» »Unlabelled » Wanita SPDP minta diberi peluang BorneoPost Online | Borneo , Malaysia, Sarawak Daily News » Berita Iban - New 2 Borneo

05:05:00

Wanita SPDP minta diberi peluang BorneoPost Online | Borneo , Malaysia, Sarawak Daily News » Berita Iban - New 2 Borneo

Wanita SPDP minta diberi peluang

Posted: 22 Feb 2014 09:09 AM PST

by Rengenyan Labang. Posted on February 23, 2014, Sunday

Abis nadai seiku ari raban nya dichalunka nyadi pengari parti ba PRN Ke-11

KUCHING: Wanita Parti Demokratik Progresif Sarawak (SPDP) ngarap sereta minta abis nadai seiku ari raban indu dichalunka nyadi pengari parti nya ba Pengawa Bepilih Besai Nengeri (PRN) Ke-11.

Ketuai Wanita SPDP, Datuk Chiew Yen Chew madahka diri arap bendar sereta ngenukuka raban tauka pengari indu ulih ngenegap sereta ngeringka parti.

Iya madahka raban indu ukai semina ulih ngereja pengawa dalam ekonomi sereta sosial tang mega dalam dunya politik.

"Dalam parti, Sayap Wanita bisi pemereti ati ti manah, tang kami bisi juluk ati, kami deka nyapai juluk nya, kami deka ke ari raban indu nyadi pengari tauka chalun abis nadai seiku, ba PRN ila.

"Kami  udah berengkah bejalaika pengawa sereta deka chakah gawa enggau bala ketuai parti ngambika ulih negapka agi penuduk dalam PRN ila.

"Mayuh kaban indu SPDP ti bepengelandik tauka bepenemu, tang naka ke diatu kami bedau ulih madahka sapa bagi chalun indu nya lalu enda ngira dini sitak ke diarika sebedau dikemendar parti, asal aja abis nadai seiku chalun indu ba PRN ila," ku iya.

Chiew mansutka pekara nya dalam aum pengarang berita pengudah nyadi Chairperson Aum Exco Wanita SPDP ti diatur ba Indu Opis SPDP di Jalai Badaruddin ditu, kemari.

Nitihku iya dalam aum nya raban Wanita SPDP udah mutuska deka chakah ngatur mayuh program begulai sereta betemu enggau rayat berengkah ari bulan March nyentuk sepemanjai taun tu.

Parti SPDP ba pengawa bepilih nengeri diungkupka lapan sitak iya nya Tasik Biru, Pakan, Meluan, Bekenu, Marudi, Batu Danau, Ba'Kelalan enggau Krian.

Kelimpah ari nya Chiew mega ngarapka mayuh agi raban indu ari SPDP diberi peluang sereta diambi gawa dalam opis kepala menteri.

"Diatu kitai meda majak mayuh orang indu nitih pengawa politik ari komponen parti bukai.

"Nya alai kami amat ngarapka bala ketuai parti ulih meri pekara ti dipinta kami lebuh sida milih chalun pengawa bepilih ila, abis nadai seiku chalun indu.

"Nambahka nya, naka ke diatu semina seiku aja ari Wanita SPDP nyadi sekretari politik, nya alai kami minta seiku agi ari Wanita SPDP dipilih nyadi sekretari politik," ku iya seraya madahka Kijan Toynbee ari sayap Wanita SPDP ti nyadi Sekretari Politik ngagai Kepala Menteri.

Berebak enggau nya Wanita SPDP meri pengaga ati ngagai Tan Sri Datuk Amar Adenan Satem ti dichirika nyadi Kepala Menteri Kelima Sarawak sereta beterima kasih ngagai Pehin Sri Abdul Taib Mahmud ti mujur ngiring menua sepengalama 33 taun udah nyadi kepala menteri.

"Kami begunaka sukung bala ketuai BN sereta Kepala Menteri baru ngagai peminta kami ti deka bisi pengari rayat indu," ku Chiew.

