» »Unlabelled » MCMC enda patut ngendiauka diri, ku Chong BorneoPost Online | Borneo , Malaysia, Sarawak Daily News » Berita Iban - New 2 Borneo

05:38:00

MCMC enda patut ngendiauka diri, ku Chong BorneoPost Online | Borneo , Malaysia, Sarawak Daily News » Berita Iban - New 2 Borneo

MCMC enda patut ngendiauka diri, ku Chong

Posted: 02 Feb 2014 08:46 AM PST

by Jacqueline David. Posted on February 3, 2014, Monday

KUCHING: Ba runding komuniti ke ngembuan hak demokartik, genap iku rayat tau mantaika penemu diri tang penemu nya enda tau tekuing sereta bepelasarka undang-undang menua, ku Chairman Parti Tindakan Demokratik (DAP), Chong Chieng Jien (gambar).

Chong madah munyi nya lebuh diasuh nimbal pasal lambar dalam laman pengawa rama 'Facebook' ke bisi mandangka seraban orang ke ngumbai diri 'Semenanjung Malaysia Anti Sabah & Sarawak' ke bejaika orang Sabah enggau Sarawak lebih agi ngemelika pupu bansa menua tu ke bepengarap Keristin.

"Ngaga nama 'Anti Sabah & Sarawak' nya pan udah ngelanggar undang-undang sereta tau mai penyarut.

"Ba penemu aku, MCMC (Malaysia Multi Media Commission) patut ngemeratka atur ba pekara tu, enti enda utai tu tau mai penyarut ngagai menua sereta ngenakutka orang bukai.

"Kitai enda nyebut utai 'Anti Malaysia', 'Anti Selangor', 'Anti Johor' enggau sekeda jaku begedi laban enti iya bansa nya, kitai nganu nengeri. Tang enti sema jaku kita madah 'anti Barisan Nasional (BN), nya enda ngawa laban nya parti politik. Semua parti politik bisi penyukung diri," ku iya.

Iya madah munyi nya ba aum media pengudah Mandal Chairman Parti Keadilan Rakyat (PKR), ti mega nyadi ADUN Batu Lintang, See Chee How bejadika pengerami 'Ngelalu Pengabang Taun Baru Cina' PKR di luar opis parti nya di Batu 3, ditu, kemari.

Lebuh ditanya enti lambar 'Facebook' nya tau ngenakut tauka enda likun ba rayat Sabah enggau Sarawak, iya madah:

"Enda iya bansa nya, orang Malaysia tu orang ke ngena runding, orang ke ngembuan penemu bebatak asur, semina ekstremis aja ke ngaga utai bansa nya. Sida tu orang ke deka magi tauka sida tu semina deka mai penyarut aja ngagai Malaysia," ku iya.

Pekara nya enda berat enti diperundingka, dibanding enggau utai ke nyadi di Malaysia diatu, ku Chong.

"Kitai jarang endar dikeibuhka sereta enda dibagi enggau sama rata nitihka sempekat Malaysia," ku iya, lalu nambah, lambar 'Facebook' 'Semenanjung Anti Sabah & Sarawak' nya diatu udah ditutup.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

PR Sarawak nyukung Anwar bediri di Kajang

Posted: 02 Feb 2014 08:46 AM PST

KUCHING: Pemesai sereta penyukung Pakatan Rakyat (PR) Sarawak deka bebendar nyukung Penyanding Penemu Parti Keadilan Rakyat (PKR) Datuk Seri Anwar Ibrahim bediri nyadi chalun ba pengawa bepilih mit Kajang.

Mandal Chairman PKR ti mega ADUN Batu Lintang, See Chee How madah, amat pan Sultan dipelilih menua Selangor nya ngembuan kuasa besai tang PR mesti ngangkatka penemu sida iya laban diatu, ku Chee How, semua mata meratika Selangor.

"Kepala Menteri Selangor, Tan Sri Khalid Ibrahim orang ke nyulut megai perintah Selangor. Taja pia, semua mata meratika Selangor ulih mutarka penanggul ke ditapi sida iya lebih ari nya.

