai baka Kaunsil Adat Istiadat Sarawak (MAIS) patut ngemeratka atur bansa tu lebih agi ngagai indai tunggal enggau anak iya. Naka ke diatu, MAIS nadai adat bansa nya.

"Perambu kami minta MAIS mansik baru Seksyen 159 ngambika 'Belanja Ngelempung Pengidup' ulih dibayar ngagai bini ke udah disarak tauka indai tunggal kelebih agi bini sida ke enda pengerai," ku Wendy.

Lalu baka nya mega bekaul enggau anak sida iya kelebih agi ba BNP, anak biak ari 18 taun diketuka enti indai tauka bini orang nya belaki baru.

"Ba 'Majlis Wanita & Keluarga Sarawak (MWKS), kami ngasaika atur baka tu enda patut digaga bansa nya. BNP enda patut diketuka taja pan indai iya belaki baru laban ba penemu Majlis Wanita ngasaika tanggungpengawa BNP  nya sigi tanggungpengawa apai indai asal iya," ku iya.

Iya nandu baru, Opis MAIS mega patut beratika kuantum bayar diungkup ke anak.

"Naka ke diatu, pengabis mayuh semina RM200 aja, lalu minta MAIS mansik pekara nya baru.

"Nya alai udah kami mansik undang-undang tu ila, iya deka dibai ngagai Opis Attorney General  lalu ditangkan deka dibantai ba Aum Kunsil Nengeri (DUN) sebedau iya tau dikena," ku iya.

Ba aum nya kemari, aum keterubah 'Majlis Wanita & Keluarga Sarawak 2014', Fatimah mega bisi ngerintaika atur pengawa ke deka digaga kaunsil sepemanjai taun tu, kelimpah ari mantaika lima pekara dalam 'Teras Strategik MWKS', iya nya 'Teras Pengupayaan dan Pemerkasaan Ekonomi, Teras Pengukuhan Institusi Keluarga, Teras Kepimpinan & Pembuat Keputusan, Teras Keselamatan & Perundangan enggau Teras Kesihatan'.

Lalu entara projek bukai ke deka dipejalai nyegkaum nyelak 2 buah bup 'Sarawak Women in Voluntarism' enggau 'Sarawak Women in Politics: The Nationalists (Wanita Sarawak Dalam Politik: Pejuang Nasionalisme', Projek Pemansang Wisma Wanita, Perambu Ngaga Palan Pemisi Indu enggau Atur Pengawa Program Pemansang Indu enggau Ruang Bilik begulai enggau NGO.

Print Friendly

Abu Bekir madahka diri lantang nyadi orang dagang, sedia kereja ke rayat

Posted: 26 Feb 2014 08:04 AM PST

KUCHING: "Aku lantang agi nyadi orang dagang, taja pan aku besedia deka kereja ke rayat," ku saut anak kedua Kepala Menteri, Dato Sri Mahmud Abu Bekir.

Bekir nyaut munyi nya lebuh dikerandau sekalika iya bisi ati deka nganti penuduk apai iya, Kepala Menteri Pehin Sri Abdul Taib Mahmud maya Taib ngelengkaka pangku pengawa iya nyadi Kepala Menteri kena hari Lima, 28 Februari tu.

Berindik ari Taib ke dipadu nyadi Tuai Pemegai Menua ila, dijangka kerusi Balingian ke endang alai Taib bediri ngelama tu deka kusung.

Lalu dijangka mega enti sema kerusi Balingian nya nadai ADUN agi, dipelaba pengawa bepilih mit deka diatur ba sitak nya, taja pan naka ke diatu Opis Pengawa Bepilih (SPR) madahka sida iya bedau nerima sebarang berita sekalika kerusi nya kusung tauka enda.

"Aku empu enda nemu sapa ke deka bediri dia ila taja pan aku sigi bisi pengerindu ke orang Sarawak. Enti aku diasuh bediri dia, aku deka ngaga pengawa aku enggau naka pemanah.

"Tambah aku diatu orang ke selalu nadai hari laban pengawa dagang aku. Aku besedia gawa ke rayat tang pelaba aku nadai nama aku di sengkaum dalam lis," ku Bekir.

Berindik ari pangku pengawa Kepala Menteri ti deka dilengkaka Taib 28 Februari tu, ditangkanka Tan Sri Datuk Amar Adenan Satem ke deka besumpah mangku pengawa nyadi Kepala Menteri ba mua Tuai Pemegai Menua kediatu, Tun Muhammad Salahuddin, enggau padu pangku pengawa Tuai Pemegai Menua ke baru ke dipelaba deka diganti Taib, kerusi Balingian apin diputuska sekalika pengawa bepilih mit deka diatur tauka enda.

Print Friendly

Sinohydro enggau Trenergy udah mujur besain sempekat ngaga 500kV ‘transmission backbone’

Posted: 26 Feb 2014 08:04 AM PST

KUCHING: Sarawak Energy, pengungkup kuasa menua tu, kemari madah, pengawa ngaga 500kV 'transmission backbone' mujur nitihka perambu lebuh sida nyain sempekat entara Sinohydro Coroporation (M) Sdn Bhd (Sinohydro) enggau Trenergy Infrastructure Sdn Bhd (Trenergy) ngaga Pakej B&C nya, kemari.

Mungkur penyauh lebih 500km ari Similajau, Bintulu ngagai Tondong di Kuching, Trenergy Infrastructure, iya nya sebuah kompeni diempu Sarawak Cable, begempung enggau Sinohydro, sebuah kompeni ke tebilang dalam industri kuasa di China diberi tanggung pengawa ngaga dua bengkah ari 500kV 'transmission backbone' , iya nya ari Mapai, Sibu ngagai Lachau (Pakej B), lalu ari Lachau ngagai Tondong (Pakej C).

Pakej A baru udah disain kena bulan Disember nyin tadi enggau Toshiba.

Pengawa ngaga konterik nya dijangka ngena belanja urung RM619 juta lalu dipelaba deka tembu dalam Suku Keterubah 2016.

Tender pakej ke bukai ari 500kV sigi udah dibantai ba tinda antarabansa, setipak enggau proses 'procurement' terit Sarawak Energy.

Maya nganjung tinda, semua tinda dipansik nitihka atur baka ke dipinta tinda nya, nitihka atur Sarawak Energy, ke ngangkatka integriti ke pemadu tinggi, betatika bejimatka belanja, tebuka sereta semekif ke efektif, nadai dipelalai  lalu meri peluang ngagai peranak menua tu empu.

Ketuai Pemesai Eksekutif Sarawak Energy Berhad (SEB), Datuk Torstein Dale Sjoviet madah pemeri dua iti pakej nya nitihka  'procurement process', iya nya nyapai penyampau ke pengabis baruh tauka manah lalu meri peluang ngagai pengawa dagang dalam menua tu empu.

"Sinuhydro-Trenergy JV entara ke pengabis mit 'bidder' ba pakej tu, mandangka penemu sereta peneleba sida iya," ku Torstein.

Direktor Besai Trenergy Infrastructure, Aaron Toh madah, sida iya berasai temegah ati ulih mantu menua tu enggau peneleba sida iya ngaga sebuah projek besai Sarawak, tambah enggau rikod ke manah sida iya ngelama tu ulih mantu ngaga projek tu nitihka timpuh sereta kos ke mit.

Penulung Direktor Besai Sinohydro Corporation, Gu Hong Liang madah, Trenergy enggau Sarawak Cable udah lama bekaul dalam pengawa dagang, iya nya ari taun 2008 lebuh sida iya ngaga Bakun-Similajau-Murum 'Junction Transmission Line Project'.

Projek 500kV 'backbone transmission' sebuah projek ke berat ungkup Sarawak jemah ila. Enggau penembu grid kedua, menua tu deka dijaga ari sistem 'blackout'.

"Projek 500kV nya deka nyukung pemansang Sarawak lebih agi ba kandang SCORE ke majak nambah diatu.

"Kelimpah ari nya mega, mayuh agi kapsiti 'transmission' diguna kena negapka bekal karan ke diatu di Kuching enggau sitak selatan, barat Sarawak," ku Torstein.

Trenergy Infrastructure kemari diarika chairman kompeni nya empu, iya nya Dato Sri Mahmud Abu Bekir Taib.

Print Friendly

MKN nengah TBN berengkah nyadung pemeri tasah bah: Yusni

Posted: 26 Feb 2014 08:04 AM PST

by Judan Bungap. Posted on February 27, 2014, Thursday

SIBU: Orang ke tasah dituntung bah di nengeri tu ke udah ngerijista ba Opis Pengintu Penglikun deka diberi bantu RM500 tiap ruang bilik.

Pemantu Sekretari Kaunsil Pengelikun Menua Nengeri (MKN) Mejar Mohd Yusni Abu Bakar madah, bantu ke diberi nya ari Tabung Bencana Negara.

"Kitai belabuh nyadung bantu ngagai serata nengeri berengkah ari bulan tu nyentuk ke bulan April ti deka datai," ku iya maya dikerandau pengarang berita, kemari.

