Kemeratka ulah sereta pemindah anak kitai BorneoPost Online | Borneo , Malaysia, Sarawak Daily News » Berita Iban - New 2 Borneo |
- Kemeratka ulah sereta pemindah anak kitai
- Sempekat Malaysia 1963 (MA63) enda dititih sereta enda dikeibuh
- Penyakah, pengikak belatih mai tuah ngagai Alexander
- Chong: DAP muji penyiru perintah nengeri nyaup kos perubat Wong Ho Leng
- Nembiak Lubok Antu patut nyulut ba pelajar
- Masjid India deka dikemanah nyadi Masjid Bandar: Abg Jo
| Kemeratka ulah sereta pemindah anak kitai Posted: 27 Apr 2014 03:15 PM PDT by Edwin Jemat. Posted on April 28, 2014, Monday Apai indai, pengereja pengawa gerija patut besaup ngiring bala anak ngambika sida enda 'buta' KUCHING: Raban apai indai sereta pengereja pengawa gerija dilalau ngemeratka ulah anak sereta raban nembiak kemaya hari tu ngambika sida enda muntang tekuing penemu, tererunda nitih buta. Patron pengerami Beserumpu Makai Malam, Douglas Jipau mansut penemu munyi nya nyerumba pengawa ngintu genap 21 Taun Komiti Ruang Bilik Katolik (KRBK) RPR Batu Kawa Fasa II udah ditumbuh, ke diatur ba sebengkah restoren ditu malam kemari. "Kitai ke apai indai anang enda ngemeratka ulah anak diri lebih agi ba jalai pengarap. Mayuh udah dipeda sereta didinga, bala anak kitai buta runding ngujungka sida tererunda tesat jalai ba pengarap," ku iya. Iya mega ngelalau pengereja pengawa gerija, ketuai sembiang tauka katekis ngatur program ti engkeman tauka randau endur ngajar sereta belajarka jalai pengarap ti menuku. "Enti enda diiring nengah jalai Tuhan, anak kitai, taja pan sida iya keristin tang bisi mega sida teparuk ba jalai pengarap bukai baka Islam lebih agi anak indu," ku iya seraya madah, utai ti baka tu suah nyadi ba anak enti nadai iring menyana. Douglas ke mega presiden etnik Bidayuh Pinyawa nyerita ba sekeda penanggul ti ditapi anak indu (Islam) bansa Dayak ti deka mulaika diri nyadi orang keristin pengudah dibuai tauka sarak enggau laki (Islam) sida. "Baka ni kitai ngatur sida tu? Ukai ulih ditegu sengapa enti ukai Majlis Islam, indah Tuai Rumah tauka ketuai raban bansa kitai pan enda tau ngatur pekara ti bisi sangkut paut enggau Islam," tandu iya. "Tu penanggul besai ke bisi nyadi ba bansa kitai lebih agi maya pemarai, dini numbakka sida, baka ni intu pemati nya? Semua tu enda tau diputuska kitai ti ukai Islam," terang iya. Berebak enggau nya iya berat mesan raban apai indai ngambika suah sereta anang leju ngajar sereta ngelalau anak diri baka nya mega nengah ajar ari gerija ngambika penusah tu enda betandu belama. "Kitai enggai meda anak kekapa nadai kuing jalai pengarap ti menuku dititih pengudah sarak, dibuai laki tauka laki (Islam) sida bebini baru ti ngujungka sida mulaika diri ke menua tauka rumah panjai apai indai lalu kekapa nengah pemetang jalai pengarap. Kelimpah ari nya, iya mega ngarapka bala apai indai ngaga atur it menuku ba ruang bilik diri ngambika genap pemindah anak kitai ditemu belama. "Gaga atur, enti anak kitai mindah ari rumah, kitai ke apai indai patut nemu kuing sida lalu netapka maya sida patut mulaika diri ke rumah," ku Douglas seraya ngelalau, enti kitai bisi atur baka tu, dia ulah ke enda menyana ulih diseliah. Lebuh