» »Unlabelled » SPDP sanggup berunding enggau raban G5 BorneoPost Online | Borneo , Malaysia, Sarawak Daily News » Berita Iban - New 2 Borneo

05:05:00

SPDP sanggup berunding enggau raban G5 BorneoPost Online | Borneo , Malaysia, Sarawak Daily News » Berita Iban - New 2 Borneo

SPDP sanggup berunding enggau raban G5

Posted: 23 Feb 2014 01:37 PM PST

by Chris Bishop. Posted on February 24, 2014, Monday

Pemutus tu bepun ari lalau Menteri Besai enggau Kepala Menteri ti ngemeratka penegap BN

KUCHING: Parti Progresif Demokratik Sarawak (SPDP) sedia bejalaika atur ti patut dikena ngenegapka parti sereta Barisan Nasional seraya nyaut lalau ari Menteri Besai enggau Kepala Menteri.

Presiden parti nya Tan Sri William Mawan madah, SPDP angkun ngenegap sereta ngempung BN Sarawak nitihka tangkan ari kededua ketuai ngambika majak tegap lebih agi dikena napi pengawa bepilih nengeri tu ila.

"Lalau ke dipansutka Menteri Besai enggau Kepala Menteri nya chukup beguna lalu patut dikemerat ke alai kitai nyadang pengawa bepilih nengeri deka diatur kandang timpuh setaun dua tu.

"Serakup parti dalam BN mega dilalau mutarka sebarang penanggul ke bisi ditapi. Ditu raban kaunsil parti meri mandat ngagai aku enggau sapit presiden berandauka enggau jauh senentang pesan ari kededua ketuai BN nya.

"Taja pan kitai bisi penanggul dalam parti, kitai mega angkun ngerampas penuduk ti udah dialah lalu atur ngenegap parti entara sebengkah chara ke pemadu manah endur kitai nyapai juluk," ku iya.

Iya mansutka jaku tu ba sebengkah aum pengarang berita pengudah ngulu aum kaunsil tinggi parti nya ba indu opis SPDP di Jalai Badaruddin ditu, kemari.

Ngenang senentang jaku iya ti sedia nerima pulai raban G5 ngagai parti, Mawan madah naka ke diatu sida lima nadai ngenataika pinta masuk nyadi kaban parti baru.

"Kitai netapka pemutus ketegal deka meda parti majak tegap, semua patut sanggup berunding, ari nya baru pekara ulih diputar.

"Enti sida lima enda ngenataika pinta masuk nyadi kaban parti, nadai meh isu ke alai kitai pan enda meh ulih bejurai panjai agi," ku iya.

Lima pengari rayat SPDP tauka G5 ke disebut iya nya ADUN Tasik Biru Datuk Peter Nansian, ADUN Bekenu Rosey Yunus, ADUN Batu Danau Paulus Gumbang, ADUN Marudi Datuk Sylvester Entrie enggau MP Mas Gading Datuk Tiki Lafe.

Nyaut tanya senentang berita ti nyebut SPDP enggau SUPP ti deka begempung, Mawan madah parti seruran tebuka ba sebarang perambu enggau inisiatif ti tau ngeringka BN.

Taja pia, iya madah, kitai enda ulih begempung enti sepiak aja ke keran, ba piak SPDP, kitai ngelaluka perambu nya.

Bela datai ngulu aum nya, Sapit presiden Datuk Seri Tiong King Sing, Sekretari Besai Nelsong Balang Rining enggau kaban bukai.

Print Friendly

Bisi 35 bengkah atur pengawa endur nyuaka baucher BR1M

Posted: 23 Feb 2014 01:36 PM PST

KUCHING: Bisi 35 bengkah atur pengawa nyuaka baucher Bantu Rayat 1Malaysia (BR1M) diperambu diatur di serata nengeri bererenggat nitihka sitak parlimen.

Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah madah, pengawa nya deka ngemudah atur ngagih baucher bantu ngagai penerima ke nadai akaun bank.

"Sarawak ngembuan mayuh penerima ke nadai akaun bank lalu enggau kebuah nya,kitai ngarika perintah merambu ngatur pengawa ngagih ngambika ngemudah sida nerima.

"Naka ke diatu, kitai merambu ngatur 36 pengawa ngagih baucher ba serata Sarawak berengkah sehari tu (kemari) nyentuk ke 12 March 2014," ku iya.

Iya mansutka jaku nya lebuh dikerandau maya ngepunka pengawa nyuaka baucher BR1M 3.0 di Stadium Tertutup Majlis Bandaraya Kuching Selatan (MBKS) ditu, kemari.

Ba pengawa nya, sepenyampau 2,207 orang tuai ari parlimen Bandar Kuching enggau Stampin nerima BR1M sida.

Ba kaul ke sama, Fatimah ngelalau penerima baucar BR1M enda sengapa melanja duit nya lalu patut dikena meli barang ke diguna ruang bilik diri empu.

Iya madah, ba Sarawak sepenyampau 594,765 iku orang deka nerima bantu ti mungkur 262,711 iku penerima nengah akaun sereta 332,054 penerima ke nadai akaun.

Print Friendly

Seraban 31 iku kaunsilor MDLA besumpah mangku pengawa ungkup penggal dua taun

Posted: 23 Feb 2014 01:35 PM PST

ENGKILILI: Seraban 31 iku kaunsilor ti betuaika Chairman Opis Kaunsil Pelilih Mit Lubok Antu (MDLA) Jack Aman Luat udah besumpah mangku pengawa nyadi kaban MDLA Antu ungkup penggal 2014 / 2015 di Dewan Masyarakat Engkilili, ditu empai lama ke udah.

Ari 31 iku, 17 nya kaunsilor baru lalu 14 agi orang lama.

Pengawa angkat sumpah nya udah dipenyadika Menteri Muda Perintah Kandang Menua, Datuk John Sikie Tayai.

Datuk Sikie ke mega ADUN sitak Kakus madah, Opis Menteri Perintah Kandang Menua enggau Pemansang Komuniti puas ati enggau servis Piak Bekuasa Kanadang Menua (PBT) di menua pesisir dalam nengeri tu.

Ku iya, piak Opis Menteri naka ke diatu nadai kala nerima sebarang sebana ke berat bekaul enggau servis PBT di nengeri tu.

"Kami bisi nerima sebana ari peranak ba kandang nengeri dalam nengeri tu baka penanggul jalai rusak, lampu jalai rusak enggau pengawa begumpulka uras.

"Taja pia, PBT tetap ngemeratka penanggul nya sereta ngiga chara mutarka penanggul nya ngambi pulaika pengelnatang ngagai mensia mayuh," ku iya.

Iya bejaku munyi tu ngagai pemberita pengudah ngemataka pengawa Besumpah Mangku Pengawa ungkup kaban MDLA Antu penggal 2014 / 2015 di Dewan Masyarakat Engkilili, ditu empai lama ke udah.

Sama bisi dia maya nya, Kaban Parlimen Lubok Antu William Nyalau Badak, ADUN Engkilili, Dr Johnnical Rayong Ngipa, ADUN Batang Ai, Malcom Mussen Lamoh, Residen Sri Aman, Johnathan Lugoh enggau Sekretari MDLA Ignatius Jinnie Bunyau.

Print Friendly