Perambu ngemayuhka KR1M disukung rayat BorneoPost Online | Borneo , Malaysia, Sarawak Daily News » Berita Iban - New 2 Borneo |
- Perambu ngemayuhka KR1M disukung rayat
- Ngemasukka duit BR1M ngagai akaun penerima, atur engkeman, patut dipuji
- Urung 1,000 iku pengayuh basikal ngulu pengawa ‘Kayuhan Mesra Warisan 2014’ enggau ‘Hari Enda Bekerita’, 23 Feb
- NPC ngelempungka sekeda pemar tating pengidup seiku jurugambar
- Rumah Lichai angus diempa api
- Saidol: Perintah semampai ngemeratka penanggul NCR
| Perambu ngemayuhka KR1M disukung rayat Posted: 18 Feb 2014 02:26 PM PST by Rengenyan Labang. Posted on February 19, 2014, Wednesday Tang apak endur numbuhka palan nya patut engkeman sereta dikelingi peranak menua ti kurang penatai pemisi KUCHING: Perambu perintah ngemayuhka Kedai Rakyat 1Malaysia (KR1M) endang disukung rayat tang palan nya patut strategik ngambika juluk penumbuh kedai nya tejapai. KR1M mega patut bisi nyendiaka peluang dagang ngagai orang ti nyual barang borong, kelimpah ari meri rega ti murah sereta ngurangka pemerat belanja orang ti kurang penatai pemisi. Wendy Earnest, 38, lebuh dikerandau madah, iya temegah ati sereta nyukung perambu perintah ti deka ngemayuhka KR1M laban nya ulih mantu raban orang ti ditagit. Iya ngarapka perintah ulih berati sereta milih kandang endur ti engkeman sebedau numbuhka KR1M. "Ba penemu aku, palan endur numbuhka KR1M patut engkeman sereta ngemuntangka mensia mayuh. "Ari nya mensia mayuh deka muntang agi ngelawa kedai nya lalu tau bendar ngelantangka rayat ke kurang penatai pemisi. "Ambika banding, baka ti dipeda aku, apak endur KR1M di Padawan enda engkeman ngujungka orang jarang kia. Di Batu Kawa digaga ba kedai mit pia mega di Bau, KR1M patut bisi palan kediri disikap ngena palan pengengkah kerita ti chukup sereta meri pengelantang ngagai orang ti bebeli barang dia," ku iya. Nambahka nya iya bepenemu KR1M mega patut bisi nyendiaka peluang dagang ngagai raban pemborong di nengeri tu ti nyual barang chara borong ngagai KR1M. "KR1M tu meri peluang ngagai pemborong, baka aku empu ti nyadi pemborong beras ti semina dikemendar nyual borong ngagai KR1M. "Laban enti pemayuh KR1M enda ditambah, nya ulih ngeruga pemujur kami ti nyadi pemborong," ku iya. Nambahka nya, Elizan Elias, 36, ari Sukma, lebuh dikerandau pengarang berita madahka perambu perintah ngemayuhka KR1M endang patut laban nya ulih nyendiaka rega barang ti lebih murah. Taja pia, iya ngarapka perintah ulih milih palan ti pemadu manah sereta engkeman lebih agi ba kandang endur ti diuan mayuh peranak menua ti kurang penatai pemisi. "Penumbuh KR1M tu endang manah laban rega barang ba kedai tu jauh murah ari kedai bukai lebih agi produk 1Malaysia lalu ke ukai produk 1Malaysia nya kira murah 10 sen ngagai 20 sen ari kedai bukai. "Nya alai aku amat nyukung perambu perintah ti deka ngemayuhka KR1M. "Ngarapka ba KR1M ke dudi ila, perintah ulih ngemayuhka bansa barang jual, baka kedai bup (1Malaysia) laban naka ke diatu semina produk ti lebih ngagai pemakai enggau ai irup bisi dijual dia. "Palan endur numbuhka KR1M mega patut diuan sereta di genturung pendiau mensia mayuh ti kurang penatai pemisi, baka di Kuching empu patut ba Rampangi tauka Sukma," ku Elizan ti selalu bebelika barang ba KR1M Medan Hamidah ditu. Apin lama ti udah ba sebengkah berita madah, perintah deka numbuhka 60 buah KR1M di serata menua taun tu lebih agi di Sabah enggau Sarawak. Menteri Dagang Dalam Nengeri, Koperasi enggau Pekara Bebeli Barang, Datuk Seri