ngenang penumbuh KRBK RPR Batu Kawa Fasa II ti genap 21 taun, iya ngelalau KRBK dirijista ngambika sida muntang agi sereta enda kakang bejalaika pengawa. "Komiti tu patut dirijista ngambika kita bisi pelasar endur ngatur pengawa, tambah mega kita ngasi agi didinga orang," ku iya. Bela bisi ngulu atur pengawa nya, Ketuai Penyasat Kanan Pampang Trafik Kuching ASP Poge, chairman KRBK RPR Batu Kawa Fasa II Nicholas Niko, chairman pengatur pengawa Lendik Edmond, kaban komiti iya sereta raban keristin bukai.   |
| Sempekat Malaysia 1963 (MA63) enda dititih sereta enda dikeibuh Posted: 27 Apr 2014 03:14 PM PDT KUCHING: Sempekat Malaysia 1963 (MA63) udah enda dititih lalu mega enda dikeibuh pengelama 50 taun ke udah ke alai tu mega ngelaika sempekat nya udah enda diguna agi, ku Chairman STAR Sabah Datuk Dr Jeffrey Kitingan. "Ketegal nya, Sabah enggau Sarawak diatu patut beserakup lalu ngansak perintah besai ke dikuasa sebengkah parti berandauka pekara tu enggau silik. "Sigi nadai jalai bukai enti kitai deka meda MA63 dititih enggau terit… semina nengah randau enti sida enggai meda mayuh agi politikal revolusyen angkat di kededua nengeri tu,'ku iya. Jeffrey mansutka penerang tu ba jaku pengelalu Forum Malaysian Agreement 1963 – Past, Present & Future ke digulu enda kurang ari 200 iku mensia ba sebengkah hotel ditu, kemari. MA63 disetuju maya Sabah, Sarawak enggau Singapore setuju numbuhka serakup Malaysia begulai enggau nengeri bukai di Malaya. Tang bedau lama udah nyapai kuasa merintah diri kena 16 September 1963, Jeffrey ke kala ditan nengah ISA madah MA63 enggau lelubah enda dikeibuh lalu ngujungka Sabah enggau Sarawak majak tinggal ba mayuh pekara kelebih agi ba pemansang enti dibanding enggau nengeri bukai di Semenanjung Malaysia. 'Sabah enggau Sarawak udah lenyau kuasa autonomi, lenyau politikal francais, lenyau kuasa ngintu pengeraja asal baka minyak sereta enda diberi kuasa ba dalam perintah besai. "Kuasa ba perintah besai patut dikunsi entara Semenanjung Malaysia, Sabah enggau Sarawak nitihka MA63, tang diatu udah nyata kededua nengeri di Borneo tu nadai kuasa agi ba senentang pekara nya,"ku iya. Diatu, ku Jefrrey kededua nengeri ngembuan kuasa ti chukup tegap ti udah ngujungka perintah besai (Barisan Nasional) ngembuan kuasa merintah menua. "Enti nadai sukung ari parti sereta rayat ari Sabah enggau Sarawak, aku ngasai perintah ke maya hari tu enda ulih merintah. Sida iya alah di Semenanjung Malaysia lalu semina bepanggai enggau sukung ari kitai. "Ketegal nya, kitai di Sabah enggau Sarawak patut angkat diatu, negika hak ke patut diempu kitai,' ku iya. Maya jeman numbuhka Malaysia, ketuai politik di Sabah enggau Sarawak bedau besedia, kitai semina ulih ngelakka pekara nyadi lalu semina bepanggai enggau raban ketuai ari Malaya enggau British. Sida udah beambi ulih ari pengelemi kitai maya nya lalu nya meh pengilap kitai suba, tandu iya. Seraya ti ngelalau perintah Sarawak bechuntoka pengilap perintah Sabah ti udah dikuasa sebengkah parti ari Semenanjung Malaysia, Jeffrey bejaku ngenang asil minyak ke dipansut Sarawak. Ku iya, Sarawak teulihka US$15 biliun ari asil minyak enggau gis ninting taun lalu ari penyampau nya, semina tauka kurang ari US$1 Biliun dipulaika baru ngagai Sarawak ke dikumbai royalti. "Kelimpah ari nya, maya bajet menua dibantai, Sarawak semina nerima kurang ari RM1 Biliun ungkup pengawa pemansang enggau ungkus operasyen bukai tajapan udah ngeluar bebiliun ari asil minyak enggau gis,'ku ADUN Bingkor, Sabah nya. Forum kemari mega matak sekeda ketuai ke landik ba pekara politik bela enggau mantaika keretas kereja. Entara ke bela mantaika keretas kereja iya nya Kepala Menteri Sabah ke dulu suba Datuk Seri Panglima Yong Teck Lee, Sapit Presiden PBDS Baru Patrick anak Uren enggau Chairman HINDRAF Waythamoorthy Ponnusamy. |
| Penyakah, pengikak belatih mai tuah ngagai Alexander Posted: 27 Apr 2014 03:13 PM PDT KUCHING: Penyakah sereta pengikak belatih mai guni pasir pemerat 5 kilogram, meri tuah ngagai Alexander Lungan Unyat, 17, teulihka gelar Kadet Terbaik Lelaki, Perkhemahan Kor Kadet Polis Peringkat Negeri Sarawak 2014. Alexander seiku ari kadet SMK Selirik, Kapit ngarika Kor Kadet Pelilih Mit Menua Kapit ba pekit Perkhemahan Kor Kadet Polis Peringkat Negeri Sarawak 2014 ti diatur ba Pusat Latihan Polis (Pulapol) Kuching, Jalai Puncak Borneo ditu. Dalam mayuh aktiviti ti dipejalaika ba program nya, iya teulihka rikod pengelama tujuh (7) minit lebih dalam Rentas Halangan. "Sebedau masuk pekit tu kami bisi belatih, lalu entara latih kami nya mai guni pasir pemerat 5kg kelimpah ari belanda, aku arap bendar latih nya ti meri pemujur ngagai aku seharitu ti teulihka gelar Kadet Terbaik Lelaki. Aku ngarapka diri ulih ngetan sereta teulihka penyulut bukai lebih agi dalam Kor Kadet Polis," ku iya ti dipelabaka seiku ari kor kadet ngarika nengeri renggat menua ila. Lebuh ditanya sekalika iya endang bisi juluk deka nyadi polis jemah ila, Alexander madahka diri deka ngulihka juluk nya. "Juluk ati aku endang deka sereta bepengerindu nyadi polis. Taja pan keterubah suba nadai ati tang nyau kelelama pengerindu nya bisi. Kebuah aku ke deka nyadi polis tu laban deka bejalaika tanggungpengawa ngagai menua, ngetanka pengelantang enggau pemaik," ku iya. Nambahka nya, Nur Atiqah Kulah,17, ari Kor Kadet Kota Samarahan dipilih nyadi Kadet Terbaik Perempuan mega madahka diri bisi juluk deka nyadi polis. Iya ti ari sekula SMK Wira Penerissen madahka juluk ati nya enda ulih dijapai berindik ari bisi penanggul. "Aku endang bisi juluk ati deka nyadi polis tang engka enda tejapai laban aku bisi rabun. Nya alai Kor Kadet Polis tu meh peluang aku mantaika pengelandik dikembuan aku. Deka nyadi orang ti nyulut dalam unit tu begunaka latih chukup, sukung ari apai indai, jurulatih sereta sampi ngagai Tuhan enggau penegap runding patut bisi," ku iya. Kelimpah ari nya, Guru Pengiring/Penasihat Kor Kadet Polis Kota Smarahan, Karim Redzuan madahka penyulut kadet iya teulihka lumur satu, nyadi sejarah ngagai Kor Kadet Polis Samarahan. Iya madah, dua taun sebedau tu Kor Kadet Polis Samarahan ba lumur dua pemadu baruh tang bisi nambah manah lebuh teulihka lumur tiga ba pekit Perkhemahan Kor kadet Polis Peringkat Negeri Sarawak 2013, di Betong. Iya madahka diri temegah ati ngagai penyulut Kor Kadet Polis Kota Samarahan sereta ngarapka ulih ngetanka penuduk nya. "Kami ngarapka ngagai sekeda Kor Kadet Polis ari Kota Samarahan ti ngarika nengeri ba renggat menua ila ulih mai pulai pemujur besai ungkup Sarawak. Taja pan kor kadet tu ari mayuh macham sekula tang kami ngembuan juluk ke sama iya nya ngulihka lumur satu ba pekit Perkhemahan Kor kadet Polis Peringkat Negeri Sarawak 2014, lalu seharitu kami udah ngaga sejarah dalam Kor Kadet Polis Kota Samarahan," ku Karim. |
| Chong: DAP muji penyiru perintah nengeri nyaup kos perubat Wong Ho Leng Posted: 27 Apr 2014 03:12 PM PDT KUCHING: Parti Tindakan Demokratik (DAP) Sarawak muji Perintah Nengeri ti setuju mayar sekeda ari ungkus perubat Kaban Kunsil Nengeri (ADUN) Bukit Asek, Wong Ho Leng. Chairman Chong Chieng Jen ba sebengkah aum pengarang berita kemari madah bantu nya nimbal pinta ti dikenatai ruang bilik wong. "Taja pia, aku enda ulih sengapa mantai penyampau ungkus berubat iya ti ke endar," ku iya. Nitihka Wong ke mega ADUN Kota Sentosa sereta Kaban Parlimen (MP) Bandar Kuching, nengah kuasa perintah nengeri tiap iku MP enggau ADUN ulih nerima belanja berubat pechuma di Pusat Perubatan Pakar Normah di Petra Jaya. Ungkus berubat nya, ku iya deka dibayar Perintah Nengeri. "Ketegal iya (Wong) diperubat di Singapura, Perintah Nengeri meri bantu bepelasarka pemereti guna mantu, ketegal Wong udah mayuh meri jasa ngagai Sarawak," ku iya. Wong ke mega MP Sibu ke dulu suba, disah ngidap tumor untak ba taun 2012 ti ngujungka iya ngelengka penuduk nyadi chairman DAP nengeri lalu diatu benung pemisi sakit ari ngulu aum DUN. Hari Empat tu tadi, Kepala Menteri Tan Sri Datuk Amar Adenan Satem ba sebengkah aum pengarang berita di opis iya madah Perintah Nengeri setuju mayar sekeda ungkus berubat Wong ngambika ulih mantu ngurang tating belanja ruang bilik iya. Adenan madah bantu belanja nya diberi ketegal meretika guna mantu ketegal polisi perintah maya ke diatu semina mayar kus berubat raban ADUN ti berubat di spital dalam nengeri. |
| Nembiak Lubok Antu patut nyulut ba pelajar Posted: 27 Apr 2014 03:11 PM PDT Dr Rayong meransang nembiak sekula seraya ngelalau apai indai ngemeratka pelajar anak ENGKILILI: Kaban Kunsil Nengeri (ADUN) Engkilili Dr Johnnical Rayong anak Ngipa deka meda mayuh agi nembiak ke pepandai ditempa ba nengeri tu lebih agi dalam Pelilih Mit Lubok Antu jemah ila. Bala pengajar enggau apai indai patut seruran ulih bekerejasama ngambika juluk nya ulih dijapai, ku iya. "Aku ke nyadi pengari rayat sitak DUN Engkilili, deka meda, mayuh agi nembiak ke pepandai ditempa nengah pelajar jemah ila. "Aku arapka sekula primari San Semanju teulihka pemutus peresa ke manah ba Ujian Peperiksaan Sekolah Rendah (UPSR) 2014 tu ila," Dr Rayong bejaku munyi tu ba Pengerami Merarau ke diatur Serakup Apai Indai enggau Pengajar SK San Semanju, diatur ba sekula nya, apin lama ke udah. Dulu ari nya, pengerami nya dipenyadika Kaban Parlimen Lubok Antu, William Nyalau anak Badak. Dr Rayong mega ngelalau bala apai indai anang nejuka anak sida tererunda bemain nyentuk enda ingatka pelajar diri. "Suah agi betanyaka pemansang pelajar sida sereta nemu endur sida enti sida nadai ba rumah," pia ku iya. Beserimbai enggau pengerami nya, Dr Rayong ngungkupka Projek Mit Pemansang Menua Pesisir (MRP), RM5,000 ngagai PIBG SK San Semanju lalu RM3,000 diungkupka ngagai SK Ridan. Bela bisi ngulu pengerami nya, Kepala Pengajar SK San Semanju, Insam Meliam, chairman PIBG SK San Semanju, Nyalau Gawan enggau bala ketuai raban bansa bukai ke bisi ditu. |
| Masjid India deka dikemanah nyadi Masjid Bandar: Abg Jo Posted: 27 Apr 2014 03:10 PM PDT by Jacqueline David. Posted on April 28, 2014, Monday KUCHING: Perintah Menua deka ngemanahka Masjid India (ba India Street Kuching), nyadi Masjid Bandar laban masjid tu ngembuan sejarah ke kala alai raban Islam di menua tu ngulihka penemu, kelia. Menteri Dagang Temuai Datuk Amar Abang Johari Tun Openg madah, perintah udah setuju ngemanahka masjid enggau sekeda endur ke tuai. "Perintah Menua deka bekerejasama enggau Opis Agama ngaga sebuah masjid ba tebing sungai betunga enggau Masjid India. "Reti nya, Jalai Gambier ke endur Masjid India deka digaga seiti (lurung), lalu ba mua nya diawakka alai ngaga masjid baru ke muat enggau penyampau orang ke besembiang ba Masjid India," ku iya. Abang Johari bejaku munyi tu lebuh ke nutup atur pengawa 'Sukan-Ria Bintangor 2014' ba Genturung Pendiau Bintangor ditu, kemari. Ku Iya, masjid baru ke deka digaga nya enda besai tang besai reti laban dia meh pemun pemansang pengarap Islam di menua tu. "Pemun pengarap Islam bepun ari nya sereta mengkang ditanka dia taja pan perintah menua deka ngaga sebuah masjid baru enda jauh ari nya. "Kami deka ngaga tampung ari Projek Tebing Sungai Bintangor nyentuk ke nanga Bintangor nujah Genturung Pendiau Masjid nyentuk ke Masjid India ba waterfont semak enggau Masjid Bandar Kuching (dikelala enggau nama Masjid India). Ku Iya, enti dipeda ari Waterfront, nya manah amat laban enti kitai bedarat berengkah ari Fort Margarita,, kitai deka meda Dewan Dagang China (CCCI), Tepikong, mansa Jalai Tun Abang Haji Openg bisi gerija Anglikan, St Thomas Cathedral. "Tu mandangka kitai bisi penyerakup di Bandaraya Kuching, sebagi ari adat asal ke deka dikunsi kitai enggau temuai. "Semua palan tu manah alai temuai, ka mega sebengkah kelai rayat menua tu ulih diau begulai enggau pangan diri taja pan bebida ari segi jalai pengarap, tang kitai agi ulih beserakup," ku iya. Ba atur pengawa nya mega iya madahka Parti Pesaka Bumiputera Bersatu (PBB) Satok deka muka 'Perbadanan Pelaburan Satok' ke deka nyendiaka 'Tabung Amanah Pelaburan Satok' ungkup komuniti Bumiputera ke diau ba sitak nya. "Tebal agi komuniti ke diau ba sitak Satok tu Bumiputera Islam ke ngembuan retanah ditu, taja pia ketegal bebagika reta pesaka nitihka 'faraid' pengudah orang ke beempuka reta nya parai, tanah nya nyadi komersil laban Bumiputera enda ulih meli reta tanah nya ketegal rega iya ke kelalu mar. "Diatu kami bisi RM3 juta, arapka taun baru tu ila kitai bulih geran RM5 juta (core fund) ngambika raban Bumiputera ulih beranakka puku dia,"pia ku iya. Abang Johari madah, ngemansangka tabung tu sebaka enggau REIT (Real Estate Investment Trust). |
| You are subscribed to email updates from BorneoPost Online | Borneo , Malaysia, Sarawak Daily News » Berita Iban To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |