» »Unlabelled » Mawan pechaya Menteri Besai agi ingat ke semaya iya ngagai SPDP BorneoPost Online | Borneo , Malaysia, Sarawak Daily News » Berita Iban - New 2 Borneo

05:46:00

Mawan pechaya Menteri Besai agi ingat ke semaya iya ngagai SPDP BorneoPost Online | Borneo , Malaysia, Sarawak Daily News » Berita Iban - New 2 Borneo

Mawan pechaya Menteri Besai agi ingat ke semaya iya ngagai SPDP

Posted: 23 Feb 2014 01:32 PM PST

KUCHING: Presiden Parti Progresif Demokratik Sarawak Tan Sri William Mawan mengkang arap sereta pechaya kaban parlimen (MP) ari parti nya deka diungkupka pangku pengawa menteri ba perintah besai.

Ku iya, Menteri Besai Datuk Seri Najib Tun Razak agi ingat ke semaya iya ngagai SPDP ti deka meri pangku pengawa menteri ngagai seiku MP ari SPDP.

"Kitai nyadang ba ubah rintai kabinet menteri ke deka datai, seiku MP ari parti tu deka dipadu mangku pengawa nyadi menteri tauka sapit menteri.

"Najib bisi nelai aku, beri awak ngagai sida MP nuan enggau orang belabanka penemu di parlimen dulu," ku iya nyerita ba sebengkah aum pengarang berita pengudah ngulu aum Kaunsil Tinggi parti nya ba indu opis SPDP Jalai Badaruddin ditu, kemari.

Ba pengawa Bepilih Besai ti Ke-13, SPDP menang ba semua empat sitak parlimen ke alai presiden, Mawan menang di parlimen Saratok, Datuk Seri Tiong King Sing (Bintulu), Anyi Ngau (Baram) enggau Anthony Nogeh (Mas Gading).

Taja pia, Mawan dulu agi ari tu bisi mansutka jaku dia iya enda ngerebut penuduk menteri dalam perintah besai ketegal ti udah mangku pengawa menteri ba perintah nengeri ke alai iya mega ADUN Pakan.

Berindik ari nya, entara sida tiga Tiong, Anyi enggau Anthony disadang dichiri mangku pengawa menteri ba perintah besai.

Sebedau PRU-13, SPDP diungkupka dua penuduk menteri, iya nya pangku pengawa Sapit Menteri Pengangkut (Jelaing Mersat) enggau Sapit Menteri Dagang Antarabansa enggau Industri (Dato Jacob Dungau Sagan).

Print Friendly

Rayat patut ngasai macham pengerugi dipegai penyakal

Posted: 23 Feb 2014 01:32 PM PST

Seraya andal ngerampas Pelagus ari penyakal, PRS ngelalau peranak menua dia ngambika enda muntang dikemeliKUCHING: Parti Rakyat Sarawak (PRS) andal ulih ngerampas Pelagus ari penyakal maya pengawa bepilih Kunsil Nengeri dudi tu ila, ku kaban parlimen (MP) Ulu Rajang Wilson Ugak Kumbong.

Sentang pekara nya, iya ngelalau rayat ba kandang menua nya anang agi dikemelika penyakal ba pengawa bepilih Kunsil Nengeri dudi tu ila.

"Taja pan sitak Pelagus ukai ari baruh bungkur sitak parlimen aku, tang aku nyaup sida meri bantu ke patut ngagai rayat," ku Ugak bejaku ba Pengerami Betemu enggau Rayat ke diatur ba Rumah Bujah, Pelagus empai lama ke udah.

Ku iya, rayat di Pelagus nadai diungkupka RM1.5 miliun Projek Mit Pemansang Menua Pesisir (MRP), ninting taun.

"Uji kita berunding, berapa mayuh kita rugi dalam kandang lima taun ari baruh pegai penyakal," tandu Ugak, ti mandingka pekara ke nyadi ba kandang menua nya diatu baka ngena injin sepit ke semina seiti plag aja.

"Enti injin sepit kitai semina bepanggai ba seiti plag aja, baka ni perau ulih nanjak arus ai deras," ku iyaseraya madahka sitak Pelagus nya diatu semina dikemata ka MP Kapit ke mega Sapit Menteri Pemansang Menua Pesisir enggau Kandang Menua, Datuk Alexander Nanta Linggi.

Sitak Pelagus diatu ari baruh pegai Sarawak Workers' Party (SWP) nengah Sapit presiden parti nya, George Lagong ke udah menang ba sitak nya maya pengawa bepilih Kunsil Nengeri sebedau tu ngalahka chalun BN-PRS, Stanley Nyitar enggau Edward Sumbang Asun ari PKR nengah majoriti of 2,837 iti undi.

Berebak enggau pengerami nya, Ugak ngungkupka geran MPR  RM5,000  ngagai Komiti Pemansang enggau Pengelikun Genturung Pendiau (JKKK) Rumah Bujah, RM3,000 ungkup biro indu lalu RM5,000 diberi ngagai Indu PRS Bagi Pelagus, ngambika bisi dikena sida bejalaika pengawa.

Ugak ke mega Kaban Kaunsil Besai PRS, ngelalau chalun ke bisi ati deka bediri ba sitak nya begempung ngambika sida ulih ngambi ati enggau runding penyukung.  Orang ti dikeandalka nyadi chalun ba sitak  Pelagus nyengkaum Sekretari politik Kepala Menteri, Wilson Nyabong Ijang, Kepala Opis Kaunsil Pelilih Kapit, Cr Phillimon Nuing, Cr Jackson Melintang, Stanley Nyitar enggau Wilson Awan.

Print Friendly

Empat sebakih bakal ba kes bebadi jalai alun

Posted: 23 Feb 2014 01:31 PM PST

KUCHING: Seiku indu ke beumur 19 taun bebadi balat bendar sereta putus jari kanan seraya tiga iku bakih lelaki iya semina bebadi mimit pengudah teparuk dalam sebengkah kes bebadi jalai alun ba Jalai Ngelambung di Simpang Tiga, ditu kemari.

Penusah nya nyadi urung pukul 12.30 ngalih hari ke alai kerita bansa Toyota Hilux ke dibai seiku ari bakih mansa tepawah lalu nempuh pemagi jalai sebedai lungkup di tengah jalai.

Mansa kenu duduk di bangku penumpang udah nya diperumban ngagai hospital ngena ambulan.

Raban ari Sibu nya baru datai di bandaraya Hari Enam tu tadi.

Maya penusah tu nyadi, sida empat nya kenu mansang deka merarau ngagai pusat bandar.

Raban bomba begaut angkat ngagai tempat penyadi ngambika meri bantu seraya polis trafik nasat penyadi.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

SDNU enda tau dibalut pengawa politik: Tengku

Posted: 23 Feb 2014 01:30 PM PST

SIBU: Gerempung Bansa Dayak Sarawak (SDNU) ukai ditumbuh bepelasarka politik taja pan bisi sekeda kaban gerempung nya orang politik,ku Sekretari Politik Kepala Menteri, Tengku Gruna.

Ku iya, sesebengkah gerempung ukai dikuasa perintah (NGO) ti ditumbuh ukai kena  bepolitik tang deka meri penguntung ngagai semua nyengkaum pemansang sereta nyadi pengari mantaika penanggul ti bekaul enggau sesebengkah komuniti.

"Nya alai, anang mai ideologi politik tama ngagai SDNU nangi mambarka kitai ketegal enda sebaka penemu.

"Kami suah dilalau ngambika enda ngena SDNU malutka diri ba politik, tang diperansang ngena SDNU ngemansangka raban Dayak.

"Nadai ngira kita ngarika sesebengkah parti politik sereta beserekang penemu dalam politik tang kita anang enda berakup sereta sejalai dalam SDNU ngambi pulaika pemaik ngagai raban Dayak,"pia ku iya.

Iya bejaku munyi tu lebuh bejadika Pengerami Gaga Ati ke diatur SDNU Unit Sentosa I ba Kampung Sentosa, Jalai Salim ditu, malam ensanus.

Sama bisi ngulu pengerami nya, Ketuai SDNU Unit Sentosa I Kelvin Kieh, Ketuai Serakup Indu Dayak Sarawak (SIDS) Kandang Sentosa I Margaret Jara, ex-Kaunsilor ke mega ex-Ketuai SDNU Unit Sentosa I, Dr Johnny Kieh enggau bala exco SDNU Sibu bukai.

Beserimbai enggau pengerami nya, Tengku ke mega Chairman SDNU Sibu bisi nerima pom minta masuk nyadi kaban baru ari 30 iku peranak Kampung Sentosa Fasa I ke minta nyadi kaban SDNU Sibu.

SDNU Unit Sentosa I diatu ngembuan 60 iku kaban ari baruh SDNU Sibu.

Tengku mega madah, SDNU patut nyempil diri sereta nyukung perintah ke diatu ngambika ulih nerima bantu ke patut.

"Nyempilka diri sereta nyukung perintah ke diatu ukai reti nya kitai bepolitik, tang kelai kitai andal ati ke perintah.

