Anang nejuka Taib Ngulihka Penuduk Gabenor!

Posted: 14 Feb 2014 07:29 AM PST

Ngayanka mua ti balat kena tating mayuh penanggul – opis Taib udah enda ngasuh bala pengarang berita nusui berita enggau silik sebedau jaku gerah dipansutka!

Ke bendar Taib lalu bedau ulih betindak enggau jampat baka ti dikedekaka iya lalu ngaga pemutus runding dikena iya ngulihka penuduk Gabenor nya nunjukka iya majak bisi pengelemi ba penuduk nya.

Laun mansutka jaku gerah bekaul enggau tindak iya nya sereta ngiga orang ti ulih nukar iya mai reti iya benung napi pemar enggau BN dikena iya ngulihka penuduk ti tinggi agi kuasa nya.

Tambah mega, raban ukui pengasu dalam PBB udah enggau jampat ngemendarka iya ngereja dua iti pekara ti enda betul dalam sistem demokrasi nya dikereja, kuasa milih nama penganti iya enggau netapka nama iya empu nyadi chalun tunggal ba penuduk Gabenor sida.

Enggau nya, kebuah iya bedau ulih neruska juluk ati iya engkka agi bepanggai ba iya ti agi betawar-tawar enggau perintah besai di KL.

Taib tetenguk ke penuduk Gabenor ti bekuasa penuh, nyengkaum kebal ti beguna bendar ba iya awakka iya enda ulih didawa ketegal mayuh bengkah penyalah makai suap iya. Iya deka terus merintah awakka iya ulih ngintu semua pengeraja iya nya lalu mega pengawa dagang enggau projek iya ti besai-besai.

Deka tauka enggai iya besetuju nirika Abang Johari ti dikerinduka Najib nyadi Kepala Menteri anak patung?
Tang, pengelaun nya nunjukka runding enggau penemu enda besenutuk, lalu lama agi orang mayuh ditejuka nganti, mar agi pekara nya diterima.

Bala tuai penyakal enggau raban NGO ti meratika udah nemu, nirika Taib Mahmud nyadi Gabenor ti baru ukai semina deka meri malu ke menua iya empu, laban penyalah makai suap iya, tang atur nya enda nitihka undang-undang menua.

Pengari DAP Padungan, Wong King Wei udah ngenataika jaku bantah iya ba minggu nyin kemari udah bekau berita angin ti berubah nyadi bendar pasal Taib ti deka mansutka jaku gerah pasal iya ti deka badu gawa.

Wong nunjukka atur pengawa nya ngelanggar undang-undang menua laban Taib endang bisi pengawa dagang ti besai bendar ba menua iya nya (bedau nyengkaum pengawa dagang enggi sida sebilik).

Pengarah dalam kompeni Mesti Bersatu, ti bisi syer ti mayuh di menua Sarawak, nyengkaum tanah ti dirampas, ti dipegai kompeni Delta Padi

Wong udah mujur nunjukka penuduk Taib ti nyadi pengarah dalam kompeni Mesti Bersatu, munyi ti udah kala dituliska dalam laman web tu.

Kaban politik nya madahka, dalam undang-undang Menua Sarawak Kepala Menteri tauka Gabenor ditagang mangku sebarang pengawa dalam sebarang kompeni tauka ngaga kaul dalam dagang kunsi.

Jaku tangkan ari Wong nya madahka Taib patut badu mangku pengawa nyadi Kepala Menteri, tang iya mega enda tau mangku pengawa nyadi Gabenor.

Taib nyadika pemegai syer pemadu besai, sama enggau sida sebilik ti dikaitka enggau niang menyadi iya, Arip Mahmud

Gerempung NGO, Bruno Manser Fund, ti udah bejalaika pansik sida ti silik ba kompeni-kompeni enggi sida Taib sebilik, diatu udah tetemu sebengkah penerang ti baru ti patut dikena nagang Taib ari ti dipaduka mangku pengawa Gabenor.

Dalam sebengkah penerang media bedau lama tu udah, NGO nya udah mantaika rintai nama kompeni ti silik ti bekaul enggau kompeni Mesti Bersatu, ti endur sida mujur ngerintaika enda kurang ari 18 buah kompeni pemegai syer.

