» »Unlabelled » Sarawak enda patut ditagang ari betanam sawit: Masing BorneoPost Online | Borneo , Malaysia, Sarawak Daily News » Berita Iban - New 2 Borneo

05:50:00

Sarawak enda patut ditagang ari betanam sawit: Masing BorneoPost Online | Borneo , Malaysia, Sarawak Daily News » Berita Iban - New 2 Borneo

Sarawak enda patut ditagang ari betanam sawit: Masing

Posted: 14 Feb 2014 05:01 PM PST

by Chris Bishop. Posted on February 15, 2014, Saturday

KUCHING: Menteri Pemansang Tanah Tan Sri Dr James Masing (gambar) enda kiruh enggau pemutus sebuah kompeni Penapis minyak  ngetu meli asil minyak sawit ari nengeri tu berengkah taun 2015.

Seraya ke madah enda napi sebarang penanggul ngiga kompeni bukai ke tau meli, Masing ngasaika kebuah pemutus kompeni nya nya enda diterima akal.

"Aku bisi nerima surat ari sebuah kompeni napis minyak sawit, Bintulu kenaka 5 Disember 2013 ke alai sida netapka pemutus ngetu meli asil minyak sawit ari nengeri tu.

"Ba surat nya, sida madahka kebuah pemutus digaga ketegal enda setuju enggau pengawa kitai ditu ke betebang kayu enggau meresi kampung ungkup pengawa nanam sawit.

"Pengawa kitai nya diperatika sida ngerusak rampa menua tang iya ke amat ba asai aku sigi deka ngelabuh ekonomi nengeri tu ke bela ngerampit ngagai orang bekebun sawit mit ke bukai,"ku iya.

Iya mansutka jaku nya ba siti aum pengarang berita ke diatur di Begunan Masja ditu, kemari.

Masing nambah, kompeni nya ke ngelamatu meli 45 peresin asil minyak sawit Sarawak meri kebuah ti enda diterima runding lalu digaga enggau tuju ngelaku  bunga matahari enggau kachang soya ke bela ngemansutka minyak ke ditanam ba menua luar.

"Sawit 10 kali lipat produktif ari bunga matahari enggau kachang soya lalu sida ba menua luar pan enda mega nanam kededua produk nya ba tanah pasir.

"Pekara tu meri pangka ba ekonomi orang bekebun mit sawit. Taja pia aku pechaya kitai nadai penanggul ngiga kompeni bukai ke tau meli nganti kompeni nya r,"ku iya seraya ke madah udah nganjung surat nimbal kompeni nya.

Sepenyampau 17,578 orang bekebun mit sawit di nengeri tu teulihka penguntung urung RM227 ungkup sehektar tiap bulan ari asil sawit.

Ba taun 2012, asil ari minyak sawit Sarawak manggai RM425.21 juta lalu ba 2011 RM417.5 juta.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Produk Lada Asap diadang bisi dijual dipasar ila

Posted: 14 Feb 2014 05:01 PM PST

BELAGA: Dagang nyual tepung lada meri penguntung ke manah amat ngagai Penghulu Saging Bit ari Uma Belor, Sg Asap dalam kandang beberapa taun ke udah.

"Dagang nyual tepung lada tu sebengkah ari chara kena ti dikemeranka aku dalam kandang tiga taun ke udah kena nyungkak belanja, laban semina nya produk ba Palan Sekim Pengentap Berumah Baru di Sg Asap ti ulih diperundingka aku. Produk bukai ti bisi diperundingka maya nya, sawit tang kena ngepunka dagang nya begunaka puku besai," pia ku Saging madah ngagai The Borneo Post lebuh ke enggau betemu ba Pasar Belaga apin lama ke udah.

Iya madahka diri merambu nyual produk nya ngagai menua tasik nengah bantu ari sida sebilik enggau bala bakih.

"Aku mega merambu deka ngerejister sereta ngaga chap kediri ba produk nya ngambika ulih dijual nengah chara dagang," ku iya.

Saging merambu deka meri produk iya nya nama 'Lada Asap' kena ngelaika penatai asal produk nya.

"Lada tu diproses ari kebun lada aku empu enggau sekeda ari kebun lada bukai ba Sg Asap," pia ku iya.

Tepung lada iya nya udah disadung nyentuk ke Sabah enggau Semenanjung Malaysia tang diatu udah tebilang di Bintulu.

Berebak enggau nya, Pemancha Tony Kulleh madahka diri berasai gaga ati laban bakih iya Saging teulihka penatai pemisi lebih nengah produk nya.

"Aku deka nyaup iya ngelakuka produk nya ngambika iya mujur ba pengawa tu," pia ku Tony.

Sebutul plastik nya dijual enggau rega RM4.50. Saging mega bisi nyual tepung lada iya dalam butul enggau bungkus empelus mit.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Aku udah belajar sekeda pekara ari Taib: Adenan

Posted: 14 Feb 2014 05:00 PM PST

KUCHING: Menteri ba Opis Kepala Menteri Tan Sri Adenan Satem netapka nadai ubah besai ba rintai ketuai  perintah nengeri pengudah iya mangku pengawa nyadi kepala menteri berengkah 28 Februari tu.

Iya madah ke diri enda arapka atur nganti raban ketuai ba tengan renggat perintah serak ke diatu kelebih agi tim ke diatu diarika raban ketuai ke manah.

"Enti nuan ngembuan raban ke manah. . .anang nganti raban nya.

"Aku ngasai kitai udah gawa nengah atur begempung betaun  ke udah ke alai kitai udah nempuh macham pemedis enggau penyamai.

"Kelebih agi ba tengan renggat perintah ke diatu, anang meh ngubah kuda ba tengah jalai,'ku iya.

Iya mansutka jaku tu ba siti aum pengarang berita ba Begunan Yayasan Sarawak, Jalai Sultan Tengah ditu, kemari.

Iya nambah, raban ketuai ke diatu disadang deka nampung tanggung pengawa sida lalu portfolio ke dipangku iya (Adenan) deka diperundingka baru.

Ngenang senentang pangku pengawa kepala menteri, Adenan madah iya udah belajar sekeda pekara ari Pehin Sri Taib.

"Kenyau begulai enggau kepala menteri, aku belajar sekeda pekara. Enti nuan nyadi kepala menteri Sarawak nuan meh kepala menteri Sarawak lalu ukai ungkup bansa Melayu aja, ukai ungkup bansa China aja, lalu pia mega ukai ungkup Iban, Bidayuh, Orang Ulu.

"Aku mega deka nyadi kepala menteri ngagai raban ari parti penyakal ketegal kitai diau nguan menua Malaysia kelebih agi nengeri Sarawak.

Aku deka bebendar bejalaika tanggung pengawa, malas pengarap ke udah diberi rayat lalu aku deka meri servis pengambis manah ke ulih digaga diri,"ku iya.

Nyaut tanya pemberita senentang pengawa bepilih di deka diuluka iya ngarika perintah Barisan Nasional (BN) Adenan madah sebarang penusah ba dalam parti deka dulu diputar.

"Kitai patut mutarka penusah ke nuntung SUPP, aku bisi runding  mutarka pekara nya tang aku bedau deka mansutka pugu runding nya dulu ditu.

"SPDP mega napi penusah, PRS enggau PBB ok. Sebarang penusah patut dulu diputar sebedau kitai nempuh pengawa bepilih. . . pekara nya udah nyadi tanggung pengawa aku diatu,"ku iya.

Iya ke mega ADUN Tanjung Datu netapka pangku pengawa sapit kepala menteri agi mengkang naka ke diatu lalu enda nyangkal engka deka nyiri seiku agi sapit kepala menteri jemah.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Adenan mayuh peneleba, ku DCCI

Posted: 14 Feb 2014 05:00 PM PST

KUCHING: Balai Dagang enggau Industri Dayak (DCCI) nerima pemutus nyiri Tan Sri Datuk Amar Adenan Satem nyadi Kepala Menteri ke lima.

Sapit Presiden DCCI Tan Sri Celestine Ujang Jilan nengah siti surat penerang media ke dipansut kemari madah Adenan sigi ulih nyaup ngemansang Sarawak bepelasarka peneleba iya ke mayuh.

Nya nyengkaum peneleba meri serbis nyadi menteri ba perintah besai enggau nengeri kelimpah ti landik ba pekara undang-undang.

"Iya ngembuan runding politik ke lanjau sereta pintar nguluka raban ketuai ke bukai.

"Iya ke chukup meretika atur pengawa dagang, raban orang dagang enggau profesyenal Dayak ngarapka iya ulih meri ajar enggau bantu ngambika sida ulih ngambi bagi ba projek perintah baka ke ba SCORE,"ku iya.

Ujang madah DCCI pechaya Adenan deka mai atur pemansang enggau lengkas ba nengeri tu kelebih agi ba menua pesisir kelimpah ti ngangkatka tikas pengidup rayat ke diau di menua pesisir.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SCCS ngatur Pelanda Colour Rush 2.0, 23 Feb

Posted: 14 Feb 2014 04:59 PM PST

MIRI: Gerempung Penyakit Riman Nembiak Mit Nengeri Sarawak (SCCS) ditu mengkang ngelaluka peranak ba kandang menua tu nyereta Pelanda Colour Rush 2.0 ke deka diatur 23 Februari.

Ku tukang pengerembai berita pengatur pengawa, nyentuk ke diatu lebih 300 iku penyereta udah diterima tang raban pengatur mengkang ngelaluka mensia mayuh nyereta program nya.

Colour Rush 2.0 keterubah endar diatur ditu berindik ari pemujur Colour Rush ke diatur taun siti nyin kemari di Kuching, ke diatur SCCS nengah kerejasama enggau OurYouth.my.

Bayar ngerejister diri RM35 deka dipinta, lalu program nya diatur ba Dewan Suarah Miri deka belabuh pukul 6.30 pagi.

Ku iya, pom tau diambi ba Hotel Somerset di No.12 Kwang Tung Road maya jam gawa.

Penyereta mega tau ngerejister diri nengah website SCCS www.colourrushrun.com.

Program tu diatur kena ngiri penemu ngagai mensia mayuh sentang penyakit riman seraya meransang mensia mayuh sama ngemujurka program tu, nyadika kelai sukung ngagai nembiak mit ke ngidap penyakit riman.

Ku iya, Colour Rush 2.0 nya sebengkah ari pelanda ke mayuh chura sepenyauh lima kilometer belabuh ari Dewan Suarah Miri ngelingi kandang Miri sereta mulaika diri baru ngagai dewan nya.

Sebedau belawa, genap penyereta deka diberi dua kambut tepung chura ngambika ditabur ngagai bala penyereta bukai.

Sebarang tanya sentang Colour Rush Miri,tau dikenataika ngagai Chairman SCCS Pampang Miri, Jocelyn Hee ba lumur 019-8841161 tauka diemel ngagai chia@sccs.org.my.

SCCS sebuah gerempung pengasih ti ukai begiga penguntung, ditumbuhka seraban apai indai nembiak ke ngidap penyakit riman.

Gerempung nya mega nyendiaka bantu ari segi duit sereta sukung semengat, palan bemalam sereta berubat ungkup orang ari menua pesisir enggau pelajar sereta penemu pasal penyakit riman ba nembiak mit.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

31 pasang laki bini nanggam pengerindu ba MCCCI kemari

Posted: 14 Feb 2014 04:59 PM PST

MIRI: Tiga puluh satu pasang laki bini udah besilih tinchin ba sebengkah pengerami melah pinang bebala mayuh ba diatur ba  Balai Tikah Chinese Chamber of Commerce and Industry (MCCCI)

Pengerami nya berengkah jam 10 pagi, ke alai pasang laki bini nya datai ngena baju kot enggau tali lisir seraya pengantin indu diias naka pemajik.

Bekenangka hari bulan berepak Chap Goh Mei (malam ke 15) enggau Hari Valentine, Sapit Menteri Penyambung Datuk Lee Kim Shin ngenataika selamat pengantin baru ngagai bala pasang melaki bini.

"Sehari tu nya hari ke meruan dikeingat dalam pasuk tiga bengkah pengerami ke nyadi berepak dalam sehari, berindik ari nya tu nyadika sebengkah haribulan ke semampai dikenang ungkup sida ke bepasang nya "iya bejaku ba mua orang mayuh di balai tikah MCCCI.

"Sekalika hari tu nya dipenggau nyadika hari ungkup makai malam enggau orang ke dikesayau tauka nikam limau  Mandarin tauka makai beserumpu, semua orang patut ngingatka hari ke mai mayuh bengkah reti tu, setegal 19 taun agi baru pengerami tu berepak baru dalam taun 2033," tambah iya.

Lee ngulu pengerami melah pinang sekretari eksekutif Supp, Lee Kok Leong enggau bini.

Sekeda saksi be bisi ngulu pengerami tu nya mandal Presiden II MCCCI Lee Choon Seng, Pemesai Pekara Dagang l Chai Min Kian enggau Pemesai Pekara Chukai enggau Undang-undang Chion Yuei Liun, Temenggong Lee Sie Tong enggau ke bukai.

Hari bulan ke bukai ke manah dalam taun kuda tu mega 1 April , 2014 (1-4-14), reti iya 'Semampai Begulai', 1 March , 2014 (1-3-14) 'Pengerindu Meruan'  enggau 20 Mei, 2014 (5-20-14) nyebut 'Aku Sayau Ke Nuan Belama'.

Orang ke bepasang ke beniat deka ngerejister tikah sida nya ba hari bulan tu enda tau enda nganjung pom sida 21 hari sebedau hari bulan tu tauka tumu agi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.