Dulu agi ari nya iya ngulu Pengerami Nyuaka Bantu ngagai orang ke ditinggang penusah ampuh bah bagi renggat Sibu 2014.

Bantu nya disuaka Menteri Kaunsil Kandang Menua enggau Pemansang Raban Bansa Dato Sri Wong Soon Koh.

Taja pan baka nya, Yusni enggai madah penyampau semua bantu ke deka diberi ngagai serata nengeri.

Ku iya madah, pelilih Sibu bisi 249 iku penerima lalu ditangkan 300 di Kanowit enggau 542 iku di Selanggau.

Maya bejaku ba pengerami nya, Residen Sibu Sim Kok Kee madah bantu ke diberi nya ukai pampas ketegal lenyau keresa maya ampuh bah.

"Bantu ke diberi dikena ngelempungka penusah sida ke tasah ampuh bah urung dua bulan ke udah.

"Aku pechaya penyampau pengerugi ke ditapi jauh agi mayuh ari bantu ke diberi sehari tu," tandu iya.

Print Friendly

Apat uras, projek besai ili Sg Tabuan Dayak dipelaba kebuah bah ngenyit nyadi

Posted: 26 Feb 2014 08:04 AM PST

KUCHING: Penyampat bantu ari Opis Kaunsil Bandaraya Kuching Selatan (MBKS) ngelantangka ati komuniti Tabuan Dayak ditu  maya genturung pendiau nya ditinggang penusah ampuh bah ngenyit berebak enggau  ujan ke enda ngetu nyentuk dinihari, hari Lima tu tadi.

Seiku kaban Kaunsil MBKS Manjeet Kaur Sidhu, entara orang keterubah datai ba endur nya kena hari Enam (pengudah ampuh bah) lalu meda enggau mata diri, utai ke ngasuh balat kena ampuh bah lalu udah nya berandau enggau komuniti ke diau dia ke benung kiruh meresi rumah sida iya nyengkaum bejembuika rengka ke basah laban bah ngenyit nya.

Kampung Tabuan Dayak nyadi sebengkah genturung pendiau ke suah betapi enggau ampuh bah ngenyit tiap kali kena ujan lebat, lalu mensia mayuh ke diau di genturung nya nyangka kebuah kena bah ngenyit ke pengabis balat dalam kandang 20 taun tu ketegal pengawa ngaga projek besai di belakang Tabuan Dayak (di Jalai Wan Alwi) nya dipelaba nyadi pengepun.

Seiku ari komuniti genturung pendiau nya madah, sebedau projek ngaga rumah tauka pasaraya nya, konteriktor dia kala besemaya deka ngemesaika Sungai Tabuan alai sida iya ngaga projek nya, ngambika enda ngenusahka mensia mayuh lebuh tasah ampuh bah ngenyit.

Tang datai ke sehari tu, janji tinggal janji, komuniti di Tabuan Dayak majak tusah ati tiap kali ujan lebat, sida iya ke nanggung semua penusah nya.

Nya alai, tiap kali hari ujan lebat, Kampung Tabuan Dayak nyadi endur keterubah betapi enggau penusah ampuh bah ngenyit, ukai semina nuntung rumah ke diau dia, tang datai ba jalai alun lalu ngujungka Sungai Tabuan ke sempit nya, enda ulih nguan ai kelalu mayuh lalu ngampuhka jalai sereta rumah mensia dia.

Seiku ari komuniti ke diau di Kampung Tabuan Dayak, Dorothy Gregory madah, taja pan Kampung Tabuan Dayak suah endar dituntung penusah bah ngenyit, rumah sida iya entara ke pengabis penudi kena ampuh, tang ampuh bah ngenyit ke nyadi hari Lima tu tadi, ke pengabis balat kala nyadi seumur hidup iya.

"Aku baru ngasai penyamai bekau udah ampuh bah ngenyit kena 1 Januari tu tadi, lalu dituntung baru bah ngenyit hari Lima tu tadi. Kumbai aku, lebuh maya 5 Januari 2012 balat, enda nemu ke baru tu tadi balat agi ari nya," ku Dorothy.

Iya melabaka bah ngenyit nya ukai ketegal parit di genturung pendiau dia enda ngeraratka ai enggau manah, tang jangka iya ketegal projek ngaga rumah tauka pasaraya belakang genturung pendiau (ba Jalai Wan Alwi) ke nyadi pengepun, nuntung genturung pendiau alai komuniti Dayak ari Saratok, Betong, Simunjan belabuh datai lalu nirika ruang bilik dia.