Siti ari kompeni nya, Delta Padi Sdn Bhd, udah sekali agi dibantah ba minggu nyin kemari laban ditemu ngelanggar kuasa pengelantang orang asal lalu ngerampas tanah sida (beduduk ba berita ti asal iya udah kala dituliska dalam Sarawak Report tu dulu suba).

Baka ti udah kala ditunjukka NGO ari menua Switzerland nya, isu tu lalu ngerampit isu Taib ti dibalut skandal ba ikas entarabansa, lebih agi ba pemutus ti deka meri iya kebal dalam pengelama empat taun agi.

Baka ni Yang Di-pertuan Agong Malaysia enggau Perintah iya mudah bendar ngemendarka siku tuai, ti benung dipansik komisyen penagang penyalah makai suap (SPRM) menua iya empu ketegal salah guna kuasa iya ti disempulangka enggau pengawa mai pansut duit menua bebilion-bilion ringgit lalu disimpan dalam akaun bank sida sebilik?

Pengawa iya ngemataka undang-undang menua. Ngaga pemutus nirika Taib nyadi Gabenor deka ngeruga penuduk iya.

Enti BN enggau Agong Malaysia deka majak maduka Taib nyadi tuai menua iya, sida deka dipeda mantaika kasam sida empu ngagai serata dunya lalu nya deka nunjukka sida enda ulih ngapuska siku pemerintah kleptokrat ti rangka nya.

Lalu menua Malaysia mega deka dikumbai menua ti nadai luan pejalai. Tentu nya deka nambahka pemerat tanggungpengawa Agong, ti endang udah betanggungpengawa ngemataka penuchi undang-undang!

Sekali ke pansik raban SPRM udah ditangguhka enggau lengkas, ketegal nyadika siti ari kondisyen dalam jurai nya?
Iya tentu deka meri malu ngagai mensia mayuh, tang kondisyen nya tentu deka diengkahka ba ikas pemadu tinggi dalam rintai kondisyen dikena betawar-tawar ke pengawa Taib!

Enggau semua atur ti dipejalaika dalam pemetang nya, enggau chara belubah-lubah tang tetap bendar, sada nyawa jaku bantah orang udah majak inggar-seinggar bekaul enggau pkara ti udah ulih ditapi nya.

Jaku bantah enggau jaku kutuk udah belabuh pansut dalam media ti seruran muji Taib lebuh maya iya mansutka jaku gerah madahka diri ti badu mangku pengawa nyadi Kepala Menteri.

Siku pengarang berita veteran, Christina Suntai, ti diatu bekereja nyadi pengeluar berita dalam stesyen Radio Free Sarawak, udah madahka kuasa ti enda ulih dibai berunding deka nyadi nyata enti orang politik ti endang udah balat dibalut pengamah makai suap nya dipaduka nyadi Gabenor.

Tambah mega Taib udah ditemu ngaga sayap opis atur pengawa perintah ba rumah ofisyel Gabenor, Astana, ngambika empu ila udah terus merintah menua Sarawak belama-lama!

Gajah dalam rumah – baka ni Taib deka nerangka pasal kompeni CMS?

Nadai siti pan utai tu patut ditejuka, laban dalam atur perintah demokrasi ti tulen proses ti meruan lalu bepilihbesai patut diatur dikena ngiga penganti Taib.

Bala tuai parti dalam PBB patut dipilih nengah pengawa bepilih dalam parti; bala tuai dalam serakup BN di menua Sarawak patut ditentuka ulih serakup entara parti-parti lalu atur dikena nentuka Gabenor ti baru patut dikereja dalam kuasa undang-undang, ti udah tentu deka nulak sebarang orang dagang pemadu kaya di Sarawak, Abdul Taib Mahmud.

Repot Taun 2012 CMS

NGO Bruno Manser Fund udah bulih penerang ti madahka kompeni CMS enggau mayuh agi kompeni di Sarawak udah mujur dikena nugungka pengeraja ke sida Taib sebilik nyentukka datai ngagai enda kurang ari USD$80 juta.

Rakyat Sarawak bisi kuasa arapka Agong enggau perintah iya deka ngemataka sereta bebasaka undang-undang. Tu deka nentuka Taib patut ditagang ngulihka penuduk Gabenor nya lalu iya patut dipansik enggau silik bekaul enggau penyalah makai suap iya ti balat bendar nya.

Anang nejuka Taib Ngulihka Penuduk Gabenor!

Anang nejuka Taib Ngulihka Penuduk Gabenor!

Recent Comments

Archive