Nitihku Chiew naka ke diatu serata Sarawak bisi 40,000 iku kaban Indu SPDP.

Print Friendly

Rayat menua pesisir dilalau ngambika enda muntang dikemelu

Posted: 22 Feb 2014 09:08 AM PST

SELANGAU: Rayat menua pesisir dilalau ngambika enda muntang dikemelu sekeda raban ke nadai beempu tanggungpengawa ke nguji ngeleseka pengawa perintah ngurangkan sabsidi.

Menteri ba Opis Menteri Besai Datuk Joseph Entulu Belaun madah, strategi perintah ngurangka sabsidi meri pangka ngagai perintah ke bisi belanja dikena mantu rayat.

"Nengah chara enda ngubah sabsidi, sida ke bepenatai pemisi tinggi mega ngasaika penguntung sabsidi ke ditaga kena mantu sida ke kurang penatai pemisi.

"Nya alai, perintah ngasaika pekara tu enda patut nyadi lalu ngurangka sabsidi nengah ngalihka pengawa meri sabsidi ngagai bantu mata duit terus ngagai sida kurang bepenatai pemisi tinggi," ku iya.

Entulu bejaku munyi nya maya bejadika 'Program Membantu Rakyat (MEMBARA) Seminar Kerjaya dan Penyampaian Bantuan Khas Awal Persekolahan 1Malaysia' ba Sekolah Menengah Kebangsaan (SMK) Hulu Balingian, ditu, ensana.

Iya madah, tuju perintah ngurangka sabsidi udah mujur tang pemujur nya udah diputar belit raban penyakal.

"Penyakal mutar belitka fakta bekaul enggau pengawa perintah  ngurangka sabsidi. Sabsidi ke dibatak pulai lalu diberi bantu nengah Bantu Rayat 1Malaysia (BR1M).

"Kena 2018 ila, rayat deka nerima BR1M nyentuk ke RM1,200. Asil ari chara bekelimat digaga perintah nengah mayuh macham chara udah nya diberi baru ngagai rayat.

"Tu chara perintah bejalaika pengawa merintah menua mantu ngurangka tating pemerat rayat. Nya alai, aku arapka semua piak besaup nerangka isu sabsidi perintah," ku iya.

Nyerumba enggau pengerami nya mega, Entulu berasai temegah ati ketegal SMK Hulu Balingian bulih Anugerah Khas Ketua Menteri Sarawak 2013 (Sekolah Harapan).

"Dikearapka SMK Hulu Balingian ulih terus maju, nyulut dalam bidang akademik enggau kokurikulum," ku iya ke mega Kaban Parlimen Selangau.

Program Membantu Rakyat (MEMBARA) Seminar Kerjaya ke diatur Opis JASA nengah kerejasama SMK Hulu Balingian mai Pengajar Ismadi Johari nyadi pengelicha motivasi.

Kelimpah ari nya, Ketuai Operasyen Tabung Ekonomi Gagasan Anak Bumiputera Sarawak, Awangku Merali Pengiran Mohamed meri licha bekaul enggau 'Pendidikan Dan Kerjaya Dalam Bidang Teknikal'.

Sama bisi datai Sekretari Politik Menteri ba Opis Menteri Besai Chumang Nyambong, Pemesai Opis JASA Bagi Menua Sibu/Mukah Awang Julaihi Awang Ali Bohan, Penghulu Thomas Jawa enggau Pengetua SMK Hulu Balingian, Wong Teck Ling.

Print Friendly

Semua pengajar patut nitihka atur ti udah ditetapka KPM: Entulu

Posted: 22 Feb 2014 09:08 AM PST

BINTULU: Semua pengajar nyengkaum pengereja pengawa sukung sekula dilalau nitihka undang-undang ti udah ditetapka Opis Pelajar Malaysia (KPM) ngambika pulai ke pemanah nembiak sekula nya empu.

Menteri ba Opis Menteri Besai Datuk Joseph Entulu Belaun madah,  enti tetiap iku pengajar nitihka atur ti udah ditetapka ba sekula, dia sekula nya ulih mansang sereta ngadaka mayuh agi nembiak ti nyulut ba pelajar laban pengajar semina ngemeranka pengawa ngajar sereta enda limpang ari tanggungpengawa asal sida.

"Aku bisi nerima kompelin pasal sekeda ari kepala pengajar enda nitihka atur masa sekula ti udah ditetapka perintah (KPM)," ku Entulu bejaku ba Pengerami Makai Malam Kaunsil Kepala Pengajar (MGB) Pelilih Tatau ba sebengkah hotel ti tebilang ditu, kena malam Hari Lima, tu tadi.

Ku iya, kompelin nya mega bisi madahka kepala pengajar ngemendarka pengajar enggau nembiak pulai tumu ari jam ti udah ditetapka lebuh Hari Lima.

"Enti amat nyadi, tu tau bendar ngeruga pemujur bidang akademik  nembiak ti besekula ba sekula nya.

Kelimpah ari nya ku iya, pengajar baik nya ba kandang mengeri tauka menua pesisir anang kelalu lama ninggal ke sekula ngambika nyamai bala apai indai nembiak tauka orang bukai ti begunaka bantu sida kelebih agi bekaul enggau pemansang pelajar sekula anak sida.

Pemesai Opis Pelilih Mit Menua Tatau Peleadzman Ahip enggau Chairman MGB Pelilih Mit Menua Tatau Tony Madup entara ke bisi datai ngulu pengerami nya.

Print Friendly

S’wak agi betapi enggau suntuk lutur pakar ngeli

Posted: 22 Feb 2014 09:08 AM PST

KUCHING: Sarawak agi betapi enggau suntuk lutur pakar ngeli taja pan sepital di nengeri tu ngembuan kereban perubat ngeli ti chukup.

Menteri Muda Pengerai Mensia Mayuh, Datuk Dr. Jerip Susil madah, enti dibandingka enggau Semenanjung Malaysia nengeri tu agi jauh tinggal ti semina bisi 15 iku pakar dalam bidang nya.

"Suntuk pakar ba bidang nya (ngeli) endang penanggul besai kitai. Nyauka tiap kelinik pakar sepital betapi enggau penanggul tu lalu atur pengawa deka nambahka penyampau pakar nya berat amat ba kitai.

"Di nengeri tu, Opis Menteri Pengerai bisi kereban ortodontik di sepital, tang penanggul iya kitai enda chukup lutur pakar, ambika banding di Sepital Bintulu.

"Lutur pakar mega endang amat diguna lebuh kitai deka nambahka kereban baru di sepital di mengeri besai dalam nengeri tu baka di Sibu," ku iya.

Pekara nya dipadahka Dr. Jerip ngagai pengarang berita pengudah bejadika Kongres Pergigian Borneo Ke-4 ( ti diatur 22 ngagai 23 Februari) di Hotel Pullman ditu, kemari.

Nitihku iya, penyampau lutur ortodontik di Sarawak enggau Sabah agi jauh tinggal iya nya seiku lutur sama enggau 9,000 pesakit (1:9,000), ke patut iya seiku lutur sama nenggau 1,000 ngagai 3,000 pesakit (1: 1,000-3,000).

"Kitai (perintah) nemu mayuh pekara ti patut dipejalaika dikena ngangkatka status pengerai ngeli di Sabah enggau Sarawak.

"Enti disimpulka, bekaul enggau pengerai ngeli kitai agi tinggal di belakang Semenanjung Malaysia, taja pia kitai meri terima kasih ngagai Opis Menteri Pengerai Nengeri enggau Gerempung Ukai Dikuasa Perintah baka Gerempung Lutur Ngeli Malaysia (MDA) Zon Timur laban ti bebendar ngerapitka takah nya," ku iya.

Dr. Jerip madah, kerejasama entara MDA enggau Jabatan Pergigian di Sabah enggau Sarawak meri pangka ti manah ngagai perintah ti bebendar ngangkatka pemanah pengerai ngeli.

Nengah kerejasama nya ulih bekunsi kereban sereta bejalaika macham projek taja pan betapi enggau penanggul ungkus enggau pengereja pengawa ti enda chukup, ku iya.

Kelimpah ari nya lebuh ti ngenang Kongres nya Dr. Jerip ngarapka raban pesereta nguna peluang nya nambahka pengelandik enggau penemu dalam teknologi ti bekaul enggau perubat ngeli.

"Ba kongres tu kitai ukai semina bekunsi peneleba enggau penemu sereta nambahka pengelandik tang mega bisi pemeri licha anatarabansa baka ari Taiwan enggau India kelimpah ari Malaysia.

Ba pengerami nya Dr. Jerip ngarika MDA nyuaka chek sepenyampau USD1,000 ngagai Persatuan Bagi Kebajikan Kanak-Kanak Terencat Akal Sarawak (PERKATA) enggau Persatuan Autistik Kuching (KAA).

Sama bisi ba pengerami nya, Direktor Pengerai Nengeri Datu Dr. Zulkifli Jantan, Presiden MDA Dr. Neoh Gim Bok, Chairman MDA Zon Timur Dr. Leong Kei Joe enggau Chairman Pengatur Kongres Dr. Nurshaline Pauline Kipli.

Print Friendly

246 iku udah diterima diau ngenduh ba Anjung Singgah YKN di Kuching

Posted: 22 Feb 2014 09:08 AM PST

KUCHING: Palan Pengenduh Arau tauka Anjung Singgah Yayasan Kebajikan Negara (YKN) Sarawak ti bepalan di Kuching udah nerima 246 iku orang diau ba palan nya.

Penyampau nya bepelasarka statistik ke dirikut berengkah 15 Oktober 2012 ngagai Februari 2014 ari YKN, ti ngerikutka sepenyampau 132 iku lelaki enggau 114 indu ari raban bansa Melayu, China, India, Iban, Bidayuh, Melanau enggau ke bukai.

Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah lebuh ditelefon madah, Palan Pengenduh Arau nya ukai semina dikena mantu orang kampar aja tang nyengkaum raban bansa ari menua pesisir ti datai ke mengeri ke nadai kaban belayan endur diau.

"Raban bansa ari menua pesisir ti datai ke mengeri ketegal dikangau ngulu interbiu gawa ti nadai belanja dikena nyuwa hotel (nyengkaum ke nadai kaban belayan endur diau) mega ulih diau ba Palan Pengenduh Arau tu.

"Orang ti datai lalu diau ba palan nya ketegal ngulu interbiu, Palan Pengenduh Arau tu mega meri sereta bekunsi penemu bakani chara maya interbiu," ku iya.

Tuju penumbuh palan nya ukai semina nyendiaka endur diau aja tang nyengkaum meri pemakai enggau utai irup, nyadi palan intervensi, perubat, mantu ngiga pengawa sereta meri kaunseling ngagai orang kampar.

Dalam proses intervensi, barang sapa orang ke diau tauka orang kampar semina dikemendarka diau ba palan nya pengelama seminggu ngagai dua minggu, timpuh ti chukup endur mantu sida ngatika diri, ngiga pengawa sereta bulih endur diau ti senipak.

"Sepemanjai diau ba palan nya, sida (orang kampar) deka diajar pengelandik ke ulih mantu sida ngiga belanja," ku iya.

Nambahka nya, Fatimah lebuh ditanya sekalika Opis Menteri Pemansang Orang Indu, Ruang Bilik enggau Raban Bansa bisi nganjung perambu ngagai Opis Menteri iya deka nambahka Palan Pengenduh Sementara YKN Sarawak, iya madahka;

"Naka ke diatu nadai perambu deka nambahka palan nya di Sarawak, laban kitai bepelasarka peminta enggau guna orang mayuh.

Kelimpah ari nya, nitihku seiku orang ti gawa ba palan nya madahka sida mayuh udah mantu orang ke diau ba palan nya nyengkaum ngiga ke pengawa ti ukai semina ba opis perintah aja tang nyengkaum ba kompeni.

Orang ti kala diau ba palan nya ukai semina rayat Sarawak aja tang bisi peranak Sabah, ku iya.

"Palan Pengenduh Arau tu mega bisi nerima sida ari Anjung Kasih, nyemaka bisi puang," ku iya.

Palan Pengenduh Arau YKN Sarawak ti berengkah dibuka kena 15 Oktober 2012 bepalan ba Lot 289, Seksyen 9, Jalan Rubber disikap bilik tinduk, bilik makai, surau lelaki enggau indu, bilik interbiu, bilik kaunseling, bilik perubat sereta chukup endur 38 iku orang sekali.

Sebarang pekara ti deka ditemu pasal Palan Pengeduh Arau YKN Sarawak tau telefon ngagai lumur 082-233098 tauka 017-3782656.

Print Friendly

32 nerima midul emas Pengakap

Posted: 22 Feb 2014 09:07 AM PST

by Chris Bishop. Posted on February 23, 2014, Sunday

Pengakap udah ngayanka pemujur dalam nyerakupka pupu raban bansa

KUCHING: Tan Sri William Mawan nguluka 31 orang bukai nerima midul emas nyerumba 100 taun penumbuh Pengakap di Nengeri Sarawak ke diatur di Palan Pematih Pengajar Batu Lintang ditu, kemari.

Mawan ke mega Yang Di-Pertua Majlis Pengakap Sarawak nerima tanda pingat nya ari ketuai Komisioner Pengakap Nengeri Sarawak Sudaryo Osman ke bela dikemata Sapit Ketuai Komisioner Pengakap Menua Datuk Abdul Kader Mohd Nor.

Ba jaku pengelalu pengawa nya, Mawan meransang Pengakap majakka pengawa manah ti udah meri latih ngagai raban nembiak ngambika sida ngembuan ulah ke manah ke tau nyaup ngemansang bansa enggau menua.

"Semengat angkunka menua  ke diterenak ba dalam tiap iku raban Pengakap chukup beguna kelebih agi dikena nentuka menua tu seruran likun sereta mansang.

"Pengakap nyadi sebengkah gerempung ikas dunya ti meri latih ngagai raban nembiak ba mayuh bengkah pekara.

"Ungkup kaban Pengakap, kena meh awak tu endur ngulihka penau enggau pengelandik ti tau dikena nempuh bemacham penguji dalam pengidup jemah,'ku iya.

Pengawa manah kaban Pengakap ti ngereja pengawa enggau enda bebayar patut dipajak ke alai gerempung tu mega udah mujur nyerakupka pupu bansa di nengeri tu, tandu iya.

Di Nengeri Sarawak, kaban Pengakap diatu udah manggai ba penyampau 62,000 iku orang ti ngarika enda kurang ari 900 buah sekula.

Sekeda orang bukai ke bisi nerima midul emas nya kemari, Direktok Opis Pelajar Sarawak Datu Abdillah Adam. Sudaryo Osman, Datuk Abdul Kader Mohd Nor, Datu Putit Matzen enggau niang Tan Sri Datuk Amar Sulaiman Daud.

Nitihka sejarah, Reverand T C Alexander diriput ngepunka Boy Scout di Borneo Utara ba taun 1913 lalu berengkah ari nya gerempung tu majak ngerembai di nengeri Sarawak enggau Sabah.

Print Friendly