Taja pan parit ngembuan kelalu mayuh uras nyangka kebuah tau mai bah ngenyit, tang komuniti di genturung pendiau nya madah, pengawa MBKS enda meresi parit nya tau mega nyadi kebuah.

"Maya kami kena tasah, tauka maya kami kompelin baru MBKS datai, tang enti enda dikompelin, sida iya jarang kitu meresa endur tu," ku iya.

Lebuh kaban Kaunsil Manjeet meresa parit ba genturung pendiau dia, iya madah nyangka siti ari kebuah bah ngenyit selalu nyadi laban parit dia nadai jalai ai pansut ngagai Sungai Tabuan, lalu iya semina begelumu ba sebengkah endur, nya ke tau ngasuh ampuh bah ngenyit.

"Aku udah bejaku enggau Datuk Bandar pasal penusah tu, lalu udah tu ila, kami deka bejuraika pekara nya, baka ni deka ngaga besai agi parit nya. Laban bisi sekeda jalai parit nya bisi ngerampit tanah orang bukai. Kami enda tau sebarang nyangkul tanah orang laban patut nitih undang-undang.

"Enti ngemesaika parit nya ba tanah orang bukai, nyangka nya ukai bidang kuasa MBKS, tang nyangka opis kandang menua ke besai agi kuasa tau berandau enggau orang ke ngempu tanah nya, ngambika meri awak ngagai kami ngemesaika parit di genturung pendiau tu," ku iya madah lebuh dikerandau pemberita ditu apin lama ke udah.

Kelimpah ari nya, seiku agi komuniti ke diau di genturung pendiau dia madah, iya empu kala nulis surat ngagai Datuk Bandar MBKS enggau Opis Parit enggau Entali Ai (DID).

Opis DID kala datai kia, ku indu nya, tang semaya DID deka ngemesaika parit nya datai ke sehari tu pan enda kala diatur.

Albert Merikan, seiku komuniti ke diau di Tabuan Dayak dia madah, ari penusah bah ngenyit ke nyadi tu tadi, iya ngarapka opis kandang menua ulih mantu komuniti di Tabuan Dayak, ngemesaika agi parit ba endur nya lalu tau mega bejaku enggau konteriktor kena gaga projek ba Jalai Song, ngamatka semaya sida ti deka ngemasaika Sungai Tabuan nya.

Tuai Kampung (TK), Kampung Tabuan Dayak (Paya) Peter Encharang lebuh dikerandau madah, iya udah nganjung surat ngagai Indu Opis Parti Sa'ati Rayat Sarawak (SUPP) baka ke dipadah seiku pemesai parti nya, tang datai ke sehari tu nadai kala dikemerat.

"Sida MBKS bisi datai, tang nadai ngaga nama-nama. Surat aku ke penudi endar nuju MBKS pasal kompelin jalai enggau sekeda utai bukai pan bedau di atur.

"Aku ngarapka penanggul tu ulih diputar enggau jampat, laban enda alah tiap kali hari ujan lebat, kami ditu irau belama enggaika kena ampuh bah baru," ku Peter.

Naka ke diatu, berebak enggau penusah bah ngenyit hari Lima tu tadi, MBKS semina udah muai uras ari parit lalu bisi udah nebas nisi parit nya aja.

Print Friendly

PIBG SMK Luar Bandar No. 1 Sibu mujur ngatur aum keterubah taun tu

Posted: 26 Feb 2014 08:03 AM PST

SIBU: Gerempung Apai Indai enggau Pengajar (PIBG) Sekolah Menengah Kebangsaan (SMK) Luar Bandar No. 1 Sibu (SMKLBS) udah ngatur aum keterubah taun tu, empai lama tu tadi.

Aum nya digulu urung 500 iku apai indai nembiak nyengkaum raban pengajar sekula nya.

Batang pekara ke bisi dikerandau ba aum tu iya nya bekaul enggau penanggul ke bisi nyadi antara bala apai indai nembiak enggau pengajar sekula.

Randau tu ngembuan tuju deka nyerenih sereta nyintalka agi kaul kededua piak dikena ngelantangka agi sekula tu nempa pemujur ba pekara pelajar nembiak sekula.

Awak tu mega dikena bala apai indai betanya pekara pelajar anak sida ngagai pengajar.

Aum tu mega bisi digulu ex-kepala pengajar sekula nya, Tan Hock Sang enggau Chairman Gerempung Apai Indai enggau Pengajar (PIBG) SMKLBS, Liang Mikui.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.