"SDNU mengkang begunaka iring sereta bantu ari perintah ngambika ulih bejalaika atur pengawa gerempung tu. Nya alai aku ngelalau kita semua anang ngenyauhka diri ari perintah laban perintah ngembuan mayuh bengkah perambu kena ngemansangka komuniti nengah SDNU dudi ila," pia ku iya.

Ba runding iya, genap iti unit ari baruh SDNU Sibu beguna amat kena ngemansangka pampang (Sibu) nyengkaum nyerakupka komuniti Dayak nengah atur pengawa sida. "Kitai tu sebilik dalam SDNU taja pan enda sama sepenemu ari segi politik enggau mayuh macham pekara bukai. Taja pan kitai bebida, tang kitai patut berakup dalam gerempung tu.

"SDNU ulih nyadika pelasar dikena ngemansangka komuniti Dayak ari segi ekonomi, pelajar, tikas pengidup enggau sekeda utai bukai. Kena meh gerempung  tu memanah," pia ku iya.

Print Friendly

Bisi 25 iku nembiak mujur ngulu kos ‘Bejalaika ‘Y’ Centre’ ke diatur KPSU

Posted: 23 Feb 2014 01:29 PM PST

SRI AMAN: Seraban 25 iku nembiak ari Pelilih Sarikei, Betong enggau Sri Aman udah ngulu kos Bejalaika 'Y' Centre' ke diatur Opis Menteri Pemansang Rama enggau Kandang Nengeri Sarawak (KPSU) ba Bilik Baum, KPSUPelilih Sri Aman ditu pagi kemari.

Kos sehari suntuk nya diatur kena ngelatih bala penyereta ke dipilih bejalaika 'Y' centre ba pelilih menua sida, laban berengkah ari taun tu, semua Dewan Suarah di Sarawak deka dibuka palan nya.

Tukang pengerembai berita pengatur kos nya madahka, 'Y' Centre ke deka dibuka ba semua pelilih menua di Sarawak berengkah ari taun tu mega deka nyadi palan endur bala nembiak betemu enggau pangan diri ti ngemeratka atur pengawa ke menuku.

"Palan nya ila deka disikap enggau wi-fi, mini Librari, palan endur ngelantang runding enggau sekeda perengkaguna bukai nitihka pengerindu bala nembiak," pia ku iya sepenembu kos nya pagi kemari.

Ku iya baru, palan nya dibuka ngambika tau nyadika pelasar sereta nyadika sebengkah ari chara endur bala nembiak berandau sereta merambu atur pengawa bala nembiak.

"Palan nya deka dikemataka Menijer Dewan Suarah sereta dipejalaika bala nembiak nitihka perambu sida. Palan nya deka dibuka tujuh hari seminggu berengkah ari pukul 8.00 pagi nyentuk ke 8.00 malam,"pia ku iya.

Ku iya, nengah mayuh bengkah atur pengawa ti dipejalaika ba palan nya ila, perintah arapka penusah rama ke nyadi ba bala nembiak ulih dikurangka.

Pengerami nutup kos nya udah dipenyadika Pemesai ari Unit Nembiak, KPSU Sarawak, Paul Kawen.

Sama bisi ngulu pengerami nya, dua iku pemesai ti ngarika Unit Nembiak KPSU Sarawak, Abang Zaffrul Abang Zarul engagu Rosli Pajie, Ketuai KPSU Betong, Awang Mazelan, pengari Ketuai KPSU Sarikei, Yazid Yusuf enggau pengari Ketuai KPSU Sri Aman, Abang Shahfian Abang Ibrahim.

Print Friendly

Gerempung Wang Chong Malaysia teperindang ngelawa Makit Sentral

Posted: 23 Feb 2014 01:28 PM PST

SIBU: Gerempung Wang Chong Malaysia diketuaika Chairman, Dato' Heng Hong Him bisi ngelawa Makit Sentral Sibu, kemari.

Penatai iya dikelaluka mandal Chairman Opis Munisipal Kaunsil Sibu, Datuk Andrew Wong enggau Chairman Gerempung Wang Rajang Pampang Sibu, Wong Chung Tiew.

Andrew nguluka Heng enggau sekeda orang bukai matau makit nya iya nya sebengkah ari makit ke pengabis besai di menua tu.

Heng enggau kaban gerempung nya bela tebelenga meda pemesai makit enggau pemayuh utai ke bisi dijual dia.

Makit Sentral Sibu tembu digaga ujung taun 1996 suba sereta beungkus urung RM12 miliun.

Makit nya ulih muat urung 1,100 buah kedai bejual barang basah enggau rangkai ditambah enggau 200 buah kedai ba palan pasar tamu.

Print Friendly
We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.