» »Unlabelled » 150 ngulu program ASM Investment BorneoPost Online | Borneo , Malaysia, Sarawak Daily News » Berita Iban - New 2 Borneo

05:41:00

150 ngulu program ASM Investment BorneoPost Online | Borneo , Malaysia, Sarawak Daily News » Berita Iban - New 2 Borneo

150 ngulu program ASM Investment

Posted: 01 Dec 2013 02:06 PM PST

by Chris Bishop. Posted on December 2, 2013, Monday

Proram nya meri penerang sentang beranakka puku ba saham amanah

KUCHING: Program Hari Mesra Pelanggan ke diatur ASM Investment nengah kerejasama Parti Rakyat Sarawak (PRS) matak lebih 150 iku penyereta lalu meri penerang beguna senentang chara beranakka puku ba saham amanah.

Program sehari nya (kemari) dipenyadi Kaban Kunsil Tinggi (PRS) Dato Kristoffer Nyuak Bajok ti ngarika presiden Tan Sri James Masing.

"Program tu ukai semina muka runding raban penyereta senentang chara beranakka puku ba saham amanah tang mega meri awak ngagai sida ngelala chara ti tau dikena ba atur ngena belanja.

"Kitai patut beambika awak disedia, merambu belanja ngambika penatai pemisi seruran tegap jemah. Siti chara ke pemadu manah dikena kitai ngenegapka ikas pemisi iya nya ngangguh pengeran diri ti deka bebelika barang tauka perengka,"ku iya.

Reti nya, enti kitai enda bebasauka duit sehari tu, duit nya meh pengaya ti udah dikukun kitai ngambika tau dipelanja jemah, tandu iya.

Iya nambah, nengah saham amanah, rayat ke bepemisi mit enggau umbas iya pemesai ngembuan awak ngaul diri ba atur pengerembai ekonomi seraya teulihka penguntung ari makit saham.

"Sigi dikearap, puku ke diperanak tajapan mit, deka belelubah mulaika penguntung ngagai penyampau saham ke alai kitai mega dikelai nyadi pemegai syer mit ba kompeni ti didagang ba Bursa Malaysia,"ku iya.

Berindik enggau nya, Kristoffer madah mensia mayuh nyengkaum peranak ke diau di menua pesisir patut diajar ngambika landik merambu pengawa beranakka puku lalu penau senentang pekara nya patut mega ditambah.

Ku iya, konsep risiko enggau penyampau untung patut dikemerat ngambika mereti gaya saham ti kekadang nurun niki .

Program Hari Mesra Pelanggan kemari ke tebal agi digulu kaban PRS meri awak ngagai sida milih produk saham amanah ti disedia ASM Investment.

Bela datai CEO ASM Investment Ameer Ali Mohamed, Sekreteri Eksekutif PRS Edward Kurik enggau Sekretari Politik Kepala Menteri Angeline.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Jacqueline Gau, Kumang Krismas SPDP 2013

Posted: 01 Dec 2013 02:04 PM PST

MARUDI: Seiku indu dara, Jacqueline Gau ke beumur 16 taun ari Rumah Selat, sg Pasir, udah bulih gelar nyadi Kumang Krismas SPDP, beserimbai enggau pengerami Makai Lemai Mantar Krismas ke diatur Pampang Indu SPDP Marudi begulai enggau Bagi Telang Usan ba Dewan Suarah Baram, malam ensanus.

Pengerami nya udah dipenyadika Kaban Parlimen Baram, Anyi Ngau ngarika Menteri Kanan ke mega Menteri Pemansang Rama sereta Presiden SPDP, Tan Sri William Mawan Ikom.

Ivony Lawai, penakan Iban/ Kenyah udah teulihka lumur dua ditangkanka Sophia Tijan Philip bansa Kayan, lumur tiga.

Perais sindu ati diberi ngagai Patricia Welma Nelson Munan enggau Nur Safikah Zainal.

Seraban 10 iku pemekit udah berebutka gelar Kumang Mantar Krismas nya.

Kumang pekit nya nerima perais tropi, Selampai enggau mata duit RM500, lumur dua nerima perais tropi enggau mata duit RM400 lalu lumur tiga nerima perais tropi enggau mata duit RM300.

Pemekit ti bulih lumur empat enggau lumur lima nerima perais sinu ati mata duit Rm100 enggau tropi, lalu lima iku ke bukai nerima perais sinu ati mata duit RM50.00.

Perais nya udah disuaka Sekretari Politik Kepala Menteri Kansilor Kijan Toybee enggau Kaban Parlimen Baram, MP Anyi Ngau.

Pengerami Makai Lemai Mantar Krismas nya udah digulu urung 1,000 iku bala kaban enggau penyukung SPDP.

Sama bisi ngulu pengerami nya Sekretari Politik Kepala Menteri, Kijan Toybee, Chairman SPDP Pampang Marudi, Alexander Asing John Sadai, Chairlady SPDP Marudi ke mega Komiti Pengatur Pengerami, Theresa Gelang, Ketuai Nembiak SPDP, Robert Ayu , SAO Rose Edward Tarang, Ketuai Putera SPDP, Tonny Cheng enggau bala ketuai raban bansa ba kandang menua nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

St Paul’s Extention Center deka bisi rumah gerija baru

Posted: 01 Dec 2013 02:04 PM PST

KUCHING: Raban ke bepengarap Keristin ti besembiang ba St Paul's Extention Center, Bandar Baru Samariang deka berasai lantang agi enseput laban bisi rumah gerija ke manah agi endur besembiang enda lama agi.

Sebedau tu, sida seminang besembiang ba ringkat satu rumah kedai, kenyau ari taun 2004.

Sapit Menteri Pengawa Berumah, Datuk Wan Junaidi Tuanku Jaafar, kemari udah nyuaka belanja RM300,000 ngambika bisi dikena sida nirika rumah gerija.

"Palan endur nirikaka rumah gerija ti beungkus RM500,000, udah dikemendarka. Aku arapka gerija nya ulih didirika enggau lengkas, tambah mega aku deka ngiga jalai dikena nambahka belanja ke udah bisi nya," pia ku iya bejaku ba pengerami nyuaka chek nya kemari.

Ku iya, aum deka nirika rumah gerija nya udah dikerandau dalam kandang dua taun ke udah, taja pia ngelama tu ukai semina nganti pemendar ari perintah menua tang mega perintah besai.

Perintah menua ngemendarka tanah lalu perintah besai deka ngemansutka belanja.

Kelimpah ari nya, pengawa ngaga rumah gerija nya mega begunaka pemendar ari gerija besai Anglikan.

Ku iya baru, gerija Anglikan udah ngemeratka pekara nya laban urung 600 iku bansa Iban ba kandang menua tu endang ari gerija Anglikan.

Dulu ari nya, chairperson palan besembiang nya Engachok Siong arapka pengawa ngaga rumah gerija nya ulih berengkah dipejalaika dalam bulan Januari sereta dipelabaka tembu dalam kandang 10 bulan udah nya.

Gerija nya digaga ba Fasa 2 Bandar Baru Semariang sereta muat 350 iku orang.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Perintah Nengeri diansak nambahka penyampau penerebai bilun

Posted: 01 Dec 2013 02:02 PM PST

KUCHING: Perintah Nengeri patut nambah mayuh agi penerebai bilun terus ngagai menua luar enti deka besemekih enggau Sabah dalam atur matak orang dagang temuai ari luar datai nyerumba Taun Nemuai Malaysia 2014.

Ketegal nya, Sapit Menteri Pengeraja Asal enggau Rampa Menua Datuk Sri James Dawos Mamit ngarap perintah nengeri ransing agi ngatur randau enggau Opis Menteri Pengangkut ngambika juluk nya dikemujur.

"Enti dibandingka Sarawak enggau Sabah ba pekara matak temuai luar, enda mayuh bida tang semina Sarawak kurang ba atur penerebai bilun.

"Ba taun ke udah, Sarawak ngerikut lebih empat juta temuai datai ke alai dua juta datai ari Semenanjung lalu laluh ari Brunei enggau Singapura.

"Tang di Sabah jauh manah, nengeri nya udah matak lebih lapan juta temuai lalu nya ditempa ketegal bisi penerebai bilun terus ke China, Shanghai, Hong Kong, Jepun enggau Taiwan,"ku iya.

Dawos ke kala mangku pengawa nyadi Sapit Menteri Dagang Temuai mansutka penerang nya ba siti aum pengarang berita nyerumba Program Strategi Lautan Biru Kebangsaan (NBOS): 1Malaysia Voluntourism di Homestay Kampung Annah Rais, Jalai Puncak Borneo ditu, kemari.

Dulu agi ari nya, Kaban Parlimen Mambong nya nyadang Sarawak deka matak mayuh agi temuai nyerumba Taun Nemuai Malaysia 2014.

Ku iya, Sarawak ngembuan pengelebih ari pekara main asal enggau pemaik rampa menua.

"Raban orang ke ngaul diri ba industri dagang temuai nyengkaum industri Nyemilik patut udah nyikap diri napi penatai temuai ari menua luar ba taun ke deka datai,"ku iya.

Program NBOS: 1Malaysia Voluntourism di Homestay Kampung Annah Rais nyadi sebengkah pengawa ke diatur Opis Menteri Dagang Temuai enggau Main Asal Malaysia, Sarawak enggau tuju matak mayuh agi temuai datai ngagai nengeri tu.

Program digulu 120 pelajar menua tu enggau 29 nembiak menua bukai ari Unimas, 35 nembiak ari UiTM enggau 43 nembiak ari Kolej Komuniti.

Bela datai Direktor Opis Menteri Dagang Temuai enggau Main Asal Malaysia, Sarawak, Suriya Charles Buas.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

SWP ukai parti kami sebilik: Larry

Posted: 01 Dec 2013 02:01 PM PST

KUCHING: Parti Pekerja Sarawak (SWP) maduka Wilfred Landong mangku pengawa nyadi tukang wang, udah bekau Jessie Sng ngelengka pangku pengawa nya.

Presiden SWP Larry Sng madahka, menyadi iya ( Jessie Sng ) ngelengka pangku pengawa dikena nyeliahka penemu ti madahka parti nya dikuasa sida sebilik magang.

"Wilfred Landong dipilih nganti Jessie Sng, kami nguji ngurangka penyampau kami diri sebilik dalam parti tu.

"Kami enggai dipeda nyadi sebuah parti ke dikuasa sebuah ruang bilik aja, nya alai Jessie udah ngelengkaka pangku pengawa nya," ku iya lebuh ke dikerandau pengarang berita sepengudah bechairmanka aum ba indu opis SWP ba Jalai Tun Jugah ditu ensanus.

Wilfred Landong sebedau tu ex- ketuai warden Sarawak Forestry Corporation sereta ex- chalun parti nya ba sitak Sri Aman maya Pengawa Bepilih Besai ke diatur kena bulan Mei taun tu tadi.

Parti nya mega maduka Patricia Ng nyadi kaban komiti kunsil besai parti nya lalu Zachery Ng diatu dichiri nyadi sekretari eksekutif parti nya.

Larry mega madahka parti nya deka ngerembaika besai agi sayap di Sarawak nengah chara numbuhka sekeda pampang ba sekeda kandang menua, taun baru.

Ku iya, pampang ke pemadu baru udah dibuka ba Padungan sereta deka dipenyadika kena 10 Januari taun baru.

Pampang nya deka betuaika Sekreteri Besai parti, Dr Ong Lak Sai.

"Kami mega melaba deka numbuhka pampang baru ba Dudong, Maradong enggau Bukit Begunan taun baru," ku iya.

Naka ke diatu SWP, udah bisi pampang ba Pelagus, Julau, Kanowit, Ulu Rajang, Lubok Antu, Sri Aman enggau Selangau Kebuh ke ngenang sentang batang aum sida nya, Larry madahka parti nya udah numbuhka komiti pengawa bepilih ti diarika lima iku kaban nyengkaum iya empu.

"Chalun raban komiti deka ditentuka sereta nyadi pengari kami maya pengawa bepilih kunsil nengeri tu ila," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Padum mujur direjister ROS, 18 Nov

Posted: 01 Dec 2013 02:00 PM PST

Genap iku kaban gerempung aruh chakah mantu raban bansa: Uggah  KUCHING: Raban Dayak Graduet Universiti Malaysia udah numbuhka sebuah gerempung ke dikumbai Gerempung Alumni Dayak Universiti Malaya tauka Padum, ke udah mujur direjister ba Opis Pengerejister Gerempung (ROS) kena 18 November tu tadi.

Gerempung nya betuaika protem chairman Cooplay Nyipa Aji, lalu Menteri Kebun Bedandang Besai enggau Komoditi, Dato Amar Douglas Uggah Embas nyadi patron.

Kena malam Hari Enam tu tadi, urung 200 iku bala ke udah graduet ari Universiti Malaya nyengkaum Uggah, Chairman Gerempung Pesaka Bung Bratak (BBHA) Datuk Peter Minos enggau Sekreteri Mendam Opis Menteri Pemansang Tanah, Datu Jaul Samion bisi ngulu pengerami makai lemai sereta bejadika gerempung nya ba sebuah hotel ditu.

Ku Uggah, ngerejister gerempung ba ROS nya mudah, tang bejalaika gerempung nya nengah chara ke ngasi ngambi tejapaika juluk, pekara ke pemadu mar.

Iya meransang semua raban Dayak ke graduet ari UM nyukung gerempung, nengah chara nyadi kaban gerempung sereta chakah nyaup gerempung nya.

"Gerempung mega patut ngembuan tusun atur pengawa ti tau nyadika lalau sentang chara nyaup raban bansa.

"Kitai ditu bisi raban profesyenal ke graduet ari UM ba mayuh bengkah sektor enggau gerempung ke ulih ngiga chara ke pemadu manah dikena mantu gerempung kitai,"ku iya.

Ku Uggah, nengah gerempung mega bala kaban gerempung ulih ngemanah sereta ngenegapka kaul enggau pangan diri. Sesapa ke udah mujur ba pengawa ke dikereja sida, patut mantu orang bukai ke mengkang kekusil ngulihka pemujur.

Iya mega meransang Padum nempa pemanah kaul enggau Alumni Nasional Universiti Malaya, ari sukut 'strategic partnership' kelebih agi ngagai sida ke gawa sereta bejalaika pengawa dagang di menua tasik.

Berebak enggau nya, Cooplay madahka bisi lebih 200 raban Dayak ke udah graduet ari Universiti Malaya di menua tu. Iya mega madahka sida deka majak nambahka kaban gerempung nya.

Raban komiti mega deka baum ngerintai aktiviti ke pemadu manah dikena nyaup komuniti, ku iya.

Beserimbai enggau pengerami nya, Uggah nyuaka chek RM10,000 ngagai Padum ngambika bisi dikena sida bejalaika pengawa lalu deka ngungkupka belanja RM30,000 agi taun baru.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.