» »Unlabelled » Tekat hidro Baleh, Baram deka sereta digaga: Taib BorneoPost Online | Borneo , Malaysia, Sarawak Daily News » Berita Iban - New 2 Borneo

05:35:00

Tekat hidro Baleh, Baram deka sereta digaga: Taib BorneoPost Online | Borneo , Malaysia, Sarawak Daily News » Berita Iban - New 2 Borneo

Tekat hidro Baleh, Baram deka sereta digaga: Taib

Posted: 03 Feb 2014 02:00 PM PST

by Judan Bungap. Posted on February 4, 2014, Tuesday

Pengawa nya dikena napi peminta kompeni besai ti udah mayuh merambu beranakka puku dituSIBU: Perintah nengeri udah ngaga pemutus deka ngaga tekat ai Baleh enggau Baram sereta, ukai bererenggat baka ti diperambu sebedau tu.

Kepala Menteri Sarawak Pehin Sri Abdul Taib Mahmud madah, pemutus nengeri nya digaga dikena nyaga ati orang ti beranakka puku ba Projek Kuasa Tau Dikena Baru Sarawak (SCORE) lebih agi baka ari menua Jipun, Korea enggau menua Timur.

"Sebedau tu perintah nengeri merambu ngaga tekat ari Baram enggau Baleh nengah chara berenggat.

"SCORE nerima sambut ti manah lalu mujur matak RM28 billion ari pengawa beranakka puku ari lima bengkah kompeni besai.

"Kitai mega diatu benung ngelubahka peminta bala orang beranakka puku bepun ari kitai suntuk bekal kuasa karan," ku iya.

Iya mantaika jaku tu maya bejadika pengerami Pra-Bejadi University College Of Technology Sarawak (UCTS) ditu, lemai kemari.

Pengerami nya mega disempulang bini Taib Puan Sri Ragad Kurdi Taib, Sapit Kepala Menteri Datuk Patinggi Tan Sri Alfred Jabu Numpang, Menteri Wang II ti mega Chairman UCTS, Menteri Pengawa Berumah Datuk Amar Abang Johari, Menteri Opis Kepala Menteri Datuk Adenan Satem, Sapit Menteri Pemansang Menua Pesisir enggau Kandang Menua Datuk Alexander Nanta Linggi, Ketuai Sekretari Kepala Menteri Abdullah Saidol, Sapit Chanselor UCTS Datuk Dr Abdul Hakim Juri enggau bala pemesai perintah bukai.

Taib ti mega Menteri Wang madah, penanggul suntuk bekal karan deka diputar taun ti deka datai bepun ari penembu tekat ai Bakun enggau tekat ai Murum.

Bakun ulih mekalka 2,400 megawatt karan lalu Murum 944 MW.

Tekat ai Baram enggau Baleh ila ulih mekalka kuasa entara 1,000 ngagai 2,000 MW ti dikena industri ari SCORE.

"Kitai ngarapka 20 taun ti deka datai SCORE ulih matak US$200 billion ari pengawa beranakka puku," ku iya.

Ba pekara ke sebaka Taib madahka projek ngaga hotel enggau rumah ungkup orang ke gawa di Samalaju benung dipejalaika.

"Tiga taun ti deka datai, kitai ulih ngaga rumah ungkup 15,000 iku orang ke gawa dalam menua ke bungkur Score," ku iya.

Bekenangka university, iya madahka diri andal palan nya ulih nyediaka orang gawa ba pemansang SCORE.

"Aku pechaya ba taun 2017 ila, university tu ila deka ngembuan 5,000 iku nembiak," ku iya nambahka baru.

Ba pengerami tu UCTS mega betukar sempekat pemereti ati (MoU) enggau raban kerejasama ke bukai kelimpah UCTS nerima bantu skolarship RM1 milliun ari Titanium Project Management Sdn Bhd.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Seiku aki, 60, mati dipelaba ngitang diri

Posted: 03 Feb 2014 01:58 PM PST

MIRI: Seiku aki ke beumur 61 taun dipechaya ngitang diri ngena tali nilon ba bilik iya di Taman Ceria Permyjaya ditu urung pukul 8.00 pagi kemari.

Niang Jau Jok bansa Kayan ari Sungai Dua Baram ditemu menantu lelaki iya Francis Ngo, 33, begitang dalam bilik iya pukul 10.00 pagi.

Nundaku anak indu iya, Mary Jau, 31, laki iya pulai gawa urung pukul 10.00 pagi kemari terus tama ke bilik sida ba ringkat atas.

"Lebuh iya pansut ari bilik kami, iya mansa bilik apai indai tang bisi besangka laban pintu nya enda ditambit manah.

"Datai iya semak lalu muka pintu, tekenyit iya meda apai aku begitang enda benyawa enggau tali nilon ke ditanggam ngagai grill jenila," ke iya lebuh dikerandau ba rumah sida kemari.

Mary madah, apai iya nguji ngambi nyawa diri udah dua kali iya nya dalam Jun 2012 enggau November taun nyin tadi.

"Tu ketiga kali iya lalu nyadi," ku leka sabak Mary.

Nundaku iya, apai iya bisi bepenanggul untak enggau darah tinggi.

"Demalam (Hari Minggu) urung pukul 9.00 malam, iya besadu ngagai indai aku iya enda nyamai pendiau.

Kepenudi aku meda iya nya pukul 4.00 pagi tadi (kemari) di bilik besai rumah," ku Mary nambahka indai sida nadai di rumah maya penusah tu nyadi.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Pekit KSPA 2014 deka ditutup 30 Mei taun tu

Posted: 03 Feb 2014 01:58 PM PST

KUCHING: Pengawa meri gelar ke raban pemberita berprestij, Gelar Kenyalang SHELL (KSPA) 2014 ti ke-26, kena meri kelai berita ke ditulis pemberita di menua tu.

Penyerta diatu dibuka ngagai pemberita ke gawa tetap, jurugambar enggau pengeluar media chelak tauka elektronik nengah lapan iti kategori KSPA ke deka dipekit.

Iya nyengkaum Gelar Pemberita, Gelar Berita ke diripot, Gelar Dagang enggau Ekonomi, Gelar Forografi, Gelar Pemberita (Penyiaran), Gelar Pemberita Rampa Menua, Gelar Berita ke diripot bekaul enggau Pengerai enggau Gelar Berita Lumba enggau Main.

Pengawa besai Shell ke pemberita nya deka digaga dalam bulan Oktober taun tu kelimpah ari muka penyerta pemberita ke udah dichelak dalam surat berita tauka media elektronik entara 1 Januari 2013 ngagai 31 Disember 2013.

Bekual enggau berita tu, hari penudi nganjung penyerta, iya nya kena 30 Mei 2014 kena pukul 4.00 lemai lalu tiap berita ke dianjung nya, patut dianjung terus ngagai:'Sekretariat Kenyalang Shell Press Awards (KSPA) 2014, c/o Institut Akhbar Malaysia (MPI), 2945 Jalan Bukit Ledang, Off Jalan Duta, 50490 Kuala Lumpur'.

Pom penyerta sereta atur pekit nya tau diambi ari laman web Shell Malaysia nengah www.shell.com.my, tauka nengah Gerempung Pemberita Sarawak (FSJA) tauka nengah Gerempung Pemberita Pelilih Menua Kuching (KDJA), Gerempung Pemberita Utara Sarawak (NSJA) tauka gerempung media di Sarawak.

Tiap iti ari penyerta nya mesti disedia enggau seset pom penyerta enggau gambar penyerta sebedau di anjung ngagai MPI.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Wong enda lantang ati sekeda orang ngemaruhka UCTS

Posted: 03 Feb 2014 01:58 PM PST

SIBU: Menteri Wang II Dato Sri Wong Soon Koh enda lantang ati enggau pengawa sekeda orang ti ngemaruhka University College Of Technology Sarawak (UCTS) ketegal beambi ulih tauka bepun ari politik.

Ku iya pungka rayat Sibu ditu patut berasai temegah ati laban ketungkah iya bisi palan pelajar tinggi baka UCTS nya ti mai mayuh penguntung ngagai rayat ba sitak enggau nengeri tu.

"Kitai ngarapka sida ti ngemaruhka UCTS tu badu ngembuan peragam ke enda manah.

"Semua pelajar ke bisi ba UCTS bela tikas enggau palan pelajar tinggi ke bukai," ku iya maya aum media pengudah ngulu Pengerami Pra-Bejadi UCTS ke dipenyadi Kepala Menteri Sarawak Pehin Sri Abdul Taib Mahmud ditu, lemai kemari.

Maya ngenang senentang ngaga Phase II palan pelajar nya, ku iya ti mega Chairman UCTS madah, sida empai nentuka hari agi.

Tu bepun ari piak ke ngaga projek nya ngemeratka pengawa ngaga tiga blok ke empai tembu.

"Enti tiga iti blok nya udah tembu baru kitai nentuka kemaya ngaga projek Phase II UCTS," ku iya nerangka baru.

Wong ti mega Menteri Kaunsil Kandang Menua enggau Pemansang Raban Bansa madahka, diatu UCTS udah nambah tujuh bengkah kos baru.

Kos tu ku iya baka Ijazah Sarjana Muda Kejuruteraan Mekanikal, Ijazah Sarjana Muda Kejuruteraan Elektrik (Tenaga), Ijazah Sarjana Muda Teknologi Makanan, Ijazah Sarjana Muda Sains Seni Bina, Ijazah Sarjana Muda Perakaunan, Ijazah Sarjana Muda Kejuruteraan Perisian enggau Ijazah Sarjana Muda Rangkaian Perkomputeran.

"UCTS mega taun tu merambu deka nambah 800 iku agi nembiak ke sebedau tu semina 179 iku nampung pelajar dia," ku iya nandu.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Peranak Rh Gaing dilalau bejejaga lebuh ujan lebat

Posted: 03 Feb 2014 01:57 PM PST

Sida diasuh ngenduh bedampa ba palan ke likun seraya nganti penemu sereta atur ke patut dititihKAPIT: Kepala Opis Pelilih Mit Kapit, Tuan DO Elvis Didit ke mega chairman Komiti Penyangga Penusah Ngenyit Kapit begulai enggau sekretari politik Kepala Menteri, Wilson Nyabong sereta disempulang pemesai opis perintah bukai bejalaika pengawa perintah ngelawa Rumah Gaing, di Nanga Baleh, Batang Rajang ngambika meda enggau mata diri pemalat tanah merekah ke dipadah bisi ngeruga pengelikun rumah panjai 26 pintu nya.

Seraban urung 30 iku pemesai tu niki ke punjung bukit peninggi 300 meter deka meda seraya ngenukuka pengamat tanah berenyang sereta merekah munyi ke dipadahka Jilap Bangkong,44, enggau Moses Sumbang,42, ngagai The Borneo Post empai lama ke udah.

Jilap nyerita, asai renyang tanah dia nyadi pengudah ujan lebat ujung taun nyin kemari.

Urung tengah hari petengan ujung bulan taun nyin tadi, seraya kiruh begagaka rumah diri, kami ngasaika tanah balat berenyang. Kami serumah enda nemu nama kebuah tang mai ati rawan magang.

Udah meresa baru nemu nya amat tanah merekah, sekeda perengka rumah kami mega rusak nyengkaum tiang semin, lantai merekah lalu sekeda belubang.

Udah nya baru kami ngeripot ngagai balai polis enggau BOMBA. Berindik ari pansik sida madahka tanah dia merekah laban bisi disilup ai ari baruh," ku Jilap.

Ba randau ti diketuaika Elvis Didit, pengawa sida ngagai rumah panjai nya bepun ari ripot sida serumah. Taja pan irauka pengelikun peranak menua dia tang peneka tauka pengenggai pindah, ngenduh di tempat bukai bepanggai ba sida serumah.

Bepelasarka ripot, renyang ke diasaika peranak rumah panjai nya berindik ari struktur tanah nya beginsit ari dalam bekau silup ai ba bukit nya. Berebak enggau nya aku minta sida serumah ngiga apak bukai endur sida berumah baru laban nitih gaya ripot nya, palan nya enda likun agi," ku iya.

Berebak enggau nya, kami deka berandau enggau Sapit Menteri Pemansang Menua Pesisir enggau Kandang Pendiau Datuk Alexander Nanta Linggi ngambi ulih ngenukuka sebarang bantu ti patut dikenataika ngagai sida," tandu iya.

Elvis mega irau, nangika ujan lebat nandu rekah tanah taba rumah panjai nya ke tau ngujungka sebarang penyadi ti dikenggaika, ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

WEC dua hari nya nerima respon ti manah

Posted: 03 Feb 2014 01:53 PM PST

by Jacqueline David. Posted on February 4, 2014, Tuesday

Keterubah diatur, aum besai tu deka digulu raban indu ti ngemeranka pengawa dagang

KUCHING: Konferens Women's Entreprenurship (WEC) 2014 ke diatur sayap indu Serakup Graduet Dayak Sarawak (SDGA) pengelama dua hari kena 22-23 March tu ila nerima respon ke manah ari serata menua.

Chairman Pengatur Konferens tu, Caroline Sandra Giang madah, dijangka raban indu ke ngemeranka pengawa dagang ari menua pesisir sama bela deka nyukung aum besai tu, kelimpah ari raban indu dagang ti bepeneleba ari nengeri tu ke dijangka digulu entara 250-300 iku penyereta.

WEC 2014 deka diatur di Swinburne University of Technology (SUT) di Jalai Simpang Tiga ditu madah, raban indu ti ngemeranka pengawa dagang enda ngira baru belabuh tauka udah lama, sida ke bisi dagang mit, nembiak ngambi kos pengawa dagang tauka nembiak bisi ati deka nyadi orang dagang, pemesai opis perintah tauka ejensi sereta sida ke bepengelandik dalam pengawa dagang mit enggau numbas pemesai (SME).

Dipelaba penyerta ti udah bisi madah deka ngulu aum besai nya, sida ari opis perintah tauka ejensi, orang ke ngatika diri enggau gerempung ukai dikuasa Perintah (NGO).

"Kami melaba mayuh ari penyerta nya ila indu ti ngemeranka pengawa dagang ke datai ari menua pesisir. Nya kebuah kami bekerejasama enggau NGO Indu meransang mayuh agi penyerta ari menua pesisir datai ngulu aum dua hari nya," ku Caroline.

Iya nambah, maya konferens nya ila, jaku ke dikena mantaika penemu tau ngena jaku English tauka Bahasa Melayu.

"Laban tu atur pengawa keterubah iya diatur SDGA Sayap Indu, tampai kami deka nyapai konferens ke pengabis manah ngambika ulih nyapai setindit atur menua, nasional sereta antarabansa.

"Kami deka bekerejasama enggau sekeda ejensi dalam pekara tu. Kena ngemunka atur pengawa tu, kami bisi ngangauka sekeda indu dagang ke udah mujur ngambika diinterbiu nengah video, nyeritaka peneleba sida ke udah mujur ba pengawa dagang," ku iya.

Tuju ngatur konferens tu ngambika penyerta ulih belajar sereta ngulihka penemu kena ngemanahka agi pengawa dagang sida iya, lalu kelimpah ari nya ngiga peluang bekelala enggau indu dagang bukai maya konferens tu.

"Tuju iya meri pemerat ngagai pengawa bekaul entara indu dagang dalam sitak menua tu, belajar sereta nentuka kaul ke penguntung pengawa dagang diri, nyendiaka palan ungkup indu dagang dalam industri, kompeni peribit, ejensi perintah enggau palan pelajar, nyengkaum nyendiaka palan tukang pansik bekaul enggau penyereta, industri, kompeni peribit enggau ejensiperintah," ku Caroline.

Pom dikena minta masuk tau diambi ari emel sarawakdga@gmail.com , tauka betelefon ngagai opis SDGA ba lumur 082-258588 (Angela Sating, Hazelina Samuel enggau Amelia Jimbun).

Bayar masuk ngulu konferens tu RM650 tau dibayar nengah akaun 'Sarawak Dayak Graduates Association' nengah Maybank ba lumur akaun: 511038081069.

Atur pengawa nya ila deka dipenyadika Menteri Pengintu Pengelantang Pendiau, Pekara Indu enggau Pemansang Komuniti Malaysia, Dato Sri Rohani Abdul Karim kena 22 March lalu deka ditutup Menteri Pengintu Pengelantang Pendiau, Pekara Indu enggau Pemansang Ruang Bilik, Datuk Fatimah Abdullah kena 23 March.

Entara speaker ke bisi dikangau mantaika keretas kereja, Presiden Gerempung Kebangsaan Indu Dagang Malaysia (NAWEM) Sarojini Ruth, Florice Christy (MAXCEL Institute Management Sarawak), Rodney Lim (chalun pHD sereta lecturer ba SUT), Prof Madya Dr Madeline Berma (Fakulti Ekonomi enggau Pengatur ti mega Direktor Palan Ketuai Indu, Universiti Kebangsaan Malaysia), Dr Peter Sheppard (CREDO Trust, Petaling Jaya enggau ejensi perintah bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.