» »Unlabelled » Riot tegap ngembuan penemu tengah hari BorneoPost Online | Borneo , Malaysia, Sarawak Daily News » Berita Iban - New 2 Borneo

05:28:00

Riot tegap ngembuan penemu tengah hari BorneoPost Online | Borneo , Malaysia, Sarawak Daily News » Berita Iban - New 2 Borneo

Riot tegap ngembuan penemu tengah hari

Posted: 15 Dec 2013 08:55 AM PST

Iya nadai bepiak ngagai sesapa taja pan parti nya meruan ditepan penyarut

KUCHING: Sapit Presiden Parti Sa'ati Rayat Sarawak (SUPP) Dato Sri Richard Riot Jaem mengkang enggau runding enda bepiak ke sesapa ba penyarut ti nuntung parti nya.

"Baka ke runding aku ngelamatu, aku enda miak ngagai sesapa lalu deka mengkang baka tu. Aku enda madah aku ngarika piak president Tan Sri Peter Chin tauka piak Dato Sri Wong Soon Koh. Aku enda ngembuan sebarang laya enggau Wong lalu iya pan pia mega.

"Aku ngarap kededua piak ulih bebaik jemah.

"Baka ke suah aku enggai bejaku senentang pekara tu…tu meh keterubah iya aku nyaut tanya senentang SUPP," ku iya nyaut tanya pemberita pengudah bejadi Hari Terbuka Kuching Bidayuh Cooperative (Kobib) kemari.

Riot ke mega Menteri Pengereja Pengawa madah pekara ti dikemerat iya diatu iya nya bejalaika tanggung pengawa nyadi menteri penuh.

"Pekara ti dikemerat iya nya ngemujurka semua pengawa nyadi menteri penuh lalu enda ngelebu Menteri Besai.

"Nyadi sapit presiden SUPP, aku enggai meda parti dikinsil Opis Pengerijister Gerempung (ROS) lalu ngarapka gerempung nya netapka pemutus enggau lengkas.

"Sebarang aja pemutus patut dipebasa, aku ngelempai pekara nya ngagai ROS diatu," ku iya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Stell begulai enggau Kelab Lumba SEB mai pengaga Hari Krismas ke Metalun

Posted: 15 Dec 2013 08:55 AM PST

KUCHING: Kelab Lumba SEB ke diketuaika Penyanding Penemu Khas Kaul Komuniti Stell Sindau bisi ngelawa palan pengentap pendiau Murum di Metalun, bedau lama ke udah.

Pejalai sida mega disempulang Sekretari Kelab Lumba SEB Elizabeth Lee.

Raban nya bisi datai di Murum ngambika mai pengaga Krismas ngagai raban bansa Penan di genturung pendiau ke kena bungkur Projek Hidroelektrik (HEP) Murum.

Bisi 11 buah 4WD penuh mai pemakai bekejang ngagai Murum urung pukul 9 pagi lalu samapai din kira pukul 5 lemai nya.

Nundaku  Stell, iya gagit bendar meda pengagit ke diayan ba mua raban ke mansang kin.

"Aku gagit bendar ati meda raban kami ke bebendar dalam nyendiaka utai dipeguna dikena ngemujurka aktiviti nyerumbai Hari Krismas tu," ku iya.

Berebak enggau nya, ku Elizabeth, kelab nya ukai semina meransang bala raban ngamalka pengidup bepengerai nengah lumba enggau main, tang mega malut diri dalam pengawa pengasih.

"Kami deka mai pengagit ngintu pengerami sama-sama enggau bansa Penan di Murum kelebih agi sida ke mangkng palan pengentap pendiau," ku iya.

Kelimpah nya, kelab mega bisi ngatur barbekiu di Metalun kelimpah masang lagu-lagu Krismas ngambika nambahka pengerindu sereta pengagit ati nyambut hari besai nya.

Raban bansa Penan ke dikerami terang bendar ngayanka pengaga lebih agi sida ke nembiak ke diampit perais enggau pemeri bukai. SEB arap bendar nengah pengawa ke diatur baka tu, raban bansa dia deka nelebaka pendiau diri jampat agi diau di kandang endur pengentap baru Murum.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Enda ngeleda udah bekau bebadi ngena mutosikal

Posted: 15 Dec 2013 08:55 AM PST

KUCHING: Seiku nembiak lelaki ke beumur 12 taun enda ngeleda setegalka bedarah dalam untak udah bekau labuh ari motosikal ke ditepan iya lemai ensanus semak Sungai Maong ditu.

Nembiak lelaki nya nepan mutosikal enggau aya iya umur 20 taun urung pukul 7.00 malam.

Lebuh penyadi nya seduai dalam pejalai ngagai kedai leban deka meli CD game.

Tang enda memukai seduai dilantak sebuah kerita ke benung surut pansut ari tempat paking dia.

Ku aya iya, lepas nya, anak buah nya madahka nadai nenama lalu seduai pulai di Taman Genesis di Matang ngena mutosikal nya.

Datai di rumah tudah madahka deka ngenatka diri lalu terus tinduk ba peninduk iya.

Beberapa jam udah nya seiku ari sida sebilik bisi nyenguk lalu tetemuka tudah pedis nyintak seput.

Iya ditemu enda ngeleda ke alai sida lalu bekangauka ambulans ke mai iya ngagai Sepital Besai Sarawak (HUS) ngambika diperubat.

Asil ari buntas tasat nya tetemuka untak iya bedarah setegal bebadi nya.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Penumbuh kaunsil sosialis nembiak DAP dikearap ulih ngerembai juluk ke pesisir

Posted: 15 Dec 2013 08:54 AM PST

KUCHING: Parti Tindakan Demokratik (DAP) kemari mantaika rintai eksekutif Nembiak Sosialis DAP Nengeri bagi Renggat 2013 ngagai 2016 ke bechairmanka Wong King Wei.

Ba aum media di Indu Opis  DAP ditu kemari, Wong madah, kaunsil sosialis nembiak ditumbuhka dua bulan lepas ngambika nyaup ngerembaika sukung rayat di serata nengeri. Kena ngepun, kaunsil eksekutif nya ari nembiak umur 35 taun ke baruh tu merambu deka nyungkak pengelandik kaban sida kelimpah ari nyendiaka saup orang ke bekereja dikena bejalaika pengawa di luar bandar.

"Tuju kaunsil tu ditumbuhka nya dikena ngerembai politik DAP ngagai rayat di menua pesisir enggau nebing bandar.

"Majlis tu bejalaika pengawa bepelasarka lima batang pekara lalu sekeda nya penyerakup, negapka kaban nyadi tulang belakang parti lalu nempa penyedar ngagai juang parti," ku iya.

Bisi datai ba aum media, Sapit Chairman Alan Ling Sie Kiong, Sekretari Ung Cheng Chak enggau kaban komiti Julian Tan Kok Ping.

Tambah Wong ke mega ADUN Padungan, pengawa numbuhka kaulsil tu dikearapka ulih nempa DAP nyadi sebuah parti ke pengambis kering di Sarawak.

Dalam kerembai bukai, Wong madahka pengirau ati iya ba rega rumah di nengeri tu ke makin niki ukai semina maya ke diatu tang nyengkaum taun-taun ke deka datai ila.

Peniki rega rumah ke majak tinggi ku iya ngasuh rayat kelebih agi rebak baru enda tebelika rumah laban rega kelalu mar.

"Nundaku riput dalam  Focus Malaysia, penulis nyebut pengirau ba peniki rega rumah-rumah di Sarawak.

"Aku setuju enggau penulis nya peniki tu ngasuh rayat kelebih agi rebak baru enda tebelika rumah diri empu.

"Berindik ari tu aku ngansak perintah nurunka rega rumah nengah kerejasama enggau piak pemaju lalu bekiraka pemerat ba rayat kitai," ku iya.

Ku Wong nampung baru perintah aruh ngaga polisi betatika pemerat empas iya ba rayat ukai nguntungka bala kroni-kroni iya ke bulih penguntung ari projek-projek pemansang.

Ketegal polisi perintah ke bepiak ngagai bala kroni iya nya, rayat Sarawak enggai enda mih nanggung rega ke udu tinggi enti dibanding enggau penatai belanja ke diterima.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Lab ekonomi diperambu ungkup peranak Saribas

Posted: 15 Dec 2013 08:51 AM PST

KUCHING: Peranak Sari­bas disadang nempa mayuh agi pemujur enggau penge­lantang manggai ba taun 2020 pengudah sebengkah Lab diperambu dipun ba bulan January 2014.

Dituku Menteri Bekebun Bedandang Besai enggau Ko­moditi Datuk Amar Douglas Uggah Embas sereta disukung Sapit Kepala Menteri Datuk Patinggi Tan Sri Alfred Jabu, Lab nya deka matak orang ke landik ba pekara beranakka puku enggau ekonomi ngam­bika ulih nyapai juluk.

"Langgur penemu Uggah ti deka numbuhka Lab siti perambu ti chukup manah sereta deka nentuka kitai ulih napi pemar jemah ila.

"Kitai deka berandau be­gulai enggau orang ke landik ba pekara ekonomi sereta beranakka puku lalu netapka jalai ti patut dikena ngambika bala kitai di Saribas ulih majak mansang," ku Jabu.

Iya mansutka jaku tu ba pengerami Makai Lemai Malam Gempuru 2013 ke mega nyerumba pengawa ngintu 20 taun penumbuh The Saribas Sosial and Rec­reational Club (SSCR) di sebuah hotel tebilang ditu, malam ensanus.

Jabu ke mega Menteri Pe­mansang Menua Pesisir eng­gau ADUN Layar madahka Lab nya patut berengkah ba pun taun 2014.

Ku iya, nengah ajar sereta embing orang ke landik ba pengawa ekonomi enggau beranakka puku, duit tauka aset RM400 ribu ke dikem­buan kelab diatu ulih diper­anak ba Koperasi Beserakup Saribas.

"Aku nyadang, manggai ba taun 2020 koperasi kitai ulih ngempuru enda kurang ari RM1 juta ba taun 2020. Engka RM4 ngagai RM 5 juta ulih digempuru kitai.

"Anang takut, kitai deka minta embing orang ke landik ba pengawa beranakka puku,"ku iya.

Ngenang senentang pekara ke sama, Uggah ke mega Kaban Parlimen Betong madah Lab nya deka nen­tuka peranak Saribas nempa mayuh agi pemujur sereta pengelantang jemah.

Seraya netapka seduai Jabu deka melanja Lab nya, strategi deka ditusun enggau manah ngambika juluk dijapai.

"Lab tu deka nentuka kitai peranak Saribas majak mansang ba pekara ekonomi lalu enda ngining orang bukai jemah,'ku iya.

Uggah mega ngansak per­anak Saribas ngambika se­ruran ngaul diri ba program ke deka sereta benung diatur perintah.

Ku iya, sepenyampau RM500 deka dipelanja opis menteri ke dikuasa iya ba taun 2014 ungkup pengawa pemansang bekebun lada, getah, sawit, koko enggau ke bukai.

"Tiap iku kitai ke ngem­buan tanah (NCR) patut nganjung pom pinta ngagai ijinsi ke bekaul ngambika bela diserangkum dalam program pemansang bekebun tu.

"Program tu deka nen­tuka kitai teulihka pemaik sereta mantu ngangkatka ikas ekonomi ruang bilik diri,"ku iya.

Lebih 1,000 iku peranak Saribas datai ngulu pengerami Makai Lemai Malam Gem­puru SSCR 2013 ti nungkatka rambai jaku 'Maju Mansang Ngena Pelajar'.

Jabu mega bisi nyuaka insentif ngagai nembiak per­anak Saribas ke nyulut dalam pelajar.

Ba pengerami nya, Jabu enggau Uggah ngagihka RM20 ribu enggau RM30 ribu ngagai The Saribas So­sial and Recreational Club ke alai Menteri Muda Pengintu Pengelantang ke mega Adun Bukit Saban Robert Law­son Chuat ti bisi datai meri RM8,000.

Bela datai Dato Sri Em­piang Jabu, Chairman SSCR Andrew Bangkang, ADUN Engkilili Johnicol Rayong, MP Lubok Antu William Nyalau Badak sereta orang bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.

Ulah bebatak asur ba jalai pengarap penyanding penyerakup: Mawan

Posted: 15 Dec 2013 08:50 AM PST

PAKAN: Ulah ke bebatak asur dalam jalai pengarap ba pupu raban bansa nyadika penyanding penyerakup pupu raban bansa di menua tu.

Menteri Pemansang Rama Tan Sri William Mawan Ikom madah ulah ke ganas ba politik patut diseliah ngambika enda ngenyaika menua Malaysia.

Ku iya, politik ke baka nya nadai mai pemaik tang menua ti ngemeranka politik nya deka pambar.

"Kitai ke nyadi peranak menua tu patut megai tanggungpengawa nyeliahka pekara nya ngambika enda nyadi di menua Malaysia tu.

"Anang mudah tekuing runding enggau ulah sekeda orang ti nguji mgemunaska pengelikun ti udah diasaika kitai ari kelia nyentuk ke diatu," ku iya lebuh bejadika Pengerami Mantar Krismas di Pakan, malam kemari.

Teks jaku iya dibacha Sekretari Politik Kepala Menteri, Paul Igai.

Ku Mawan, rakyat patut beterima kasih enggau pengelantang diasaika diatu baka ari segi ekonomi, pengawa rama, politik enggau ke bukai.

"Kitai sama bela enggau ngintu pengerami ke dintu pupu raban bansa bukai ke nguan menua tu enggau likun.

"Pengerami nya diintu enggau ati ke gaga ti ngelaika penegap penyerakup di menua Malaysia ," ku Mawan.

Ku iya,pengelantang ke baka nya patut ditan sereta diketegapka semua nengah chara nyeliahka bida ari segi jalai pengarap enggau bansa.

"Kitai mega patut ngawakka runding sereta nyeliahka semua ulah ke jai baka dengki, kepapas ati enggau ulah bukai ke enda manah.

"Semua ulah ke manah ukai semina patut dikereja kitai maya ke bisi pengerami aja, tang mega patut dikemeranka belama ba pengidup kitai ," ku iya.

Sama bisi ngulu pengerami nya, Residen Pelilih Sarikei Michael Dawi Alli, DO Pakan Inting Nyami, Pemesai Penguasa Opis Pemansang Rama Sarikei Munir Din, SAO Pakan Yalin Asan enggau bala ketuai raban bansa ke bukai.

Print Friendly

To enable your comment to be published, please refrain from vulgar language, insidious, seditious or slanderous remarks. This includes vulgar user names.