"Nya alai, kami (PR) mantaika jaku kami bekaul enggau penanggul ke nyadi di Selangor diatu. Enti enda baka nya, kami (PR) nadai bida enggau UMNO, nya kebuah bisi pemerat," ku Chee How madah ba aum media pengudah bejadika atur pengawa Ngelalu Pengabang  nyerumba Taun Baru China di Opis PKR di Batu 3 ditu, kemari, ke bela digulu pemesai bukai ari Parti Tindakan Demokratik (DAP).

Sebedau nya Tukang Wang PKR ti mega  Kaban Parlimen (MP) Miri, Dr Michael Teo madah, bisi kebuah ti berat Anwar enda tau enda bediri di Kajang, Selangor.

"Kitai begunaka tuai ke tegap, nya alai PR betatika pekara tu. Bisi pemerat Anwar di DUN Selangor ketegal politik.

"Nya alai kami (PR) deka kin (Kajang) nyukung iya, ngambika iya ulih nyadi Kaban Kunsil Nengeri (ADUN) Selangor. Kami ngasaika iya (Anwar) landik agi mutarka semua penanggul ke ditapi Selangor," ku Teo.

Ke diatu, Anwar nyadi MP sitak Permatang Pauh di Pulau Pinang tang ukai ADUN Selangor.

"Kami udah besedia ke pengawa bepilih mit Kajang, lalu PKR Sarawak deka mantu Anwar menang kerusi tu taja pan pengawa bepilih mit nya bedau dipadah, tang udah iya dipadah ila, kami deka kin nyukung iya (Anwar).

"Diatu kelalu mayuh penanggul ke ditapi Selangor. Mayuh orang ngumbai Anwar ulih mutarka penanggul nya, lalu kami di PKR pan berunding Anwar patut nyadi ADUN Selangor, lebih agi mutarka penanggul ke ditapi raban Keristin diatu bekaul enggau isu pengarap," ku iya ke ngumbai Menteri Besai (PM) nadai mantai penemu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Anang malut jalai pengarap ngena pekara politik: Masing

Posted: 02 Feb 2014 08:45 AM PST

KUCHING: Pekara bekaul enggau pengarap, enda patut dibalut pekara politik, lalu enti iya enda diputar enggau manah, iya tau mai penyarut ngagai mensia mayuh sereta ngeruga pengelikun menua, ku Menteri Pemansang Tanah Sarawak, Tan Sri Dr James Masing (gambar).

"Pengarap tu hak seseiku, iya enda patut dibalut pekara politik. Ari keterubah pekara tu nyadi, aku endang enda setuju," ku Masing.

Iya madah munyi tu lebuh diasuh nimbal sebengkah penemu ba laman pengawa rama 'Facebook' alai seraban orang ke ngumbai diri 'Semenanjung Anti Sabah enggau Sarawak' nganu sereta ngemelikka pupu bansa ba kededua buah nengeri tu.

"Enti deka muru rayat ari kededua buah nengeri tu enda disengkaum dalam Sempekat Malaysia, nya ukai chara mutarka penanggul ke benung nuntung diatu," ku Masing.

Masing ti meg Presiden Parti Rayat Sarawak (PRS) madah, kitai patut belajar nerima jaku lalau enggau runding ke tebuka laban mayuh jaku lalau digaga dikena ngemanahka agi gempung Malaysia.

"Orang ari luar Sabah enggau Sarawak patut beratika perambu sereta jaku lalau rayat ari menua tu.

"Malaysia ditumbuh nengah gempung nengeri lalu iya tetap nyadi gempung entara nengeri dalam Malaysia. Nya alai, kitai patut bekerejasama ngemanahka agi penuduk kitai nyadi rayat Malaysia.

"Sida ke ngaga lambar 'Facebook' 'Semenanjung Malaysia anti Sabah & Sarawak' nya pan patut ngetuka pengawa begedik baka nya," ku iya.

Iya madah munyi tu lebuh dikerandau nyerumba atur pengawa Ngelalu Pengabang Taun Baru China Parti Sa'ati Rayat Sarawak (SUPP) kena hari Lima tu tadi.

Masing madah, kadang-kadang amat iya enda entu lantang meda utai ke digaga Perintah Besai, tang pengawa nya ku iya, deka ngemanahka agi gempung Malaysia lalu ukai mechahka gempung nya.

"Kadang-kadang aku pan enda lantang ati meda chara Perintah Besai mutarka isu 'Allah' tang ukai reti aku bejaika gempung Malaysia nya, tang semina ngasuh Perintah Besai bejimat lebuh mutarka isu 'Allah' laban iya besangkut paut enggau rayat Keristin menua tu," ku iya.

Hari Lima tu tadi, Sapit Menteri Dalam Menua, Datuk Wan Junaidi Tuanku Jaafar madah, kitai bisi undang-undang, bejejimat, anang ngelebus adan.

"Nya alai enti orang bejaku peneka ati, asal iya agi dalam konteks undang-undang menua, Perintah agi ulih ngenatka nya, tang anang ngelui adan.

"Tang enti udah ngelui adan, polis besedia nangkap orang nya. Laban kitai pan enggai meda menua kitai ke ngembuan mayuh macham pupu bansa, pengarap kitai nyadi charut laban utai bansa tu ke tau mai penyarut.

"Nya alai, jaku lalau aku seagi-agi kita bisi hak nulis blog tauka 'Twitter', anang sesekali ngelui pematut," ku iya.

Bedau lama tu ke udah, lambar 'Facebook' 'Semenanjung Malaysia Anti Sabah enggau Sarawak' mantaika gambar (dalam Facebook sida iya) ngemelika orang Keristin menua tu, nyengkaum ngengkah gambar engkatak ba regang.

Kelimpah ari ngengkah gambar bansa nya, gerempung tu mega ngemelika pupu bansa kededua buah nengeri tu.

Naka ke diatu, ripot bisi madahka lambar 'Facebook' nya diatu udah ditutup.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Harden bebulaka penemu Leon ti ngumbai projek ngaga sepital baru Sri Aman nya ‘sakit’

Posted: 02 Feb 2014 08:45 AM PST

SRI AMAN: Menteri Muda Pemansang Menua Pesisir, Datuk Francis Harden Hollis madah, Mandal Chairman Parti Tindakan Demokratik (DAP) Sarawak, Leon Jimat enda berapa nemu sentang atur perintah bejalaika projek ngaga sepital baru Sri Aman.

Ulah Leon ti madahka pengawa ngaga sepital baru nya 'sakit', semina kena ngulihka publisiti murah ti pulaika penguntung politik iya empu aja.

Ketuai penyakal nya patut beratika dulu pemujur  projek ngaga sepital nya diatu, sebedau ngemansutka sebarang penerang ba media.

"Penemu Leon nya nadai pengamat laban pengawa ngerata sereta nambun tanah ba palan endur ngaga sepital baru nya benung dipejalaika diatu," ku iya seraya bebulaka jaku Leon ti madahka projek sepital baru Sri Aman ke beungkus RM200 miliun nya 'sakit' sereta nadai pemansang naka ke diatu.

Ku Harden, dokumen tinda ngaga sepital baru nya deka dikeluarka enti pengawa nambun tanah ba palan endur bejalaika projek nya udah tembu ila.

Iya melabaka dokumen tinda nya deka dikeluarka pun taun tu, ke alai seraban perunding teknikal ari Kuching deka datai meresa pengawa ngerata sereta nambun tanah ba palan projek nya

"Aku arapka rayat nemu projek sepital baru Sri Aman nya mengkang dipejalaika, lalu ukai 'sakit' baka ke disebut Leon," ku iya.

Ku Harden, pagar ke rebah ba palan projek sepital baru ketegal perengka injin berat pemaju.

"Anang ngumbai projek sepital baru Sri Aman nya 'sakit' semina ketegal pagar ba palan projek nya rebah," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penyadi tanah tusur balat ngirauka ati peranak dia

Posted: 02 Feb 2014 08:34 AM PST

BINTULU: Peranak rumah panjai ke dipegai Tuai Rumah (TR) Gani Lansam berasai irau endar ati berindik ari penyadi tanah tusur di belakang rumah panjai sida.

Seiku peranak rumah panjai nya, Lalai Ligong, 56, madahka tanah tusur ke nyadi ba belakang rumah panjai nya dalam kandang dua minggu ke udah, ngirauka ati peranak rumah panjai nya.

"Aku arap raban ke bekaul mantu mutarka penanggul tanah tusur nya ngambika enda ngachau pengelikun rumah panjai kami," ku iya.

Ku iya, penanggul nya nyadi ketegal ujan bangat ke nyadi ba pelilih mit Sebauh apin lama ke udah. Lalai arapka raban ti bekaul ngaga geraga  bukit ke tegap agi ngambika penanggul nya enda nyadi agi.

Ku Johnnicol Gian, 60, raban ke bekaul patut mantu ngenegapka geraga bukit ti endang udah bisi nya sereta ngemesaika arung ai ba bukit nya.

"Endang bisi kelai tanah nya deka tusur laban bisi repik batu enggau tanah labuh ari atas bukit. Taja pia, kami enda nyadang pekara tu ngemalat nya ketegal ujan bangat ke nyadi di Bintulu dalam kandang dua minggu ke udah," ku iya.

Ketegal tanah runtuh nya mega, semua sida serumah diatu tinduk ba ruai, laban irauka penusah nya nyadi balat.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Fadillah ngarapka penanggul ke nuntung SUPP diputar dalam parti

Posted: 02 Feb 2014 08:33 AM PST

KUCHING: Ketuai Nembiak Barisan Nasional (BN) Nengeri Datuk Fadillah Yusuf madah penusah ke nuntung Parti Bersatu Rakyat Sarawak (SUPP) patut diputar raban dalam parti nya empu.

Taja pia, Fadillah madah raban parti bukai dalam serakup BN ulih meri penemu enggau lalau nengah semengat dalam BN.

"Kenyau ari suba, tiap parti dalam serakup BN seruran meri bantu enggau sukung ngagai parti bukai dalam serakup ti benung betapi enggau penusah.

"Tajapia, bantu ke diberi bisi tikas lalu enti sida napi penyarut dalam parti, raban dalam SUPP aja ke ulih mutarka pekara nya,'ku iya lebuh dikerandau kemari.

Kitai semina ulih meri penemu enggau jaku lalau, tandu iya.

Iya mansutka jaku nya lebuh dipinta ngenang pinta presiden SUPP Tan Sri Peter Chin ti nagih bantu ari parti bukai dalam serakup BN.

Chin Hari Empat tu tadi minta bantu ari raban parti bukai dalam serakup BN ngambika ulih nyelamat parti pemadu tuai di Sarawak, iya nadai pilih bukai.

"Enti penanggul tu sebengkah penusah ke nyadi dalam SUPP, kitai engka ulih mutarka dalam parti aja.

"SUPP ukai semina betapi enggau penyarut dalam parti aja tang napi penusah dikinsil pengerijister Opis Pengerijister Gerempung (ROS) ti ngait pampang aku Bekenu enggau Piasau,"ku Chin.

Fadillah ke mega Ketuai Nembiak Parti Pesaka Bumiputera Bersatu (PBB) nambah, sebarang pemutus ke diletak SUPP deka dipebasa parti bukai dalam serakup BN.

Ba kaul ke sama, Sekretari Besai Parti Progresif Demokratik Sarawak (SPDP) Datuk Nelson Balang Rining madah naka ke diatu nadai randau udah diatur entara SPDP enggau SUPP senentang pinta Chin nya.

"Nadai randau udah diatur naka ke diatu lalu aku enggai bejurai panjai,'ku iya.

Sekretari Besai Parti Rakyat Sarawak (PRS) Datuk Wilfred Rata Nissom netapka parti enggai masuk champur sereta ngaul diri ba penusah ke ditapi SUPP diatu.

"Naka  ke diatu, kitai enda deka ngaul diri ba penusah SUPP,"ku iya lebuh dikerandau kemari.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.