Hasan Malek madah, KR1M ti nyendiaka rega 50 peratus lebih baruh ari rega renchit nerima timbal ti manah ari rayat. "Opis menteri aku benung mansik palan ti engkeman endur numbuhka KR1M di serata menua, lebih agi di Sabah enggau Sarawak. Naka ke diatu perintah udah numbuhka 125 buah KR1M serata menua sereta nyendiaka 397 produk jenama 1Malaysia. Ku iya, KR1M ukai semina ngurangka tating pemerat pengidup rayat, tang mega mantu orang dagang mit ngurangka ungkus bebeli barang dagang ngena chara borong nengah rega ti patut.   |
| Ngemasukka duit BR1M ngagai akaun penerima, atur engkeman, patut dipuji Posted: 18 Feb 2014 02:26 PM PST KUCHING: Atur ngungkupka duit Bantu Rayat 1Malaysia (BR1M) 3.0 dipasuk ngagai akaun bank penerima endang engkeman, likun sereta patut dipuji. Duit BR1M deka berengkah diagih ngagai penerima nengah akun sida berengkah 22 Februari tu lalu orang ti nadai akaun bank diberi bererenggat berengkah 23 Februari ngagai 15 Mach tu. Bepelasarka tinjau pengarang berita, tebal agi penerima besetuju enggau chara perintah ti beratka pengelantang rayat, enti dibandingka chara sebedau tu. Chara baru dipejalaika perintah nya mega udah mutarka mayuh penanggul ti ditapi penerima sebedau tu baka enda ibuh bebaris panjai, enda ibuh minta kemisi ketegal deka ngambi duit BR1M. Bantu diberi terus ngagai akaun bank mega meri penyenang enggau pengelantang ngagai orang tuai, laban lebuh nerima BR1M 1.0 enggau 2.0 orang tuai sama enggau bebaris taja pan bisi kaunter ungkup orang tuai. Elizan Elias, 36, lebuh dikerandau pasal chara baru perintah meri bantu BR1M nya, iya madahka diri amat setuju sereta nya nunjukka perintah seruran ngemanahka chara mantu rayat. "Bantu Rayat 1Malaysia (BR1M) ti diberi nengah akaun bank penerima nya chara ti lebih mudah enggau betul sereta kitai nadai pengirau laban nya endang ditemu masuk ngagai akaun kitai empu, kelimpah ari ti enda ibuh bebaris panjai. "Aku endang kurang besetuju enggau atur nyuaka BR1M nengah kaunter laban nya ulih ngeruga pengelikun, kelimpah ari orang ulih nyaru diri (taja pan naka ke diatu nadai udah nyadi)," ku iya. Nambahka nya, Wendy Earnest, 38, lebuh ditanya pekara ti sama mega sepenemu madahka duit BR1M terus diberi ngagai akaun enda meri pengiruh ngagai penerima bebaris panjai. "Chara ti dipejalaika perintah baka terus masuhka duit BR1M ngagai akaun penerima endang chukup manah sereta meri pengelantang ngagai penerima. "Taja pia, chara tu ngenataika penanggul ngagai rayat menua pesisir ti nadai akaun, tang perintah bisi nyendiaka pilih sekalika nengah akaun tauka baka ngelama tu. "Ba penemu aku, ngagai rayat di menua pesisir, perintah sereta ketuai raban bansa tau ngatur pengawa meri duit BR1M nya ba rumah panjai, balai aum enggau ke bukai baka sebedau tu," ku iya Nitih penemu ari Menteri Pengintu Pengelantang, Pekara Indu enggau Pemansang Ruang Bilik, Datuk Fatimah apin lama ke udah madah, di Sarawak sepenyampau 332,054 ari 594,765 penerima ti ulih nerima BR1M 3.0 nadai akaun bank lalu tebal agi sida tu peranak menua pesisir. Iya madah, Sarawak ngerikodka penyampau penerima bantu nya ti pemadu mayuh nadai akun bank. 'Mekanisme ti deka dipejalaika di Sarawak dalam atur pengawa meri diut BR1M ngagai penerima ti nadai akaun bank ulih diterima perintah besai iya nya nengah chara baka ngelama tu, diberi ngagai penerima ba sebengkah pengerami ti diatur opis residen enggau opis pelilih mit menua. "Lalu 262,771 penerima ti bisi akaun bank, deka terus dibayar ngagai akaun bank penerima kena 22 Februari tu pengudah Menteri Besai Datuk Seri Najib Tun Razak bejadika atur pengawa nya ba renggat nasional. Fatimah nandu, orang ti ulih nerima BR1M 3.0 deka nerima surat ari Lembaga Hasil Dalam Nengeri (LHDN), kelimpah ari ti meda status peminta di opis LHDN ti semak sereta di opis residen enggau opis pelilih mit menua. |
| Posted: 18 Feb 2014 02:26 PM PST KUCHING: Program nepan basikal 'Kayuhan Mesra Warisan 2014' deka diatur begulai enggau 'Hari Enda Bekerita' (DBKU) kena 23 Februari tu ila deka mungkur penyauh lima kilometer ngelingi palan besejarah sereta palan ke suah dilawa temuai di bandaraya Kuching nyengkaum genturung pendiau Satok. Menteri Muda Nembiak (Nengeri), Datuk Abdul Karim Rahman Hamzah madah program nya ke keterubah iya diatur. Program nya ku iya dipasuk urung 1,000 iku pengayuh basikal ari genap renggat umur enda ngira tuai tauka biak, diatur begulai Kelab Lumba enggau Main Komuniti (KSK) Satok, Gerempung Pemuda Parti Pesaka Bumiputera Bersatu (PBB) Satok, Opis Malaysia Tourism, Opis Kaunsil Bandaraya Kuching Utara (DBKU), Opis Menteri Dagang Temuai Sarawak, Opis Menteri Pemansang Nembiak, Opis Pemadah Malaysia, Opis Pengelikun Jalai Alun (JKJR), YR1M, Gerempung Bebasikal Menua Sarawak enggau Polis Diraja Malaysia (pampang Trafik). Iya madah program ke deka bepun ari pukul 6 pagi nya ari 'Explanade Kuching Waterfront' betuju ngeramika Taun Nemuai Ke Malaysia enggau Taun Nemuai Ke Sarawak 2014, meransang mensia mayuh bela ngerami aktiviti bepengerai bansa nya kelimpah ari belelak sereta ngangkatka pengawa dagang temuai nengah chara bebasikal. Kelimpah ari nya mega, iya dikena meri kelai 'duta' mit pengawa dagang temuai Sarawak ba komuniti ditu. Iya madah, jalai ke ditengah bebasikal, iya nya ari Explanade Kuching Waterfront Kuching nuju Jalai Ajibah Abol, Jalai Patingan, Jalai Kulas, Jalai Haji Taha lalu mulaika diri ngagai Explanade Kuching Waterfront. Menteri Dagang Temuai, Datuk Amar Abang Johari Tun Openg deka bejadika atur pengawa nya ila. Penyereta mega deka ngetu ba sebuah rumah Melayu lama ke dikumbai enggau nama 'Darul Maziah' dipelaba udah manggai 300 taun di Kampung No.6 mendingka penerang bekaul enggau rumah lama nya. Maya kelia, rumah lama nya kala dikena pemesai menua ditu baum begempung mantah menua Sarawak diserah ngagai British. "Pengawa ngena basikal diatu majak dikerinduka nembiak. Lebih agi di Kuching enggau Sarawak, orang mayuh majak rindu ngena basikal ke nyadi sebengkah chara sida iya belepa "Enti kitai meratika ba ratau jalai, mensia mayuh enda ngira umur, lelaki tauka indu, rindu belepa ngayuh basikal. "Nya alai, ngaga program baka tu deka matih nembiak kita bepengerai kelimpah ari ngedut kaul enggau diri sebilik sereta komuniti enggau peminat lumba basikal," ku iya nerang maya aum media di opis menteri muda nya di Wisma Sultan Tengah ditu, kemari. Abdul Karim ti mega nyadi Menteri Muda Pengawa Berumah madah, kelimpah ari belelak, sida penyereta mega bepeluang mantu Gerempung Anak Mit Sakit Riman (SCCS) enggau chara mantu RM1 maya sida ngerejister diri kena hari Minggu tu ila. Kelimpah ari nya, 500 iku penyerta ke dulu datai deka diberi baju 'T' pechuma 'Kayuhan Mesra Warisan 2014', 1,000 iti gelang jari (wrist band) lalu ditangkan enggau chabut betuah sereta bantu basikal ke diberi Yayasan Rakyat 1Malaysia (YR1M) ngagai nembiak sekula ari sekula ke dipilih. Kelimpah ari nya, Datuk Bandar DBKU Datuk Abang Abdul Wahab Abang Julai madah, maya nya mega (hari Minggu) mayuh aktiviti bukai sama bela bisi diatur, lalu siti ari program nya, 'Fun Run" ke deka diatur belabuh ari pukul 6.00 pagi diatur begulai, Kelab Marathon Kuching, pengawa nebah band ari DBKU, soldadu (ATM), Saberkas enggau Kampung Madrasah ke deka bejalai lalu nebah band, urung penyauh dua kilometer. Jalai-jalai ke dijangka tutup maya pengawa nya, Jalai Haji Taha, Jalai Kulas, Jalai Datuk Ajibah Abol, Jalai Main Bazaar, Leboh Wayang, Jalai Tabuan, Jalai McDougall, Jalai Tun Abg Hj Openg enggau Jalai Satok. "Taja pia, orang Keristin ke deka nurun besembiang ngagai gerija kathedral St Thomas, agi ulih mansa sekula St Mary, lalu pansut ba Padang Merdeka enggau Jalai McDougall nya empu (sepiak jalai ke enda ditutup). Sama bisi ngulu aum media nya kemari, Direktor Opis Dgang Temuai Malaysia Sarawak Salahhuddin Mohd Ariffin, Ketuai Pemuda PBB Satok Iskandar Sharkawi enggau chairman KSK Satok Irwan Zulkarnain Mohd Hasbie. |
| NPC ngelempungka sekeda pemar tating pengidup seiku jurugambar Posted: 18 Feb 2014 02:26 PM PST KUCHING: The National Press Club (NPC) of Malaysia udah nyuaka pemeri RM2,000 ngagai Suzanne Empam, seiku jurugambar ari Utusan Sarawak ke dipansikperesa klinikal ditemu ditepan penyakit leukemia. Suzanne, 32, diperubatka ba Unit Siru Intu ba Sepital Besai Sarawak (HUS) ditu, pia ku penerang ti dipansutka NPC ditu apin lama ke udah. NPC nyuaka bantu pengudah Gerempung Jurugambar Surat Kabar Sarawak (SPPA) mantaika penusah ke ditapi iya bulan siti nyin tadi. Sama bisi enggau lebuh nyuaka bantu nya Sekretari Gerempung Jurugambar Surat Kabar Sarawak (SPPA), Razali Nordin enggau Sapit Tukang Wang SPPA, Ahmad Rushdan Abdul Manan. Suzanne orang ti kedua ari Sarawak nerima bantu Wang Turu Pengintu Pengelantang Pendiau Pemberita (Journalist Welfare Fund (JWF) ari NPC. Bulan seiti nyin tadi, NPC udah nyuaka bantu RM2,000 ngagai Lu Kheng Heng, 62, ex-jurugambar ari New Sarawak Tribune ke ngidap penyakit riman prostat. Presiden NPC Mokhtar Hussain madah, JWF ditumbuhka nengah pengasih ari organisasi koperat ti nyendiaka bantu ari segi belanja ngagai pemberita ke balat sakit tauka sida sebilik ke mati biak. |
| Posted: 18 Feb 2014 02:25 PM PST by Judan Bungap. Posted on February 19, 2014, Wednesday SELANGAU: Rumah Lichai Pusong, Sungai Tepus, Ulu Balingian, panjai 16 pintu udah ambis angus diempa api, pagi kemari. Penusah ke nuntung rumah panjai urung 180 kilometer penyauh ari pasar Sibu nya nyadi urung pukul 10 pagi alai maya penusah mayuh agi ari peranak rumah panjai nadai nguan rumah. Pemangku Kepala Opis Bomba Enggau Penyelamat (BOMBA) Sungai Merah Graji Layau madah, opis sida nerima kangau urung pukul 10.08 minit pagi. "Raban kami ke disempulang 24 iku raban ari Opis BOMBA Sungai Merah enggau Opis BOMBA Sentral Sibu datai ba palan penusah urung pukul 11.50 pagi ketegal kelalu jauh. "Tang maya kami datai ditu rumah panjai nya udah ambis angus," pia ku iya madah ngagai pengarang berita. Taja pan baka nya ku iya, nadai penusah bakal sereta bebadi nyawa diriput bisi nyadi. "Ba pansik keterubah api nyangka berengkah nyadi ari dapur. "Tang kitai mengkang nandu pansik penusah angus tu," ku iya sambil madah raban sida bekenaka ai sungai urung 400 meter penyauh ari rumah panjai dikena madamka api. Graji mega maya tu madahka iya enda lantang ati enggau sekeda ari orang ti betengahka jalai alun laban enda meri kerejasama ngagai raban sida maya benung ba pejalai ngelawa palan penusah. Ku iya, kelimpah ti jauh, ulah tu nekul bendar pengawa raban sida sereta tau ngujungka penusah nabanka nyawa nyadi. Seiku ari bala rumah panjai tu, Muyah Merat, 50, maya dikerandau pengarang berita madah, api berengkah nyadi bepun ari dapur bilik sepiak iya. "Maya nya aku baru tembu mandi tepedaka api benung nyerarai nyadi ari bilik sepiak lalu beguai megauka kami serumah. "Tang tebal agi bala kami serumah nadai di rumah maya nya laban bisi nya gawa lalu bisi mega ngalu ke pasar," ku iya. Muyah madah, api bangat jampat nyerarai ti ngujungka iya enggau sida ke bukai enda mujur beambika keresa dalam bilik. Taja pan baka nya ku iya, sida serumah benasit manah laban nadai seiku bakal nyengkaum iya empu ke baru gerai beputung sebulan lebih ke udah. Penghulu Thomas Jawa ke bela bisi datai ngesah penusah ke nuntung rumah panjai nya ngambi awak ngelalau bala mayuh kelebih agi peranak rumah panjai ngambika semampai ngemeratka pengelikun. "Tebal agi penusah angus bepun ari pengilap diri empu. "Nya alai, kelebih agi sida ke indu anang enda bejimat maya nyumai, tentuka api dapur udah dipadam dulu enti deka mindah ke bukai," ku iya. Bepun ari penusah nya, Thomas ngarapka pengari rayat bagi menua nya ulih datai ngesah sereta meri bantu kena ngelempungka penusah ke nuntung urung 96 iku peranak rumah panjai nya. Maya tu mega iya ngarika Opis Pelilih Selangau bisi nyuaka barang pemakai enggau dapur gis dikena mantu peranak rumah panjai nya. |
| Saidol: Perintah semampai ngemeratka penanggul NCR Posted: 18 Feb 2014 02:24 PM PST SIBU: Chairman Kelab Penyukung Barisan Nasional (BNBC) Abdullah Saidol (gambar) ningkah penemu Chairman Parti Keadilan Rayat (PKR) Nengeri Baru Bian madahka rayat rindu agi minta saup penyakal mutarka pekara bekaul enggau isu tanah. Pungka ku iya, perintah semampai ngemeratka pekara bekaul enggau tanah adat Bumiputera (NCR) nyengkaum ngemansutka belanja beribu ringgit dikena bejalaika program nyukat kelingi tanah NCR enti dibida enggau penyakal ke semina ngira penguntung populariti politik aja. "Baru Bian semina nemu ngelambung diri aja tang perintah nerima sereta berundingka sebana rayat senentang tanah sida. "Tu bida ke jauh nyengenda, kitai enda ngelambung diri tang terus mai pekara bekaul enggau tanah NCR ngagai ijinsi perintah nitihka atur enggau prosedur," pia ku iya maya dikerandau pengarang berita, kemari. Baru maya ba aum media kena Hari Empat tu tadi di Kuching minta BNBC ngambika nanya ngagai diri empu nama kebuah mensia mayuh rindu agi mantaika penanggul bekaul enggau tanah ngagai penyakal tang ukai ngagai Kaban Parlimen perintah. Baru madah, pekara nya bepun ari servis pengari rayat BN enda ngemantupka ati rayat tauka sida enda nyikap diri mutarka penanggul ketegal bepegai ba polisi. "Penyakal enda peduli baikka pekara bekaul enggau tanah nya sah tauka enda kelimpah enda bebendar bekerejasama enggau perintah mutarka penanggul nyengkaum rindu bejai pemendar perintah ngatur program nyukat kelingi tanah," ku iya. Kelimpah ari nya ku Abdullah ti mega Kaban Kunsil Nengeri (ADUN) Semop madah, penyakal nyangka bisi minta bayar luyar enti minta saup sida kelimpah seraya minta peda media dikena ngulihka populariti politik sida. Ku iya, Malaysia sebengkah menua demokratik lalu rayat dipegai bepelasarka undang-undang. "Nya alai, barang sapa bisi penanggul bekaul enggau tanah ti enda lantang ati tau mutarka penanggul nya bekenaka undang-undang tauka pampas nengah undang-undang ti engkeman," pia ku iya madahka baru. |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |